﻿Zabbu̱li̱.
20.
Hali mu̱handu̱ wa bahi̱i̱mi̱. Zabbu̱li̱ gya Dau̱di̱. Mukama yei̱rangamwo kusaba kwamu mu biro bya b̯ujune! Ibara lya Ruhanga wa Yakobbo likulindenge! 
Yaakutumiranga kujunwa kuruga mu kiikaru kyamwe ki̱syanu̱ na b̯u̱sagi̱ki̱ kuruga Sayu̱u̱ni̱. 
Yei̱zu̱kanga bisembu byamu byensei̱ byomuhongera kandi yeikirizanga byonzira byamu byokye. 
Yaakuhanga bya mutima gwamu gu̱byendya naakuteeraho ku̱si̱ngu̱ra mu ntegeka zaamu zensei̱. 
B̯u̱wakasi̱ngu̱ranga twasemererwanga nitubyokya bbendera zikuhaariiza ibara lya Ruhanga weetu̱. Mukama yei̱rangamwo kusaba kwamu kwensei̱. 
Hataati̱ nkyegi̱ri̱ nti Mukama ajuna mutongoole waamwe, ei̱ramwo kusaba kwamwe na mwiguru lyamwe li̱syanu̱, naamujuna na mukono gwamwe gwab̯udyo gwa maani. 
Bamwei̱ beesiga ku̱lwani̱sya bigaali na bandi beesiga mbaraasi, bei̱tu̱ twe twesiga ibara lya Mukama Ruhanga weetu̱. 
Baagwanga nibahwerekeera, bei̱tu̱ twe twasi̱ngu̱ranga nitwemeera nituli beesi̱mbu̱. 
Ai̱ Mukama, ikiriza mukama asi̱nge! B̯utwakakusabanga otwi̱rengemwo. 
