GEN 1:1 Ангал о Дэл кердяс о булутя тай э пху.
GEN 1:2 Э пху сас би ништоско чючи, тэмина сас опэр хорипэ, тай о Духос э Дэвлэско урялас опэр пани.
GEN 1:3 О Дэл пхэнляс: — Мэ овэл ярэки. Тай уло ярэки.
GEN 1:4 О Дэл дикхляс, кай о ярэки лачё, тай паляшты лэс катар тэмина.
GEN 1:5 О Дэл тхэдяс о ярэки «дес», ай э тэмина — «рат». Сас бэлвэль, тай сас сабаги — дес екхто.
GEN 1:6 О Дэл пхэнляс: — Мэ овэл учярдипэ машкарэ ко паня, тэ палящиес о пани катар пани.
GEN 1:7 О Дэл кердяс о учярдипэ тай паляшты о пани тал учярдипэ катар пани опэр лэстэ, тай уло аякха.
GEN 1:8 О Дэл тхэдяс о учярдипэ «булутя». Сас бэлвэль, тай сас сабаги — дес дуйто.
GEN 1:9 О Дэл пхэнляс: — О паня тал булутя тэ кидиндён екхетханэ, тай тэ овэл шукипэ. Тай уло аякха.
GEN 1:10 О Дэл тхэдяс о шукипэ «пху», ай о кидинэ паня тхэдяс «морес». Тай дикхляс о Дэл, кай адава лачё.
GEN 1:11 — Мэ керэл э пху зэлэниматэс: чяря гугусенца тай тэрэкя вэрсавэ сортенца опэр пху, савэ анэн имиша зэкенца, — пхэнляс о Дэл. Тай уло аякха.
GEN 1:12 Э пху кердяс алаи, со барёл: вэрсавэ сортя чяря, савэ анэн гугуся, тай вэрсавэ сортя тэрэкя, кай анэн имиша зэкенца. Тай о Дэл дикхляс, кай адава лачё.
GEN 1:13 Сас бэлвэль, тай сас сабаги — дес трито.
GEN 1:14 Тай о Дэл пхэнляс: — Мэ овэн ярэкя опэр учярдипэ ки булутенго, тэ палящиел о дес катар рат, тай он мэ овэн сикаипэ, тэ галярэн о вахытя, о деса тай о брэша.
GEN 1:15 Он мэ овэн ярэкя опэр учярдипэ ки булутенго, тэ овэл ярэки опэр пху. Тай уло аякха.
GEN 1:16 О Дэл кердяс дуй барэ ярэкя — о баро ярэки, тэ гортярэл о дес, тай о тикно ярэки, тэ гортярэл э рат, тай генэ Ов кердяс о чергэня.
GEN 1:17 О Дэл тхэдяс лэн опэр учярдипэ ки булутенго, тэ анэн ярэки опэр пху,
GEN 1:18 гортярэнас о дес тай э рат тай палящиенас о ярэки катар тэмина. О Дэл дикхляс, кай адава лачё.
GEN 1:19 Сас бэлвэль, тай сас сабаги — дес штарто.
GEN 1:20 О Дэл пхэнляс: — Мэ пхэрдёл о пани дживиндимаса, тай мэ урян чирикля опэр пху, опэр учярдипэ ки булутенго.
GEN 1:21 О Дэл кердяс барэ моряки гайванен, вэрсавэ дживиндиматэс кажнес лэски породаса, кай вразэн андэ пани, тай чириклен пхакенца кажня лаки породаса.
GEN 1:22 О Дэл алгышты лэн тай пхэнляс: — Мэ аракхлён тумэндэ пуя тай мэ овэн он бут, пхэрэн о паня андэ морес. Тай о чирикля мэ бутён опэр пху.
GEN 1:23 Сас бэлвэль, тай сас сабаги — дес панджто.
GEN 1:24 О Дэл пхэнляс: — Мэ керэл э пху вэрсавэ сортя дживиндиматэс: кхерутнэ гайваня, тай кай балакадиен, тай вэшэски гайванен. Тай уло аякха.
GEN 1:25 О Дэл кердяс вэрсавэ вэшэски гайванен, тай кхерутнэ гайванен, тай вэрсавэ, кай балакадиен. Тай дикхляс о Дэл, кай адава лачё.
GEN 1:26 Дэчи о Дэл пхэнляс: — Тэ керас манушэс, сар амэн, Амаро шавлин. Мэ овэл сагбус опэр маче ки моряки тай опэр чирикля ки булутенгерэ, опэр гайваня, опэр алаи ки пху тай опэр алаи, со бэшэл опэр пху.
GEN 1:27 Аякха о Дэл кердяс манушэс, сар Пэс; Ов кердяс лэс, По шавлин, сар шавлин э Дэвлэски; муршэс тай джювля Ов кердяс лэн.
GEN 1:28 О Дэл алгышты лэн тай пхэнляс: — Мэ аракхлён тумэндэ пуя тай мэ овэн бут; пхэрэн э пху тай овэн сагбудэс опэр латэ. Овэн сагбудэс опэр маче ки моряки, тай опэр чирикля ки булутенги, тай опэр алаи, со бэшэл опэр пху.
GEN 1:29 Дэчи о Дэл пхэнляс: — Мэ дав тумэн алаи о чяря э гугусенца опэр алаи ки пху тай алаи о тэрэкя, кай дэн имиша зэкенца. Он кан овэн тумэнги хапэ.
GEN 1:30 Тай алаи э гайванен э пхуякерэн, тай алаи э чириклен опрунэн, тай алаи, со кхелавэлпэс опэр пху, — алаен, андэ кастэ си бэшыпэ, — Мэ дав тэ хан алаи э чяр. Тай уло аякха.
GEN 1:31 О Дэл дикхляс опэр алаи, со Ов кердяс, тай алаи сас бут лачё. Сас бэлвэль, тай сас сабаги — дес шовто.
GEN 2:1 Аякха сас бытэрдимэ о кердипэ э булутенго тай э пхуяко тай алаеско, со си тай со бэшэл отхэ.
GEN 2:2 Ко эфтато дес о Дэл бытэрды э бути, сави Ов керэлас, тай ко эфтато дес Ов на керэлас бути.
GEN 2:3 О Дэл алгышты о эфтато дес тай кердяс лэс шужо, вай андэ адава дес Ов на керэлас бути.
GEN 2:4 Аки о пхукаипэ катар булутя тай пху, кана он сас кердэ. Кана о Дэл о Яхвэ кердяс э пху тай о булутя,
GEN 2:5 опэр пху дага на сас нэ кущёки ливадяко, нэ ливадяки чяря, вай о Дэл о Яхвэ на бичялэлас опэр пху брышым, тай на сас мануш, тэ керэл бути опэр пху.
GEN 2:6 Екх диряв ваздиндёлас андар пху тай суслярэлас алаи ла.
GEN 2:7 Дэчи о Дэл о Яхвэ кердяс манушэс катар пхуяко прахос тай пхудиняс лэски андэ хэрня тынышы бэшымаско, тай о мануш уло дживиндо.
GEN 2:8 О Дэл о Яхвэ барярдяс сади ко вастоки, андэ Эдэм, тай тхэдяс отхэ манушэс, савэс Ов кердяс.
GEN 2:9 О Дэл о Яхвэ барярдяс катар пху алаи о тэрэкя, касавке си, шукара тэ дикхес тай лаче тэ хас. Машкарэ ко сади барёнас тэрэки бэшымаско тай тэрэки, кай галёс лачипэ тай джюнгалипэ.
GEN 2:10 Андар Эдэми чёрдёлас диряв, кай суслярэлас о сади, ай дэчи ой палящиеласпэс штарэ паненги.
GEN 2:11 О екхто бучёлас Пишон: ов чёрдёл агорял алаи ки пху Хавила, катэ си пхоля.
GEN 2:12 Э пхол андэ одоя пху лачи, тай дага отэ си тэрэкеско смолас, кай шукар кхандэл, тай о бар шохам.
GEN 2:13 Дуйто диряв бучёл Гихон, ой чёрдёл агорял алаи ки пху Куш.
GEN 2:14 Трито диряв бучёл Тигр, ой чёрдёл карин вастоки катар Ашшур. Ай э штарто диряв — адава Евфрат.
GEN 2:15 О Дэл о Яхвэ тхэдяс манушэс андэ Эдэмски сади, ов тэ дикхел пал лэстэ тай тэ кутардиел.
GEN 2:16 О Дэл о Яхвэ диняс тхэдипэ э манушэс: — Ха имиша алаи катар тэрэкя андэ сади,
GEN 2:17 ай ма ха катар тэрэки, кай дэл тэ галёс лачипэ тай джюнгалипэ. Вай одова дес, кана ту кан хас имишы опрал лэстэ, ту чячес кан мэрэс.
GEN 2:18 О Дэл о Яхвэ пхэнляс: — Нанай лачё манушэски тэ овэл екх. Мэ кан керав лэски ярдымарес, сар лэс.
GEN 2:19 О Дэл о Яхвэ кердяс катар пху алаи э гайванен э вэшэскерэн тай алаи э чириклен опрунэн. Дэчи Ов андяс лэн ко мануш, тэ дикхел, сар одова лэн кан тхэл. Сар тхэдяс о мануш кажни дживиндо кердипэ, аякха да уло лэско нав.
GEN 2:20 Аякха о мануш диняс нава алаи э гайванен, алаи э чириклен опрунэн тай алаи э вэшэскерэ гайванен. Ай э Адамески на аракхлило тэ уйдиел ярдымари сар ов.
GEN 2:21 Дэчи о Дэл о Яхвэ диняс э манушэс зорало суно, тай бискай одова суто, лиляс екх андар лэски прашавандэ тай пханляс адава тхан тэнеса.
GEN 2:22 Андар прашаво, саво Ов никалдяс андар мануш, о Дэл о Яхвэ кердяс джювля тай андяс ла лэстэ.
GEN 2:23 О мануш пхэнляс: — Адава кокало катар кокала минрэндар тай о тэни катар тэни минрэстэ. Ой кан бучёл «ромни», вай сас линди катар ром.
GEN 2:24 Оничин кан ачявэл о мануш дадэс тай дэя тай кан колизэл пэ ромняса, тай о дуй кан овэн екх тэни.
GEN 2:25 Тай о Адам, тай лэски ромни сас нанге, ай на сас ладжяво.
GEN 3:1 Андар алаи ки вэшэски гайваня, савэн кердяс о Дэл о Яхвэ, алаендар ярамази сас о сап. Ов пхучляс ки джювли: — Чячи о Дэл пхэнляс: «Ма хан нисавэ тэрэкестар андэ сади»?
GEN 3:2 Э джювли пхэнляс э сапэски: — Амэнги муклёл тэ хас имиша опрал тэрэкя андэ сади.
GEN 3:3 Ай о Дэл пхэнляс : «Ма хан имиша опрал тэрэки, саво машкарэ ко сади, тай ма астарэн лэн, я кан мэрэн».
GEN 3:4 — На, тумэ на кан мэрэн, — пхэнляс о сап э джювляки.
GEN 3:5 — О Дэл джянэл, кана тумэ кан хан лэн, тумарэ якха кан пхутэрдён тай тумэ кан овэн, сар о Дэл, саво джянэл о лачипэ тай о джюнгалипэ.
GEN 3:6 Дэчи э джювли дикхляс, кай о имишы э тэрэкеско сас лачё тэ хас тай шукар тэ дикхес, тай сас мангемаско, вай дэл годявэрипэ. Ой лиляс екх андар имиша тай халяс. Ой диняс имишы ли пэ ромэс, саво сас ласа, тай ов халас лэс.
GEN 3:7 Лэнги якха пхутэрдилэ, тай он галилэ, кай нанге. Дэчи он сивдэ пэски савутя опэр шалоя катар патря ки инжырески.
GEN 3:8 Бэлвэле пхудэлас балвалёри, сар шылоро. Он шунлэ, сар о Дэл о Яхвэ пхерэл андэ сади. О Адам тай лэски ромни гаравдэпэс катар Дэл Яхвэ машкарэ ко тэрэкя андэ сади.
GEN 3:9 О Дэл о Яхвэ пхэнляс э Адамески: — Кай сан?
GEN 3:10 О Адам пхэнляс: — Мэ шунлём Тут андэ сади, трашанилём, вай мэ нанго, тай гаравдёман.
GEN 3:11 О Дэл о Яхвэ пхучляс: — Кон пхэнляс туки, кай ту нанго? Ту халян имиша катар тэрэки, савэстар Мэ динём тхэдипэ тэ на хас?
GEN 3:12 О Адам пхэнляс: — Э джювли, савя Ту динян ман, тэ овэл ой манца, — адава ой диняс ман о имишы одолэ тэрэкестар, тай мэ халём лэс.
GEN 3:13 Дэчи о Дэл о Яхвэ пхэнляс э джювляки: — Со ту кердян? Э джювли пхэнляс: — О сап хохавдяс ман, аки мэ тай халём.
GEN 3:14 Дэчи о Дэл о Яхвэ пхэнляс э сапэски: — Андар одолэстэ, кай ту адава кердян, дино ту арман машкарэ алаи ки вэшэски тай кхерутнэ гайваня! Ту кан балакадиес опэр пэр, ту кан хас о прахос алаи о деса тэ бэшымаски.
GEN 3:15 Мэ кан керав душманлыки машкарэ тутэ тай ки джювли тай машкарэ тэ пуёстэ тай лаки пуёстэ: ов кан марэл то шэро, ай ту кан дандэлэс лэски патум.
GEN 3:16 Ай э джювляки Ов пхэнляс: — Мэ кан керав то насвалипэ пуёстэ пхаро: о пуя кан аракхлён тутэ андэ хурлуки. Ту кан мангес тэ овэс опэр тэ ромэстэ, ай ов кан овэл сагбус опэр тутэ.
GEN 3:17 Э Адамески Ов пхэнляс: — Аякха кай ту шунлян э ромня тай халян о имишы опрал тэрэки, савэстар Мэ пхэнлёмас туки: «Ма ха лэстар», арман дини андар тутэ э пху: андэ пхари бути ту кан хас латар андэ алаи ко деса тэ бэшымаски.
GEN 3:18 Ой кан барярэл туки хлядя тай налаче чяря, тай ту кан хас ливадяки гива.
GEN 3:19 О манро кан казандиес пхарэс, бискай на кан джяс андэ пху, андар савятэ санас линдо. Вай ту — прахос, тай андэ прахос ту кан джяс.
GEN 3:20 О Адам тхэдяс пэ ромня Ева, вай ой ули э дай алаи, кай бэшэн.
GEN 3:21 О Дэл о Яхвэ кердяс савутя катар моркхи тай урявдяс андэ лэндэ Адамес тай лэски ромня.
GEN 3:22 Дэчи о Дэл о Яхвэ пхэнляс: — О мануш галило о лачипэ тай джюнгалипэ тай уло акана, сар екх андар Амэндэ. На камэл, ов тэ сидэл по васт тай тэ чинэл имишы ли опрал тэрэки ки бэшымаско, тэ хал лэс тай лиляс тэ бэшэл сальтя.
GEN 3:23 Тай о Дэл о Яхвэ кувды лэс андар сади Эдэм, тэ керэл ов бути опэр пху, андар савятэ сас линдо.
GEN 3:24 Ов кувды э манушэс тай тхэдяс ко вастоки ангал сади Эдэм херувимен тай о камас, кай марэл алаи о рига ягаса, тэ дикхен пал ко дром ко тэрэки ки бэшымаско.
GEN 4:1 О Адам сас э Еваса пэ ромняса, тай ой насвалили пуёстэ тай аракхлило о Каин. Ой пхэнляс: «Э ярдымеса э Сагбуски Яхвэскерэса мэ диндилём манушэс».
GEN 4:2 Дэчи латэ аракхлило лэско пхрал о Авель. О Авель чярявэлас э бакрэн тай бузнен, ай о Каин барярэлас опэр пху.
GEN 4:3 Вахытестар о Каин андяс имиша э пхуяки, сар башладипэ э Сагбуски э Яхвэски,
GEN 4:4 о Сагбус о Яхвэ махтады э Авелес тай лэско башладипэ,
GEN 4:5 ай э Каинэс тай лэско башладипэ Ов на махтады. О Каин холясаило, тай лэско муй калило катар холи.
GEN 4:6 Дэчи о Сагбус о Яхвэ пхэнляс э Каинэски: — Соски ту холязэс? Соски то муй калило?
GEN 4:7 Ту тэ керэса чячипэ, та со, ту на кан ваздэс то муй? Ай ту тэ керэс начячипэ, дэчи тэ ударэстэ гаравдэпэс бэзя: ов манген тэ овэн опэр тутэ, ай ту камэл тэ овэс опэр лэстэ.
GEN 4:8 О Каин пхэнляс пэ пхралэски: — Гадэ ки ливади. Кана он сас ки ливади, о Каин читяспэс опэр пэ пхралэстэ ко Авель тай мудардяс лэс.
GEN 4:9 Дэчи о Сагбус о Яхвэ пхэнляс э Каинэски: — Кай то пхрал о Авель? — На джянав, — пхэнляс одова. — Та со, мэ дикхав пал мэ пхралэстэ?
GEN 4:10 О Сагбус о Яхвэ пхэнляс: — Со ту кердян? О рат тэ пхралэско пхэнэл Манги андар пху.
GEN 4:11 Акана ту дино арман, кувдимэ андар пху, сави пхутэрдили, тэ лэл о рат тэ пхралэско, чёрдо тэ вастэса.
GEN 4:12 Кана ту кан керэс бути опэр пху, ой на кан дэл тут пэ имиша. Ту кан пхерэс опэр пху акарин-окорин, сар би кхерэско.
GEN 4:13 О Каин пхэнляс э Яхвэ Сагбуски: — Мо хурлуки пхаро, ниш ми зор тэ накхав.
GEN 4:14 Анкха ту кувдиес ман катар муй ки пхуяко, тай мэ кан овав гаравдо Тутар. Мэ кан пхерав опэр пху акарин-окорин, сар би кхерэско, тай кон кан дикхел ман, одова кан мударэл ман.
GEN 4:15 Ай о Сагбус о Яхвэ пхэнляс лэски: — На. Кон кан мударэл э Каинэс, одова кан диндёл эфтавар бут. Тай о Сагбус о Яхвэ кан керэл э Каинэски метка, тай никхон, тэ дикхела лэс, тэ на мударэл лэс.
GEN 4:16 О Каин гело катар Сагбус Яхвэ тай бэшэлас андэ пху Нод, ко вастоки катар Эдэми.
GEN 4:17 О Каин сас пэ ромняса, тай ой насвалили пуёстэ тай аракхлило о Ханох. Одова вахыти о Каин тхэлас диз тай тхэдяс ла о нав пэ чявэско Ханох.
GEN 4:18 Ко Ханох аракхлило о Ирад, ко Ирад аракхлило о Мехиаэл, ко Мехиаэл аракхлило о Метушаэл, тай ко Метушаэл аракхлило о Ламех.
GEN 4:19 О Ламех лиляс пэски ромнян до джювлен: екх бучёлас Ада, авэр — Цылла.
GEN 4:20 Ки Ада аракхлило о Явал: ов уло о дад одолэнго, кон бэшэл андэ катунэс тай барярэл гайванен.
GEN 4:21 Лэско пхрал бучёлас Ювал: ов уло о дад алаенго, кон кхелэл опэр арфа тай дурули.
GEN 4:22 Ли ки Цылла сас чяво, Тувал-Каин, саво керэлас вэрсавэ шэя катар бронза тай састэр. Э пхэн э Тувал-Каинэски сас Наама.
GEN 4:23 О Ламех пхэнляс пэ ромненги: — Ада тай Цылла, шунэн ман, ромня э Ламехески, шунэн мэ зборэс. Мэ мудардём муршэс андар одолэстэ, кай ов чиндяс ман, тэрнагарэс андар одолэстэ, кай ов чялавдяс ман.
GEN 4:24 Андар Каин тэ си о душманлыки эфтавар бут, андар Ламех — эфтадэша эфтавар бут.
GEN 4:25 О Адам генэ сас пэ ромняса, тай латэ аракхлило чяво тай тхэдяс лэс Сиф, пхэнляс: «О Дэл башлады ман авэрэ пуёс ко тхан ки Авелеско, савэс мудардяс о Каин».
GEN 4:26 Ли ко Сиф сас чяво, тай ов тхэдяс лэс Енос. Одова вахыти о мануша лилэ тэ манген о нав э Сагбуски Яхвэско.
GEN 5:1 Аки о пхукаипэ катар Адам тай лэски пуендар. Кана о Дэл кердяс э манушэс, Ов кердяс лэс, тэ ушадиел Лэски.
GEN 5:2 Ов кердяс муршэс тай джювля тай алгышты лэн. Кана он сас кердэ, ов тхэдяс лэн «мануш».
GEN 5:3 Кана о Адам бэшло 130 брэш, лэстэ аракхлило чяво, сар ов, сар лэско шавлин, тай ов тхэдяс лэс Сиф.
GEN 5:4 Пал ко аракхлима ки Сифеско о Адам бэшло 800 брэш, тай лэстэ сас генэ чявэ тай чяя.
GEN 5:5 Алаи о Адам бэшло 930 брэш тай муло.
GEN 5:6 Кана о Сиф бэшло 105 брэш, лэстэ аракхлило о Енос.
GEN 5:7 Пал ко аракхлима ки Еносеско о Сиф бэшло 807 брэш, тай лэстэ сас генэ чявэ тай чяя.
GEN 5:8 Алаи о Сиф бэшло 912 брэш тай муло.
GEN 5:9 Кана о Енос бэшло 90 брэш, лэстэ аракхлило о Каинан.
GEN 5:10 Пал ко аракхлима ки Каинанеско о Енос бэшло 815 брэш, тай лэстэ сас генэ чявэ тай чяя.
GEN 5:11 Алаи о Енос бэшло 905 брэш тай муло.
GEN 5:12 Кана о Каинан бэшло 70 брэш, лэстэ аракхлило о Малелеил.
GEN 5:13 Пал ко аракхлима ки Малелеилеско о Каинан бэшло 840 брэш, тай лэстэ сас генэ чявэ тай чяя.
GEN 5:14 Алаи о Каинан бэшло 910 брэш тай муло.
GEN 5:15 Кана о Малелеил бэшло 65 брэш, лэстэ аракхлило о Яред.
GEN 5:16 Пал ко аракхлима ки Яредеско о Малелеил бэшло 830 брэш, тай лэстэ сас генэ чявэ тай чяя.
GEN 5:17 Алаи о Малелеил бэшло 895 брэш тай муло.
GEN 5:18 Кана о Яред бэшло 162 брэш, лэстэ аракхлило о Енох.
GEN 5:19 Пал ко аракхлима ки Енохеско о Яред бэшло 800 брэш, тай лэстэ сас генэ чявэ тай чяя.
GEN 5:20 Алаи о Яред бэшло 962 брэш тай муло.
GEN 5:21 Кана о Ханох бэшло 65 брэш, лэстэ аракхлило о Мафусал.
GEN 5:22 Пал ко аракхлима ки Мафусалеско о Ханох пхерэлас э Дэвлэса 300 брэш, тай лэстэ сас генэ чявэ тай чяя.
GEN 5:23 О Ханох бэшло 365 брэш.
GEN 5:24 О Ханох пхерэлас э Дэвлэса, дэчи лэс на уло, вай о Дэл лиляс лэс.
GEN 5:25 Кана о Мафусал бэшло 187 брэш, лэстэ аракхлило о Ламех.
GEN 5:26 Пал ко аракхлима ки Ламехеско о Мафусал бэшэлас 782 брэш, тай лэстэ сас генэ чявэ тай чяя.
GEN 5:27 Алаи о Мафусал бэшло 969 брэш тай муло.
GEN 5:28 Кана о Ламех бэшло 182 брэш, лэстэ аракхлило чяво.
GEN 5:29 Ов диняс лэс нав Ной тай пхэнляс: «Ов кан дэл рагати амэн андэ хэзмэти, андэ пхари бути амарэ васта, опэр пху, дини арман э Сагбуса э Яхвэса».
GEN 5:30 Пал ко аракхлима ки Ноеско о Ламех бэшло 595 брэш, тай лэстэ сас генэ чявэ тай чяя.
GEN 5:31 Алаи о Ламех бэшло 777 брэш тай муло.
GEN 5:32 Кана э Ноески сас 500 брэш, лэстэ аракхлилэ о Сим, о Хам тай о Яфет.
GEN 6:1 О мануша лилэ тэ бутён опэр пху, тай лэндэ аракхлёнас чяя.
GEN 6:2 О чявэ э Дэвлэски дикхлэ, кай о манушыканэ чяя шукара, тай лилэ тэ лэн пэски ромнен лэн, кажын савя мангляс.
GEN 6:3 О Сагбус о Яхвэ пхэнляс: — На екхараи кан овэл о Духос Минро андэ мануш. О мануш э си тэни; мэ овэн о деса лэнги шэлу биш брэш.
GEN 6:4 Андэ адала деса (тай пал адалэ десендэ) опэр пху сас нефилимя, кана о чявэ э Дэвлэски лэнас э манушыканэ чяян тай овэнас лэндар пуя. Адава сас муршаря намлыдэс авгутнэ вахытендар.
GEN 6:5 О Сагбус о Яхвэ дикхляс, кай о мануша опэр пху улэ бут канлыдэс, тай алаи лэнги тюшундиматэс екхараи бангёнас карин канлылыки.
GEN 6:6 О Сагбус о Яхвэ аяды, кай кердяс манушэс опэр пху, тай о ило Лэско пхэрдило дукх.
GEN 6:7 Тай пхэнляс о Сагбус о Яхвэ: — Мэ кан кхосав опрал муй ки пхуяко э манушыкани порода, сави Мэ кердём. Мэ кан мударав ли э манушэн, ли э гайванен, тай кай балакадиен, тай э чириклен опрунэн, вай Мэ аядияв, кай кердём лэн.
GEN 6:8 Ай о Ной аракхляс мила андэ якха ки Сагбуски Яхвэски.
GEN 6:9 Аки о пхукаипэ катар Ной тай лэски пуендар. Машкарэ ко мануша одолэ вахытески екх о Ной сас чячё тай бидошако; ов пхерэлас э Дэвлэса.
GEN 6:10 Ко Ной сас трин чявэ: о Сим, о Хам тай о Яфет.
GEN 6:11 Андэ Дэвлэски якха э пху паровдили, пхэрдили джюнгалипэ.
GEN 6:12 О Дэл дикхляс, сар паровдили э пху андар одолэстэ, кай алаи о мануша опэр пху гелэ опэр налаче дрома.
GEN 6:13 Дэчи о Дэл пхэнляс э Ноески: — Мэ кан тхав бытима алаески, со бэшэл опэр пху, вай андар лэндэ э пху пхэрдили джюнгалимаса. Мэ кан кхосав лэн екхетханэ алаи э пхуяса.
GEN 6:14 Кер туки кавчеги катар тэрэки гофер, тай кер андэ лэстэ тхана, тай мак смоласа лэс андар тай аврял.
GEN 6:15 Аки сар ту камэл лэс тэ керэс: о кавчеги камэл тэ овэл 150 куня андэ дулгипэ, 25 куня андэ буглипэ тай 15 куня андэ учипэ.
GEN 6:16 Кер лэс опрал пханло тай э крыша опрал кер учи катар кавчеги екхпаш куни. Тхэ катар риг удар тай кер тэлуно, машкаруно тай опруно этажа.
GEN 6:17 Мэ кан бичялав опэр пху паня бугулдимаски, тэ мэрэл алаи, со бэшэл тал булутя, алаи о дживиндо, андэ савэстэ тэнышы бэшымаско. Алаи, со си опэр пху, кан мэрэл.
GEN 6:18 Ай туса Мэ кан керав завети, тай ту кан дэс андэ кавчеги — ту тай тэ чявэ, тай ти ромни, тай о ромня тэ чявэнги.
GEN 6:19 Гел андэ кавчеги алаи э гайванен по дон, муршэс тай джювля, тэ ачён он дживиндэ екхетханэ туса.
GEN 6:20 Тутэ кан авэн, тэ ачён ли он дживиндэ, по дуй алаи андар вэрсавэ породэс андар чирикля, гайваня тай алаи о породэс, савэ балакадиен.
GEN 6:21 Лэ бут туса вэрсаво хапэ, тай тхэ екхетханэ, тэ хас ли ту, ли он.
GEN 6:22 О Ной кердяс алаи аякха, сар пхэнляс лэски о Дэл.
GEN 7:1 О Сагбус о Яхвэ пхэнляс э Ноески: — Дэ андэ кавчеги алаи э хорандаса. Мэ дикхав, кай машкарэ алаендэ, кай бэшэн андэ адава вахыти, екх ту чячё ангал Мандэ.
GEN 7:2 Лэ туса по эфта парэс андар вэрсавэ шужэ гайванен, муршэн тай джювлен, тай по екх пара андар кажни порода вэрсавэ нашужэ гайванен, муршэн тай джювлен,
GEN 7:3 тай по эфта парэс андар вэрсавэ булутенги чириклен, муршэн тай джювлен, тэ гаравэн лэги порода опэр пху.
GEN 7:4 Эфта десендар Мэ кан бичялав брышым опэр пху саранда дес тай саранда ратя. Мэ кан кхосав опрал муй ки пхуяко алаи о дживиндо, савэс Мэ кердём.
GEN 7:5 О Ной кердяс алаи, сар пхэнляс лэски о Сагбус о Яхвэ.
GEN 7:6 Кана о паня э бугулдимаски алэ опэр пху, э Ноески сас шовшэл брэш.
GEN 7:7 О Ной, лэски чявэ, лэски ромни тай о ромня лэски чявэнги динэ андэ кавчеги, тэ кутардиенпэс катар бугулдима.
GEN 7:8 О шужэ тай нашужэ гайваня, чирикля тай алаи, кай бэшэн по бут,
GEN 7:9 алэ ко Ной тай динэ андэ кавчеги парэнца: мурш тай джювли, сар пхэнляс э Ноески о Дэл.
GEN 7:10 Эфта десендар опэр пху алэ о паня э бугулдимаски.
GEN 7:11 Кана э Ноески сас шовшэл брэш, андэ дэшуэфтато дес дуйто чёнэско, пхарэ алаи о тхана э хоримаски, пхутэрдилэ о пэнчерэс э булутенги,
GEN 7:12 тай опэр пху чёрдёлас о брышым саранда дес тай саранда ратя.
GEN 7:13 Андэ одова жэ дес динэ андэ кавчеги о Ной, лэски чявэ о Сим, о Хам тай о Яфет, э ромни э Ноески тай о ромня лэски тринэ чявэнги.
GEN 7:14 Лэнца динэ андар алаи о породэс вэрсавэ гайваня: вэрсавэ породэс вэшэски гайваня, кхерутнэ гайваня, алаи о породэс, кай балакадиен опэр пху, алаи о породэс о чирикля, алаи о дживиндэ э пхакенца.
GEN 7:15 Алаи, андэ кастэ тэнышы бэшымаско, алэ ко Ной тай динэ андэ кавчеги парэнца,
GEN 7:16 мурш тай джювли андар алаи ко породэс, сар пхэнляс э Ноески о Дэл. Тай дэчи о Сагбус о Яхвэ пханляс пал лэстэ о удар.
GEN 7:17 О бугулдима сас опэр пху саранда дес, тай о паня бутёнас, ваздинэ о кавчеги, тай ов диняс джялдави опрал пху.
GEN 7:18 О паня бутёнас тай ваздиндёнас, ай о кавчеги дэлас джялдави опэр пани.
GEN 7:19 Он ваздиндилэ опэр пху аякха учес, кай учярдэ алаи о уче горадэс тал булутя.
GEN 7:20 О паня ваздиндилэ тай учярдэ алаи о горадэс учес, ниш дэшупандж куня.
GEN 7:21 Алаи о дживиндо, со кхелавэласпэс опэр пху, муло: чирикля, гайваня, вэшэски гайваня, алаи, со бэшэл бут опэр пху, тай алаи о мануша.
GEN 7:22 Алаи опэр шукипэ, андэ каски хэрнендэ сас тынышы бэшымаско, муло.
GEN 7:23 Алаи о дживиндо сас кхосло опрал пху: о мануша тай о гайваня, тай савэ балакадиен, тай о чирикля э булутенги. Ачило екх о Ной тай одола, кон сас лэса андэ кавчеги.
GEN 7:24 О пани авэлас тай авэлас опэр пху шэлупэинда дес.
GEN 8:1 Ай о Дэл тюшундиелас катар Ной тай катар алаи вэшэски гайваня тай катар кхерутнэ гайваня, савэ сас лэса андэ кавчеги, тай Ов бичялдяс балвал опэр пху, тай о паня лилэ тэ залагизэн.
GEN 8:2 О тхана э хоримаски тай о пэнчерэс э булутенги пханлилэ, тай о брышым тэрдило тэ чёрдёл опрал.
GEN 8:3 О пани тэмэли джялас опрал пху, тай ко шэлупэинда дес ов лачес гело.
GEN 8:4 Ко дэшэфтато дес эфтато чёнэско о кавчеги тэрдило опэр горадэс Арарат.
GEN 8:5 О паня генэ залагизэнас джи ко дэшто чён, тай андэ екхто дес ко дэшто чён лилэ тэ дикхиндён опрал о горадэс.
GEN 8:6 Саранда десендар о Ной пхутэрдяс э пэнчера, сави ов кердяс андэ кавчеги,
GEN 8:7 тай мукляс э карга, тай одоя урялас тай авэлас палэ джи одолэ вахытески, бискай о пани опэр пху на шукило.
GEN 8:8 Дэчи о Ной мукляс голубес, тэ дикхел, гело о пани опрал пху.
GEN 8:9 Ай о голуби на аракхляс шуко тхан тэ мукелпэс, тай ало ко Ной андэ кавчеги, вай о пани учярэлас алаи э пху. О Ной сидиняс по васт тай лиляс э голубес палэ пэстэ андэ кавчеги.
GEN 8:10 Накхло эфта дес, ов генэ мукляс э голубес андар кавчеги.
GEN 8:11 Кана бэлвэле о голуби ало, андэ муй лэстэ сас чинди зэлэно маслинаки патри. Дэчи о Ной галило, кай о пани гело опрал пху.
GEN 8:12 Ов ишанды генэ эфта дес тай генэ мукляс э голубес, тай акана о голуби на ало палэ.
GEN 8:13 Кана сас э Ноески шовшэл екх брэш, андэ екхто дес ки екхе чёнэско лэски бэшымаско э пху шукили катар пани. О Ной пхутэрдяс опрал о кавчеги, ваздиняспэс тай дикхляс, кай э пху шуки.
GEN 8:14 Ко биш эфтато дес ки дуйто чёнэско э пху ули алаи шуки.
GEN 8:15 Дэчи о Дэл пхэнляс э Ноески:
GEN 8:16 — Никлё андар кавчеги ту, ти ромни, тэ чявэ тай лэнги ромня.
GEN 8:17 Никал аври алаи э дживиндэн, савэ туса: чириклен, гайванен тай алаен, кай балакадиен, он тэ пхэрэн э пху, тэ аракхлён лэндэ генэ тай тэ бутён.
GEN 8:18 Тай о Ной никлисто андар кавчеги екхетханэ пэ чявэнца, пэ ромняса тай пэ чявэнги ромнянца.
GEN 8:19 Алаи о гайваня, тай кай балакадиен, тай алаи о чирикля — алаи, со кхелавэлпэс опэр пху, — никлистэ андар кавчеги, екх порода пал екхаврэстэ.
GEN 8:20 О Ной кердяс э Яхвэ Сагбуски алтари, лиляс шужэ гайванен тай чириклен андар кажни порода, чиндяс лэн тай алаи тхардяс опэр яг.
GEN 8:21 О Сагбус о Яхвэ шунляс лачё кхандэл тай пхэнляс андэ Пэ илэстэ: — На кан дав генэ Мэ арманя э пху андар мануш. Тикнярила о ило э манушэско сидэлпэс ко канлыки, ай генэ на кан мударав алаи о дживиндо, сар кердём анкха.
GEN 8:22 Бискай си э пху, на кан бытиел о вахыти, кана о мануша барярэн тай кидэн о гив, кана овэл о шудрипэ тай тхарипэ, о милай тай о вэн, о дес тай э рат.
GEN 9:1 О Дэл алгышты э Ноес тай лэски чявэн тай пхэнляс лэнги: — Мэ аракхлён пуя тай бутён, пхэрэн э пху.
GEN 9:2 Мэ лэл траш тай израипэ ангал тумэндэ алаи э гайванен э пхуякерэн тай алаи э чириклен э булутенгерэн, алаи, кай балакадиен, тай алаи э моряки мачен: он динэ тумэндэ андэ васта.
GEN 9:3 Алаи, со бэшэл тай со кхелавэлпэс, кан овэл тумэнги хапэ. Сар буруни Мэ динём тумэн зэлэниматэс, аякха ли анкха Мэ дав тумэн алаи.
GEN 9:4 Ами ма хан мас ратэса, саво си о бэшыпэ э гайваненго.
GEN 9:5 Тай андар тумаро рат Мэ чяльти кан мангав покиндима. Мэ кан мангав покиндима андар лэстэ кажни гайванестэ. Тай кажни манушэстэ Мэ кан пхучяв андар бэшыпэ лэски тухуместэ.
GEN 9:6 Кон би тэ на чёрэл рат манушэско, манушэски вастэса кан чёрдёл ли лэско рат. Вай о мануш кердо, сар о шавлин э Дэвлэско.
GEN 9:7 Мэ аракхлён пуя тай бутён, пхэрэн э пху тай бутён опэр латэ.
GEN 9:8 О Дэл пхэнляс э Ноески тай лэски чявэнги:
GEN 9:9 — Анкха Мэ керав завети тумэнца тай тумарэ пуенца,
GEN 9:10 тай вэрсавэ дживиндимаса, саво си тумэнца: чирикли я, кхерутно гайвани я вэшэско гайвани — алаенца, кон никлисто тумэнца андар кавчеги, тай кажни гайванеса опэр пху.
GEN 9:11 Мэ керав тумэнца завети: на кан овэл генэ алаи о дживиндо мудардо бугулдимаски паненца, на кан овэл генэ о бугулдима тэ хурдярэл э пху.
GEN 9:12 О Дэл пхэнляс: — Аки о сикаипэ э заветеско, саво Мэ керав машкарэ Мандэ тай тумэндэ тай алаи ко дживиндэ, савэ си тумэнца, алаи о породэс, савэ кан овэн.
GEN 9:13 Мэ тхав опрэ булутя Ми радуга, тай ой кан овэл сикаипэ э заветеско машкарэ Мандэ тай ки пху.
GEN 9:14 Кана би Мэ тэ на бичялав булутя опэр пху, андэ булутя кан овэл радуга,
GEN 9:15 тай Мэ кан тюшундияв Мо завети машкарэ Мандэ тай тумэндэ тай алаи ко дживиндэ. Генэ о паня на кан чёрдён бугулдимаса, тэ мударэл алаи о дживиндо.
GEN 9:16 Екхараи, кана э радуга кан овэл андэ булутя, Мэ кан дикхав ла тай кан тюшундияв, кай на бытиел о завети машкарэ ко Дэл тай алаи ко дживиндэ, савэ си опэр пху.
GEN 9:17 Аякха пхэнляс о Дэл э Ноески: — Аки о сикаипэ э заветеско, саво Мэ кердём машкарэ Мандэ тай алаи, ко дживиндо опэр пху.
GEN 9:18 О чявэ э Ноески, кай никлистэ андар кавчеги, сас о Сим, о Хам тай о Яфет. (О Хам — о дад э Ханаанеско.)
GEN 9:19 Адала трин чявэ э Ноески, тай лэндар улэ мануша, савэ бутилэ опэр алаи ки пху.
GEN 9:20 О Ной лиляс тэ гортярэл э пху тай тэ барярэл дракх.
GEN 9:21 Екхвар ов пиляс винас, матило тай сас пашло нанго андэ пэ катунатэ.
GEN 9:22 О Хам, о дад э Ханаанеско, дикхляс о нангипэ пэ дадэско тай никлисто, пхукавдяс адалэстар пэ пхралэнги.
GEN 9:23 Ай о Сим тай о Яфет лилэ савутя, тхэдэ лэн опэр пумарэ пхикендэ тай чёриндос динэ андэ тай учярдэ о нангипэ пумарэ дадэско. Лэнги муя сас болдинэ авэр риг, тэ на дикхен о нангипэ пумарэ дадэско.
GEN 9:24 Кана о Ной аинды тай галило, со кердяс лэса о тикно чяво.
GEN 9:25 Ов пхэнляс: — О Ханаан дино арман! Ов кан овэл пэ пхралэнги палуно андар иргатя.
GEN 9:26 Генэ ов пхэнляс: — Алгыштимэ о Сагбус о Яхвэ, о Дэл э Симеско! Мэ овэл о Ханаан иргати э Симеско.
GEN 9:27 Мэ буглярэл о Дэл э пху э Яфетески, мэ бэшэл о Яфет андэ катунэс ки Симески. Тай мэ овэл о Ханаан лэнги иргати.
GEN 9:28 Пал ко бугулдима о Ной бэшло 350 брэш.
GEN 9:29 Алаи о Ной бэшло 950 брэш тай муло.
GEN 10:1 Аки о пхукаипэ катар Сим, Хам тай Яфет, э Ноески чявэнго, савэндэ пал ко бугулдима аракхлилэ чявэ.
GEN 10:2 О чявэ э Яфетескерэ: о Гомер, о Магог, о Мадай, о Яван, о Тувал, о Мешэх тай о Тирас.
GEN 10:3 О чявэ э Гомерески: о Ашкеназ, о Рифат тай о Тогарма.
GEN 10:4 О чявэ э Яванески: о Элиша, о Таршыш, о Киттим тай о Роданим.
GEN 10:5 Лэндар улэ паш ки моря о дюнядэс тай пхэрдилэ опэр пумарэ пхуя, машкарэ пумарэ дюнядэндэ; кажнестэ лэски чиб тай лэски порода.
GEN 10:6 О чявэ э Хамески: о Куш, о Мицраим, о Пут тай о Ханаан.
GEN 10:7 О чявэ э Кушэски: о Сева, о Хавила, о Савта, о Раама тай о Савтеха. О чявэ э Раамаски: о Шэва тай о Дедан.
GEN 10:8 О Куш сас о дад ли э Нимродеско, саво уло о баштутно опэр пху зорало муршари.
GEN 10:9 Ов сас баро астардимари э гайваненго ангал Сагбус Яхвэ, оничин пхэнлёлпэс: «Баро астардимари ангал Сагбус Яхвэ, сар о Нимрод».
GEN 10:10 О баштутнэ диза андэ лэски патишайлыкестэ сас о Вавилон, Эрех, Аккад тай о Халне андэ пху Шынар.
GEN 10:11 Андар одолэ пхуятэ ов накхло андэ пху Ашшур, катэ тхэдяс э Ниневия, Реховот-Ир, Калах
GEN 10:12 тай Ресен, машкарэ ки Ниневия тай ки бари диз Калах.
GEN 10:13 О Мицраим сас о дад э лудеенго, анамеенго, легавеенго, нафтухеенго,
GEN 10:14 патрусеенго, каслухеенго (савэндар улэ о филистимляня), тай кафтореенго.
GEN 10:15 О Ханаан сас о дад э Сидонеско, о баштутно лэско, о Хет,
GEN 10:16 ай генэ евусеенго, амореенго, гергашэенго,
GEN 10:17 хивеенго, аркеенго, синеенго,
GEN 10:18 арвадеенго, цэмареенго тай хаматеенго. Дэчи э Ханаанески порода паляштыпэс,
GEN 10:19 тай о четя э Ханаанески сас катар Сидон ко Герар джи ки Газа, ай отхар ко Садом, Гамора, Адма тай Цэвоим джи ко Лаша.
GEN 10:20 Асавке улэ катар Хам дюнядэс андэ пумарэ породэс, пумарэ чибаса, андэ пумарэ пхуя.
GEN 10:21 Аракхлилэ чявэ ли ко Сим, ко баро пхрал ки Яфетеско. О Сим сас о дад алаи э Эверески чявэнго.
GEN 10:22 О чявэ э Симески: о Элам, о Ашшур, о Арпахшад, о Луд тай о Арам.
GEN 10:23 О чявэ э Арамески: о Уц, о Хул, о Гетер тай о Мешэх.
GEN 10:24 Ко Арпахшад аракхлило о Шэлах, ай ко Шэлах аракхлило о Эвер.
GEN 10:25 Ко Эвер аракхлилэ дуй чявэ: о екх бучёлас Пелег (вай андэ лэски десендэ э пху сас палящимэ), ай лэски пхралэс — Ёктан.
GEN 10:26 О Ёктан сас о дад э Алмодадеско, Шалефеско, Хацармаветеско, Ерахеско,
GEN 10:27 Гадорамеско, Узалеско, Дикласко,
GEN 10:28 Овалеско, Авимаилеско, Шэваско,
GEN 10:29 Офиреско, Хавиласко тай Ёвавеско. Алаи он сас о чявэ э Ёктанески.
GEN 10:30 Э область, катэ он бэшэнас, сас катар Меша джи ки Сефар андэ васточня горадэс.
GEN 10:31 Асавке улэ катар Сим дюнядэс андэ пумарэ породэс, пумарэ чибаса, андэ пумарэ пхуя.
GEN 10:32 Асавке породэс э Ноески чявэнги, лэнги породэндар андэ лэнги дюнядэс. Лэндар пал ко бугулдима улэ алаи о дюнядэс опэр пху.
GEN 11:1 Андэ алаи ко дюняс сас екх чиб тай екх зборэс.
GEN 11:2 О мануша джянас ко вастоки тай никлистэ опэр шужы ливади андэ Шынари тай ачилэ тэ бэшэн отхэ.
GEN 11:3 Он пхэнлэ екхаврэски: — Элан керас кирпичя катар глина тай тэ тхарас лэн лачес. Аякха о мануша ки барэнго тхан тхэнас кирпичя, савэ он колискерэнас смоласа.
GEN 11:4 Дэчи он пхэнлэ: — Элан тхас амэнги диз башняса джи ко булутя. Аякха амэ кан махтадияс амаро нав, тай на кан дуряс опэр алаи ки пху.
GEN 11:5 О Сагбус о Яхвэ фулистино тэ дикхел карин диз тай башня, савэ тхэнас о чявэ э манушэнги,
GEN 11:6 тай пхэнляс: — Алаи о мануша — екх дюняс, лэндэ екх чиб. Тай он токо лилэ тэ керэн алаи. Акана со тэ на манген, алаи кан керэн.
GEN 11:7 Элан фуляс тэ намискерас лэнги зборэс, тэ на галён екхаврэс.
GEN 11:8 Тай о Сагбус о Яхвэ дурярдяс лэн отхар опэр алаи ко муй ки пхуяко, тай он тэрдилэ тэ тхэн одоя диз.
GEN 11:9 Аки соски ов сас тхэдо Вавилон — вай о Сагбус о Яхвэ намискердяс отхэ о зборэс алаи э дюняски. Отхар о Сагбус о Яхвэ дурярдяс лэн опэр муй алаи ки пхуяко.
GEN 11:10 Аки о пхукаипэ катар Сим тай лэски пуендар. Э Симески сас шэл брэш, кана лэстэ аракхлило о Арпахшад. Адава уло до брэшэндар пал ко бугулдима.
GEN 11:11 Пал ко аракхлима ки Арпахшадеско о Сим бэшло 500 брэш, тай лэстэ сас генэ чявэ тай чяя.
GEN 11:12 Кана о Арпахшад бэшло 35 брэш, лэстэ аракхлило о Шэлах.
GEN 11:13 Пал ко аракхлима ки Шэлахеско о Арпахшад бэшло 403 брэш, тай лэстэ сас генэ чявэ тай чяя.
GEN 11:14 Кана о Шэлах бэшло 30 брэш, лэстэ аракхлило о Эвер.
GEN 11:15 Пал ко аракхлима ки Эвереско, о Шэлах бэшло 403 брэш, тай лэстэ сас генэ чявэ тай чяя.
GEN 11:16 Кана о Эвер бэшло 34 брэш, лэстэ аракхлило о Пелег.
GEN 11:17 Пал ко аракхлима ки Пелегеско о Эвер бэшло 430 брэш, тай лэстэ сас генэ чявэ тай чяя.
GEN 11:18 Кана о Пелег бэшло 30 брэш, лэстэ аракхлило о Реу.
GEN 11:19 Пал ко аракхлима ки Реуско о Пелег бэшло 209 брэш, тай лэстэ сас генэ чявэ тай чяя.
GEN 11:20 Кана о Реу бэшло 32 брэш, лэстэ аракхлило о Серуг.
GEN 11:21 Пал ко аракхлима ки Серугеско о Реу бэшло 207 брэш, тай лэстэ сас генэ чявэ тай чяя.
GEN 11:22 Кана о Серуг бэшло 30 брэш, лэстэ аракхлило о Нахор.
GEN 11:23 Пал ко аракхлима ки Нахореско о Серуг бэшло 200 брэш, тай лэстэ сас генэ чявэ тай чяя.
GEN 11:24 Кана о Нахор бэшло 29 брэш, лэстэ аракхлило о Терах.
GEN 11:25 Пал ко аракхлима ки Терахеско о Нахор бэшло 119 брэш, тай лэстэ сас генэ чявэ тай чяя.
GEN 11:26 Пал отхэ сар о Терах бэшло 70 брэш, лэстэ аракхлилэ о Аврам, о Нахор тай о Аран.
GEN 11:27 Аки о пхукаипэ катар Терах тай лэски пуендар. Ко Терах аракхлилэ о Аврам, о Нахор тай о Аран. Ко Аран аракхлило о Лот.
GEN 11:28 Кана лэско дад о Терах сас дага дживиндо, о Аран муло андэ диз Ур, катэ бэшэнас о халдея, андэ пху, кай ов аракхлило.
GEN 11:29 О Аврам тай о Нахор лилэ пэски ромнян. Э ромни э Аврамески бучёлас Сара, ай э ромни э Нахорески — Милка. О Аран — о дад э Милкако тай э Искако.
GEN 11:30 Ки Сара на сас пуя, вай латэ нащи аракхлёнас пуя.
GEN 11:31 О Терах лиляс пэ чявэс э Аврамес, пэ турунес э Лотес, э чявэс э Аранескерэс, тай пэ боря э Сара, э ромня э Аврамески, тай екхетханэ он гелэ андар Ур, катэ бэшэнас о халдея, андэ Ханаан. Тай алэ джи ко Харан, катэ ачилэ тэ бэшэн.
GEN 11:32 О Терах бэшэлас 205 брэш тай муло андэ Харан.
GEN 12:1 О Сагбус о Яхвэ пхэнляс э Аврамески: — Ачяв ти пху, то дюняс тай тэ дадэско кхер тай джя ки пху, сави Мэ туки кан сикавав.
GEN 12:2 Мэ кан керав тутар баро дюняс, кан алгыштияв тут тай кан керав намлыс то нав. Ту аврэнги кан овэс бахт!
GEN 12:3 Мэ кан дав лачипэ одолэн, кон мангел туки лачипэ, тай кан дав арманя одолэс, кон дэл арманя тут. Булуб туки кан диндён бахт алаи о дюнядэс опэр пху.
GEN 12:4 Тай о Аврам гело ко дром, сар пхэнляс лэски о Сагбус о Яхвэ, тай о Лот гело екхетханэ лэса. Кана ов гело андар Харан, э Аврамески сас 75 брэш.
GEN 12:5 Ов лиляс пэса пэ ромня э Сара, пэ пхралэски чявэс э Лотес, алаи о мангин, саво он кидинэ, тай э манушэн, савэ лэндэ сас андэ Харан. Он гелэ андэ Ханаан тай ало отхэ.
GEN 12:6 О Аврам накхло опэр адалэ пхуятэ джи одолэ тханэстэ андэ Шэхем, катэ сас тэрдо о тэрэки тэрэбинт, саво бучёлас Морэ. Одова вахыти отхэ бэшэнас о ханаанея.
GEN 12:7 О Сагбус о Яхвэ сикавдяспэс э Аврамески тай пхэнляс: — Мэ кан дав адая пху тэ пуен. О Аврам кердяс отхэ алтари э Сагбуски э Яхвэски, Саво сикавдяспэс лэски.
GEN 12:8 Отхар ов гело андэ горадэнго тхан ко вастоки катар Вефиль. Тай тхэдяс пи катуна аякха, кай сас о Вефиль карин запад, ай о Гай — карин вастоки. Отхэ ов кердяс алтари э Сагбуски э Яхвэски тай мангляс Лэско нав.
GEN 12:9 Дэчи о Аврам гело катар тхан тай гело дром ко юги, ко Негев.
GEN 12:10 Опэр пху сас бокх, бут бари, тай о Аврам накхло ко Египти.
GEN 12:11 Кана он пашонас ко Египти, ов пхэнляс пэ ромняки э Сараки: — Алаи кан дикхен, кай ту шукар джювли.
GEN 12:12 Кана о египтяня кан дикхен тут, он кан тюшундиен: «Адая лэски ромни», — тай кан мударэн ман, ай тут кан ачявэн дживиндя.
GEN 12:13 Пхэн, кай сан ми пхэн. Дэчи булуб туки манца кан овэн лаче, тай кан ачяв дживиндо.
GEN 12:14 Кана о Аврам ало андэ Египти, о египтяня дикхлэ, кай э Сара бут шукар.
GEN 12:15 Ай кана ла дикхлэ о князя э фараонески, он махтадылар ла э фараонески, тай э Сара лилэ лэстэ андэ патишайлытико кхер.
GEN 12:16 Ов кердяс лачипэ э Аврамески булуб э Сараки. Ко Аврам сас бузнэ, бакрэ, гурува, джёрэ тай джёря, иргатя тай иргатинкес, тай камилэс.
GEN 12:17 Ай о Сагбус о Яхвэ бичялдяс джюнгалэ насвалиматэс опэр фараони тай алаи опэр лэски кхерутнэндэ, андар одолэстэ кай ов лиляс э Сара, э Аврамески ромня, андэ пэ кхерэстэ.
GEN 12:18 Дэчи о фараони диняс икос э Аврамес тай пхучляс: — Со кердян манца? Соски ту на пхэнлян манги, кай ой — ти ромни?
GEN 12:19 Соски ту пхэнлян, кай ой ти пхэн? Екх андар адалэстэ мэ манглём тэ лав ла. Аки ти ромни, лэла тай джя атхар!
GEN 12:20 О фараони пхэнляс пэ манушэнги тэ кувдиен э Аврамес отхар екхетханэ э ромняса тай алаеса, со сас лэстэ.
GEN 13:1 О Аврам пэ ромняса тай алаи э мангинэса гело андар Египти андэ Негев, тай о Лот гело лэса.
GEN 13:2 Ко Аврам акана сас бут гайваня, руп тай пхол.
GEN 13:3 Андар Негев ов гело англэ дром, бискай на ало андэ Вефиль, одолэ тханэстэ, катэ буруни тэрди лэски катуна, машкарэ ко Вефиль тай Гай,
GEN 13:4 одолэ тханэстэ, катэ ов кердяс алтари. Отхэ о Аврам мангляс о нав э Сагбуско э Яхвэско.
GEN 13:5 Ли ко Лоти, саво ладэлас э Аврамеса, сас бузнэ, бакрэ, гурувня тай катунэс.
GEN 13:6 Тай э пху на рэсэлас лэнги э донги: лэндэ сас аякха бут алаи, кай он нащи бэшэнас екхетханэ.
GEN 13:7 Машкарэ ко чёбаня ки Аврамески тай ко чёбаня ки Лотески ули чингар. Озаман андэ одолэ пхуятэ бэшэнас о ханаанея тай о периззея.
GEN 13:8 Дэчи о Аврам пхэнляс э Лотески: — На камэл амэнги тай амарэ чёбаненги чингар, вай амэ тухумя.
GEN 13:9 Дикх! Алаи э пху ангал тутэ. Эла ту тэ джяса ки леви рик, мэ кан джяв ки прави рик, ай ту тэ джяса ки прави рик, дэчи мэ кан джяв ки леви рик.
GEN 13:10 О Лот варды тай дикхляс, кай алаи э Иордански ливади джи ко Цоар лачес суслелас, сар сади э Сагбуско э Яхвэско, сар э пху египтески. Адава дага сас ангал, сар о Сагбус о Яхвэ хурдярдяс о Садом тай э Гомора.
GEN 13:11 О Лот лиляс пэски алаи э ливади э Иордански тай гело ко вастоки. Он паляштыларпэс:
GEN 13:12 о Аврам бэшэлас андэ пху ханаанеенги, ай о Лот бэшэлас машкарэ ко диза ки ливадякерэ, тхэдяс катунэс надур катар Садом.
GEN 13:13 О мануша э Садомески сас нашужэ тай бут бэзялэ ангал ко Сагбус ко Яхвэ.
GEN 13:14 О Сагбус о Яхвэ пхэнляс э Аврамески пал отхэ, сар о Лот паляштыпэс лэстар: — Дикх анкха агорял тутэ. Дикх карин север тай карин юги, карин вастоки тай карин запад.
GEN 13:15 Алаи э пху, сави ту дикхес, Мэ кан дав тут тай тэ пуен алаи э вахытески.
GEN 13:16 Мэ кан керав тэ пуен бут, сар кишай, тай кон кан гинэл э кишай, дэчи тэ пуя кан овэн гиндэ.
GEN 13:17 Джя, пхер опэр адалэ пхуятэ дулгимаса тай буглимаса, вай Мэ кан дав ла тутэ.
GEN 13:18 О Аврам кидиняс о катунэс тай гело тэ бэшэл надур катар тэрэкя тэрэбинтя вэш Мамрэ андэ Хеврон. Ов тхэдяс отхэ алтари э Сагбуски э Яхвэски.
GEN 14:1 Одова вахыти о Амрафел, о патишаи э Шынареско, о Ариох, о патишаи э Элласареско, о Кедорлаомер, о патишаи э Эламеско, тай о Тидал, о патишаи э Гоимеско,
GEN 14:2 екхетханэ гелэ маримаса опэр Бэра, ко патишаи ки Садомеско, опэр Бирша, ко патишаи ки Гаморако, опэр Шынав, ко патишаи ки Адмако, опэр Шэмевер, ко патишаи ки Цэвоимеско, тай опэр патишаи ки Бэлако (самким Цоар).
GEN 14:3 Адала патишая тхэдэ екхетханэ пумари зор андэ ливади Сиддим (катэ акана Лонди моря).
GEN 14:4 Дэшудуй брэш он э сас тал зор ки Кедорлаомерески, ай ко дэшутрито брэш ваздиндилэ.
GEN 14:5 Андэ дэшуштарто брэш о Кедорлаомер тай екхетханэ лэса о патишая никлистэ тай мудардэ э рефаимеен андэ Аштерот-Карнаим, э зузеен андэ Гам, э эмеен андэ Шавэ-Кирьятаим
GEN 14:6 тай э хореен опэр горадэс Сеир, опэр дром андэ Эл-Паран, ко чети ки ливадяко.
GEN 14:7 Отхар он болдинэ палэ тай алэ ко Эн-Мишпат (самким ки Кадэш) тай лилэ алай э пху э амалекитяненги, тай аякха ли э амореенги, савэ бэшэнас андэ Хацацон-Тамар.
GEN 14:8 Мамуй лэндэ тэрдилэ о патишаи э Садомеско, о патишаи э Гаморако, о патишаи э Адмако, о патишаи э Цэвоимеско тай о патишаи э Бэлако (самким Цоар). Андэ ливади Сиддим он лилэ тэ марэнпэс
GEN 14:9 мамуй ко Кедорлаомер, патишаи э Эламеско, ко Тидал, патишаи э Гоимеско, ко Амрафел, патишаи э Шынареско, тай ко Ариох, патишаи э Элласареско, — штар патишая мамуй панджендэ.
GEN 14:10 Андэ ливади Сиддим сас бут холя смоласки. Кана о патишая Садомеско тай Гаморако лилэ тэ нашэн, о бут пэлэ андэ холя, ай авэра нашлэ андэ горадэс.
GEN 14:11 Штар патишая лилэ алаи о мангин э Садомеско тай э Гаморако тай алаи лэнго хапэ тай гелэ.
GEN 14:12 Он лилэ ли э Лотес, э Аврамески пхралэски чявэс, саво бэшэлас андэ Садом, тай алаи лэско мангин.
GEN 14:13 Екх андар одолэндэ, кон кутардыпэс, ало тай пхукавдяс адалэстар э евреески э Аврамески. О Аврам бэшэлас надур катар тэрэкя тэрэбинтя, савэ сас э амореески э Мамрэски. О Эшкол тай о Анэр сас пхрала лэса. О Аврам тай он сас амала.
GEN 14:14 Кана о Аврам шунляс, кай лэско тухуми астардо, ов кидиняс тришэл дэшуохто муршэн, савэ аракхлилэ андэ лэски кхерэстэ, тай галёнас лачес тэ марэнпэс. Он прастанилэ пал ко штар патишая тай джянас пал лэндэ джи ко Дан.
GEN 14:15 О Аврам паляшты пэ иргатен, рати пэло опэр лэндэ. Он лилэ тэ нашэн, ай о Аврам джялас пал лэндэ джи ки Хова, ко север катар Дамаск.
GEN 14:16 Ов лиляс палэ алаи о мангин э душманенго. Тай генэ лиляс пэски пэ тухумес э Лотес, лэско мангин, э джювлен тай э манушэн.
GEN 14:17 Кана о Аврам мардяс э Кедорлаомерес тай э патишаен, савэ сас лэса, ов лиляс тэ джял кхерэ. Дэчи о патишаи э Садомеско никлисто тэ дикхел лэс ки ливади Шаве (самким Патишайлытико ливади).
GEN 14:18 О Мелхисэдэк, о патишаи э Салимеско, никалдяс манро тай винас. Ов сас попази э Уче Дэвлэско. Ов алгышты э Аврамес акасавке зборэнца:
GEN 14:19 — О Учё Дэл, саво кердяс о булутя тай э пху, мэ алгыштиел э Аврамес!
GEN 14:20 Тай махтадипэ э Уче Дэвлэски, саво диняс тэ марэс тэ душманен. О Аврам диняс лэс алаестар дэшто паи.
GEN 14:21 О патишаи э Садомеско пхэнляс э Аврамески: — Дэ мандэ мэ манушэн, ай о мангин ачяв туки.
GEN 14:22 Ай о Аврам пхэнляс э Садомески патишаески: — Мэ ваздинём мо васт ко Сагбус ко Яхвэ, ко Учё Дэл, Саво кердяс о булутя тай э пху, тай динём збора,
GEN 14:23 кай на кан лав тутар джи тхав я кустик катар минис, на кан лав ништо тинро, ту тэ на пхэнэс: «Мэ барвалякердём э Аврамес».
GEN 14:24 Мэ кан лав екх одова, со халэ мэ мануша. Ай кон гело манца — о Анэр, о Эшкол тай о Мамрэ — мэ лэн по паи.
GEN 15:1 Пал атхэ о Сагбус о Яхвэ сикавдяспэс э Аврамески тай пхэнляс: — Ма траша, Аврам. Мэ — то кутардима. То башладима кан овэл бут баро.
GEN 15:2 Ай о Аврам пхэнляс: — Вай, Сагбус Яхвэ, со Ту кан дэс ман? Вай мэ ачяв би пуенго, тай мо мангин кан диндёл ко Элиезер андар Дамаск.
GEN 15:3 О Аврам генэ пхэнляс: — Ту на динян ман пуен, тай о иргати, кай аракхлило андэ мэ кхерэстэ, кан лэл мо мангин.
GEN 15:4 Тай сас лэски збора э Сагбуски э Яхвэски: — Ов на кан лэл. Кан лэл одова, саво кан овэл тутар.
GEN 15:5 Ов никалдяс лэс аври тай пхэнляс: — Дикх карин булутя тай гин о чергэня. Ту кан гинэс лэн? — Тай пхэнляс лэски: — Аборкха кан овэн тутэ пуя.
GEN 15:6 О Аврам пакянило э Сагбуски э Яхвэски, тай Ов гиндяс лэс чячес.
GEN 15:7 Генэ Ов пхэнляс лэски: — Мэ — о Сагбус о Яхвэ, Саво никалдяс тут андар Ур ки халдеенго, тэ дэл тут адая пху.
GEN 15:8 Ай о Аврам пхучляс: — Вай, Сагбус Яхвэ, сар мэ тэ галяв, кай ой кан овэл минри?
GEN 15:9 О Сагбус о Яхвэ пхэнляс лэски: — Ан Манги тринэ брэшэнги гурувня, тринэ брэшэнги бузня тай тринэ брэшэнги бакрэс, тай генэ ан голубка тай тэрнэ голубес.
GEN 15:10 О Аврам аякха ли кердяс. Ов чиндяс лэн дуй котора тай тхэдяс о котора о екх мамуй аврэстэ. Ай э чириклен ов на чиндяс дуй котора.
GEN 15:11 О барэ канлыдэс чирикля кидэнаспэс опэр мулэ тэня, ай о Аврам кувдиелас лэн.
GEN 15:12 Сар бэшло о кхам, э Аврамес лиляс зорало суно. Атхэ вэркатэ фулистини кали тэмина, тай бари траш лиляс лэс.
GEN 15:13 О Сагбус о Яхвэ пхэнляс лэски: — Тэ джянэс, кай тэ пуя кан овэн джятя андэ джяти пху; лэн кан керэн иргатен тай кан тасавэн штаршэл брэш.
GEN 15:14 Ай Мэ кан тасавав о дюняс, саво кердяс лэн иргатен, тай дэчи он кан никлён отхар барэ мангинэса.
GEN 15:15 Ту бут пхуро кан мэрэс андэ рагати тай кан овэс тэ дадэндэ.
GEN 15:16 Атхэ кан авэл о штарто роди тэ породако, вай дага о бэзя э амореенги на улэ джи ко чети.
GEN 15:17 Кана о кхам бэшло тай уло тэмина, бирдэн ули бари яг тай какаи ангарэнца, андар савятэ ваздиндёлас тхув. Он накхлэ машкарэ ко чиндэ котора.
GEN 15:18 Андэ одова дес о Сагбус о Яхвэ кердяс завети э Аврамеса тай пхэнляс: — Мэ дав тэ пуен адая пху, катар египтески диряв джи ки бари диряв Евфрат:
GEN 15:19 э пху э кенеенги, кенезеенги, кадмонеенги,
GEN 15:20 хетеенги, периззеенги, рефаимеенги,
GEN 15:21 амореенги, ханаанеенги, гиргашэенги тай евусеенги.
GEN 16:1 Ки Сара, ки ромни ки Аврамески, на аракхлёнас пуя лэски. Латэ сас иргатинка андар Египти, ой бучёлас Агарь.
GEN 16:2 Э Сара пхэнляс э Аврамески: — О Сагбус о Яхвэ на диняс ман пуен. Джя, пашлё мэ иргатинкаса. Файма, латар мандэ кан овэн пуя? О Аврам кердяс, сар пхэнляс э Сара.
