﻿2. Korinćanenđe.
6.
Molisaras tumen sago e Hristošće saradnikon ćeren bući zajedno e Devlesa, te či primin e Devlešći milost uzalud. 
Kaj o Del phenel: “Čhutem kan tute ande pravo vrjama thaj pomognisardem tuće ando đes palo spasenje.” Ake akana si e pravo vrjama! Ake akana si o đes palo spasenje! 
Trudi men te trajis gajda te khonikas či sablaznis thaj te khonik či araćhel zamerka amare bućaće. 
Nego, ande sa sikavas kaj sam sluge e Devlešće: strpljivo podnosisaras e bare nevolje, čoripe, thaj pharipe, 
dok marenas men, čhudenas amen ande tamnice, suočisas men e holjariko themesa, ćerasas phari bući, e raćava či sovasas thaj samas bokhale. 
Sikadilam sago e Devlešće sluge ande čistoća, ando džanglipe, ande strpljivost, ando lačhipe, ando Sveto Duho, ande iskreno ljubav, 
ando čačo alav, ande Devlešći sila, naoružime katar e pravednost palo napad thaj e odbrana. 
Kasave sam kana slavin men thaj ladžaren men, e lačhe thaj e bilačhe glasosa, smatrin amen sago hohamnen vi ako samo mothas o čačipe. 
Smatrin amen kaj sam sago okola kaj naj pindžarde, a pindžarde sam, sago kaj meras, a ake trajis, kaznime sam a najsam mudarde. 
Žalosne sam, a palem uvek sam bahtale, čore sam, a palem buten barvardam, naj amen khanči, a palem sa si amen. 
Mothas tumenđe iskreno, manušalen andar o Korinto, širom putardam amaro ilo pale tumende. 
Amari ljubav pale tumende či nestanisarda, ali tumen phandadine tumaro ilo pale amende. 
Phenav tumenđe sago mungre čhavrenđe: putren amenđe tumare ile sago kaj amen putardam tumenđe amare ile. 
Na udružin tumen okolenca save či paćan. Kaj e pravednost thaj o bezakonje či džan zajedno. E svetlo naj khanči e tamava. 
Ande soste o Hristo slažol pe e benđeja? Ili so si zajedničko e verniko thaj e neverniko? 
Thaj so si e Devlešće Hramo e idolenca? Kaj, amen sam hramo e džude Devlesko, sago kaj o Del phendas: “Trajiva lenca thaj phirava maškar lende, thaj me avava lengo Del, a von avena mungro them.” 
Zato: “Inkljen andar lenđi sredina thaj odvojin tumen, phenel o Gospod. Pe khanči so si nečisto na čhon tumare vas, thaj me primiva tumen.” 
“Me avava tumaro Dad, a tumen avena mungre čhave thaj čheja, phenel o Gospod savo sa šaj.” 
