﻿Англунимос.
11.
Пай ся люма сас екх шыб тай екх дума. 
Кала э мануша жанас каринг о востоко, вонэ вижылэ пэ мал андо Шынари и ашылепэ тэ жувэн котэ. 
Вонэ пхэндэ екх екхэсти: — Стерам бара анда чик и випхабарам лэн мишто. Э бара анда чик сас лэндэ пала бара, ай э смола сас, сар састимос важ э бара. 
Тунче вонэ пхэндэ: — Стерам амэнди форо башняса жы каринг о нэбо. Кадя амэ ашараса пэстеро алав. Ай сар на тераса када, росжасапэ па ся пхув. 
О РАЙ сжыля тэ дикхэл о форо тай э башня, савэ терэнас э шавэ манушэндерэ. 
И пхэндя о РАЙ: — Саворэ мануша — екх народо, дэн дума пэ екх шыб. Акэ акада качи майанглуно лэндеро рындо. Акана, со б вонэ на закамле, вонэ са терэна. 
Авам жэ и сгамисараса лэнди э шыба, соп вонэ тэ на полэн екх екхэс. 
И о РАЙ розасадя лэн пай ся муй ла пхуяко, и вонэ парашылэ тэ терэн кодыва форо. 
Акэ состар кадва форо сас акхардо Вавилоно — котэ о РАЙ сгамисардя э шыба савора люмати, и котар о РАЙ розашардя лэн па ся муй ла пхуяко. 
Акэ э дума пала Симо тай лэстерэ потомкуря. Лэ Симости сас шэл бэрша, кала лэстэ аракхадиля о Арпахшадо. Сар сас о потопо, прожылэ дуй бэрша. 
Тунче, кала аракхадиля о Арпахшадо, о Симо жудя 500 бэрша, и лэстэ сас инке шавэ и щея. 
Кала о Арпахшадо прожудя 35 бэрша, лэстэ аракхадиля о Шэлахо. 
Тунче, кала аракхадиля о Шэлахо, о Арпахшадо жудя 403 бэрша, и лэстэ инке сас шавэ и щея. 
Кала о Шэлахо прожудя 30 бэрша, лэстэ аракхадиля о Еверо. 
Тунче, кала аракхадиля о Еверо, о Шэлахо жудя 403 бэрша, и лэстэ инке сас шавэ и шея. 
Кала о Еверо прожудя 34 бэрша, лэстэ аракхадиля о Пелего. 
Тунче, кала аракхадиля о Пелего, о Еверо жудя 430 бэрша, и лэстэ сас инке шавэ и шея. 
Кала о Пелего прожудя 30 бэрша, лэстэ аракхадиля о Реуо. 
Тунче, кала аракхадиля о Реуо, о Пелего жудя 209 бэрша, и лэстэ сас инке шавэ и шея. 
Кала о Реуо прожудя 32 бэрша, лэстэ аракхадиля о Серуго. 
Тунче, кала аракхадиля о Серуго, о Реуо жудя 207 бэрша, и лэстэ сас инке шавэ и щея. 
Кала о Серуго прожудя 30 бэрша, лэстэ аракхадиля о Нахоро. 
Тунче, кала аракхадиля о Нахоро, о Серуго жудя 200 бэрша, и лэстэ сас инке шавэ и щея. 
Кала о Нахоро прожудя 29 бэрша, лэстэ аракхадиля о Терахо. 
Тунче, кала аракхадиля о Терахо, о Нахоро жудя 119 бэрша, и лэстэ сас инке шавэ и щея. 
Кала о Терахо прожудя 70 бэрша, лэстэ аракхадиля о Аврамо, о Нахоро тай о Арано. 
Акэ э дума пала Терахо тай лэстерэ потомкуря. Кай о Терахо аракхадилэ о Аврамо, о Нахоро тай о Арано. Кай о Арано аракхадиля о Лото. 
Кала лэско дад о Терахо сас инке жундо, о Арано муля андо Уро Халдеенго, пэ кодва тхан, кай аракхадилян. 
О Аврамо тай о Нахоро линэ пала пэстэ ромнян. Лэ Аврамостеря ромня акхарэнас Сара, ай лэ Нахоростеря ромня — Милка. Вой сас щей лэ Араности. Арано сас о дад ла Милкако тай ла Искако. 
Э Сара сас бибэяцэндери, пала кода со вой нащи тэ анэл бэятонэн. 
О Терахо ля пэсти шавэс лэ Аврамос, Араностерэс шавэс Лотос ай пэстеря боря Сарас, ромня Аврамос, и екхтанэ вонэ вижылэ анда Уро Халдеенго андо Ханаано. Но кала дожылэ каринг о Харано, вонэ линэ тэ жувэн котэ. 
О Терахо жудя 205 бэрша и муля андо Харано. 
