﻿Ngeera.
24.
Otalikwatirwa i̱hali̱ nkori̱ za bibii, kadi habbe kubanywana, 
hab̯wakubba beicala nibatab̯ukatab̯uka, kubaza kwab̯u kuhutaaza bandi. 
Maka gakorwa magezi̱, kwetegereza ni̱ku̱gemereeryaho. 
Mu kukenga bi̱si̱i̱ka bya nnyu̱mba bizula na bikwatu bya mugasu bya muhendu kandi birungi. 
Muntu mu̱gezi̱ akira wamaani, mwetegerezi̱ yeyongera kubba munyamaani, 
hab̯wakubba kulwana b̯ulemu ki̱si̱gi̱ki̱ra ha ntegeka za magezi̱, ku̱b̯u̱si̱nga, bakub̯uhanulira balinakubba banene. 
Bigambu bya muntu mu̱gezi̱ tibigasira mudoma, talinakyabaza hali bakuhanuura byamugasu. 
Yensei̱ eicala naatekereza kukora bibiibi, bamweta mu̱gezi̱gezi̱. 
Kuhab̯urwa kwa mudoma kibba kibii, na mu̱gayi̱ abba muziro hali bantu. 
Kabii b̯u̱kei̱za ni̱kakaku̱su̱lu̱ngani̱a, mananu kwo obba muceke. 
Waacunguranga bantu bakutwalwa kwi̱twa, waajuniranga bakweti̱ gukubagoromora. 
Osobora kukoba, “Ntakakyege!” Bei̱tu̱ yogwo asengeeja biteekerezu yeega bili mu mutima. Yogwo akulinda akyegi̱ri̱, alikusasula naasi̱gi̱ki̱ra ha milimo mi̱wakoori̱. 
Mwana wange, dyanga b̯uhooki b̯ubba b̯urungi, manyondo gaab̯wo ganolira ki̱mwei̱. 
Okyege nti, magezi̱ nka b̯uhooki ganolira mutima gwamu, kakubba ogaagya olibba kurungi, naku̱ni̱hi̱ra kwamu tikulimalika. 
Otabba mubiibi aramagira murungi, weehalenge ku̱ru̱mba nnyu̱mba gyamwe, 
kubba nab̯wagwa mirundi musanju asigala naabyoka, bei̱tu̱ babiibi nibaswaswanika nibamaliraho ki̱mwei̱. 
Oteeb̯uganga munyanzigwa waamu yaakagweb̯wangaho kabii, otamu̱sekereeryanga b̯uyaakagwanga hansi. 
Kubba wolibikora, Mukama alikuzingalira, naalekaho kumufubira. 
Otatuntuliranga bantu babiibi, habbe kukwatirwa i̱hali̱ nkori̱ za bibii, 
kubba mubiibi talitunga birungi, ali̱lu̱ma b̯u̱lu̱mi̱ nka taara. 
Mwana wange, ti̱i̱nanga Mukama na mu̱lemi̱, kandi otadi̱danga na bantu bajeemu̱. 
Babiri bab̯wo basobora kubahwerekereerya hahwo b̯uloho b̯uloho haloho yeegi̱ri̱ b̯ujune b̯ulileetwa bab̯wo babiri? 
Bibi nabyo bili bigambu bya magezi̱. Muze gwa kusemba rubaju lu̱mwi̱ tigubba gurungi. 
Aweera mubiibi nti, “Toli na musangu,” bantu balimukyena kandi balimunoba. 
Baramu̱ri̱ bafubira nkori̱ za bibii, baliheeb̯wa mu̱gi̱sa. 
Akuweera mananu, abba akwolokeeye mukagu gwa biribiri. 
Banza otegeke misiri omisimbe, kasi obi̱mbe nnyu̱mba. 
Otarumirizanga mu̱taahi̱ atali na nsonga, otabazanga b̯u̱gobya. 
Otakobanga nti, “Kyankoori̱ nagya ndikimukora, ndikimusasula ki̱i̱yankoori̱.” 
Nyaarabi̱ri̱ mu ndimiro gya mugarei, mu musiri gwa mi̱zabbi̱bbu̱ gwa ntwarwa. 
Gwali gwi̱zwi̱ri̱ mahwa, gu̱ju̱mbi̱ri̱ neirungu, na lugo lwagwo lwa mahi̱ga lu̱gwi̱ri̱. 
Nyagu̱li̱ngi̱ri̱i̱ri̱, nyeega b̯utakoba, 
“Kandaaleho kadooli̱, kandindeho kadooli̱, kammpu̱u̱mu̱u̱lyeho mikono kadooli̱.” 
Mwomwo nnaku zi̱li̱kwi̱zi̱ra nka mwi̱bi̱, ni̱zi̱ku̱ru̱mba nka mutemu. 