GEN 16:3 Э Сара, лэски ромни, лиляс пэ иргатинка, э египтянка э Агаря, тай диняс сар ромня пэ ромэстэ. Адава кана уло, о Аврам бэшэлас андэ Ханаан дэш брэш.
GEN 16:4 Ов пашлило э Агаряса, тай ой насвалили пуёстэ. Кана э Агарь галили, кай насвали пуёстэ, ой лиляс тэ на гинэл пэ сагбуиса.
GEN 16:5 Дэчи э Сара пхэнляс э Аврамески: — Ой кай керэл манги хурлуки, ту сан дошало. Мэ динём э иргатинка тутэ опэр тхан, ай акана ой джянэл, кай насвали пуёстэ, тай на гинэл ман. Мэ керэл о Сагбус о Яхвэ амэнги цындос.
GEN 16:6 — Вай ой ти иргатинка. Кер ласа, со мангес, — пхэнляс о Аврам. Дэчи э Сара лиляс аякха тэ тасавэл э Агаря, кай одоя нашли латар.
GEN 16:7 О Миляики э Сагбуско э Яхвэско аракхляс э Агаря андэ ливади, надур катар ханинг. Адая ханинг сас паш ко дром ко Шур.
GEN 16:8 Ов пхучляс: — Агарь, иргатинка э Сараки, катар ту алян тай кай джяс? — Мэ нашав мэ сагбуисатар катар Сара, — пхэнляс ой.
GEN 16:9 Дэчи о Миляики э Сагбуско э Яхвэско пхэнляс лаки: — Джя палэ тэ сагбуисатэ тай шун ла.
GEN 16:10 Генэ о Миляики э Сагбуско э Яхвэско пхэнляс лаки: — Мэ аякха бут кан керав тэ пуен, кай лэн нащи кан гинэс.
GEN 16:11 Генэ о Миляики э Сагбуско э Яхвэско пхэнляс лаки: — Ту акана насвали пуёстэ, тай кан аракхлёл тутэ чяво. Тхэ лэс Измаил, оничин о Сагбус о Яхвэ шунляс тэ хурлукестар.
GEN 16:12 Ов кан овэл, сар вэшэско джёро; лэски васта кан овэн мамуй алаендэ, тай о васта алаенги кан овэн мамуй лэстэ, ов кан бэшэл андэ душманлыки алаи пэ пхралэнца.
GEN 16:13 Э Сагбуски э Яхвэски, Саво зборизэлас ласа, Агарь диняс нав Эль-Рои, вай ой пхэнляс: — Анкха мэ дикхлём Одолэс, Кон дикхел ман.
GEN 16:14 Аки соски одоя ханинг бучёлас Бээр-Лахай-Рои. Ой ли анкха отхэ, машкарэ ко Кадэш тай ко Беред.
GEN 16:15 Ки Агарь аракхлило чяво э Аврамески, тай ов тхэдяс пэ чявэс Измаил.
GEN 16:16 Э Аврамески сас охтодэша шов брэш, кана лэско чяво о Измаил аракхлило ки Агарь.
GEN 17:1 Кана э Аврамески сас энядэша эня брэш, о Сагбус о Яхвэ сикавдяспэс лэски тай пхэнляс: — Мэ — о Дэл о Баро-Зорало. Пхер ангал Мандэ тай ов чячё.
GEN 17:2 Мэ дав тут Мо завети тай кан дав тут бут-бут пуен.
GEN 17:3 О Аврам бангило моса джи ки пху, тай о Дэл пхэнляс лэски:
GEN 17:4 — Мэ ригатар, аки туки Мо завети: ту кан овэс о дад бутэ дюнядэнго.
GEN 17:5 Адалэ вахытестар туки на кан пхэнэн Аврам, то нав кан овэл Авраам, вай Мэ кердём тут о дад бутэ дюнядэнго.
GEN 17:6 Тутэ кан овэн бут пуя. Мэ кан керав тутар дюнядэс, тай тутар кан овэн патишая.
GEN 17:7 Мэ дав тут завети тай адава завети аякхажэ кан овэл алаи тэ пуенго алаи о вахытя: Мэ кан овав то Дэл тай о Дэл тэ пуенго.
GEN 17:8 Алаи э пху Ханаан, катэ ту анкха джяти, Мэ кан дав тутэ тай тэ пуендэ, тай ой кан овэл сальтя тинри. Тай Мэ кан овав лэнго Дэл.
GEN 17:9 О Дэл пхэнляс э Авраамески: — Тэ ригатар, ту тай тэ пуя, кай кан овэн пал тутэ, алаи о вахыти камэл тэ керэс Мо завети.
GEN 17:10 Аки Мо завети туса тай тэ пуенца пал тутэ, саво камэл ту тэ керэс: кажын мурш мэ овэл абрезани.
GEN 17:11 Кажнески камэл тэ овэл кердо абрезания, тай адава кан овэл завети машкарэ Мандэ тай тумэндэ.
GEN 17:12 Кажын тумаро пуёс мурш камэл тэ овэл абрезани, кана лэски кан овэл охто дес; аякха камэл тэ керэн алаи о породэс. Тай одова, кон аракхлило андэ тэ кхерэстэ, тай одова, кон нанай андар тэ породатэ, ами киндо ловэнги джятендэ.
GEN 17:13 Тай кай аракхлило андэ тэ кхерэстэ, тай киндо ловэнги камэл тэ овэл абрезани. Мо завети опэр тумарэ тэнестэ кан овэл завети сальтя.
GEN 17:14 Одова, кон на кан овэл абрезани, кан овэл кувдимэ андар пэ дюнястэ, вай пхагердяс Манца о завети.
GEN 17:15 Генэ о Дэл пхэнляс э Авраамески: — Ма пхэн тэ ромняки Сара, лако нав кан овэл Сарра.
GEN 17:16 Мэ кан алгыштияв ла тай кан дав тут латар чявэс. Мэ кан алгыштияв ла аякха, кай ой кан овэл э дай э дюнядэнги тай э патишаенги.
GEN 17:17 О Авраам бангило моса джи ки пху, ай асанило тай тюшунды: «Кан аракхлёл чяво ко мануш, савэски шэл брэш? Кан аракхлел пуёс ки Сарра, савяки энядэша?»
GEN 17:18 Тай ов пхэнляс э Дэвлэски: — Хоч о Измаил тэ овэл дживиндо ангал Тэ мостэ!
GEN 17:19 О Дэл пхэнляс: — Адава тэ ромнятэ ки Сарра кан аракхлёл чяво, тай ту кан тхэс лэс Исаак. Адава лэс Мэ кан дав Мо завети. Адава кан овэл сальтя завети лэски тай лэски пуенги.
GEN 17:20 Ли катар Измаил Мэ шунлём тут. Мэ кан алгыштияв лэс тай кан дав бутэ пуен. Ов кан овэл о дад дэшудо сагбудэнго тай барэ дюняско.
GEN 17:21 Ай Мо завети кан дав ко Исаак, саво ки Сарра кан аракхлёл туки адава вахыти окова брэш.
GEN 17:22 О Дэл бытэрды тэ зборизэл э Авраамеса тай ваздиндило лэстар.
GEN 17:23 Одова жэ дес о Авраам лиляс пэ чявэс э Измаилес тай алаен, кон аракхлило андэ лэски кхерэстэ тай киндо рупунэ ловэнги, алаи э муршэн андэ кхер, тай абрезал лэн, сар пхэнляс лэски о Дэл.
GEN 17:24 Кана сас о Авраам абрезани, лэски сас энядэша эня брэш.
GEN 17:25 Ай лэски чявэски э Измаилески сас дэшутрин.
GEN 17:26 О Авраам тай лэско чяво о Измаил ли о дуй сас абрезаня андэ екх дес.
GEN 17:27 Тай алаи лэса о мурша андэ кхер ки Авраамеско, ли одова, саво аракхлило андэ лэски кхерэстэ я киндо ко джятя, сас абрезаня екхетханэ лэнца.
GEN 18:1 Десе, кана тхарэлас о кхам, паш ко тэрэкя тэрэбинтя Мамрэ, кана о Авраам сас бэшло ангал пэ катунатэ, лэски сикавдяспэс о Сагбус о Яхвэ.
GEN 18:2 О Авраам ваздиняс пэ якха тай дикхляс ангал пэс тринэ муршэн. Ов дикхляс лэн, прастанило катар удар ки катунако мамуй лэндэ тай бангило джи ки пху.
GEN 18:3 Ов пхэнляс: — Сагбус! Ов мандэ миласа, ма накх пашал мандэ Тэ иргатестэ.
GEN 18:4 Мэ анэн залак пани, тай мэ халярэн тумарэ пинрэ, тай рагантиен тал адалэ тэрэкестэ.
GEN 18:5 Тэ алянус тумэ тумарэ иргатестэ, мэ кан анав тумэнги тэ хан, тумэ кан хан тай кан джян англэ тумаро дром . — Бут лачё, — пхэнлэ он. — Кер, сар пхэнэс.
GEN 18:6 О Авраам сигярдяс ки Сарра андэ катуна тай пхэнляс: — Дэба, никал трин тапцыес лачё варо, кер хумэр тай пэк питэс.
GEN 18:7 Дэчи ов прастанило ки атара, лиляс э лаче тэрнорэ гуруворэс тай диняс ко иргати, саво чяльти пэкляс лэс.
GEN 18:8 Дэчи ов андяс тхуд тай сути, тхэдяс ангал лэндэ э гуруворэс тэ хан. Бискай он ханас, ов сас тэрдо паш лэндэ тал тэрэки.
GEN 18:9 — Кай ти ромни э Сарра? — пхучлэ он. — Окотэ, андэ катуна, — пхэнляс ов.
GEN 18:10 Дэчи о Сагбус о Яхвэ пхэнляс: — Мэ чячес кан авав тутэ авэр брэш, паш адава жэ вахыти, тай ки Сарра, тэ ромнятэ, кан овэл чяво. Э Сарра шунэлас, тэрди пал лэски думэстэ, андэ катуна.
GEN 18:11 О Авраам тай э Сарра сас пхурэ тай барэ брэшэнги, тай одова, со овэл ки джювли, ки Сарра тэрдило.
GEN 18:12 Оничин э Сарра асанили андар пэстэ, тюшунды: «Мэ вай пхурилём, тай мо сагбус пхуро. Мандэ тэ овэл асавки лош?»
GEN 18:13 Дэчи о Сагбус о Яхвэ пхэнляс э Авраамески: — Соски э Сарра асал тай пхэнэл: «Та со, мандэ пхурятэ чячес кан овэл пуёс?»
GEN 18:14 Си шо-то, со нащи керэл о Сагбус о Яхвэ? Мэ кан авав тутэ авэр брэш андэ вахыти, саво камэл, тай ки Сарра кан овэл чяво.
GEN 18:15 Э Сарра трашанили тай лиляс тэ лэл пэ зборэс палэ: — Мэ на асанилём. Ай Ов пхэнляс: — На, ту асанилян.
GEN 18:16 О мурша ущинэ тай лилэ тэ джян карин Садом. О Авраам гелдяс лэн.
GEN 18:17 О Сагбус о Яхвэ пхэнляс: — Мэ на кан гаравав катар Авраам, со мангав тэ керав.
GEN 18:18 Катар Авраам кан овэл баро тай зорало дюняс, тай булуб лэски кан диндён бахт алаи о дюнядэс опэр пху.
GEN 18:19 Вай Мэ тхэдём лэс, ов тэ пхэнэл пэ пуенги, савэ кан аракхлён, тэ пхерэн о дром э Сагбуски э Яхвэско, тэ керэн о чячипэ тай о цындос. Дэчи Мэ, о Сагбус о Яхвэ, кан керав одова, со пхэнлём э Авраамески.
GEN 18:20 О Сагбус о Яхвэ пхэнляс: — Э бэбэря мамуй ко Садом тай ко Гамора асавки бари, отхэ о мануша керэн пхарэ бэзя.
GEN 18:21 Кай тэ фуляв тэ дикхав, алаи си отхэ дошалэ я на. Тэ на, Мэ кан галяв.
GEN 18:22 О мурша болдинэпэс тай гелэ ко Садом, ай о Авраам ачило ангал Сагбус ко Яхвэ.
GEN 18:23 О Авраам пашыло карин Лэстэ тай пхэнляс: — Ту со, кан мударэс э надошалэс э дошалэса?
GEN 18:24 Со, тэ си андэ диз пэинда надошалэ? Ту со, кан хурдярэс тай на кан ачявэс адая диз булуб пэинда надошалэнги?
GEN 18:25 Нащи Ту керэс асавко, тэ мударэс э надошалэн э дошалэса, нащи керэс э надошалэски тай э дошалэски екх. Нащи Ту керэс аякха! Та со, о Цындомари алаи э пхуяко кан керэл начячипэ?
GEN 18:26 О Сагбус о Яхвэ пхэнляс: — Мэ тэ аракхава андэ Садом пэинда надошалэн, кан аядияв булуб лэнги алаи адая диз.
GEN 18:27 Дэчи о Авраам пхэнляс генэ: — Аки, динём ман зор тэ зборизав э Сагбуса, хоч мэ прахос тай катрани.
GEN 18:28 Со, тэ си надошалэ пандженги залак, ниш пэинда? Кан хурдярэс Ту алаи э диз, кай на рэсэн пандж мануша? — Мэ тэ аракхава отхэ саранду пандж, — пхэнляс Ов, — на кан хурдярав ла.
GEN 18:29 О Авраам пхэнляс Лэски генэ екхвар: — Со, отхэ тэ аракхлёна саранда? Ов пхэнляс: — Булуб саранданги Мэ на кан керав адава.
GEN 18:30 Дэчи одова пхэнляс: — Ма холязэ, Сагбуса, кан мукес ман тэ пхэнав. Со, тэ аракхлёна отхэ екх триянда? Ов пхэнляс: — Мэ на кан керав адава, тэ аракхава отхэ триянда.
GEN 18:31 О Авраам пхэнляс: — Аки, мандэ сас асавки зор, кай пхэнлём э Сагбуски. Кай, тэ аракхлёна отхэ екх биш? Ов пхэнляс: — Булуб бишэнги Мэ на кан хурдярав ла.
GEN 18:32 Дэчи о Авраам пхэнляс: — Ма холязэ, Сагбуса, ами мук ман тэ пхэнав генэ екхвар. Со, тэ аракхлёна отхэ екх дэш? Ов пхэнляс: — Булуб дэшэнги Мэ на кан хурдярав ла.
GEN 18:33 Кана о Сагбус о Яхвэ бытэрды тэ зборизэл э Авраамеса, Ов гело, ай о Авраам ало кхерэ.
GEN 19:1 Дуй миляикя алэ андэ Садом бэлвэле, тай о Лот сас бэшло ки бар ки дизаки. Кана о Лот дикхляс лэн, ов ущино тай бангило джи ки пху.
GEN 19:2 — Сагбудэс минрэ, — пхэнляс ов, — мангав тумэн, элан андэ кхер мандэ, тумарэ иргатестэ. Тумэ тэ кан халярэн тумарэ пинрэ тай тэ раткерэн, ай эртэс сабахтан тэ джян тумаро дром. — На, — пхэнлэ он, — амэ кан раткерас ко майдани.
GEN 19:3 Ай ов аякха лачес мангляс лэн, кай он гелэ пал лэстэ тай динэ андэ кхер. Ов диняс лэн хабэ тай пэкляс лэнги писноя питэс, тай он халэ.
GEN 19:4 Ай ангал отхэ сар он пашлилэ, алаи о мурша э Садомески, о тэрнэ тай о пхурэ, агорадылар о кхер.
GEN 19:5 Он дэнас бэбэря э Лотески: — Кай о мануша, савэ алэ тутэ бэлвэле? Никал лэн амэндэ, амэ мангас тэ совас лэнца.
GEN 19:6 О Лот никлисто лэндэ тай пханляс пал пэстэ о удар.
GEN 19:7 Ов пхэнлём: -— На, мэ пхрала, ма керэн асавко джюнгалипэ.
GEN 19:8 Шунэн, мандэ си дуй чяя, савэ дага на сас ромэстэ. Эла мэ кан никалав лэн тумэндэ, тай керэн лэнца, со манген. Ай ма керэн ништо адалэ манушэнги, савэ алэ андэ мэ кхерэстэ.
GEN 19:9 Он пхэнлэ: — Джя катар дром! Тай пхэнлэ: — Аки ту, джяти, алян тай пхэнэс амэнги, со тэ керас! Амэ кан керас туки май хурлуки, ниш лэнги. Он лилэ тэ дэн бутуря э Лотес тай пашылэ тэ хурдярэн о удар.
GEN 19:10 Ай о мурша, савэ сас андэ кхер, сидинэ э Лотес андэ кхер тай пханлэ о удар.
GEN 19:11 Ай одолэн, кон э сас ко удар ки кхерэско, э тэрнэн тай э пхурэн, он корярдэ, аякха кай на аракхенас о удар.
GEN 19:12 Тай он пхэнлэ э Лотески: — Кон генэ тутэ атхэ си? Джямутрэ,чявэ, чяя, кон-то генэ андэ диз? Гел лэн атхар,
GEN 19:13 вай амэ мангас тэ хурдярас адава тхан. Э бэбэря ангал Сагбус Яхвэ адалэ дюнястэ асавки бари, кай Ов бичялдяс амэн тэ хурдярас э диз.
GEN 19:14 О Лот никлисто тай пхэнляс одолэнги, савэ кан овэн лэски джямутрэ, пэ чяянги дэхлэнги: — Чяльти, джян атхар! О Сагбус о Яхвэ кидэлпэс тэ хурдярэл э диз! Ай одола тюшундылар, кай керэл пхэряс.
GEN 19:15 Кана лиляс тэ десёл, о миляикя лилэ тэ сигярдярэн э Лотес, пхэнэнас: — Сигяр! Гел атхар тэ ромня тай тэ до чяян, я ту кан мэрэс екхетханэ адалэ бэзялэ дизаса.
GEN 19:16 Ов на сигярэлас, тай одола о дуй лилэ лэс вастэндар, тай лэски ромня, тай до чяян, вай о Сагбус о Яхвэ сас лэндэ миласа, тай никалдэ лэн пал диз.
GEN 19:17 Тай пал диз о екх андар лэндэ бэбэряса пхэнляс: — Кутардие то бэшыпэ! Ма дикх палэ тай ма тэрдё опэр дром! Наш андэ горадэс, я ту кан мэрэс!
GEN 19:18 Ай о Лот пхэнляс лэнги: — На, Сагбус!
GEN 19:19 Ту аякха лачё манца, тэ иргатестэ, тай Ту сикавдян манги бари мила, кутардиесас мо бэшыпэ. Ай андэ горадэс мэ нащи кан прастав: о хурлуки кан астарэл ман, тай мэ кан мэрав.
GEN 19:20 Аки одоя дизори надур, отхэ мэ кан рэсав тэ прастав, ой набари. Мук ман тэ прастав отхэ — вай ой тикнёри, тай мэ кан овав кутардимэ.
GEN 19:21 Ов пхэнляс: — Лачё, Мэ кан керав ли адава: Мэ на кан хурдярав э диз, савятар ту пхэнэс.
GEN 19:22 Праста отхэ чяльти, вай Мэ нащи керав ништо, бискай ту на кан авэс джи латэ. Оничин одоя диз бучёл Цоар.
GEN 19:23 О кхам ваздиндило, кана о Лот ало ко Цоар.
GEN 19:24 Дэчи о Сагбус о Яхвэ чёрдяс опэр Садом тай Гамора, сар брышым, тхарди сера. Ой али катар Сагбус Яхвэ опрал булутя.
GEN 19:25 Ов хурдярдяс о диза тай алаи одоя риг, тай алаен, кон бэшэлас андэ диза, тай алаи, со барёлас опэр пху.
GEN 19:26 Ай э ромни э Лотески дикхляс палэ тай ули лонэско столби.
GEN 19:27 Авэр сабаги о Авраам ущино эртэс тай ало одолэ тханэстэ, катэ ов сас тэрдо ангал Сагбус Яхвэ.
GEN 19:28 Ов дикхляс карин Садом тай Гамора, тай карин алаи ки ливади, тай дикхляс: бут тхув ваздиндёл катар пху, сар тхув андар пэчи.
GEN 19:29 Аякха, кана о Дэл тхардяс о диза э ливадяки, андэ савэндэ бэшэлас о Лот, Ов тюшунды катар Авраам тай кутарды э Лотес катар хурлуки.
GEN 19:30 О Лот трашалас тэ ачёл андэ Цоар, оничин ов тай лэски дуй чяя нашлэ андэ горадэс. Он екхетханэ ачилэ тэ бэшэн андэ пищера.
GEN 19:31 Э бари чяй пхэнляс э тикняки: — Амаро дад пхуро, тай нанай мурш опэр пху, тэ пашлён амэнца, сар камэл.
GEN 19:32 Эла пиявдярас амарэ дадэс винас тай тэ пашляс лэса. Хоч амарэ дадэстар мэ овэн амэн пуя!
GEN 19:33 Одоя рат он пиявдярдэ пумарэ дадэс винас, тай э бари чяй али тай пашлили лэса. Ов на джянэлас, кана ой пашлили тай кана ой ущини.
GEN 19:34 Авэр дес э бари чяй пхэнляс э тикняки: — Окоя рат мэ пашлилём амарэ дадэса. Эла генэ пиявдярас лэс винас авдес бэлвэле, тай ту кан авэс тай кан пашлёс лэса. Хоч амарэ дадэстар мэ овэн амэн пуя!
GEN 19:35 Он пиявдярдэ пумарэ дадэс винас тай адая рат, ли э тикни чяй али тай пашлили лэса. Тай ов на джянэлас, кана ой пашлили тай кана ой ущини.
GEN 19:36 Аякха ли о дуй чяя э Лотески насвалилэ пуёстэ пумарэ дадэстар.
GEN 19:37 Ки бари чяй аракхлило чяво, тай тхэдяс лэс Моав. Ов — о дад аканутнэ моавитяненго.
GEN 19:38 Ли ки тикни чяй аракхлило чяво, тай тхэдяс лэс Бэн-Амми. Ов — о дад аканутнэ аммонитяненго.
GEN 20:1 Отхар о Авраам гело андэ Негев тай ачило тэ бэшэл машкарэ ко Кадэш тай Шур. Ов саво-то вахыти бэшэлас андэ Герар.
GEN 20:2 Отхэ ов алаенги пхэнэлас, кай э Сарра — лэски пхэн. Оничин о Авимелех, о патишаи э Герареско, бичялдяс пал Сарра тай лиляс ла пэстэ андэ кхер.
GEN 20:3 Ай о Дэл ало ко Авимелех рати андэ суно тай пхэнляс лэски: — Ту кан мэрэс андар джювли, савя ту лилян тутэ андэ кхер. Ой ромэстэ.
GEN 20:4 Ай о Авимелех на колисаило латэ, оничин ов пхэнляс: — Сагбуса, та со, Ту кан мударэс надошалэ дюняс?
GEN 20:5 Адава мануш ов сам пхэнляс, кай ой лэски пхэн, тай ой аякхажэ пхэнляс. Андэ адалэ дилатэ мэ на кердём бэзя нэ андэ мэ илэстэ, нэ вастэнца.
GEN 20:6 О Дэл пхэнляс лэски андэ суно: — Ва, Мэ джянав, кай адава ту кердян шужэ илэса. Адава Мэ астардём тут катар бэзя ангал Мандэ, оничин на муклём тут тэ колизэс латэ.
GEN 20:7 Акана дэ палэ э ромня ко ром, вай ов — прароки. Ов кан алгыштиел тут, тай ту кан ачёс дживиндо. Ай ту тэ на дэса ла, джян, кай ту тай тэ тухумя кан мэрэн.
GEN 20:8 Авэр дес эртэс сабахтан о Авимелех кидиняс алаи пэ иргатен тай пхукавдяс лэнги, со уло, тай он лачес трашанилэ.
GEN 20:9 Дэчи о Авимелех диняс икос э Авраамес тай пхэнляс: — Со ту амэнца кердян? Со джюнгалипэ мэ туки кердём, кай ту тхэдян тэ керас бэзя ман тай алаи мо патишайлыки? Ту кердян манца аякха, сар на камэл тэ керэс.
GEN 20:10 Тай о Авимелех пхучляс э Авраамес: — Со ту тюшундиесас, кана ту кердян асавко?
GEN 20:11 О Авраам пхэнляс: — Мэ тюшундым, со адалэ тханэстэ о мануша чячес на трашан катар Дэл, тай он кан мударэн ман андар мэ ромнятэ.
GEN 20:12 Тай генэ ой чячес ми пхэн — огеи мэ дадэстар. Тай ой ули ми ромни.
GEN 20:13 Кана о Дэл бичялдяс ман андар кхер мэ дадэско аврэ пхуендэ, мэ пхэнлём лаки: «Сикав манги то дэхыпэ, пхэн, кай мэ то пхрал, кай би амэ тэ на авас».
GEN 20:14 Дэчи о Авимелех диняс ко Авраам э Сарра тай генэ андяс лэски бузнен, бакрэн, гурувнен, иргатен тай иргатинкен.
GEN 20:15 О Авимелех пхэнляс: — Ми пху ангал тутэ: бэш, кай мангес.
GEN 20:16 Э Сарраки ов пхэнляс: — Мэ динём тэ пхралэс бини руп, тэ пхандэл якха алаенги, кон эси туса. Ту анкха ангал алаендэ шужы.
GEN 20:17 О Авраам мангелас э Дэвлэс, тай о Дэл аиндырды э Авимелехес, лэски ромня тай э иргатинкен, тэ овэн лэндэ пуя.
GEN 20:18 Ай ангал отхэ андэ кхер ко Авимелех о Сагбус о Яхвэ на дэлас билиекхе джювля пуен андар Сарра, ки ромни ки Авраамески.
GEN 21:1 О Сагбус о Яхвэ, сар Ов пхэнляс, сас миласа ки Сарра тай кердяс, со пхэнлясас.
GEN 21:2 Э Сарра насвалили пуёстэ, тай э пхурэ Авраамески аракхлило чяво, андэ одова вахыти, сар пхэнляс лэски о Дэл.
GEN 21:3 Пэ чявэс, саво аракхлило ки Сарра, о Авраам тхэдяс Исаак.
GEN 21:4 Кана лэски чявэски э Исаакески уло охто дес, о Авраам абрезал лэс, сар пхэнляс лэски о Дэл.
GEN 21:5 Кана аракхлило о Исаак, э Авраамески сас шэл брэш.
GEN 21:6 Э Сарра пхэнляс: — О Дэл тхэдяс ман тэ асав. Кажын, кон кан шунэл адалэстар, кан асал екхетханэ манца.
GEN 21:7 Тай генэ пхэнляс: — Кон би пхэнлясас э Авраамески, кай э Сарра кан хавдярэл колиндэса? Ай мандэ аракхлило чяво лэски андэ лэски пхуримастэ.
GEN 21:8 О пуёс барило тай сас линдо катар колин. Одова дес, кана о Исаак сас линдо катар колин, о Авраам кердяс баро хабэ.
GEN 21:9 Э Сарра дикхляс, кай о чяво, саво аракхлило ки египтянка Агарь э Авраамески, асал катар Исаак,
GEN 21:10 тай пхэнляс э Авраамески: — Кувдие адалэ иргатинка тай лаки чявэс, вай о чяво адалэ иргатинкако на кан палящиел о мангин мэ чявэса э Исаакеса.
GEN 21:11 О Авраам сас бут касывэтлыс, вай адава сас лэско чяво.
GEN 21:12 Ай о Дэл пхэнляс лэски: — Ма ов касывэтлыс андар чяворо тай иргатинка. Шун э Сарра тай кер алаи, сар ой пхэнэл, вай катар Исаак тутэ кан овэн пуя, савэндар Мэ туки пхэнлёмас.
GEN 21:13 Ай Мэ кан керав дюняс ли катар чяво ки иргатинкако, вай ли ов — то чяво.
GEN 21:14 Авэр дес эртэс сабахтан о Авраам лиляс хапэ тай моркхяко гоно панеса тай диняс ки Агарь, тхэдяс лэн лаки опэр пхике тай бичялдяс ла екхетханэ э пуёса. Ой гели ко дром тай пхерэлас андэ ливади Бээр-Шэва.
GEN 21:15 Кана о пани андэ гоно быты, ой ачявдяс э чяворэс тал кущёки
GEN 21:16 тай гели, бэшли надур, о дурипэ, сар кай мукес стрилас, вай тюшундиелас: «На мангав тэ дикхав, сар о чяворо мэрэл». Ой бэшли отхэ надур тай руни.
GEN 21:17 О Дэл шунляс о роипэ э чяворэско, тай о миляики э Дэвлэско болдиняспэс карин Агарь опрал булутя тай пхэнляс лаки: — Со уло, Агарь? Ма траша! О Дэл шунляс, сар ровэл о чяворо отхэ, катэ ов пашло.
GEN 21:18 Ущи, ваздэ э чяворэс тай лэ лэс вастэстар, вай Мэ кан керав лэстар баро дюняс.
GEN 21:19 Тай о Дэл пхутэрдяс лаки якха, тай ой дикхляс ханинг панеса. Ой гили, пхэрдяс о гоно панеса тай пиявдярдяс э чяворэс.
GEN 21:20 О Дэл сас э чяворэса. О Измаил барило, бэшэлас ки ливади тай уло одова, кай мукел стрилас.
GEN 21:21 Ов бэшэлас ки ливади Паран, тай э дай лиляс лэски ромня андар Египти.
GEN 21:22 Андэ одова вахыти о Авимелех тай о Пихол, о баро лэски армияко, пхэнляс э Авраамески: — О Дэл туса андэ алаестэ, со ту керэс.
GEN 21:23 Ха совля манги атхэ ангал Дэл, кай ту на кан керэс джюнгалипэ нэ манца, нэ мэ пуенца, нэ мэ породаса. Кер манги тай э пхуяки, андэ савятэ ту бэшэс, мила, сави кердём мэ туки.
GEN 21:24 О Авраам пхэнляс: — Хав совля.
GEN 21:25 Дэчи о Авраам пхэнляс э Авимелехески катар ханинг э панеса, сави лилэ о иргатя э Авимелехески.
GEN 21:26 Ай о Авимелех пхэнляс: — Мэ на джянав, кон адава кердяс. Ту на пхэнлянас манги, тай джи адалэ десески мэ на шунлёмас адалэстар.
GEN 21:27 О Авраам андяс э тикнэ тай э барэ гайванен тай диняс ко Авимелех, тай он кердэ завети машкарэ пэстэ.
GEN 21:28 О Авраам лиляс андар атара эфта тэрнэ бакрэн,
GEN 21:29 тай о Авимелех пхучляс ко Авраам: — Со си адала эфта тэрнэ бакрэ, савэн ту лилян аврэндар?
GEN 21:30 Ов пхэнляс: — Лэ мэ эфта тэрнэ бакрэн. Мэ овэн он сикаипэ кай мэ хранлём адая ханинг.
GEN 21:31 Аки соски одова тхан сас тхэдо Бээр-Шэва: вай он о дуй отхэ халэ совля.
GEN 21:32 Кана он кердэ завети машкарэ пэстэ андэ Бээр-Шэва, о Авимелех тай о Пихол, о баро лэски армияко, алэ палэ андэ пху ки филистимляненги.
GEN 21:33 О Авраам барярдяс андэ Бээр-Шэва тэрэки тамариски тай мангляс о нав э Сагбуско э Яхвэско, э Дэвлэс, Саво си Сальтя .
GEN 21:34 О Авраам бэшэлас опэр пху ки филистимляненги бут вахыти.
GEN 22:1 Вахытестар о Дэл зумавдяс э Авраамес. Ов пхэнляс лэски: — Авраам! — Мэ атхэ, — пхэнляс о Авраам.
GEN 22:2 О Дэл пхэнляс: — Лэ тэ екхе чявэс, э Исаакес, савэс ту дэхэс, джя ки пху Мориа тай ан лэс отхэ курбани, тхар опэр горас, опэр савэстэ Мэ кан сикава туки.
GEN 22:3 Авэр дес эртэс сабахтан о Авраам ущино, гортярдяс э джёрэс, лиляс пэса до иргатен тай пэ чявэс э Исаакес, пхагердяс кашта ягаки тай гело ко дром одолэ тханэстэ, савэстар пхэнляс лэски о Дэл.
GEN 22:4 Ко трито дес о Авраам ваздиняс пэ якха тай дикхляс дурал одова тхан.
GEN 22:5 Ов пхэнляс э иргатенги: — Ачён атхэ э джёрэса, ай амэ э чяворэса кан джяс отхэ тай кан мангас э Дэвлэс, тай дэчи кан авас тумэндэ.
GEN 22:6 О Авраам лиляс о кашта э ягаки тай тхэдяс лэн опэр думо ки Исаакеско, ай ов гелдяс э яг тай э чюри, тай он о дуй гелэ ко дром.
GEN 22:7 О Исаак пхэнляс пэ дадэски э Авраамески: — Дадэ! — Ва, мо чяво? — пхэнляс о Авраам. — Амэндэ си яг тай кашта, — пхэнляс о Исаак, — ай кай о бакроро э курбанески?
GEN 22:8 О Авраам пхэнляс: — О Дэл Ов сам кан гортярэл бакрорэс курбанески, мо чяво. Тай он о дуй гелэ англэ.
GEN 22:9 Кана он алэ ко тхан, савэстар пхэнляс лэски о Дэл, о Авраам кердяс отхэ алтари тай кидиняс опрал о кашта, пханляс пэ чявэс э Исаакес тай тхэдяс лэс опэр алтари опэр кашта.
GEN 22:10 Ов сидиняс пэ васта тай лиляс чюри, тэ чинэл пэ чявэс.
GEN 22:11 Ай о Миляики э Сагбуски Яхвэско пхэнляс лэски опрал булутя: — Авраам! Авраам! — Мэ атхэ, — пхэнляс ов.
GEN 22:12 — Ма ваздэ то васт опэр чяворо, — пхэнляс Ов, — ма кер лэса ништо. Акана мэ джянав, кай ту трашас катар Дэл, вай ту на аядын Манги тэ екхе чявэс.
GEN 22:13 О Авраам ваздиняс пэ якха тай дикхляс бакрэс, саво пакярдило шынгенца андэ чяря. Ов гело, лиляс э бакрэс тай андяс лэс курбани, тхардяс ко тхан ки чявэско.
GEN 22:14 О Авраам тхэдяс одова тхан Яхвэ-Ирэ, тай отхар джи анкха пхэнлёлпэс: «Опэр горас ки Сагбуски Яхвэско кан аракхлёл».
GEN 22:15 О Миляики э Сагбуски Яхвэско пхэнляс э Авраамески опрал булутя дуйто рази:
GEN 22:16 — Дав совля опэр Мандэ, пхэнэл о Сагбус о Яхвэ: кай ту кердян адава тай на аядын Манги тэ екхе чявэс,
GEN 22:17 Мэ анкха кан алгыштияв тут тай кан керав тэ пуен бут, сар чергэня опэр булутя, сар кишай паш ки моря. Тай тэ пуя кан лэн о диза пумарэ душманенги.
GEN 22:18 Кай ту тхэдян кан Ман, андар тэ пуендэ кан диндён алгышы алаи о дюнядэс опэр пху.
GEN 22:19 О Авраам ало ко иргатя, тай он екхетханэ гелэ андэ Бээр-Шэва. О Авраам ачило андэ Бээр-Шэва.
GEN 22:20 Накхло вахыти, тай э Авраамески пхэнлэ: — Ли э Милка ули дай, аракхлилэ латэ чявэ тэ пхралэски э Нахорески:
GEN 22:21 о Уц, о баштутно, о Буз, лэско пхрал, о Кемуил (о дад э Арамеско),
GEN 22:22 о Кесед, о Хазо, о Пилдаш, о Идлаф тай о Бетуил.
GEN 22:23 О Бетуил уло о дад э Рэвэкако. Адала охто чявэ ки Милка аракхлилэ э Авраамески пхралэски э Нахорески.
GEN 22:24 Лэски иргатинкатэ, сави бучёлас Реума, аракхлилэ чявэ: о Тевах, о Гахам, о Тахаш тай о Мааха.
GEN 23:1 Э Сарра бэшли шэлу биш эфта брэш — адава о брэша э Сарраки.
GEN 23:2 Ой мули андэ Кирьят-Арба (самким Хеврон), андэ пху Ханаан, тай о Авраам ало тэ керэл касывэти пал Сарра тай тэ ровэл пал латэ.
GEN 23:3 Дэчи о Авраам ачявдяс пэ мулэ ромня тай гело ко хетеенги. Ов пхэнляс:
GEN 23:4 — Мэ машкарэ тумэндэ джяти аврэ пхуятар. Бикнэн манги тхан тэ пароскерав э муля.
GEN 23:5 О хетея пхэнлэ э Авраамески:
GEN 23:6 — Сагбуса, шун, ту — Дэвлэско мануш машкарэ амэндэ. Пароскер э муля андэ зиядэ андар амарэ паромаски тханэндэ. Никхон андар амэндэ на кан пхэнэл туки, на дав тхан тэ пароскерэс э муля.
GEN 23:7 Дэчи о Авраам ущино, бангило э манушэнги одолэ пхуякерэнги, э хетеенги.
GEN 23:8 Ов пхэнляс лэнги: — Тэ мукен тумэ тэ пароскерав э муля, дэчи шунэн ман тай манген андар мандэ э Эфронес, э чявэс э Цохарескерэс,
GEN 23:9 ов тэ бикнэл манги э пищера э Махпела, сави си лэски тай си ко чети лэски ливадятэ. Мэ бикнэл ла манги э кимяки, сар керэл о тхан, катэ пароскерэс машкарэ тумэндэ.
GEN 23:10 О хетеи о Эфрон бэшло машкарэ пэ дюнястэ тай пхэнляс э Авраамески ангал алаи ко хетея, савэ алэ ки бар лэски дизатэ.
GEN 23:11 Ов пхэнляс: — На, мо сагбуса, шун ман. Мэ дав тут э ливади тай дав тут э пищера, сави си опэр латэ. Мэ дав тут адава ангал мэ дюнястэ. Пароскер тэ муля.
GEN 23:12 О Авраам генэ бангило э манушэнги одолэ пхуякерэнги
GEN 23:13 тай пхэнляс э Эфронески ангал лэндэ: — Шун акана ту ман. Мэ кан покинав руп э ливадяки. Лэ лэс мандар, мэ тэ пароскерав отхэ э муля.
GEN 23:14 О Эфрон пхэнляс э Авраамески:
GEN 23:15 — Шун ман, мо сагбус. Э пху кай керэл штаршэл шэкеля руп. Та со, адава бут туки я манги? Пароскер тэ муля.
GEN 23:16 О Авраам тхэдяс кан э Эфронес тай алды э кими э ливадяки, кай пхэнлили ангал хетея: штаршэл шэкеля руп, сар кинэн о кинимаря.
GEN 23:17 Аякха э ливади э Эфронески андэ Махпела паш Мамрэ — тай ливади, тай э пищера опэр латэ, тай алаи о тэрэкя опэр ливади — улэ
GEN 23:18 э Авраамески ангал алаи ко хетея, савэ алэ ки дизаки бар.
GEN 23:19 Пал атхэ о Авраам пароскердяс пэ ромня э Сарра андэ пищера опэр ливади Махпела паш ки Мамрэ (кай андэ Хеврон), андэ пху Ханаан.
GEN 23:20 Э ливади, тай э пищера опэр латэ ули э Авраамески катар хетея сар тхан паромаски.
GEN 24:1 О Авраам сас пхуро, барэ брэшэнго, тай о Сагбус о Яхвэ алгышты лэс андэ алаестэ.
GEN 24:2 О Авраам пхэнляс э барэ иргатески андэ пэ кхерэстэ, саво дикхелас пал алаестэ, со лэстэ сас: — Тхэ то васт манги тал шалос
GEN 24:3 тай ха совля манги э Сагбуса э Яхвэса, э булутенги Дэвлэса тай э пхуяки Дэвлэса, кай ту на кан лэс мэ чявэски ромня андар ханаанеенги чяя, машкарэ савэндэ мэ бэшав,
GEN 24:4 ами кан джяс мэ пхуятэ, мэ тухумендэ, тай отхэ кан лэс ромня мэ чявэски э Исаакески.
GEN 24:5 О иргати пхучляс лэс: — Ами тэ на мангела одоя джювли тэ джял манца атхэ, андэ адая пху? Со манги дэчи тэ керав, тэ гелав тэ чявэс андэ одоя пху, катар ту алян?
GEN 24:6 О Авраам пхэнляс: — Тэ на гелэс отхэ мэ чявэс.
GEN 24:7 О Сагбус о Яхвэ э булутенго, саво никалдяс ман андар кхер мэ дадэско тай андар мэ чяче пхуятэ, Саво зборизэлас манца тай халяс совля манги, пхэнляс: «Мэ кан дав адая пху тэ пуендэ». Ов кан бичялэл Пэ миляикес ангал тутэ, ту тэ лэс отхар ромня мэ чявэски.
GEN 24:8 Э джювли тэ на мангела тэ джял туса, ту кан овэс мукло адалэ совлендар. Ай мэ чявэс ма гел отхэ.
GEN 24:9 О иргати тхэдяс по васт тал шалос пэ сагбустэ ко Авраам тай халяс совля лэски.
GEN 24:10 Дэчи о иргати лиляс дэшэ камилэн пэ сагбуски, пхэрдяс лэн лаче шэя лэстар тай гело ко дром. Ов гело андэ Арам-Нахараим, джялас андэ диз, катэ бэшэлас о Нахор.
GEN 24:11 Ов тэрдярдяс э камилэн пал диз ки ханинг. Адава сас паш ки бэлвэль, кана о джювля авэн панески.
GEN 24:12 Ов пхэнляс: — О Сагбус о Яхвэ, о Дэл мэ сагбуско э Авраамеско! Дэ ман авдес лачипэ тай кер мила мэ сагбуски э Авраамески.
GEN 24:13 Аки, мэ тэрдо ки ханинг, тай о чяя адалэ манушэнги авэн панески.
GEN 24:14 Мэ овэл аякха: тэ пхэнава мэ чяяки: «Мангав тут, мук о кхоро опрал пхико, мэ тэ пияв», — ай ой кан пхэнэл: «Пи, ай мэ кан пиявдярав тэ камилэн», — ла Ту да газырлыдын э иргатески Тинрэски э Исаакески. Аякха мэ кан галяв, кай Ту кердян мила мэ сагбуски.
GEN 24:15 Ов дага на бытэрды тэ пхэнэл, кай э Рэвэка, э чяй э Бетуилески, э Милкаки чявэски, э ромни э Авраамески пхралэски э Нахорески, никлисти ко пани кхорэса опэр пхико.
GEN 24:16 Ой сас бут шукар чяй, тэрнагар, сави дага на сас муршэса. Ой мукляспэс ко пани, пхэрдяс о кхоро тай гели палэ.
GEN 24:17 О иргати сигярдяс мамуй тай пхэнляс: — Мангав тут, дэ ман набут пани андар тэ кхорэстэ.
GEN 24:18 — Пи, мо сагбус, — пхэнляс ой, чяльти мукляс о кхоро опэр васта тай диняс лэс тэ пиел.
GEN 24:19 Кана ов пиляс лачес, ой пхэнляс: — Мэ кан пхэрав пани ли тэ камилэнги, бискай он на кан пиен лачес.
GEN 24:20 Ой чяльти чёрдяс о пани андар кхоро андэ копана, прастанили генэ ко пани тэ пхэрэл алаи лэски камилэнги.
GEN 24:21 Ов тэныки дикхелас пал латэ, мангелас тэ галёл, башлады о Сагбус о Яхвэ лачимаса лэско дром.
GEN 24:22 Кана о камилэс пилэ, одова мануш никалдяс пхоляки чяни андэ накх, сави сас пхаримаса екпаш шэкели, тай дуй пхоляки бруслетя, савэ сас дэш шэкеля,
GEN 24:23 тай пхучляс: — Пхэн манги, каски ту чяй? Нанай андэ кхер тэ дадэстэ тхан, амэнги тэ раткерас?
GEN 24:24 Ой пхэнляс лэски: — Мэ э чяй э Бетуилески, э Милкаки чявэски, саво латэ аракхлило э Нахорески.
GEN 24:25 Тай генэ пхэнляс: — Амэндэ бут пхус, тай хапэ э гайваненги, тай си тхан тэ раткерэс.
GEN 24:26 Дэчи ов бангило тай махтады э Сагбус э Яхвэс,
GEN 24:27 пхэнляс: — Махтадипэ э Яхвэски, Дэвлэски мэ сагбускерэски э Авраамески, Саво на ачявдяс би Пэ милако тай би чячимаско мэ сагбус! О Сагбус о Яхвэ андяс ман доврус андэ кхер ко тухумя мэ сагбускерэндэ.
GEN 24:28 Э чяй прастанили тай пхукавдяс алаестар андэ кхер пэ дэятэ.
GEN 24:29 Ки Рэвэка сас пхрал, саво бучёлас Лаван, тай ов сигярдяс одолэ манушэстэ ки ханинг.
GEN 24:30 Сар ов дикхляс э чяни э накхески тай бруслетя ко васта пэ пхэнятэ тай шунляс о пхукаипэ э Рэвэкако одолэстар, со пхэнляс лаки одова мануш, ов гело лэстэ, ай одова аякха да тэрдо э камилэнца ко панги.
GEN 24:31 — Гадэ амэндэ, алгыштимэ э Сагбуса э Яхвэса, — пхэнляс о Лаван. — Соски ту тэрдо атхэ аври? Мэ гортярдём кхер тай тхан э камилэнги.
GEN 24:32 Одова мануш диняс андэ кхер, тай опрал камилэс сас линдэ о сидладэс. Э камилэнги андэ пхус тай хапэ, ай лэски тай лэски манушэнги андэ пани, тэ халярэн пумарэ пинрэ.
GEN 24:33 Ангал лэстэ тхэдэ хапэ, ай ов пхэнляс: — Мэ на кан хав, бискай на пхукава, со камэл мэ тэ керав. — Пхукав, — пхэнляс о Лаван.
GEN 24:34 Ов пхэнляс: — Мэ — о иргати э Авраамеско.
GEN 24:35 О Сагбус о Яхвэ бут лачес алгышты мэ сагбус, тай ов уло барвало. Ов диняс лэс бакрэн, бузнен, гурувнен, руп тай пхол, иргатен тай иргатинкен, камилэн тай джёрэн.
GEN 24:36 Мэ сагбуски ромнятэ ки Сарра аракхлило лэски чяво опэр пхуримастэ, тай ов ачявдяс лэски алаи, со лэстэ си.
GEN 24:37 Мо сагбус пхэнляс манги тэ хав совля тай пхэнляс: «Ма лэ ромня мэ чявэски э ханаанеенги чяен, андэ каски пхуятэ мэ бэшав,
GEN 24:38 ами джя мэ дадэски хорандастэ, мэ тухумендэ, тай отхар лэ ромня мэ чявэски».
GEN 24:39 Мэ пхучлём мэ сагбус: «Ай со, одоя джювли тэ на джяла манца?»
GEN 24:40 Ов пхэнляс: «О Сагбус о Яхвэ, ангал муй Савэстэ мэ пхерав, кан бичялэл туса Пэ миляикес тай кан керэл лачипэ андэ ти дила, ту тэ лэс ромня мэ чявэски андар мэ тухумендэ тай андар мэ дадэски хорандастэ.
GEN 24:41 Екх озаман ту кан овэс мукло адалэ совлендар, кана кан овэс андэ кхер мэ дадэстэ, тай тэ пхэнэна, на дас ла тутэ, дэчи ту кан овэс мукло катар совля».
GEN 24:42 Кана мэ авдес алём ко пани, мэ пхэнлём: «О Сагбус о Яхвэ, о Дэл мэ сагбуско э Авраамеско, екх тэ дэсас би Ту лачипэ андэ мэ дилатэ, савяса мэ бичялдо!
GEN 24:43 Аки мэ тэрдо ко пани. Тэ никлёла чяй тэ пхэрэл пани, тай мэ кан пхэнав лаки: "Мангав тут, дэ ман тэ пияв пани андар тэ кхорэстэ",
GEN 24:44 — тай ой тэ пхэнэла манги: "Пи, ай мэ кан пхэрав пани ли тэ камилэнги", — дэчи о Сагбус о Яхвэ гортярдяс ла мэ сагбуски чявэски».
GEN 24:45 Дага мэ на бытэрдым тэ мангав андэ мэ илэстэ, кана никлисти э Рэвэка э кхорэса опэр пхико. Ой мукляспэс ки ханинг тай пхэрдяс пани, тай мэ пхэнлём лаки: «Мангав тут, дэ ман тэ пияв».
GEN 24:46 Ой чяльти фулярдяс о кхоро опрал пхико тай пхэнляс: «Пи, ай мэ кан пиявдярав ли тэ камилэн». Тай мэ пилём пани, ай ой пиявдярдяс э камилэн.
GEN 24:47 Мэ пхучлём ла: «Каски ту чяй?» Ой пхэнляс: «Э чяй э Бетуилески, э Нахорески чявэски, саво лэски аракхлило ки Милка». Дэчи мэ динём ла чяни накхески тай бруслетя вастэнги
GEN 24:48 тай бангилём, махтадым э Сагбус э Яхвэс. Мэ махтадым э Дэвлэс э Яхвэс, э Дэвлэс мэ сагбускерэс э Авраамескерэс, Саво чяче дромэса андяс ман, тэ лав лэски чявэски э туруниса мэ сагбуски пхралэскеря ромня.
GEN 24:49 Акана, тумэ тэ керэна мила тай чячипэ мэ сагбуски, аякха да пхэнэн манги. Ай тэ на, пхэнэн манги, со манги тэ керав.
GEN 24:50 О Лаван тай о Бетуил пхэнлэ: — Адая дила катар Сагбус Яхвэ; на амэнги тэ пхэнас туки ва я на.
GEN 24:51 Аки э Рэвэка ангал тутэ; лэ ла тай джя, тай мэ овэл ой э ромни тэ сагбуски чявэски, сар гортярдяс о Сагбус о Яхвэ.
GEN 24:52 Кана э Авраамеско иргати шунляс адала зборэс, ов бангило ангал Сагбус Яхвэ джи ки пху.
GEN 24:53 Дэчи ов никалдяс о савутя, пхоляки тай рупунэ шэя тай башлады э Рэвэкаке, ай лаки пхралэс тай э дэя ов башлады багалыдэс шэя.
GEN 24:54 Ов тай о мануша, кай сас лэса, ханас, пиенас тай ачилэ тэ раткерэн. Кана авэр дес он ущинэ, ов пхэнляс: — Мукен ман, мэ мангав тэ джяв дром мэ сагбустэ.
GEN 24:55 Ай лако пхрал тай э дай пхэнлэ: — Мэ ачёл э чяй амэнца генэ хоч дэш дес, дэчи джя.
GEN 24:56 Ай ов пхэнляс: — Ма астарэн ман, кай о Сагбус о Яхвэ кердяс лачипэ мэ дилаки. Мукен ман ко дром, мэ тэ авав мэ сагбустэ.
GEN 24:57 Он пхэнлэ: — Кан дас икос э чяя тай кан пхучяс ла.
GEN 24:58 Он динэ икос э Рэвэка тай пхучлэ: — Кан джяс акалэ манушэса? — Кан джяв, — пхэнляс ой.
GEN 24:59 Тай он бичялдэ ко дром пэ пхэня э Рэвэка екхетханэ одоласа, сави хавдярэлас ла, э Авраамески иргатеса тай лэски манушэнца.
GEN 24:60 Он алгыштылар э Рэвэка тай пхэнлэ: — Амари пхэн, тэ овэн гиндэ тэ пуя биненца биня! Тэ лэн тэ пуя о кхера пэ душманенги!
GEN 24:61 Э Рэвэка тай лаки иргатинкес кидинэпэс, бэшлэ опэр камилэс тай гелэ пал одолэ манушэстэ. Аякха о иргати лиляс э Рэвэка тай гело ко дром.
GEN 24:62 О Исаак ало андар Бээр-Лахай-Рои тай бэшэлас андэ Негев.
GEN 24:63 Бэлвэле ов никлисто андэ ливади, ваздиняс пэ якха тай дикхляс, кай авэн камилэс.
GEN 24:64 Ли Рэвэка ваздиняс пэ якха тай дикхляс э Исаакес. Ой фулистини опрал камила
GEN 24:65 тай пхучляс ко иргати: — Кон адава мануш андэ ливади, кай авэл мамуй амэндэ? — Адава мо сагбус, — пхэнляс о иргати. Дэчи ой лиляс басмас тай читяс опэр пэстэ.
GEN 24:66 О иргати пхукавдяс э Исаакески алаестар, со ов кердяс.
GEN 24:67 О Исаак андяс э Рэвэка андэ катуна пэ дэякири ки Сарраки тай лиляс ла ромня. Ой ули лэски ромни, тай ов дэхляс ла. Аякха о Исаак раганты пал пэ дэяки мэримастэ.
GEN 25:1 О Авраам лиляс пэски аврэ ромня, сави бучёлас Хетура.
GEN 25:2 Лэски латэ аракхлило о Зимран, о Йокшан, о Медан, о Мадиан, о Ишбак тай о Шуах.
GEN 25:3 О Йокшан сас о дад э Шэваско тай э Деданеско; о пуя э Деданески сас о ашшурея, о летушэя тай леуммея.
GEN 25:4 О чявэ э Мадианески: о Эфа, о Эфер, о Ханох, о Авида тай о Элдаа — алаи он о пуя э Хетураски.
GEN 25:5 О Авраам ачявдяс алаи, со сас лэстэ, э Исаакески.
GEN 25:6 Дага кана сас дживиндо, ов диняс э иргатинкенги чявэнги багалыдэс шэя тай бичялдяс пэ чявэстар катар Исаак ко вастоки, андэ вастокески пху.
GEN 25:7 Алаи о Авраам бэшло шэл эфтадэша пандж брэш.
GEN 25:8 Ов мукляс по тэнышы тай муло бут пхуро, чяло бэшымаса, тай гело пэ тухумендэ.
GEN 25:9 Лэски чявэ о Исаак тай о Измаил пароскердэ лэс андэ пищера Махпела паш ко Мамрэ, опэр ливади ки хетески э Эфронески, э чявэски э Цохарески,
GEN 25:10 сави о Авраам киндяс ко хетея. Отхэ о Авраам сас паромэ паш пэ ромнятэ ки Сарра.
GEN 25:11 Пал ко мэрипэ ки Авраамеско о Дэл о Яхвэ алгышты лэски чявэс э Исаакес, саво озаман бэшэлас паш ко Бээр-Лахай-Рои.
GEN 25:12 Аки э порода э Измаилески, э Авраамески чявэски, саво аракхлило э Авраамески ки Сарраки иргатинка, ки египтянка Агарь.
GEN 25:13 Аки о нава э Измаилески чявэнги, пхэнлэ пал екхаврэстэ лэнго аракхлима: о Невайот, о баштутно э Измаилеско, о Кедар, о Адбеэл, о Мивсам,
GEN 25:14 о Мишма, о Дума, о Масса,
GEN 25:15 о Хадад, о Тема, о Етур, о Нафиш тай о Кедма.
GEN 25:16 Адава о нава э Измаилески чявэнги, о нава э дэшудо сагбудэнго породэс, катэ он бэшэнас тай катэ качюискерэнас.
GEN 25:17 О Измаил бэшло 137 брэш. Ов мукляс по тэнышы тай муло, тай гело пэ тухумендэ.
GEN 25:18 Лэски пуя накхлэ андэ области катар Хавила джи ки Шур, паш ки граница ки Египтески, опэр дром ко Ашшур. Он бэшэнас андэ душманлыки алаи э пхралэнца.
GEN 25:19 Аки о пхукаипэ катар Исаак, ко чяво ки Авраамеско, тай лэски пуендар. Ко Авраам аракхлило о Исаак.
GEN 25:20 Э Исаакески сас саранда брэш, кана ов прандосаило опэр Рэвэка, э чяй арамеески э Бетуилески андар Паддан-Арам, э пхэн э арамеески э Лаванески.
GEN 25:21 О Исаак мангелас э Сагбус э Яхвэс андар пэ ромнятэ, вай ой сас би пуенги. О Сагбус о Яхвэ кердяс, со о Исаак мангляс Лэстэ, тай лэски ромни э Рэвэка насвалили пуёстэ.
GEN 25:22 О пуя лилэ тэ дэн бутуря екхаврэс андэ латэ, тай ой пхэнляс: — Андар состэ манги адава? Тай ой гели тэ пхучел ко Сагбус ко Яхвэ.
GEN 25:23 О Сагбус о Яхвэ пхэнляс лаки: — Дуй породэс андэ тутэ, дуй дюнядэс кан овэн тутар тай кан палящиенпэс. О екх кан овэл зорало аврэстар, тай о баро кан керэл иргатлыки э тикнэски.
GEN 25:24 Кана ало вахыти латэ тэ аракхлён о пуя, андэ латэ чячес сас чяворэ-огизя.
GEN 25:25 О екх аракхлило лоло, тай алаи о тэни лэско сас учярдо балэнца, сар балалэ савутенца. Оничин лэс тхэдэ Исав.
GEN 25:26 Дэчи сикавдяспэс лэско пхрал, ов астарэласпэс вастэса ки патум ки Исавески. Оничин ов сас тхэдо Яков. Э Исаакески сас 60 брэш, кана он аракхлилэ ки Рэвэка.
GEN 25:27 О чяворэ барилэ. О Исав сас лачё ахотники, мануш э ливаденго, ай о Яков сас мануш тэныки, ов бэшэлас машкарэ ко катунэс.
GEN 25:28 О Исаак, саво дэхэлас о дами э вэшэнги гайваненго, зиядэ дэхэлас э Исавес, ай э Рэвэка зиядэ дэхэлас э Яковес.
GEN 25:29 Екхвар, кана о Яков тавэлас чёрба, о Исав ало катар ливади бут бокхало.
GEN 25:30 Ов пхэнляс э Яковески: — Чяльти, дэ ман тэ хав набут одова лоло, со ту тавэс! Мэ мэрав катар бокх! (Аки соски лэс динэ нав Эдом).
GEN 25:31 О Яков пхэнляс: — Хани бикин манги то баштутно аракхлипэ.
GEN 25:32 — Мэ мэрав катар бокх, — пхэнляс о Исав. — Со манги файдас катар баштутно аракхлипэ?
GEN 25:33 О Яков пхэнляс: — Хани ха совля. Ов халяс совля, тай аякха бикиндяс по баштутно аракхлипэ э Яковески.
GEN 25:34 Дэчи о Яков диняс э Исавэс манро тай чечевични чёрба. Ов халяс, пиляс, ущино тай гело. Аякха о Исав ачявдяс по баштутно аракхлипэ.
GEN 26:1 Опэр пху сас бокх, — на одоя баштутни бокх, сави сас, кана сас о Авраам, — тай о Исаак гело ко Авимелех, ко патишаи ки филистимляненго, андэ Герар.
GEN 26:2 О Сагбус о Яхвэ сикавдяспэс э Исаакески тай пхэнляс: — Ма джя андэ Египти, бэш опэр одолэ пхуятэ, катэ Мэ кан пхэнав туки тэ бэшэс.
GEN 26:3 Ачё опэр акалэ пхуятэ вахытески, тай Мэ кан овав туса тай кан алгыштияв тут. Мэ кан керав, сар Мэ халёмас совля тэ дадэски э Авраамески, тай кан дав алаи адала пхуя тэ пуендэ.
GEN 26:4 Мэ кан керав тэ пуен бут, сар чергэня опэр булутя, тай кан дав лэн алаи адала пхуя. Тэ пуендар кан диндён алгышы алаи о дюнядэс опэр пху,
GEN 26:5 андар одолэстэ кай о Авраам шунэлас Ман тай керэлас, со Мэ пхэнавас, о пхэнлиматэс тай о тхэдиматэс.
GEN 26:6 Тай о Исаак накхло андэ Герар.
GEN 26:7 Кана о мануша одолэ тханэски пхучлэ лэстэ лэски ромнятар, ов пхэнляс: «Адая ми пхэн». Ов трашалас тэ пхэнэл: «Адая ми ромни». Ов тюшунды: «О мануша адалэ тханэски тэ на мударэн ман андар Рэвэка, вай ой шукар».
GEN 26:8 Екхвар, кана о Исаак бут вахыти бэшло отхэ, о Авимелех, о патишаи э филистимляненго, дикхляс андар пэнчира тай дикхляс, сар о Исаак сыпады пэ ромня э Рэвэка.
GEN 26:9 О Авимелех диняс икос э Исаакес тай пхэнляс: — Акана, ой ти ромни! Соски ту пхэнлян: «Ой ми пхэн»? О Исаак пхэнляс лэски: — Вай мэ тюшундым, тэ на мэрав андар латэ.
GEN 26:10 Дэчи о Авимелех пхэнляс: — Со ту кердян амэнца? Екх андар мурша кан пашлёлас тэ ромняса, тай ту кан керэсас опэр амэндэ дош.
GEN 26:11 О Авимелех пхэнляс алаи э дюняски: — Кажын, кон кан астарэл адалэ манушэс я лэски ромня, кан овэл мудардо.
GEN 26:12 О Исаак читяс тэ барел гив опэр ливади одолэ пхуятэ тай одова жэ брэш кидиняс шэлвар бут. О Сагбус о Яхвэ алгышты лэс.
GEN 26:13 О Исаак барвалило, тай о мангин лэско сальтя барёлас, бискай ов на уло бут барвало.
GEN 26:14 Лэстэ сас асавке барэ атарэс бакрэ, бузня, гурувня, тай аборкха иргатя, кай о филистимляня кизгандиенас лэс.
GEN 26:15 Он чёрдэ пху опэр алаи ко ханинга, савэ дага андэ вахыти лэски дадэско хранлэ о иргатя лэски дадэски э Авраамески.
GEN 26:16 О Авимелех пхэнляс э Исаакески: — Джя амэндар. Ту улян бут зорало амэнги.
GEN 26:17 О Исаак гело отхар андэ ливади Герар тай ачило отхэ тэ бэшэл.
GEN 26:18 О Исаак шужардяс о ханинга, савэ сас хранлэ андэ вахыти лэски дадэско ки Авраамеско, ай дэчи савэ учярдэ о филистимляня пал лэски мэримастэ. Ов диняс лэн одола нава, савэ буруни диняс лэско дад.
GEN 26:19 О иргатя э Исаакески лилэ тэ храндэн андэ ливади ханинг тай аракхлэ отхэ шужо пани,
GEN 26:20 ай о герарскя чёбаня лилэ тэ ирищиен э Исаакески чёбаненца тай пхэнэнас: «Адава амаро пани!» Ов тхэдяс э ханинг Эсек, вай он ирищиенас лэнца.
GEN 26:21 Дэчи он хранлэ авэр ханинг, ай андар латэ ули чингар, оничин ов тхэдяс ла Ситна.
GEN 26:22 Ов гело отхар тай хранляс генэ екх ханинг, андар савятэ ирищима на сас, тай ов тхэдяс ла Реховот, пхэнэл: «Акана о Сагбус о Яхвэ диняс амэн тхан, тай амэ кан бутяс андэ адалэ пхуятэ».
GEN 26:23 Отхар о Исаак гело андэ Бээр-Шэва.
GEN 26:24 Андэ одоя рат о Сагбус о Яхвэ сикавдяспэс лэски тай пхэнляс: — Мэ о Дэл о Яхвэ тэ дадэско э Авраамеско. Ма траша, Мэ туса. Мэ кан алгыштияв тут тай кан бутярав тэ пуен булуб Мэ иргатески э Авраамески.
GEN 26:25 О Исаак кердяс отхэ алтари, мангляс о нав э Сагбуски э Яхвэско тай тхэдяс отхэ катуна. Ай о иргатя лэски хранлэ ханинг.
GEN 26:26 О Авимелех ало лэстэ андар Герар екхетханэ э Ахузатеса, пэ ярдымареса, тай э Пихолеса, лэски армияки барэса.
GEN 26:27 О Исаак пхучляс лэн: — Соски тумэ алянус, вай тумэ санусас душманя манги тай кувдынус ман?
GEN 26:28 Он пхэнлэ: — Амэ акана галилям, кай туса о Сагбус о Яхвэ, тай амэ гиндям, кай машкарэ тутэ тай амэндэ камэл тэ овэл совленго зборима. Эла керас завети машкарэ амэндэ,
GEN 26:29 кай ту на кан керэс амэнги джюнгалипэ, сар амэ на астардям тут, ами самас туса сальтя лаче тай муклям тут лачимаса. Акана ту алгыштимэ э Сагбуса э Яхвэса.
GEN 26:30 О Исаак кердяс лэнги мисяфири, тай он ханас тай пиенас.
GEN 26:31 Авэр дес эртэс сабахтан он динэ екхаврэс совля. О Исаак зборисаило лэнца, тай он гелэ лэстар лачимаса.
GEN 26:32 Одова жэ дес о иргатя э Исаакески алэ тай пхукавдэ лэски катар ханинг, сави он хранлэ. Он пхэнлэ: — Амэ аракхлям пани!
GEN 26:33 Ов тхэдяс ла Шыва, тай джи авдес о нав адалэ дизако — Бээр-Шэва.
GEN 26:34 Кана э Исавески сас саранда брэш, ов лиляс ромнян э Ехудита, э чяя э хетеески э Бээрески, тай э Басемата, э чяя э хетеески э Элонески.
GEN 26:35 Лэндар э Исаакески тай Рэвэкаки сас бут касывэти.
GEN 27:1 Кана о Исаак пхурило тай о якха лэски на дикхенас, ов диняс икос э Исавес, пэ барэ чявэс, тай пхэнляс лэски: — Мо чяво! — Мэ атхэ, — пхэнляс о Исав.
GEN 27:2 О Исаак пхэнляс: — Мэ ужэ пхуро, тай на джянав о дес мэ мэримаско.
GEN 27:3 Лэ то мултуки — тэ стриладэс тай то луки — тай никлё андэ ливади тэ аракхес манги гайванен.
GEN 27:4 Тав манги хапэ, саво мэ дэхав, тай ан манги тэ хав, тэ алгыштияв тут ангал мэ мэримастэ.
GEN 27:5 Э Рэвэка шунляс, сар о Исаак зборизэлас пэ чявэса э Исавеса. Кана о Исав гело ки ливади тэ мударэл тай тэ анэл гайванес,
GEN 27:6 э Рэвэка пхэнляс пэ чявэски э Яковески: — Мэ шунлём, сар то дад пхэнляс тэ пхралэски э Исавески:
GEN 27:7 «Ан гайванес тай тав манги дамлыс хапэ, мэ тэ алгыштияв тут ангал Сагбус Яхвэ, бискай мэрав».
GEN 27:8 Шун ман лачес, мо чяво, тай кер, сар мэ кан пхэнав.
GEN 27:9 Джя ки атара тай ан манги до зиядэ бузнорэн, тэ керав мэ дамлыс хапэ тэ дадэски, асавко, сар ов дэхэл.
