﻿Ngeera.
23.
B̯wolibbanga oi̱cali̱i̱ri̱ kudya na mu̱lemi̱, weekengerenge byaku̱segereerye. 
Waabba nooli waamururu weefugenge. 
Otalitubira bidyo byaku̱ti̱mbi̱i̱ri̱, tiweega gwakubba mutegu. 
Mu̱leke kwejwahya naaku̱toolya itungu, mu̱bbe na magezi̱ mwemige. 
Obba noocakalitaho li̱i̱so ni̱li̱syera nka rundi si li̱meeri̱ bimpaha lyadu̱ndu̱u̱ka mu mwanya nka wambooli̱. 
Otadyanga bidyo bya mupu, habbe kwegomba bi̱nolu̱ byamwe, 
hab̯wakubba eicala nabaliira muhendu gu̱yabi̱gu̱u̱ri̱, akuweera, “Dya kandi onywe,” bei̱tu̱ ataku̱ki̱manyi̱sya. 
Okwi̱za kubitunaka bi̱waadi̱i̱ri̱, na bigambu byakwenolereerya byolibba obazi̱ri̱ bilibba byab̯usa. 
Otali̱bazi̱ri̱ryanga mudoma, kubba byamagezi̱ byomuweera akwi̱za kubigaya. 
Otali̱segu̱li̱i̱rya nsaru gya kadei na kadei otalyezi̱ri̱i̱rya itehe lya nfu̱u̱zi̱. 
Hab̯wakubba mu̱bacu̱ngu̱ri̱ wamaani, akwi̱za kubalwaniira, atongane nanywe. 
Taho mutima gwamu ha kuhondera kulambwa, naakuteganga mapokopo kwegwa bigambu bya kwetegereza. 
Otalyehu̱u̱kya kuhab̯ura mwana waamu, kumukuuta na kajunju tikisobora ku̱mwi̱ta. 
Hab̯wakubba kumufubira ki̱i̱za kumujuna lu̱ku̱u̱. 
Mwana wanga, wolikabba na magezi̱ nagya ndisemererwa. 
B̯u̱ndikwegwa nookubaza bigambu bya magezi̱, ndyesi̱i̱ma mu mutima gwange. 
Otakwatirwa itima babiibi, gyenda mu mei̱so naakutamwo Mukama ki̱ti̱i̱ni̱sa. 
Hab̯wakubba olitungiramwo mpeera, kyaku̱ni̱hi̱ra kwamu kiliiza. 
Mwana wange, weetegeerya kandi obbe wa magezi̱, taho mutima kukora birungi. 
Weehalanga ku̱di̱da na batami̱i̱ru̱, rundi batubira nyama, 
hab̯wakubba mu̱tami̱i̱ru̱ na mu̱tu̱u̱b̯u̱ bakwi̱za kuseega, nibadwa ha kulwala nsensende. 
Weegwanga bbaawu, munyakukubyala, ogonderenge maawu nab̯wali̱gu̱lu̱u̱sa. 
Mananu, magezi̱, ngesu na kwetegereza bya mugasu kubitunga, otalibifeerwa. 
Mudulu wa mwana murungi alisemererwa, munyakubyala mwana mu̱gezi̱ yeesi̱i̱me. 
Bbaawu na mmaawu beesi̱i̱me, mu̱kali̱ yogwo munyakukubyala asemererwenge. 
Mwana wange taho mutima gwamu ha bigambu byange, ohondere ngesu zange. 
Mu̱kali̱ mu̱b̯u̱ngi̱ kandi mwenzi̱, eisana b̯u̱hya. 
Atega badulu nka banyagi̱, nabongera b̯utabba beesigwa. 
Banaani beicala nibazongoba? Mpaka zikuutwa banaani? Bihote bili na banaani? Kulwanagana kuli na naani? Mpaka zili na naani? Bihote bitakuhona bili na naani? Mei̱so gengu̱ gali na naani? 
Boobo bab̯wo beicaara ha maaci batakurugaho, nibanywa gaga na gadi̱. 
Maaci na rangi̱ zaago gatakwohyanga, gatakusikirizanga namu giraasi oganywe. 
Hei̱nyu̱ma gukuluma nka mpiri, nigakutematema nka b̯umala b̯wa hu̱lu̱hu̱ndu̱. 
Mei̱so gaamu galiwona masana, mutima gwamu nigutekereza kiki na ki̱di̱. 
Olyezegwa nkoleeri̱ hakati̱ weitaka, nka nkwokusulebera mu b̯wati̱ b̯ukukuutwa kihehu. 
Olikoba yati, “Banku̱u̱ti̱ri̱, b̯u̱ku̱u̱ti̱, bei̱tu̱ tindina hampu̱teeri̱, banti̱ndagi̱ri̱ b̯u̱ti̱ndagi̱ ntakwega!” B̯wi̱re b̯wakya di̱i̱? Ndinakutungayo maaci gandi. 
