﻿Англунимос.
8.
О Дэл на бистардя пала Ноё и палай саворэ вэшэско жундимос тай пала ското, савэ сас лэса андо ковчего. Вов бишалдя э балвал пэ пхув, и о паи ашыля тэ ужалтар. 
Э хаинга лэ барэ паести тай э фэлястрэ лэ нэбости запхандадилэпэ, и о брышынд парашыля тэ жал пай нэбо. 
О паи найито ужалас пай пхув, и каринг о шэл панчдэшто дес вов фартэ ужылятар. 
По ефтадэшто дес ефтатерэ шонэстар о ковчего тэрдиля пэ Араратски плая. 
О паи жаластар жы каринг о дэшто шон, и андо пэрво дес андо дэшто шон линэ тэ дичён о вэрхо лэ плаенго. 
Прожылэ саранда деса, и о Ноё отпхандадя э фэлястра, сави вов стердя андо ковчего, 
и вяшадя лэ воронос, и вов вивурялас и привурялас палпалэ жы кола времятэ, сар вишутиля э пхув. 
Тунче о Ноё вяшадя лэ голубос, соп тэ дикхэл, ужыля ли о паи упрал пай пхув, 
но о голубо на аракхля шуко тхан, соп тэ прибэшэл, и рисайля каринг о Ноё андо ковчего, пала кода со о паи ушарадя ся пхув. О Ноё процырдя о васт и ля лэ голубос каринг пэстэ андо ковчего. 
Прожылэ ефта деса, и вов упалэ вяшадя лэ голубос анда ковчего. 
Кала увэчери о голубо рисайля, андо муй лэстэ сас тэрно листо анда оливково кашт. Тунче о Ноё поля, со о паи жылятар пай пхув. 
Вов поаштярдя инке ефта деса и упалэ вяшадя лэ голубос, и вов бутэр на рисайля. 
Карик о англуно дес англунэ шонэско шовшэл екхэскэ бэршэско лэ Ноёстерэ жувимасти э пхув вишутиля лэ паестар. О Ноё одпхандадя ушарди лэ ковчегоско и дикхля, со э пхув шуки. 
Карик биштай ефтато дес дуйтонэ шонэстар э пхув ся сас шуки. 
Тунче о Дэл пхэндя лэ Ноёсти: 
— Вижа анда ковчего, ту и тери ромни, терэ шавэ и лэнди ромня. 
Виндяр аври ся, со исы жундо, со исы туса, — э черэкля, э жундимос, саво пхирэл па пхув, соп вонэ тэ пхэрэн э пхув, и тэ анэн бэятонэн тэ ашэн майбут пэ пхув. 
О Ноё вижыля анда ковчего екхтанэ пэстерэ шавэнца, ла ромняса и э ромня лэ шавэнди. 
Баро тай цыкно пхуяко жундимос, и саворэ черэкля, — ся, со пхирэл пай пхув, — вижылэ анда ковчего пэстеря породаса, екх пала екхэстэ. 
О Ноё стердя лэ РАЕСТИ жэртвенико и андя пэр лэстэ жэртва: ля коисавэн андай саворэ вужэ скотонэндар тай лэ черэкляндар, зашындя лэн тай спхабардя пэ яг. 
О РАЙ ашундя лэ накхэса лашо фано и пхэндя андо ди Пэсти: — Никала акана на авава Мэ тэ дав амрая э пхув пала мануш, хоть анда бэятонэндерэ времятар оди лэ манушэско цырдэлпэ каринг э холи. И никала акхана на умарава саворо жундимос, сар тердэм екхатар. 
Андэ саворэ деса ла пхуятерэ на парашэла время, кала росшон о ворзо и кала стидэн о ворзо; на парашэна о шудримос тай о татимос, о милай тай о йивэн, о дес тай э рят. 