GEN 27:10 Дэчи гел лэс тэ дадэстэ, ов кан хал тай кан алгыштиел тут ангал пэ мэримастэ.
GEN 27:11 О Яков пхэнляс э Рэвэкаки, пэ дэяки: — Вай мо пхрал о Исав алаи балало, ай мандэ э моркхи би балэнги.
GEN 27:12 Ами, мо дад тэ сыладиела ман? Мэ кан овав ангал лэстэ хохавно тай кан лав опэр мандэ арманя, ами на алгыштима.
GEN 27:13 Э дай пхэнляс лэски: — О арманя мэ овэн опэр мандэ, мо чяво, ай ту кер, сар мэ пхэнав: джя тай ан бузнорэн.
GEN 27:14 Ов гело, лиляс э бузнорэн тай андяс лэн пэ дэятэ, тай ой тавдяс дамлыс хапэ, асавко, сар дэхэл о дад.
GEN 27:15 Дэчи э Рэвэка лиляс о лаче савутя пэ барэ чявэски э Исавески, савэ сас латэ андэ кхер, тай урявдяс опэр тикно, опэр Яков,
GEN 27:16 ай лэски васта тай э мэн, катэ нанай бала, учярдяс э бузнорэнги моркхяса.
GEN 27:17 Дэчи ой диняс пэ чявэс э Яковес дамлыс хапэ тай манро, савэ тавдяс.
GEN 27:18 Ов ало пэ дадэстэ тай пхэнляс: — Мо дад! — Аки мэ, — пхэнляс одова. — Ту саво андар мэ чявэндэ?
GEN 27:19 О Яков пхэнляс пэ дадэски: — Мэ — о Исав, то баштутно. Мэ кердём, сар ту пхэнлян. Мангав, ваздэтут, бэш тай ха мэ гайванен, ту тэ алгыштиес ман.
GEN 27:20 О Исаак пхучляс пэ чявэс: — Сар ту аракхлян лэн аякха чяльти, мо чяво? — То Сагбус о Яхвэ диняс ман лачипэ, — пхэнляс ов.
GEN 27:21 О Исаак пхэнляс э Яковески: — Пашо пашэ, мэ тэ сыладияв тут, мо чяво, чячес ту мо чяво о Исав я на.
GEN 27:22 О Яков пашыло пашэ пэ дадэстэ ко Исаак, саво сылады лэс тай пхэнляс: — О сэси — сар ко Яков, ай о васта — сар ко Исав.
GEN 27:23 Ов на пэнджярдяс лэс, вай о васта лэстэ сас балалэ, сар ко Исав, тай ов алгышты лэс.
GEN 27:24 — Чячес ту мо чяво о Исав? — пхучляс о Исаак. Ов пхэнляс: — Ва, адава мэ.
GEN 27:25 О Исаак пхэнляс: — Мо чяво, ан манги то хапэ пашэ, тай мэ кан хав, ай дэчи кан алгыштияв тут. О Яков диняс лэс о хапэ, тай ов халяс, андяс винас тай ов пиляс.
GEN 27:26 Дэчи лэско дад о Исаак пхэнляс лэски: — Пашо, мо чяво, тай чюмидэ ман.
GEN 27:27 Ов пашыло тай чюмидиняс лэс, тай пхэнляс: — Вай, мо чяво кхандэл, сар кхандэл э ливади, сави алгышты о Сагбус о Яхвэ.
GEN 27:28 О Дэл мэ дэл тут катар булутенго пани тай катар имиша ки пхуяки, бут гив тай тэрно винас.
GEN 27:29 О породэс мэ керэн туки иргатлыки, тай дюнядэс мэ бангён туки. Ов сагбус опэр тэ пхралэндэ, тай мэ бангён ангал тутэ о чявэ тэ дэякерэ. Мэ диндёл арманя одова, саво дэл тут арманя, ай кон алгыштиел тут, мэ овэл алгыштимэ.
GEN 27:30 Сар о Исаак бытэрды тэ алгыштиел тай о Яков никлисто пэ дадэстар, ало катар астардипэ лэско пхрал о Исав.
GEN 27:31 Ли ов тавдяс дамлыс хапэ тай андяс пэ дадэски. Ов пхэнляс лэски: — Дадэ, ваздэтут, бэш тай ха мо хапэ, ай дэчи алгыштие ман.
GEN 27:32 Лэско дад о Исаак пхучляс: — Кон ту? — Мэ то чяво, — пхэнляс ов, — то баштутно, о Исав.
GEN 27:33 О Исаак алаи изранило тай пхэнляс: — Кон эсас одова, саво мудардяс гайванес тай андяс манги? Мэ халём лэс ангал отхэ, кай ту алян, тай алгыштым лэс. Ов акана да кан овэл алгыштимэ!
GEN 27:34 О Исав шунляс о зборэс пэ дадэски, лачес диняс бэбэря тай пхэнляс пэ дадэски: — Алгыштие ли ман, дадэ!
GEN 27:35 Ай одова пхэнляс: — То пхрал ало ярамазлыкеса тай лиляс тутар о алгышы.
GEN 27:36 О Исав пхэнляс: — На чячимаса ов тхэдо Яков? Дувар ов хохавдяс ман: лиляс мо баштутно аракхлипэ, акана ли мо алгышы! Тай пхучляс: — На ачило тутэ алгышы ли манги?
GEN 27:37 О Исаак пхэнляс э Исавески: — Мэ кердём лэс сагбус опэр тутэ, тай алаи лэски тухумен динём лэстэ тэ овэн иргатя, тай башладым лэс манрэса тай тэрнэ винаса. Со камэл мэ акана тэ керав туки, мо чяво?
GEN 27:38 О Исав пхэнляс пэ дадэски: — Тутэ екх алгышы си, дадэ? Алгыштие ли ман, мо дад! О Исав лачес руно.
GEN 27:39 Лэско дад о Исаак пхэнляс лэски: — Кан овэл то бэшыпэ дур катар имиша ки пхуяки, дур катар пани ки булутенго опрал.
GEN 27:40 Ту кан бэшэс камаса тай кан керэс иргатлыки тэ пхралэски. Кан авэл вахыти, кана ту кан ваздиндёс, ту кан чес лэско пхарипэ опрал тэ мэнятэ.
GEN 27:41 О Исав гаравдяс холи опэр Яков андар алгыштима, саво диняс лэс о дад, тай пхэнляс пэски: «О деса э роимаски пал мэ дадэстэ пашэ — дэчи мэ кан мударав мэ пхралэс э Яковес».
GEN 27:42 Э Рэвэкаки пхэнлэ, со пхэнляс лако баро чяво о Исав, тай ой бичялдяс пал тикно чяво, пал Яков, тай пхэнляс лэски: — То пхрал о Исав тюшундиел тэ мударэл тут.
GEN 27:43 Мо чяво, кер, сар кан пхэнав: чяльти праста андэ Харан мэ пхралэстэ ко Лаван.
GEN 27:44 Бэш лэстэ саво-то вахыти, бискай на кан тэныкизэл э холи тэ пхралэски.
GEN 27:45 Кана э холи тэ пхралэски кан тэныкизэл тай ов кан бристэл одова, со ту кердян лэски, дэчи мэ кан бичялав тэ пхэнэн туки, кай камэл тэ авэс палэ. Соски манги тэ нашавав тумэн э дон андэ екх дес?
GEN 27:46 Дэчи э Рэвэка пхэнляс э Исаакески: — Мэ бэшымаски на лошазав андар адалэ чяяндэ ки хетеенги. О Яков тэ лэла пэски ромня аканутнэ джювля, асавкя хетеянка, дэчи соски мэ тэ бэшав?
GEN 28:1 О Исаак диняс икос э Яковес, алгышты лэс тай пхэнляс лэски: — Ма лэ ромня ханаанеянка.
GEN 28:2 Джя андэ Паддан-Арам, андэ кхер ко Бетуил, тэ дэяки дадэстэ. Лэ отхэ туки ромня андар чяя ки Лаванески, тэ дэяки пхралэстэ.
GEN 28:3 О Дэл о Баро-Зорало мэ алгыштиел тут тай мэ дэл тут бутэ пуен, тутар тэ овэн бут дюнядэс.
GEN 28:4 Мэ дэл Ов тут тай тэ пуен о алгышы э Авраамеско, тутэ тэ овэл э пху, опэр савятэ ту анкха бэшэс, сар джяти, э пху, сави о Дэл диняс э Авраамес.
GEN 28:5 Дэчи о Исаак бичялдяс э Яковес, тай одова гело андэ Паддан-Арам ко Лаван, ко чяво ки арамееско ки Бетуилеско, ко пхрал ки Рэвэкако, э Яковески тай э Исавески дай.
GEN 28:6 О Исав галило, кай о Исаак алгышты э Яковес тай бичялдяс лэс андэ Паддан-Арам, тэ лэл отхар ромня, кай ов алгышты лэс тай пхэнляс лэски: «Ма лэ ромня ханаанеянка»,
GEN 28:7 тай кай о Яков шунляс пэ дадэс тай пэ дэя тай гело андэ Паддан-Арам.
GEN 28:8 Дэчи о Исав галило, сар лэско дад о Исаак на мангелас ханаанеянкен.
GEN 28:9 О Исав гело ко Измаил тай лиляс пэски ромня, булуб одолэндар, савэ лэстэ сас, э Махалатя, э Невайотаски пхэня, э Авраамеско чяво Измаилески чяя.
GEN 28:10 О Яков ачявдяс э Бээр-Шэва тай гело андэ Харан.
GEN 28:11 Ов ало савэ-то тханэстэ тай тэрдило ратяки, вай о кхам бэшло. Ов лиляс отхэ бар, тхэдяс тал пэ шэрэстэ тай пашлило тэ совэл.
GEN 28:12 Ов дикхляс суно: аки драбина, сави сас тэрди опэр пху тай сас джи ко булутя, тай о миляикя э Дэвлэски ваздэнаспэс тай фуленас опрал.
GEN 28:13 Опэр латэ сас тэрдо о Сагбус о Яхвэ тай пхэнэлас: — Мэ — о Сагбус о Яхвэ, о Дэл тэ дадэско э Авраамеско тай о Дэл э Исаакеско. Э пху, опэр савятэ ту анкха пашло, Мэ кан дав тут тай тэ пуен.
GEN 28:14 Тэ пуя кан овэн бут, сар пхуяко прахос, тай ту кан бутёс карин запад тай карин вастоки, карин север тай карин юги. Алаи о дюнядэс опэр пху кан диндён алгышы андар тутэ тай тэ пуендэ.
GEN 28:15 Мэ туса тай кан кутардияв тут, кай ту тэ на джяс, тай кан анав тут андэ адая пху. Мэ на кан ачявав тут тай кан керав алаи, со пхэнлёмас туки.
GEN 28:16 О Яков джянгавдило тай тюшунды: «Чячес, адалэ тханэстэ о Сагбус о Яхвэ, ай мэ джи на джянавас».
GEN 28:17 Ов трашанило тай пхэнляс: — Сар трашавэл адава тхан! Сар кай атхэ о кхер э Дэвлэски, тай адава — э бар э булутенги.
GEN 28:18 О Яков ущино эртэс сабахтан, лиляс о бар, саво сас тал шэро, тхэдяс о бар тэрдиндос тай чёрдяс опэр лэстэ маслинаки олия.
GEN 28:19 Ов тхэдяс адава тхан Вефиль, ай ангал одоя диз бучёлас Луз.
GEN 28:20 Дэчи о Яков халяс совля, тай пхэнляс: — О Дэл тэ овэла манца, тэ кутардиела ман опэр адалэ дромэстэ, тэ дэла ман манро тай хапэ тай савутя,
GEN 28:21 тай мэ тэ авава тай тэ бэшава андэ рагати андэ кхер мэ дадэстэ, дэчи о Сагбус о Яхвэ кан овэл мо Дэл.
GEN 28:22 Тай адава бар, саво мэ тхэдём, сар сикаипэ, кан овэл э Дэвлэско кхер, тай алаестар, со Ту кан дэс ман, мэ кан дав Тут дэшто паи.
GEN 29:1 О Яков гело англэ по дром тай ало ки пху ко васточня дюнядэс.
GEN 29:2 Отхэ ов дикхляс ханинг ки ливади тай паш латэ трин атарэс бакрэн, вай андар одолэ ханингатэ пиявдярэнас э гайванен. Э ханинг сас пханли барэ барэса.
GEN 29:3 Кана алаи о атарэс кидэнаспэс, о чёбаня пэравэнас опрал ханинг тай пиявдярэнас э бакрэн, ай дэчи тхэнас о бар палэ одолэ тханэстэ.
GEN 29:4 О Яков пхучляс ко чёбаня: — Пхралалэн, катар тумэ? — Амэ андар Харан, — пхэнлэ он.
GEN 29:5 Ов пхэнляс лэнги: — Джянэн тумэ э Лаванес, э Нахорески турунес? — Ва, джянас, — пхэнлэ он.
GEN 29:6 О Яков пучляс: — Лэстэ алаи лачё ? — Лачё, — пхэнлэ он. — Ай аки э Рахиль, лэски чяй, авэл э бакрэнца.
GEN 29:7 — О кхам дага учес, — пхэнляс ов, — дага нанай о вахыти тэ кидэс о атарэс. Пиявдярэн э бакрэн тай кувдиен лэн палэ ки ливади.
GEN 29:8 — Амэ нащи, — пхэнлэ он, — бискай на кидэнпэс алаи о атарэс, тай о бар на кан пэравэн катар ханинг. Дэчи амэ кан пиявдярас э бакрэн.
GEN 29:9 Ов дага зборизэлас лэнца, тай пашыли э Рахиль э бакрэнца: ой чярярэлас э бакрэн.
GEN 29:10 Кана о Яков дикхляс э Рахиля, пэ какески э Лаванески чяя, ов пашыло, пэравдяс о бар катар ханинг тай пиявдярдяс э Лаванески бакрэн.
GEN 29:11 Дэчи о Яков чюмидиняс э Рахиля тай лачес руно,
GEN 29:12 пхэнляс э Рахиляки, кай ов — тухуми лаки дадэско тай о чяво э Рэвэкако. Ой прастанили тай пхукавдяс адава пэ дадэски.
GEN 29:13 О Лаван шунляс, кай ало лэско племянники о Яков, прастанило мамуй, диняс лэс ангали, чюмидиняс тай андяс пэстэ андэ кхер. О Яков пхукавдяс лэски алаестар,
GEN 29:14 тай о Лаван пхэнляс: — Ту мо тэни тай мо рат. Кана о Яков бэшло лэстэ чён,
GEN 29:15 о Лаван пхэнляс лэски: — Хоч ту сан манги тухуми, соски ту камэл тэ керэс манги бути ботени? Пхэн манги, со туки тэ покинав.
GEN 29:16 Ай ко Лаван сас дуй чяя: э бари бучёлас Лия, ай э тикни — Рахиль.
GEN 29:17 Ки Лия сас лаче шукара якха, ай ки Рахиль сас шукар ли о муй, ли о тэни.
GEN 29:18 О Яков дэхляс э Рахиля тай пхэнляс э Лаванески: — Мэ кан керав бути туки эфта брэш андар тэ тикнэ чяятэ ки Рахиль.
GEN 29:19 О Лаван пхэнляс: — Зиядэ мэ кан дав ла тутэ, ниш кастэ-то аврэстэ. Ачё мандэ.
GEN 29:20 О Яков кердяс иргатлыки эфта брэш, тэ лэл э Рахиля, ай он дикхиндилэ лэски, сар набут дес, вай ов дэхэлас ла.
GEN 29:21 Дэчи о Яков пхэнляс э Лаванески: — Дэ ман мэ ромня, тэ бэшав ласа сар ромняса, ало мо вахыти.
GEN 29:22 О Лаван диняс икос алаен, кай бэшэнас агорял, тай кердяс мисяфири.
GEN 29:23 Ай кана ули бэлвэль, ов лиляс пэ чяя э Лия тай диняс ла ко Яков, тай о Яков пашлило ласа.
GEN 29:24 (О Лаван диняс пэ чяя иргатинка э Зилпа.)
GEN 29:25 Кана уло сабаги, о Яков галило, кай адая э Лия! Ов пхэнляс э Лаванески: — Со ту кердян манца? Мэ вай кердём иргатлыки туки андар Рахиль. Соски ту хохавдян ман?
GEN 29:26 О Лаван пхэнляс: — Амэндэ аякха на керэн, тэ дэс ромэстэ э тикнэ чяя ангал бари.
GEN 29:27 Бэш базари адалэ чяяса, ай дэчи амэ кан дас тут ли э тикня, аврэ эфта брэшэнги иргатлыкески.
GEN 29:28 О Яков аякха да кердяс: бэшло базари э Лияса, ай дэчи о Лаван диняс лэс ромня пэ чяя э Рахиля.
GEN 29:29 О Лаван диняс э Рахиля пэ иргатинка э Билха.
GEN 29:30 О Яков лиляс тэ бэшэл э Рахиляса тай дэхэлас э Рахиля бут, ниш э Лия. Ов керэлас бути э Лаванески генэ эфта брэш.
GEN 29:31 Кана о Сагбус о Яхвэ дикхляс, кай о Яков на дэхэлас э Лия, Ов кердяс, тэ овэн латэ пуя. Ай э Рахиль сас би пуенги.
GEN 29:32 Э Лия насвалили пуёстэ тай аракхлило латэ чяво. Ой пхэнляс: «О Сагбус о Яхвэ дикхляс мо касывэти. Акана мо ром, гэлбэтэм, кан дэхэл ман», тай тхэдяс лэс Рувим.
GEN 29:33 Ой генэ насвалили пуёстэ, тай кана аракхлило латэ чяво, пхэнляс: «Аякха кай о Сагбус о Яхвэ шунляс, кай ман на дэхэл, Ов диняс ман генэ ли адалэс». Тай ой тхэдяс лэс Симеон.
GEN 29:34 Ой генэ насвалили пуёстэ, тай кана латэ аракхлило чяво, пхэнляс: «Акана мо ром кан колизэл мандэ, вай мандэ аракхлилэ лэски трин чявэ». Оничин ов сас тхэдо Левий.
GEN 29:35 Тай генэ ой насвалили пуёстэ, тай кана аракхлило чяво, пхэнляс: «Адава рази мэ кан махтадияв э Сагбус э Яхвэс». Оничин ой тхэдяс лэс Иуда. Дэчи латэ на аракхлёнас пуя.
GEN 30:1 Э Рахиль дикхелас, кай латэ на аракхлён пуя э Яковески, тай кизганды пэ пхэня э Лия. Ой пхэнляс э Яковески: — Дэ ман пуен, я мэ кан мэрав!
GEN 30:2 О Яков холясаило лаки тай пхэнляс: — Та со, мэ о Дэл, Саво на дэл тут пуен?
GEN 30:3 Ой пхэнляс: — Аки э Билха, ми иргатинка. Пашлё ласа, латэ тэ аракхлёл пуёс, савэс мэ кан лав опэр мэ кочендэ, тай мэ кан гинав лэс минрэс. Аякха мандэ кан овэн пуя латар.
GEN 30:4 Аякха ой диняс лэс ромня пэ иргатинка э Билха. О Яков пашлило ласа,
GEN 30:5 ой насвалили пуёстэ, тай аракхлило лэски чяво.
GEN 30:6 Дэчи э Рахиль пхэнляс: «О Дэл кердяс манги чячё цындос. Ов шунляс мо мангипэ тай диняс ман чявэс». Оничин ой тхэдяс лэс Дан.
GEN 30:7 Э Билха, э иргатинка Рахиляки, генэ насвалили пуёстэ, тай аракхлило латэ дуйто чяво э Яковески.
GEN 30:8 Дэчи э Рахиль пхэнляс: «Барэ маримаса маравасман мэ мэ пхэняса тай улём ангал». Тай ой тхэдяс лэс Неффалим.
GEN 30:9 Э Лия дикхляс, кай латэ на аракхлён пуя, лиляс пэ иргатинка э Зилпя тай диняс ла ко Яков ромня.
GEN 30:10 Ки Лияки иргатинка ки Зилпа аракхлило чяво э Яковески.
GEN 30:11 Дэчи э Лия пхэнляс: «Со бахт!» Тай ой тхэдяс лэс Гад.
GEN 30:12 Ки Лияки иргатинка ки Зилпа аракхлило дуйто чяво э Яковески.
GEN 30:13 Дэчи э Лия пхэнляс: «Со мэ бахтали! О джювля кан пхэнэн манги бахталие!» Тай ой тхэдяс лэс Асир.
GEN 30:14 О вахыти, кана кидэнас о гив, о Рувим никлисто ки ливади, аракхляс мандрагоря тай андяс лэн пэ дэяки. Э Рахиль пхэнляс э Лияки: — Мангав, тут дэ ман мандрагоря тэ чявэски.
GEN 30:15 Ай одоя пхэнляс лаки: — Ту ли аякха лилян мэ ромэс. Мангес акана тэ лэс ли о мандрагоря мэ чявэски? — Лачё, — пхэнляс э Рахиль, — мэ пашлёл ов туса авдес рати, ай ту дэ ман о мандрагоря тэ чявэски.
GEN 30:16 Кана бэлвэле о Яков ало катар ливадя, э Лия никлисти тэ ишандиел лэс тай тэ пхэнэл: — Ту камэл тэ пашлёс манца. Мэ покиндём андар тутэ о мандрагоря мэ чявэски. Тай ов пашлило ласа одоя рат.
GEN 30:17 О Дэл шунляс э Лия, ой насвалили пуёстэ, тай латэ аракхлило э Яковески панджто чяво.
GEN 30:18 Дэчи э Лия пхэнляс: «О Дэл алгышты ман андар одолэстэ, кай мэ динём мэ ромэс мэ иргатинка». Тай ой тхэдяс лэс Иссахар.
GEN 30:19 Э Лия генэ насвалили пуёстэ, тай латэ аракхлило э Яковески шовто чяво.
GEN 30:20 Дэчи ой пхэнляс: «О Дэл башлады ман багалыс башладипэ. Акана мо ром кан гинэл ман, вай мандэ аракхлилэ лэски шов чявэ». Тай ой тхэдяс лэс Завулон.
GEN 30:21 Савэ-то вахытестар латэ аракхлили чяй, тай тхэдяс ла Дина.
GEN 30:22 Дэчи о Дэл тюшунды катар Рахиль. Ов шунляс ла тай пхутэрдяс ла.
GEN 30:23 Ой насвалили пуёстэ, тай латэ аракхлило чяво. Ой пхэнляс: «О Дэл лиляс мо ладжяво».
GEN 30:24 Ой пхэнляс: «Мэ дэл ман о Сагбус о Яхвэ генэ екхе чявэс», тай тхэдяс лэс Иосиф.
GEN 30:25 Пал отхэ сар ки Рахиль аракхлило о Иосиф, о Яков пхэнляс э Лаванески: — Мук ман тэ джяв палэ мэ чяче ригендэ.
GEN 30:26 Дэ ман мэ ромнен тай мэ пуен, андар савэндэ мэ кердём туки бути, тай мэ кан джяв ко дром. Ту джянэс, сар бут мэ керавас бути туки.
GEN 30:27 Ай о Лаван пхэнляс лэски: — Мэ тэ аракхлём мила андэ тэ якхендэ, мангав тут, ачё. Мэ галилём андар дорикерипэ, кай о Сагбус о Яхвэ алгыштиел ман булуб туки.
GEN 30:28 — Тай пхэнляс: — Пхэн ти кими, мэ кан покинав ла.
GEN 30:29 О Яков пхэнляс лэски: — Ту джянэс, сар мэ керавас бути туки тай касавке си тэ атарэс булуб мэ бутяки.
GEN 30:30 Лэн сас набут ангал отхэ, кай мэ алём, ай акана он бутилэ. О Сагбус о Яхвэ алгыштиел тут андар мандэ. Кана мэ кан кидав шо-то мэ кхерэски?
GEN 30:31 О Лаван пхучляс: — Со тэ дав тут? — Манги ништо на камэл, — пхэнляс о Яков. — Кер манги екх, тай мэ англэ кан чярярав тай кан кутардияв тэ атарэс:
GEN 30:32 мук ман тэ накхав алаи тэ атарэс тай тэ лав отхар э тапенги бакрэн, алаи э калэ бакрорэн тай алаи э тапенги бузнэн. Он да кан овэн ми кими.
GEN 30:33 Асавке палящимаса ту сальтя кан джянэс, алаи о чячипэ. Тэ дикхеса андэ мэ атаратэ бузнэн би тапенги я би полоскенги я парнэ бакрэн, тэ джянэс — кай адала чёрдиканэ.
GEN 30:34 -— Лачё, — пхэнляс о Лаван. — Мэ овэл аякха, сар ту пхэнлян.
GEN 30:35 Одова жэ дес ов паляшты алаи э бузнэн э тапенца, алаи э тапенги бузнян — одолэн, опэр савэндэ сас парно, — тай алаи э калэ бакрорэн тай диняс лэн тэ дикхел пал лэндэ о чявэ.
GEN 30:36 Ов пхэнляс тэ овэл машкарэ лэстэ тай ко Яков дурипэ трин дес дром. Ай о Яков англэ чярярэлас э Лаванески авэрэн бакрэн тай бузнен.
GEN 30:37 О Яков чингердяс веткес катар парно топаль, миндали тай чинари тай кердяс опэр лэндэ парнэ полоскес, шужардяс опрал тай нангярдяс о парно кашт андар.
GEN 30:38 Ов тхэдяс о чингердэ веткес алаи андэ копанэс, тэ овэн он доврус ангал бакрэ тай бузня, кана о гайваня авэнас тэ пиен. О вахыти о гайваня лэнаспэс.
GEN 30:39 Он лэнаспэс ангал веткес, тай о гайваня аракхлёнас тапенца.
GEN 30:40 Генэ о Яков болдэлас лэн карин тапенги тай карин калэ бакрэ тай бузня, савэ сас э Лаванески, ай э тэрнэн тхэлас аврэтхэ. Аякха лэстэ улэ лэски атарэс, тай ов астарэлас лэн аврэтхэ катар атарэс ки Лаванески.
GEN 30:41 Кана авэнас тэ пиен о зоралэ гайваня, о Яков тхэлас ангал лэндэ андэ копана веткес, он тэ лэнпэс ангал веткес.
GEN 30:42 Ай о гайваня тэ на сас зоралэ, ов на тхэлас веткес. О назоралэ гайваня ачёнас э Лаванески, ай о зоралэ — э Яковески.
GEN 30:43 О Яков лиляс тэ барвалёл, лэстэ акана сас барэ атарэс, тай генэ иргатинкес, иргатя, камилэс тай джёрэ.
GEN 31:1 О Яков шунляс, сар о чявэ э Лаванески пхэнэнас: «О Яков лиляс алаи, со сас амарэ дадэстэ. Ов кидиняс пэски барвалипэ булуб амарэ дадэски».
GEN 31:2 О Яков дикхляс, кай о Лаван сас лэса на аякха, сар буруни.
GEN 31:3 О Сагбус о Яхвэ пхэнляс э Яковески: — Джя ки пху ки дадэнги, тэ тухумендэ, тай Мэ кан овав туса.
GEN 31:4 О Яков бичялдяс тэ пхэнэн э Рахиляки тай э Лияки, тэ никлён он ки ливади, катэ сас лэски атарэс.
GEN 31:5 Ов пхэнляс лэнги: — Мэ дикхав, кай тумаро дад манца на аякха, сар буруни. Ай о Дэл мэ дадэско манца.
GEN 31:6 Тумэ джянэн, кай мэ керавас бути тумарэ дадэски алаи мэ зораса,
GEN 31:7 ай тумаро дад хохавэлас ман, дэшвар паровэлас мо покинипэ. Ай о Дэл на диняс ман лэстэ андэ хурлуки.
GEN 31:8 Ов тэ пхэнэлас: «О покинипэ тинро кан овэл тапенги», алаи ко гайваня аракхлёнас тапенца, ай ов тэ пхэнэлас: «О покинипэ тинро кан овэн о чюбаря», алаи ко гайваня аракхлёнас чюбаря.
GEN 31:9 Аякха о Дэл лиляс э гайванен тумарэ дадэстэ тай диняс мандэ.
GEN 31:10 Екхвар, одова вахыти, кана лэнпэс о гайваня, мэ дикхлём суно: мэ ваздинём мэ якха тай дикхлём, кай о бузнэ, кай учярэнас э бузнян, сас полосатя тапенги тай чюбаря.
GEN 31:11 О Миляики э Дэвлэско пхэнляс манги андэ суно: «Яков». Мэ пхэнлём: «Мэ атхэ».
GEN 31:12 Ов пхэнляс: «Дикх, тай ту кан дикхес: алаи о бузня, кай учярэн э гайванен, — полосатя, чюбаря я тапенги. Мэ дикхлём, со кердяс туки о Лаван.
GEN 31:13 Мэ — о Дэл э Вефилеско, катэ ту чёрдян э маслинаки олия опэр тэрдо бар тай халян совля Манги. Ачяв адая пху тай джя палэ ки пху, катэ ту аракхлилян».
GEN 31:14 Э Рахиль тай э Лия пхэнлэ: — Ва ай си амэндэ генэ паи андэ мангин амарэ дадэско?
GEN 31:15 Та со, на дикхиндёл, кай ов гинэл амэн джятен? Ов бикиндяс амэн тай тхэдяс одова, со лиляс амэнги.
GEN 31:16 Гэлбэтэм, алаи о барвалипэ, саво о Дэл лиляс амарэ дадэстар, амаро си тай амарэ пуенго. Самким кер, сар пхэнэл туки о Дэл.
GEN 31:17 О Яков бэшавдяс э пуен тай э ромнен опэр камилэс,
GEN 31:18 кувды алаи э гайванен ангал пэстэ, лиляс алаи о мангин, саво ов кидиняс андэ Паддан-Арам, тай гело ко дром пэ дадэстэ ко Исаак ки пху Ханаан.
GEN 31:19 Кана о Лаван гело тэ моравэл э бакрэн, э Рахиль чёрдяс лэски дэвлэн.
GEN 31:20 Ай о Яков хохавдяс э арамеес э Лаванес, на пхэнляс лэски, кай джялпэски.
GEN 31:21 Ов нашло алаи пэ мангинэса, накхло э диряв тай гело ко горадэс Галаад.
GEN 31:22 Ко трито дес э Лаванески пхэнлэ, кай о Яков нашло.
GEN 31:23 О Лаван лиляс пэса э тухумен, прастанило пал Яков тай эфта десендар аракхляс лэс андэ горадэс Галаад.
GEN 31:24 Ай рати о Дэл сикавдяспэс э арамеески э Лаванески андэ суно тай пхэнляс лэски: «Сакёв, ма пхэн ништо э Яковески, нэ лачё, нэ джюнгало».
GEN 31:25 О Лаван рэсло э Яковес. О Яков тхэдяс катуна андэ горадэс Галаад, ли о Лаван э тухуменца тхэдяс катуна отхэ.
GEN 31:26 О Лаван пхэнляс э Яковески: — Со ту кердян? Ту хохавдян ман тай гелдян мэ чяян, сар пханлимарен ко марипэ.
GEN 31:27 Соски ту нашлян чёриндос? Соски ту на пхэнлян манги, тэ мукав тут лошаса тай гиленца, бубнэнца тай арфэнца?
GEN 31:28 Ту на динян ман джи тэ чюмидав мэ турунен тай мэ чяян, кай джянпэски. Ту кердян битюшундимаски дила.
GEN 31:29 Мандэ си зор тэ керав туки джюнгалипэ, ай окоя рат о Дэл тэ дадэско пхэнляс манги: «Сакёв, ма пхэн э Яковески ништо, нэ лачё, нэ джюнгало».
GEN 31:30 Самким, ту гелян, вай ту манглян тэ джяс андэ кхер тэ дадэстэ, ами соски ту чёрдян мэ дэвлэн?
GEN 31:31 О Яков пхэнляс э Лаванески: — Мэ трашавас тай тюшундиявас, кай ту зораса кан лэс мандар тэ чяян.
GEN 31:32 Ту тэ аракхеса атхэ кастэ-то тэ дэвлэн, одова на кан бэшэл. Ангал тэ тухумендэ дикх ту сам, си мандэ шо-то тинро. Тэ си, лэ палэ. О Яков на джянэлас, кай э дэвлэн чёрдяс э Рахиль.
GEN 31:33 О Лаван диняс андэ катуна ки Яковески, андэ катуна ки Лияки тай андэ катуна до иргатинкенги, тай ништо на аракхляс. Пал ки катуна ки Лияки ов диняс андэ катуна ки Рахиляки.
GEN 31:34 Э Рахиль лиляс э кхерутнэ дэвлэн тай тхэдяс лэн андэ камилако сидлас тай бэшли опэр лэндэ. О Лаван родиняс алаи э катуна тай ништо на аракхляс.
GEN 31:35 Э Рахиль пхэнляс пэ дадэски: — Ма холязэ, мо сагбус, мэ нащи ущяв ангал тутэ, вай мандэ одова, со овэл ко джювля. Сар ов на родэлас, ов нащи аракхляс э дэвлэн.
GEN 31:36 О Яков сас бут холямэ тай лиляс тэ пхэнэл э Лаванески: — Андэ состэ мо джюнгалипэ? — пхучляс ов. — Со бэзя мэ кердём, кай ту прастанилян пал мандэ тэ рэсэс?
GEN 31:37 Ту родинян алаи мо мангин — со ту аракхлян андар тэ мангинэстэ? Тхэ, со аракхлян, ангал тэ тухумендэ тай минрэндэ, тай мэ керэн он амэнги цындос.
GEN 31:38 Биш брэш мэ бэшлём тутэ: тэ бакрэн тай бузнян на чясас, э бакрэн андар тэ атарэс мэ на халём.
GEN 31:39 Э мудардэ гайванен мэ на анавас тутэ, ами мэ сам покинавас андар лэндэ. Ту мангесас мандар тэ покинав андар алаестэ, со сас чёрдо, десе тэ сас адава я рати.
GEN 31:40 Аки сар сас манги: о тхарипэ тхарэлас ман десе, о шудрипэ магроскерэлас ман рати, тай о соипэ нашэлас мэ якхендар.
GEN 31:41 Асавке сас одола биш брэш, кай мэ бэшавас андэ тэ кхерэстэ. Мэ керавас бути опэр тутэ дэшуштар брэш андар тэ до чяяндэ тай шов брэш андар гайваня, ай ту дэшвар паровэсас одова, со покинэсас манги.
GEN 31:42 Тэ на овэлас би манца о Дэл мэ дадэско, о Дэл э Авраамеско, Одова, Кастар трашалас о Исаак, ту бичялдянас би ман чюче вастэнца. Ай о Дэл дикхляс мо чёрипэ тай ми пхари бути тай кердяс цындос амэнги окоя рат.
GEN 31:43 О Лаван пхэнляс э Яковески: — Адала чяя — мэ чяя, пуя — мэ пуя, тай о атарэс — мэ атарэс. Алаи, со ту дикхес, — алаи минро. Ами со мэ акана тэ керав мэ чяянца я э пуенца, савэ лэндэ аракхлилэ?
GEN 31:44 Эла керас завети, ту тай мэ, тай ов мэ овэл сикаипэ машкарэ амэндэ.
GEN 31:45 О Яков лиляс бар тай тхэдяс лэс тэрдиндос.
GEN 31:46 Ов пхэнляс пэ тухуменги: — Кидэн бара. Он кидинэ бара горас тай бэшлэ пашэ тэ хан.
GEN 31:47 О Лаван тхэдяс лэс Иегар-Сагадута, ай о Яков — Гал-Эд.
GEN 31:48 О Лаван пхэнляс: — Авдес адава горас — сикаипэ машкарэ тутэ тай мандэ. Аки соски тхэдэ лэс Гал-Эд.
GEN 31:49 Тай генэ Мицпа, вай о Лаван пхэнляс: — Мэ дикхел о Сагбус о Яхвэ пал тутэ тай пал мандэ, кана кан овас дур екхаврэста.
GEN 31:50 Тэ овэса хурлуки мэ чяянца я кан лэс туки аврэ ромнян, булуб мэ чяяндар, — джи кана амэнца никхон нанай, тюшундие, кай о Дэл — машкарэ амэндэ.
GEN 31:51 Генэ о Лаван пхэнляс э Яковески: — Аки барэндар горас тай тэрдо бар, саво мэ тхэдём машкарэ тутэ тай мандэ.
GEN 31:52 Адала бара — сикаипэ, тай адава тэрдо бар — сикаипэ одолэски, кай мэ на кан накхав пал адава горас э барэнго тэ ригатэ, тэ керав туки джюнгалипэ, тай ту на кан накхес адава тэрдо бар тай адава горас э барэнго мэ ригатэ, тэ керэс манги хурлуки.
GEN 31:53 О Дэл э Авраамеско тай о Дэл э Нахореско, о Дэл лэнги дадэско, мэ керэл цындос машкарэ амэндэ. О Яков халяс совля Одолэнги, Савэстар трашалас лэско дад о Исаак.
GEN 31:54 Ов кердяс курбани отхэ андэ горадэс тай диняс икос э тухумен тэ хан екхетханэ. Он халэ тай раткердэ отхэ.
GEN 31:55 Ай эртэс сабахтан о Лаван чюмидиняс э турунен тай э чяян, алгышты лэн тай гело кхерэ.
GEN 32:1 О Яков англэ гело по дром, тай о миляикя э Дэвлэски никлистэ мамуй.
GEN 32:2 Кана о Яков дикхляс лэн, ов пхэнляс: — Адава э Дэвлэско табури! — тай тхэдяс одова тхан Маханаим.
GEN 32:3 О Яков бичялдяс ангал пэстэ манушэс пэ пхралэстэ ко Исав ки пху Сеир, андэ ливади Эдом.
GEN 32:4 Ов пхэнляс лэнги: — Пхэнэн мэ сагбуски э Исавески акаякха: «То иргати о Яков пхэнэл: Мэ бэшавас ко Лаван тай сомас отхэ джи авдесутнэ десестэ.
GEN 32:5 Мандэ си гурува, джёрэ, бакрэ тай бузнэ, иргатя тай иргатинкес. Мэ бичялав адава габэри мэ сагбуски, тэ аракхав мила андэ тэ якхендэ».
GEN 32:6 О бичялдэ алэ палэ тай пхэнлэ э Яковески: — Амэ самас тэ пхралэстэ ко Исав. Акана ов сам авэл мамуй тутэ, тай лэса штаршэл мануша.
GEN 32:7 Барэ трашаса тай прастаимаса о Яков паляшты до табуренги э манушэн, савэ сас лэса, тай о атарэс э барэ тай э тикнэ гайваненца тай э камилэн.
GEN 32:8 Ов тюшунды: «О Исав тэ пэрэла опэр екх табури, ай о дуйто кан ачёл дживиндо тай кан кутардиелпэс» .
GEN 32:9 О Яков мангляс э Дэвлэс: — О Дэл мэ дадэско э Авраамеско, о Дэл мэ дадэско э Исаакеско, о Сагбус о Яхвэ, кай пхэнляс манги: «Джя ки пху тинрятэ, тэ тухумендэ, тай Мэ кан дав тут лачипэ»!
GEN 32:10 Мэ на керав одоя мила тай о лачипэ, савэ кердян Ту Тэ иргатески. Мандэ ништо на сас, булуб катар ровли, кана мэ накхлём о Иордани, ай акана мэ авав палэ до табуренца .
GEN 32:11 Мангав Тут, кутардие ман мэ пхралэстар катар Исав. Мэ трашав, кай ов кан авэл тай кан пэрэл опэр мандэ тай опэр дэя э пуенца.
GEN 32:12 Вай Ту пхэнлян: «Мэ чяльти кан дав тут лачипэ тай кан керав тэ пуен бут, сар моряки кишай, сави нащи гинэс».
GEN 32:13 Ов сас отхэ рат тай андар одолэстэ, со лэстэ сас, лиляс башладипэ пэ пхралэски э Исавески:
GEN 32:14 душэл бузнян тай бишэ бузнэн, душэл бакрян тай бишэ бакрэн,
GEN 32:15 триянда камилэн тикнорэ камилэнца, саранда гурувнен тай дэшэ гурувэн, бишэ джёрян тай дэшэ джёрэн.
GEN 32:16 Ов тхэдяс кажни атаратэ иргатес тай пхэнляс лэнги: — Джян ангал мандэ тай астарэн о атарэс дур екхаврэстар.
GEN 32:17 Ов сиклярдяс одолэс, кон джялас ангал: — Кана мо пхрал о Исав кан дикхел тут тай кан пхучел: «Каско ту? Кай джяс? Каски гайванен ту кувдиес?» —
GEN 32:18 дэчи ту пхэн: «О гайваня тэ иргатески э Яковески. Адава башладипэ туки лэстар мэ сагбуски э Исавески, ай ов авэл пал амэндэ».
GEN 32:19 Ов сиклярдяс ли э дуйтонэс, ли э тритонэс, тай алаи аврэн, кай авэнас пал атарэс: — Тай тумэ аякхажэ пхэнэн э Исавески, кана ов тумэн кан дикхел.
GEN 32:20 Тай генэ пхэнэн: «То иргати о Яков авэл пал амэндэ». Ов тюшунды: «Мэ кан ковлярав лэс адалэса башладимаса, кай бичялав лэски ангал мандэ, ай дэчи, кана амэ кан дикхас екхаврэс, ов, файма, кан мукел ман».
GEN 32:21 Аякха о мангин, кай башлады о Яков, сас бичялдо ангал, ай ов сас рат андэ табури.
GEN 32:22 Одоя рат о Яков ущино тай лиляс пэ до ромнян, до иргатинкен тай дэшуекх чявэн тай накхло опрал диряв Яббок.
GEN 32:23 Ов накхавдяс лэн опрал пани тай бичялдяс алаи по мангин.
GEN 32:24 Тай аки о Яков ачило коркоро, тай Кон-то ушарэлас лэса джи сабахтаняки.
GEN 32:25 Кана Ов дикхляс, кай нащи ушарэл э Яковес, Ов колисаило ко шалос ки Яковеско, аякха кай сас о шалос болавдо, кана ов ушарэлас Лэса.
GEN 32:26 Тай Ов пхэнляс: — Мук Ман, вай сиризэл. Ай о Яков пхэнляс: — На кан мукав, бискай на кан алгыштиес ман.
GEN 32:27 Ов пхучляс: — Сар то нав? — Яков, — пхэнляс ов.
GEN 32:28 Дэчи Ов пхэнляс: — Акана то нав кан овэл на Яков, ами Израиль, вай ту ушардян э Дэвлэса тай э манушэнца тай ушардян лэн.
GEN 32:29 О Яков пхэнляс: — Мангав Тут, пхэн манги То нав. Ай Ов пхэнляс: — Соски ту пхучес Мо нав? Тай Ов алгышты лэс.
GEN 32:30 О Яков тхэдяс одова тхан Пениэл, пхэнляс: «Мэ дикхлём э Дэвлэс муй ко муй тай ачилём дживиндо».
GEN 32:31 О кхам ущино опэр лэстэ, кана ов накхелас о Пениэл. Ов лангалас андар пэ шалостэ.
GEN 32:32 Аки соски джи авдес о израильтяня на хан жылэс опрал кокало ки шалоско: вай Ов колисаило ко кокало ки шалоско ки Яковеско паш ко жылэс.
GEN 33:1 О Яков дикхляс, кай авэл о Исав тай лэса штаршэл мануша. Ов паляшты э пуен машкарэ ки Лия, ки Рахиль тай ко дуй иргатинкес.
GEN 33:2 Ов тхэдяс э иргатинкен тай лэнги пуен ангал, э Лия тай лаки пуен пал лэндэ, ай э Рахиля э Иосифеса пал алаендэ.
GEN 33:3 Ай ов гело ангал, пашолас пэ пхралэстэ тай бангило джи ки пху эфтавар.
GEN 33:4 Ай о Исав прастанило мамуй ко Яков, диняс ангали лэс, читяспэс лэски мэнятэ тай чюмидиняс лэс, тай он рунэ.
GEN 33:5 О Исав дикхляс э джювлен тай э пуен тай пхучляс: — Кон адава туса? О Яков пхэнляс: — Адала пуя, савэн о Дэл миласа диняс тэ иргатес.
GEN 33:6 Пашылэ о иргатинкес пумарэ пуенца тай бангилэ.
GEN 33:7 Дэчи пашылэ тай бангилэ э Лия тай лаки пуя. Пал алаендэ пашылэ о Иосиф тай э Рахиль ли бангилэ.
GEN 33:8 О Исав пхучляс ко Яков: — Соски ту бичялдян алаи адала атарэс мамуй мандэ? — Мэ манглём тэ аракхав мила андэ тэ якхендэ, мо сагбус, — пхэнляс ов.
GEN 33:9 О Исав пхэнляс: — Мандэ си алаи бут, мо пхрал. Ачяв тинро туки.
GEN 33:10 — На, мангав тут! — пхэнляс о Яков. — Мэ тэ аракхлём мила андэ тэ якхендэ, дэчи лэ мандар адава башладипэ. Манги тэ дикхав то муй — адава сар тэ дикхав о муй э Дэвлэско, вай ту муклян ман аякха миласа.
GEN 33:11 Мангав тут, лэ мандар адава башладипэ, вай о Дэл сас миласа мандэ, тай мандэ си алаи, со манги камэл. О Яков лачес мангелас, тай о Исав лиляс о башладипэ.
GEN 33:12 Дэчи о Исав пхэнляс: — Гадэ, камэл тэ джяс ко дром. Мэ кан астаравман паш тутэ.
GEN 33:13 Ай о Яков пхэнляс: — Мо сагбус джянэл, кай о пуя би зораки тай мэ камэл тэ дикхав пал бакря тай гурувня, савэ дэн сути. Лэн лачес тэ кувдиеса хоть екх дес, о гайваня кан мэрэн.
GEN 33:14 Мэ джял мо сагбус ангал пэ иргатестэ, ай мэ кан джяв тэмэли, сар кан джян о атарэс ангал мандэ тай сар кан джян о пуя, бискай на кан авэн мэ сагбустэ андэ Сеир.
GEN 33:15 О Исав пхэнляс: — Мук ман тэ ачявав туса мэ манушэн сарсавэн. — Соски? — пхучляс о Яков. — Рэсэл ли одова, кай мэ аракхлём мила андэ якха мэ сагбустэ.
GEN 33:16 Тай о Исав одова жэ дес гело палэ пэстэ андэ Сеир.
GEN 33:17 Ай о Яков гело андэ Суккот, катэ ов тхэдяс пэски кхер тай катунэс э гайваненги. Аки соски адава тхан бучёл Суккот.
GEN 33:18 О Яков ало андар Паддан-Арам, лачимаса ало ки диз Шэхем андэ Ханаан тай ачило тэ бэшэл ангал диз.
GEN 33:19 Шэлэ рупунэ которэнги ов киндяс ко чявэ ки Хаморески, ко дад ки Шэхемеско, котор пху, опэр савятэ ов тхэдяс пи катуна.
GEN 33:20 Отхэ ов кердяс алтари тай тхэдяс лэс Эль-Элохей-Йисраэль.
GEN 34:1 Э Дина, э чяй э Лияки катар Яков, гели тэ дикхел аканутнэ чяян.
GEN 34:2 Кана о Шэхем, о чяво э хивееско э Хамореско, о сагбус одолэ областяко, дикхляс ла, астардяс, пашлило ласа тай лиляс ла.
GEN 34:3 О ило лэско колисаило ки Дина, ки чяй ки Яковески, ов дэхляс ла тай зборизэлас ласа дэхымаса.
GEN 34:4 Ов пхэнляс пэ дадэски э Хаморески: — Лэ манги адалэ чяя ромня.
GEN 34:5 Кана о Яков шунляс, кай лэски чяятар катар Дина кердэ маскаралыки, лэски чявэ сас ки ливади э атарэнца. Ов на пхэнэлас адалэстар, бискай он на алэ кхерэ.
GEN 34:6 О Хамор, о дад э Шэхемеско, ало тэ зборизэл э Яковеса.
GEN 34:7 Кана о чявэ э Яковески шунлэ, со уло, он алэ катар ливадя. Он сас пхэрдэ касывэти тай холи, вай о Шэхем кердяс ладжяваски дила андэ Израиль, кана пашлило э Яковески чяяса. Асавко нащи овэл.
GEN 34:8 О Хамор пхэнляс лэнги: — Мо чяво о Шэхем илэса пханлило тумарэ чяятэ. Мангав тумэн, дэн ла лэстэ ромня.
GEN 34:9 Элан овас тухумя: дэн амэндэ тумарэ чяян тай лэн амарэн.
GEN 34:10 Манген, бэшэн машкарэ амэндэ, — э пху ангал тумэндэ: бэшэн тай пхерэн опэр латэ, тай кинэн ла тумэнги.
GEN 34:11 О Шэхем пхэнляс э Динаки дадэски тай э пхралэнги: — Мэ кан дав тумэн алаи, со тумэ кан пхэнэн, тэ аракхав мэ мила андэ тумарэ якхендэ!
GEN 34:12 Пхэнэн андар бори, саво манген калыни тай багалыдэс шэя, тай мэ кан покинав, екх дэн ман ла ромня.
GEN 34:13 Дэчи о чявэ э Яковески пхэнлэ э Шэхемески тай лэски дадэски э Хаморески хохаимаса, вай ов кердяс маскаралыки лэнги пхэнятар катар Дина.
GEN 34:14 Он пхэнлэ лэски: — Амэ нащи керас асавко: тэ дас амарэ пхэня не абрезани муршэстэ кан овэлас би амэнги ладжяво.
GEN 34:15 Амэ кан пхэнас лачё, тумэ тэ овэна, сар амэ, тай тэ керэна алаи тумарэ муршэнги абрезания.
GEN 34:16 Дэчи амэ кан дас тумэн амарэ чяян тай кан лас амэнги тумарэн. Амэ кан бэшас машкарэ тумэндэ тай кан овас тумэнца екх дюняс.
GEN 34:17 Ай тумэ тэ на керэна абрезания, амэ кан лас амарэ пхэня тай кан джяс.
GEN 34:18 О Хамор тай лэско чяво о Шэхем дэхляс лэнги зборэс.
GEN 34:19 О тэрно мануш чяльти кердяс одова, со он пхэнлэ, вай ов бут лачес дэхэлас э Яковески чяя. Ай андэ кхер пэ дадэстэ о Шэхем сас алаендар намлыс.
GEN 34:20 Дэчи о Хамор тай лэско чяво о Шэхем алэ ки бар ки дизаки тай пхэнлэ э дюняски.
GEN 34:21 — Адала мануша лаче амэнца, — пхэнлэ он. — Мэ бэшэн опэр амарэ пхуятэ тай мэ пхерэн опэр латэ. Опэр адалэ пхуятэ лэнги рэсэл тхан. Амэ кан прандозас опэр лэнги чяяндэ, тай он мэ прандозэн опэр амаряндэ.
GEN 34:22 Ай амарэ мурша, сар он, камэл тэ овэн абрезаня. Екх озаман кан бэшэн адала мануша амэнца, сар екх дюняс.
GEN 34:23 Озаман лэнги атарэс, о мангин тай алаи лэнги гайваня кан овэн амарэ. Эла керас, со он пхэнлэ, тай он кан бэшэн машкарэ амэндэ.
GEN 34:24 Алаи, кон кидэласпэс ки дизаки бар, пхэнлэ лачё э Хаморески тай лэски чявэски э Шэхемески, тай алаи о мурша андэ диз сас абрезаня.
GEN 34:25 Тринэ десендар, кана лэндэ дага дукхалас, о дуй чявэ э Яковески — о Симеон тай о Левий, о пхрала э Динаки — лилэ о камадэс, бирдэн пэлэ опэр диз тай мудардэ алаи э муршэн.
GEN 34:26 Он мудардэ камаса э Хаморес тай лэски чявэс э Шэхемес, лилэ э Дина андар Шэхемеско кхер тай гелэ.
GEN 34:27 Дэчи о чявэ э Яковески алэ ко мудардэ тай чёрдэ э диз, катэ кердэ маскаралыки катар пхэн.
GEN 34:28 Он лилэ о атарэс э барэ тай э тикнэ гайваненца, джёрэн — алаи, со сас андэ диз тай ко ливадя.
GEN 34:29 Алаи лэнго барвалипэ, тай э пуен, тай э джювлен, тай алаи, со сас андэ кхера, он лилэ пэски.
GEN 34:30 Дэчи о Яков пхэнляс э Симеонески тай э Левиески: — Тумэ кердянус манги хурлуки, кердянус тэ на дэхэн ман о мануша адалэ пхуяки, о ханаанея тай о периззея. Амэндэ залак мануша, ай он кан овэн екхетханэ тай кан мударэн ман, тай алаи амаро дюняс кан мэрэл.
GEN 34:31 Ай он пхэнлэ: — Та со, камэл тэ керэн амарэ пхэняса, сар кахпэисаса?
GEN 35:1 О Дэл пхэнляс э Яковески: — Ваздэтут андэ Вефиль, ачё отхэ тай кер отхэ алтари э Дэвлэски, Саво сикавдяспэс туки, кана ту нашлян тэ пхралэстар катар Исав.
GEN 35:2 О Яков пхэнляс пэ кхерутнэнги тай алаенги, кон эсас амэнца: — Шужарэн тумэн катар джятя дэла, савэ тумэнца, тай паровэн тумэнги о савутя.
GEN 35:3 Дэчи кидэнтумэн ко дром, тай амэ гелям андэ Вефиль, катэ мэ кан керав алтари э Дэвлэски, Саво зборисаило манца андэ дес ки хурлукеско тай сас манца, кай тэ на джяв.
GEN 35:4 Он динэ ко Яков алаи э джяте дэвлэн, савэ сас лэндэ, тай о чяня андар кана, тай о Яков хранляс лэн тал дуби андэ Шэхем.
GEN 35:5 Дэчи он гелэ ко дром. Э траш э Дэвлэски лиляс алаи о диза агорял лэндэ, аякха кай никхон на родэлас э Яковески пуен.
GEN 35:6 О Яков тай алаи, кон сас лэса, алэ андэ Луз (самким Вефиль) ки пху Ханаан.
GEN 35:7 Отхэ ов кердяс алтари тай тхэдяс одова тхан Эль-Бет-Эль, вай отхэ о Дэл пхутэрдяспэс лэски, кана ов нашло пэ пхралэстар.
GEN 35:8 Э Девора, сави хавдярэлас э Рэвэка, мули тай сас паромэ тал дуби паш ко Вефили. Оничин ов сас тхэдо Аллон-Бахут.
GEN 35:9 Кана о Яков ало палэ андар Паддан-Арам, о Дэл генэ сикавдяспэс лэски тай алгышты лэс.
GEN 35:10 О Дэл пхэнляс лэски: — То нав Яков, ай акана ту на кан бучёс Яков. То нав кан овэл Израиль. Аякха о Дэл тхэдяс лэс Израиль.
GEN 35:11 Ов пхэнляс лэски: — Мэ — о Дэл о Баро-Зорало. Мэ аракхлён тутар пуя тай бутё. Дюняс тай бут дюнядэс кан овэн тутар, тай патишая кан овэн тутар.
GEN 35:12 Э пху, сави Мэ динём э Авраамес тай э Исаакес, Мэ кан дав тутэ тай ла тэ пуендэ.
GEN 35:13 Тай о Дэл ваздиняспэс лэстар отхэ.
GEN 35:14 О Яков тхэдяс о бар тэрдиндос одолэ тханэстэ, катэ о Дэл зборизэлас лэса, тай чёрдяс опэр лэстэ винас тай маслинаки олия.
GEN 35:15 О Яков тхэдяс о тхан, катэ о Дэл зборизэлас лэса, Вефиль.
GEN 35:16 Он ачявдэ о Вефиль тай сас надур катар Эфрата, кана ки Рахиль лиляс тэ аракхлёл пуёс, тай о аракхлипэ сас бут пхаро.
GEN 35:17 Ой бут сидэла дукх, кана аракхлёлас о пуёс. Э джювли, сави керэлас ярдыми тэ аракхлёл, пхэнляс лаки: — Ма траша, тутэ кан овэл генэ екх чяво.
GEN 35:18 Кана э Рахиль мукелас по тэнышы тай мэрэлас, ой тхэдяс пэ чявэс Бэн-Они, ай о дад тхэдяс лэс Вениамин.
GEN 35:19 Э Рахиль мули тай сас паромэ опэр дром ко Эфрата (самким Вифлееми).
GEN 35:20 Опэр лаки гробостэ о Яков тхэдяс бар тэрдиндос. Одова бар тэрдо опэр гробус ки Рахиляко джи авдес.
GEN 35:21 О Израиль джялас англэ тай тхэдяс катуна пал Мигдал-Эдэр.
GEN 35:22 Кана о Израиль бэшэлас андэ одолэ пхуятэ, о Рувим пашлило пэ дадэски иргатинкаса э Билхаса, тай о Израиль галило адалэстар. Ко Яков сас дэшудуй чявэ.
GEN 35:23 Катар Лия: о Рувим, баштутно э Яковеско, о Симеон, о Левий, о Иуда, о Иссахар тай о Завулон.
GEN 35:24 Катар Рахиль: о Иосиф тай о Вениамин.
GEN 35:25 Катар Рахиляки иргатинка ки Билха: о Дан тай о Неффалим.
GEN 35:26 Катар Лияки иргатинка ки Зилпа: о Гад тай о Асир. Аки о чявэ э Яковески. Он аракхлилэ лэски андэ Паддан-Арам.
GEN 35:27 О Яков ало пэ дадэстэ ко Исаак андэ Мамрэ, кай пашэ Кирьят-Арба (самким Хеврон), катэ бэшэнас о Авраам тай о Исаак.
GEN 35:28 Алаи о деса э бэшымаски э Исаакески сас шэлу охтодэша брэш.
GEN 35:29 О Исаак сас пхуро тай чяло бэшымаса. Ов мукляс по тэнышы, муло тай гело пэ мулэ папудэндэ. Лэски чявэ о Исав тай о Яков пароскердэ лэс.
GEN 36:1 Аки о пхукаипэ катар Исав (ов да Эдом) тай лэски пуендар.
GEN 36:2 О Исав лиляс пэски ромнян андар Ханаан: э Ада, э чяя хетеески э Элонески, э Оголивама, э Анаки чяя тай туруни э хивеески э Цывеонески,
GEN 36:3 тай генэ э Басемата, Измаилески чяя, э пхэня э Невайотески.
GEN 36:4 Ки Ада аракхлило э Исавески о Элифаз, ки Басемата аракхлило о Реуэл,
GEN 36:5 ки Оголивама аракхлило о Еуш, о Ялам тай о Корах. Адава о чявэ э Исавески, кай аракхлилэ лэски андэ Ханаан.
GEN 36:6 О Исав лиляс пэ ромнян, чявэн, чяян тай алаи э кхерутнэн, лиляс о атарэс, э гайванен тай алаи о мангин, саво ов кидиняс андэ Ханаан, тай накхло андэ авэр пху пэ пхралэстар ко Яков,
GEN 36:7 вай лэндэ сас бут мангин, тай нащи овэн он екхетханэ. Лэндэ сас аборкха гайваня, кай э пху, катэ он бэшэнас, нащи хавдярэлас лэн э дон.
GEN 36:8 Аякха о Исав (ов да о Эдом) ачило андэ горадэс андэ Сеир.
GEN 36:9 Аки о пхукаипэ катар Исав (ов си о дад э эдомитяненги кай бэшэлас андэ горадэс ки Сеир) тай лэски пуендар.
GEN 36:10 Аки о нава э Исавески чявэнги: о Элифаз, о чяво э Исавеско лэски ромнятар катар Ада, тай о Реуэл, о чяво э Исавеско лэски ромнятар катар Басемата.
GEN 36:11 О чявэ э Элифазески: о Теман, о Омар, о Цэфо, о Гатам тай о Кеназ.
GEN 36:12 Ко чяво ки Исавеско ко Элифаз сас иргатинка, сави бучёлас Тимна, савятэ аракхлило лэски о Амалек. Адава о туруня э Исавески ромняки э Адаки.
GEN 36:13 О чявэ э Реуэлески: о Нахат, о Зерах, о Шамма тай о Мизза. Адава о туруня э Исавески ромняки э Басематаки. Цефо*
GEN 36:14 О чявэ э Исавески лэски ромнятар катар Оголивама, э чяй э Анаски тай э туруниса э Цывеонески, савэ аракхлилэ латэ э Исавески: о Еуш, о Ялам тай о Корах.
GEN 36:15 Аки о сагбудэс машкарэ ко пуя ки Исавески. О чявэ э Элифазески, о баштутно э Исавеско: о сагбудэс о Теман, о Омар, о Цэфо, о Кеназ,
GEN 36:16 о сагбудэс о Корах, о Гатам тай о Амалек. Адава о сагбудэс, кай аракхлилэ катар Элифаз андэ Эдом; он сас о туруня э Адаки.
GEN 36:17 О чявэ э Реуэлески, э Исавески чявэски: о сагбудэс о Нахат, о Зерах, о Шамма тай о Мизза. Адава о сагбудэс, савэ аракхлилэ катар Реуэл андэ Эдом; он сас о туруня э Исавески ромняки э Басематаки.
GEN 36:18 О чявэ лэски ромнятар ки Оголивама: о сагбудэс о Еуш, о Ялам тай о Корах. Адава о сагбудэс, кай аракхлилэ катар Исавески ромни ки Оголивама, э чяй э Анаски.
GEN 36:19 Аки о чявэ э Исавески (ов да о Эдом) тай аки лэнги сагбудэс.
GEN 36:20 Аки о чявэ э Сеирески о хореи, кай бэшэлас андэ одоя область: о Лотан, о Шовал, о Цывеон, о Ана,
GEN 36:21 о Дишон, о Эцэр тай о Дишан. Адала чявэ э Сеирески андэ Эдом сас сагбудэс э хореенги.
GEN 36:22 О чявэ э Лотанески: о Хорий тай о Хемам. Э пхэн э Лотанески сас э Тимна.
GEN 36:23 О чявэ э Шовалески: о Алван, о Манахат, о Эвал, о Шэфо тай о Онам.
GEN 36:24 О чявэ э Цывеонески: о Айя тай о Ана. Адава одова Ана, саво пхутэрдяс андэ ливади тхарэ ханинга, кана чярярэлас э джёрэн пэ дадэскерэн э Цывеонески.
GEN 36:25 О пуя э Анаски: о Дишон тай э Оголивама, чяй э Анаски.
GEN 36:26 О чявэ э Дишонески: о Хемдан, о Эшбан, о Ифран тай о Херан.
GEN 36:27 О чявэ э Эцэрески: о Билхан, о Зааван тай о Акан.
GEN 36:28 О чявэ э Дишанески: о Уц тай о Аран.
GEN 36:29 Аки о сагбудэс э хореенги: о сагбудэс о Лотан, о Шовал, о Цывеон, о Ана,
GEN 36:30 о сагбудэс о Дишон, о Эцэр тай о Дишан. Он сас сагбудэс э хореенги лэнги породэнги андэ пху Сеир.
GEN 36:31 Аки о патишая, савэ сас сагбудэс андэ Эдом, дага ангал отхэ, сар андэ Израиль улэ патишая:
GEN 36:32 О Бэла, о чяво э Бэореско, сас патишаи андэ Эдом. Лэски диз бучёлас Динхава.
GEN 36:33 Пал ко мэрипэ ки Бэласко патишаи лэски тханэстэ уло о Иовав, о чяво э Зэрахеско, андар Боцра.
GEN 36:34 Пал ко мэрипэ ки Иовавеско патишаи лэски тханэстэ уло о Хушам катар пху ки теманитяненги.
GEN 36:35 Пал ко мэрипэ ки Хушамеско патишаи лэски тханэстэ уло о Хадад, о чяво э Бэдадеско, саво мудардяс э мадианитянен андэ пху ки Моавески. Лэски диз бучёлас Авит.
GEN 36:36 Пал ко мэрипэ ки Хададеско патишаи лэски тханэстэ уло о Самла андар Масрека.
GEN 36:37 Пал ко мэрипэ ки Самласко патишаи лэски тханэстэ уло о Саул андар Реховот, кай си ки диряв.
GEN 36:38 Пал ко мэрипэ ки Саулеско патишаи лэски тханэстэ уло о Баал-Ханан, о чяво э Ахбореско.
GEN 36:39 Пал ко мэрипэ ки Баал-Хананеско, э чявэско э Ахбореско, патишаи лэски тханэстэ уло о Хадар. Лэски диз бучёлас Пау. Ай о нав лэски ромняко сас Мэхэтавэль; ой сас э чяй э Матрэдэски, э туруниса э Мэ-Захавески.
GEN 36:40 Аки о нава э сагбудэнги, э Исавески пуенги, лэнги породэнги тай пхуенги. Лэнги нава: о сагбудэс о Тимна, о Алва, о Етет,
GEN 36:41 о сагбудэс о Оголивама, о Эла, о Пинон,
GEN 36:42 о сагбудэс о Кеназ, о Теман, о Мивцар,
GEN 36:43 о сагбудэс о Магдиэл тай о Ирам. Адава о сагбудэс э Эдомески лэски тханэндэ андэ пху, опэр савятэ он си. Адава сас о Исав, о дад э эдомитяненго.
GEN 37:1 О Яков бэшэлас андэ одолэ пхуятэ, катэ бэшэлас лэско дад, ки пху Ханаан.
GEN 37:2 Аки о пхукаипэ катар Яков тай лэски пуендар. О Иосиф, савэски сас дэшуэфта брэш, чярярэлас о атарэс э бакрэнца екхетханэ пэ пхралэнца — э Билхаки тай э Зилпаки чявэнца, э ромненги э Иосифески дадэски. О Иосиф пхукавэлас пэ дадэски налачё пэ пхралэндар.
GEN 37:3 О Израиль дэхэлас э Иосифес бут алаи аврэ чявэндар, вай ов аракхлило лэски опэр пхуримастэ. О Израиль кердяс лэски бут шукара савутя.
GEN 37:4 Кана о пхрала дикхлэ, кай о дад дэхэл лэс бут, ниш лэн алаен, он на дэхлэ лэс тай нащи лачимаса зборизэнас лэса.
GEN 37:5 Екхвар о Иосиф дикхляс суно. Ов пхукавдяс лэстар пэ пхралэнги, тай он на дэхлэ лэс май бут.
GEN 37:6 Аки со ов пхэнляс лэнги: — Шунэн, со суно мэ дикхлём.
GEN 37:7 Амэ пхандасас о снопя гив ки ливади, тай бирдэн мо снопи ваздиняспэс тай гортярдяспэс, ай тумаро снопя тэрдило агорял лэстэ тай бангилэ.
GEN 37:8 О пхрала пхэнлэ лэски: — Та со, ту кан овэс патишаи опэр амэндэ? Та со, амэ кан овас тутэ иргатя? Тай он май бут холясаилэ опэр лэстэ андар лэско суно тай андар адава пхукаипэ.
GEN 37:9 О Иосиф дикхляс генэ екх суно тай генэ пхукавдяс лэстар пэ пхралэнги: — Шунэн, мэ дикхлём генэ екх суно: кай манги бангило о кхам, о чюнут тай о дэшуекх чергэня.
