﻿Англунимос.
7.
О РАЙ пхэндя лэ Ноёсти: — Зажа андо ковчего саворэ ереса. Мэ дикхав, со машкар саворэ, ко жувэл адес, екх ту кати чячюно сан англа Мандэ. 
Лэ пэса пай ефта пай дуйжынэ саворэндар вужэндарэ жундиматар, лэс и ла, и пай дуйжынэ лэ найвужэндар жундиматар, лэс и ла, 
и пай ефта паруря саворэндар черэкляндар, лэс и ла, соп тэ фиринпэ лэндар инке пэ пхув. 
Черэзэ ефта деса Мэ бишалава брышынд пэ пхув пэ саранда деса тай пэ саранда рятя, и Мэ потасава ся, со исы жундо пэ пхув, ся, со Мэ стердэм. 
О Ноё стердя ся, сар припэндя лэсти о РАЙ. 
Кала о паи авиля пэ пхув, лэ Ноёсти сас шовшэла бэрша. 
О Ноё, лэсти шавэ, лэсти ромни тай э ромня лэсти шавэн зажылэ андо ковчего, соп тэ фиринпэ лэ паестар. 
Э вужэ тай э найвужэ жундимата, э черэкля тай саворо жундимос 
авилэ каринг о Ноё и зажылэ андо ковчего пай дуйжынэ, вов и вой, сар припхэндя о Дэл лэ Ноёсти. 
Прожылэ ефта деса, и пэ пхув жыля о брышынд. 
Кала лэ Ноёсти сас шовшэла бэрша, андо дэшуефтато дес дуйтонэ шонэстар, прошындилэ саворэ хаинга лэ барэ паёсти, отпхэрнадилэ э фэлястрэ лэ нэбости, 
и шорэлас пэ пхув о брышынд саранда деса тай саранда рятя. 
Андэ кодыва жэ дес зажылэ андо ковчего о Ноё, лэстерэ шавэ о Симо, Хамо тай о Яфето, э ромни лэ Ноёсти и э трин ромня лэстерэ шавэнди. 
И лэнца зажылэ саворэ породуря лэ жундимастерэ: саворэ породуря лэ вэшэстерэ жундимата, черутно ското, саворэ породуря пхуяко жундимос, саворэ породуря лэ черэклэн, саворо пхакало жундимос. 
Саворэ, андэ кастэ пхурдэл жувимос, авилэ каринг о Ноё и зажылэ андо ковчего по дуй, 
вов и вой андай саворэ породуря, сар припхэндя о Дэл лэ Ноёсти. И тунче о РАЙ пхандадя пала лэстэ э вудара. 
О потопо сас пэ пхув саранда деса. О паи авэлас и звазгля о ковчего, и вов жыля па паи. 
О паи ся ваздэласпэ и ваздэласпэ, ай о ковчего жалас па паи. 
О паи кадя вучес вазгляпэ пэ пхув, со ушарадя саворэ вуче плая тэла нэбо. 
О паи вазгляпэ и ушарадя саворэ плая майвучес, сар пэ ефта епашэса метруря. 
Ся, со сас жундо пэ пхув, похасайля: э черэкля, о ското, о вэшэско жундимос, жундимос, саво пхирэл гуртоса пай пхув, тай саворэ мануша. 
Ся, со сас пэ пхув жундо, со пхурдэлас и жувэлас, ся похасайля. 
Похасайля ся, со сас жундо пэ пхув, сас ся хасайля ла пхувятар: э мануша тай э жундима, тай пхуяко жундимос, тай э черэкля лэ нэбости. Ашыляпэ екх о Ноё, тай кола, ко сас лэса по ковчего. 
О потопо лэлас зор пэ пхув шэл и панчдэша деса. 
