﻿Otkrivenje.
12.
Ko nebo mothovđa pe baro znako: i đuvli urjavdi ano kham, talo pre olakerei o masek, a upro šero ine la kruna oto dešu duj čerenja. 
Inele khamni hem vičinđa oto dukha e bijandipnasere. 
Tegani ko nebo mothovđa pe aver znako: bari Aždaja, loli sar jag, sava ine efta šere hem deš šinga, a upro šere ine la efta krune. 
Pla porikaja cidinđa trećina oto čerenja taro nebo hem frdinđa len upri phuv. I Aždaja terdini angli đuvli koja valjanđa te bijani, te hal lakere čhavore kad ka bijanđol. 
Oj bijanđa murše čhavore, kova ka vladini upro sa o narodija sastrenale palicaja. I lakoro čhavoro inele vazdime koro Devel hem koro lesoro prestolje. 
A i đuvli našli ani pustinja, ko than savo o Devel pripreminđa laće, adari te brininen pe olaće hiljadu dušelu šovardeš dive. 
Tegani ano nebo ulo mariba: o Mihailo ple anđelencar marđa pe protiv i Aždaja hem lakere anđelja. 
Ali i Aždaja hem lakere anđelja na inele dovoljno zorale, i našalde pumaro than ano nebo. 
I bari Aždaja inele frdime taro nebo – o Purano sap, savo vičini pe beng hem Sotoni, savo legari sa e sveto ano greh. I Aždaja hem olakere anđelja inele frdime ki phuv. 
Tegani šunđum o zoralo glaso ko nebo sar vaćeri: “Akana reslo o spasenje hem o zoralipe hem o carstvo amare Devlesoro hem i vlast lesere Hristesiri, adalese soi frdime o tužitelji amare phraljengoro kova dive hem rat optužini len ine anglo amaro Devel. 
On pobedinde le e Bakroresere rateja hem e lafencar oto pumaro svedočanstvo. On inele spremna te den pumaro dživdipe hem te meren. 
Adalese radujinen tumen, o nebesija hem sare kola živinena ano lende! A jao tumenđe, kola živinena ki phuv hem ano more, adalese so o beng huljilo tumende! Zorali holi uklinđa le, adalese so džanel da na ačhilo le but vreme.” 
Kad i Aždaja dikhlja dai frdime ki phuv, lelja te progonini okola đuvlja koja bijanđa e murše čhavore. 
Ali i đuvli dobinđa duj phaka e bare oraosere te odletini đi ko plo than ani pustinja, dur e Sapestar, kaj ka brininen pe olatar trin tekvaš berš. 
Tegani o Sap muklja taro plo muj pani sar len pali đuvli, sar te šaj i len legari la. 
Ali i phuv pomožinđa e đuvljaće: phravđa plo muj hem pilja i len savi i Aždaja muklja taro plo muj. 
I Aždaja inele but holjame upri đuvli, i dželi te marel pe protiv lakere potomci kola ačhile. Adala inele okola kola ićerena e Devlesere naredbe hem ićerena pe upro svedočanstvo e Isusesoro. 
I Aždaja ačhili ki obala e moresiri. 