GEN 37:10 Ов пхукавдяс о суно на екх пэ пхралэнги, ами ли пэ дадэски, тай о дад холясаило лэски: — Со суно адава ту дикхлян? Та со, мэ, ти дай тай тэ пхрала чячес кан авас тай кан бангяс туки джи ки пху?
GEN 37:11 О пхрала кизгандиенас лэс, ай о дад тюшундиелас адалэстар.
GEN 37:12 О пхрала гелэ тэ чярярэн атарэс пэ дадэски ко тхана андэ Шэхем,
GEN 37:13 тай о Израиль пхэнляс э Иосифески: — Ту джянэс, кай тэ пхрала чярярэн о атарэс паш ко Шэхем. Мэ мангав тэ бичялав тут лэндэ. — Мэ газыри, — пхэнляс о Иосиф.
GEN 37:14 О дад пхэнляс лэски: — Джя дикх, алаи лачё тэ пхралэнца тай э атарэнца, тай эла пхэн манги. Ов пхэнляс лэски адава ки ливади Хеврон, тай о Иосиф гело андэ Шэхем.
GEN 37:15 Отхэ ов родэлас ко ливадя, бискай на дикхляс лэс мануш тай пхучляс лэс: — Со ту родэс?
GEN 37:16 Ов пхэнляс: — Мэ родав мэ пхралэн. Мангав тут, пхэн манги, катэ он чярярэн пумарэ атарэс?
GEN 37:17 — Он гелэ атхар, — пхэнляс о мануш. — Мэ шунлём, сар он зборизэнас: «Гадэн андэ Дотан». О Иосиф гело пал пэ пхралэндэ тай аракхляс лэн ко Дотан.
GEN 37:18 Он дикхлэ лэс дурал, тай ангал отхэ, сар ов пашыло лэндэ, зборисаилэ тэ мударэн лэс.
GEN 37:19 — Аки авэл одова, саво дикхел сунэ! — пхэнлэ он екхаврэски.
GEN 37:20 — Элан мударас лэс тай тэ чяс андэ шуки ханинг, ай амарэ дадэски пхэнаса, кай лэс халяс вэшэско гайвани. Дэчи кан дикхас, со кан никлёл андар лэски сунэндэ.
GEN 37:21 Ай о Рувим шунляс тай кутарды лэс лэндар, пхэнляс: — На, на кан мударас лэс.
GEN 37:22 Ма чёрэн рат. Чен лэс андэ акая ханинг атхэ, андэ ливади, ай ма ваздэн опэр лэстэ тумаро васт. О Рувим мангляс тэ кутардиел лэс лэндар тай тэ анэл ко дад.
GEN 37:23 Кана о Иосиф пашыло пэ пхралэндэ, он пхаравдэ опрал лэстэ о савутя — одола, савэ сас багалыс сивдэ, —
GEN 37:24 тай читэ лэс андэ ханинг. Э ханинг сас чючи, би панески.
GEN 37:25 Дэчи он бэшлэ тэ хан, тай дикхлэ каравани э измаильтяненго, кай авэл андар Галаад. Лэнги камилэс сас пхэрдэ чяренца, бальзамеса тай мирраса, савэ он гелэнас андэ Египти.
GEN 37:26 О Иуда пхэнляс пэ пхралэнги: — Со файдас амэнги, амэ тэ мударас амарэ пхралэс тай кан гаравас адава?
GEN 37:27 Зиядэ тэ бикнас лэс э измаильтяненги тай тэ на ваздас опэр лэстэ амарэ васта; вай ов амаро пхрал, амаро тэни тай рат. О пхрала пхэнлэ лачё.
GEN 37:28 Кана о мадианскя бикинимаря накхенас пашал, о пхрала никалдэ э Иосифес андар ханинг тай бикиндэ э измаильтяненги бишэ рупунэ которэнги. О измаильтяня лилэ лэс тай гелдэ андэ Египти.
GEN 37:29 Кана о Рувим ало ки ханинг, ов дикхляс, кай о Иосиф отхэ нанай, тай пхаравдяс опэр пэстэ о савутя.
GEN 37:30 Ов ало пэ пхралэндэ тай пхэнляс: — О чяворо отхэ нанай! Кай манги акана тэ гарававман?
GEN 37:31 Дэчи он лилэ о савутя э Иосифески, чиндэ бузнэс тай макхлэ о савутя рат.
GEN 37:32 Он гелдэ о багалыдэс сивдэ савутя пумарэ дадэски тай пхэнлэ: — Аки со амэ аракхлям. Дикх, на о савутя адава тэ чявэски?
GEN 37:33 Ов пэнджярдяс лэн тай диняс бэбэря: — Адава о савутя мэ чявэски! Лэс халяс вэшэско гайвани! Эйами, о Иосиф сас джирдимэ котора!
GEN 37:34 О Яков пхаравдяс опэр пэстэ о савутя, урявдяс гонэски савутя тай бут дес ровэлас пэ чявэски.
GEN 37:35 Алаи лэски чявэ тай чяя алэ тэ аядиен лэс, ай ов на мангелас тэ аядиен лэс, пхэнэлас: — На, мэ аякха андэ касывэтестэ, тай кан джяв андэ дюняс ки мулэнго, мэ чявэстэ. Аякха о дад ровэлас пэ чявэски.
GEN 37:36 Ай о мадианитяня одова вахыти бикиндэ э Иосифес андэ Египти э Потифарески, э фараонески ярдымарески, саво сас лэстэ баро опэр барэ.
GEN 38:1 О Иуда одова вахыти ачявдяс пэ пхралэн тай бэшэлас екхе манушэстэ андар Адуллам, кай бучёлас Хира.
GEN 38:2 Отхэ о Иуда дикхляс чяя ханаанеескеря, саво бучёлас Шуа. Ов прандосаило опэр латэ тай лиляс тэ бэшэл ласа.
GEN 38:3 Ой насвалили пуёстэ, тай аракхлило чяво, савэс о Иуда тхэдяс Эр.
GEN 38:4 Ой генэ насвалили пуёстэ, тай аракхлило чяво, тай ой тхэдяс лэс Онан.
GEN 38:5 Латэ аракхлило генэ екх чяво, тай ой тхэдяс лэс Шэла. Латэ ов аракхлило андэ Хезив.
GEN 38:6 О Иуда лиляс пэ баштутнэски э Эрески ромня, кай бучёлас Тамарь.
GEN 38:7 Ай о Эр, э Иудеско баштутно, сас бэзяло андэ якха ки Сагбуски, тай о Сагбус о Яхвэ диняс лэс ко мэрипэ.
GEN 38:8 Дэчи о Иуда пхэнляс э Онанески: — Ту камэл тэ пашлёс тэ пхралэски ромняса, тэ керэс, со камэл тэ керэл о кумнатос, тэ овэн пуя тэ пхралэски.
GEN 38:9 Ай о Онан джянэлас, кай о пуя на кан овэн лэски, оничин сальтя, кана пашлёлас пэ пхралэски ромняса, ов чёрэлас э муршэско ки пху, тэ на аракхлён пуя э пхралэски.
GEN 38:10 Одова, со ов керэлас, сас бэзя андэ якха ки Сагбуски Яхвэски, оничин Ов диняс ко мэрипэ ли Онанес.
GEN 38:11 Дэчи о Иуда пхэнляс пэ боряки э Тамаряки: — Бэш пхивли андэ кхер тэ дадэстэ, бискай на кан барёл мо чяво о Шэла. Ов тюшунды: «Сар би о Шэла тэ на мэрэл пал пэ пхралэндэ». Тай э Тамарь гели тэ бэшэл андэ кхер пэ дадэстэ.
GEN 38:12 Бутэ вахытестар э ромни э Иудаски, э чяй э Шуаски, мули. Кана о Иуда раганты, ов гело андэ Тимна ко мануша, савэ моравэнас лэски бакрэн, тай лэско амал адулламитяни о Хира гело лэса.
GEN 38:13 Э Тамаряки пхэнлэ: — То састро джял андэ Тимна тэ моравэл пэ бакрэн.
GEN 38:14 Ой читяс э пхивляки савутя, учярдяспэс, тэ на пэнджярэн ла, тай бэшли ангал Энаим, кай опэр дром андэ Тимна. Ой дикхелас, кай о Шэла барило, ай ла на динэ лэстэ сар ромня.
GEN 38:15 Кана о Иуда дикхляс ла, ов галило, кай кахпэиса, вай латэ сас пханло о муй.
GEN 38:16 Ов болдиняс катар дром латэ тай пхэнляс: — Гадэ, мук тэ пашляв мэ туса, — вай ов на джянэлас, кай адава лэски бори. Ой пхучляс: — Ай со кан дэс ман андар одолэстэ, тэ пашлёс манца?
GEN 38:17 Ов пхэнляс: — Мэ кан бичялав туки бузнорэс андар мэ атаратэ. Ой пхучляс: — Ай ту кан дэс ман шо-то джи одолэ вахытески, бискай бичялэс бузнорэс?
GEN 38:18 Ов пхэнляс: — Со тэ дав тут? Ой пхэнляс: — То печяти опэр гайтани тай ровли, сави тутэ андэ васт. Ов диняс ла алаи адава тай суто ласа, тай ой насвалили пуёстэ лэстар.
GEN 38:19 Ой гели отхар, пхучярдяспэс тай генэ урявдяс пхивляки савутя.
GEN 38:20 Одова вахыти о Иуда бичялдяс пэ амалэс э адулламитянес бузнорэса, тэ лэл палэ одова, со ачявдяс одолэ джювлятэ, ай о амал на аракхляс ла.
GEN 38:21 Ов пхучляс атхутнэ манушэндэ: — Кай э храмески кахпэиса, сави сас бэшли ко дром андэ Энаим? Он пхэнлэ: — Атхэ на сас нисави храмески кахпэиса.
GEN 38:22 Ов ало ко Иуда тай пхэнляс: — Мэ на аракхлём ла, тай о мануша одолэ тханэски пхэнлэ: «Атхэ нанай нисави храмески кахпэиса» .
GEN 38:23 О Иуда пхэнляс: — Мэ ачявэл пэски одова, со лиляс, я кан овас андэ ладжявастэ. Вай мэ бичялдём лаки бузнорэс, ай ту ла на аракхлян.
GEN 38:24 Тринэ чёнэндар э Иудаски пхэнлэ: — Ти бори э Тамарь пэли андэ кахпэлыки тай одолэстар насвалили пуёстэ. О Иуда пхэнляс: — Никалэн ла, тай ой мэ овэл тхарди!
GEN 38:25 Ай кана ла никалдэ аври, ой бичялдяс ко састро тэ пхэнэн: — Мэ насвали пуёстэ катар мануш, каски си акала шэя. — Генэ пхэнляс: — Дикх, на пэнджярэс, каски акава печяти, гайтани тай ровли?
GEN 38:26 О Иуда пэнджярдяс лэн тай пхэнляс: — Ой чячи, ниш мэ, вай мэ на динём ла мэ чявэстэ ко Шэла. Ов генэ на пашлёлас ласа.
GEN 38:27 Кана ало лаки вахыти тэ аракхлёл пуёс, андэ латэ сас чяворэ-огизя.
GEN 38:28 Кана латэ аракхлёнас, о екх андар лэндэ никалдяс васт. Дэчи э джювли, кай керэлас ярдыми тэ аракхлён, лиляс лоло тхав, пханляс лэско васт тай пхэнляс: — Адава никлисто ангал.
GEN 38:29 Ай ов сидиняс о васт палэ, тай никлисто лэско пхрал. Дэчи ой пхэнляс: — Сар адава ту накхлян? Тай лэс тхэдэ Парец.
GEN 38:30 Дэчи никлисто ли одова, савэстэ опэр васт сас лоло тхав, тай лэс тхэдэ Зерах.
GEN 39:1 О измаилитяня андэ э Иосифес андэ Египти, тай о египтяни о Потифар, ярдымари э фараонеско тай баро опэр лэски барэндэ, киндяс лэс лэндэ.
GEN 39:2 О Сагбус о Яхвэ сас э Иосифеса, тай лэстэ алаи сас лачё, кай бэшэлас андэ кхер пэ египетски сагбустэ.
GEN 39:3 Лэско сагбус дикхляс, кай о Сагбус о Яхвэ сас э Иосифеса тай кай Ов дэл лэс лачипэ андэ алаестэ, со ов керэл.
GEN 39:4 О Иосиф аракхляс лачипэ андэ лэски якхендэ тай уло лэско иргати. О Потифар тхэдяс лэс опэр пэ кхерэстэ тай диняс лэс тэ дикхел пал алаи пэ мангинэстэ.
GEN 39:5 Тай одолэ вахытестар, сар ов тхэдяс лэс опэр пэ кхерэстэ тай опэр алаи ко мангин, о Сагбус о Яхвэ алгышты о кхер э египтянеско булуб э Иосифески. О алгыштима э Сагбуско сас опэр алаестэ, со сас ко Потифари, — тай андэ кхер, тай андэ ливади.
GEN 39:6 Оничин ов диняс, тэ дикхел о Иосиф пал алаестэ, со лэстэ сас. Булуб э Иосифески ов ништоски на керэлас касывэти, екх тэ хал. Ко Иосиф сас лачё стани тай шукар,
GEN 39:7 тай вахытестар э ромни лэски сагбуски лиляс тэ дикхел карин лэстэ: — Пашлё манца!
GEN 39:8 Ай ов на мангляс, пхэнляс: — Манца мо сагбус ништоски на керэл касывэти андэ кхер. Алаи, со си лэстэ, ов диняс мандэ тэ дикхав пал лэстэ.
GEN 39:9 Андэ адалэ кхерэстэ мэ алаендар баро. Мо сагбус диняс ман алаи, булуб тутар, вай ту — лэски ромни. Сар мэ тэ керав асавко баро джюнгалипэ тай керав бэзя ангал Дэл?
GEN 39:10 Ой мангелас лэс кажын дес, ай ов на мангелас тэ пашлёл ласа тай джи тэ овэл ласа.
GEN 39:11 Екхвар ов диняс андэ кхер пэ дилаки, кана никхон андар кхерутнэ на сас андэ кхер.
GEN 39:12 Ой диняс бурнэк лэс савутендар тай пхэнляс: — Пашлё манца! Ай ов сидиняспэс тай нашло, ачявдяс опрунэ савутя латэ андэ васта.
GEN 39:13 Кана ой дикхляс, кай ов нашло тай ачявдяс о савутя латэ андэ васта,
GEN 39:14 ой диняс икос э кхерутнэ иргатен тай пхэнляс лэнги: — Дикхен, адалэ евреес андэ амэндэ андэ кхер, ай ов керэл амэнги маскаралыки! Ов ало атхэ тай мангляс тэ пашлёл манца, ай мэ лилём тэ дав бэбэря.
GEN 39:15 Ай ов мэ бэбэрятар ачявдяс пэ савутя тай нашло.
GEN 39:16 Ой астарэлас о савутя э Иосифески пэстэ, бискай на ало кхерэ лэско сагбус.
GEN 39:17 Ой пхукавдяс лэски одова жэ пхукаипэ: — Адава иргати, о евреи, савэс ту амэндэ андян, ало мандэ тай мангляс мандар тэ керэл маскаралыки,
GEN 39:18 ай мэ лилём тэ дав бэбэря, тай ов ачявдяс мандэ пэ савутя тай нашло.
GEN 39:19 Кана лэско сагбус шунляс о пхукаипэ пэ ромняко, сави пхэнляс: «Аки со то иргати кердяс манца», ов лачес холясаило.
GEN 39:20 Ов лиляс э Иосифес тай бэшавдяс лэс андэ пханли, катэ сас о патишайлытика пханлимаря. Тай аякха о Иосиф уло андэ пханли.
GEN 39:21 Ай о Сагбус о Яхвэ сас лэса; Ов кердяс лэски мила, тай о баро опэр барэ сас лачё лэса.
GEN 39:22 О баро опэр барэ тхэдяс э Иосифес опэр алаи ко пханлимаря, тай ов дикхелас пал алаи ко дилэс андэ пханли.
GEN 39:23 О баро опэр барэ на дикхелас пал одолэстэ, пал состэ дикхелас о Иосиф, вай о Сагбус о Яхвэ сас э Иосифеса тай дэлас лэс лачипэ андэ алаи ко дилэс.
GEN 40:1 Сар савэ вахытестар э винаскочёрдимари тай о пэкимари э египтески патишаески сас дошалэ ангал пэ сагбустэ, ко патишаи э Египтеско.
GEN 40:2 О фараони холясаило пэ до иргатенги, э барэ винаскичёрдимарески тай э барэ пэкимарески,
GEN 40:3 тай пханляс лэн андэ пханли андэ кхер ки барэско опэр барэ, отхэ, катэ сас пханло о Иосиф.
GEN 40:4 О баро опэр барэ диняс лэн ко Иосиф, тай одова дикхелас пал лэндэ. Он сас пханлэ сарсаво вахыти,
GEN 40:5 тай аки он о дуй — э винаскочёрдимари тай о пэкимари э египтески патишаески, савэ сас бэшлэ андэ пханли, андэ екх рат дикхлэ сунэ, тай кажни суно галярэлас шо-то пинро.
GEN 40:6 Кана о Иосиф ало лэндэ авэр сабаги, ов дикхляс, кай он касывэтлыдэс.
GEN 40:7 Ов пхучляс э фараонески иргатен, пханлэн екхетханэ лэса андэ кхер лэски сагбустэ: — Соски тумэ авдес касывэтлыдэс?
GEN 40:8 — Амэ о дуй дикхлям сунэ, — пхэнлэ он, — ай тэ галярэл лэн нанай кон. О Иосиф пхэнляс лэнги: — Та со, о галярипэ на катар Дэл? Пхукавэн манги тумарэ сунэ.
GEN 40:9 О баро винаскочёрдимари пхукавдяс э Иосифески по суно: — Мэ дикхлём андэ суно дракхаки лазас,
GEN 40:10 тай опэр лазас сас трин веткес. Залак сикавдэпэс о почкес тай пхари, тай о лулудя улэ бирдэн веткес дракхаки.
GEN 40:11 Мандэ андэ васт сас кадеи э фараонеско. Мэ лилём э дракх, бастым о соки андэ кадеи тай динём о кадеи ко фараони.
GEN 40:12 — Аки со адава, — пхэнляс лэски о Иосиф. — Трин веткес — адава трин дес.
GEN 40:13 Тринэ десендар о фараони кан ваздэл тут тай кан тхэл, катэ санас, тай ту кан дэс ко фараони лэско кадеи, сар авгутнэ вахытя, кана ту санас лэско винаскочёрдимари.
GEN 40:14 Ай мангав тут, андэ одола лаче деса тюшундие мандар тай кер манги мила: пхэн мандар э фараонески, тэ мукел ман андар пханли.
GEN 40:15 Вай ман зораса гелдэ катар пху ки евреенги, тай атхэ мэ ништо на кердём асавко, тэ бэшав андэ пханли.
GEN 40:16 О баро пэкимари дикхляс, кай о Иосиф диняс лачё галярипэ, тай пхэнляс э Иосифески: — Ли мэ дикхлём суно: мэ астаравас опэр мэ шэрэстэ трин сэпэтя манрэса.
GEN 40:17 Андэ опрунятэ сас вэрсаво пэкипэ э фараонески, ай ла чюкудиенас о чирикля доврус андар сэпэти опэр мэ шэрэстэ.
GEN 40:18 — Аки со си адава, — пхэнляс о Иосиф. — Трин сэпэтя — адава трин дес.
GEN 40:19 Тринэ десендар о фараони кан ваздэл ли тут — туки кан чинэн о шэро, ай о тэни кан илдиен опэр тэрэки, тай о чирикля кан чюкудиен лэс.
GEN 40:20 Ко трито дес, андэ лэско дес, кана аракхлило о фараони, ов кердяс хабэ алаи пэ манушэнги, тай машкарэ лэндэ ов ваздиняс э барэ винаскичёрдимарес тай э барэ пэкимарес:
GEN 40:21 э барэ винаскичёрдимарес ов тхэдяс лэски тханэстэ, тай одова генэ диняс о кадеи андэ васт ко фараони,
GEN 40:22 ай э барэ пэкимарес илды опэр тэрэки, сар о Иосиф пхэнляс лэнги андэ пэ галяримастэ.
GEN 40:23 Ай о баро винаскочёрдимари на тюшунды катар Иосиф; ов бристэрдяс лэстар.
GEN 41:1 Накхло дуй брэш, тай о фараони дикхляс суно: ов сас тэрдо паш ко диряв Нил,
GEN 41:2 тай аки андар диряв ваздиндилэ эфта гурувня — шукара тай тхулэ — тай лилэ тэ чярён андэ трастникя.
GEN 41:3 Пал лэндэ никлистэ андар Нил авэра эфта гурувня — нашукара тай кишлэ — тай тэрдилэ паш одолэндэ паш ки диряв.
GEN 41:4 Тай о нашукара, о кишлэ гурувня халэ э эфта джяладимэнэн, тхулэ гурувнен. Тай о фараони джянгавдило.
GEN 41:5 Ов суто генэ, тай ов дикхляс авэр суно: эфта эрнэкя — барэ тай пхэрдэ — барёнас опэр екх ветка.
GEN 41:6 Пал лэндэ барилэ генэ эфта эрнэкя — шуке тай тхардэ васточни балваляса.
GEN 41:7 О шуке эрнэкя накхавдэ о эфта барэ, пхэрдэ. Тай о фараони джянгавдило. Адава сас суно.
GEN 41:8 Сабахтан э траш на мукелас лэс. Ов диняс икос алаи э магиен тай э бут годявэрэн э Египтески тай пхукавдяс лэнги пэ сунэ, ай никхон нащи лэн галярдяс.
GEN 41:9 Дэчи о баро винаскочёрдимари пхэнляс э фараонески: — Акана мэ тюшундияв, кай дошало.
GEN 41:10 Екхвар о фараони холясаило опэр пэ иргатендэ тай пханляс ман тай э барэ пэкимарес андэ кхер ки барэско опэр барэ.
GEN 41:11 Ли мэ, ли ов андэ екх рат дикхлям суно, тай кажни сунэстэ сас лэско галярипэ.
GEN 41:12 Отхэ амэнца сас тэрно евреи, о иргати э барэско опэр барэ. Амэ пхукавдям лэски амарэ сунэ, тай ов галярдяс лэн амэнги; кажнески ов галярдяс.
GEN 41:13 Тай сар ов галярдяс, аякха да уло: ман тхэдэ ки баштутни бути, ай околэс илдылар опэр тэрэки.
GEN 41:14 О фараони бичялдяс пал Иосиф, тай лэс чяльти андэ андар пханли. Ов моравдяспэс, паровдяс о савутя тай тэрдило ангал фараони.
GEN 41:15 О фараони пхэнляс э Иосифески: — Мэ дикхлём суно, тай никхон нащи галярэл лэс. Ай мэ шунлём тутар, кай ту галёс о сунэ тай галёс тэ галярэс лэн.
GEN 41:16 О Иосиф пхэнляс: — На мэ, ами о Дэл кан пхэнэл э фараонески лачё галярипэ.
GEN 41:17 О фараони пхэнляс э Иосифески: — Мэ дикхлём суно, кай мэ тэрдо паш ко диряв Нил,
GEN 41:18 тай бирдэн андар диряв ваздиндилэ эфта гурувня, тхулэ тай шукара, тай лилэ тэ чярён андэ трастникя.
GEN 41:19 Пал лэндэ ваздиндилэ эфта авэра гурувня — кокалангерэ, кишлэ тай нашукара, савэ мэ буруни на дикхлём опэр алаи ки пху ки Египтески.
GEN 41:20 О кишлэ, нашукара гурувня халэ о эфта тхулэ гурувнен, савэ никлистэ буруни.
GEN 41:21 Ай адава на гело лэнги лачимаски: он ачилэ асавке жэ нашукара, сар сас. Тай мэ джянгавдилём.
GEN 41:22 Дэчи мэ дикхлём андэ суно эфта эрнэкя опэр екх ветка, пхэрдэ лачё гив.
GEN 41:23 Пал лэндэ барилэ авэра эфта эрнэкя — шуке, кишлэ тай тхардэ васточни балваляса.
GEN 41:24 О шуке эрнэкя накхавдэ о эфта пхэрдэ эрнэкя. Мэ пхукавдём э магиенги, ай никхон нащи галярдяс манги.
GEN 41:25 О Иосиф пхэнляс э фараонески : — О галярипэ э фараонески до сунэнго екх. О Дэл пхутэрдяс э фараонески, со Ов кидэлпэс тэ керэл.
GEN 41:26 Эфта лаче гурувня — адава эфта брэш, ай эфта лаче эрнэкя — адава эфта брэш; о галярипэ екх.
GEN 41:27 Эфта кишлэ, нашукара гурувня, савэ алэ палал, — адава эфта брэш. Аякхажэ эфта кишлэ эрнэкя, тхардэ васточни балваляса, — адава эфта брэш бокхаки.
GEN 41:28 Аки состар мэ пхэнавас, кана пхэнлём э фараонески, кай о Дэл пхутэрдяс лэски, со Ов мангел тэ керэл.
GEN 41:29 Опэр пху ки Египтески авэн эфта брэш барэ чялимаски,
GEN 41:30 ай пал лэндэ кан авэн эфта брэш бокхаки, кана алаи о чялипэ андэ Египти кан овэл бристэрно, тай э бокх кан чючярэл э пху.
GEN 41:31 Ангалутно чялипэ кан бристэрдёл андэ адалэ пхуятэ андар бокх, саво кан авэл пал лэстэ, вай э бокх кан овэл зорали.
GEN 41:32 Ай одова, кай о суно сас э фараонески дувар, си, кай о Дэл чячес кан керэл адава тай чяльти кан овэл, со Ов мангел тэ керэл.
GEN 41:33 Мэ аракхел о фараони галяримаски тай годявэрэ манушэс тай мэ тхэл лэс опэр пху ки Египтески.
GEN 41:34 Мэ тхэл о фараони барэн опэр алаи ки пху, тэ кидэн он панджто паи гив андэ Египти андэ одола эфта брэш э чялимаски.
GEN 41:35 Андэ одола лаче брэша он мэ кидэн алаи о хапэ, кай авэл лэндэ, тай э фараонески зораса мэ кидэн гив тай мэ гаравэн андэ диза.
GEN 41:36 Адава хапэ э пхуяки кан овэл ачявдо, э пху тэ на мэрэл андэ одола эфта брэш э бокхаки, савэ дэчи кан овэн андэ Египти.
GEN 41:37 О фараони тай лэски ярдымаря пхэнлэ лачи адая дила.
GEN 41:38 О фараони пхучляс пэ ярдымарен: — Кан аракхас амэ генэ асавкес, сар адава мануш, андэ савэстэ о Духос э Дэвлэско?
GEN 41:39 Тай о фараони пхэнляс э Иосифески: — Тэ пхутэрдяс о Дэл туки алаи адава, нанай асавко годявэр тай галярдо мануш, сар ту.
GEN 41:40 Мэ тхав тут опэр мэ кхерэстэ, тай алаи мо дюняс кан шунэл, со ту кан пхэнэс. Екх тронеса мэ кан овав учё тутар.
GEN 41:41 О фараони пхэнляс э Иосифески: — Дикх, мэ тхав тут опэр алаи ки пху ки Египтески.
GEN 41:42 Ов читяс пэ наестар э ангрусти тай урявдяс ко най ки Иосифеско, ов урявдяс лэс андэ савутя санэ басмастар тай илды лэски мэнятэ пхоляки джянджир.
GEN 41:43 Ов пхэнляс тэ пхеравэн лэс андэ бричка сар дуйтонэс пал пэстэ тай тэ дэн бэбэря ангал лэстэ: «Бангём!» Аякха ов тхэдяс лэс опэр алаи ки пху ки Египтески.
GEN 41:44 О фараони пхэнляс э Иосифески: — Мэ фараони, ай би тэ зборако никхон андэ алаи ко Египти на кан кхелавэл наеса.
GEN 41:45 Ов диняс э Иосифес нав Цафнат-Панеах тай диняс лэс ромня э Асната, э чяя Поти-Пераски, саво сас попази э дизако, кай бучёлас Он. Тай гело о Иосиф ко дром опэр алаи Египтески пху.
GEN 41:46 Э Иосифески сас триянда брэш, кана ов лиляс тэ керэл бути э фараонески, э Египтески патишаески. Ов никлисто катар фараони тай гело ко дром опэр алаи ко Египти.
GEN 41:47 Андэ эфта брэш ки чялимаски э пху дэлас бут гив.
GEN 41:48 О Иосиф кидэлас алаи о гив одола эфта брэш э чялимаски андэ Египти тай тхэлас андэ диза. Андэ кажни дизатэ ов кидэлас о гив агорял катар ливадя.
GEN 41:49 О гив, кай кидиняс о Иосиф, сас, сар кишай ки моря, тай ов тэрдило тэ гинэл лэс, вай нащи лэс гинэсас.
GEN 41:50 Ангал отхэ, кай алэ о брэша э бокхаки, ко Иосиф аракхлилэ дуй чявэ катар Асната, э чяй э Поти-Пераски. Ов сас о попази э дизако, кай бучёлас Он.
GEN 41:51 О Иосиф тхэдяс пэ баштутнэс Манассия тай пхэнляс: «О Дэл диняс ман тэ бристав алаи мэ касывэтя тай о кхер мэ дадэско».
GEN 41:52 Э дуйтонэс чявэс тхэдяс Ефрем, пхэнляс: «О Дэл алгышты ман ки пху мэ касывэтестэ».
GEN 41:53 Эфта брэш э чялимаски андэ Египти бытылар,
GEN 41:54 тай улэ эфта брэш бокхаки, сар о Иосиф галярдяс. Э бокх сас алаи авэрэ пхуендэ, екх андэ пху ки Египтески сас хапэ.
GEN 41:55 Кана алаи о Египти лиляс тэ бокхалёл, о дюняс мангляс ко фараони хапэ, тай о фараони пхэнляс э египтяненги: — Джян ко Иосиф тай керэн, сар ов кан пхэнэл.
GEN 41:56 Кана э бокх ули опэр алаи ки пху, о Иосиф пхутэрдяс о араня тай лиляс тэ бикнэл о гив э египтяненги, вай э бокх андэ Египти сас бари.
GEN 41:57 Андар алаи ко пхуя авэнас андэ Египти, тэ кинэн ко Иосиф гив, вай опэр алаи ко дюняс сас бари бокх.
GEN 42:1 Кана о Яков галило, кай андэ Египти си гив, ов пхэнляс пэ чявэнги: — Со тумэ дикхен карин екхаврэстэ? —
GEN 42:2 тай генэ пхэнляс: — Мэ шунлём, кай андэ Египти си гив. Джян кинэн лэс амэнги, амэ тэ на мэрас.
GEN 42:3 Дэш пхрала э Иосифески гелэ андэ Египти, тэ кинэн гив,
GEN 42:4 ай э Вениаминес, э Иосифески пхралэс, о Яков на мукляс авэрэ пхралэнца. Ов пхэнляс: — Тэ на овэл лэса хурлуки.
GEN 42:5 Аякха машкарэ аврэндэ ли о чявэ э Израилескерэ алэ тэ кинэн гив, вай ки пху Ханаан сас бокх.
GEN 42:6 О Иосиф сас сагбус опэр алаи ки пху. Ов бикнэлас гив э дюняски андэ алаи ко Египти. Кана о пхрала э Иосифески алэ, он бангилэ лэски джи ки пху.
GEN 42:7 Сар о Иосиф дикхляс пэ пхралэн, ов пэнджярдяс лэн, ай кердяспэс, кай на джянэл лэн, тай зборисаило лэнца баримаса. — Катар тумэ алянус? — пхучляс ов. — Катар пху Ханаан, тэ кинас хапэ, — пхэнлэ он.
GEN 42:8 О Иосиф пэнджярдяс пэ пхралэн, ай он на пэнджярдэ лэс.
GEN 42:9 Ов тюшунды пэ сунэ лэндар тай пхэнляс: — Тумэ — душманя! Тумэ алянус тэ вардиен о назоралэ тхана амарэ пхуятэ.
GEN 42:10 — Ту со, сагбуса, — пхэнлэ он. — Тэ иргатя алэ тэ кинэн хапэ.
GEN 42:11 Амэ алаи о чявэ екхе дадэски. Тэ иргатя чяче мануша, на душманя.
GEN 42:12 Ов пхэнляс лэнги: — На, тумэ алянус тэ вардиен, катэ си андэ амарэ пхуятэ назоралэ тхана.
GEN 42:13 Ай он пхэнлэ: — Тэ иргатя сас дэшудуй пхрала, чявэ екхе дадэски, саво бэшэл опэр пху Ханаан. О тикно ли анкха амарэ дадэса, ай о екх нанай.
GEN 42:14 О Иосиф пхэнляс лэнги: — Мэ вай пхэнлём, кай тумэ — душманя!
GEN 42:15 Тай аки сар мэ тумэн кан галяв: хав совля э фараонески бэшымаса: тумэ на кан джян атхар, бискай на кан авэл атхэ тумаро тикно пхрал.
GEN 42:16 Бичялэн екхес андар тумэндэ пал тумарэ пхралэстэ, ай алаи кан овэн бэшлэ андэ пханли. Аякха мэ кан галяв тумарэ зборэс — чячипэ тумэ манги пхэнэн я на. Тэ на, хав совля э фараонески бэшымаса, тумэ душманя!
GEN 42:17 Тай ов пханляс лэн тринэ десенги.
GEN 42:18 Ко трито дес о Иосиф пхэнляс лэнги: — Керэн, со мэ кан пхэнав, тай кан ачён дживиндэ, вай мэ трашав катар Дэл.
GEN 42:19 Тумэ тэ санус чяче мануша, о екх андар тумэндэ мэ ачёл атхэ андэ пханли, ай авэра мэ гелэн о гив тумарэ бокхалэ хорандадэнги.
GEN 42:20 Ай тумэ камэл тэ анэн мандэ тумарэ тикнэ пхралэс, тэ овэн тумарэ зборэс чяче тай тумэ тэ ачён дживиндэ. Аякха он да кердэ.
GEN 42:21 Он пхэнлэ екхаврэски: — Галилям, кай амэ сидас хурлуки андар амарэ пхралэстэ. Амэ дикхлям лэски касывэти, кана ов мангелас амэн, ай амэ на шунасас, тай аки амэнги уло одова жэ хурлуки.
GEN 42:22 О Рувим пхэнляс: — Мэ вай пхэнавас тумэнги, ма керэн бэзя мамуй ко чяворо, ай тумэ на шунлянус! Акана авэл покиндима андар лэски ратэстэ.
GEN 42:23 Он на тюшундиенас, кай о Иосиф галёл лэн, вай ов зборизэлас лэнца манушэса, саво джянэлас лэнги чиб.
GEN 42:24 Ов болдиняспэс лэндар тай руно, дэчи генэ болдиняспэс тай зборисаило лэнца. Ов лиляс лэндар э Симеонес тай пханляс лэс ангал лэнги якхендэ.
GEN 42:25 О Иосиф пхэнляс тэ пхэрэн лэнги гонэ гив, тэ тхэн лэнги руп кажнески палэ андэ лэски гонэстэ тай тэ пхэрэн лэнги опэр дром. Аякха да сас кердо.
GEN 42:26 Он тхэдэ о гив опэр джёрэ тай гелэ ко дром.
GEN 42:27 Кана он тэрдилэ тэ раткерэн, о екх андар лэндэ пхутэрдяс о гоно, тэ лэл хапэ э джёрэски, тай дикхляс андэ гоно по руп.
GEN 42:28 — Мо руп палэ ало! — пхэнляс ов пэ пхралэнги. — Аки ов, андэ мэ гонэстэ. Лэнго ило тэрдило; он андэ траш болдинэпэс екхаврэстэ тай пхэнлэ: — Со адава кердяс амэнца о Дэл?
GEN 42:29 Он алэ пумарэ дадэстэ ко Яков ки пху Ханаан, пхукавдэ лэски алаестар, со лэнца уло. Он пхэнлэ:
GEN 42:30 — О мануш, саво си опэр одолэ пхуятэ, зборизэлас амэнца зораса тай галило амэн душманен.
GEN 42:31 Ай амэ пхэнлям лэски: «Амэ чяче мануша, на душманя.
GEN 42:32 Амэ самас дэшудуй пхрала, чявэ екхе дадэски. О екх анкха нанай, ай о тикно анкха э дадэса андэ Ханаан».
GEN 42:33 Дэчи о мануш, кай опэр одоя пху, пхэнляс амэнги: «Аки сар мэ кан галяв, тумэ чяче мануша я на: ачявэн екхе пхралэс атхэ манца, лэн хапэ тумарэ бокхалэ хорандадэнги тай джян тумаро дром.
GEN 42:34 Ай анэн мандэ тумарэ тикнэ пхралэс. Аякха мэ кан галяв, кай тумэ на душманя, ами чяче мануша. Дэчи мэ кан дав тумэн тумарэ пхралэс тай кан мукав тумэн тэ пхерэн андэ адая пху».
GEN 42:35 Кана чючярэнас о гонэ, кажни аракхляс андэ по дорбасоро э рупаса. Кай дикхлэ э руп, ли он, тай ли лэнго дад трашанилэ.
GEN 42:36 О Яков пхэнляс лэнги: — Тумэ ачявдянус ман би пуенго. О Иосиф тай о Симеон амэнца нанай, ай акана тумэ манген тэ лэн э Вениаминес. Алаи болдиндило мамуй мандэ!
GEN 42:37 О Рувим пхэнляс пэ дадэски: — Мудар мэ до чявэн, мэ тэ на анава лэс палэ тутэ. Дэ лэс андэ мэ вастэндэ, тай мэ кан анав лэс палэ.
GEN 42:38 Ай о Яков пхэнляс: — Мо чяво на кан джял отхэ туса. Лэско пхрал муло, ов ачило екх. Опэр дром лэса тэ овэла хурлуки, адалэ касывэтеса тумэ кан тхэн мо сиво шэро андэ дюняс ки мулэнго.
GEN 43:1 Андэ одолэ пхуятэ аякхажэ сас зорали, бари бокх.
GEN 43:2 Кана он халэ алаи о гив, кай андэ андар Египти, о дад пхэнляс лэнги: — Джян палэ тай кинэн генэ набут хапэ.
GEN 43:3 Ай о Иуда пхэнляс лэски: — Одова мануш зораса пхэнляс амэнги: «Ма сикавэн тумэн мэ якхендэ, тумэнца тэ на овэла тумаро пхрал».
GEN 43:4 Ту тэ мукеса амэнца амарэ пхралэс, амэ кан джяс тай кан кинас туки хапэ.
GEN 43:5 Ай тэ на мукеса лэс, амэ на кан джяс, вай одова мануш пхэнляс амэнги: «Ма сикавэн тумэн мэ якхендэ, тумэнца тэ на овэла тумаро пхрал».
GEN 43:6 — Соски тумэ кердянус манги адава касывэти, соски пхэнлянус одолэ манушэски, кай тумэндэ си генэ пхрал? — пхучляс о Израиль.
GEN 43:7 Он пхэнлэ: — Одова мануш алаи пхучелас амэн амэндар тай амарэ хорандастар: «Дживиндо дага тумаро дад? Нанай тумэн генэ пхрал?» Амэ пхэнасас лэски, со пхучелас. Катар амэ джянасас, кай ов кан пхэнэл: «Анэн атхэ тумарэ пхралэс»?
GEN 43:8 О Иуда пхэнляс э Израилески, пэ дадэски: — Мук э чяворэс манца, тай амэ чяльти кан джяс, алаи амэ тэ овас дживиндэ тай тэ на мэрас: ли амэ, ли ту, тай амарэ пуя.
GEN 43:9 Мэ кан дикхав пал лэстэ; мандар ту кан пхучес лэс. Тэ на анава мэ лэс тутэ тай на кан тхав акатэ ангал тутэ, мэ кан овав дошало ангал тутэ, бискай на мэрав.
GEN 43:10 Тэ на овас тэмэля, кан джясас тай кан авасас дувар.
GEN 43:11 Дэчи лэнго дад о Израиль пхэнляс лэнги: — Тэ камэл адава тэ керэн, дэчи керэн аки со: тхэн андэ дорбадэс о лаче имиша адалэ пхуяки та гелэн, башладиен одолэ манушэс: бальзами тай бали, чяря тай мирра, фисташкес тай миндали.
GEN 43:12 Лэн дувар бут руп, тумэ тэ анэн тумэнца ли одова, со сас тхэдо палэ андэ тумарэ гонэ. Файма, он на галилэ.
GEN 43:13 Лэн ли тумарэ пхралэс тай джян генэ одолэ манушэстэ.
GEN 43:14 Мэ дэл о Дэл о Баро-Зорало тумэн мила ангал лэстэ, ов тэ мукел авэрэ тумарэ пхралэс, тай э Вениаминес тэ авэн палэ тумэнца. Ай мэ тэ камэл тэ ачяв би пуенго, мэ овэл аякха.
GEN 43:15 Он лилэ одова, со пхэнляс лэнги о дад, тай дувар бут руп, дэчи лилэ э Вениаминес тай гелэ ко Египти. Он тэрдилэ ангал Иосиф.
GEN 43:16 Кана о Иосиф дикхляс, кай о Вениамин лэнца, ов пхэнляс пэ ярдымарески: — Гел адалэ манушэн мандэ андэ кхер, чинэн савэ-то гайванес тай тавэн хапэ. Десе он кан хан манца.
GEN 43:17 О мануш кердяс, сар сас лэски пхэнло, андяс лэн андэ кхер ко Иосиф.
GEN 43:18 Он трашанилэ, кана лэн андэ лэстэ андэ кхер, вай тюшундылар: «Амэн андэ атхэ андар руп, саво сас андэ амарэ гонэ баштутно рази. Ов мангел тэ пэрэл опэр амэндэ, тай тэ лэл амэн андэ иргатлыки, тай тэ лэл амарэ джёрэн».
GEN 43:19 Он пашылэ ко ярдымари ки Иосифеско тай зборисаилэ лэса паш ко удар, кай дэс андэ кхер:
GEN 43:20 — Шун, сагбуса, — пхэнлэ он, — амэ екхвар алямас атхэ тэ кинас хапэ,
GEN 43:21 ай кана амэ тэрдилям ратяки тай пхутэрдям о гонэ, кажын андар амэндэ аракхляс андэ по руп, сокабор сас. Оничин амэ андям лэс палэ.
GEN 43:22 Амэ андям амэнца генэ руп, тэ кинас хапэ. Амэ на джянас, кон баштутно рази тхэдяс амаро руп амэнги андэ гонэ.
GEN 43:23 Ов пхэнляс: — Алаи лачё, ма трашан. Тумаро Дэл, о Дэл тумарэ дадэско, тхэдяс адава мангин андэ тумарэ гонэ. Ай ман динэ тумаро руп. Дэчи ов андяс лэндэ э Симеонес.
GEN 43:24 О ярдымари андяс э пхралэн андэ кхер ко Иосиф, диняс лэн пани тэ халярэн пумарэ пинрэ тай диняс пхус лэнги джёрэн.
GEN 43:25 Он гортярдэ, со андэ, тэ дэн ко Иосиф, сар авэл десе, вай лэнги пхэнлэ, кай он отхэ кан хан.
GEN 43:26 Кана о Иосиф ало кхерэ, он динэ лэс, со андэ, тай бангилэ ангал лэстэ джи ки пху.
GEN 43:27 Ов пхучляс лэнго такати, дэчи пхэнляс: — Ами сар си тумаро пхуро дад, савэстар тумэ пхэнэнас манги? Дживиндо ов дага?
GEN 43:28 Он пхэнлэ: — То иргати, амаро дад, дага дживиндо тай такатлыс. Тай бангилэ тэлэ, кай гинэн лэс.
GEN 43:29 О Иосиф болдиняспэс тай дикхляс пэ пхралэс э Вениаминес, пэ дэяки чявэс. Ов пхучляс: — Адава — тумаро тикно пхрал? Одова, савэстар тумэ пхэнэнас манги? О Дэл мэ овэл миласа туки, мо чяво!
GEN 43:30 О ило э Иосифеско пхэрдило дэхымаса тай ов кан ровэлас; Иосиф чяльти гело тай родэлас пханло тхан. Ов ало пэстэ тай отхэ лачес руно.
GEN 43:31 Дэчи ов халярдяс по муй, генэ никлисто тай астарэласпэс тэ на ровэл. Ов пхэнляс: — Анэн хапэ.
GEN 43:32 Лэски тхэдэ авэртэ тханэстэ, э пхралэнги тхэдэ авэртэ, тай э египтяненги, савэ ханас лэса, авэртэ, вай о египтяня нащи ханас э евреенца, адава сас гарами э египтяненги.
GEN 43:33 Э пхралэн бэшавдэ ангал лэстэ пал екхаврэстэ, катар баштутно джи ко тикно, тай он дикхенас карин екхаврэстэ шаштимэна.
GEN 43:34 Лэнги тхэнас хапэ опрал конас ки Иосифеско, ай э Вениаминески тхэнас панджвар бут, ниш аврэнги. Он ханас тай пиенас лэса.
GEN 44:1 О Иосиф пхэнляс пэ ярдымарески: — Пхэр о гонэ адалэ манушэнги хапэ, сокабор кан гелэн, тай тхэ кажнески э руп палэ андэ гоно.
GEN 44:2 Ай андэ гоно ко тикно э рупаса андар гив тхэ мо кадеи, мо рупуно кадеи. Одова кердяс, сар пхэнляс о Иосиф.
GEN 44:3 Сар дисило, э пхралэн бичялдэ ко дром лэнги джёрэнца.
GEN 44:4 Он сас дага надур катар диз, кана о Иосиф пхэнляс э ярдымарески: — Чяльти рэс адалэ манушэн тай, кана кан рэсэс, пхэн лэнги: «Соски тумэ покиндянус джюнгалипэ э лачимаски?
GEN 44:5 Вай адава кадеи мэ сагбуско, андар савэстэ ов пиел тай опэр савэстэ ов дорикерэл! Тумэ кердянус налачи дила!»
GEN 44:6 Ов рэсло лэн тай пхэнляс лэнги адала зборэс.
GEN 44:7 Он пхэнлэ: — Соски о сагбус пхэнэл асавке зборэс? Та со, тэ иргатя кан керэн асавко?
GEN 44:8 Вай амэ андям туки палэ катар пху Ханаан одова руп, саво аракхлям амэндэ андэ гонэ. Соски амэнги тэ чёрас руп я пхол андар кхер тэ сагбуско?
GEN 44:9 О шэи тэ аракхлёла екхестэ андар тэ иргатендэ, мэ мэрэл ов, ай авэра мэ овэн иргатя амарэ сагбуски.
GEN 44:10 Ов пхэнляс: — Лачё, мэ овэл аякха, сар тумэ пхэнэн: кастэ кан аракхлёл о кадеи, одова кан овэл мо иргати, ай авэра на кан овэн дошалэ.
GEN 44:11 О пхрала чяльти муклэ кажни по гоно ки пху тай пхутэрдэ лэн.
GEN 44:12 О ярдымари лиляс тэ родэл, катар баро джи ко тикно, тай о кадеи аракхлило андэ гоно ко Вениамин.
GEN 44:13 О пхрала пхаравдэ опэр пэстэ о савутя, тхэдэ о гонэ, алаи кажни опэр пэ джёрэстэ, тай гелэ андэ диз.
GEN 44:14 О Иуда тай лэски пхрала алэ андэ кхер ко Иосиф, саво дага сас отхэ. Он читэпэс ангал лэстэ ки пху.
GEN 44:15 О Иосиф пхэнляс лэнги: — Со тумэ кердянус? Та со, тумэ на джянэнас, кай асавко мануш, сар мэ, кан галёл алаи андар дорикерипэ?
GEN 44:16 — Со амэ тэ пхэнас мэ сагбуски? — пхэнляс о Иуда. — Сар амэнги тэ зборизас? Сар тэ галярас амаро чячипэ? О Дэл пхутэрдяс э дош тэ иргатенги. Акана амэ иргатя мэ сагбуски — ли амэ, ли одова, кастэ аракхлэ о кадеи.
GEN 44:17 О Иосиф пхэнляс: — Та со, мэ кан керав асавко? Екх одова, кастэ аракхлило о кадеи, кан овэл мо иргати, ай тумэ джян тумарэ дадэстэ лачимаса.
GEN 44:18 Дэчи о Иуда пашыло лэстэ тай пхэнляс: — Мангав тут, мо сагбус, мук тэ иргатес тэ пхэнэл збора. Ма холязэ тэ иргатески, хоч ту — сар о фараони.
GEN 44:19 Мо сагбус пхучляс пэ иргатен: «Си тумэндэ дад я пхрал?»
GEN 44:20 Тай амэ пхэнлям: «Амэндэ си пхуро дад тай си лэско тэрно чяво, саво аракхлило лэски опэр пхуримастэ. Лэско пхрал муло, тай ов ачило екх андар чявэ пэ дэякерэндар, тай о дад дэхэл лэс».
GEN 44:21 Озаман ту пхэнлян тэ иргатенги: «Анэн лэс мандэ, мэ тэ дикхав карин лэстэ».
GEN 44:22 Ай амэ пхэнлям мэ сагбуски: «О чяворо нащи кан ачявэл пэ дадэс. Ай тэ ачявэла, о дад кан мэрэл».
GEN 44:23 Ай ту пхэнлян тэ иргатенги: «Бискай тумаро пхрал на кан авэл атхэ тумэнца, ма сикавэн тумэн мэ якхендэ».
GEN 44:24 Амэ алям тэ иргатестэ, амарэ дадэстэ, пхукавдям лэски, со пхэнляс мо сагбус.
GEN 44:25 Амаро дад пхэнляс: «Джян генэ тай кинэн генэ набут хапэ».
GEN 44:26 Ай амэ пхэнлям: «Амэ нащи джяс. Екх тэ джяла о тикно пхрал амэнца, дэчи амэ кан джяс. Амэ нащи джи ангал якха тэ сикавас амэн одолэ манушэски, тэ на овэла амэнца о тикно пхрал».
GEN 44:27 То иргати, мо дад, пхэнляс амэнги: «Тумэ джянэн, кай мэ ромнятэ аракхлилэ дуй чявэ.
GEN 44:28 О екх андар лэндэ на уло. Мэ пхэнлём: "Гэлбэтэм, ов эсас джирдимэ котора", — тай одолэ вахытестар мэ лэс на дикхлём.
GEN 44:29 Тумэ тэ лэна мандар ли аврэс, тай лэса кан овэл джюнгалипэ. Тумэ кан бичялэн мо сиво шэро катар касывэти андэ дюняс ки мулэнго».
GEN 44:30 Оничин, о чяворо тэ на овэла амэнца, кана мэ кан авав тэ иргатестэ, мэ дадэстэ, тай мо дад, саво аякха пханло адалэ чяворэстэ,
GEN 44:31 кан дикхел, кай ов нанай амэнца, ов кан мэрэл. Тэ иргатя кан бичялэн о сиво шэро амарэ дадэско катар касывэти андэ дюняс ки мулэнго.
GEN 44:32 То иргати пхэнляс ангал пэ дадэстэ, кай кан кутардиел э чяворэс. Мэ пхэнлём: «Дадэ, мэ тэ на анава лэс ангал тутэ, э дош ангал тутэ кан овэл опэр мандэ алаи мо бэшыпэ».
GEN 44:33 Акана, мангав тут, мук то иргати тэ ачёл атхэ иргати мэ сагбуско ко тхан ки чяворэско, тай мук э чяворэс тэ джял пэ пхралэнца.
GEN 44:34 Сар мэ тэ джяв мэ дадэстэ, о чяворо тэ на овэла манца? Тэ на дикхав мэ о касывэти мэ дадэско.
GEN 45:1 Озаман о Иосиф нащи астардяс пэс ангал иргатя тай пхэнляс: — Джян алаи мандар! Тай никхон на сас э Иосифеса, кана ов пхутэрдяспэс пэ пхралэнги.
GEN 45:2 Ов аякха лачес руно, кай шунлэ о египтяня, тай шунлэ адалэстар джи ки бар ки фараонески.
GEN 45:3 О Иосиф пхэнляс пэ пхралэнги: — Мэ — о Иосиф! Дживиндо дага мо дад? Ай о пхрала нащи пхэнлэ ништо — аякха он сас шаштимэна.
GEN 45:4 Дэчи о Иосиф пхэнляс пэ пхралэнги: — Пашон мандэ. Тай кана он пашылэ, ов пхэнляс: — Мэ — тумаро пхрал о Иосиф, савэс тумэ бикиндянус ко Египти!
GEN 45:5 Ма керэн касывэти тай ма керэн генэ тумэн дошалэн андар одолэстэ, кай бикиндянус ман атхэ. Адава о Дэл бичялдяс ман ангал тумэндэ тэ кутардиндёл тумаро бэшыпэ.
GEN 45:6 Ужэ дуй брэш, сар опэр пху бокх, тай генэ пандж брэш нэ на кан барярэн, нэ на кан кидэн.
GEN 45:7 Ай о Дэл бичялдяс ман ангал тумэндэ, тэ кутардиел тумарэ бэшыматэс тай тумари порода тэ ачёл опэр пху.
GEN 45:8 На тумэ бичялдянус ман атхэ, ами о Дэл. Ов кердяс ман дад э фараонески, сагбус опэр алаи лэски кхерэстэ тай сагбус алаи э Египтеско.
GEN 45:9 Сигярэн тэ джян мэ дадэстэ тай пхэнэн лэски: «Аки со пхэнэл то чяво о Иосиф: "О Дэл кердяс ман сагбус алаи э Египтеско. Чяльти элан мандэ.
GEN 45:10 Ту кан бэшэс андэ область Гошэн тай кан овэс пашэ мандэ: ли ту, ли тэ пуя, ли тэ туруня, тэ барэ тай тикнэ гайваня, тай алаи, со тутэ си.
GEN 45:11 Отхэ мэ кан дикхав пал тутэ, вай кан овэн генэ пандж брэш бокх — я ли ту, ли то кхер, тай алаи, со си тинро, кан овэл андэ бокх"».
GEN 45:12 Тумэ дикхен тумарэ якхенца, ли тумэ, ли мо пхрал о Вениамин, кай адава чячес мэ зборизав тумэнца.
GEN 45:13 Пхукавэн мэ дадэски одолэстар, сар мэ намлыс андэ Египти, тай алаестар, со тумэ дикхлянус. Тай чяльти анэн атхэ мэ дадэс.
GEN 45:14 Ов диняс ангали пэ пхралэс э Вениаминес тай руно. Ли о Вениамин ровэлас, кана дэлас ангали лэс.
GEN 45:15 Ов чюмидиняс алаи пэ пхралэн тай роимаса дэлас ангали лэн. Дэчи о пхрала зборизэнас лэса.
GEN 45:16 О нами одолэстар, кай алэ о пхрала э Иосифески, гело джи ки бар ки фараонески. О фараони тай лэски мануша лошасаилэ,
GEN 45:17 тай о фараони пхэнляс э Иосифески: — Пхэн тэ пхралэнги: «Керэн аки со: тхэн опэр тумарэ гайванендэ хапэ тай джян палэ андэ пху Ханаан.
GEN 45:18 Анэн мандэ тумарэ дадэс тай хорандадэн. Мэ кан дав тумэн э зиядэ пху андэ Египти, тай тумэ кан бэшэн лаки лаче имишэнца».
GEN 45:19 Генэ пхэнав тэ пхэнэс лэнги: «Лэн андар Египти бричкес тумарэ пуенги тай ромненги, анэн тумарэ дадэс тай элан ли тумэ.
GEN 45:20 Ма аядиен тумаро мангин, вай алаи о зиядэ андэ Египти кан овэл тумаро».
GEN 45:21 О чявэ э Израилески аякха да кердэ. О Иосиф диняс лэн бричкес, сар пхэнляс о фараони, тай хапэ дромэски.
GEN 45:22 Кажнески ов башлады нэвэ савутя, ай э Вениаминес диняс тришэл котора руп тай пандж парэс савутя.
GEN 45:23 Пэ дадэски ов бичялдяс дэшэ джёрэн, опрал пхэрдэ о зиядэ мангин э Египтеско тай дэшэ джёрян, опрал пхэрдэ гив, манро тай авэр хапэ дромэски.
GEN 45:24 Пал адалэстэ ов мукляс пэ пхралэн, тай кана он джянас, пхэнляс лэнги: — Ма ирищиен тумэ екхаврэса опэр дром!
GEN 45:25 Он гелэ ко дром андар Египти, алэ пумарэ дадэстэ ко Яков ки пху Ханаан
GEN 45:26 тай пхэнлэ лэски: — О Иосиф дживиндо! Ов — о сагбус алаи э Египтеско! Ко Яков тэрдило о ило, тай ов на пакянило лэнги.
GEN 45:27 Ай кана он пхукавдэ лэски алаи, со пхэнляс о Иосиф, тай кана ов дикхляс о бричкес, савэ о Иосиф бичялдяс, тэ анэн лэс, э духос э Яковески дживиндило.
GEN 45:28 Тай о Израиль пхэнляс: — Овэл! Мо чяво о Иосиф дживиндо! Кан джяв тай кан дикхав лэс, бискай на мулём!
GEN 46:1 О Израиль гело ко дром алаеса, со сас лэстэ, ало андэ Бээр-Шэва тай андяс отхэ курбанен э Дэвлэски пэ дадэскерэски э Исаакески.
GEN 46:2 О Дэл зборизэлас э Израилеса андэ ратяко дикхипэ тай пхэнляс: — Яков! Яков! — Аки мэ, — пхэнляс о Яков.
GEN 46:3 Ов пхэнляс: — Мэ — о Дэл, о Дэл тэ дадэско. Ма траша тэ джяс андэ Египти. Мэ кан керав тутар отхэ баро дюняс.
GEN 46:4 Мэ кан джяв андэ Египти екхетханэ туса, тай Мэ жэ кан анав тут палэ. Тай о якха туки кан пхандэл о васт э Иосифеско.
GEN 46:5 О Яков гело ко дром андар Бээр-Шэва. О чявэ э Израилески бэшавдэ пумарэ дадэс, э пуен тай э ромнен андэ бричкес, савэ о фараони бичялдяс, тэ анэн лэс.
GEN 46:6 Он лилэ пэса э гайванен тай о мангин, саво кидинэ андэ Ханаан, тай о Яков алаи пэ пуенца ало андэ Египти.
GEN 46:7 Ов лиляс пэса андэ Египти пэ чявэн тай э турунен, пэ чяен тай турунисэн — алаи пи порода.
GEN 46:8 Аки о нава э Израилески чявэнго, савэ алэ андэ Египти: О Яков тай лэски пуя: о Рувим, о баштутно э Яковеско.
GEN 46:9 О чявэ э Рувимески: о Ханох, о Фаллу, о Хецрон тай о Кармий.
GEN 46:10 О чявэ э Симеонески: о Емуэл, о Ямин, о Охад, о Яхин, о Цохар тай о Шаул, о чяво э ханаанеянкако.
GEN 46:11 О чявэ э Левиески: о Гершон, о Кехат тай о Мерарий.
GEN 46:12 О чявэ э Иудаски: о Эр, о Онан, о Шэла, о Парец тай о Зерах (ай о Эр тай о Онан мулэ андэ Ханаан). О чявэ э Парецэски сас о Хецрон тай Хамул.
GEN 46:13 О чявэ э Иссахарески: о Тола, о Пувва, о Иов, тай о Шымрон.
GEN 46:14 О чявэ э Завулонески: о Серед, о Элон тай о Яхлэл.
GEN 46:15 Адава о чявэ э Лияки, савэ латэ аракхлилэ э Яковески андэ Паддан-Арам. Латэ аракхлили ли чяй э Дина. Алаи лэн эсас триянду трин мануша.
GEN 46:16 О чявэ э Гадески: о Цыфион, о Хаггий, о Шуний, о Эцбон, о Эрий, о Ародий тай о Арелий.
GEN 46:17 О чявэ э Асирески: о Имна, о Ишва, о Ишвий тай о Бриа. Лэнги пхэн э Серах. О чявэ э Бриаски: о Хевер тай о Малкиэл.
GEN 46:18 Адава о пуя, савэ аракхлилэ ки Зилпа э Яковески, савя о Лаван диняс пэ чяятэ ки Лия. Алаи дэшушов мануша.
GEN 46:19 О чявэ э Яковески ромняки э Рахиляки: о Иосиф тай о Вениамин.
GEN 46:20 Андэ Египти э Аснат, э чяй э Поти-Пераски, саво сас о попази э дизако э Он, латэ аракхлило э Иосифески о Манассия тай о Ефрем.
GEN 46:21 О чявэ э Вениаминески: о Бэла, о Бэхер, о Ашбэл, о Гера, о Нааман, о Эхий, о Рош, о Муппим, о Хуппим тай о Ард.
GEN 46:22 Адава о чявэ э Рахиляки, савэ латэ аракхлилэ э Яковески. Алаи дэшуштар мануша.
GEN 46:23 О чяво э Данеско: о Хушым.
GEN 46:24 О чявэ э Неффалимески: о Яхцэл, о Гуний, о Ецэр тай о Шыллем.
GEN 46:25 Адава о чявэ, савэ аракхлилэ ки Билха э Яковески, савя о Лаван диняс пэ чяятэ ки Рахиль. Алаи эфта мануша.
GEN 46:26 Алаен, кон ало андэ Египти э Яковеса, — лэски пуя, тэ на гинэс лэски чявэнги ромнян, — сас эксинда шов мануша.
GEN 46:27 О чявэ э Иосифески, савэ аракхлилэ лэски андэ Египти, сас дуй. Алаи о мануша э Яковески хорандаски, кай алэ андэ Египти, сас эфтадэша мануша.
GEN 46:28 О Яков бичялдяс ангал пэстэ ко Иосиф э Иудас, тэ галёл о дром андэ Гошэн. Кана он алэ отхэ,
GEN 46:29 о Иосиф гортярдяс э бричка тай гело андэ Гошэн, тэ дикхел пэ дадэс э Израилес. Ов тэрдило ангал лэстэ, диняс ангали лэс тай бут вахыти ровэлас.
GEN 46:30 О Израиль пхэнляс э Иосифески: — Акана мэ рагати кан мэрав, вай дикхлем мэ якхенца, кай ту дживиндо.
GEN 46:31 О Иосиф пхэнляс пэ пхралэнги тай пэ дадэски кхерутнэнги: — Мэ кан джяв ко фараони тай кан пхэнав лэски: «Мэ пхрала тай о кхер мэ дадэско, савэ бэшэнас ки пху Ханаан, алэ мандэ.
GEN 46:32 Адала мануша — чёбаня. Он барярэн гайванен тай андэ пумэнца пумарэ атарэс, тай андэ алаи пумаро мангин».
GEN 46:33 Кана о фараони кан дэл икос тумэн тай кан пхучел: «Со тумэ керэн?» —
GEN 46:34 тумэ камэл тэ пхэнэн: «Тэ иргатя тэрнярила тай джи анкха барярэн гайванен, сар керэнас ли амарэ дада». Дэчи тумэн кан мукен тэ бэшэн ки пху Гошэн, вай о египтяня джириндиен катар чёбаня.
GEN 47:1 О Иосиф гело ко фараони тай пхэнляс лэски: — Мо дад тай мэ пхрала пумарэ атарэнца, э барэ тай э тикнэ гайваненца тай алаи пумарэ мангинэса алэ катар пху Ханаан тай анкха си андэ Гошэн.
GEN 47:2 Ов лиляс панджен андар пхрала тай тхэдяс лэн ангал фараони.
GEN 47:3 О фараони пхучляс э пхралэн: — Со тумэ галён тэ керэн? Он пхэнлэ э фараонески: — Тэ иргатя — чёбаня, сар амарэ дада. —
GEN 47:4 Генэ он пхэнлэ: — Амэ алям атхэ тэ бэшас, вай ки пху Ханаан бари бокх тай тэ иргатенги нанай катэ чярярэн о атарэс. Оничин мук тэ иргатен тэ бэшэн андэ Гошэн.
GEN 47:5 О фараони пхэнляс э Иосифески: — То дад тай тэ пхрала алэ тутэ.
GEN 47:6 Э пху Египти — ангал тутэ; дэ тэ дадэс тай тэ пхралэн о зиядэ котор адалэ пхуяко. Мэ бэшэн андэ Гошэн. Ай ту тэ джянэс, кон андар лэндэ лачес керэс бути, тхэ лэн тэ дикхен пал мэ гайванендэ.
GEN 47:7 О Иосиф андяс пэ дадэс э Яковес тай сикавдяс лэс э фараонески, тай о Яков алгышты э фараонес.
GEN 47:8 О фараони пхучляс лэс: — Сокабор брэш туки?
GEN 47:9 О Яков пхэнляс э фараонески: — О деса мэ пхуримаски — шэлу триянда брэш. Мэ бэшлём на бут, тай алаи о брэша мэ пхеравас опэр пху тай дикхавас бут хурлуки. Мэ дада бэшлэ мандар бут тай зиядэ.
GEN 47:10 О Яков алгышты э фараонес тай гело.
GEN 47:11 Сар пхэнляс о фараони, о Иосиф андяс пэ дадэс тай пэ пхралэн андэ Египти тай диняс лэн зиядэ котор пху андэ пху Раамсес.
GEN 47:12 О Иосиф диняс хапэ пэ дадэс, пэ пхралэн тай алаи пи порода, диняс кажне манушэс андэ хорандас.
GEN 47:13 Дэчи никатэ на сас хапэ, вай сас бари бокх; о Египти тай о Ханаан сас кхино катар бокх.
GEN 47:14 О Иосиф кидиняс алаи э руп, савэ сас андэ Египти тай Ханаан, андар гив, саво лэстэ кинэнас. Ов гаравэлас ла андэ кхер ко фараони.
GEN 47:15 Кана быты э руп андэ Египти ли андэ Ханаан, алаи о египтяня алэ ко Иосиф тай пхэнлэ: — Дэ амэн манро. Соски амэнги тэ мэрас ангал тэ якхендэ? Амари руп быты.
GEN 47:16 О Иосиф пхэнляс: — Тэ быты тумари руп, анэн тумарэ гайванен, мэ кан паровав манрэски.
GEN 47:17 Он андэ ко Иосиф э гайванен, тай ов диняс лэн манро паровдяс опэр грастэнги, бакрэнги тай бузнэнги, гурувэнги, гурувненги тай джёрэнги. Ов хавдярэлас лэн манрэса одова брэш, пароимаски алаи лэнги гайваненги.
GEN 47:18 Кана о брэш накхло, он алэ лэстэ тай пхэнлэ: — Амэ на кан гаравас амарэ сагбустар, кай амари руп быты, тай амарэ гайваня си тинрэ, тай амэндэ ништо на ачило тэ дас амарэ сагбус, булуб амарэ тэнендар тай амарэ пхуятар.
GEN 47:19 Соски амэнги тэ мэрас ангал тэ якхендэ, ли амэнги, ли амарэ пхуяки? Кин амэн тай амари пху манрэски, тай амэ амарэ пхуяса кан овас иргатя ко фараони. Дэ амэн гугуся, амэ тэ бэшас тай тэ на мэрас, тай адая пху тэ на чючёл.
GEN 47:20 Аякха о Иосиф киндяс алаи э пху андэ Египти э фараонески. О египтяня бикиндэ кажни пи ливади, вай э бокх тасавдяс лэн. Аякха э пху ули э фараонески,
GEN 47:21 ай о дюняс э Иосиф кердяс иргатен, катар екх чети ки Египтеско джи аврэстэ.
GEN 47:22 Ов на киндяс екх э пху э попазенги, вай он сальтя диндёнас паи катар фараони, тай адава паи, саво диняс лэн о фараони, лэнги рэсэлас хамаски. Аки соски он на бикиндэ пумари пху.
GEN 47:23 О Иосиф пхэнляс э дюняски: — Акана, кана мэ киндём тумэн тай тумари пху э фараонески, аки тумэнги гугуся, тэ чен андэ пху.
GEN 47:24 Кана кан барел о гив, дэн о панджто паи лэстар э фараонес, ай окола штар пая кан овэн тумэнги гугуся э ливадянги тай хамаски тумэнги, э кхерутнэнги тай э пуенги.
GEN 47:25 Он пхэнлэ: — Ту кутардын амэнги о бэшыпэ. Тэ аракхас мила андэ якха амарэ сагбускерэ. Амэ кан овас о иргатя э фараонески.
GEN 47:26 Аякха о Иосиф тхэдяс андэ Египти тхэдипэ катар пху, саво ли авдес зорало: панджто паи о гив си э фараонеско, булуб о гив катар пху ки попазенги, сави на ули э фараонески.
GEN 47:27 О израильтяня бэшэнас андэ Египти андэ область Гошэн. Лэндэ уло отхэ мангин тай сас лэндэ пуя, тай он бутилэ.
GEN 47:28 О Яков бэшло андэ Египти дэшуэфта брэш, самким алаи ов бэшло шэлу саранда эфта брэш.
GEN 47:29 Кана ало вахыти ов тэ мэрэл, ов диняс икос пэ чявэс э Иосифес тай пхэнляс лэски: — Тэ аракхлём мэ мила андэ тэ якхендэ, тхэ то васт тал мэ шалостэ тай дэ збора, кай кан керэс манги мила тай чячипэ. Ма пароскер ман андэ Египти.
GEN 47:30 Ай кана мэ кан мэрав, никал ман андар Египти тай пароскер отхэ, катэ пароскердэ мэ папудэс. О Иосиф пхэнляс: — Мэ кан керав аякха, сар ту пхэнлян.
GEN 47:31 — Ха совля, — пхэнляс ов. О Иосиф халяс совля лэски, тай о Израиль мангляс э Дэвлэс, астарэласпэс опэр пэ ровлятэ.
GEN 48:1 Вахытестар э Иосифески пхэнлэ: — То дад насвало. О Иосиф лиляс пэса до чявэн, э Манассияс тай э Ефремес.
GEN 48:2 Э Яковески пхэнлэ: — Тутэ ало то чяво о Иосиф. О Израиль кидиняспэс зораса, ваздиняспэс тай бэшло опэр тхан.
GEN 48:3 О Яков пхэнляс э Иосифески: — Андэ Луз, ки пху Ханаан, манги сикавдяспэс о Дэл о Баро-Зорало тай алгышты ман.
GEN 48:4 Ов пхэнляс манги: «Мэ кан дав тут бутэ пуен, кан бутярав тут, кан керав тутар бут дюнядэс тай кан дав адая пху тэ овэл екхараи тэ пуенги».
GEN 48:5 Акана тэ чявэ о дуй, кай аракхлилэ туки андэ Египти бискай мэ алём атхэ, кан овэн минрэ. Сар о Рувим тай о Симеон, о Ефрем тай о Манассия кан овэн минрэ.
GEN 48:6 О пуя, савэ кан аракхлён туки пал лэндэ, кан овэн тинрэ, тай лэндэ кан овэл котор пху андар паи лэнги пхралэнго.
GEN 48:7 Кана мэ ававас андар Паддан, ми Рахиль мули ки пху Ханаан, кана амэ самас дага опэр дром, надур катар Эфрата. Оничин мэ пароскердём ла отхэ, опэр дром ко Эфрата (самким Вифлееми).
GEN 48:8 О Израиль дикхляс э Иосифески чявэн тай пхучляс: — Кон адала?
GEN 48:9 О Иосиф пхэнляс пэ дадэски : — Адава о чявэ, савэн о Дэл диняс ман атхэ. О Израиль пхэнляс: — Ан лэн мандэ, тэ алгыштияв лэн.
GEN 48:10 О Израиль катар пхурипэ на лачес дикхелас. О Иосиф андяс пэ чявэн пашэ пэ дадэстэ, тай одова чюмидиняс тай диняс ангали лэн.
GEN 48:11 О Израиль пхэнляс э Иосифески: — Мэ джи на тюшундым генэ тэ дикхав тут, ай о Дэл диняс ман тэ дикхав джи тэ пуен.
GEN 48:12 О Иосиф гелдяс лэн катар кочя ки Израилески тай бангело лэски джи ки пху.
GEN 48:13 Дэчи о Иосиф тхэдяс э Ефремес катар прави рик пэстар, катар леви васт катар Израиль, ай э Манассияс катар леви риг пэстар, катар прави катар Израиль, тай андяс лэн паш пэ дадэстэ.
GEN 48:14 Ай о Израиль сидиняс о прави васт тай тхэдяс опэр шэро ки Ефремеско, хоч ов эсас о тикно, кердяс хачи пэ васта, тай о леви ов тхэдяс опэр шэро ки Манассияско, хоч о Манассия сас о баштутно.
GEN 48:15 Дэчи ов алгышты э Иосифес тай пхэнляс: — О Дэл, ангал Савэстэ пхерэнас о дада минрэ о Авраам тай о Исаак, о Дэл, Саво сас мо чёбани алаи мо бэшыпэ джи адалэ десески,
GEN 48:16 о Миляики, саво кутардиелас ман вэрсавэ джюнгалимастар, мэ алгыштиел адалэ пуен. Мэ овэл андэ лэндэ мо нав тай о нав мэ дадэнго э Авраамеско тай э Исаакеско, тай мэ овэн бут лэнги пуя опэр пху.
GEN 48:17 Кана о Иосиф дикхляс, кай о дад тхэдяс о прави васт опэр шэро ки Ефремеско, ов уло касывэтлыс тай лиляс пэ дадэс вастэстар, тэ тхэл катар шэро ки Ефремеско опэр шэро ки Манассияско.
GEN 48:18 О Иосиф пхэнляс: — На, дадэ, аки акава — о баштутно. Тхэ о прави васт опэр лэски шэрэстэ.
GEN 48:19 Ай о дад на мангляс тай пхэнляс: — Мэ джянав, мо чяво, мэ джянав. Ли лэстар кан овэл дюняс, ли ов кан овэл баро. Ай лэско тикно пхрал кан овэл баро лэстар, тай лэски пуя кан овэн бут дюнядэс.
GEN 48:20 Тай ов алгышты лэн одова дес тай пхэнляс: — О израильтяня кан пхэнэл тумарэ нава, сар алгыштима: «Мэ керэл тут о Дэл, сар э Ефремес тай э Манассияс». Аякха о Израиль тхэдяс э Ефремес ангал Манассия.
GEN 48:21 О Израиль пхэнляс э Иосифески: — Мэ мэрав, ай о Дэл кан овэл тумэнца тай кан анэл тумэн ки пху тумарэ дадэнги.
GEN 48:22 Мэ дав тут бут пху, ниш тэ пхралэн, дав тут генэ котор пху горадэнца, саво мэ лилём ко аморея камаса тай лукеса.
GEN 49:1 О Яков диняс икос пэ чявэн тай пхэнляс: — Кидэнтумэн агорял, тай мэ кан пхэнав, со кан овэл тумэнца андэ деса, кай авэн.
GEN 49:2 Кидэнтумэн тай шунэн, о чявэ э Яковески, шунэн тумарэ дадэс э Израилес!
GEN 49:3 Рувим, ту — мо баштутно, ми зор, о баштутно имишы мэ муршыканэ зорако; ов алаендар зорало тай лэс алаи гинэн.
GEN 49:4 Ай, сар пани, тут нащи тэрдярэс. Акана ту на кан овэс баштутно, вай ту пашлилян опэр тхан тэ дадэско тай гарамладын мо тхан.
GEN 49:5 О Симеон тай о Левий — пхрала, лэнги камадэс керэн хурлуки.
GEN 49:6 Мэ на кан овав андэ лэнги дилэндэ, мэ на кан овав лэнца екх, вай он холясаилэ тай мударэнас э муршэн, манглэ тай чиндэ э гурувэн.
GEN 49:7 Дини арман лэнги холи, вай джюнгали, тай о канлылыки, вай бут баро! Мэ кан чяв лэн машкарэ ко пуя ки Яковески тай кан дурярав лэн андэ Израиль.
GEN 49:8 Иуда, тэ пхрала кан махтадиен тут, то васт кан овэл опэр мэн тэ душманенги, о чявэ тэ дадэски кан бангён туки.
GEN 49:9 Ту — тэрно леви, Иуда; ту авэс хамаса, мо чяво. Сар леви, ов пэрэл ки пху тай пашлёл, сар львица — кон кан мангел лэс тэ астарэл?
GEN 49:10 О скипетр на кан ачявэл э Иудас, тай о пуя лэски екхараи кан астарэн э ровли э патишаенги, бискай на кан авэл о Шыло, Кас кан тхэн кан о дюнядэс.
GEN 49:11 Ов кан пхандэл пэ джёрэс ки дракхаки лазас, пэ джёрорэс — ки зиядэ ветка. Ов кан халярэл пэ савутя андэ винастэ, о уряипэ пинро — андэ рат ки дракхако.
GEN 49:12 О якха лэски — калэ катар винас, о данда лэски — катар сути парнэ.
GEN 49:13 О Завулон кан бэшэл паш ки моря тай лэстэ кан авэн караблядэс; лэски четя кан сидэнпэс джи ко Сидон.
GEN 49:14 О Иссахар — зорало джёро, пашло машкарэ ко пхарэ гонэ.
GEN 49:15 Ов дикхляс, со лачё лэско тхан э рагатеско тай со лачи лэски пху; ов кан бангярэл пэ пхике тал пхарипэ тай кан керэл бути сар иргати.
GEN 49:16 О Дан диндёл тэ керэл цындос пэ дюняски сар екх андар порода ки Израилески.
GEN 49:17 О Дан кан овэл э сапэнги паш ко дром, гадюка ки ливади, сави дандэлэл э грастэс чянгатар, тай о атлыс пэрэл тэлэ.
GEN 49:18 О Сагбус о Яхвэ, Тутэ родав мэ кутардипэ!
GEN 49:19 Опэр Гад кан пэрэн чёра, ай ов кан пэрэл опэр лэндэ палэ тай кан кувдиел.
GEN 49:20 О хапэ э Асиреско кан овэл бут; ов кан анэл патишайлытико хапэ.
GEN 49:21 О Неффалим — мукли лани, сави анэл шукарэ пуен.
GEN 49:22 О Иосиф — имишэнго дракхако кущёки, имишэнго кущёки паш ко пани, савэски веткес ваздэнпэс опэр стинас.
GEN 49:23 Холинаса пэрэнас опэр лэстэ тай мукенас андэ лэстэ стриладэс.
GEN 49:24 Ай о луки лэско ачило зорало, э зор лэски вастэнги — о зорало Дэл э Яковеско, о нав э Чёбанеско тай о Бар э Израилеско.
GEN 49:25 Ов — о Дэл тэ дадэско, Саво кан керэл туки ярдыми. Ов — о Дэл Баро-Зорало, Саво кан алгыштиел тут. Ов кан дэл тут алгыштима э булутенго опрал, тай безднако тэлал, тай алгыштима э дэенго, савэ хавдярэн э пуен.
GEN 49:26 О алгыштима тэ дадэско зиядэ, ниш алгыштима э пуранэ горадэнго, ниш алгыштима э пуранэ ливаденго. Мэ овэн он алаи опэр шэро ки Иосифеско, опэр чикат ки тхэдэ князеско машкарэ пэ пхралэндэ.
GEN 49:27 О Вениамин — джюнгало рув; сабахтан ов хал со астардяс, бэлвэле палящиел, со чёрдэ.
GEN 49:28 Аки касавке си дэшудуй породэс э Израилески. Аки со пхэнляс лэнги о дад, кана алгыштиелас лэн; кажнес ов диняс лэнго алгыштима.
GEN 49:29 О Яков пхэнляс лэнги: — Мэ джяв мэ дадэндэ. Пароскерэн ман мэ дадэнца андэ пищера ки ливади ки хетеески ки Эфронески,
GEN 49:30 андэ пищера ки ливади Махпела паш ко Мамрэ андэ Ханаан, сави о Авраам киндяс ко хетеи ко Эфрон сар паромаско тхан.
GEN 49:31 Отхэ сас пароскердэ о Авраам тай лэски ромни э Сарра, отхэ сас пароскердэ о Исаак тай лэски ромни э Рэвэка, тай отхэ мэ пароскердём э Лия.
GEN 49:32 Э ливади тай э пищера сас киндэ ко хетея.
GEN 49:33 О Яков бытэрды тэ пхэнэл пэ чявэнги, ваздиняс пэ пинрэ опэр тхан, мукляс по тынышы тай гело пэ дадэндэ.
GEN 50:1 О Иосиф пэло опэр пэ дадэстэ, руно опэр лэстэ тай чюмидиняс лэс.
GEN 50:2 Ов пхэнляс пэ иргатенги э враченги тэ керэн бальзамирования лэски дадэски, тай о врачя кердэ бальзамирования э Израилески.
GEN 50:3 О врачя керэнас адава саранда дес. Дэчи эфтадэша дес о египтяня ровэнас пал муло.
GEN 50:4 Кана накхлэ о деса э роимаски, о Иосиф пхэнляс э фараонески иргатенги: — Тэ аракхлём мэ мила андэ тумарэ якхендэ, манген андар мандэ э фараонес тай пхэнэн лэски:
GEN 50:5 «Мо дад пхэнляс манги тэ хав совля тай пхэнляс: "Мэ мэрав; тхэ ман андэ склепи, саво мэ гортярдём манги ки пху Ханаан". Мук ман тэ джяв тэ пароскерав мэ дадэс. Пал отхэ мэ кан авав».
GEN 50:6 О фараони пхэнляс: — Джя, пароскер тэ дадэс аякха, сар ту халян совля.
GEN 50:7 О Иосиф гело тэ пароскерэл пэ дадэс, тай лэса гелэ алаи о иргатя тай о барэ мануша э фараонески, тай алаи о барэ мануша э Египтески,
GEN 50:8 тай алаи о кхер э Иосифеско, тай лэски пхрала, тай алаи о кхер лэски дадэско. Андэ Гошэн ачилэ екх лэнги пуя тай о атарэс о барэ тай э тикнэ гайваня.
GEN 50:9 Лэнца сас бричкес тай атлыдэс; адава сас баро табури.
GEN 50:10 Он алэ ко тхан Горен-Атад, кай сас пал Иордани, тай отхэ лилэ лачес тэ ровэн. Отхэ о Иосиф эфта дес ровэлас пэ дадэски.
GEN 50:11 Кана о ханаанея, о мануша одолэ пхуяки, дикхлэ роипэ ко Горен-Атад, он пхэнлэ: «Ко египтяня баро роипэ тай касывэти». Аки соски одова тхан паш ко Иордани бучёл Авел-Мицраим.
GEN 50:12 Аякха о чявэ э Яковески кердэ, со ов пхэнляс:
GEN 50:13 он гелдэ лэс ки пху Ханаан тай пароскердэ андэ пищера ки ливади Махпела, паш ко Мамрэ. Адая пищера о Авраам киндяс ко хетеи ко Эфрон екхетханэ э ливадяса, тэ овэл лэстэ тхан паромаски.
GEN 50:14 Кана о Иосиф пароскердяс пэ дадэс, ов екхетханэ пэ пхралэнца тай алаенца, кон гело лэса тэ пароскерэл э дадэс, гело палэ ко Египти.
GEN 50:15 Кана о дад муло, о пхрала э Иосифески тюшундылар: «Кай о Иосиф тэ гаравэл холи амэнги тай акана тэ кан покинэл амэнги андар алаи ко джюнгалипэ, саво амэ лэски кердям?»
GEN 50:16 Тай он бичялдэ ко Иосиф тэ пхэнэн: — Ангал мэрипэ о дад ачявдяс асавке пхэнлиматэс:
GEN 50:17 «Аки со тумэ камэл тэ пхэнэн тумарэ пхралэски э Иосифески: "Мэ мангав тут, апувикер тэ пхралэн лэнги дош тай о бэзя, савэ он кердэ, кай кердэ туса асавко джюнгалипэ. Акана мангав тут, апувикер о бэзя э иргатенги э Дэвлэски тэ дадэскерэски"». О Иосиф ровэлас, кана лэски пхэнэнас адала зборэс.
GEN 50:18 Лэски пхрала алэ, пэлэ ангал лэстэ тай пхэнлэ: — Амэ — тэ иргатя.
GEN 50:19 О Иосиф пхэнляс: — Ма трашан. Та со, мэ о Дэл?
GEN 50:20 Тумэ тюшундынус мамуй мандэ джюнгалипэ, ай о Дэл болдиняс лэс андэ лачипэ тай кутарды о бэшыпэ бутэ манушэнги.
GEN 50:21 Оничин ма трашан: мэ кан хавдярав ли тумэн, ли тумарэ пуен. Ов лошаскердяс лэн тай зборизэлас лэнца лачимаса.
GEN 50:22 О Иосиф бэшэлас андэ Египти екхетханэ э хорандаса пэ дадэскерэса, тай бэшло шэлу дэш брэш.
GEN 50:23 Ов сас джи, кана сас э трито порода о пуя э Ефремески. Аякхажэ о Иосиф дикхляс тай астардяс опэр кочендэ э пуен э Махирескерэн, саво сас о чяво э Манассияско.
GEN 50:24 О Иосиф пхэнляс пэ пхралэнги: — Мэ мэрав, ай о Дэл кан авэл тэ керэл ярдыми тумэнги тай кан никалэл тумэн андар адалэ пхуятэ ки пху, сави Ов халяс совля тэ дэл ко Авраам, э Исаак тай э Яков.
GEN 50:25 О Иосиф пхэнляс э Израилески чявэнги тэ хан совля: — О Дэл кан авэл тумэндэ тэ керэл ярдыми, тай дэчи тумэ камэл тэ никалэн атхар мэ кокала.
GEN 50:26 Кана о Иосиф муло, лэски сас шэлу дэш брэш. Лэски кердэ бальзамирования тай тхэдэ андэ склепи андэ Египти.
RUT 1:1 Одова вахыти, кана андэ Израиль сас цындомаря, ули бокх опэр пху. Екх мануш гело андар Вифлееми андэ Иудеи пэ ромняса тай пэ дуе чявэнца тэ бэшэн андэ ливадя ко Моавитскя.
RUT 1:2 Адава мануш бучёлас Элимелех, лэски ромня — Ноеминь, ай лэски дуе чявэн — Махлон тай Хилеон; он сас ефрафяня андар Вифлееми андэ Иудеи. Он алэ ко ливадя ко Моавитскя тай ачилэ отхэ.
RUT 1:3 О Элимелех, о ром э Ноеминяко, муло, тай ой ачили пэ дуе чявэнца.
RUT 1:4 Он лилэ пэски ромнен моавитянкен, э екх бучёлас Орфа, ай авэр Руфь. Пал отхэ сар он бэшлэ отхэ паш ко дэш брэш,
RUT 1:5 о Махлон тай о Хилеон мулэ, тай э Ноеминь ачили би чявэнго тай би ромэско.
RUT 1:6 Э Ноеминь шунляс андэ Моави, кай о Сагбус о Яхвэ ало ярдымеса Пэ дюнястэ тай диняс лэн хапэ. Ой пэ боренца гортярдэпэс тэ джян кхерэ.
RUT 1:7 Екхетханэ пэ боренца ой ачавдяс о тхан, катэ бэшэлас, тай гили ко дром, саво камэлас тэ анэл лэн палэ ки пху Иуда.
RUT 1:8 Э Ноеминь пхэнляс пэ боренги: — Джян кажни андэ кхер тэ дэятэ. Мэ овэл о Сагбус о Яхвэ миласа тумэндэ, сар тумэ санусас миласа тумарэ мулэндэ тай мандэ.
RUT 1:9 Мэ дэл о Сагбус о Яхвэ кажня андар тумэндэ тэ аракхен бахт андэ кхер ко нэво ром. Ой чюмиды лэн, тай он лачес рунэ
RUT 1:10 тай пхэнлэ лаки: — Амэ туса кан джяс тэ дюнястэ.
RUT 1:11 Э Ноеминь пхэнляс: — Джян кхерэ, мэ чяя. Соски тумэ тэ джян манца? Та со, мандэ кан овэн авэра чявэ, савэ кан овэн тумэнги рома?
RUT 1:12 Джян кхерэ, мэ чяя; мэ бут пхури, тэ овэл мандэ авэр ром. Джи мэ тэ тюшундиявас, кай мандэ генэ си ишандипэ, — джи адая рат мэ би тэ овав ромэса, тай дэчи тэ аракхлён мандэ чявэ,
RUT 1:13 — та со, кан ишандиен, бискай он кан барён? Камэл тумэнги тэ ишандиен тай тэ на джян ромэстэ? На, мэ чяя. Мэ бут касэвэтлыс пал тумэндэ, вай о васт э Сагбуско э Яхвэско уло мамуй мандэ!
RUT 1:14 Он ваздинэ бэбэря тай генэ лилэ тэ ровэн. Тай э Орфа чюмидиняс пэ саса тай гели пэ дюнястэ, ай э Руфь ачили ласа.
RUT 1:15 Э Ноеминь пхэнляс: — Аки, ти бори гели пэ дюнястэ тай пэ дэвлэндэ. Джя ли ту пал тэ борятэ.
RUT 1:16 Ай э Руфь пхэнляс: — Ма тхэ ман тэ мукав тут тай тэ джяв тутар. Кай ту кан джяс, отхэ ли мэ кан джяв, тай кай ту кан бэшэс, отхэ ли мэ кан бэшав. То дюняс кан овэл мо дюняс, тай то Дэл — мо Дэл.
RUT 1:17 Катэ кан мэрэс ту, кан мэрав ли мэ тай отхэ кан овав паромэ. О Сагбус о Яхвэ лачес мэ марэл ман, тэ авэр со-то, екх о мэрипэ кан лэл ман тутар.
RUT 1:18 Кана э Ноеминь галили, кай э Руфь лачес мангел тэ джял ласа, ой тэрдили ла тэ тхэл.
RUT 1:19 Тай джянас о дуй он, бискай на алэ андэ Вифлееми. Кана он алэ андэ Вифлееми, алаи э диз ваздиндили лэндар тай пхэнэнас: — Адава э Ноеминь?
RUT 1:20 — Ма пхэнэн манги Ноеминь, — ой пхэнляс лэнги. — Ами пхэнэн манги Мара, вай о Зорало Дэл бичялдяс манги баро касэвэти.
RUT 1:21 Мэ никхлистём атхар мангинэса, ай о Сагбус о Яхвэ андяс ман палэ би ништоско. Соски тэ пхэнэн манги Ноеминь, кана о Сагбус о Яхвэ диняс ман касэвэти, тай о Зорало Дэл бичялдяс манги бибахталипэ?
RUT 1:22 Аякха э Ноеминь али кхерэ. Ай ласа катар ливадя ко Моавитскя али лаки бори, моавитянка э Руфь. Тай он алэ андэ Вифлееми, кана лилэ тэ кидэн о ячмени.
RUT 2:1 Ки Ноеминяко ром сас тухуми, саво бучёлас Боаз. Ов сас намлыс патювало мануш андар порода, катар сас о Элимелех.
RUT 2:2 Э моавитянка э Руфь пхэнляс э Ноеминяки: — Кан джяв ки ливади тэ кидав гив, кастэ кан аракхав мила? Э Ноеминь пхэнляс: — Джя, ми чяй.
RUT 2:3 Э Руфь гели тай лиляс тэ кидэл о гив, саво пэрэлас пал одолэндэ, савэ кидэнас о гив. Тай уло аякха, кай одоя ливади сас э Боазески, э порода э Элимелехески.
RUT 2:4 Тай аки, о Боаз ало андар Вифлееми тай пхэнляс одолэнги, савэ кидэн о гив: — О Сагбус о Яхвэ тумэнца! Он пхэнлэ лэски: — Мэ алгыштиел тут о Сагбус о Яхвэ!
RUT 2:5 О Боаз пхучляс ко бутярно, саво сас опэр иргатя, савэ кидэн о гив: — Каски чяй адая?
RUT 2:6 О бутярно, саво сас опэр иргатя, савэ кидэн о гив, пхэнляс: — Адая тэрни джювли моавитянка, али э Ноеминяса катар ливадя Моавитскя.
RUT 2:7 Ой пхэнляс: «Кан кидав о гив пал одолэндэ, кон кидэл о гив». Али сабахтан, ой си джякана атхэ тай дага на раганты.
RUT 2:8 О Боаз пхэнляс э Руфяки: — Шун ман, ми чяй. Ма джя тэ кидэс аврэ ливадятэ тай ма джя атхар. Ов атхэ мэ иргатинкенца.
RUT 2:9 Дикх, катэ керэн бути джювля, тай джя пал лэндэ. Мэ пхэнлём мэ манушэнги тэ на холязэн туки. Тэ мангеса тэ пиес, пашо тай пи андар кхорэ, савэ пхэрдэ мэ иргатя.
RUT 2:10 Ой бангили моса джи ки пху тай пхэнляс лэски: — Ту манги керэс лачипэ тай дикхес пал мандэ, вай мэ сом джяти?
RUT 2:11 О Боаз пхэнляс лаки: — Манги пхукавдэ одолэстар, со ту кердян тэ сасаки пал мэрипэ тэ ромэско: сар ту ачявдян тэ дадэс тай тэ дэя, ачявдян тэ дюняс тай гелян андэ пху, сави на джянэс.
RUT 2:12 Лачипэ мэ керэл туки о Сагбус о Яхвэ андар адалэстэ! Мэ овэл тутэ барвалипэ катар Яхвэ, Дэл ки Израилеско, Савэстэ ту алян! Мэ овэл рагати туки тал Лэски пхакендэ!
RUT 2:13 — Лошани мэ тэ керав, со мангес ту, сагбус минро, — пхэнляс ой. — Ту кердян лачипэ тай рагати манги, тэ иргатинка, гэм мэ на сом машкарэ тэ иргатинкендэ.
RUT 2:14 Кана ало вахыти тэ хан, о Боаз пхэнляс э Руфяки: — Эла атхэ, ха, бол то котор манро андэ шутлипэ. Э Руфь бэшли паш ко мануша, савэ кидэн о гив, тай ов диняс ла жарини гив. Ой халяс, чялили, тай латэ дага ачило.
RUT 2:15 Дэчи э Руфь гели тэ кидэл о чёрдо гив, ай о Боаз пхэнляс пэ манушэнги: — Мэ кидэл ой ли машкарэ ко пханлэ снопи гив, ма холязэн лаки.
RUT 2:16 Тай андар снопи никалэн гив, чен лаки тай ачявэн, мэ кидэл ой, тай ма холязэн лаки.
RUT 2:17 Аякха ой кидэлас ки ливади джи ки бэлвэль, мардяс о ячмени, дэчи шужардяс тай сеискердяс, тай уло гоно гив.
RUT 2:18 Ой андяс о гоно андэ диз, тай лаки сасуй дикхляс, сокабор бут ой кидиняс. Генэ э Руфь никалдяс тай диняс ла одова, со ачило латэ, кана халас.
RUT 2:19 Тай пхэнляс лаки э сасуй: — Кай ту авдес кидэсас? Катэ керэсас бути? Мэ овэл лачипэ одолэски, кон мукляс тут! Э Руфь пхэнляс пэ сасаки, кастэ ой керэлас бути, тай пхэнляс: — Одова мануш, кастэ мэ авдес керэвас бути, бучёл Боаз.
RUT 2:20 — Алгыштие лэс о Сагбус о Яхвэ! Ов на ачявдяс би милако ли э дживиндэнги, ли э мулэнги! — пхэнляс э Ноеминь пэ боряки. — Адава мануш — амаро пашутно тухуми.
RUT 2:21 Э моавитянка э Руфь пхэнляс: — Ов джи пхэнляс манги: «Ов мэ бутярнэнца, бискай он кан бытэрдиен тэ кидэн о гив опэр ми ливади».
RUT 2:22 Э Ноеминь пхэнляс пэ боряки э Руфяки: — Си лачё, ми чяй, кай ту кан пхерэс лэски иргатинкенца тай на кан холязэн туки аврэ ливадятэ.
RUT 2:23 Аякха э Руфь сас э иргатинкенца э Боазескерэнца, бискай на быты тэ кидэн о ячмени тай о гив, тай бэшэлас пэ сасатэ.
RUT 3:1 Э Ноеминь пхэнляс пэ боряки: — Ми чяй, тэ родав туки лачё тхан, катэ кан овэс рагати?
RUT 3:2 Аки о Боаз, э иргатинкенца савэнца ту санас, амаро тухуми. Ов адая рат кан шужарэл ячмени.
RUT 3:3 Ту халяр тут, мак тут, уряв тут шукар тай джя ко тхан, катэ шужарэн о ячмени, тай ма сикав тут э Боазески, бискай ов на кан бытэрдиел тэ хал тай тэ пиел.
RUT 3:4 Дикх, катэ ов кан пашлёл тэ совел, дэчи пашо, пхутэр лэс тай пашлё пашэ. Ов кан пхэнэл туки, со тэ керэс дэчи.
RUT 3:5 Э Руфь пхэнляс: — Мэ кан керав алаи, сар ту пхэнлян.
RUT 3:6 Ой гели ко тхан, катэ шужарэн о ячмени, тай кердяс, сар пхэнляс лаки э сасуй.
RUT 3:7 О Боаз халяс, пиляс тай лошано пашлило тэ совэл паш ки бари кучя гив. Э Руфь погаля пашыли, пхучярдяс лэс тай пашлили пашэ.
RUT 3:8 Рати ов джянгавдило, лиляс тэ болдэлпэс тай дикхляс, кай паш лэстэ пашли джювли.
RUT 3:9 — Ту кон? — пхучляс ов. Ой пхэнляс: — Мэ э Руфь, иргатинка тинри. Лэ тэ иргатинка тал тэ пхакатэ, вай ту мо тухуми.
RUT 3:10 Ов пхэнляс: — Мэ алгыштиел тут о Сагбус о Яхвэ, ми чяй! Ту кердян зиядэ, ниш буруни: на родинян туки тэрнэс, нэ чёрэс, нэ барвалэс.
RUT 3:11 Ма траша, ми чяй. Мэ кан керав алаи, со ту кан мангес, вай андэ адалэ дизатэ алаи джянэн, кай ту лачи джювли.
RUT 3:12 Адава чячи, мэ то тухуми. Ай си генэ тухумя май пашэ, ниш мэ.
RUT 3:13 Сов атхэ, ай рано, ов тэ керэла со камэл тэ керэл, — лачё, мэ керэл. Ай ов тэ на мангела тэ керэл ярдыми, дэчи мэ ангал Сагбус Яхвэ хав совля, мэ кан керав ярдыми туки. Сов, о сабаги дага дур.
RUT 3:14 Ой сути лэски пинрэндэ джи сабахтаняки тай ущини ангал отхэ, бискай на уло дисипэ. О Боаз тюшунды: «Зиядэ никхон мэ на джянэл, кай ой алисас атхэ».
RUT 3:15 Ов пхэнляс лаки: — Дэ ти накидка, сави опэр тутэ, тай астар ла. Кана ой кердяс адава, о Боаз чёрдяс андэ шов сырэс ячмени, тай кердяс ярдыми тэ чел о дорбаз опэр пхике. Пал отхэ гело андэ диз.
RUT 3:16 Э Руфь али пэ сасатэ, тай одоя пхучляс: — Ми чяй, сар ту? Э Руфь пхукавдяс лаки одолэстар, со кердяс о Боаз,
RUT 3:17 тай генэ: — Ов диняс ман акала шов сырэс ячмени тай пхэнляс: «Ма джя тэ сасатэ чюче вастэнца».
RUT 3:18 Э Ноеминь пхэнляс: — Ишандие, ми чяй, бискай на кан галёс, сар алаи кан бытиел. Вай адава мануш на кан тэрдёл, бискай авдес на кан керэл о дилэс.
RUT 4:1 Ай о Боаз гело тай бэшло ки дизаки бар. Дикхел, авэл одова тухуми, савэстар ов пхэнэлас. О Боаз диняс икос лэс тай пхэнляс: — Амал, эл атхэ, бэш пашэ. Одова пашыло тай бэшло.
RUT 4:2 О Боаз андяс дэшэ барэ манушэн э дизакерэн тай пхэнляс: — Бэшэн акатэ. Он бэшлэ.
RUT 4:3 О Боаз пхэнляс э тухумески: — Э Ноеминь, сави али катар ливадя Моавитскя, бикнэл котор ливади, сави си амарэ пхралэски э Элимелехески.
RUT 4:4 Мэ тюшундым, кай камэл адалэстар тэ пхукавав туки. Ту тэ кинэс адая ливади ангал алаендэ, кон си атхэ, тай ангал барэ мануша ки дюняски. Мангес — кин, ай на мангес — пхэн манги, мэ тэ джянав. Вай ту камэл ангал тэ керэс адава, ай мэ — пал тутэ. — Мэ кан кинав лэс, — пхэнляс ов.
RUT 4:5 Дэчи о Боаз пхэнляс: — Одова дес, кана ту кан кинэс э пху ки Ноеминь, ту камэл тэ прандозэс опэр моавитянка Руфь, э пхивли э мулэски, тай кана тумэндэ кан аракхлёл чяво, э пху тэ ачёл э мулэски хорандаски.
RUT 4:6 Дэчи о тухуми пхэнляс: — На, мэ нащи кинав, аякха сар мэ кан чёраляв. Кин зиядэ ту, мэ нащи адава керав.
RUT 4:7 (Авгос андэ Израиль, тэ кинэс я тэ дэс пху, екх андар кинимари челас по минис тай дэлас аврэстэ. Аякха камэлас тэ керэн андэ Израиль тэ сикавэн э дини збора.)
RUT 4:8 — Кин ту, — пхэнляс о тухуми э Боазески тай читяс о минис.
RUT 4:9 Дэчи о Боаз пхэнляс э барэ манушэнги тай алаи э дюняски: — Авдес тумэ дикхен одова, кай мэ киндём ки Ноеминь алаи, со сас ко Элимелех, ко Хилеон тай ко Махлон.
RUT 4:10 Генэ мэ лилём манги ромня э моавитянка э Руфя, э Махлонески пхивля, тэ овэл э пху э мулэски хорандаски, лэско нав тэ на бристэн машкарэ лэски тухумендэ тай катар бар лэски чяче дизатар. Тумэ авдес дикхен!
RUT 4:11 Дэчи о барэ мануша тай алаи, кон сас ки бар, пхэнлэ: — Амэ дикхлям. Мэ керэл о Сагбус о Яхвэ дэя э джювля, сави авэл андэ тэ кхерэстэ, сар э Рахиль тай э Лия, савэ екхетханэ ваздинэ о кхер э Израилеско. Лэ барвалипэ андэ Ефрафа, тай мэ овэл то нами андэ Вифлееми.
RUT 4:12 Тэ пуендар, савэн о Сагбус о Яхвэ кан дэл тут адалэ тэрнэ джювлятар, ти порода мэ овэл, сар э порода ко Парец, саво аракхлило ки Фамарь тай ко Иуда.
RUT 4:13 О Боаз лиляс э Руфя, тай ой ули лэски ромни. Ов сас ласа, тай о Сагбус о Яхвэ диняс ла тэ насвалёл пуёстэ, тай латэ аракхлило чяво.
RUT 4:14 О джювля пхэнэнас э Ноеминяки: — Шукор э Сагбуски э Яхвэски, Саво на ачявдяс тут авдес би турунеско, саво кан дикхел пал тутэ. Мэ овэл о чяворо махтадимэ андэ Израиль!
RUT 4:15 Ов кан керэл то бэшыпэ нэво тай кан дикхел пал тутэ опэр пхуримастэ. Вай ов аракхлило тэ борятэ, сави дэхэл тут, тай сави си туки зиядэ эфта чявэндар.
RUT 4:16 Э Ноеминь лиляс э пуёс, пхеравэлас лэс андэ ангали тай дикхелас лэс.
RUT 4:17 О джювля, савэ бэшэнас отхэ, пхэнэнас: — Ки Ноеминь аракхлило чяво. Он тхэдэ лэс Овид. Ов уло о дад э Иессееско, саво сас о дад э Давидеско.
RUT 4:18 Аки э порода э Парецки: о Парец сас о дад э Хецронеско,
RUT 4:19 о Хецрон — о дад э Рамеско, о Рам — о дад э Аминадавеско,
RUT 4:20 о Аминадав — о дад э Нахшонеско, о Нахшон — о дад э Салмонеско,
RUT 4:21 о Салмон — о дад э Боазеско, о Боаз — о дад э Овидеско,
RUT 4:22 о Овид — о дад э Иессееско, ай о Иессей — о дад э Давидеско.
JON 1:1 О Сагбус о Яхвэ пхэнляс э Ионаски, чявэски э Амиттаески:
JON 1:2 — Ущи, джя андэ бари диз ки Ниневия тай пхэн манушэнги, о габэри лэнги джюнгалимастар ало джи Мандэ.
JON 1:3 Ай о Иона кидиняспэс тэ нашэл катар Сагбус Яхвэ андэ Таршыш. Ов гело андэ Яффа, аракхляс карабляс, кай джял андэ Таршыш, покиндяс андар дром, бэшло опэр лэстэ, тэ джял катар Сагбус Яхвэ.
JON 1:4 Ай о Сагбус о Яхвэ ваздиняс опэр пани бари зорали балвал, тай ваздиндило аякха лачес о пани, кай о карабляс сас газыри тэ хурдёл.
JON 1:5 О марякя трашанилэ, тай кажни лиляс тэ мангел пэ дэвлэс. Он читэ андэ пани алаи о шэя, савэ сас опэр карабляс, ов тэ локёл. Ай о Иона мукляспэс андэ трюми, пашлило отхэ тай лачес суто.
JON 1:6 О капитани ало лэстэ тай пхэнляс: — Со сан суто? Ущи, манг тэ Дэвлэс! Файма, Ов кан дикхел амэн, тай амэ на кан мэрас.
JON 1:7 О марякя пхэнлэ екхаврэски: — Эла чяс жреби тай галяс, андар кастэ амэндэ уло адава хатас. Он читэ жреби, тай о жреби пэло опэр Иона.
JON 1:8 Дэчи он пхучлэ лэс: — Пхэн амэнги, кон эси дошало адалэ хатаски? Соса казандиес? Катар авэс? Со пхуятар ту сан? Андар со дюнястэ?
JON 1:9 Ов пхэнляс: — Мэ евреи тай гинав э Сагбус э Яхвэс, э Дэвлэс опрунэс, Саво кердяс о пани тай э пху.
JON 1:10 О Иона пхукавдяс лэнги, кай ов нашэл катар Сагбус Яхвэ. Кана он адалэстар галилэ, он бут трашанилэ тай пхучлэ: — Со ту кердян?
JON 1:11 Ай о пани ваздиндёлас май лачес тай лачес, тай дэчи он пхучлэ лэс: — Со амэнги тэ керас туса, тэ тэрдёл о пани ангал амэндэ?
JON 1:12 — Лэн ман тай чен андэ пани, — пхэнляс ов, — тай ов кан тэрдёл ангал тумэндэ. Мэ джянав, кай адая бари зорали балвал пэли опэр тумэндэ андар мандэ.
JON 1:13 Ай он лилэ май зоралэс тэ дэн джялдави, тэ пашон ки пху, ай он адава нащи кердэ, вай о пани ваздиндёлас май лачес тай лачес.
JON 1:14 Дэчи он лилэ тэ манген э Сагбус э Яхвэс: — Сагбус Яхвэ, ма дэ тэ мэрас андар адалэ манушэстэ. О мэрипэ э бидошалэ манушэско мэ на овэл опэр амэндэ, вай Ту, Сагбус Яхвэ, керэс одова, со мангес Ту.
JON 1:15 Дэчи он лилэ э Ионас, читэ лэс андэ пани, тай о пани тэрдило.
JON 1:16 О марякя лачес трашанилэ катар Сагбус Яхвэ, кердэ э Сагбуски э Яхвэски курбани тай халэ совля.
JON 2:1 О Сагбус о Яхвэ бичялдяс барэ мачес, тай ов накхавдяс э Ионас. О Иона сас андэ маческо пэр трин дес тай трин ратя.
JON 2:2 Кана сас андэ маческо пэр, о Иона мангелас пэ Дэвлэс э Яхвэс.
JON 2:3 Ов пхэнляс: — Андэ хурлуки мэ манглём э Сагбус э Яхвэс , тай Ов пхэнляс манги. Андар хорипэ ко дюняс ки мулэнго мэ динём бэбэря — тай Ту шунлян ми бэбэря.
JON 2:4 Ту читян ман андэ хорипэ, андэ ило ки панеско; агорадылар ман о паня. Алаи Тэ кубукенги паня накхлэ опрал мандэ.
JON 2:5 Мэ пхэнлём: «Кувдимэ мэ Тэ якхендар; ай мэ генэ кан дикхав о шужо храми Тинро».
JON 2:6 О паня учярдэ ман, о хорипэ агорады ман, тай э панески чяря колисаилэ мэ шэрэстэ.
JON 2:7 Ко днас, ко кориня ки горадэнги мэ фулистинём, о клидя э пхуяки пханлилэ пал мандэ алаи э вахытески, ай Ту, Яхвэ, Дэл минро, никалдян ман андар хорипэ дживиндэс!
JON 2:8 Кана о бэшыпэ бытиелас андэ мандэ, мэ катар Сагбус Яхвэ тюшундым, тай гело мо мангипэ джи Тутэ, андэ шужо храми Тинро.
JON 2:9 Одола, кон гинэл э чюче дэвлэн, ачявдэ по пакяпэ Туки.
JON 2:10 Ай мэ лошанэ гиленца кан анав Туки курбанен. Кай халём совля — кан керав. О кутардипэ — катар Сагбус Яхвэ!
JON 2:11 О Сагбус о Яхвэ пхэнляс э мачески, тай ов читяс э Ионас опэр пху.
JON 3:1 О Сагбус о Яхвэ пхэнляс э Ионаски дуйто рази:
JON 3:2 — Ущи, джя андэ бари диз ки Ниневия тай пхэн манушэнги, со Мэ туки пхэнав.
JON 3:3 О Иона тхэдяскан э Сагбус э Яхвэс збора тай кидиняспэс, гело ки Ниневия. Э Ниневия сас Дэвлэски бари диз — тэ накхес ла камэлас трин дес.
JON 3:4 О Иона диняс андэ диз тай састо дес перэлас тай бэбэряса пхэнэлас: «Генэ саранда дес, тай э Ниневия кан овэл хурдярди!»
JON 3:5 О ниневитяня пакянилэ э Дэвлэски тай лилэ оразас, тай алаи — катар барвало джи ко чёро — урявдэ гонэски савутя.
JON 3:6 Кана адава габэри гело джи ко патишаи ки Ниневияко, ов ущино пэ тронестар, читяс пэ патишаитика савутя, урявдяс гонэски савутя тай бэшло андэ прахос.
JON 3:7 О патишаи кидиняс пэ барэ манушэн, тай екхетханэ он андэ Ниневия пхэнлэ асавко тхэдипэ: «О мануша мэ на хан тай мэ на пиен. Тай о гайваня мэ на джян тэ чярён тай тэ пиен пани.
JON 3:8 Мэ урявэн ли э манушэн, ли э гайванен гонэски савутя. Кажни андар алаи пэ зоратэ мэ мангел э Дэвлэс. Мэ тэрдён тэ керэн джюнгалэ дилэс тай канлыки.
JON 3:9 Кон джянэл, файма, о Дэл кан паровэл, со тюшундиелас, кан аядиел амэн тай кан тэрдёл тэ холязэл, тай амэ на кан мэрас».
JON 3:10 Кана о Дэл дикхляс одова, со он кердэ, тай сар он ачявдэ пумарэ джюнгалэ дилэс, Ов кердяс мила лэнги тай на бичялдяс опэр лэндэ джюнгалипэ, саво Ов мангляс тэ бичялэл.
JON 4:1 О Иона холясаило, бут холясаило.
JON 4:2 Ов лиляс тэ мангел э Сагбус э Яхвэс: — Сагбус Яхвэ, та со, мэ на адава пхэнавас, кана дага сомас кхерэ? Оничин мэ нашлём андэ Таршыш. Мэ джянавас, кай Ту о Дэл, саво керэл лачипэ тай мила, бутэдаяндимаско тай бутэдэхымаско тай Ту касывэтлыс андар бибахталипэ.
JON 4:3 Ай акана, Сагбус Яхвэ, лэ мо бэшыпэ, вай манги зиядэ тэ мэрав, ниш тэ бэшав.
JON 4:4 Ай о Сагбус о Яхвэ пхэнляс: — Лачё туки тэ холязэс?
JON 4:5 О Иона никлисто тай бэшло карин вастоки катар диз. Отхэ ов кердяс пэски катуна катар веткес, бэшло тэлал андэ салкыни тай лиляс тэ ишандиел, со кан овэл э дизаса.
JON 4:6 Ай о Дэл о Яхвэ кердяс аякха, кай барило кущёки, саво ваздиндило опэр Иона, о салкыни опэр лэски шэрэстэ тэ кутардиел лэс катар кхам, тай о Иона бут лошасаило адалэ кущёкески.
JON 4:7 Ай ангал сабахтанятэ авэр дес о Дэл бичялдяс кермэс, саво халяс о кущёки, тай ов шукило.
JON 4:8 Кана о кхам ваздиндило, о Дэл бичялдяс тхари васточни балвал, тай о кхам лиляс тэ тхарэл о шэро э Ионаско аякха, кай э зор ачявэлас лэс. Ов мангляс тэ мэрэл тай пхэнляс: — Зиядэ си манги тэ мэрав, ниш тэ бэшав.
JON 4:9 Ай о Дэл пхэнляс э Ионаски: — Лачё туки тэ холязэс андар кущёки? — Лачё! — пхэнляс ов. — Лачё на екх тэ холязав, ами джи тэ мэрав.
JON 4:10 Ай о Сагбус о Яхвэ пхэнляс: — Ту аядиес о кущёки, саво ту на барярдян. Ов андэ рат барило тай андэ рат шукило.
JON 4:11 Манги дэчи тэ на аядияв э бари диз э Ниневия, катэ си бут гайваня тай бут шэлэ бишэ бине манушэндар, савэ на джянэн, со си лачё, тай со си джюнгало?
LUK 1:1 О бут лилэпэс тэ яздиен одолэстар, со сас машкарэ амэндэ,
LUK 1:2 со пхукавдило амэнги э манушэнца, савэ май ангал дикхлэ пумарэ якхенца, тай сас о иргатя э Збораки.
LUK 1:3 Ли мэ лилём тэ галяв алаи лачес, со сас ангал, тай тэ пхукавав туки, намлысана Феофил, алаи пал екх аврэстэ,
LUK 1:4 кай ту тэ галёс, со шунлян, си о чячипэ.
LUK 1:5 О вахыти, кана о Ирод сас патишаи э Иудеяко, сас попази, саво бучёлас Захария, андар Авияско попазенго джемэяти, тай э ромни лэски андар порода ки Ааронески, кай бучёлас Елизавета.
LUK 1:6 Он ли о дуй сас чяче ангал Дэл, тай керэнас лачес алаи о пхэнлиматэс тай о тхэдиматэс э Сагбуски.
LUK 1:7 Лэндэ на сас пуя, э Елизавета сас бипуенги, ли о дуй он э сас пхурэ.
LUK 1:8 Екхвар э попазенги джемэятески э Захариескерэски ало вахыти тэ керэн хэзмэти ангал Дэл.
LUK 1:9 Сар екхараи керэнас, о попазя читэ жреби, тай э Захариески пэло тэ джял андэ храми ки Сагбуско, тэ тхарэл чяря, савэ кхандэн.
LUK 1:10 О вахыти, кана тхарэлас о чяря, савэ кхандэн, андэ бар бут мануша пхэнэнас э Дэвлэски.
LUK 1:11 Бирдэн о Захария дикхляс э миляикес э Сагбускерэс, саво сас тэрдо катар прави риг ки алтарески, катэ тхарэнас о чяря, савэ кхандэн.
LUK 1:12 Кана о Захария дикхляс лэс, ов шашты тай трашанило.
LUK 1:13 О миляики пхэнляс лэски: — Ма траша, Захария, О Дэл шунляс то мангипэ. Тэ ромнятэ ки Елизавета кан овэл чяво, тай ту кан тхэс лэс Иоанн.
LUK 1:14 То ило кан пхэрдёл бахт тай лош, тай о бут кан лошазэн, кай ов аракхлило,
LUK 1:15 вай ов кан овэл баро ангал Сагбус. Ов на кан пиел винас тай нисавэ матимаски пииматэс. Дага ангал отхэ, сар ов кан аракхлёл, ов кан овэл пхэрдо Шужэ Духоса.
LUK 1:16 Бутэ израильтянен ов кан анэл палэ ко Сагбус, лэнги Дэвлэстэ.
LUK 1:17 Ов кан авэл ангал Сагбус андэ духос тай андэ зор ки Илияски, тэ болдэл о илэ э дадэнги ко пуя, ай савэ на тхэн кан — ко годявэрипэ ки чяче манушэнго, тай кан гортярэл э дюняс ангал отхэ, кай кан авэл о Сагбус.
LUK 1:18 О Захария пхучляс э миляикес: — Сар мэ тэ галяв, кай адава кан овэл? Вай мэ сом пхуро, тай э ромни минри барэ брэшэнги.
LUK 1:19 О миляики пхэнляс: — Мэ — о Гавриил, кай тэрдо ангал Дэл, тай мэ бичялдо тэ зборизав туса, тай тэ пхэнав туки адава лошано габэри.
LUK 1:20 Ай анкха андар одолэстэ, кай ту на пакянилян мэ зборэнги, савэ кан овэн пумаро вахыти, ту сакави кан овэс тай нащи кан зборизэс джи одолэ вахытески, бискай адава на кан овэл.
LUK 1:21 Ай адава вахыти о мануша ишандиенас э Захариес тай шаштиенас, соски ов аякха бут вахыти на никлёл андар храми.
LUK 1:22 Кана о Захария никлисто, ов нащи зборизэлас. Алаи галилэ, кай андэ храми лэски со-то сикавдило. Ов камэлас тэ зборизэл лэнца вастэнца, тай ачёлас сакави.
LUK 1:23 Кана о деса бытылар лэски попазески бутяко, о Захария ало кхерэ.
LUK 1:24 Андар набут вахытестар лэски ромни э Елизавета насвалили пуёстэ тай пандж чён на никлёлас андар кхер.
LUK 1:25 Ой пхэнляс: — Аки со кердяс манги о Сагбус, кана мангляс тэ лэл опрал мандэ о ладжяво ангал мануша!
LUK 1:26 Кана э Елизавета сас шовто чён насвали пуёстэ, о Дэл бичялдяс миляикес э Гавриилес андэ галилейски диз, кай бучёл Назарет,
LUK 1:27 ки чяй, кай бучёлас Мария. Э Мария сас манглярди э Иосифеса, андар порода ки Давидески.
LUK 1:28 О миляики ало латэ тай пхэнляс: — Сэлями туки, дини мила! Туса о Сагбус!
LUK 1:29 Э МариЯ адала зборэс бут шаштэрдылар, тай ой тюшундиелас, со адава сас асавко сэлями.
LUK 1:30 О миляики пхэнэлас: — Ма траша, Мариё, вай о Дэл кердяс туки мила!
LUK 1:31 Ту кан насвалёс пуёстэ тай кан аракхлёл тутэ Чяво, тай кан тхэс Лэс Исус.
LUK 1:32 Ов кан овэл баро, тай Лэски кан пхэнэн о Чяво э Уче Дэвлэско. О Сагбус Дэл кан дэл Лэс о трони э Давидеско, саво андар Лэски папудэндэ,
LUK 1:33 тай Ов кан овэл Патишаи опэр кхер ки Яковеско алаи о вахытя, тай Лэско Патишайлыки на кан бытиел.
LUK 1:34 — Сар адава кан овэл? — пхучляс э Мария ко миляики. — Вай мэ дага на сомас муршэса.
LUK 1:35 Ай о миляики пхэнляс лаки: — О Шужо Духос кан авэл опэр тутэ, тай тут кан учярэл э зор э Уче Дэвлэски. Оничин о Пуёс о Шужо, Саво кан аракхлёл тутэ, кан бучёл о Чяво э Дэвлэско.
LUK 1:36 Аки ли ти тухумиса э Елизавета, ли латэ кан аракхлёл чяво опэр пхуримастэ. Латар пхэнэнас, кай ой си бипуенги, ами ой си шовто чён насвали пуёстэ.
LUK 1:37 Э Дэвлэски нанай ништо, со нащи керэл.
LUK 1:38 — Мэ иргатинка э Сагбуски, — пхэнляс э Мария, — мэ овэл алаи манца аякха, сар ту пхэнлян. Тай о миляики мукляс ла.
LUK 1:39 Пал адалэстэ э Мария кидиняспэс тай сигярдяс андэ диз, кай сас андэ горадэс ки Иудеяки.
LUK 1:40 Ой диняс андэ кхер ки Захариеско тай диняс сэлями э Елизаветаса.
LUK 1:41 Кана э Елизавета шунляс о сэлями э Марияко, о пуёс андэ латэ читяспэс; э Елизавета пхэрдяс Шужо Духос,
LUK 1:42 тай ой бэбэряса пхэнляс: — Махтадимэ ту машкарэ ко джювля, тай махтадимэ о Пуёс, Савэс ту пхеравэс!
LUK 1:43 Катар манги асавко, кай мандэ али э дай мэ Сагбуски?
LUK 1:44 Кана мэ шунлём то сэлями, о пуёс андэ мандэ читяспэс катар лош.
LUK 1:45 Бахтали э джювли, сави пакянили, кай кан овэл одова, со пхэнляс о Сагбус!
LUK 1:46 Э Мария пхэнляс: — Мо ило махтадиел э Сагбус,
LUK 1:47 тай о ило минро лошазэл катар Дэл, о Кутардимари минро,
LUK 1:48 вай Ов дикхляс, кай ивашы Лэски иргатинка. Акана алаи о породэс кан пхэнэн манги бахтали,
LUK 1:49 андар одолэстэ, кай о Зорало Дэл кердяс асавки бари дила манги! Лэско нав шужо!
LUK 1:50 Катар порода ки порода Ов керэл мила одолэнги, кон трашал Лэстар!
LUK 1:51 Лэски вастэса кердэ барэ дилэс: Ов кердяс каипи э фалаки илэнгерэн,
LUK 1:52 читяс э зоралэн лэнги тронестар тай ваздиняс э ивашэн!
LUK 1:53 Ов чялярдяс лачимаса э бокхалэн, ай э барвалэн бичялдяс чючен.
LUK 1:54 Ов кердяс ярдыми Пэ иргатески э Израилески, тай на бристэрдяс Пи збора, кай диняс амарэ дадэн, —
LUK 1:55 тэ овэл миласа ко Авраам тай кон аракхлило лэстар алаи о вахытя.
LUK 1:56 Э Мария сас ки Елизавета паш ко трин чён тай дэчи али палэ кхерэ.
LUK 1:57 Кана ало о вахыти, ки Елизавета аракхлило чяво.
LUK 1:58 Лаки комшудэс тай о тухумя шунлэ одолэстар, кай о Сагбус кердяс лаки бари мила, тай лошазэнас екхетханэ ласа.
LUK 1:59 Ко охтото дес алэ, тэ керэн э пуёски абрезания, тай манглэ тэ тхэн лэс, сар э дадэс, Захария.
LUK 1:60 Ай э дай пхэнляс: — На! Ов кан бучёл Иоанн.
LUK 1:61 Лаки лилэ тэ пхэнэн: — Та вай машкарэ тумарэ тухумендэ нанай никхон асавке навэса!
LUK 1:62 Он лилэ вастэнца тэ пхучен ко дад, сар би ов мангелас тэ тхэл пэ чявэс.
LUK 1:63 О Захария мангляс пхалёри тэ яздиел, тай э шаштимаски алаенгерэски, язды: «Лэско нав Иоанн».
LUK 1:64 Одова жэ сагати ов генэ лиляс тэ зборизэл, махтадиелас э Дэвлэс.
LUK 1:65 Алаи э комшудэн лиляс траш, тай о габэри адалэстар, со уло, накхло алаи о горадэс э Иудеяки.
LUK 1:66 Алаи, кон шунляс адалэстар, тюшундиенас андэ пумарэ илэндэ: — Кон кан овэл адава пуёс? — вай о васт э Сагбуско сас лэса.
LUK 1:67 О Шужо Духос пхэрдяс э Захариес, э дадэс э Иоаннескерэс, тай ов лиляс тэ пхэнэл, сар прароки:
LUK 1:68 — Махтадимэ о Сагбус, о Дэл э Израилеско, Саво ало Пэ дюнястэ, покиндяс тай кутарды лэс!
LUK 1:69 Ов ваздиняс амэнги Кутардимарес андар кхер Пэ иргатестар ко Давид,
LUK 1:70 сар Ов чёктан динясас збора андар Пэ шужэ прарокендэ,
LUK 1:71 кай Ов кан кутардиел амэн катар душманя тай катар васт одолэнгерэндар, кон на дэхэл амэн.
LUK 1:72 Аякха Ов кердяс мила амарэ папудэнги тай на бристэрдяс По шужо завети,
LUK 1:73 совля, савэ Ов халяс амарэ дадэски э Авраамески:
LUK 1:74 кан кутардиел амэн катар васта амарэ душманенги, тай амэ битрашако тэ керас иргатлыки Лэски,
LUK 1:75 тэ бэшас ангал Лэстэ андэ шужымастэ тай андэ чячимастэ алаи о деса амарэ бэшымаски!
LUK 1:76 Ай ту, пуёс, кан бучёс прароки э Уче Дэвлэско тай кан джяс ангал Сагбус, тэ гортярэс Лэски дром,
LUK 1:77 тэ пхукавэс Лэски дюняски, кай о кутардипэ авэл, кана о бэзя муклён.
LUK 1:78 Амаро Дэл милако, Ов кан бичялэл амэнги опрал, Сабахтутно Ярэки
LUK 1:79 тай кан дэл ярэки одолэн, савэ бэшэн андэ тэмина тай андэ траш ангал мэрипэ, тай кан болдэл амарэ пинрэ ко дром ки лачимаско!
LUK 1:80 О Пуёс барёлас тай зоралёлас духоса. Ов бэшэлас ки ливади джи одолэ вахытески, сар на сикавдяспэс ангал мануша ки Израилески.
LUK 2:1 Одола деса о император Август тхэдяс тэ гинэн тай тэ яздиен алаен опэр алаи ки пху, катэ бэшэн о мануша.
LUK 2:2 Кана э Сирияко сагбус сас о Квириний, адава сас о баштутно яздипэ.
LUK 2:3 Оничин кажни гело пэ дизатэ тэ яздиелпэс.
LUK 2:4 О Иосиф гело андар галилейски диз Назарет андэ пху Иудея, андэ диз ки Давидески, кай бучёл Вифлееми, вай ов сас андар порода ки Давидески.
LUK 2:5 Ов гело э Марияса отхэ тэ яздиелпэс. Ой сас лэса манглярди, тай сас насвали Пуёстэ.
LUK 2:6 Ко Вифлееми э Марияки ало вахыти, тэ аракхлёл о пуёс,
LUK 2:7 тай аракхлило о чяво лако баштутно, тай пакярдяс Лэс, тай тхэдяс андэ арани, вай лэнги на аракхлило тхан андэ кхер.
LUK 2:8 Надур сас чёбаня, савэ бэшэнас ки ливади тай дикхенас рати пал пумарэ атарэс.
LUK 2:9 Бирдэн тэрдило ангал лэндэ о миляики э Сагбуско, тай о нами э Сагбуско учярдяс лэн ярэкеса. О чёбаня лачес трашанилэ.
LUK 2:10 Ай о миляики пхэнляс лэнги: — Ма трашан! Мэ алём тэ пхэнав тумэнги габэри, кай кан анэл бари лош алаи э дюняски!
LUK 2:11 Авдес андэ диз ки Давидески аракхлило тумаро Кутардимари — Христос, о Сагбус!
LUK 2:12 Аки тумэнги сикаипэ: тумэ кан аракхен э Пуёс, пакярдэс тай пашлэс андэ арани.
LUK 2:13 Бирдэн паш миляики улэ аборкха миляикя опрунэ, кай на дикхиндёлас о чети. Он махтадиенас э Дэвлэс тай бэбэряса пхэнэнас:
LUK 2:14 — Махтадипэ э Дэвлэски андэ учипэ опрэ! Ай опэр пху рагати э манушэнги, савэнги Ов кердяс мила!
LUK 2:15 Кана о миляикя гелэ лэндар опрэ, о чёбаня пхэнлэ екх аврэски: — Гадэн андэ Вифлееми тай кан дикхас, со отхэ уло, состар адава амэнги пхэнляс о Сагбус.
LUK 2:16 Он сигярдэ отхэ тай аракхлэ э Мария, э Иосифес тай э Пуёс, пашлэс андэ арани.
LUK 2:17 Кана он Лэс дикхлэ, тай пхукавдэ алаи, со лэнги сас пхэнло адалэ Пуёстар.
LUK 2:18 Алаи, кон шунэлас, шаштиенас, со пхукавэн о чёбаня,
LUK 2:19 э Мария ништо на бристэлас тай тюшундиелас адалэстар.
LUK 2:20 О чёбаня гелэ палэ, барярэнас тай махтадиенас э Дэвлэс андар алаестэ, со он дикхлэ тай шунлэ: алаи уло аякха, сар лэнги сас пхэнло.
LUK 2:21 Ко охтото дес, кана ало о вахыти тэ керэн Лэски абрезания, Лэс тхэдэ Исус, о нав, саво о миляики диняс Лэс дага, кана э Мария на сас насвали Пуёстэ.
LUK 2:22 Кана быты о вахыти э шужымаско, сар яздиндёл андэ Тхэдипэ ки Маисееско, э Мария тай о Иосиф гелдэ э Пуёс ко Иерусалими, тэ башладиен Лэс э Сагбуски.
LUK 2:23 Вай андэ Тхэдипэ ки Сагбуско яздимэ: «Кажни баштутно чяво камэл тэ овэл башладимэ э Сагбуски».
LUK 2:24 Сар си яздимэ андэ Тхэдипэ ки Сагбуско, он камэлас тэ анэн курбани — до барэ голубен я до тэрнэ голубен.
LUK 2:25 Андэ Иерусалими адава вахыти сас мануш, саво бучёлас Симеон. Ов сас Дэвлэско чячё мануш тай ишандиелас Одолэс, Кон кан анэл рагати э Израилески, тай опэр лэстэ сас Шужо Духос.
LUK 2:26 О Шужо Духос пхутэрдяс лэски, кай ов на кан мэрэл, сар на дикхел э Сагбуски Христос.
LUK 2:27 Гелдо э Шужэ Духоса, о Симеон ало андэ храми, тай кана о дад тай э дай андяс э Пуёс э Исусес, тэ керэн опэр Лэстэ одова, со пхэнлёлас андэ Тхэдипэ,
LUK 2:28 о Симеон лиляс э пуёс андэ васта, махтады э Дэвлэс тай пхэнляс:
LUK 2:29 — Барэя! Сар Ту пхэнлян, акана Ту мукес Тэ иргатес лачимаса,
LUK 2:30 вай мэ якха дикхлэ о кутардипэ Тинро,
LUK 2:31 саво Ту гортярдян ангал муя алаи ки дюняски.
LUK 2:32 Ов ярэки, саво кан учярэл алаи о дюнядэс, тай о нами э дюняски Тинрэски Израиль!
LUK 2:33 О дад тай э дай э Исусески шаштиенас одолэски, со пхэнэнас Лэстар.
LUK 2:34 Дэчи о Симеон мангляс алгышы лэнги тай пхэнляс э Марияки, э дэяки Лэскеряки: — Аки пашло Одова, андар савэстэ о бут андэ Израиль кан пэрэн тай о бут кан ваздиндён. Вай ли то ило кан хэвлярэл о камас. Тай кан овэл адава Пуёс сикаипэ, савэстар о бут кан болдэнпэс, тай андар адалэстэ кан пхутэрдёл, состар он тюшундиенас андэ ило.
LUK 2:36 Отхэ сас ли э Анна, э прарочица, э чяй э Фануилески андар порода Асира. Ой э сас бут пхури. Э Анна гели ромэстэ тэрнёри тай бэшли эфта брэш пэ ромэса,
LUK 2:37 ай алаи по ачявдо бэшыпэ ой бэшэлас пхивли. Лаки сас охтодэша штар брэш. Ой били екхвар на джялас андар храми, ли о дес ли э рат керэлас иргатлыки оразаса тай мангимаса э Дэвлэски.
LUK 2:38 Адава вахыти ой пашыли тай барярдяс э Дэвлэс, тай пхэнэлас катар Пуёс алаенги, кон ишандиел кутардипэ э Иерусалимески.
LUK 2:39 Кана о дад тай э дай э Исусески кердэ алаи, сар си яздимэ андэ Тхэдипэ ки Сагбуско, он гелэ палэ ки Галилея, андэ пэ чяче дизатэ андэ Назарет.
LUK 2:40 О Пуёс барёлас тай пхэрдёлас зор тай годи, тай э мила э Дэвлэски сас опэр Лэстэ.
LUK 2:41 Кажни брэш, кана авэл Пэсах, о дад тай э дай э Исусески джянас андэ Иерусалими.
LUK 2:42 Кана э Исусески сас дэшудуй брэш, он, сар екхараи, гелэ ко мисяфирлыки.
LUK 2:43 Пал отхэ, сар быты о мисяфирлыки, кана джянас кхерэ, о Чяворо о Исус ачило андэ Иерусалими, ай Лэско дад тай э дай адалэстар на джянэнас.
LUK 2:44 Тюшундиенас, кай Ов джял машкарэ аврэ манушэндэ, он пал ко састо дес дром лилэ тэ родэн Лэс машкарэ ко тухумя тай ко джянлэ мануша.
LUK 2:45 Кай на аракхлэ, он палэ гелэ ко Иерусалими, тэ родэн отхэ.
LUK 2:46 Тринэ десендар он аракхлэ э Чяворэс андэ храми. Ов бэшло сас машкарэ ко сикляримаря, шунэлас лэн тай пхучелас лэндэ.
LUK 2:47 Алаи, кон Лэс шунэлас, шаштиенас Лэски джянлимаски тай Лэски зборэнги.
LUK 2:48 О дад тай э дай сас шаштимэна, кай дикхлэ Лэс отхэ. — Мо чяворо, соски Ту аякха амэнца кердян? — пхучляс Лэс э дай. — То дад тай мэ андэ касэвэтестэ самас тай родасас Тут.
LUK 2:49 — Соски тумэ родэнас Ман? — пхучляс Ов. — Та со, тумэ на джянэнас, кай Мэ камэл тэ овав андэ кхер Мэ Дадэстэ?
LUK 2:50 Ай он на галилэ, состар Ов лэнги пхэнэлас.
LUK 2:51 Ов гело лэнца ко Назарет тай тхэлас кан лэн. Ай алаи, со уло, э дай Лэски гаравэлас андэ пэ илэстэ.
LUK 2:52 О Исус барёлас тай овэлас май годявэр. Лэс дэхэнас ли о мануша, ли о Дэл.
LUK 3:1 Андэ дэшупанджто брэш ки императореско э Тиберияско, кана опэр Иудея сас о Понтий Пилат, о Ирод сас о сагбус-тетрархи э Галилеяко, лэско пхрал о Филипп — о сагбус-тетрархи э Итуреяко тай э Трахонияки областяко, о Лисаний — о сагбус-тетрархи э Авилинеяко,
LUK 3:2 ай о барэ попазя сас о Аннас тай о Кайафа, э збора э Дэвлэски сас э Иоаннески, э чявэски э Захариескерэски, ки ливади.
LUK 3:3 Пал отхэ о Иоанн гело алаи ко пхуя, савэ сас паш ко Иордани, тай пхэнэлас э манушэнги, тэ ачявэн пумарэ бэзя тай тэ болэнпэс, тэ мукел о Дэл лэнги бэзя.
LUK 3:4 Сар си яздимэ андэ книжка ки прарокески Исаиески: «Сэси шунлёл ки ливади: "Гортярэн о дром э Сагбуски, керэн доврус о тхан, опрал савэстэ Ов кан накхел!
LUK 3:5 Кажни хорипэ мэ овэл пхэрдо, тай кажни горас тай учё тхан — мэ фулен тэлэ; о болавдэ дрома мэ овэн доврус, тай о камбуря дрома — мэ гортён,
LUK 3:6 тай алаи о дживиндэ тэ дикхен э Дэвлэско кутардипэ"».
LUK 3:7 Ко Иоанн авэнас бут дюнядэс, тэ болэл ов лэн, ов лэнги пхэнэлас: — Тумэ, канлыс сапанэ породаки! Кон пхэнляс тумэнги тэ нашэн катар холи, кай авэл?
LUK 3:8 Дилэнца сикавэн, кай ачявдянус тумарэ бэзя. Ма тюшундиен тэ пхэнэн андэ тумэндэ: «Амаро дад — о Авраам!» Пхэнав тумэнги, кай ко Дэл си зор тэ керэл пуен э Авраамески акалэ барэндар.
LUK 3:9 О товэр пашло ко корини ки тэрэкеско, тай саво тэрэки на анэл лаче имиша, кан овэл чиндо тай чито андэ яг.
LUK 3:10 — Со амэнги тэ керас? — пхучелас о дюняс.
LUK 3:11 О Иоанн пхэнляс: — Одова, кастэ си дуй гада, мэ дэл екх одолэс, савэстэ нанай били екх, тай одова, кастэ си хапэ, мэ керэл аякха жэ.
LUK 3:12 Кидимаря э налогенги авэнас тэ болэнпэс. — Сикляримарина, — пхученас он, — со амэнги тэ керас?
LUK 3:13 — Ма лэн катар мануша бут, ниш камэл, — пхэнэлас ов лэнги.
LUK 3:14 Пхученас лэс о салдатя: — Ами со амэнги тэ керас? О Иоанн пхэнляс лэнги: — Ма лэн ко мануша ловэ зораса тай трашаимаса, никхас хохавнэс ма керэн тай дошалэс, бэшэн одолэса, со покинэн тумэнги.
LUK 3:15 О дюняс ишандиенас, тай алаи мангенас тэ галён, на о Христос си о Иоанн.
LUK 3:16 Адалэски о Иоанн пхэнэлас лэнги алаенги: — Мэ болав тумэн панеса, ай кан авэл Одова, Саво май зорало мандар, мэ на керав тэ пхутрав э кустик Лэски минидэндэ. Ов кан болэл тумэн э Шужэ Духоса тай ягаса.
LUK 3:17 Лэстэ андэ васта сэнэки, тэ шужарэл о гив. О гив кан кидэл андэ Пэ аранестэ, ай о сипэс кан тхарэл андэ яг, сави на мэрэл.
LUK 3:18 Тай бут авэр пхэнэлас о Иоанн, тай галярэлас э дюняски, тай пхукавэлас лэски Лошано Габэри.
LUK 3:19 О Иоанн лиляс тэ керэл дошалэс э сагбус-тетрархи э Иродес, кай лиляс э Иродиада, пэ пхралэски ромня, тай андар алаи ко канлыдэс дилэс лэскерэндэ.
LUK 3:20 О Ирод алаи ко джюнгалипэ тхэдяс генэ екх, кай пханляс э Иоаннес андэ пханли.
LUK 3:21 Кана алаи о дюняс болдяспэс ко Иоанн, сас болдо ли о Исус, тай кана пал ко болдипэ Ов зборизэлас э Дэвлэса, пхутэрдило опрэ удар,
LUK 3:22 тай опэр Лэстэ фулистино о Шужо Духос, фулистино андэ тэни, сар голуби. Тай опрал шунлило сэси: — Ту — Мо дэхло Чяво! Ту — Ми лош!
LUK 3:23 Э Исусески сас паш ко триянда брэш, кана Ов лиляс тэ керэл иргатлыки э Дэвлэски. Сар алаи тюшундиенас, Лэско дад сас о Иосиф, тай Лэски папудэс сас о Илий,
LUK 3:24 о Матфат, о Левий, о Мелхий, о Ианнай, о Иосиф,
LUK 3:25 о Маттафия, о Амос, о Наум, о Еслий, о Наггей,
LUK 3:26 о Мааф, о Маттафия, о Шымьи, о Иосиф, о Иодай,
LUK 3:27 о Иоханан, о Рисай, о Зоровавель, о Шэалтиил, о Нирий,
LUK 3:28 о Мелхий, о Аддий, о Косам, о Элмадам, о Ир,
LUK 3:29 о Иосий, о Элиезер, о Иорим, о Матфат, о Левий,
LUK 3:30 о Симеон, о Иуда, о Иосиф, о Ионам, о Элиаким,
LUK 3:31 о Мелеай, о Маинай, о Маттафай, о Нафан, о Давид,
LUK 3:32 о Иессей, о Овид, о Боаз, о Сала, о Нахшон,
LUK 3:33 о Аминадав, о Админ, о Арний, о Хецрон, о Парец, о Иуда,
LUK 3:34 о Яков, о Исаак, о Авраам, о Терах, о Нахор,
LUK 3:35 о Серуг, о Реу, о Пелег, о Евер, о Шэлах,
LUK 3:36 о Каинан, о Арпахшад, о Сим, о Ной, о Ламех,
LUK 3:37 о Мафусал, о Енох, о Иаред, о Малелеил, о Каинан,
LUK 3:38 о Енос, о Сиф, о Адам, о Дэл.
LUK 4:1 О Исус, пхэрдо о Шужо Духос, ало палэ катар Иордани, тай о Духос гелдяс Лэс ки ливади.
LUK 4:2 Отхэ Лэс саранда дес зумавэлас о Шэйтани. Алаи адава вахыти о Исус ништо на халас, ай дэчи бокхалило.
LUK 4:3 Озаман о Шэйтани пхэнляс Лэски: — Тэ сан Ту о Чяво э Дэвлэско, пхэн акалэ барэски тэ овэл манро.
LUK 4:4 О Исус пхэнляс лэски: — Яздимэ си: «На екхе хамаса бэшэл мануш».
LUK 4:5 Андяс Лэс опэр учё тхан, о Шэйтани сикавдяс Лэски бут чяльти алаи о патишайлыки э пхуяко.
LUK 4:6 Тай пхэнляс Лэски: — Мэ кан дав Тут алаи лэнго барипэ тай о нами. Он динэ си мандэ, тай мэ дав лэн, кас мангав.
LUK 4:7 Акана, тэ бангёса ангал мандэ, алаи адава кан овэл Тинро.
LUK 4:8 О Исус пхэнляс: — Яздимэ си: «Бангё ангал Сагбус, ангал Дэл тинрэстэ, тай кер иргатлыки Лэски екхески!»
LUK 4:9 Пал атхэ о Шэйтани андяс Лэс ко Иерусалими тай тхэдяс Лэс опэр сами учё тхан ки храмеско. — Тэ сан Ту о Чяво э Дэвлэско, — пхэнляс ов, — читут атхар тэлэ.
LUK 4:10 Вай яздимэ си: «Пэ миляикенги зораса кан пхэнэл тэ агорадиен Тут»,
LUK 4:11 тай «он кан гелэн Тут опэр вастэндэ, Ту тэ на чялавэс То пинро андэ бар».
LUK 4:12 О Исус пхэнляс лэски: — Пхэнлило: «Ма зумав э Сагбус, э Дэвлэс тинрэс».
LUK 4:13 Кана о Шэйтани бытэрды тэ зумавэл, ов ачявдяс Лэс вахытески.
LUK 4:14 О Исус ало палэ андэ Галилея, пхэрдо зор э Духоски. Лэстар шунлэ алаи одолэ пхуятэ.
LUK 4:15 Ов сиклярэлас андэ синагогя, тай алаи махтадиенас Лэс.
LUK 4:16 Екхвар о Исус ало ко Назарет, андэ диз, катэ Ов барило, тай андэ суббота, сар екхараи Ов керэлас, гело андэ синагога. Отхэ о Исус ущино, тэ драпкерэл.
LUK 4:17 Лэс динэ книжка прароки Исаия. Ов пхутэрдяс ла тай аракхляс о тхан, катэ сас яздимэ:
LUK 4:18 «О Духос э Сагбуско опэр Мандэ, вай Ов макхляс Ман тэ пхукавав э чёрэнги о Лошано Габэри. Ов бичялдяс Ман тэ пхэнав э пханлэнги, кай лэн кан мукен, э корэнги, кай лэн кан дэн дикхипэ, тэ мукав э кхинэн,
LUK 4:19 тэ пхэнав, кай ало вахыти э Сагбуски милако».
LUK 4:20 О Исус пханляс э книжка, диняс ла ко иргати андэ синагога тай бэшло. О якха алаенги андэ синагога сас колимэна Лэстэ.
LUK 4:21 Ов лиляс тэ пхэнэл: — Авдес, кана тумэ шунэнас, улэ адала зборэс э Яздимаски.
LUK 4:22 Алаи махтадиенас Лэс тай шаштиенас Лэски лаче зборэнги, савэ никлёнас андар Лэски мостэ. — Та со, Ов нанай о чяво э Иосифеско? — пхученас он.
LUK 4:23 О Исус пхэнляс лэнги: — Тумэ Манги, гэлбэтэм, кан дэн мэ годятэ, сар пхэнлёлпэс: «Врачина! Аиндэрдие ту тут!» Тай кан пхэнэн Манги: «Амэ шунлям, кай Ту кердян бут чюдэс андэ Капернаум, кер ли атхэ, катэ Ту барилян, асавко».
LUK 4:24 Ай пхэнав тумэнги о чячипэ, били екхе прарокес на гинэн андэ лэски дизатэ.
LUK 4:25 Пхэнав тумэнги чячипэ, андэ вахытя ки Илияски, кана трин тай екхпаш брэш на сас брышым тай опэр алаи ки пху сас бари бокх, андэ Израиль сас бут пхивля,
LUK 4:26 ай о Илия на сас бичялдо били екхатэ андар лэндэ, ами екх ки пхивли андэ Сарепта паш ко Сидон.
LUK 4:27 Бут сас андэ Израиль гералэ о вахытя кана сас о прароки Елисей, ай били екх андар лэндэ на сас шужардо, ами екх о сирийцы Нааман.
LUK 4:28 Алаи андэ синагога холясаилэ, кана шунлэ адава.
LUK 4:29 Он ущинэ, никалдэ э Исусес пал диз тай андэ Лэс ко чети ки гораско, опэр савэстэ сас тхэди э диз, тэ чен Лэс тэлэ.
LUK 4:30 Ай о Исус накхло андар дюняс тай гело.
LUK 4:31 Ов гело андэ галилейски диз ко Капернаум, тай андэ субботаки деса сиклярэлас отхэ дюняс.
LUK 4:32 О мануша шаштиенас Лэски сикляримаски, вай андэ Лэски зборэндэ шунлёлас барипэ.
LUK 4:33 Андэ синагога сас мануш, андэ савэстэ сас о духос э бишужэ шэйтанеско, тай бирдэн ов диняс бэбэря:
LUK 4:34 — А-а-а! Со Ту мангес амэндар, Исус андар Назарет? Ту алян, тэ мударэс амэн? Мэ джянав, Кон Ту! Ту — о Шужо э Дэвлэско!
LUK 4:35 — Тэныкизэ! — холяса тхэдяс лэс о Исус. — Никлё андар лэстэ! Читяс э манушэс ангал алаендэ ки пху, о шэйтани никлисто андар лэстэ тай на дукхавдяс лэс.
LUK 4:36 Алаи шаштиенас тай пхэнэнас екх аврэски: — Со си адава? Асавке баримаса тай зораса Ов пхэнэл бишужэ духенги, тай он никлён!
LUK 4:37 О зборэс катар Исус шунлёнас алаи ко тхана агорял.
LUK 4:38 Никлисто андар синагога, о Исус гело андэ кхер ко Симон. Ки сасуй ки Симонэски адава вахыти сас баро тхарипэ, э Исусес манглэ, тэ керэл лаки ярдыми.
LUK 4:39 Бангило опэр латэ, о Исус пхэнляс э тхаримаски тэ мукел э манушня, тай ов мукляс ла. Ой бирдэн ущини тай лиляс тэ тхэл лэнги конас.
LUK 4:40 Кана о кхам бэшло, алаи, кастэ сас насвалэ алаи э дукхенца, лилэ тэ анэн лэн ко Исус, тай Ов тхэлас опэр кажнестэ Пэ васта тай аиндэрдиелас лэн.
LUK 4:41 Аякхажэ ли о шэйтаня никлёнас андар бут мануша бэбэряса: — Ту — о Чяво э Дэвлэско! Ай о Исус на мукелас лэн тэ пхэнэн, вай он джянэнас, кай Ов — Христос.
LUK 4:42 Кана уло дес, о Исус никлисто андар диз тай гело андэ биманушэнго тхан. О мануша лилэ тэ родэн Лэс, тай кана аракхлэ, мангенас тэ ачёл лэндэ.
LUK 4:43 Ай о Исус пхэнляс лэнги: — Мэ камэл тэ пхукавав Лошано Габэри катар Патишайлыки ки Дэвлэско ли аврэ дизэндэ, вай адалэски Мэ сом бичялдо.
LUK 4:44 Тай Ов сиклярэлас андэ синагогя ки Иудеяки.
LUK 5:1 Екхвар о Исус тэрдо сас паш ко бошы пани Генисарет, тай о дюняс тасавэнас Лэс агорял, тэ шунэн э збора э Дэвлэски.
LUK 5:2 О Исус дикхляс паш ко пани дуй лодкес. О мануша, савэ астарэнас э мачен, никлистэ андар лодкес, чяйкадиенас пумарэ сеткес.
LUK 5:3 Ов диняс андэ екх лодка, сави сас э Симонэски, тай мангляс лэс, тэ дэл джялдави залаг э лодкаса катар чети ки панеско. Дэчи Ов бэшло тай лиляс тэ сиклярэл э дюняс андар лодка.
LUK 5:4 Кана о Исус бытэрды тэ зборизэл, Ов пхэнляс э Симонэски: — Дэ джялдави э лодкаса ко хор тхан тай чи о сеткес, тэ астарэс мачен.
LUK 5:5 О Симон пхэнляс: — Сикляримарина, амэ керасас пхари бути састи рат тай ништо на астардям, эй сар Ту аякха пхэнэс, кан чяв о сеткес.
LUK 5:6 Тай кана он кердэ адава, астардэ аборкха маче, кай о сеткес лилэ тэ пхаравдён.
LUK 5:7 Он вастэнца дэнас икос ярдымески э амалэн андар авэр лодка. Одола алэ, тай екхетханэ он пхэрдэ дуй лодкес аякха, кай о лодкес лилэ тэ бугулдиен.
LUK 5:8 Кана о Симон Пётар адава дикхляс, ов пэло ко чянга ки Исусески тай пхэнляс: — Наш мандар, Сагбуса, вай мэ мануш бэзяло!
LUK 5:9 Ов пхэнляс аякха, кай лэс тай алаен, кон лэса астарэлас мачен, лиляс бари траш, кай дикхлэ аборкха маче.
LUK 5:10 Сас шаштимэна ли о амала э Симонэски: о Яков тай о Иоанн, о чявэ э Зеведеески. О Исус пхэнляс э Симонэски: — Ма траша, акана ту кан астарэс манушэн.
LUK 5:11 Тай никалдэ о лодкес опэр пху, он ачявдэ алаи тай гелэ пал Лэстэ.
LUK 5:12 Екхвар, кана о Исус сас андэ екхе дизатэ, Ов дикхляс манушэс, гералэс. Кана ов дикхляс э Исусес, пэло моса тэлэ тай лиляс лачес тэ мангел Лэс: — Сагбуса! Тэ мангес, Тутэ си зор тэ шужарэс ман.
LUK 5:13 О Исус сидиняс по васт, колисаило лэстэ тай пхэнляс: — Мангав, шужо! Э гер бирдэн гили опрал лэстэ.
LUK 5:14 О Исус пхэнляс лэски холяса никхаски адалэстар тэ на пхукавэл: — Джя, сикав тут э попазески тай ан курбанес, кай шужылян, сар адава пхэнляс о Маисей. Тай алаи мэ дикхен адава.
LUK 5:15 О зборэс катар Исус шунлёнас май буглэс, тай бут мануша джянас Лэстэ, тэ шунэн Лэс тай тэ аиндиен катар дукха.
LUK 5:16 О Исус бутвар джялас ки биманушэнги тхана тай зборизэлас э Дэвлэса.
LUK 5:17 Екхвар, кана о Исус сиклярэлас, пашэ бэшлэ сас о фарисея тай о сикляримаря э Тхэдимаски, савэ кидинэпэс андар алаи ко диза ки Галилеяки тай Иудеяки, тай андар Иерусалими. Э Исусеса сас э зор э Сагбуски, тэ аиндэрдиел э насвалэн.
LUK 5:18 Тай алэ мануша, анэнас опэр матрази астардэс, тай мангенас тэ гелэн лэс андэ кхер, тэ пашлярэн ангал Исус.
LUK 5:19 Тай андар дюняс он нащи адава кердэ, тай дэчи он ваздинэпэс опэр кхер, тай лилэ опрал э черепица, тай муклэ э насвалэс опэр матрази машкарэ ко кхер, доврус ангал Исус.
LUK 5:20 Кана о Исус дикхляс лэнго пакяпэ, Ов пхэнляс э насвалэски: — Амал, муклён туки тэ бэзя!
LUK 5:21 О фарисея тай о сикляримаря э Тхэдимаски тюшундиенас андэ пэстэ: «Кон эси адава Мануш, Саво пхэнэл бэзялэ зборэс? Вай екх ко Дэл си зор, тэ мукел бэзя?»
LUK 5:22 Галило, состар он тюшундиен, о Исус пхэнляс лэнги: — Со тюшундима тумэндэ андэ ило?
LUK 5:23 Со локо — тэ пхэнэс: «Муклён туки тэ бэзя» — я тэ пхэнэс: «Ущи тай пхер?»
LUK 5:24 Тумэ тэ джянэн, кай ко Чяво ко Манушыкано си барипэ опэр пху тэ мукел э манушэнги о бэзя… Дэчи о Исус пхэнляс э астардэ манушэски: — Пхэнав туки, ущи, лэ то матрази тай джя кхерэ.
LUK 5:25 Одова бирдэн ангал алаенги якхендэ ущино, лиляс одова, опэр состэ сас пашло, гело кхерэ тай махтадиелас э Дэвлэс.
LUK 5:26 Алаи шаштылар, тай он махтадиенас э Дэвлэс. Тай трашавнэ, он пхэнэнас: — Барэ дилэс, савэ на овэн, амэ авдес дикхлям.
LUK 5:27 О Исус никлисто андар адалэ кхерэстэ тай дикхляс кидимарес налогенгерэс, лэско нав Левий, бэшлэс ко тхан, кай кидэн о налогя. — Эла пал Мандэ, — пхэнляс лэски о Исус.
LUK 5:28 О Левий ущино, ачявдяс алаи тай гело пал Лэстэ.
LUK 5:29 Дэчи о Левий кердяс пэстэ кхерэ баро мисяфирлыки э Исусески. Ко мисяфирлыки кидинэпэс бут кидимаря э налогенги тай авэр дюняс. Он сас пал конас екхетханэ э Исусеса.
LUK 5:30 О фарисея тай о сикляримаря э Тхэдимаски холяса пхученас э сиклярдэн э Исусескерэн: — Соски тумэ хан тай пиен э кидимаренца э налогенгерэнца тай э бэзялэнца?
LUK 5:31 О Исус пхэнляс лэнги: — На э састярдэнги камэл врачи, ами э насвалэнги.
LUK 5:32 Мэ алём тэ пхэнав на э чяченги, ами э бэзялэнги, тэ болдэнпэс катар бэзя.
LUK 5:33 Дэчи он пхэнлэ э Исусески: — О сиклярдэ э Иоаннески тай э фарисеенги бутвар астарэн оразас тай мангенпэс ко Дэл, ай Тэ сиклярдэ хан тай пиен.
LUK 5:34 О Исус пхэнляс лэнги: — Та сар тэ тхэс э манушэн ко бияв, тэ астарэн оразас, кана си лэнца о джямутро?
LUK 5:35 Вай кан авэл вахыти, кана о джямутро кан линдёл лэндар, аки одола деса, он кан астарэн оразас.
LUK 5:36 Ов генэ пхукавдяс лэнги пхукаипэ: — Никхон на сивэл котор пуранэ савутестэ, чиндо адалэски котор нэвэстар. Ов адава тэ керэла, ов ли о нэво савути кан аравэл, та ли ко пурано о котор на кан уйдиел.
LUK 5:37 Тай никхон на чёрэл о нэво винас андэ пуранэ моркхяки гонэ, вай о нэво винас кан пхаравэл лэн — тай кан чёрдёл, ай о гонэ кан пхаравдён.
LUK 5:38 На, о нэво винас чёрэн андэ нэвэ моркхяки гонэ.
LUK 5:39 Тай никхон, кон пиел пурано винас, на кан мангел тэ пиел винас нэво, вай кан пхэнэл: «О пурано винас зиядэ».
LUK 6:1 Екхвар андэ суббота, кана о Исус накхелас андар ливадя, катэ барёлас о гив, Лэскерэ сиклярдэ чинэнас о гив, ронискерэнас лэс вастэнца тай ханас.
LUK 6:2 Ай сарсавэ фарисея пхучлэ: — Соски тумэ керэн одова, со на муклёл тэ керэн андэ суббота?
LUK 6:3 О Исус лэнги пхэнляс: — На драпкердянус тумэ одолэстар, со кердяс о Давид, кана ов тай кон сас лэса бокхалилэ?
LUK 6:4 Ов диняс андэ кхер ки Дэвлэско, лиляс о манро, кай сас башладимэ э Дэвлэски, саво на муклёлас тэ хал никхон, екх о попазя, халяс, тай диняс лэс ли пэ манушэн.
LUK 6:5 Тай пхэнляс лэнги генэ: — О Чяво о Манушыкано си о Сагбус опэр суббота!
LUK 6:6 Авэр суббота о Исус диняс андэ синагога тай сиклярэлас. Отхэ сас мануш шуке чяче мусяса.
LUK 6:7 О сикляримаря э Тхэдимаски тай о фарисея дикхенас пал Лэстэ, на кан аиндэрдиел Ов андэ суббота, вай родэнас, андар состэ тэ керэн дошалэс Лэс.
LUK 6:8 Ай о Исус джянэлас, состар он тюшундиенас, тай пхэнляс э манушэски э шуке мусяса: — Ущи тай никлё ко машкар. Одова ущино тай никлисто ангал.
LUK 6:9 Дэчи о Исус пхэнляс лэнги: — Мэ пхучяв тумэн: со муклёлпэс тэ керэс андэ суббота, лачипэ я джюнгалипэ? Тэ кутардиес о бэшыпэ я тэ мударэс?
LUK 6:10 Ов дикхляс карин лэндэ тай пхэнляс э манушэски: — Сидэ ти муси. Одова сидиняс, тай лэски муси састили.
LUK 6:11 Ай он холясаилэ тай лилэ тэ зборизэн машкарэ пэстэ, со лэнги тэ керэн э Исусеса.
LUK 6:12 Одола деса о Исус ваздиняспэс опэр горас тай састи рат зборизэлас э Дэвлэса.
LUK 6:13 Кана уло дес, Ов диняс икос Пэ сиклярдэн тай лиляс андар лэндэ дэшудон, савэн тхэдяс апостолен:
LUK 6:14 э Симонэс (савэс Ов тхэдяс Пётар), э пхралэс э Андреес, э Яковес, э Иоаннес, э Филиппес, э Варфоломеес,
LUK 6:15 э Матфеес, э Фомас, э Яковес, э чявэс э Алфеескерэс, э Симонэс, савэски пхэнэнас Зилот,
LUK 6:16 э Иудас, э чявэс э Яковескерэс, тай э Иудас Искариотес, саво уло пхукаимари.
LUK 6:17 О Исус фулистино лэнца тэлэ опрал горас, опэр гортэ тханэстэ. Отхэ кидинэпэс бут Лэскерэ сиклярдэ тай бут мануша андар Иудея, Иерусалими тай андар диза ко Тир тай Сидон, савэ си паш ко бошы пани.
LUK 6:18 Он алэ тэ шунэн э Исусес тай тэ аиндиен катар насвалиматэс. Одола, кас кхинярэнас о бишужэ духя, ли одола улэ аиндимэна.
LUK 6:19 Алаи о дюняс мангенас тэ колизэн ко Исус, вай андар Лэстэ никлёлас зор, сави алаен аиндэрдиелас.
LUK 6:20 Дикхляс карин сиклярдэ, о Исус лиляс тэ пхэнэл: — Бахталэ тумэ, чёралэн, вай тумэндэ э Дэвлэско Патишайлыки.
LUK 6:21 Бахталэ тумэ, кон анкха бокхало, вай тумэ кан чялён. Бахталэ тумэ, кон анкха ровэл, вай тумэ кан асан.
LUK 6:22 Бахталэ тумэ, кана о мануша тумэн на дэхэн, кана тумэн кувдиен тай кушэн, кана калярэн тумаро нав андар Чяво ко Манушыкано.
LUK 6:23 Вай аякха керэнас э прарокенги о папудэс адалэ манушэнги. Одова дес лошаса чен тумэн, вай опрэ тумэн кан махтадиен!
LUK 6:24 Ами касэвэти тумэнги, барвалалэн, вай тумэ анкха лилянус тумаро рагати.
LUK 6:25 Касэвэти тумэнги, кон анкха чяло, вай тумэ кан овэн бокхалэ. Касэвэти тумэнги, кон анкха асал, вай тумэ кан гаулизэн тай кан ровэн.
LUK 6:26 Касэвэти тумэнги, кана алаи махтадиен тумэн, вай аякха лэнги папудэс махтадиенас э хохавнэ прарокен.
LUK 6:27 — Мэ пхэнав тумэнги, одолэнги, кон шунэл Ман: дэхэн тумарэ душманен, керэн лачипэ одолэнги, кон на дэхэл тумэн,
LUK 6:28 манген алгышы одолэнги, кон арманя дэл тумэн, тай манген э Дэвлэс одолэндар, кон керэл тумэнги джюнгалипэ.
LUK 6:29 Одолэс, кон кан чялавэл ти екх фалка, тхэ ли авэр, ай одова, кон лэл тутар опрунэ савутя, мук мэ лэл ли о гад.
LUK 6:30 Кажнески, кон тумэндэ мангел, дэ; тай кон-то, кан лэл тинро, ма манг палэ.
LUK 6:31 Керэн э манушэнги аякха, сар тумэ манген, он тэ керэн тумэнги.
LUK 6:32 Тэ дэхэнa тумэ одолэн, кон дэхэл тумэн, андар состэ тумэн тэ махтадиен? Вай джи о бэзялэ дэхэн одолэн, кон лэн дэхэл.
LUK 6:33 Тэ керэн тумэ лачипэ одолэнги, кон керэн лачипэ тумэнги, андар состэ тумэн тэ махтадиен? Вай джи о бэзялэ керэн аякха.
LUK 6:34 Тэ дэн тумэ борджи екх одолэн, кастар ишандиен тэ лэн палэ, андар состэ тумэн тэ махтадиен? Вай джи о бэзялэ дэн борджи э бэзялэн, тай ишандиен, тэ лэн палэ оборкха, сокабор динэ.
LUK 6:35 Ай тумэ дэхэн тумарэ душманен, керэн лэнги лачипэ тай дэн борджи, тай ма ишандиен палэ. Дэчи тумэн кан махтадиен опрэ, тай тумэ кан овэн о чявэ э Уче Дэвлэски. Вай Ов Сам лачё джи э налаченги тай э канлыдэнги.
LUK 6:36 Овэн милаки, сар милако тумаро Дад.
LUK 6:37 Ма керэн цындос, тай тумэнги на кан керэн цындос. Ма керэн дошалэс, тай тумэн на кан керэн дошалэн. Апувикерэн, тай тумэн кан апувикерэн.
LUK 6:38 Дэн, тай ли тумэн кан дэн. Пхэрдо паи, тасавдо тай чёрдёл опрал чети, тумэнги кан чёрэн андэ тумарэ подятэ. Со паи дэн тумэ, асавко кан дэн ли тумэн.
LUK 6:39 О Исус пхукавдяс лэнги акасавко пхукаипэ: — Кан гелэл о коро э корэс? Та со, он на кан пэрэн ли о дуй андэ хандаки?
LUK 6:40 О сиклярдо нанай баро пэ сикляримарестар, ай кажни, кон алаи кан сиклёл, кан овэл сар по сикляримари.
LUK 6:41 Со ту дикхес карин тикноро кашторо андэ якх тэ пхралэстэ, кана андэ тинрятэ на дикхес бари ровли?
LUK 6:42 Сар ту пхэнэс тэ пхралэски: «Пхрала, дэ мэ кан никалав о кашторо андар тэ якхатэ», кана ту на дикхес бари ровли андэ тэ якхатэ? Домонго, никал ханик э бари ровли андар тэ якхатэ, ай дэчи лачес ту кан дикхес, сар тэ никалэс о кашторо андар якх тэ пхралэстэ.
LUK 6:43 О лачё тэрэки на анэл кермалэ имиша, тай кермало тэрэки на анэл лаче имиша.
LUK 6:44 Кажни тэрэки галён катар имиша. Вай на кидэн опрал хлядяло тэрэки инжыри я опрал хлядяло кущёки дракх.
LUK 6:45 Андар ило, пхэрдо лачипэ, о лачё мануш никалэл лачипэ, ай о канлыс мануш никалэл канлыки андар ило, пхэрдо канлыки. Вай опэр чиб ки манушэски одова, соса си пхэрдо лэско ило.
LUK 6:46 Со тумэ дэн икос Ман: «Сагбуса, Сагбуса», ай на керэн, со Мэ пхэнав?
LUK 6:47 Мэ кан сикавав тумэнги, соски ушадиел кажни, кон авэл Мандэ, шунэл Мэ зборэс тай керэл лэн.
LUK 6:48 Ов ушадиел одолэски, саво керэл кхер, саво хранляс хор хандаки тай тхэдяс о фундамент опэр барэстэ. Кана ваздиндило пани тай опэр кхер чёрдили диряв, ой на кхелавдяс лэс, вай ов сас зоралэс кердо.
LUK 6:49 Ай одолэс, кон шунэл Мэ зборэс, ай на керэл лэн, ушадиел манушэски, саво тхэдяс кхер опэр пху бифундаментеско. Сар э диряв чёрдили опэр кхер, о хурдярдипэ, тай о пэрипэ лэско сас баро.
LUK 7:1 О Исус бытэрды тэ пхэнэл э дюняски, гело ко Капернаум.
LUK 7:2 Отхэ екх баро, саво сас опэр шэлэ салдатендэ, лэстэ сас насвало тай пашло опэр мэримастэ иргати. Лэски сас бут багалыс адава лэско иргати.
LUK 7:3 Тай кана ов шунляс катар Исус, бичялдяс Лэстэ иудейски барэ манушэн, тэ манген тэ авэл тай тэ аиндэрдиел лэски иргатес.
LUK 7:4 О барэ мануша алэ ко Исус тай лилэ бут лачес тэ манген Лэс: — Адава мануш керэл То ярдыми,
LUK 7:5 вай ов дэхэл амарэ дюняс, тай адава ов кердяс амэнги синагога.
LUK 7:6 О Исус гело лэнца. Ов пашолас ко кхер, тай бичялдяс о баро, саво сас опэр шэлэндэ, Лэстэ пэ амалэн, тэ пхэнэн: — Сагбуса, ма кхиняр Тут, вай мэ на керав одова, тэ дэс Ту андэ мэ кхерэстэ.
LUK 7:7 Мэ ли ман на гиндём, кай керав, тэ авав Тутэ. Ай пхэн екх збора, тай мо иргати кан аиндиел.
LUK 7:8 Вай ли опэр мандэ си барипэ, тай ли мандэ си, савэ тхэн кан ман салдатя. Мэ пхэнав екхески: «Джя!» — та`й ов джял, аврэски: «Эла!» — тай одова авэл. Иргатески минрэски пхэнав: «Кер акава!» — тай ов керэл.
LUK 7:9 О Исус шунляс адава, шашты тай болдиняспэс ко дюняс, кай авэлас пал Лэстэ, пхэнляс: — Пхэнав тумэнги, кай джи андэ Израиль Мэ на аракхлём асавко пакяпэ.
LUK 7:10 Кана о бичялдэ алэ палэ андэ кхер, он дикхлэ о иргати аинды.
LUK 7:11 Набут пал отхэ о Исус гело андэ диз, кай бучёлас Наин. Лэса сас Лэскерэ сиклярдэ тай бут авэра мануша.
LUK 7:12 Кана Ов пашолас ки бар ки дизаки, андар латэ никалэнас мулэс, чявэс, саво сас екх ки дай, ай ой сас пхивли. Екхетханэ ласа андар диз никлёлас бут дюняс.
LUK 7:13 Кана о Сагбус дикхляс адалэ джювля, Ов аяды ла. — Ма ров, — пхэнляс Ов лаки.
LUK 7:14 Дэчи Ов пашыло тай колисаило ко гробос. Одола, кон гелэнас лэс, тэрдилэ, тай о Исус пхэнляс: — Тэрнагара, пхэнав туки: ущи!
LUK 7:15 О муло бэшло тай лиляс тэ зборизэл, тай о Исус диняс лэс ки дай.
LUK 7:16 Алаен, кон отхэ сас, лиляс траш, тай о мануша махтадиенас э Дэвлэс: — Баро прароки уло машкарэ амэндэ! О Дэл ало Пэ дюнястэ!
LUK 7:17 О зборэс катар Исус шунлилэ алаи ко Иудея тай агорял лаки пхуендэ.
LUK 7:18 О сиклярдэ э Иоаннески пхукавдэ лэски алаестар, со уло. Тай дэчи о Иоанн диняс икос пэстэ дон андар лэндэ
LUK 7:19 тай бичялдяс лэн ко Сагбус тэ пхучен: — Ту сан Одова, Кон камэл тэ авэл, я амэнги тэ ишандияс кас-то аврэс?
LUK 7:20 О мурша алэ ко Исус тай пхэнлэ: — О Иоанн Болдимари бичялдяс амэн Тутэ тэ пхучяс: Ту сан Одова, Саво камэл тэ авэл, я амэнги тэ ишандияс кас-то аврэс?
LUK 7:21 О Исус сами адава вахыти аиндэрды бутэ манушэн катар дукха тай катар насвалипэ, тай катар джюнгалэ духя, тай бутэ корэн башлады дикхипэ.
LUK 7:22 Тай Ов пхэнляс э бичялдэнги: — Джян, пхукавэн э Иоаннески одолэстар, со тумэ дикхлянус тай со шунлянус: о корэ дикхен, о банге пхерэн, о гералэ шужон, о кашуке шунэн, о мулэ дживиндён тай э чёрэнги пхукавдёл Лошано Габэри.
LUK 7:23 Бахтало одова, кон андар Мандэ на кан джял опрал дром!
LUK 7:24 Кана о бичялдэ э Иоаннески гелэ, о Исус лиляс тэ пхэнэл э дюняски катар Иоанн: — Со тумэ гелянусас тэ дикхен ки ливади? Карин камышы, кай кхелавдёл катар балвал?
LUK 7:25 Дэчи со тумэ гелянусас тэ дикхен? Манушэс, урявдэс андэ багалыдэс савутя? На, одола, кон урявэн багалыдэс савутя тай бэшэн андэ барвалимастэ, си андэ патишаитика кхера.
LUK 7:26 Дэчи со тумэ пхерэнас тэ дикхен? Э прарокес? Ва, тай пхэнав тумэнги, кай баро, ниш прароки.
LUK 7:27 Ов одова, кастар яздимэ: «Аки, Мэ бичялав ангал Тутэ Мэ манушэс, саво кан гортярэл ангал Тутэ То дром».
LUK 7:28 Пхэнав тумэнги, машкарэ алаи, кай аракхлилэ джювлятар, нанай баро, ниш о Иоанн. Ами алаендар о тикно андэ Дэвлэско Патишайлыки — баро лэстар.
LUK 7:29 Тай алаи о дюняс, тай джи о кидимаря э налогенги, кай шунлэ о зборэс э Исусески, пакянилэ кай э Дэвлэско дром чячё, тай он лилэ о болдипэ э Иоаннеско.
LUK 7:30 О фарисея тай о сикляримаря э Тхэдимаски на манглэ, тэ лэн болдипэ лэстар, динэ бутуря э Дэвлэско мангипэ.
LUK 7:31 — Каса дэчи Манги тэ ушатэрдияв э манушэн адалэ вахытескерэн? — пхэнэлас о Исус. — Каски он ушадиен?
LUK 7:32 Он сар пуя, савэ бэшлэ ко майдани тай дэн бэбэря екх аврэски: «Амэ марасас тумэнги опэр дурули, ай тумэ на кхелэнас. Амэ дасас паромаски гиля, ай тумэ на ровэнас».
LUK 7:33 Дикхен, аки ало о Иоанн о Болдимари, на хал манро тай на пиел винас, тай тумэ пхэнэн: «Андэ лэстэ шэйтани»
LUK 7:34 Ало о Чяво о Манушыкано, хал тай пиел, тай тумэ пхэнэн: «Аки о хавджяло тай о матимари, о амал э кидимаренго э налогенгерэнго тай э бэзялэнго».
LUK 7:35 Алаи о пуя э годявэримаски сикавэн, кай о годявэрипэ си чячё.
LUK 7:36 Екх андар фарисея диняс икос э Исусес пэстэ тэ хал. О Исус ало лэстэ андэ кхер тай лиляс тхан пал конас.
LUK 7:37 Адава вахыти екх джювли андар адалэ дизатэ, савя джянэнас, сар бэзяля, галили, кай о Исус хал андэ кхер ко фарисеи, андяс алебастрови кхоро, андэ савэстэ сас бут багалыс духыс.
LUK 7:38 Э джювли тэрдили палал ко чянга ки Исусески тай, ровэлас, чёрэлас Лэски пинрэндэ ався. Ой лиляс тэ кхосэл Лэски пинрэ пэ балэнца, чюмидэлас лэн тай макхелас духыса.
LUK 7:39 Кана о фарисеи, саво диняс икос э Исусес, дикхляс адава, ов тюшунды: «Тэ овэл би Адава Мануш чячес прароки, Ов би джянэлас, кай э джювли, сави Лэстэ колизэл, — бэзяли».
LUK 7:40 Дэчи о Исус пхэнляс лэски: — Симон, Мэ мангав туки со-то тэ пхэнав. — Пхэн, Сикляримарина, — пхэнляс ов.
LUK 7:41 — Дуй мануша сас борджи екхе манушэски, — пхэнэлас о Исус. — О екх сас борджи панджшэл динаря, ай авэр — пэинда.
LUK 7:42 Ли э екхески, ли аврэски на сас соса тэ дэн о борджи, тай мукляс о борджи лэнги э донги. Кон андар лэндэ, ту тюшундиес, кан дэхэл лэс бут?
LUK 7:43 О Симон пхэнляс: — Мэ тюшундияв, одова, каски сас мукло о баро борджи. — Ту чячи тюшундын, — пхэнляс о Исус.
LUK 7:44 Тай болдиняспэс ки джювли, пхэнляс э Симонэски: — Ту дикхес адалэ джювля? Мэ алём андэ тэ кхерэстэ, тай ту на динян Ман джи пани, тэ халярав Мэ пинрэ, ай ой халярдяс Мэ пинрэ авсенца тай кхосляс пэ балэнца!
LUK 7:45 Ту джи на чюмидын Ман, кана дикхлян, ай адая джювли одолэ вахытестар, сар Мэ алём андэ кхер, на тэрдёл тэ чюмидэл Мэ пинрэ.
LUK 7:46 Ту на макхлян Манги Мо шэро олияса, ай ой макхляс багалыс духыса Мэ пинрэ.
LUK 7:47 Оничин Мэ пхэнав туки: лаки муклилэ бут бэзя, андар адалэстэ ой дэхляс лачес. Ай одова, савэски залаг муклило, дэхэл залаг.
LUK 7:48 Оничин пхэнляс о Исус э джювляки: — Тэ бэзя муклэ си.
LUK 7:49 Ай авэра мануша, кай сас Лэса пал конас, лилэ тэ тюшундиен: «Кон Ов асавко, кай джи о бэзя мукел?»
LUK 7:50 О Исус пхэнляс э джювляки: — То пакяпэ кутарды тут, джя лачимаса.
LUK 8:1 Пал атхэ о Исус пхерэлас андар диз андэ диз, андар гав андэ гав, пхукавэлас Лошано Габэри катар Дэвлэско Патишайлыки. Лэса сас о дэшудуй апостоля,
LUK 8:2 тай сарсавэ джювля, савэ сас аиндимэна катар джюнгалэ духя тай катар дукха: э Мария, кай бучёлас Магдалина, андар савятэ никлистэ эфта шэйтаня,
LUK 8:3 э Иоанна, э ромни э Хузаски, саво дикхел пал ко кхер ки Иродеско, э Сусанна тай бут авэра. Адала джювля керэнас ярдыми э Исусески тай Лэски сиклярдэнги андар одолэстэ, со сас лэндэ.
LUK 8:4 Ко Исус генэ авэнас мануша андар бутэ дизэндэ. Тай кана кидиняспэс бут дюняс, Ов пхукавдяс лэнги пхукаипэ:
LUK 8:5 — О мануш никлисто тэ чел андэ пху о гив. Тай кана ов чёрэлас лэс, сарсаво гив пэло паш ко дром, тай сас таптадимэ тай чюкудимэ э чирикленца.
LUK 8:6 Авэра пэлэ опрэ баруно тхан, тай, сар никлистэ, о ирнэкя шукилэ, кай на рэсэлас пани.
LUK 8:7 Авэра пэлэ андэ хлядя, тай кана о хлядя барилэ, пханлэ лэн.
LUK 8:8 Авэра пэлэ опэр лачи пху. Он никлистэ тай динэ шэлвар бут гив одолэстар, кай сас чито андэ пху. Пхукавдяс адава, о Исус лачес пхэнляс: — Кастэ си кана, тэ шунэн, мэ шунэл!
LUK 8:9 Кана о сиклярдэ пхучлэ, состар адава пхукаипэ,
LUK 8:10 о Исус пхэнляс: — Тумэнги дино, тэ джянэн о гараипэ э Дэвлэски Патишайлыкеско, ай аврэнги алаи ачёл пхукаипэ, саво он на галён, «тэ дикхен, ай на дикхен, тэ шунэн, ай на галён».
LUK 8:11 Аки, со си адава пхукаипэ: гив — адава си э Дэвлэски збора.
LUK 8:12 Гив, кай пэло паш ко дром, — адава одола, кон шунэн э збора, ай дэчи авэл о Шэйтани тай чёрэл э збора андар лэнги илэндэ, тэ на пакян он тай тэ на овэн кутардимэна.
LUK 8:13 Гив, кай пэло опэр бар, — адава си одола, кон лошаса лэл э збора, кана шунэл ла. Ай лэндэ нанай корини. Ханик он пакян, ай кана авэл о вахыти о пхаро, он дурён.
LUK 8:14 Гив, кай пэло андэ хлядя, — адава си одола мануша, савэ шунэн э збора, ай вахытестар кажындесенги касэвэтя, барвалипэ тай соса манген тэ чялён, дурярэл лэн, тай о имишы лэнго на барёл.
LUK 8:15 Гив, кай пэло опэр лачи пху, — адава о мануша, савэ шунэн э збора, гаравэн ла андэ лачё тай андэ шужо ило тай анэн имиша андар одолэстэ, кай сас зоралэ андэ пакяпэ.
LUK 8:16 Никхон э тхарди лампа на тхэл тал какаи я тал кравати, ами тхэн опэр падставка, кон авэл тэ дикхел о ярэки.
LUK 8:17 Нанай ништо тэныки, со на овэлас би сикавдо, тай нанай ништо гаравдо, со на овэлас би джянло тай на никлисто аври.
LUK 8:18 Тай дикхен лачес, сар тумэ шунэн, вай кастэ си, одолэс кан овэл дино генэ, тай кастэ нанай, кан овэл линдо ли одова, со, сар лэски фаизэл, лэстэ си.
LUK 8:19 Ко Исус алэ Лэски дай тай о пхрала, тай андар бут дюняс нащи пашылэ Лэстэ.
LUK 8:20 Кон-то Лэски пхэнляс: — Ти дай тай Тэ пхрала тэрдэ аври тай манген Тут тэ дикхен.
LUK 8:21 О Исус пхэнляс лэнги: — Ми дай тай Мэ пхрала — одола, кон шунэл збора э Дэвлэски тай керэл ла.
LUK 8:22 Екхвар о Исус пхэнляс Пэ сиклярдэнги: — Кан накхас околэ ригатэ ки панеско. Он бэшлэ андэ лодка тай динэ джялдави.
LUK 8:23 Бискай он накхенас о пани, о Исус суто. Бирдэн опэр пани ваздиндили бари балвал, тай э лодка лиляс тэ учярэл о пани, аякха, кай он улэ андэ хатастэ.
LUK 8:24 Дэчи о сиклярдэ пашылэ ко Исус тай джянгавдэ Лэс, тай пхэнлэ: — Сикляримарина, Сикляримари, амэ бугулдияс! Тай джянгавдило о Исус тай тхэдяс тэ тэрдёл э балвал, тай о пани. Тай тэрдилэ э балвал тай о пани, тай уло тэныки.
LUK 8:25 — Кай тумаро пакяпэ? — пхэнляс о Исус э сиклярдэнги. Он трашанилэ тай шаштимэна пхученас екх аврэстар: — Кон Ов, кай джи э балвалянги тай э панески пхэнэл, тай тхэн кан Лэс?
LUK 8:26 Он алэ андэ пху ки герасиненги, кай мамуй ки Галилея.
LUK 8:27 Кана о Исус никлисто андар лодка ки пху, Лэстэ мамуй никлисто мануш андар диз, андэ лэстэ сас шэйтаня. Опэр лэстэ чёктан на сас савутя, тай бэшэлас ов на андэ кхерэстэ, ами андэ склепя.
LUK 8:28 Кана ов дикхляс э Исусес, ов читяспэс Лэски чянгендэ тай диняс бэбэря алаи пэ сэсеса: — Со Ту мандар мангес, Исус, Чяво Уче Дэвлэско? Мангав Тут, ма кхиняр ман!
LUK 8:29 — вай о Исус пхэнляс э бишужэ духоски тэ никлёл андар адалэ манушэстэ. О шэйтани екхараи джялас андэ адалэ манушэстэ, тай дэчи, джи кана лэс пхандэнас джянджирэнца о васта тай о чянга тай дикхенас пал лэстэ, ов чинэлас о джянджира, тай о шэйтани кувдиелас лэс ки биманушэнги тхана.
LUK 8:30 О Исус пхучляс лэс: — Сар си то нав? — Легион, — пхэнляс одова, вай андэ лэстэ гелэ бут шэйтаня.
LUK 8:31 Тай он мангенас э Исусес тэ на бичялэл лэн андэ бездна.
LUK 8:32 Надур паш ко горас адава вахыти чярявэнаспэс бут чёчкадэс, тай о шэйтаня манглэ э Исусес тэ мукел лэн тэ джян андэ лэндэ. Ов мукляс.
LUK 8:33 Кана о шэйтаня никлистэ андар адалэ манушэстэ тай гелэ андэ чёчкадэс, алаи о чёчкадэс читэпэс опрал горас андэ пани, тай бугулдылар.
LUK 8:34 О чёбаня э чёчкадэнги дикхлэ, со уло, прастанилэ тай пхукавдэ алаестар андэ диз тай агорял.
LUK 8:35 Кидинэпэс мануша тэ дикхен, со уло. Пашылэ ко Исус, он дикхлэ, кай о мануш, андар савэстэ никлистэ о шэйтаня, бэшло ко чянга ки Исусески, урявдо тай годявэр, тай трашанилэ.
LUK 8:36 Савэ дикхлэ, пхукавдэ лэнги одолэстар, сар сас аиндимэ андэ савэстэ сас шэйтаня.
LUK 8:37 Дэчи алаи, кон бэшэл андэ Герасински пху, лилэ тэ манген э Исусес тэ джял лэнги тханэндар, вай лачес трашанилэ. О Исус бэшло андэ лодка тай ало палэ.
LUK 8:38 О мануш, андар савэстэ никлистэ о шэйтаня, мангелас, тэ лэл лэс Пэса, ай о Исус бичялдяс лэс тай пхэнляс:
LUK 8:39 — Джя палэ кхерэ тай пхукав, со кердяс туки о Дэл. Одова гело, тай пхукавэлас алаи андэ диз одолэстар, со кердяс лэски о Исус.
LUK 8:40 Кана о Исус ало палэ, Лэс дэнас сэлями бут дюняс, вай алаи ишандиенас Лэс.
LUK 8:41 Лэстэ пашыло мануш, о нав савэско Иаир, саво сас баро мануш андэ синагога, тай пэло Лэски чянгендэ, лиляс тэ мангел э Исусес, тэ авэл лэстэ кхерэ:
LUK 8:42 лэстэ сас екх чяй, савяки сас паш ко дэшудуй брэш, мэрэлас. О Исус гело отхэ машкарэ ко бут дюняс, савэ тасавэнас Лэс алаи катар рига.
LUK 8:43 Андэ дюняс сас джювли, дэшудуй брэш латэ чёрдёлас рат. Ой тхэдяс опэр врачя алаи, со сас латэ, ай никхон нащи ла аиндэрды.
LUK 8:44 Ой пашыли палал ко Исус тай колисаили ко чети Лэски опрунэ савутендэ. Тай бирдэн тэрдило о рат.
LUK 8:45 — Кон Мандэ колисаило? — пхучляс о Исус. Никхон на пхукавэласпэс, тай о Пётар пхэнляс: — Сикляримарина, агорял Тутэ бут дюняс та дэн бутуря алаи катар рига!
LUK 8:46 Ай о Исус пхэнляс: — Кон-то Мандэ колисаило. Мэ тэнеса галилём, сар андар Мандэ никлисти зор.
LUK 8:47 Дэчи э джювли галили, кай нащи гаравдяспэс, пашыли, изравни, тай пэли ангал Исус. Ангал алаи ко дюняс ой пхукавдяс, соски ой Лэстэ колисаили тай сар бирдэн сас аиндимэ.
LUK 8:48 Дэчи о Исус пхэнляс лаки: — Ми чяй, то пакяпэ аиндэрды тут. Джя лачимаса.
LUK 8:49 О Исус дага на бытэрды тэ зборизэл, кай ало мануш андар кхер ки барэско э синагогакерэско. — Ти чяй мули, — пхэнляс ов, — ма кхиняр генэ э Сикляримарес.
LUK 8:50 Шунляс адава, о Исус пхэнляс э Иаирески: — Ма траша, екх пакя, тай э чяёри кан овэл кутардимэ.
LUK 8:51 Кана Ов диняс андэ кхер, на мукляс никхон, тэ дэл Лэса, екх э Пётарэс, э Иоаннес, э Яковес тай э дадэс э дэяса э чяёрякерэн.
LUK 8:52 О дюняс ровэнас тай гаулизэнас пал латэ. — Тэрдён тэ ровэн, — пхэнляс о Исус, — вай ой на мули, ами сути.
LUK 8:53 Он лилэ тэ асан Лэстар, вай джянэнас, кай э чяёри мули.
LUK 8:54 О Исус лиляс ла вастэстар тай пхэнляс: — Пуёс, ущи!
LUK 8:55 О духос э чяёряко ало палэ латэ, тай ой бирдэн ущини. О Исус пхэнляс, тэ дэн ла тэ хал.
LUK 8:56 О дад тай э дай сас шаштимэна, ай о Исус тхэдяс лэн никхаски тэ на пхукавэн одолэстар, со уло.
LUK 9:1 Кидиняс екхетханэ э дэшудон апостолен, о Исус диняс лэн зор тай барипэ, тэ кувдиен алаи э шэйтанен тай тэ аиндэрдиен о дукха.
LUK 9:2 Пал отхэ Ов бичялдяс лэн, тэ пхукавэн катар Дэвлэско Патишайлыки тай тэ аиндэрдиен э насвалэн,
LUK 9:3 пхэнляс лэнги: — Ништо ма лэн тумэнца ко дром: нэ ровли, нэ гоно, нэ манро, нэ ловэ, нэ дуйто савути.
LUK 9:4 Кана тумэ дэн андэ екх кхер, ачён отхэ, бискай на авэл вахыти тэ джян англэ.
LUK 9:5 Ай катэ о мануша тумэн на кан мукен, дэчи джян андар одолэ дизатэ, кактиен о прахос опрал тумарэ пинрэндэ, тай он адава мэ дикхен.
LUK 9:6 О апостоля гелэ ко дром, накхенас андар гава ко гава, пхукавэнас Лошано Габэри тай, кай сас, аиндэрдиенас э насвалэн.
LUK 9:7 Кана о сагбус-тетрархи Ирод шунляс адалэстар алаестар, ов на джянэлас, со тэ тюшундиел. Вай сарсавэ пхэнэнас, кай адава о Иоанн дживиндило андар мулэ,
LUK 9:8 авэра — кай ало о Илия, май авэра — кай дживиндило екх андар пуранэ прарокя.
LUK 9:9 О Ирод пхэнляс: — Э Иоаннески о шэро мэ чиндём, кон эси адава мануш, кастар манги пхукавэн? Тай родэлас тэ дикхел э Исусес.
LUK 9:10 О апостоля алэ тай пхукавдэ э Исусески алаестар, со он кердэ. Дэчи Ов лиляс лэн Пэса, тай он гелэ коркорэ ки диз, кай бучёлас Вифсаида.
LUK 9:11 О бут дюняс галилэ адалэстар тай гелэ пал Исус. Ов лошаса лэн лиляс тай пхэнэлас лэнги катар Дэвлэско Патишайлыки, тай генэ аиндэрдиелас одолэн, каски камэлас.
LUK 9:12 О дес пашолас ки бэлвэль, тай о дэшудуй апостоля пашылэ ко Исус тай пхэнлэ: — Мук э дюняс, тэ джян он агорял ко диза тай андэ гава, тай тэ аракхен пэски, кай тэ совэн тай тэ хан, вай амэ атхэ сам ки ливадяко тхан.
LUK 9:13 О Исус пхэнляс: — Тумэ дэн лэн тэ хан. Он пхэнлэ: — Ва вай амэндэ самой пандж манрэ тай дуй маче. Та со, амэнги тэ джяс, тэ кинас хапэ алаи адалэ манушэнги?
LUK 9:14 Отхэ сас паш ко пандж биня мурша. Ай о Исус пхэнляс э сиклярдэнги: — Бэшавэн э манушэн по пэинда.
LUK 9:15 О сиклярдэ аякха да кердэ. Кана алаи бэшлэ,
LUK 9:16 о Исус лиляс пандж манрэ тай дуй маче, ваздиняс Пэ якха опрэ тай алгышты о хапэ. Дэчи Ов лиляс тэ пхагерэл о манро тай о мачё, тай диняс лэн ко сиклярдэ, одола тэ дагытиен ко дюняс.
LUK 9:17 Алаи ханас тай чялилэ, тай ли кидинэ котора дэшудуй сэпэтя.
LUK 9:18 Екхвар, кана о Исус зборизэлас коркоро э Дэвлэса, тай надур Лэстар сас о сиклярдэ, Ов пхучляс лэн: — Сар кас гинэл Ман о дюняс?
LUK 9:19 Он пхэнлэ: — О Иоанн о Болдимари; авэра — о Илия; ай сарсавэ пхэнэн, кай о екх андар авэра пуранэ прарокя дживиндило.
LUK 9:20 — Ами тумэ кас гинэн Ман? — пхучляс лэндар о Исус. — О Христос э Дэвлэско, — пхэнляс о Пётар.
LUK 9:21 Ай о Исус пхэнляс лэнги, никхаски тэ на пхэнэн адалэстар,
LUK 9:22 дэчи пхэнляс: — Э Чявэски э Манушыканэски камэл бут тэ сидэл касэвэти, тай тэ болдэнпэс Лэстар о барэ мануша, о барэ попазя тай о сикляримаря э Тхэдимаски. Ов кан овэл мудардо, ко трито дес кан дживиндёл.
LUK 9:23 Дэчи о Исус пхэнляс алаенги: — Кон мангел тэ джял пал Мандэ, мэ болдэлпэс пэстар, тай кажын дес лэл по хачи. Дэчи мэ джял пал Мандэ.
LUK 9:24 Вай одова, кон мангел тэ гаравэл по бэшыпэ, кан нашавэл лэс, ай кон кан нашавэл по бэшыпэ булуб Манги, одова кан кутардиел лэс.
LUK 9:25 Вай со файдас э манушэски, ов тэ лэла алаи о дюняс, ай ов кан нашавэл по бэшыпэ я кан керэл пэски джюнгалипэ?
LUK 9:26 Кон кан ладжял Мандар тай Мэ зборэндар, одолэстар кан ладжял ли о Чяво о Манушыкано, кана кан авэл андэ Пэ наместэ тай андэ нами ки Дадэско тай э шужэ миляикенго.
LUK 9:27 Пхэнав тумэнги чячес: сарсавэ андар тумэндэ, кай тэрдэ атхэ, на кан мэрэн, бискай на дикхен э Дэвлэско Патишайлыки.
LUK 9:28 Накхло паш ко охто дес пал адалэ зборэндэ. О Исус лиляс Пэса э Пётарэс, э Иоаннес тай э Яковес, ваздиняспэс опрэ горас, тэ зборизэл э Дэвлэса.
LUK 9:29 О вахыти, кана зборизэлас э Дэвлэса, Лэско муй паровдило, ай о савутя улэ бут парнэ, сар страпи.
LUK 9:30 Тай аки, улэ дуй мануша тай лилэ тэ зборизэн э Исусеса, — адала сас о Маисей тай о Илия.
LUK 9:31 Алэ андэ нами, он пхэнэнас Лэски одолэстар, кай Ов камэл тэ джял андэ Иерусалими тай отхар тэ ачявэл адава дюняс.
LUK 9:32 Ай э Пётарэс тай околэн, кон сас екхетханэ лэса, лиляс соипэ. Ай кана он джянгавдилэ, дикхлэ о нами э Исусеско тай э до муршэнго, кай тэрдэ сас пашэ Лэстэ.
LUK 9:33 Кана о мурша лилэ тэ джян, о Пётар пхэнляс э Исусески: — Сикляримарина, амэнги атхэ аякха лачё! Эла, амэ керас трин шалаша, екх Туки, екх э Маисеески тай екх э Илияски. Ов сам на джянэлас, со пхэнэл.
LUK 9:34 Кана ов дага пхэнэлас, сикавдило булути тай пханляс лэн. Кай улэ андэ булути, он бут трашанилэ.
LUK 9:35 Ай андар булути шунлило сэси: — Адава Мо Чяво, Савэс Мэ тхэдём. Лэс шунэн!
LUK 9:36 Кана о сэси тэныкисаило, он дикхлэ э Исусес коркорэс. Он на зборизэнас адалэстар тай одова вахыти никхаски на пхукавэнас одолэстар, со дикхлэ.
LUK 9:37 Авэр дес, кана он фулистинэ опрал горас, э Исусес ишандиелас бут дюняс.
LUK 9:38 Тай екх мануш андар дюняс диняс бэбэря: — Сикляримарина, мангав Тут, дикх мэ чявэс! Ов мандэ екх.
LUK 9:39 Овэл, лэс лэл о духос, тай дэчи о чяворо бирдэн лэл тэ дэл бэбэря, лэс лэл изравни, аякха, кай лэстэ андар муй джял кубукя. О духос кхинярэл лэс тай пхарэс мукел лэс.
LUK 9:40 Мэ манглём Тэ сиклярдэн тэ кувдиен лэс, ай он нащи.
LUK 9:41 — Бипакяки тай аравдо о дюняс адалэ вахытеско, — пхэнляс о Исус. — Сокабор Манги генэ тэ овав тумэнца тай тэ даяндияв тумэн? Ан тэ чявэс атхэ.
LUK 9:42 Кана о чяворо дага джялас, о шэйтани читяс лэс ки пху андэ израипэ. Ай о Исус пхэнляс зораса э бишужэ духоски тэ никлёл, аиндэрды э чяворэс, тай пал отхэ диняс лэс ко дад.
LUK 9:43 Алаи сас шаштимэна э баримаса э Дэвлэскерэса. Алаи шаштиенас адалэ дилэнги. О Исус пхэнляс Пэ сиклярдэнги:
LUK 9:44 — Шунэн лачес, со Мэ кан пхэнав тумэнги анкха: генэ залаг, тай э Чявэс э Манушыканэс кан дэн андэ васта ки манушэнги.
LUK 9:45 Ай он на галилэ, со Ов пхэнляс, лэндар адава сас гаравдо, ай тэ пхучен, со си Лэски збора, трашанас.
LUK 9:46 Машкарэ ко сиклярдэ уло ирищима одолэстар, кон андар лэндэ си баро.
LUK 9:47 О Исус джянэлас, состар тюшундиен он андэ пумарэ илэндэ, лиляс тикнорэ пуёс тай тхэдяс лэс паш Пэстэ.
LUK 9:48 — Кон булуб Манги гинэл акасавке пуёс, — пхэнляс о Исус, — одова гинэл ли Ман, ай кон гинэл Ман, одова гинэл ли одолэс, кон бичялдяс Ман. Кон машкарэ тумэндэ тикно алаендар, одова даси баро.
LUK 9:49 О Иоанн пхэнляс Лэски: — Сикляримарина! Амэ дикхлям манушэс, саво Тэ навэса кувдиелас э шэйтанен, тай амэ тэрдярдям лэс, вай ов на джял пал Тутэ екхетханэ амэнца.
LUK 9:50 — Ма тэрдярэн, — пхэнляс о Исус. — Кон нанай мамуй тумэндэ, одова си андар тумэндэ.
LUK 9:51 Кана э Исусески ало вахыти тэ овэл линдо опрэ, Ов гело ко Иерусалими.
LUK 9:52 Ангал Пэстэ Ов бичялдяс манушэн, тай одола гелэ андэ екх самарянски диз, тэ гортярэн алаи, бискай Ов авэл.
LUK 9:53 Ай о мануша одолэ гавэски на муклэ э Исусес, кай Ов джялас ко Иерусалими.
LUK 9:54 Дикхлэ адава, Лэскерэ сиклярдэ о Яков тай Иоанн пхэнлэ: — Сагбуса, мангес, амэ кан пхэнас э ягаки, тэ авэл опрал тай алаен лэн тэ тхарэл?
LUK 9:55 Ай о Исус болдиняспэс, тэрдярдяс лэн. Тай он гелэ андэ аврэ дизатэ.
LUK 9:57 Кана он джянас опрэ дром, екх мануш пхэнляс э Исусески: — Мэ кан джяв пал Тутэ, кай би Ту тэ на джяс.
LUK 9:58 О Исус пхэнляс: — Ко лисицэс си холя, ли ко чирикля опрунэндэ си гнездадэс, ай э Чявэски э Манушыканэски нанай кай По шэро тэ бангярэл.
LUK 9:59 Аврэ манушэски о Исус пхэнляс: — Эла пал Мандэ. Ай одова пхэнляс: — Сагбуса, мук ман ханик тэ джяв тэ пароскерав мэ дадэс.
LUK 9:60 — Мук о мулэ он сам пароскерэн пумарэ мулэн, ай ту джя, пхукав э Дэвлэско Патишайлыки, — пхэнляс лэски о Исус.
LUK 9:61 Генэ екх мануш пхэнляс Лэски: — Мэ кан джяв пал Тутэ, Сагбуса, ай мук ман ханик тэ джяв тай тэ дикхав генэ екхвар мэ хорандас.
LUK 9:62 О Исус пхэнляс: — Били екх мануш, саво тхэдяс васт опэр плуги тай дикхел палэ, на камэл э Дэвлэски Патишайлыкески.
LUK 10:1 Пал отхэ о Сагбус тхэдяс генэ эфтадэша сиклярдэн тай бичялдяс лэн по дон ангал Пэстэ андэ кажни дизатэ тай андэ кажни тханэстэ, кай Ов Сам кидэласпэс тэ авэл.
LUK 10:2 Ов пхэнляс лэнги: — Бут гив си, тэ кидэн, ай о бутярнэ си залаг. Оничин манген э Сагбус э гивэскерэс, Ов тэ бичялэл бутярнэн тэ кидэн Лэско гив.
LUK 10:3 Джян! Аки, Мэ бичялав тумэн, сар бакрэн ко рува.
LUK 10:4 Ма лэн тумэнца нэ киси, нэ гоно, нэ минидэс тай опэр дром никхас ма дэн сэлями.
LUK 10:5 Кана тумэ кан дэн андэ кхер, пхэнэн ханик: «Сэлями адалэ кхерэски».
LUK 10:6 Андэ одолэ кхерэстэ тэ бэшэл мануш сэлямеско, тумаро сэлями кан овэл опэр лэстэ, ай тэ на, ов кан авэл палэ тумэндэ.
LUK 10:7 Ачён андэ адалэ кхерэстэ, хан, пиен одова, со тумэн кан дэн, вай о бутярно керэл пэ ловэ. Тай ма пхерэн катар кхер андэ кхер.
LUK 10:8 Тумэ тэ дэна андэ диз тай тумэн кан мукен, хан алаи, со тумэн кан дэн,
LUK 10:9 аиндэрдиен лэнги насвалэн, савэ отхэ си, тай пхэнэн лэнги: «О Патишайлыки э Дэвлэско пашыло тумэндэ».
LUK 10:10 Ай тэ дэна андэ савэ-то дизатэ тай отхэ тумэн на мукен, джян о улицэс адалэ дизаки тай пхэнэн:
LUK 10:11 «Джи о прахос тумарэ дизако, кай колисаило амарэ пинрэндэ, амэ кактияс опэр тумэндэ. Ай тэ джянэн: о Патишайлыки э Дэвлэско пашэ!»
LUK 10:12 Пхэнав тумэнги, кай одова дес э Садомески кан овэл локес, ниш адалэ дизаки.
LUK 10:13 Касэвэти туки, Хоразин! Касэвэти туки, Вифсаидо! Вай андэ Тир тай андэ Сидон тэ овэлас кердэ одола чюдэс, со тумэндэ, он би чёктан урявэнас гонэ тай бэшэнас андэ прахос катар яг, тай ачявэнас пумарэ бэзя.
LUK 10:14 Ай э Тирески тай э Сидонески кан овэл локо ко цындос, ниш тумэнги.
LUK 10:15 Ли ту, Капернаум, тюшундиес, кай кан овэс ваздино джи опрэ? На, ту кан овэс чито андэ ади.
LUK 10:16 Кон шунэл тумэн, шунэл Ман, тай кон болдэлпэс тумэндар, болдэлпэс Мандар. Ай кон болдэлпэс Мандар, болдэлпэс Одолэстар, Кон бичялдяс Ман.
LUK 10:17 Эфтадэша сиклярдэ алэ палэ ко Исус лошанэ: — Сагбуса, — пхэнэнас он, — джи о шэйтаня тхэн кан амэн, кана амэ пхэнас лэнги Тэ навэса!
LUK 10:18 О Исус пхэнляс: — Мэ дикхлём, сар о Сатанас пэло опрал, сар страпи!
LUK 10:19 Аки, Мэ динём тумэн барипэ тэ ущявэн опэр сапа тай опэр скарпионя, тай тэ пхагерэн алаи э зор э душманески. Тай ништо на кан анэл тумэнги джюнгалипэ.
LUK 10:20 Ай лошазэн на одолэски, кай о духя тумэн шунэн, ами одолэски, кай тумарэ нава яздимэна опрэ.
LUK 10:21 Одова сагати о Исус лошасаило андэ Шужо Духос тай пхэнляс: — Мэ махтадияв Тут, Дадэ, Сагбуса опрунэско тай э пхуяко, андар одолэстэ, кай Ту гаравдян адава катар годявэра тай катар галярдэ, ай пхутэрдян адава пуенги. Ва, Дадэ, аякха Ту манглян!
LUK 10:22 О Дад диняс Ман алаи. Никхон на джянэл, кон си о Чяво, екх о Дад, тай никхон на джянэл, кон си о Дад, екх о Чяво тай одолэски, каски о Чяво кан мангел тэ пхутрэл адава.
LUK 10:23 Дэчи Ов болдиняспэс карин Пэ сиклярдэндэ тай пхэнляс екх лэнги: — Бахталэ якха, кай дикхен одова, со тумэ дикхен.
LUK 10:24 Пхэнав тумэнги, кай бут прарокя тай патишая манглэ тэ дикхен одова, со тумэ дикхен, ай на дикхлэ, манглэ тэ шунэн одова, со тумэ шунэн, ай на шунлэ.
LUK 10:25 Екх сикляримари э Тхэдимаско ущино тай пхучляс ко Исус, тэ астарэл Лэс. — Сикляримарина, — пхучляс ов, — со манги тэ керав, тэ овэл мандэ бибытимаско бэшыпэ?
LUK 10:26 — Ай со пхэнлёлпэс андэ Тхэдипэ? — пхучляс о Исус. — Со ту отхэ драпкерэс?
LUK 10:27 Одова пхэнляс: — Дэх э Сагбус, Дэвлэс тинрэс, алаи тэ илэса тай алаи тэ бэшымаса, алаи тэ зораса тай алаи тэ годяса, тай дэх тэ комшус, сар ту дэхэс тут.
LUK 10:28 — Чячи ту пхэнлян, — пхэнляс лэски о Исус. — Кер аякха, тай ли ту кан бэшэс.
LUK 10:29 Ай ов мангляс тэ сикавэл по чячипэ тай пхучляс э Исусес: — Ай кон манги о комшус?
LUK 10:30 О Исус пхэнляс лэски: — Екх мануш авэлас андар Иерусалими андэ Иерихони. Опэр дром опэр лэстэ пэлэ прахаря, савэ нангярдэ лэс, мардэ аякха лачес, кай сас опэр мэримастэ, тай гелэ.
LUK 10:31 Уло аякха, одолэ дромэстар накхелас попази, дикхляс адалэ манушэс тай накхло пашал аврэ ригатар ки дромэско.
LUK 10:32 Аякха кердяс ли о левити: пашыло одолэ тханэстэ, дикхляс э мардэс тай накхло пашал лэстэ.
LUK 10:33 Ай аки одолэ тханэстэ, катэ ов пашло, пашыло кай накхелас пашал самаряни. Ов дикхляс тай аяды лэс.
LUK 10:34 Ов пашыло, халярдяс лэски дукхавнэ тхана олияса тай винаса, тай пханляс лэн. Дэчи ов бэшавдяс э мардэс опэр пэ джёрэстэ, андяс лэс андэ гастиница тай отхэ генэ дикхелас пал лэстэ.
LUK 10:35 Авэр дес ов диняс э сагбус э гастиницакерэс дуй динаря тай пхэнляс: «Дикх пал лэстэ, ай тэ тхэса бут, мэ кан дав тут, кана кан авав».
LUK 10:36 Кон андар адалэ тринэндэ сас, сар тюшундиес, комшус э манушэски, савэс мардэ о прахаря?
LUK 10:37 О сикляримари э Тхэдимаско пхэнляс: — Одова, кон аяды лэс. Дэчи о Исус пхэнляс лэски: — Джя тай кер ли ту аякха.
LUK 10:38 Опэр дром о Исус э сиклярдэнца ало андэ екхе дизатэ. Отхэ джювли, кай бучёлас Марфа, диняс икос Лэс андэ пэ кхерэстэ.
LUK 10:39 Латэ сас пхэн, сави бучёлас Мария. Э Мария бэшли сас ко пинрэ ки Сагбуски тай шунэлас, со Ов пхэнэлас.
LUK 10:40 Э Марфа сас андэ хэзмэти ки таимаско. Ой пашыли ко Исус тай пхэнляс: — Сагбуса, Туки нанай дила одолэстэ, кай ми пхэн ачявдяс алаи о хэзмэти опэр мандэ коркорятэ? Пхэн лаки, тэ керэл ярдыми манги!
LUK 10:41 — Марфо, Марфо, — пхэнляс о Сагбус, — ту касэвэти керэс бутэски,
LUK 10:42 ай камэл вай екх. Э Мария кердяс зиядэ, тай адава латар на кан линдёл.
LUK 11:1 Екхвар о Исус пхэнэлас э Дэвлэски, тай кана Ов бытэрды, екх андар сиклярдэ мангляс Лэс: — Сагбуса, сикляр амэн, со тэ пхэнас э Дэвлэски, сар о Иоанн сиклярдяс пэ сиклярдэн.
LUK 11:2 Ов пхэнляс лэнги: — Кана пхэнэн э Дэвлэски, пхэнэн акаякха: Дадэ, кажни мэ гинэл То шужо нав! Мэ авэл То Патишайлыки!
LUK 11:3 Дэ амэн кажын дес амаро авдесутно манро.
LUK 11:4 Тай апувикер амарэ бэзя, вай ли амэ апувикерас кажнески, кон амэнги борджи. Ма дэ амэн тэ джяс катар дром.
LUK 11:5 Дэчи о Исус пхэнляс лэнги: — Тюшундиен, екх андар тумэндэ кан авэл рати пэ амалэстэ тай кан пхэнэл: «Амал, дэ борджи ман трин питэс.
LUK 11:6 Мандэ опрал дром ало амал, тай мандэ ништо нанай лэс тэ дав».
LUK 11:7 Ай одова, сас андэ кхер, кан пхэнэл: «Ма лищие мандэ. О удар вай пханло, о пуя минрэ манца андэ тхан, нащи мэ анкха тэ ущяв тай тэ дав тут манро».
LUK 11:8 Пхэнав тумэнги, кай джи ов тэ на ущела тай тэ на дэл лэс, сар амалэс, ов кан ущел тай кан дэл лэс, сокабор камэл, кай одова на тэрдёл тэ мангел.
LUK 11:9 Оничин Мэ пхэнав тумэнги: манген — тай о Дэл тумэн кан дэл, родэн — тай кан аракхен, марэн — тай о Дэл тумэнги кан пхутрэл.
LUK 11:10 Вай кажни, кон мангел, одова диндёл, кон родэл, одова аракхел, тай одолэски, кон марэл, о Дэл пхутрэл.
LUK 11:11 Си машкарэ тумэндэ асавко дад, саво кан дэл пэ чявэс сапэс, кана кан мангел лэстэ мачес?
LUK 11:12 Я одова тэ мангела ванро, кан дэл лэс скарпионес?
LUK 11:13 Тай тумэ, кана холямэна, галён тэ дэн тумарэ пуен лачипэ, тай май зиядэ опрал о Дад кан дэл э Шужэ Духос одолэн, кон мангел Лэстэ!
LUK 11:14 Екхвар о Исус кувды э шэйтанес э сакавимаскерэс. Тай кана о шэйтани никлисто, о мануш, саво сас сакави, зборисаило. О мануша шаштиенас.
LUK 11:15 Ай сарсавэ пхэнэнас: — Ов кувдиел э шэйтанен э Веельзевулески зораса, о баро опэр бишужэ.
LUK 11:16 Авэра зумавэнас э Исусес тай мангенас, тэ сикавэл лэнги чюда опрал.
LUK 11:17 Ай о Исус джянэлас, со тюшундиен, пхэнляс лэнги: — Вэрсаво патишайлыки, кай паляштыпэс, кан овэл чючё, тай о кхер, катэ си чингара, кан хурдёл.
LUK 11:18 Тай о Сатанас тэ марэлпэс мамуй пэстэ, сар кан тэрдёл лэско патишайлыки? Ай тумэ пхэнэн, кай Мэ кувдияв э шэйтанен э Веельзевулески зораса.
LUK 11:19 Мэ тэ кувдияв э шэйтанен э Веельзевулески зораса, дэчи со зораса кувдиен лэн тумарэ чявэ? Оничин он кан керэн тумэнги цындос.
LUK 11:20 Ай Мэ тэ кувдияв э шэйтанен э Дэвлэски наеса, адава сикавэл, кай о Патишайлыки э Дэвлэско ало тумэндэ.
LUK 11:21 Кана о зорало бутэ мултукенца мануш дикхел пал пэ кхерэстэ, лэско мангин кан овэл састо.
LUK 11:22 Ай кон-то май зорало тэ пэрэла опэр лэстэ тай тэ марэла лэс, ов кан лэл о мултукя, савэнги ишандиелас о сагбус, тай кан палящиел, со лиляс.
LUK 11:23 Кон нанай Манца, одова си мамуй Мандэ, тай кон на кидэл Манца, одова чёрэл.
LUK 11:24 Кана о бишужо духос никлёл андар мануш, ов пхерэл ки бипаненги тхана, родэл тхан тэ рагантиел, тай на аракхел лэс. Дэчи ов пхэнэл: «Тэ джяв мэ андэ кхер, андар савэстэ никлистём».
LUK 11:25 Кана ов авэл палэ, аракхел о кхер шужэс шулавдо тай кидино.
LUK 11:26 Дэчи ов джял тай лэл эфта аврэ духен, май канлыдэн, ниш ов сам, тай он авэн тай бэшэн отхэ. Тай адава э манушэски май пхаро одолэстар, ниш кай сас буруни.
LUK 11:27 О Исус дага пхэнэлас, кана екх джювли андар дюняс диняс бэбэря: — Бахтали си одоя дай, кай пхеравэлас андэ пэстэ Тут тай хавдярдяс!
LUK 11:28 О Исус пхэнляс: — Бахталэ одола, кон шунэн э збора э Дэвлэски тай керэн ла.
LUK 11:29 Кана о мануша кидиндилэ май бут, о Исус лиляс тэ пхэнэл: — О дюняс адалэ вахытеско — канлыс. Ов родэл сикаипэ, ай лэски на кан овэл сикавдо нисаво сикаипэ, екх о сикаипэ э Ионеско.
LUK 11:30 Тай сар о Иона уло сикаипэ э дюняски, кай бэшэлас Ниневия, аякха о Чяво о Манушыкано кан овэл сикаипэ э дюняски адалэ вахытескерэски.
LUK 11:31 Э патишаинка катар юги кан дживиндёл ко цындос э дюняса адалэ вахытескерэса тай кан керэл цындос лэнги, вай ой али аврэ четестар ки дюняско тэ шунэл о годявэрипэ э Саламонеско. Ай анкха тумэнца Одова, Саво баро си катар Саламон.
LUK 11:32 О мануша, кай бэшэнас Ниневия, кан дживиндён ко цындос екхетханэ э дюняса адалэ вахытескерэса тай кан керэн лэн дошалэн, вай он ачявдэ пумарэ бэзя одолэстар, кай пхукавдяс лэнги о Иона. Ай анкха си тумэнца Одова, Саво баро катар Иона.
LUK 11:33 Никхон, тхарди лампа, на тхэл ла андэ погриби я тал кумани. Ами ла тхэн опэр падставка, кон авэл тэ дикхел о ярэки.
LUK 11:34 Ти якх си лампа тэ тэнески. Кана ти якх шужы, дэчи ли алаи то тэни пхэрдо ярэки. Ай кана джюнгали ти якх, дэчи алаи то тэни тэмина.
LUK 11:35 Дикх, одова ярэки, саво андэ тутэ, мэ на овэл тэмина.
LUK 11:36 Тэ си алаи то тэни пхэрдо ярэки тай андэ лэстэ нанай тэминако котор, ту алаи кан овэс пхэрдо ярэки, сар о ярэки э страпяко овэл опэр тутэ.
LUK 11:37 Кана о Исус аякха пхэнэлас, екх фарисеи диняс икос Лэс пэстэ тэ хал лэса. О Исус ало тай лиляс тхан пал конас.
LUK 11:38 О фарисеи дикхляс, кай о Исус на халярдяспэс ангал хапэ, тай лачес шашты.
LUK 11:39 Ай о Сагбус пхэнляс лэски: — Аки тумэ, фарисея, шужарэн кадея тай о тарелкес аврял, ай андар тумэ пхэрдэ бичялипэ тай джюнгалипэ.
LUK 11:40 Дэнилалэн! Та со, Одова, Кон кердяс аврял, на кердяс ли андар?
LUK 11:41 Дэн э чёрэн одолэстар, со си тумэндэ, дэчи алаи тумэнги кан овэл шужо.
LUK 11:42 Касэвэти тумэнги, фарисея! Тумэ дэн дэшто паи катар мята, катар рута тай аврэ чярендар, ай бристэн о цындос тай о дэхыпэ э Дэвлэско. Ли одова камэл тэ керэн, ли авэр тэ на ачявэн.
LUK 11:43 Касэвэти тумэнги, фарисея! Тумэ дэхэн тэ лэн лаче тхана андэ синагогя тай дэхэн, кана тумэн дэн сэлями андэ базаря.
LUK 11:44 Касэвэти тумэнги! Тумэ ушадиен э гробенги, савэ на дикхиндён. О мануша пхерэн опрал тай на джянэн.
LUK 11:45 Екх андар сикляримаря э Тхэдимаско пхэнляс Лэски: — Сикляримарина, кана Ту адава пхэнэс, Ту ли амэн дэс тэлэ.
LUK 11:46 О Исус пхэнляс: — Касэвэти ли тумэнги, сикляримаря э Тхэдимаски! Тумэ чен опэр мануша пхарипэ, саво нащи гелэс, ай тумэ били екхе наеса на астарэн лэс.
LUK 11:47 Касэвэти тумэнги! Тумэ керэн памятникя э прарокенги, савэн мудардэ тумарэ дада.
LUK 11:48 Адалэса тумэ сикавэн, кай тумарэ дада лачё керэнас: одола мударэнас э прарокен, ай тумэ керэн лэнги памятникя.
LUK 11:49 Оничин э Дэвлэско годявэрипэ пхэнляс: «Мэ кан бичялав лэндэ прарокен тай апостолен, ай он э сарсавэн андар лэндэ кан мударэн, ай аврэн кан кувдиен».
LUK 11:50 Оничин о дюняс адалэ вахытеско кан покинэл андар рат алаи ки прарокенго, кай чёрдило, сар ули э пху,
LUK 11:51 катар рат ки Авелеско тай джи ко рат ки Захариеско, э мудардэс машкарэ ко алтари тай ко храми. Ва, пхэнав тумэнги, дюняс адалэ вахытеско кан покинэл андар алаи.
LUK 11:52 Касэвэти тумэнги, сикляримаря э Тхэдимаски! Тумэ лилянус тумэнги о ключи катар джянлипэ. Ай тумэ сам на динянус андэ, тай одола, кон дэлас андэ, тумэ на муклянус лэн.
LUK 11:53 Кана о Исус никлисто андар кхер, о сикляримаря э Тхэдимаски тай о фарисея холинаса бут кхинярэнас Лэс пхучимаса.
LUK 11:54 Он тхэнас Лэски лавушкес, мангенас тэ астарэн збораса.
LUK 12:1 Одова вахыти кидинэпэс бут биня дюняс, тай о мануша тасавэнас екх аврэс. О Исус лиляс тэ пхэнэл ханик Пэ сиклярдэнги: — Трашан катар фарисейски ушлярипэ, самким катар домонги.
LUK 12:2 Нанай ништо гаравдо, со на кан пхутэрдёлас би, ли нанай ништо биджянло, со на кан овэл джянло.
LUK 12:3 Оничин одова, со тумэ пхэнэн тэминако, кан шунлёл ангал ярэки ки десеско, тай со пхэнлянус тэныки андэ кхер, кан овэл пхэнло опрал кхера.
LUK 12:4 Мэ пхэнав тумэнги, Мэ амала: ма трашан одолэндар, кон мударэл о тэни, ай дэчи нащи керэл ништо.
LUK 12:5 Мэ кан пхэнав тумэнги, Кастар тэ трашан: трашан Одолэстар, Кон мудардяс, Лэстэ си барипэ тэ чел андэ ягаки геена. Ва, пхэнав тумэнги, Лэстар трашан.
LUK 12:6 Та со, на бикнэн пандж чирикля до хурдэ капикенги? Тай били екх андар лэндэ нанай бристэрно э Дэвлэса.
LUK 12:7 Ай тумэндэ джи о бала алаи опэр шэро гиндэ! Ма трашан — тумэ багалыдэс бутэ чириклендар!
LUK 12:8 Пхэнав тумэнги: кажнес, кон кан пхэнэл ангал мануша, кай джянэл Ман, о Чяво о Манушыкано кан пхэнэл ангал Дэвлэски миляикя, кай джянэл лэс,
LUK 12:9 ай кон кан пхэнэл ангал мануша, кай на джянэл Ман, ли Мэ кан пхэнав ангал Дэвлэски миляикя, кай на джянав лэс.
LUK 12:10 Тэ пхэнэла саво-то мануш мамуй ко Чяво ко Манушыкано, о Дэл кан мукел лэски адала бэзя, ай одова, кон кушэл о Шужо Духос, о Дэл на кан мукел адала бэзя.
LUK 12:11 Кана тумэн кан анэн ко цындос андэ синагогя, ко сагбудэс тай кастэ си барипэ, ма трашан одолэстар, со зборэс тэ пхэнэн мамуй,
LUK 12:12 вай о Шужо Духос одова сагати кан сиклярэл тумэн, со тумэнги тэ пхэнэн.
LUK 12:13 Кон-то андар дюняс пхэнляс э Исусески: — Сикляримарина, пхэн мэ пхралэски, ов тэ палящиел манца, со ачило катар дад.
LUK 12:14 О Исус пхэнляс: — Амал, кон Ман тхэдяс тэ овав цындомари я машкарэ тумэндэ тэ палящияв?
LUK 12:15 Тай Ов пхэнляс лэнги: — Сакёвэн, нашэн бичялимастар. О мангин э манушэско на сикавэл о барвалипэ э бэшымаско.
LUK 12:16 Озаман Ов пхукавдяс лэнги пхукаипэ: — Пху екхе барвалэ манушэски андяс лэски лаче имиша.
LUK 12:17 «Со мэ тэ керав? Манги нанай кай тхав алаи о кидинэ имиша», — тюшунды ов.
LUK 12:18 «Аки со мэ кан керав, — гиндяс ов озаман, — мэ кан пхагерав мэ араня тай кан керав барэ, тай кан тхав андэ мо гив тай авэр мангин.
LUK 12:19 Дэчи мэ кан пхэнав мэ манги: "Акана тутэ си бут мангин бутэ брэшэнги. Рагантие, ха, пи, лошазэ"».
LUK 12:20 Ай о Дэл пхэнляс лэски: «Дэнлорэя! Авдес рати то бэшыпэ кан лэн тутар. Каски кан ачёл алаи, со ту газырлыдын?»
LUK 12:21 Аякха кан овэл кажнеса, кон кидэл барвалипэ пэски, ай на барвалёл андэ Дэл.
LUK 12:22 Дэчи о Исус пхэнляс Пэ сиклярдэнги: — Оничин Мэ пхэнав тумэнги: ма керэн касэвэти тумарэ бэшымаски, со тэ хан, я тумарэ тэнески, со тэ урявэн.
LUK 12:23 Вай о бэшыпэ багалыс хамастар, ли о тэни багалыс савутендар.
LUK 12:24 Дикхен карин каргэс, он на барярэн ли на кидэн, лэндэ нанай араня, ай о Дэл хавдярэл лэн. Сокаборэски тумэ багалыдэс адалэ чириклендар!
LUK 12:25 Тай кон андар тумэндэ, касэвэтлыс, кан дулгярэл пэски бэшыпэ хоч екхе сагатески?
LUK 12:26 Тэ нащи керэн тумэ джи адава, соски дэчи тумэнги касэвэтлыдэс тэ овэн аврэстар?
LUK 12:27 Тюшундиен одолэстар, сар барён э ливадяки лулудя. Он бути на керэн тай на сивэн, ай пхэнав тумэнги, кай джи о Саламон андэ алаи пэ баримастэ на урявэласпэс аякха, сар кажни андар лэндэ.
LUK 12:28 Ай о Дэл аякха тэ урявэл э чяр ки ливади, сави авдес си, ай рано кан овэл чити андэ пэчи, тай на кан урявэл Ов ли тумэн, залагпакяки?
LUK 12:29 Ма родэн, со тумэнги тэ хан я со тэ пиен, ма керэн касэвэти адалэстар.
LUK 12:30 Адава родэн о мануша адалэ дюняско, ай тумаро Дад джянэл, кай тумэнги камэл адава.
LUK 12:31 Родэн зиядэ Лэско Патишайлыки, тай ли адава кан овэл дино тумэн.
LUK 12:32 Ма траша, тикни атара, вай тумаро Дад мангляс тэ дэл тумэн о Патишайлыки!
LUK 12:33 Бикнэн тумаро мангин тай дагытиен ко чёрэ. Лэн тумэнги асавке кися, савэ на пуранён, тэ кидэн барвалипэ опрэ, саво на тикнёл, катэ о чёр лэндэ на кан пашол, нэ моли лэн на кан хал.
LUK 12:34 Вай катэ си тумаро барвалипэ, отхэ кан овэл ли тумаро ило.
LUK 12:35 Овэн екхараи газыря: о савутя пханлэ, э лампа тхарди,
LUK 12:36 сар одолэ иргатендэ, кай ишандиен пэ сагбус тэ авэл катар биявэско мисяфири, тай кана о сагбус кан авэл тай кан марэл, он бирдэн кан пхутрэн лэски.
LUK 12:37 Бахталэ одола иргатя, савэнго сагбус ало кхерэ тай дикхляс, кай он нанай сутэ. Пхэнав тумэнги чячипэ, дэчи ов сам кан пхандэлпэс, кан дэл икос лэн ко конас тай кан овэл ов иргати лэнги.
LUK 12:38 Бахталэ одола иргатя, савэнго сагбус кан дикхел, кай он си газыря, джи тэ авэла ов рати я опэр сабахтанятэ.
LUK 12:39 Ай тэ джянэл о сагбус э кхерэско, со сагати кан авэл о чёр, ов на кан мукелас би лэс тэ челпэс андэ кхер.
LUK 12:40 Ли тумэ камэл тэ овэн газыря, вай о Чяво о Манушыкано кан авэл одова сагати, кана тумэ Лэс на ишандиен.
LUK 12:41 О Пётар пхучляс: — Сагбуса, Ту пхукавэс адава пхукаипэ амэнги я алаенги?
LUK 12:42 О Сагбус пхэнляс: — Кон дэчи кан овэл исани тай годявэр иргати, саво дикхел пал кхер, савэс о сагбус тхэдяс опэр аврэ иргатендэ, по вахыти тэ дэл лэн хапэ?
LUK 12:43 Бахтало одова иргати, савэско сагбус, кана кан авэл, кан аракхел, кай керэл аякха.
LUK 12:44 Пхэнав тумэнги о чячипэ: ов кан дэл лэс тэ дикхел алаи по мангин.
LUK 12:45 Ай одова иргати тэ пхэнэла: «Мо сагбус кан авэл дага на чяльти», — тай кан лэл тэ марэл э иргатен тай э иргатинкен, тэ хал, тэ пиел тай тэ матёл,
LUK 12:46 кан авэл лэско сагбус одова дес, кана ов на ишандиел, тай одова сагати, кана ов на джянэл. Ов кан чинэл лэс дуй котора тай кан керэл лэски одова, со керэн э бипакякерэнца.
LUK 12:47 Одова иргати, саво джянэлас, со мангел лэско сагбус, тай на гортярдяспэс я на кердяс одова, со мангляс о сагбус, кан овэл лачес мардо.
LUK 12:48 Ай одова, кон на джянэлас, тай кердяс, андар состэ камэл мардо, кан овэл мардо залаг. Кастэ сас бут дино, одолэстар бут ли кан линдёл, тай каски сас бут пакямаса дино, одолэстар бут ли кан пхучлёл.
LUK 12:49 Мэ алём тэ анав яг опэр пху, тай сар Мэ мангав, ой анкха тэ тхабол!
LUK 12:50 Ай Манги дага камэл тэ накхав о болдипэ. Тай Мэ сар опэр сувьендэ сом, бискай адава кан овэл!
LUK 12:51 Тумэ тюшундиен, Мэ алём, тэ анав опэр пху рагати? На, пхэнав тумэнги, на рагати, ами палящима.
LUK 12:52 Хорандас андар пандж мануша кан палящиенпэс: о трин мамуй ко дуй, тай о дуй мамуй ко трин.
LUK 12:53 О дад кан овэл мамуй пэ чявэстэ, о чяво мамуй пэ дадэстэ, э дай мамуй пэ чяятэ, э чяй мамуй пэ дэятэ, э сасуй мамуй пэ борятэ, э бори мамуй пэ сасатэ.
LUK 12:54 О Исус генэ пхэнляс э дюняски: — Кана тумэ дикхен булутя ко запад, тумэ чяльти пхэнэн, кай кан овэл брышым, тай чячес джял брышым.
LUK 12:55 Тай кана пхудэл балвал катар юги, тумэ пхэнэн, кай кан овэл тхарипэ, аякха да овэл.
LUK 12:56 Домонгерэ! Тумэ джянэн, сар тэ галён, со тумэ дикхен опэр пху тай опрэ, дэчи соски тумэ на джянэн, саво вахыти ало?
LUK 12:57 Соски тумэ сам на тюшундиен, андэ со о чячипэ?
LUK 12:58 Кана ту джяс ко сагбус одолэса, саво керэл тут дошалэс, кер алаи аякха лачимаса тэ кутардиес тут лэстар дага опэр дром. Я ов кан сидэл тут ко цындомари, тай о цындомари кан дэл тут ко баро ки пханляко, тай одова кан чел тут андэ пханли.
LUK 12:59 Пхэнав туки, кай ту на кан никлёс отхар, бискай на покинэс алаи о борджи.
LUK 13:1 Сарсавэ андар одолэндэ, кон шунэлас э Исусес, пхукавдэ Лэски катар галилеяня, савэн о Пилат пхэнляс тэ мударэн одова вахыти, кана он керэнас курбанес.
LUK 13:2 О Исус пхэнляс: — Тумэ тюшундиен, кай адала галилеяня аякха мулэ, кай он сас бэзялэ алаендар аврэ галилеянендар?
LUK 13:3 На! Ай пхэнав тумэнги, тумэ тэ на ачявэна тумарэ бэзя, тумэ аякха кан мэрэн, сар он.
LUK 13:4 Я тэ лэс э дэшуохто манушэн, савэ мулэ, кана опэр лэндэ пэли э Силоамски башня. Тумэ тюшундиен, он сас дошалэ аврэндар алаендар, кон бэшэлас андэ Иерусалими?
LUK 13:5 На, ай пхэнав тумэнги: тумэ тэ на ачявэна тумарэ бэзя, ли тумэ кан мэрэн, сар он.
LUK 13:6 Пал отхэ о Исус пхукавдяс лэнги пхукаипэ: — Екхе манушэстэ машкарэ ки дракх барёлас инжыри. Екхвар ов гело тэ дикхел, нанай опрал имиша, тай ништо на аракхляс.
LUK 13:7 Дэчи ов пхэнляс э манушэски, саво дикхел пал дракх: «Аки, трин брэш мэ авав тэ дикхав, нанай опрэ адалэ инжырестэ имиша, тай ништо на аракхав. Чин лэс, соски ов ботени лэл пху?»
LUK 13:8 «Сагбуса, — пхэнляс о иргати, — ачяв лэс генэ екх брэш. Мэ лэс кан храндав агорял, кан тхав кхула э гайваненги,
LUK 13:9 тай авэр брэш тэ овэна имиша — лачё, ай тэ на, чинэса лэс».
LUK 13:10 Андэ суббота о Исус сиклярэлас андэ екх синагога.
LUK 13:11 Отхэ сас джювли, андэ савятэ сас дэшуохто брэш о духос дукхако. Ой сас камбури тай нащи гортярэласпэс.
LUK 13:12 Дикхляс ла, о Исус диняс икос ла тай пхэнляс: — Джювлие! Ту кутардимэ тэ дукхатар!
LUK 13:13 Ов тхэдяс опэр латэ Пэ васта, тай ой бирдэн гортили тай лиляс тэ махтадиел э Дэвлэс.
LUK 13:14 О баро э синагогако холясаило, кай о Исус аиндэрды андэ суббота, тай ов пхэнляс э манушэнги: — Си шов дес, кана камэл тэ керэс бути. Аки одола деса элан аиндэрдиен, ами на андэ суббота.
LUK 13:15 Адалэски о Сагбус пхэнляс лэски: — Домонгерэ! Та со, андэ суббота тумэ алаи на пхутрэн андэ арани э гурувэс я джёрэс тай на гелэс лэс тэ пиявдярэн?
LUK 13:16 Тай на камэл тэ пхутрас э джянджир э дукхаки андэ суббота ли адалэ джювлятэ, э екх андар чяя ки Авраамески, аки, дэшуохто брэш пханля астарэлас ла о Сатанас?
LUK 13:17 Кана Ов адава пхэнляс, алаи Лэски душманенги уло ладжяво, ай алаи о дюняс лошазэлас э намески дилэнги, савэ Ов керэлас.
LUK 13:18 Пал отхэ о Исус пхэнляс: — Соски ушадиел э Дэвлэско Патишайлыки? Соса лэс тэ ушатэрдиес?
LUK 13:19 Ов сар гэрчицако гугуси, саво о мануш лиляс тай читяс андэ пху андэ пэ барятэ. О гугуси барило тай уло тэрэки, аякха, кай джи о чирикля кердэ гнездадэс андэ лэски ровлендэ.
LUK 13:20 Тай генэ пхэнляс: — Соски ушадиел э Дэвлэско Патишайлыки?
LUK 13:21 Ов сар шутлипэ, саво э джювли намискердяс тринэ барэ тапцыенца варэса, тэ шутлёл алаи о хумэр.
LUK 13:22 О Исус накхелас андар диза тай гава, тай андэ алаендэ сиклярэлас дюняс. Джялас ко Иерусалими.
LUK 13:23 Кон-то пхучляс Лэс: — Сагбуса, та со, набут кан овэн кутардимэна? О Исус пхэнляс:
LUK 13:24 — Тхэ зор тэ дэс андэ танг удар. Пхэнав тумэнги: вай бут кан манген тэ дэн, ай нащи.
LUK 13:25 Кана о сагбус э кхерэско кан ущел тай кан пхандэл о удар, тумэ кан овэн тэрдэ аврял кай марэн, мангимаса: «Сагбуса амаро, пхутэр амэнги!» Ай Ов кан пхэнэл: «На джянав тумэн, катар тумэ».
LUK 13:26 Дэчи тумэ кан пхэнэн: «Амэ хасас, пиясас ангал Тутэ, тай Ту сиклярэсас амэндэ андэ улицэс».
LUK 13:27 Ай Ов кан пхэнэл: «Мэ на джянав тумэн, катар тумэ. Джян Мандар алаи, кай керэн канлыки!»
LUK 13:28 Отхэ кан овэл роипэ тай халипэ дандэнго, кана тумэ кан дикхен э Авраамес, э Исаакес, э Яковес тай алаи э прарокен андэ Дэвлэско Патишайлыки, ай тумэ кан овэн читэ отхар.
LUK 13:29 Кан авэн мануша катар вастоки тай катар запад, катар север тай катар юги, тай кан лэн тхан пал конас андэ Дэвлэско Патишайлыки.
LUK 13:30 Тай о палунэ кан овэн ангал, ай ангалунэ — палал.
LUK 13:31 Озаман ко Исус пашылэ сарсавэ фарисея тай пхэнлэ: — Джя Туки, ачяв адава тхан, вай о Ирод мангел Тут тэ мударэл.
LUK 13:32 О Исус пхэнляс лэнги: — Джян тай пхэнэн адалэ лисицаки: «Мэ кан кувдияв э шэйтанен тай кан састярав манушэн авдес тай рано, ай ко трито дес Мэ кан бытэрдияв Ми дила».
LUK 13:33 Ай авдес, рано тай овэр Мэ камэл тэ джяв англэ, вай прароки нащи мэрэл на андэ Иерусалими!
LUK 13:34 Иерусалими, Иерусалими, мударимари э прарокенго тай мударэс барэнца бичялдэн тутэ! Сокаборвар Мэ манглём тэ кидав тэ пуен, сар чирикли кидэл пэ пуен тал пэ пхакендэ, ай тумэ на манглянус!
LUK 13:35 Аки, тумаро кхер ачёл тумэнги чючё. Пхэнав тумэнги, кай тумэ на кан дикхен Ман джи одолэски, бискай на кан пхэнэн: «Махтадимэ Одова, Кон авэл андэ нав ки Сагбуско!»
LUK 14:1 Екхвар андэ суббота, кана о Исус ало тэ хал екхе барэ манушэстэ андар фарисея, одола лачес дикхенас пал Лэстэ.
LUK 14:2 Мамуй ко Исус бэшло мануш, насвало вадянка.
LUK 14:3 О Исус пхучляс э сикляримарен э Тхэдимаскерэн тай э фарисеен: — Муклёл тэ аиндэрдиен андэ суббота?
LUK 14:4 Он тэныкя сас. Озаман о Исус колисаило ко мануш, аиндэрды лэс тай мукляс.
LUK 14:5 Дэчи Ов пхэнляс лэнги: — Кастэ-то андар тумэндэ чяво я гурув кан пэрэл андэ ханинг, та со тумэ, на кан никалэн лэс чяльти, джи адава тэ овэла андэ суббота?
LUK 14:6 Лэнги ништо на сас тэ пхэнэн адалэски.
LUK 14:7 О Исус дикхелас, сар о мануша, савэн динэ икос, лэнас о зиядэ тхана пал конас, тай пхукавдяс лэнги пхукаипэ:
LUK 14:8 — Кана тут дэн икос ки биявэско мисяфири, ма бэш зиядэ тханэстэ. Вай андар одолэндэ, кон диндило икос, кон-то кан овэл намлыс тутар,
LUK 14:9 тай дэчи о сагбус, кай диняс икос ли тут, ли лэс, кан пашол тутэ тай кан пхэнэл: «Дэ о тхан акалэ манушэстэ». Тай туки кан камэл ладжяваса тэ лэс палуно тхан.
LUK 14:10 Кана тут дэн икос, джя тай бэш палунэ тханэстэ, о сагбус тэ пашол тутэ тай тэ пхэнэл: «Амал, накх ко лачё тхан». Дэчи туки кан овэл дино нами ангал алаи ко джемэяти.
LUK 14:11 Кажни, кон барярэлпэс, кан овэл тикнярдо, тай тикнярэлпэс кан овэл ваздино.
LUK 14:12 Пал отхэ о Исус пхэнляс э сагбуски: — Кана ту керэс хабэ десе я бэлвэле, ма дэ икос тэ амалэн, пхралэн, тухумен я барвалэ комшудэн, тай он тэ на дэн икос тут мамуй тай одолэса тэ на покинэн туки.
LUK 14:13 Кана ту керэс хабэ, дэ икос лэстэ э чёрэн, болавдэн, банген, корэн.
LUK 14:14 Аки дэчи ту кан овэс бахтало, вай он нащи тэ дэн палэ тут, тай ту кан диндёс палэ андэ дживиндипэ ки чяченго.
LUK 14:15 Кана екх андар савэндэ ханас шунляс адава, ов пхэнляс э Исусески: — Бахтало одова, кон кан хал манро андэ Патишайлыки ки Дэвлэско.
LUK 14:16 О Исус пхэнляс лэски: — Екх мануш гортярдяс баро хабэ тай диняс икос бут дюняс.
LUK 14:17 Кана ало вахыти э хабэско, ов бичялдяс пэ иргатес тэ пхэнэл кас динэ икос: «Элан, алаи газыри».
LUK 14:18 Ай екх пал аврэстэ он алаи лилэ тэ апувикерэнпэс. О екх пхэнляс: «Мэ киндём пху, тай манги камэл тэ джяв тай тэ дикхав ла. Апувикер ман, мангав тут».
LUK 14:19 Авэр пхэнляс: «Мэ киндём пандж парэс гурувэн тай джяв тэ галяв лэн. Апувикер ман, мангав тут».
LUK 14:20 О трито пхэнляс: «Мэ прандосаилём тай оничин нащи авав».
LUK 14:21 О иргати ало тай пхукавдяс алаи э сагбуски. Дэчи о сагбус э кхерэско холясаило тай пхэнляс э иргатески: «Джя чяльти ко улицэс тай ко танга дроморэ ки дизаки тай ан атхэ чёрэн, болавдэн, корэн тай банген».
LUK 14:22 «Сагбуса, — пхэнляс о иргати, — одова, со ту пхэнлян, кердём, ай дага си тхан».
LUK 14:23 Дэчи о сагбус пхэнляс э иргатески: «Джя ко дрома тай пашал баря тай манг алаен, кас кан дикхес, тэ авэн атхэ, о кхер минро тэ овэл пхэрдо джемэяти.
LUK 14:24 Пхэнав тумэнги, кай андар ангалунэндэ, кас диням икос, никхон на кан хал мэ хабэстэ».
LUK 14:25 Э Исусеса джялас бут дюняс. Ов болдиняспэс лэндэ тай пхэнляс:
LUK 14:26 — Кон авэл Мандэ тай дэхэл дадэс тай дэя, ромня тай пуен, пхралэн, пхэнен я джи по бэшыпэ бут, ниш Ман, ов нащи овэл Мо сиклярдо.
LUK 14:27 Одова, кон на гелэл по хачи тай на джял пал Мандэ, нащи овэл Мо сиклярдо.
LUK 14:28 Кон-то андар тумэндэ тэ мангела тэ тхэл башня, та со, ов на кан бэшэл ханик тай на кан гинэл алаи, со камэл, тэ джянэл, кан рэсэл лэски ловэ тэ бытэрдиел о тхэдипэ?
LUK 14:29 Вай ов тэ тхэла фундамент тай нащи кан бытэрдиел о тхэдипэ, тай алаи, кай дикхен адава, кан овэн лэстар, кай асан:
LUK 14:30 «Адава мануш лиляс тэ тхэл, ай нащи бытэрды».
LUK 14:31 Я патишаи, саво кидэлпэс ко марипэ мамуй аврэ патишаестэ. Та со, ов на кан бэшэл ханик тай на кан тюшундиел, зорало ов дэшэ бине манушэнца кан тэрдярэл одолэс, кон кан авэл опэр лэстэ маримаса бишэ биненца?
LUK 14:32 Тэ нащи, дэчи, бискай о душмани дага дур, ов кан бичялэл бичялдэн тэ манген лачимаса.
LUK 14:33 Акана, одова андар тумэндэ, кон на кан ачявэл алаи, со си лэстэ, нащи овэл Мо сиклярдо.
LUK 14:34 Лон — лачё шэи, ай тэ нашавэла о лон по дами, тай со генэ кан керэл лэс лондо?
LUK 14:35 Нэ андэ пху ов на лачё, нэ андэ навози, лэс ачёл екх тэ чес. Кастэ си кана, тэ шунэл, мэ шунэл!
LUK 15:1 Тэ шунэн э Исусес кидинэпэс алаи о кидимаря э налогенги тай авэра бэзялэ.
LUK 15:2 О фарисея тай о сикляримаря э Тхэдимаски холяса зборизэнас андэ пэстэ: — Ов зборизэл э бэзялэнца тай хал екхетханэ лэнца.
LUK 15:3 Озаман о Исус пхукавдяс лэнги пхукаипэ:
LUK 15:4 — Кастэ-то андар тумэндэ тэ си шэл бакрэ, тай екх андар лэндэ тэ бирисаило. Та со, ов на кан ачявэл энядэша эня ки ливади тай на кан джял тэ родэл кай бирисаило, бискай на аракхел?
LUK 15:5 Тай кана ов кан аракхел лэс, лошаса кан лэл опэр пэ пхикендэ.
LUK 15:6 Тай кана ов кан авэл кхерэ, кан дэл икос пэ амалэн тай э комшудэн тай кан пхэнэл лэнги: «Лошазэн манца, вай мэ аракхлём мэ нашавдэ бакрэс!»
LUK 15:7 Пхэнав тумэнги, кай опрэ кан овэл май бари лош екхе манушэски, саво ачявдяс пэ бэзя, ниш э энядэша энянги э чяченги, савэнги на камэл тэ ачявэн пумарэ бэзя.
LUK 15:8 Я кана ки джювли си дэш рупунэ драхмэс тай ой екх андар лэндэ кан нашавэл, та со, ой на кан тхарэл э лампа тай на кан лэл тэ шулавэл алаи о кхер джи одолэ вахытески, бискай на кан аракхел ла?
LUK 15:9 Тай кана ой ла кан аракхел, ой кан дэл икос пэ амалинкен тай э комшуисэн, тай кан пхэнэл: «Лошазэн манца, мэ аракхлём ми нашавди драхма».
LUK 15:10 Акана, Мэ пхэнав тумэнги, кай аякха э Дэвлэски миляикя лошазэн э екхески, саво ачявдяс пэ бэзя!
LUK 15:11 О Исус пхукавдяс: — Екхе манушэстэ сас дуй чявэ.
LUK 15:12 О тикно пхэнляс пэ дадэски: «Дадэ, дэ ман одова паи э мангинэско, саво кан овэл минро». Тай о дад паляшты о барвалипэ машкарэ ко чявэ.
LUK 15:13 Набут десендар о тикно чяво кидиняс алаи, со лэстэ сас, тай гело андэ дур пху. Отхэ ов тхэдяс алаи по мангин, кай на дэласпэс годи, тхэлас ловэ.
LUK 15:14 Кана лэстэ ништо на ачило, одолэ пхуятэ ули бари бокх, тай ов уло андэ чёримастэ.
LUK 15:15 Дэчи ов гело тай тхэдяспэс бутятэ екхе манушэстэ андар одолэ пхуятэ, ай одова бичялдяс лэс пэ ливадяндэ тэ чярявэл э чёчкадэн.
LUK 15:16 Ов аякха сас бокхало, кай мангляс тэ чялярэлпэс хамаса э чёчкадэнгерэса, ами ли одова лэс на дэнас.
LUK 15:17 Тай галилопэс, ов пхэнляс: «Сокабор бутярнэ андэ кхер мэ дадэстэ, тай лэндэ хапэ бут, ай мэ атхэ мэрав э бокхатар!
LUK 15:18 Кан джяв, тэ болдавман мэ дадэстэ тай кан пхэнав лэски: "Дадэ! Бэзя кердём мамуй ко Дэл, кай си опрэ, тай мамуй тутэ.
LUK 15:19 Мэ на керав тэ бучяв то чяво, ов манца, сар екхеса андар тэ бутярнэндэ"».
LUK 15:20 Тай ов ущино тай гело пэ дадэстэ. Кана ов сас дага дур, о дад дикхляс лэс тай аяды. Ов прастанило мамуй лэстэ, диняс ангали лэс тай лиляс тэ чюмидэл.
LUK 15:21 О чяво пхэнляс лэски: «Дадэ! Кердём бэзя мамуй ко Дэл, кай си опрэ, тай мамуй тутэ. Мэ на керав тэ бучяв то чяво».
LUK 15:22 Ай о дад пхэнляс пэ иргатенги: «Джян чяльти, анэн зиядэ савутя тай урявэн лэс. Тхэн ко най ангрусти тай урявэн лэс минидэс.
LUK 15:23 Анэн хавдярдэ гуруворэс тай чинэн лэс, кан керас хабэ тай кан лошазас.
LUK 15:24 Вай мо чяво сас муло, тай аки ов генэ дживиндило! Ов сас нашавдо тай аракхлило!» Тай он лилэ тэ лошазэн.
LUK 15:25 Ай о баро чяво адава вахыти сас ки ливади. Кана ов пашолас ко кхер, тай шунляс, кай андэ кхер гиля тай кхелипэ.
LUK 15:26 Ов диняс икос екхес андар иргатя тай пхучляс лэс, со овэлпэс.
LUK 15:27 «То пхрал ало, — пхэнляс лэски одова, — тай то дад чиндяс хавдярдэ гуруворэс, кай лэско чяво ало дживиндо тай аиндимэ».
LUK 15:28 О баро чяво холясаило тай на мангляс тэ дэл андэ кхер. Дэчи о дад никлисто тай лиляс лэс тэ мангел.
LUK 15:29 Ай о чяво пхэнляс пэ дадэски: «Алаи адала брэша мэ керавас бути опэр тутэ, сар иргати, тай екхараи керавас одова, со ту пхэнэсас. Ту били екхвар на динян ман джи бузнорэс, тай мэ тэ лошазав амалэнца.
LUK 15:30 Ай кана адава то чяво, саво тхэдяс то мангин э кахпэисэнца, ало кхерэ, ту чиндян лэски хавдярдэ гуруворэс!»
LUK 15:31 «Чяворо, — пхэнляс дэчи о дад, — ту вай екхараи манца, тай алаи, со си мандэ, — алаи тинро.
LUK 15:32 Ай амэ камэл тэ лошазас, вай то пхрал сас муло тай дживиндило, сас нашавдо тай аракхлило!»
LUK 16:1 О Исус пхэнляс Пэ сиклярдэнги: — Екхе барвалэстэ сас баро бутярно, саво дикхелас пал лэски мангинэстэ. Екхвар э сагбуски пхэнлэ, кай адава бутярно тхэлас бут андар лэски мангинэстэ.
LUK 16:2 О сагбус диняс икос лэс пэстэ тай пхэнляс: «Со адава мэ шунав тутар? Сикав манги алаи ти бути, со кердян. Ту нащи ачёс адалэ тханэстэ».
LUK 16:3 О бутярно тюшунды: «Со манги акана тэ керав? О сагбус чел ман катар бути. Тэ джяв тэ храндав мандэ нанай зор, тэ мангав аври — ладжяв…
LUK 16:4 Ай мэ джянав, со манги тэ керав, тай, кана ман атхар кан чен, тэ аракхлён мануша, савэ кан мукен ман пэстэ кхерэ».
LUK 16:5 Тай ов лиляс тэ дэл икос екхес пал аврэстэ э бордженгерэн пэ сагбускерэн. Э екхес ов пхучляс: «Сокабор ту борджи мэ сагбуски?»
LUK 16:6 «Шэл бочкес маслинэнги олия», — пхэнляс одова. О бутярно пхэнляс лэски: «Лэ то лил, бэш чяльти тай яздие пэинда».
LUK 16:7 Пал отхэ ов пхучляс аврэс борджескерэс: «Ами ту сокабор борджи?» «Бини гонэ гив», — пхэнляс одова. О бутярно пхэнлясас лэски: «Лэ то лил тай яздие охтошэла гонэ».
LUK 16:8 О сагбус махтады э хохавнэ бутярнэс андар лэски муршымастэ. О пуя адалэ дюняски годявэра андэ дилэс асавкенца, сар он, ниш о пуя э ярэкески.
LUK 16:9 Мэ пхэнав тумэнги, тумарэ нашужэ барвалимаса кинэн амалэн. Тай кана ов кан бытиел, тумэ тэ овэн муклэ андэ катунэс, савэ кан овэн екхараи.
LUK 16:10 Кон чячё андэ залаг, одова чячё ли андэ баро, тай кон начячё андэ залаг, одова начячё ли андэ баро.
LUK 16:11 Оничин, тумэ тэ на санусас чяче андэ тхэдипэ э пхуяки барвалимаса, тай кон кан дэл тумэн о чячикано?
LUK 16:12 Тай тумэ тэ на санусас чячимаса э барвалимаски аврэскерэски, дэчи кон кан дэл тумэн тумаро?
LUK 16:13 Били екх иргати нащи керэл иргатлыки до сагбудэнги. Ов я екхес на кан дэхэл, ай аврэс кан дэхэл, я екхески кан овэл чячимаса, ай аврэс на кан гинэл. Тумэ нащи андэ екх вахыти керэн иргатлыки ли Дэвлэски, ли барвалимаски.
LUK 16:14 О фарисея, савэ дэхэнас ловэ, шунэнас алаи адава тай асанас катар Исус.
LUK 16:15 О Исус пхэнляс лэнги: — Тумэ манген тэ сикавэн тумэн исаня ангал мануша, ай о Дэл джянэл тумарэ илэ. Одова, со гинэн о мануша, — гарами андэ якха ки Дэвлэски.
LUK 16:16 О вахыти э Тхэдимаско тай э прарокенго сас джи ко Иоанн, анкха пхукавдёл Лошано Габэри катар Дэвлэско Патишайлыки, тай кажни тхэл зор, тэ пэрэл андэ лэстэ.
LUK 16:17 Ай чяльти о булутя тай э пху кан нашавдён, ниш андар Тхэдипэ кан нашавдёл екх точка!
LUK 16:18 Кажни, кон чел пэ ромня тай лэл авря, керэл кахпэлыки, тай одова, кон кан лэл джювля, савя читяс о ром, аякхажэ керэл кахпэлыки.
LUK 16:19 Бэшэлас екх барвало мануш. Ов урявэласпэс андэ багалыдэс тай шукара савутя тай кажын дес лошаса лэлас катар бэшыпэ алаи.
LUK 16:20 Ай лэски барятэ пашло чёро, саво бучёлас Лазарь. Ов сас алаи учярдо ярадэнца
LUK 16:21 тай овэлас би лошано джи хамаски, кай пэрэл опрал конас ки барвалэско. Джюкела пашонас тай джяладиенас лэски ярадэс.
LUK 16:22 Тай аки, о чёро муло, тай миляикя гелдэ лэс ко Авраам. Муло ли о барвало, лэс пароскердэ.
LUK 16:23 Андэ ади, катэ о барвало сидэлас баро хурлуки, ов ваздиняс пэ якха тай дикхляс дурал э Авраамес, ай паш лэстэ э Лазарес.
LUK 16:24 Ов диняс икос: «Дадэ Авраам, аядие ман! Бичял э Лазарес, тай одова тэ болэл о чети пэ наеско андэ пани тай тэ шудрярэл ми чиб, вай мэ сидав хурлуки андэ адалэ ягатэ».
LUK 16:25 Ай о Авраам пхэнляс: «Пуёс, мэ авэл тэ годятэ, со ту лилян андэ тэ бэшымастэ лачё, ай о Лазарь лэлас екх джюнгало. Анкха ов атхэ лэл рагати, ай ту сидэс хурлуки.
LUK 16:26 Тай генэ, машкарэ амэндэ тай тумэндэ тхэди бари хэв, аякха кай джи кон-то би ли тэ мангелас атхар тэ джял тумэндэ, ов нащи, тай никхон отхар нащи авэл амэндэ».
LUK 16:27 О барвало пхэнляс: «Дэчи мангав тут, дадэ, бичял э Лазарес андэ кхер мэ дадэско.
LUK 16:28 Вай мандэ пандж пхрала, мэ пхэнэл лэнги, тай ли он тэ на пэрэн андэ адава тхан ки хурлукеско».
LUK 16:29 О Авраам пхэнляс: «Лэндэ си о Маисей тай о прарокя, мэ шунэн лэн».
LUK 16:30 «На, дадэ Авраам, — пхэнляс о барвало, — аки би кон-то андар мулэ тэ авэла лэндэ, озаман би он ачявэнас пумарэ бэзя».
LUK 16:31 О Авраам лэски пхэнляс: «Он э Маисеес тай э прарокен на шунэн, тай кон-то джи тэ дживиндёла андар мулэ, ли адава нащи лэн кан тхэл тэ пакян».
LUK 17:1 О Исус пхэнляс пэ сиклярдэнги: — Со зумавэл э манушэс нащи тэ на овэл, ай касэвэти одолэски, кон дэл бутуря э манушэн андэ бэзя.
LUK 17:2 Одолэски, кон хоч екхес андар адалэ тикнэндэ кан дэл бутуря андэ бэзя, сас би зиядэ, лэски тэ урявэн ки мэн мельницако бар тай тэ чен андэ пани.
LUK 17:3 Оничин сакёвэн! То пхрал тэ керэл бэзя, тэрдяр лэс, тай ов тэ ачявэла о бэзя, апувикер лэс.
LUK 17:4 Тай джи ов тэ кердяс бэзя туки эфтавар андэ дес тай эфтавар тэ авэла тутэ тай тэ пхэнэла: «Мэ сом дошало», — апувикер лэс.
LUK 17:5 О апостоля сар-то манглэ э Сагбус: — Баряр амаро пакяпэ!
LUK 17:6 О Сагбус пхэнляс: — Тумэндэ тэ си пакяпэ, сар гэрчицако гугуси, тумэ дэчи тэ пхэнэна акалэ дюдяки тэрэкески: «Чиндё э коринеса тай бэшав тут андэ пани», — ов тумэн кан тхэл кан.
LUK 17:7 Кастэ-то андар тумэндэ си иргати, саво храндэл э пху я чярярэл бакрэн. Кан пхэнэн тумэ лэски, кана ов кан авэл катар ливади: «Эла, бэш тай ха»?
LUK 17:8 На, тумэ дэба кан пхэнэн: «Газырлыдие манги хапэ, дэчи пхандэ тут опрал тай кер иргатлыки манги, бискай мэ хав тай пияв, ай дэчи кан хас, кан пиес коркоро».
LUK 17:9 Махтадиел о сагбус э иргатес андар одолэстэ, со одова керэл, со лэски пхэнлило?
LUK 17:10 Аякха ли тумэ, кана кан керэн алаи, со тумэнги сас пхэнло, пхэнэн: «Амэ сам иргатя, савэ на керэн лэн тэ махтадиес. Амэ кердям екх одова, со камэлас тэ керас».
LUK 17:11 Опэр дром ко Иерусалими о Исус накхелас машкарэ ки Самария тай ки Галилея.
LUK 17:12 Кана Ов дэлас андэ екх гав, Лэс дикхлэ дэш гералэ, савэ тэрдилэ надур
LUK 17:13 тай лачес дэнас бэбэря: — Исус, Сикляримарина, аядие амэн!
LUK 17:14 Кана о Исус лэн дикхляс, Ов пхэнляс: — Джян тай сикавэн тумэн э попазенги. Одола гелэ тай опэр дром сас аиндимэна.
LUK 17:15 О екх андар лэндэ, сар дикхляс, кай аинды, болдиняспэс, бэбэренца махтадиелас э Дэвлэс.
LUK 17:16 Ов пэло ко чянга ки Исусески тай пхэнляс Лэски: «Бахт мэ дэл тут о Дэл!» Тай адава мануш сас самаряни.
LUK 17:17 — Та со, на дэш мануша сас шужардэ? — пхучляс о Исус. — Кай авэра эня?
LUK 17:18 Соски никхон андар лэндэ, булуб акалэ джяти пхуяки манушэстар, на ало, тэ махтадиел э Дэвлэс?
LUK 17:19 Тай пхэнляс э самарянески: — Ущи тай джя, то пакяпэ кутарды тут.
LUK 17:20 Екхвар о фарисея пхучлэ ко Исус, кана кан авэл э Дэвлэско Патишайлыки. Ов пхэнляс: — Э Дэвлэско Патишайлыки на кан авэл аякха, кай кан дикхес лэс якхенца.
LUK 17:21 Никхон нащи кан пхэнэл: «Аки, ов акатэ!» я «Ов окотэ!» Э Дэвлэско Патишайлыки машкарэ тумэндэ.
LUK 17:22 Дэчи Ов пхэнляс э сиклярдэнги: — Кан авэл асавко вахыти, кана тумэ кан манген тэ дикхен хоч екх андар деса э Чявэс э Манушыканэс, тай на кан дикхен.
LUK 17:23 Тумэнги кан пхэнэн: «Аки, Ов окотэ!» я «Аки, Ов акатэ!» Ай тумэ ма прастан тэ дикхен.
LUK 17:24 Сар э страпи, кана тхабол, сикавэл алаи опрэ, катар чети джи ко чети, аякха кан овэл ли о Чяво о Манушыкано андэ дес, кана Ов кан авэл.
LUK 17:25 Ай ханик Лэски камэл тэ даяндиел бут касэвэти, тай кан болдэнпэс Лэстар о мануша адалэ вахытески.
LUK 17:26 Сар сас андэ деса ки Ноескерэ, аякха кан овэл ли андэ деса ки Чявэско ки Манушыканэско.
LUK 17:27 О мануша ханас, пиенас, прандозэнас тай джянас ромэстэ джи одолэ десестэ, кана о Ной бэшло андэ кавчеги. Дэчи ваздиндило баро пани тай алаен мудардяс.
LUK 17:28 Аякха сас андэ деса ки Лотески. О мануша ханас, пиенас, кинэнас тай бикнэнас, барярэнас тай керэнас.
LUK 17:29 Ай андэ дес, кана о Лот мукляс о Садом, опрал чёрдили яг тай сера тай алаен лэн мудардяс.
LUK 17:30 Аякха кан овэл ли одова дес, кана кан авэл о Чяво о Манушыкано.
LUK 17:31 Одова дес кон-то тэ овэла опэр кхер, ай лэски шэя — андэ кхер, мэ на фулел тэлэ пал шэя. Тай кон ки ливади, мэ на авэл палэ.
LUK 17:32 Мэ овэл тумарэ годятэ э ромни э Лотески!
LUK 17:33 Кон мангел тэ гаравэл по бэшыпэ, одова кан нашавэл лэс, тай кон кан нашавэл по бэшыпэ, одова кан гаравэл лэс.
LUK 17:34 Пхэнав тумэнги, кай одоя рат дуй кан овэн опэр екх тхан, тай о екх кан овэл линдо, ай авэр ачявдо.
LUK 17:35 Дуй джювля паш екх аврэстэ кан ронискерэн гив, э екха кан лэн, э екха кан ачявэн.
LUK 17:37 — Кай, Сагбуса? — пхучлэ о сиклярдэ. О Исус пхэнляс: — Катэ си муло, отхэ кан кидэнпэс ли арёля-стервятникя.
LUK 18:1 О Исус мангелас тэ сикавэл э сиклярдэнги, кай камэл екхараи тэ мангес ко Дэл тай тэ на керэс касэвэти, тай пхукавдяс лэнги акасавко пхукаипэ.
LUK 18:2 — Андэ екхе дизатэ сас цындомари, саво на трашалас катар Дэл тай на ладжялас катар мануша.
LUK 18:3 Андэ одолэ жэ дизатэ бэшэлас пхивли, сави екхараи пхерэлас лэстэ тай мангелас: «Чячимаса кер ми дила, кутардие ман мэ дошалэстар».
LUK 18:4 Саво-то вахыти о цындомари лаки пхэнэлас «на», тай дэчи тюшунды: «Мэ катар Дэл на трашав тай манушэндар на ладжяв,
LUK 18:5 ай адая пхивли на дэл ман рагати. Мэ кан кутардияв ла, тэ на авэл ой генэ тэ быздэрдиел ман».
LUK 18:6 Тай о Сагбус пхэнляс: — Шунэн, со пхэнляс о хохавно цындомари?
LUK 18:7 Ай сар о Дэл на кан кутардиел одолэн, савэн Ов лиляс, савэ манген Лэс ли о дес ли э рат? Сар Ов кан сидэл э ярдымеса?
LUK 18:8 Пхэнав тумэнги: Ов бисидимаско кан кутардиел лэн. Ай кана о Чяво о Манушыкано кан овэл, Ов кан аракхел пакяпэ опэр пху?
LUK 18:9 Одолэнги, кон пакялас андэ пумаро чячипэ тай фаласа дикхенас карин аврэндэ, о Исус пхукавдяс акасавко пхукаипэ:
LUK 18:10 — Дуй мануша алэ андэ храми тэ манген э Дэвлэс. О екх андар лэндэ сас фарисеи, ай авэр — кидимари э налогенго.
LUK 18:11 О фарисеи ущино тай акаякха пхэнэлас э Дэвлэски: «Дэвла, лачипэ Туки, кай мэ на асавко, сар авэра мануша: чёра, наисаня, кахпэдэс я сар акава кидимари э налогенго.
LUK 18:12 Мэ астарав оразас дувар андэ базари тай дав дэшто паи мэ казандимастар».
LUK 18:13 Ай о кидимари э налогенго тэрдо дурал, на мангелас джи пэ якха тэ ваздэл опрэ, ами марэлас по колин тай пхэнэлас: «Дэвла, ов миласа мандэ, бэзялэстэ».
LUK 18:14 Пхэнав тумэнги, кай адава мануш гело кхерэ чячё ангал Дэл, ами на о фарисеи. Вай кажни, кон ваздэлпэс, кан овэл тикнярдо, ай кажни, кон тикнярэлпэс, кан овэл ваздино.
LUK 18:15 Сарсавэ мануша анэнас ко Исус пуен, Ов тэ колизэл лэндэ. О сиклярдэ дикхенас адава тай тэрдярэнас лэн.
LUK 18:16 Ай о Исус диняс икос лэн Пэстэ тай пхэнляс: — Мукен о пуя, мэ авэн Мандэ, ма астарэн лэн, вай э Дэвлэско о Патишайлыки си асавкенги, сар он.
LUK 18:17 Пхэнав тумэнги чячипэ: кон на кан лэл э Дэвлэско Патишайлыки, сар пуёс, одова на кан дэл андэ лэстэ.
LUK 18:18 Екх баро мануш пхучляс Лэс: — Лачё Сикляримарина, со манги тэ керав, тэ овэл мандэ бибытимаско бэшыпэ?
LUK 18:19 — Соски ту пхэнэс Манги «лачё»? — пхэнляс о Исус. — Никхон нанай лачё, екх о Дэл.
LUK 18:20 Ту джянэс о тхэдиматэс: ма кер кахпэлыки, ма мудар, ма чёр, ма хохав, гин дадэс тай дэя.
LUK 18:21 — Алаи адава мэ керав дага катар деса мэ тикнимаскерэндар, — пхэнляс ов.
LUK 18:22 О Исус шунляс адава тай пхэнляс лэски: — Екх туки на рэсэл. Бикин алаи, со си тутэ, тай дагытие о ловэ ко чёрэ, тай дэчи тутэ кан овэл барвалипэ опрэ. Дэчи эла тай джя пал Мандэ.
LUK 18:23 Кана о баро шунляс адава, ов уло касэвэтлыс, вай сас бут барвало.
LUK 18:24 О Исус дикхляс карин лэстэ тай пхэнляс: — Со пхаро э барвалэнги тэ дэн андэ Дэвлэско Патишайлыки!
LUK 18:25 Локес эси э камилаки тэ накхел андар ки сувьяко кан, ниш э барвалэски тэ дэл андэ Дэвлэско Патишайлыки.
LUK 18:26 Одола, кон адава шунэлас, пхучлэ: — Кон дэчи кан кутардиелпэс?
LUK 18:27 О Исус пхэнляс: — Со нащи керэл о мануш, си зор ко Дэл тэ керэл.
LUK 18:28 Дэчи о Пётар пхэнляс: — Аки, амэ ачявдям алаи, со амэндэ сас, тай гелям пал Тутэ.
LUK 18:29 О Исус пхэнляс лэнги: — Пхэнав тумэнги чячипэ: кажни, кон мукляс кхер, я ромня, я пхралэн, я дадэс тай дэя, я пуен булуб э Дэвлэски Патишайлыкески,
LUK 18:30 кан диндёл май бут адалэ вахытестэ, тай дэчи — э бибытимаско бэшыпэ.
LUK 18:31 О Исус гелдяс дэшудо сиклярдэн ригатэ тай пхэнляс лэнги: — Аки, амэ ваздасамэн ко Иерусалими, тай отхэ кан овэл кердо алаи, со яздылар о прарокя катар Чяво ко Манушыкано.
LUK 18:32 Ов кан овэл дино ко мануша, савэ на джянэн э Дэвлэс. Одола кан асан Лэстар, кан кушэн Лэс, кан чюнгарэн опэр Лэстэ,
LUK 18:33 кан марэн камчияса тай пал отхэ кан мударэн. Ай ко трито дес Ов кан дживиндёл.
LUK 18:34 О сиклярдэ ништо андар адалэстэ на галилэ; алаи, со Ов пхэнляс, сас лэнги пханло, тай он на галёнас, состар Ов пхэнляс.
LUK 18:35 Кана о Исус пашолас ко Иерихони, ко дром бэшло сас коро тай мангелас.
LUK 18:36 Кана ов шунляс, кай пашал джял дюняс, ов пхучляс, со овэл.
LUK 18:37 — Авэл о Исус андар Назарет, — пхэнлэ лэски.
LUK 18:38 Дэчи о коро диняс бэбэря: — Исус, Чяво э Давидеско! Аядие ман!
LUK 18:39 Одола, кай джянас ангал, лилэ тэ пхэнэн ов тэ пхандэл по муй, ай о коро дэлас бэбэря май лачес: — Чяво Давидеско, аядие ман!
LUK 18:40 О Исус тэрдило тай пхэнляс, адалэ манушэс тэ анэн Лэстэ. Кана одова пашыло, о Исус пхучляс лэс:
LUK 18:41 — Со ту мангес, Мэ тэ керав туки? — Сагбуса, мэ мангав тэ дикхав, — пхэнляс о коро.
LUK 18:42 О Исус пхэнляс лэски: — Дикх! То пакяпэ аиндэрды тут.
LUK 18:43 О коро бирдэн лиляс тэ дикхел тай гело пал Исус, та ли махтадиелас э Дэвлэс. Тай алаи о дюняс, саво дикхелас адава, махтадиелас э Дэвлэс.
LUK 19:1 О Исус диняс андэ Иерихони тай накхелас андар диз.
LUK 19:2 Отхэ сас мануш, саво бучёлас Закхей. Ов эсас барвало мануш тай баро опэр кидимаря ки налогенги.
LUK 19:3 Ов мангелас тэ дикхел, кон эси адава Исус, тай нащи андар бут дюняс, вай сас тикнорэ боеско.
LUK 19:4 Озаман, тэ дикхел Лэс, о Закхей прастанило ангал тай никлисто опэр дюдяко тэрэки, катэ о Исус камэлас тэ накхел.
LUK 19:5 Кана о Исус пашыло одолэ тханэстэ, Ов дикхляс опрэ тай пхэнляс: — Закхей, фули чяльти! Авдес Мэ камэл тэ овав тутэ андэ кхер.
LUK 19:6 О Закхей чяльти фулистино тай лошаса мангляс Лэс пэстэ кхерэ.
LUK 19:7 Алаи, кон дикхелас адава, лилэ тэ холязэн: — Ов гело кхерэ ко бэзяло!
LUK 19:8 О Закхей ущино тай пхэнляс э Сагбуски: — Сагбуса! Екхпаш мэ мангинэстар мэ кан дав ко чёрэ, ай мэ кастар-то тэ лилём бут, ниш камэл, мэ кан дав лэс штарвар бут!
LUK 19:9 Дэчи о Исус пхэнляс лэски: — Авдес андэ адава кхер ало кутардипэ, вай ли адава мануш си о чяво э Авраамеско!
LUK 19:10 О Чяво о Манушыкано ало тэ аракхел тай тэ кутардиел о нашавдо.
LUK 19:11 Одолэнги, кон адава шунэлас, о Исус пхукавдяс пхукаипэ. Он сас надур катар Иерусалими, тай о мануша тюшундиенас, кай э Дэвлэско Патишайлыки камэл аки-аки тэ авэл.
LUK 19:12 О Исус пхэнляс: — Екх намлыс мануш джялас дур пхуятэ, тэ диндёл патишайлытико зор тай тэ авэл.
LUK 19:13 Ов диняс икос пэ дэшэ иргатен тай диняс лэн по шэл драхмэс. «Мукен адала ловэ андэ бути, бискай мэ на авав», — пхэнляс ов.
LUK 19:14 Ай о мануша лэски пхуяки на дэхэнас лэс тай бичялдэ пал лэстэ манушэн тэ пхэнэн: «Амэ на мангас, адава мануш тэ овэл амаро патишаи».
LUK 19:15 Кана ов диндило патишайлытико зор тай ало, пхэнляс тэ авэн лэстэ о иргатя, савэн диняс руп, тэ пхучел лэн, со он казандылар.
LUK 19:16 О екхто ало тай пхэнляс: «Сагбуса, тэ шэл драхмэс андэ бини драхмэс казандима!»
LUK 19:17 «Муршари! — пхэнляс о сагбус. — Ту лачё иргати. Ту санас чячё андэ залаг, оничин тутэ кан овэл барипэ опэр дэшэ дизэндэ».
LUK 19:18 Ало о дуйто иргати тай пхэнляс: «Сагбуса, тэ шэл драхмэс андэ панджшэл драхмэс казандима!»
LUK 19:19 О сагбус пхэнляс: «Лэ, дикх пал пандж диза».
LUK 19:20 Дэчи ало о трито иргати тай пхэнляс: «Сагбуса, аки тэ шэл драхмэс, мэ гарававас лэн пакярдэ андэ кхосно.
LUK 19:21 Мэ трашавас тутар, кай ту сан мануш канлыс. Ту лэс отхэ, катэ на тхэдян, тай кидэс, со на барярдян».
LUK 19:22 О сагбус дэчи пхэнляс: «Ту налачё иргати! Мэ кан керав цындос туки тэ зборэнца! Ту джянэсас, кай мэ мануш канлыс, тай кай мэ лав отхэ, катэ на тхэдём, тай кидав, со на барярдём?
LUK 19:23 Соски ту на муклян мо руп андэ бути, тай, кана мэ кан авав, тэ дэс лэн мандэ кяреса?»
LUK 19:24 Тай ов пхэнляс э тэрдэнги отхэ: «Лэн лэстар лэски шэл драхмя тай дэн одолэстэ, кастэ си бини драхмэс».
LUK 19:25 «Сагбуса, — пхэнлэ лэски, — ва вай лэстэ ли аякха си бини драхмэс!»
LUK 19:26 О сагбус пхэнляс: «Пхэнав тумэнги, кастэ си, кан диндёл генэ, ай кастэ нанай, кан линдёл ли одова, со си лэстэ.
LUK 19:27 Ай мэ душманен, савэ на мангенас, мэ тэ овав лэнго патишаи, анэн лэн атхэ тай мударэн лэн ангал мандэ».
LUK 19:28 О Исус пхэнляс адава тай гело англэ ко Иерусалими.
LUK 19:29 Пашолас ки Виффагия тай ки Вифания, кай сас ки Маслинэнго горас, Ов бичялдяс ангал дон сиклярдэн,
LUK 19:30 пхэнляс: — Джян андэ гав, саво си ангал тумэндэ. Кана тумэ кан дэн андэ лэстэ, тумэ кан аракхен пханлэ джёрэс, опэр савэстэ дага никхон на бэшло. Пхутрэн лэс тай анэн атхэ.
LUK 19:31 Ай кон-то тумэн тэ пхучела: «Соски тумэ лэс пхутрэн?» — пхэнэн: «Ов камэл э Сагбуски».
LUK 19:32 О сиклярдэ, савэн Ов бичялдяс, гелэ тай аракхлэ алаи аякха, сар лэнги пхэнляс о Исус.
LUK 19:33 Кана он пхутрэнас э джёрэс, о сагбудэс пхучлэ лэн: — Тумэ соски пхутрэн э джёрэс?
LUK 19:34 Он пхэнлэ: — Ов камэл э Сагбуски.
LUK 19:35 Он андэ э джёрэс ко Исус, читэ опэр лэстэ пумарэ савутя тай бэшавдэ опэр лэстэ э Исусес.
LUK 19:36 Кана Ов джялас, о мануша лилэ тэ джяйдиен опэр дром пумарэ савутя.
LUK 19:37 Тай кана Ов пашыло ко тхан, катэ о дром фулел опрал Маслинэнго горас, алаи о сиклярдэ лошаса тай лачес лилэ тэ махтадиен э Дэвлэс андар алаи ко чюдэс, савэ он дикхлэ:
LUK 19:38 — Махтадимэ Патишаи, Саво авэл андэ нав ки Сагбуско! Рагати тай нами андэ учипэ опрэ!
LUK 19:39 Сарсавэ, кай сас андэ дюняс ки фарисеенго, пхэнэнас э Исусески: — Сикляримарина, тэрдяр Тэ сиклярдэн!
LUK 19:40 Ов пхэнляс: — Пхэнав тумэнги: он тэ тэныкизэна, о бара кан дэн бэбэря.
LUK 19:41 Кана он пашонас ко Иерусалими тай дикхиндёлас э диз, о Исус руно лэски:
LUK 19:42 — Тэ галёсас би ту авдес, со анэлас би туки рагати! Ай анкха адава гаравдо тэ якхендар.
LUK 19:43 Кан авэн деса, кана тэ душманя кан агорадиен тай кан тасавэн тут алаи катар рига.
LUK 19:44 Он кан хурдярэн тут тай тэ манушэн тай на кан ачявэн андэ тутэ бар опэр бар, кай ту на галилян о вахыти, кана о Дэл ало тутэ.
LUK 19:45 Дэчи о Исус диняс андэ храми тай лиляс тэ кувдиел отхар э бикинимарен.
LUK 19:46 — Яздимэ си, — пхэнэл Ов лэнги: — «О кхер Минро кан овэл кхер, катэ зборизэн э Дэвлэса», ай тумэ кердянус лэс пэскерэнго кхер.
LUK 19:47 О Исус кажын дес сиклярэлас андэ храми, ай о барэ попазя, о сикляримаря э Тхэдимаски тай о намлыдэс мануша родэнас, сар тэ мударэн Лэс.
LUK 19:48 Ай он на джянэнас, сар адава тэ керэн, вай алаи о дюняс екхараи пхерэнас пал Исус тай шунэнас Лэс.
LUK 20:1 3Андэ екх андар деса, кана о Исус сиклярэлас э дюняс тай пхукавэлас Лошано Габэри андэ храми, Лэстэ алэ барэ попазя, о сикляримаря э Тхэдимаски тай э барэ манушэнца.
LUK 20:2 — Пхэн амэнги, каски баримаса Ту алаи адава керэс? Кон диняс Тут адава барипэ? — пхучлэ он.
LUK 20:3 О Исус пхэнляс: — Ли Мэ тумэндар кан пхучяв. Пхэнэн,
LUK 20:4 кана о Иоанн болэлас, адава сас опрал катар Дэл я катар мануша?
LUK 20:5 Он лилэ тэ зборизэн машкарэ пэстэ: «Амэ тэ пхэнаса: "Опрал катар Дэл", Ов кан пхучел: "Соски тумэ лэски на пакянилянус?"
LUK 20:6 Ай тэ пхэнаса: "Катар мануша", алаи о дюняс кан марэн амэн барэнца, вай он пакян, кай о Иоанн сас прароки».
LUK 20:7 — Амэ на джянас, кастар, — пхэнлэ он.
LUK 20:8 — Дэчи ли Мэ тумэнги на кан пхэнав, каски баримаса Мэ алаи адава керав, — пхэнляс лэнги о Исус.
LUK 20:9 Ов лиляс тэ пхукавэл э дюняски пхукаипэ: — Екх мануш барярдяс дракх, диняс ла ловэнги сарсавэ манушэндэ тэ дикхен пал латэ, ай ов гело бутэ вахытески ко джятя пхуя.
LUK 20:10 Кана ало вахыти, ов бичялдяс иргатес ко мануша, савэ дикхен пал дракх, тэ дэн лэс паи катар дракх. О мануша э дракхаки мардэ э иргатес тай бичялдэ лэс чюче вастэнца.
LUK 20:11 Ов бичялдяс аврэ иргатес, ай он ли адалэс мардэ, асанилэ лэстар тай бичялдэ лэс чюче вастэнца.
LUK 20:12 Ов бичялдяс тритонэ иргатес. Он ли адалэс бут лачес мардэ тай читэ лэс андар дракх.
LUK 20:13 Дэчи о сагбус э дракхако тюшунды: «Со манги тэ керав? Кан бичялав мэ дэхлэ чявэс, лэстар он кан ладжян».
LUK 20:14 Кана о мануша э дракхаки дикхлэ э чявэс, он гиндэ: «Адава, каски кан ачёл о мангин. Элан мударас лэс, тай о мангин тэ овэл амаро».
LUK 20:15 Он читэ лэс андар дракх тай мудардэ. Со акана кан керэл лэнца о сагбус э дракхако?
LUK 20:16 Ов кан авэл тай кан мударэл одолэ манушэн э дракхакерэн, ай э дракх кан дэл аврэндэ. Кай шунлэ адава, динэ бэбэря: — Мэ на овэл адава!
LUK 20:17 Ай о Исус дикхляс карин лэндэ, пхэнляс: — Со си о зборэс э Яздимаски: «Бар, савэс читэ о бутярнэ, уло баро э угласко»?
LUK 20:18 Кажни, кон кан пэрэл опэр Одова Бар, кан хурдёл котора, ай опэр кастэ Ов кан пэрэл, одолэс кан тасавэл.
LUK 20:19 О сикляримаря э Тхэдимаски тай о барэ попазя галилэ, кай о Исус пхукавдяс адава лэндар, оничин он манглэ одова вахыти тэ астарэн Лэс, ами трашанилэ катар дюняс.
LUK 20:20 Он лилэ лачес тэ дикхен пал Исус тай бичялдэ Лэстэ манушэн, савэ керэнаспэс чяче, мангенас би тэ астарэн Лэс збораса тай тэ дэн андэ барипэ ко пракуратори.
LUK 20:21 Одола пхучлэ э Исусес: — Сикляримарина, амэ джянас, кай Ту чячипэ пхэнэс тай сиклярэс. Ту на дикхес карин муя тай чячё сиклярэс дром э Дэвлэско.
LUK 20:22 Камэл амэнги тэ покинас налоги э императорески я на?
LUK 20:23 О Исус дикхляс лэнго хохаипэ тай пхэнляс:
LUK 20:24 — Сикавэн Манги динари. Каско си опрал муй, тай каско опрал нав? — Э императореско, — пхэнлэ он.
LUK 20:25 — Дэн э императореско ко император, ай э Дэвлэско — ко Дэл, — пхэнляс Ов лэнги.
LUK 20:26 Он нащи астарэнас Лэс ангал дюняс нэ опэр савэ Лэски зборатэ, тай, шаштимэна Лэски зборэнги, тэныкисаилэ.
LUK 20:27 Ко Исус пашылэ сарсавэ саддукея. Он пакянас, кай о мулэ на дживиндён. Он пхучлэ Лэс:
LUK 20:28 — Сикляримарина, о Маисей язды амэнги, кастэ-то тэ муло пхрал, савэстэ сас ромни, ай на сас пуя, ов камэл тэ лэл э пхивля тай тэ дэл ла пуен андар пэ пхралэстэ.
LUK 20:29 Тай аки, сас эфта пхрала. О баштутно пхрал прандосаило тай муло бипуенго.
LUK 20:30 Дэчи о дуйто
LUK 20:31 ли о трито прандосаило опэр латэ, тай аякха алаи о эфта мулэ тай пуен на ачявдэ.
LUK 20:32 Дэчи мули ли э джювли.
LUK 20:33 Кана алаи кан дживиндён, каски ромни ой кан овэл? Вай ли эфтанги ромни сас?
LUK 20:34 О Исус пхэнляс лэнги: — О мануша адалэ вахытеско прандозэн тай джян ромэстэ.
LUK 20:35 Одолэн, савэн кан гинэл о Дэл, кай он адава керэн тэ дживиндён андар мулэ тай тэ бэшэн околэ дюнястэ, на кан прандозэн тай на кан джян ромэстэ.
LUK 20:36 Вай тэ мэрэн он нащи, ами овэн сар миляикя. Он си о чявэ э Дэвлэски, вай он дживиндён.
LUK 20:37 Ай одова, кай о мулэ дживиндён, сикавдяс о Маисей андэ пхукаипэ катар хлядяло тэрэки, кана ов пхэнляс э Сагбуски «О Дэл э Авраамеско, о Дэл э Исаакеско тай о Дэл э Яковеско».
LUK 20:38 Ов о Дэл на э мулэнго, ами э дживиндэнго. Вай Лэски алаи дживиндэ!
LUK 20:39 Сарсавэ андар сикляримаря э Тхэдимаски пхэнлэ: — Лачё Ту пхэнлян, Сикляримарина!
LUK 20:40 Тай никхон пал отхэ на пхучелас Лэстар ништо.
LUK 20:41 Пал отхэ о Исус пхучляс лэндэ: — Соски пхэнэн, кай о Христос — О Чяво э Давидеско?
LUK 20:42 Вай о Давид пхэнляс андэ книжка ки Псаломенги: «Пхэнляс о Сагбус э Сагбуски минрэски: Бэш ко прави васт Мандар,
LUK 20:43 бискай Мэ на керав Тэ душманен скамейка тал Тэ пинрэндэ».
LUK 20:44 Вай о Давид пхэнэлас Лэски «Сагбус». Сар дэчи Ов лэско Чяво?
LUK 20:45 Алаи о дюняс шунэлас э Исусес, ай Ов пхэнляс Пэ сиклярдэнги:
LUK 20:46 — Сакёвэн асавке сикляримарендар ки Тхэдимаски, савэ дэхэн тэ урявэн дулгя савутя тай дэхэн, кана лэн дэн сэлями ко майдани. Он дэхэн тэ бэшэн ко лаче тхана андэ синагогя тай ко хабэнатэс.
LUK 20:47 Он хохаимаса лэн о кхера э пхивленги тай ангал якха ки манушэнги бут пхэнэн э Дэвлэски. Асавкен ишандиел зорало цындос.
LUK 21:1 О Исус дикхелас, сар о барвалэ ченас пумарэ ловэ, савэ андэ э Дэвлэски, андэ сундуки ки храмеско.
LUK 21:2 Ов дикхляс аякхажэ ли э чёрэ пхивля, сави читяс дуй капикес.
LUK 21:3 — Пхэнав тумэнги чячес, — пхэнляс о Исус, — адая чёри пхивли тхэдяс бут алаендар.
LUK 21:4 Вай алаи дэнас пумарэ барвалимастар, ай ой пэ чёримастар тхэдяс алаи, со латэ сас бэшымаски.
LUK 21:5 Кана о мануша зборисаилэ катар храми, одолэстар, сар ов урявдо шукарэ барэнца тай барвалимаса э манушэнгерэса, кай андэ э Дэвлэски, о Исус пхэнляс:
LUK 21:6 — Кан авэл вахыти, кана алаестар, со тумэ атхэ дикхен, на кан ачёл бар опрэ бар, алаи кан овэл хурдярдо.
LUK 21:7 Лэс пхучлэ: — Сикляримарина, кана адава кан овэл? Тай со сикаипэ кан сикавэл, кай пашол адава вахыти?
LUK 21:8 Ов пхэнляс: — Дикхен, никхон тэ на хохавэл тумэн, вай бут кан авэн тал Мэ навэстэ, кан пхэнэн: «Адава Мэ» тай «О вахыти ало». Ма джян пал лэндэ.
LUK 21:9 Кана тумэ кан шунэн катар чингара тай кай ваздиндилэ дюнядэс, ма трашан. Адава алаи камэл тэ овэл буруни, ай о бытима кан овэл на чяльти.
LUK 21:10 О Исус пхэнэлас: — О дюняс кан ваздиндёл опэр дюняс, о патишайлыки опэр патишайлыки.
LUK 21:11 Кан изравэл бут лачес э пху, сарсавэ тханэндэ кан овэл бокх тай насвалиматэс, кан овэн бут трашавнэ вахытя, тай кан сикавдён барэ сикаиматэс опрэ.
LUK 21:12 Ай дага ангал отхэ, сар адава алаи кан овэл, тумэн кан астарэн тай кан кувдиен. Тумэн кан анэн андэ синагогя тай кан чен андэ пханля, кан тхэн ангал патишая тай ангал сагбудэс-пракураторя, тай алаи адава андар Мэ навэстэ.
LUK 21:13 Дэчи тумэндэ кан овэл вахыти тэ сикавэн тумаро пакяпэ.
LUK 21:14 Тай ма тюшундиен ангал одолэстар, со тумэнги тэ пхэнэн, тэ кутардиен тумэн,
LUK 21:15 вай Мэ кан дав тумэн асавке зборэс тай асавки годи, кай никхон андар тумарэ душманендэ нащи кан пхэнэл я кан тэрдёл мамуй тумэндэ.
LUK 21:16 Тумэн кан пхукавэн джи тумарэ дада, дэя, пхрала, тухумя тай амала, тай сарсавэн андар тумэндэ кан мударэн.
LUK 21:17 Алаи на кан дэхэн тумэн андар Мэ навэстэ,
LUK 21:18 ай били екх бал на кан пэрэл тумарэ шэрэстар.
LUK 21:19 Даяндиен тай кан кутардиен тумаро бэшыпэ.
LUK 21:20 Кана тумэ кан дикхен о Иерусалими агорадимэ салдатенца, тэ джянэн, кай о вахыти лэски хурдяримаско пашэ.
LUK 21:21 Дэчи одола, кон си андэ Иудея, мэ нашэн андэ горадэс, кон си андэ диз — мэ нашэн андар латэ, кон си на андэ диз — мэ на джян андэ латэ,
LUK 21:22 вай адава кан овэл о вахыти э покиндимаско, кана кан овэл алаи, со си яздимэ.
LUK 21:23 Касэвэти э насвалянги пуёстэ тай кон хавдярэн колиндэса андэ одола деса, вай баро джюнгалипэ кан авэл опэр адая пху, тай холи кан чёрдёл опэр адалэ дюнястэ.
LUK 21:24 О мануша кан мэрэн катар камас, тай лэн кан гелэн пханлэн андэ алаи ко дюнядэс. О Иерусалими кан таптадиен о джятя мануша, тай аякха джи одолэ вахытески, бискай о вахыти лэнго на кан бытиел.
LUK 21:25 Опэр кхам, чюнут тай чергэня кан овэл сикаипэ, ай опэр пху о мануша кан овэн андэ израимастэ тай касэвэтестэ катар бэбэря ки бошы панеско.
LUK 21:26 Он кан овэн бизораки катар траш ангал хурдярдипэ, кай авэл опэр дюняс, тай джи опрунэ зора кан изран.
LUK 21:27 Тай дэчи о мануша кан дикхен э Чявэс э Манушыканэс, кай авэл опэр булутя зораса тай барэ намеса.
LUK 21:28 Кана адава кан лэл тэ овэл, ущен тай ваздэн тумарэ шэрэ, вай тумаро кутардипэ си пашэ.
LUK 21:29 Дэчи Ов пхукавдяс лэнги акасавко пхукаипэ: — Дикхен карин инжыри тай карин алаи ко тэрэкя.
LUK 21:30 Кана опэр лэндэ овэн патря, тумэ джянэн, кай пашол анкха милай.
LUK 21:31 Аякха ли атхэ, кана тумэ кан дикхен, кай адава овэл, дэчи джянэн, о Патишайлыки э Дэвлэско си пашэ.
LUK 21:32 Пхэнав тумэнги чячипэ: дага на кан бытиел о дюняс адалэ вахытеско, сар алаи адава кан овэл.
LUK 21:33 О булутя тай э пху кан накхен, ай Мэ зборэс на кан накхен.
LUK 21:34 Дикхен, тумарэ илэски тэ на овэн пхаро катар пэскеритико бэшыпэ, матипэ тай катар бэшымаско касэвэти, тай адава дес тэ на астарэл тумэн бирдэн,
LUK 21:35 сар капкани. Адава дес кан авэл опэр алаи ко мануша, кай бэшэн опэр алаи ки пху.
LUK 21:36 Ма совэн тай манген э Дэвлэс, тай тумэ тэ овэн зоралэ, тэ на пэрэн андэ алаи адава, со камэл тэ овэл, тай тэ тэрдён ангал Чяво ко Манушыкано.
LUK 21:37 Кажын дес о Исус сиклярэлас андэ храми, ай бэлвэле джялас опэр Маслинэнго горас тай овэлас отхэ састи рат.
LUK 21:38 Ай эртэс сабахтан о дюняс кидэласпэс андэ храми, тэ шунэн Лэс.
LUK 22:1 Пашолас мисяфири Писное Питэнго, кай бучёлас Пэсах.
LUK 22:2 О барэ попазя тай о сикляримаря э Тхэдимаски родэнас, сар тэ мударэн э Исусес, ами трашанас катар дюняс.
LUK 22:3 Дэчи о Сатанас гело андэ Иуда, савэски пхэнэнас Искариот, о екх андар дэшудуй.
LUK 22:4 О Иуда гело тай зборисаило э барэ попазенца тай э салдатенца андар храми, сар тэ дэл лэндэ э Исусес.
LUK 22:5 Одола лошасаилэ тай пхэнлэ, кай кан покинэн лэски.
LUK 22:6 О Иуда пхэнляс лачё тай лиляс тэ родэл вахыти, кана э Исусеса на кан овэл дюняс, тэ пхукавэл Лэс.
LUK 22:7 Уло о дес э Писное Питэнго, кана камэлас тэ чинэн пэсахески бакрорэс,
LUK 22:8 тай о Исус бичялдяс э Пётарэс тай э Иоаннес: — Джян тай гортярэн амэнги э пэсахеско хапэ.
LUK 22:9 — Катэ Ту мангес, амэ тэ гортярас? — пхучлэ он.
LUK 22:10 Ов пхэнляс: — Кана тумэ кан авэн андэ диз, кан дикхен манушэс, кай гелэл кхоро панеса. Джян пал лэстэ андэ кхер, катэ ов кан дэл,
LUK 22:11 тай пхэнэн э сагбуски э кхерэскерэски: «О Сикляримари пхучел тут: "Кай о тхан, катэ Мэ кан хав э пэсахеско хапэ Мэ сиклярдэнца?"»
LUK 22:12 Ов кан сикавэл тумэнги баро тхан андэ кхер опрэ, катэ си алаи гортярдо; отхэ да гортярэн хапэ.
LUK 22:13 Он гелэ, тай алаи уло аякха, сар пхэнляс лэнги о Исус, тай он гортярдэ э пэсахеско хапэ.
LUK 22:14 Кана ало о вахыти, о Исус тай Лэскерэ апостоля кидинэпэс пал конас.
LUK 22:15 О Исус пхэнляс лэнги: — Мэ бут манглём тэ хав адава Пэсах тумэнца ангал Мэ хурлукестэ.
LUK 22:16 Пхэнав тумэнги, Мэ на кан хав генэ лэс джи одолэ вахытески, бискай ов на кан овэл андэ Патишайлыки ки Дэвлэско.
LUK 22:17 Лиляс о кадеи, мангляс андар лэстэ э Дэвлэс, Ов пхэнляс: — Лэн адава кадеи тай пиен андар лэстэ алаи.
LUK 22:18 Пхэнав тумэнги, кай Мэ на кан пияв катар имишы ки дракхако джи одолэ вахытески, бискай на кан авэл э Дэвлэско Патишайлыки.
LUK 22:19 Дэчи Ов лиляс о манро тай мангляс андар лэстэ э Дэвлэс, пхагердяс лэс тай диняс лэндэ зборэнца: — Адава си Мо тэни, дино андар тумэндэ. Керэн адава, кана тюшундиен Мандар.
LUK 22:20 Аякха лиляс ли о кадеи пал хапэ тай пхэнляс: — Адава кадеи — о нэво завети, колимэ Мэ ратэса, саво андар тумэндэ чёрдёл.
LUK 22:21 Аки, о васт одолэско, кон пхукавэл Ман, опэр екх конас Манца.
LUK 22:22 Э Чявэса э Манушыканэса алаи кан овэл аякха, сар сас пхэнло, ай касэвэти одолэ манушэски, саво кан пхукавэл Лэс.
LUK 22:23 Дэчи о сиклярдэ лилэ тэ пхучен екх аврэстэ, кон андар лэндэ би керэлас асавко.
LUK 22:24 Дэчи он лилэ тэ ирищиен, кон андар лэндэ камэл тэ овэл о баро.
LUK 22:25 О Исус дэчи пхэнляс лэнги: — О патишая дюнядэс барярэнпэс опэр пумарэ манушэндэ, лэнги сагбудэнги пхэнэн, кай он керэн лэнги лачипэ,
LUK 22:26 ай тумэ ма овэн, сар он. Ами мэ овэл алаендар о баро андар тумэндэ сар алаендар о тикно, тай о баро — сар иргати.
LUK 22:27 Вай кон баро: одова, кон овэл пал конас, я одова, кон керэл иргатлыки? Та со, на одова, кон бэшло? Ай Мэ машкарэ тумэндэ сар иргати.
LUK 22:28 Тумэ санусас Манца андэ алаи Мэ пхаримастэ,
LUK 22:29 тай сар Мо Дад диняс Ман патишайлыки, аякха Мэ акана дав лэс тумэн,
LUK 22:30 тумэ тэ хан тай тэ пиен пал Мэ конастэ андэ Мэ Патишайлыкестэ. Тумэ кан бэшэн пал ко троня тэ керэн цындос дэшудо породэнги э Израилескерэнги.
LUK 22:31 — Симон, Симон, о Сатанас мангляс, тумэ тэ овэн зумавдэ тай шужардэ, сар о гив катар чёплики,
LUK 22:32 ай Мэ мангавас э Дэвлэс андар тутэ, тэ на нашавэс ту то пакяпэ. Тай кана ту кан авэс Мандэ палэ, зоралякер тэ пхралэн.
LUK 22:33 О Пётар пхэнляс: — Сагбуса, мэ газыри тэ джяв Туса ли андэ пханли, ли ко мэрипэ!
LUK 22:34 Ай о Исус пхэнляс: — Пхэнав туки, Пётар, дага о башно на кан дэл бэбэря авдес, сар ту тривал кан пхэнэс, кай на джянэс Ман.
LUK 22:35 Дэчи о Исус пхучляс лэндэ: — Кана Мэ бичялавас тумэн би кисяко, би гонэско, би минидэнго, на рэсэлас тумэнги со-то? — Алаи рэсэлас, — пхэнлэ он.
LUK 22:36 — Анкха, тэ си тумэндэ киси, лэн ла, лэн ли о гоно, тай тэ нанай тумэндэ камас, дэчи бикнэн тумарэ савутя тай кинэн камас.
LUK 22:37 Пхэнав тумэнги, кай Манца камэл тэ овэл, сар си яздимэ: «Лэс гиндэ сар прахарес». Алаи, со Мандар сас яздимэ, генэ залаг тай кан овэл.
LUK 22:38 О сиклярдэ пхэнлэ: — Дикх, Сагбуса, амэндэ си дуй камадэс. — Адава рэсэл, — пхэнляс о Исус.
LUK 22:39 О Исус, сар екхараи керэлас, гело опэр Маслинэнго горас, тай Лэскерэ сиклярдэ гелэ Лэса.
LUK 22:40 Кана алэ ко тхан, о Исус пхэнляс: — Манген э Дэвлэс, тэ на зумавдён.
LUK 22:41 Ов гело лэндар аборкхески, сар кай чен бар, тэрдило опэр кочендэ тай лиляс тэ мангел э Дэвлэс:
LUK 22:42 — Дадэ, тэ мангес Ту, гел адава кадеи пашал Мандэ. Эй мэ овэл алаи на сар Мэ мангав, ами сар мангес Ту.
LUK 22:43 Дэчи опрал Лэски ало миляики тай зоралякерэлас Лэс.
LUK 22:44 Андэ хурлуки о Исус лиляс тэ мангел э Дэвлэс май лачес, тай кердяспэс Лэско тэри сар каплес ратэски, саво пэрэлас ки пху.
LUK 22:45 Кана Ов ущино тай ало ко сиклярдэ, аракхляс лэн сутэн, вай он сас кхинэ катар касэвэти.
LUK 22:46 — Соски тумэ сутэ? — пхучляс лэн о Исус. — Ущен тай манген э Дэвлэс, тэ на зумавдён.
LUK 22:47 Ов дага пхэнэлас, кана пашыло бут дюняс, ангал джялас одова, саво бучёлас Иуда, о екх андар дэшудуй. Ов пашыло ко Исус, тэ чюмидэл Лэс.
LUK 22:48 О Исус пхэнляс лэски: — Иуда, ту чюмидимаса пхукавэс э Чявэс э Манушыканэс?
LUK 22:49 Кана одола, кон сас э Исусеса, дикхлэ, со кердёлпэс, он пхучлэ: — Сагбуса, ами тэ чялаваса камаса?
LUK 22:50 Тай о екх андар лэндэ чялавдяс э иргатес э барэ попазескерэс тай чиндяс лэско кан катар прави риг.
LUK 22:51 Ай о Исус пхэнляс: — Тэрдярэн, овэл! Ов колисаило ко кан ки иргатеско тай састярдяс лэс.
LUK 22:52 Дэчи о Исус пхэнляс э барэ попазенги, э салдатенги андар храми тай э барэ манушэнги, савэ алэ пал Лэстэ: — Та со, Мэ прахари, кай тумэ алянус камадэнца тай дэстэнца?
LUK 22:53 Мэ алаи о деса сомас тумэнца андэ храми, тай тумэ на лилянус Ман. Ай анкха тумаро вахыти, анкха о барипэ э тэминако.
LUK 22:54 Он астардэ Лэс тай гелдэ андэ кхер ки барэ попазеско. О Пётар астарэласпэс сар дур, джялас пал лэндэ.
LUK 22:55 Машкарэ ки бар тхардэ яг, о Пётар екхетханэ аврэ манушэнца бэшло ки яг.
LUK 22:56 Екх андар иргатинкес дикхляс, сар о Пётар бэшло паш ки яг, лачес дикхляс карин лэстэ тай пхэнляс: — Адава мануш сас Лэса.
LUK 22:57 Ай о Пётар пхэнляс: «На». — Мэ на джянав Лэс, джювлие, — пхэнляс ов.
LUK 22:58 Дэчи кон-то авэр дикхляс лэс тай пхэнляс: — Ту сан екх андар лэндэ. — На, мануша, — пхэнляс о Пётар.
LUK 22:59 Накхло генэ сагати, тай кон-то чячимаса пхэнляс: — Чячес, адава мануш сас Лэса, вай ов галилеяни.
LUK 22:60 Ай о Пётар пхэнляс: — Мануша, мэ на джянав, состар ту пхэнэс! Тай одова вахыти, кана ов дага пхэнэлас, диняс бэбэря о башно.
LUK 22:61 О Сагбус болдиняспэс тай дикхляс карин Пётар. Дэчи ко Пётар ало ки годи о зборэс э Сагбуски, сар Ов пхэнляс лэски: «Бискай дэл бэбэря о башно авдес, ту тривал кан болдэстут Мандар».
LUK 22:62 Тай никлисто о Пётар аври, ов лачес руно.
LUK 22:63 О салдатя, кай дикхенас пал Исус, лилэ тэ асан Лэстар тай тэ марэн Лэс.
LUK 22:64 Он пхандэнас Лэски якха тай пхученас: — Прароки, пхэн, кон Тут чялавдяс?
LUK 22:65 Тай пхэнэнас Лэски бут авэра кушымаски зборэс.
LUK 22:66 Кана уло дес, о барэ мануша э дюняски, о барэ попазя тай о сикляримаря э Тхэдимаски кидинэпэс екхетханэ. Андэ э Исусес тай тхэдэ Лэс ангал синедриони.
LUK 22:67 — Ту тэ сан о Христос, пхэн амэнги, — пхэнэнас он. О Исус пхэнляс: — Мэ тэ пхэнава тумэнги, тумэ на кан пакян.
LUK 22:68 Ай Мэ тумэн тэ пхучява, тумэ Манги на кан пхэнэн.
LUK 22:69 Акана о Чяво о Манушыкано кан овэл бэшло катар прави васт катар Дэвлэски зор.
LUK 22:70 Он алаи лилэ тэ пхучен: — Та со, Ту о Чяво э Дэвлэско? Ов пхэнляс: — Тумэ пхэнэн, кай адава Мэ.
LUK 22:71 Дэчи он пхэнлэ: — Касавке генэ амэнги камэл сикаиматэс? Амэ шунлям адава андар Лэски уштэндэ!
LUK 23:1 Алаи ущинэ тай гелдэ э Исусес ко Пилат.
LUK 23:2 Отхэ он лилэ тэ керэн дошалэс Лэс: — Амэ галилям, кай Адава Мануш гелэл катар чячё дром амарэ дюняс. Ов на мукел тэ покинэн налогя э императорески тай пхэнэл, кай си Ов о Христос, Патишаи.
LUK 23:3 О Пилат пхучляс ко Исус: — Ту о Патишаи э иудеенго? — Ту сам аякха пхэнэс, — пхэнляс о Исус.
LUK 23:4 Дэчи о Пилат пхэнляс э барэ попазенги тай э дюняски: — Мэ на гинав, кай адава Мануш си дошало.
LUK 23:5 Ай он екхараи пхэнэнас пумаро: — Ов Пэ сикляримаса ваздэл э дюняс алаи ки Иудея, ханик ки Галилея, акана ало атхэ.
LUK 23:6 О Пилат шунляс адава тай пхучляс: — Адава Мануш — галилеяни?
LUK 23:7 Кана ов галило, кай о Исус сас андар пху, сави сас тал барипэ ки Иродески, саво сас адава вахыти андэ Иерусалими, ов бичялдяс э Исусес лэстэ.
LUK 23:8 Кана о Ирод дикхляс э Исусес, бут лошасаило, вай чёктан мангелас Лэс тэ дикхел. Ов бут шунляс катар Исус тай ишандиелас, кай Одова кан сикавэл лэски саво-то сикаипэ.
LUK 23:9 Ов пхучелас Лэстар бут, ай о Исус ништо на пхэнэлас.
LUK 23:10 Тэрдэ отхэ о барэ попазя тай о сикляримаря э Тхэдимаски, бут лачес керэнас дошалэс э Исусес.
LUK 23:11 О Ирод тай лэски салдатя прасанас тай марэнас э Исусес, ай дэчи урявдэ опэр Лэстэ шукара савутя тай бичялдэ палэ ко Пилат.
LUK 23:12 Адава дес о Ирод тай о Пилат улэ амала, ай буруни сас душманя.
LUK 23:13 О Пилат кидиняс э барэ попазен, э барэ манушэн тай дюняс,
LUK 23:14 пхэнляс лэнги: — Тумэ андянус мандэ Адалэ Манушэс тай пхэнлянус, кай Ов ваздэл э дюняс. Мэ пхучлём Лэс ангал тумэндэ тай на аракхлём Лэс дошалэс андэ одолэстэ, андэ состэ тумэ Лэс керэн дошалэс.
LUK 23:15 Ли о Ирод на аракхляс андэ Лэстэ нисави дош тай бичялдяс Лэс палэ амэндэ. Сар дикхен, Ов на кердяс ништо, кай камэл тэ мударэн.
LUK 23:16 Оничин мэ кан пхэнав тэ марэн Лэс, ай дэчи тэ мукен.
LUK 23:18 Дэчи алаи екхе сэсеса динэ бэбэря: — Мэрипэ Лэски! Мук амэнги э Вараввес!
LUK 23:19 О Варавва сас бэшло андэ пханли, кай ваздиняс андэ диз чингар тай андар мударипэ.
LUK 23:20 О Пилат мангелас тэ мукел э Исусес тай генэ екхвар лиляс тэ зборизэл лэнца.
LUK 23:21 Ай он генэ дэнас бэбэря: — Опэр хачи Лэс, опэр хачи!
LUK 23:22 О Пилат трито рази пхучляс лэн: — Со джюнгалипэ Ов кердяс? Мэ на аракхлём пал Лэстэ нисави дош, андар савятэ Ов камэл тэ мэрэл. Мэ кан пхэнав тэ марэн Лэс, тай дэчи кан мукав!
LUK 23:23 Ай он май лачес дэнас бэбэря тай мангенас, о Исус тэ овэл мардо опэр хачи. Пумарэ бэбэряса он тхэдэ лэс тэ керэл, со манглэ.
LUK 23:24 О Пилат пхэнляс, кай кан керэл аякха, сар он манглэ.
LUK 23:25 Ов мукляс, сар он манглэ, одолэс, кон сас андэ пханли андар чингар тай андар мударипэ, ай э Исусес диняс андэ лэнги вастэндэ.
LUK 23:26 Кана э Исусес гелэнас, о салдатя астардэ э Симонэс андар Кирени, кай авэлас катар ливади, тхэдэ опэр лэстэ о хачи тай пхэнлэ тэ гелэл лэс пал Исус.
LUK 23:27 Машкарэ бутэ дюнястэ, кай джянас пал Исус, сас ли джювля, савэ марэнас пэс андэ колин тай ровэнас пал Лэстэ.
LUK 23:28 О Исус болдиняспэс лэндэ тай пхэнляс: — Чяя Иерусалимески, ма ровэн Манги, ровэн зиядэ пал тумэндэ тай пал тумарэ пуендэ.
LUK 23:29 Авэл асавко вахыти, кана кан пхэнэн: «Бахталэ э бипуенги, савэндэ на аракхлилэ пуя, тай савэ на хавдярдэ колиндэса!»
LUK 23:30 Дэчи о мануша кан пхэнэн э горадэнги: «Пэрэн опэр амэндэ!» тай э бугоренги: «Учярэн амэн!»
LUK 23:31 Вай э тэрнэ тай зэлэнэ тэрэкеса тэ керэн асавко, ами дэчи со кан овэл э шукеса?
LUK 23:32 Э Исусеса гелэнас тэ мударэн до прахарен.
LUK 23:33 Кана он алэ ко тхан, кай бучёлас Черэпи, отхэ мардэ опэр хачи ли Лэс, ли э прахарен, э екхес ки екх риг, аврэс ки авэр риг Лэстар.
LUK 23:34 О Исус пхэнэлас: — Дадэ, апувикер лэн, вай он на джянэн, со керэн. О салдатя читэ жреби тай паляштылар машкарэ пэстэ о савутя э Исусески.
LUK 23:35 О дюняс сас тэрдо кай дикхен. О барэ мануша асанас Лэстар: — Кутардиелас аврэн! Мэ кутардиел акана Ов Пэс, тэ си Ов э Дэвлэса тхэдо о Христос!
LUK 23:36 Ли о салдатя асанас катар Исус. Он дэнас Лэс шутло винас
LUK 23:37 тай пхэнэнас: — Кутардие Тут, Ту тэ сан о Патишаи э иудеенго!
LUK 23:38 Ай опэр Исус сас яздимэ: «Адава о патишаи э иудеенго».
LUK 23:39 О екх андар мардо опэр хачи о прахари кушэлас Лэс, пхэнэлас: — Та со, Ту на сан о Христос? Кутардие Тут тай амэн!
LUK 23:40 Авэр тэрдярэлас лэс тай пхэнэлас: — Ту катар Дэл на трашас? Вай ли туки кердэ цындос тэ овэс опэр хачи.
LUK 23:41 Амэ мардэ андар амарэ дилэндэ, диндилям андар джюнгалимастэ, саво кердям. Ай Адава Мануш на кердяс ништо джюнгало.
LUK 23:42 Тай ов пхэнляс: — Исус, ма бристэр ман, кана кан авэс андэ Тэ Патишайлыкестэ!
LUK 23:43 — Пхэнав туки чячипэ: авдес ту кан овэс Манца андэ раи, — пхэнляс лэски о Исус.
LUK 23:44 Сас десе паш ко дэшудуй сагатя, тай опэр алаи ки пху уло тэмина джи ко трин сагатя,
LUK 23:45 вай о кхам тэминисаило. Э штора андэ храми пхаравдили ко машкар.
LUK 23:46 О Исус лачес диняс бэбэря: — Дадэ, андэ Тэ вастэндэ дав Мо духос! Ов пхэнляс адава, диняс По тынышы тай муло.
LUK 23:47 Кана о баро, саво сас опэр шэлэндэ, алаи адава дикхляс, ов махтады э Дэвлэс тай пхэнляс: — Адава Мануш чячес сас чячё!
LUK 23:48 Тай алаи о дюняс, кай кидиняспэс тэ дикхел о мэрипэ, дикхляс, со уло, гело кхерэ тай марэлас пэс андэ колин.
LUK 23:49 Тай алаи, кон джянэлас э Исусес, ли о джювля, савэ джянас пал Лэстэ андар Галилея, тэрдэ дурал тай алаи дикхенас.
LUK 23:50 Отхэ сас лачё тай чячё мануш, савэско нав Иосиф. Ов сас екх андар синедриони,
LUK 23:51 ай ов на дэхэлас одова, со он пхэнэнас тай керэнас. О Иосиф сас андар Аримафея андэ Иудея тай ишандиелас э Дэвлэско Патишайлыки.
LUK 23:52 Адава мануш гело ко Пилат тай мангляс о тэни э Исусеско.
LUK 23:53 Ов лиляс о тэни опрал хачи, пакярдяс лэс андэ лёнески басмадэс тай тхэдяс андэ склепи, кердо андэ горас, катэ дага никхас ангал атхэ на пароскердэ.
LUK 23:54 Адава сас о дес э гортяримаско ки суббота, саво авэлас.
LUK 23:55 Пал ко Иосиф гелэ джювля, савэ алэ э Исусеса андар Галилея. Он дикхлэ о склепи тай одова, кай о тэни э Исусеско сас тхэдо андэ.
LUK 23:56 Он алэ палэ, гортярдэ духыдэс тай олия, кай кхандэл шукар. Субботако он сас андэ рагати, сар пхэнэл о Тхэдипэ.
LUK 24:1 Эртэс сабахтан, андэ баштутно дес ки базареско, о джювля лилэ о гортярдэ олиес, кай кхандэн шукар, тай алэ ко склепи.
LUK 24:2 Он дикхлэ, кай о бар, саво пхандэлас о склепи, си пэравдо.
LUK 24:3 Динэ андэ, он на аракхлэ о тэни э Сагбуско э Исусеско.
LUK 24:4 Тэрдэ шаштимэна, он дикхлэ, кай паш лэндэ бирдэн улэ дуй мануша андэ савутендэ, савэ лэнаспэс, сар страпи.
LUK 24:5 Андэ траш о джювля муклэ пумарэ муя карин пху, ай одола пхэнлэ лэнги: — Со тумэ родэн э дживиндэс машкарэ мулэндэ?
LUK 24:6 Лэс атхэ нанай, Ов дживиндило! Тюшундиен, со Ов пхэнэлас тумэнги дага андэ Галилея:
LUK 24:7 «О Чяво о Манушыкано камэл тэ овэл дино андэ васта ки бэзялэнги, тэ мардёл опэр хачи, тай андэ трито дес кан дживиндёл».
LUK 24:8 Дэчи лэнги алэ ки годи о зборэс э Исусески.
LUK 24:9 Алэ палэ катар склепи тай пхукавдэ алаестар э дэшуекхенги тай алаенги аврэнги.
LUK 24:10 Машкарэ одолэндэ, кон пхукавдяс адава э апостоленги, сас э Мария Магдалина, э Иоанна, э Мария э дай э Яковески, тай авэра джювля.
LUK 24:11 Ай о апостоля на пакянилэ, со пхукавдэ о джювля, лэнги сикавдило, кай адава чюче зборэс.
LUK 24:12 Ай о Пётар прастанило ко склепи. Ов бангило, дикхляс андэ тай дикхляс екх э лёнески басмадэс. Ов ало пэстэ кхерэ, шаштимэ алаестар, со уло.
LUK 24:13 Андэ одова дес о дуй андар сиклярдэ джянас андэ диз, сави бучёлас Эммаус, кай си паш ко дэшудуй вэрся катар Иерусалими,
LUK 24:14 тай зборизэнас алаестар, со уло.
LUK 24:15 Тай кана он зборизэнас тай ирищиенас, бирдэн о Исус пашыло тай гело лэнца.
LUK 24:16 Ай он сас сар корэ тай на пэнджярдэ Лэс.
LUK 24:17 О Исус пхучляс лэн: — Состар адава тумэ зборизэн машкарэ тумэндэ опрэ дром? Он тэрдилэ касэвэтлыдэ монца.
LUK 24:18 О екх андар лэндэ, савэско нав Клеопа, пхэнляс: — Ту, файма, андар алаендэ, кон ало андэ Иерусалими, сан екх, саво на джянэл одолэстар, со уло андэ адала деса.
LUK 24:19 — Состар? — пхучляс Ов. — Одолэстар, со уло э Исусеса андар Назарет, — пхэнлэ он. — Ов сас прароки, зорало ангал Дэл тай ангал мануша зборэнца тай дилэнца.
LUK 24:20 Амарэ барэ попазя тай о барэ мануша кердэ цындос Лэски мэримаски тай мардэ опэр хачи.
LUK 24:21 Ай амэ ишандиясас, кай Ов Одова, Кон камэл тэ кутардиел о Израиль. Ами аки, авдес трито дес, сар алаи адава уло.
LUK 24:22 Сарсавэ андар амарэ джювлендэ шаштэрдылар амэн. Он гелэ авдес эртэс сабахтан ко склепи
LUK 24:23 тай на аракхлэ отхэ Лэско тэни, алэ палэ тай пхукавдэ амэнги, кай лэндэ алэ миляикя тай пхэнлэ, кай Ов дживиндо.
LUK 24:24 Дэчи сарсавэ андар амарэ амалэндэ гелэ ко склепи тай дикхлэ алаи, сар пхэнлэ о джювля, ай Лэс он на дикхлэ.
LUK 24:25 О Исус пхэнляс лэнги: — Со тумэ дэнилэ, со тэмэли галён, тэ пакян алаески, со пхэнлэсас о прарокя!
LUK 24:26 Та со, на камэлас о Христос тэ накхел андар алаи адава хурлуки тай дэчи тэ джял андэ Пэ наместэ?
LUK 24:27 Тай лиляс катар Маисей тай алаи ко прарокя тэ галярэл лэнги, со сас пхэнло Лэстар андэ алаи ко Яздипэ.
LUK 24:28 Кана он пашонас ки диз, кай он джянас, о Исус кердяспэс, кай мангел тэ джял англэ,
LUK 24:29 ами он лилэ лачес тэ манген Лэс: — Ачё амэнца, вай бэлвэль си, о дес бытиел. Тай Ов диняс андэ кхер тай ачило лэнца.
LUK 24:30 Пал конас о Исус лиляс о манро, алгышты лэс, пхагердяс тай диняс лэндэ.
LUK 24:31 Дэчи лэнги якха пхутэрдилэ, тай он пэнджярдэ Лэс. Ами Ов уло асавко, кай на дикхиндёл лэнги.
LUK 24:32 Он лилэ тэ пхэнэн екх аврэски: — Та со, на тхаболас андэ амэндэ амарэ илэ, кана Ов зборизэлас амэнца опэр дром тай галярэлас амэнги о Яздипэ?!
LUK 24:33 Он ущинэ тай бирдэн гелэ палэ андэ Иерусалими. Отхэ он аракхлэ э дэшуекхен тай одолэн, кон эсас екхетханэ лэнца.
LUK 24:34 Одола пхэнлэ лэнги, со о Сагбус чячес дживиндило тай сикавдило э Симонэски.
LUK 24:35 Дэчи адала дуй пхукавдэ алаи, со уло лэнца опэр дром, тай одова, сар он пэнджярдэ э Исусес, кана Ов пхагерэлас о манро.
LUK 24:36 Кана он дага зборизэнас, о Исус сикавдяспэс машкарэ лэндэ тай пхэнляс: — Сэлями тумэнги!
LUK 24:37 Он шаштылар катар траш, тюшундиенас, кай дикхен духос.
LUK 24:38 Ов пхэнляс лэнги: — Соски тумэ аякха санус трашавнэ? Соски андэ тумарэ илэндэ нанай пакяпэ?
LUK 24:39 Дикхен карин Мэ вастэндэ тай карин Мэ пинрэндэ. Вай адава Мэ! Колизэн Мандэ тай дикхен. Вай ко духи нанай нэ тэни, нэ кокала, ай Мандэ, сар дикхен, си.
LUK 24:40 Ов пхэнляс адава тай сикавдяс лэнги Пэ васта тай Пэ пинрэ.
LUK 24:41 Он лошазэнас тай шаштиенас, ай дага нащи пакянас. Дэчи о Исус пхучляс лэн: — Тумэндэ атхэ си со-то тэ хав?
LUK 24:42 Он динэ Лэс котор пэко мачё.
LUK 24:43 Ов лиляс тай халас ангал лэндэ.
LUK 24:44 — Адалэстар Мэ пхэнавас тумэнги, кана сомас дага тумэнца, — пхэнляс Ов. — Алаи, со си яздимэ Мандар андэ Тхэдипэ ки Маисееско, ко Прарокя тай андэ Псаломя, камэл тэ овэл.
LUK 24:45 Дэчи Ов пхутэрдяс лэнги годя тэ галён о Яздипэ.
LUK 24:46 — Яздимэ, кай о Христос камэл тэ накхел хурлуки тай ко трито дес тэ дживиндёл андар мулэ, — пхэнляс Ов лэнги.
LUK 24:47 — Ханик андэ Иерусалими, ай дэчи алаи э дюнядэнги кан овэл пхукавдо, тай он андэ Лэско нав кан болдэнпэс пумарэ бэзендар, дэчи кан овэн лэнги муклэ о бэзя.
LUK 24:48 Тумэ гелэн адава габэри э манушэнги.
LUK 24:49 Мэ кан бичялав тумэнги одова, со Мо Дад пхэнляс, кай кан дэл тумэн. Ай бискай тумэ на кан урявэн зор опрал, ачён андэ диз.
LUK 24:50 Дэчи Ов никалдяс лэн андар диз джи ки Вифания, ваздиняс Пэ васта тай диняс алгышы лэн.
LUK 24:51 Ай одова вахыти, сар Ов дэлас алгышы лэн, Ов лиляс тэ дурёл лэндар тай ваздиндило опрэ.
LUK 24:52 О сиклярдэ пэлэ ки пху ангал Лэстэ тай барэ лошаса алэ палэ андэ Иерусалими,
LUK 24:53 катэ екхараи сас андэ храми тай махтадиенас э Дэвлэс.
ACT 1:1 Намлысана Феофил, андэ мэ баштутнэ пхукаимастэ мэ яздым алаестар, со о Исус керэлас тай со Ов сиклярэлас
ACT 1:2 джи одолэ десески, кана андар Шужо Духос пхэнляс э тхэдэнги Лэса апостоленги, со он камэл тэ керэн, тай Ов сас линдо опрэ.
ACT 1:3 Пал Пэ хурлукестэ Ов уло ангал лэндэ дживиндо тай сикавдяс дилэнца, кай си адава чячипэ. Саранда дес о Исус авэлас лэндэ тай пхэнэлас катар Дэвлэско Патишайлыки.
ACT 1:4 Екхвар, кана о апостоля сас екхетханэ, Ов пхэнляс лэнги тэ на ачявэн о Иерусалими, ами тэ ишандиен, со пхэнлило сас э Дадэса. — Адава одова си, со тумэ шунлянус Мандар.
ACT 1:5 Вай о Иоанн болэлас панеса, ай тумэ пал набут дес кан овэн болдэ э Шужэ Духоса.
ACT 1:6 Одола кон сас отхэ, он лилэ тэ пхучен Лэс: — Сагбуса, та со, Ту мангес тэ керэс анкха о патишайлыки э Израилеско, сар сас буруни?
ACT 1:7 Ов пхэнляс лэнги: — На тумари дила си тэ джянэн о вахыти тай о деса, савэ о Дад тхэдяс Пэ зораса.
ACT 1:8 Ай кана опэр тумэндэ кан фулел о Шужо Духос, тумэ кан лэн зор тай Мандар кан пхукавэн андэ Иерусалими, алаи ки Иудея, андэ Самария тай джи ко чети ки пхуяко.
ACT 1:9 Кана Ов пхэнляс адава, ангал лэнги якхендэ сас ваздино опрэ, тай о булути гаравдяс Лэс лэнги якхендар.
ACT 1:10 Он доврус дикхенас опрэ, бискай Ов ваздиндёлас, сар бирдэн паш лэндэ улэ дуй мануша андэ парнэ савутендэ.
ACT 1:11 — Галилеяня, — пхэнлэ он, — со тумэ санус тэрдэ кай дикхен опрэ? Адава о Исус, Саво сас линдо тумэндар опрэ, кан авэл палэ аякха, касавкес тумэ дикхлянус Лэс, сар Ов гело опрэ.
ACT 1:12 Пал отхэ он алэ андэ Иерусалими опрал горас, кай бучёлас Маслинэнго, сави сас надур катар диз, о дурипэ э дромэско, кай муклёлас тэ накхес субботако дес.
ACT 1:13 Он алэ андэ кхер тай ваздинэпэс опрэ, катэ он бэшэнас. Отхэ сас о Пётар тай о Иоанн, о Яков тай о Андрей, о Филипп тай о Фома, о Варфоломей тай о Матфей, о Яков, о чяво э Алфееско, о Симон Зилот тай о Иуда, о чяво э Яковеско.
ACT 1:14 Алаи он кидэнаспэс екхетханэ тэ зборизэн э Дэвлэса. Лэнца сас набут джювля, э дай э Исусески э Мария тай Лэски пхрала.
ACT 1:15 Андэ одола деса о Пётар ущино машкарэ ко пхрала ко пакялэ (отхэ сас шэлубиш мануша) тай пхэнляс:
ACT 1:16 — Пхралалэн, камэлас тэ овэл, со си яздимэ, катэ о Шужо Духос пхэнляс андар Давид катар Иуда, саво гелэлас одолэн, савэ джянас тэ лэн э Исусес.
ACT 1:17 О Иуда сас о екх андар амэндэ тай керэлас амэнца о хэзмэти э апостоленго.
ACT 1:18 (Э ловэнги, савэ лиляс андар пэ канлыкестэ, ов киндяс ливади, ай аякха лачес пэло ки пху, лэстэ пхаро о пэр тай со сас андэ пэр никлисто аври.
ACT 1:19 Адалэстар галилэ алаи, кон бэшэлас ко Иерусалими, тай тхэдэ э ливади опэр пумарэ чибатэ Акелдама, самким «Ратэскири ливади».)
ACT 1:20 Вай андэ книжка ки Псаломенги си яздимэ: «Мэ овэл лэско кхер чючё, мэ на бэшэл никхон андэ» тай «Авэр мэ лэл лэско тхан».
ACT 1:21 Оничин амэнги камэл тэ лас екхес андар одолэ манушэндэ, савэ сас амэнца алаи одова вахыти, кана о Сагбус Исус сас машкарэ амэндэ,
ACT 1:22 одолэ вахытестар, кана о Иоанн болдяс э Исусес, джи одолэ десески, кана о Исус сас линдо амэндар. Ов, сар амэ, камэлас тэ дикхел, кай Ов дживиндило.
ACT 1:23 Пхэнлэ дон: э Иосифес, савэски генэ пхэнэн Вар-Савва я Юст, тай э Матфиес.
ACT 1:24 Тай пхэнлэ э Дэвлэски: — Сагбуса, Ту джянэс о ило кажнеско. О Иуда ачявдяс э апостоленго хэзмэти тай гело отхэ, кай камэлас тэ джял. Сикав амэнги, кас андар адалэ дондэ ту тхэдян лэски тханэстэ.
ACT 1:26 Оничин он читэ жреби, тай пэло опэр Матфий, тай ов сас тхэдо ко дэшуекх апостоля.
ACT 2:1 Уло о дес э Пэиндако, тай алаи он сас екхетханэ.
ACT 2:2 Бирдэн опрал шунлило шуми, саво ушадиел зоралэ балваляки, саво пхэрдяс алаи о кхер, катэ он сас бэшлэ.
ACT 2:3 О сиклярдэ дикхлэ со-то, кай ушадиел э ягаки чибэнги, савэ паляштыларпэс тай тэрдилэ по екх опэр кажнестэ андар лэндэ.
ACT 2:4 Алаи он пхэрдилэ Шужэ Духоса тай лилэ тэ зборизэн опэр аврэ чибэндэ: сар дэлас о Духос лэн тэ пхэнэн.
ACT 2:5 Андэ Иерусалими адава вахыти сас э Дэвлэски иудея андар алаи ко пхуя ки дюняски.
ACT 2:6 Ко шуми кидинэпэс бут дюняс; о мануша шаштиенас, вай кажын андар лэндэ шунляс, сар окола зборизэнас опэр лэски чибатэ.
ACT 2:7 Он бут шаштиенас тай пхученас: — Та со, алаи адала мануша, савэ зборизэн, нанай галилеяня?
ACT 2:8 Сар адава кажни андар амэндэ шунэл лэн, кай зборизэн опэр амарэ чибатэ?
ACT 2:9 Машкарэ амэндэ си парфяня, мидяня, еламитя, одола, савэ бэшэн ки Месапатамия, Иудея тай Каппадокия, Понт тай э правинцыя Азия,
ACT 2:10 Фригия тай Памфилия, Египти, о тхана э Ливияке, савэ паш ко Кирени, одола, савэ бэшэн ко Рим,
ACT 2:11 о иудея тай о празелитя, о критяня тай о арабя. Тай алаи амэ шунас, сар он пхэнэн катар барэ дилэс ки Дэвлэски опэр амарэ чибэндэ!
ACT 2:12 Он шаштиенас, на джянэнас сар адава тэ галён, тай пхученас екх аврэстэ: — Со си адава?
ACT 2:13 Сарсавэ асанас лэндар: — Он пилэ тэрно винас!
ACT 2:14 О Пётар ущино екхетханэ аврэ э дэшуекхенца тай пхэнляс э манушэнги бэбэряса: — О мурша о иудея тай алаи, кон бэшэл ко Иерусалими! Тумэнги тэ овэл галярдо, шунэн лачес, со мэ кан пхэнав.
ACT 2:15 О мануша адала нанай матэ, сар тумэ тюшундиен: анкха вай сабаги си, эня сагатя.
ACT 2:16 Адава овэн о зборэс, савэ пхэнляс о прароки о Иоиль:
ACT 2:17 «Андэ бытимаски деса, — пхэнэл о Дэл, — Мэ кан чёрав о Духос Минро опэр алаи ко мануша. Тумарэ чявэ тай чяя кан пхэнэн сар прарокя, тумарэ тэрнагара кан дикхен дикхиматэс, тай тумарэ пхурэ кан дикхен прарочискя сунэ.
ACT 2:18 Джи опэр иргатя тай опэр иргатинкес Минрэндэ Мэ кан чёрав одола деса Мо Духос, тай он кан пхэнэн сар прарокя.
ACT 2:19 Мэ кан сикавав чюдэс опрэ тай знамениес тэлэ опэр пху: рат, яг тай бут тхув.
ACT 2:20 О кхам кан калёл, ай о чюнут кан овэл ратвало, ангал отхэ, сар кан овэл баро тай махтадимэ дес э Сагбуско.
ACT 2:21 Тай кажни, кон кан дэл икос о нав э Сагбуско, кан овэл кутардимэ».
ACT 2:22 О мурша о израильтяня, шунэн, со мэ тумэнги кан пхэнав. Барэ зоралэ дилэнца, чюдэнца тай сикаиматэнца, сар тумэ джянэн, о Дэл кердяс андар Исус тумэндэ ангал якха, о Дэл сикавдяс амэнги, кай о Мурш о Исус андар Назарет ало Лэстар.
ACT 2:23 Сар мангляс тай тюшунды о Дэл, тумэ мардянус Лэс, кана динянус Лэс андэ васта ко бэзялэ, савэ мардэ Лэс опэр хачи.
ACT 2:24 Ай о Дэл дживиндярдяс Лэс, кутарды андар хурлуки ки мэримаско, тай ко мэрипэ на сас зор Лэс тэ астарэл.
ACT 2:25 О Давид пхэнэл Лэстар: «Сальтя Мэ дикхавас э Сагбус ангал Мандэ: Ов катар прави васт Мандар — Мэ на кан кхелавдяв.
ACT 2:26 Оничин лошазэл о ило Минро, тай лошазэл э чиб, тай о тэни Минро кан бэшэл ишандимаса.
ACT 2:27 Вай Ту на кан мукес Мо духос андэ дюняс ки мулэнго тай на кан дэс Тэ Шужэс тэ овэл прахос.
ACT 2:28 Ту сикавдян Манги о дрома э бэшымаски, Ту кан пхэрэс Ман лошаса ангал муй Тинрэстэ».
ACT 2:29 Пхралалэн, мукен ман тэ пхэнав тумэнги доврус, кай о папус Давид муло тай сас пароскердо. Лэско склепи си амэндэ джи авдес.
ACT 2:30 Ов сас прароки тай джянэлас, кай о Дэл динясас збора совленца тэ тхэл лэски тронестэ екхес андар лэски породатэ,
ACT 2:31 ов дикхелас, со кан овэл, пхэнэлас катар дживиндипэ ки Христоско, кай Ов на сас ачявдо андэ дюняс ки мулэнго тай Лэско тэни на уло прахос.
ACT 2:32 Тай аки, о Дэл дживиндярдяс адалэ Исусес, тай амэ алаи адава дикхлям!
ACT 2:33 Ов сас ваздино э Дэвлэски чяче вастэса тай лиляс катар Дад о Шужо Духос, саво Ов пхэнляс кай кан дэл, тай чёрдяс Лэс опэр амэндэ. Тай анкха тумэ адава дикхен тай шунэн.
ACT 2:34 Вай о Давид на ваздиндило опрэ, ами ов пхэнляс: «Пхэнляс о Сагбус э Сагбуски минрэски: Бэш ко прави васт Мандар,
ACT 2:35 бискай Мэ на керав Тэ душманен скамейка тал Тэ пинрэндэ».
ACT 2:36 Оничин алаи о кхер э Израилеско мэ джянэл одова, кай Адалэ Исусес, Савэс тумэ мардянус ко хачи, о Дэл кердяс Сагбус тай Христос!
ACT 2:37 Кана о мануша шунлэ адава, лилэ пумарэ илэндэ. Он пхученас ко Пётар тай аврэ апостолен: — Пхралалэн, со амэ тэ керас?
ACT 2:38 О Пётар пхэнляс: — Ачявэн тумарэ бэзя, тай кажни андар тумэндэ мэ овэл болдо андэ нав ки Исусеско Христоско. Дэчи о Дэл кан мукел тумэнги тумарэ бэзя тай кан башладиел тумэн о Шужо Духос.
ACT 2:39 Вай адава, кай пхэнлило, си тумэнги, тумарэ пуенги тай одолэнги, кон эси дур: алаенги, кон кан диндёл икос э Сагбуса, амарэ Дэвлэса.
ACT 2:40 Тай бут авэра зборэс о Пётар пхэнэлас лэнги: — Кутардиен тумэн адалэ гарами дюнястар.
ACT 2:41 Одола, савэ лилэ лэнги зборэс, болдэпэс. Одова дес улэ лэнца паш ко трин биня мануша.
ACT 2:42 Он зоралэс астарэнаспэс ко сиклярипэ ки апостоленго, он екхараи сас екхетханэ, пхагерэн о манро тай зборизэн э Дэвлэса.
ACT 2:43 Алаи сас пхэрдэ траш ангал Дэл, вай о апостоля керэнас бут чюдэс тай сикаиматэс.
ACT 2:44 Алаи, савэ пакянас э Дэвлэски, сас екхетханэ, тай алаи лэнго сас екхетханэ.
ACT 2:45 Он бикнэнас пумарэ мангина тай дэнас алаендэ, каски сокабор камэлас.
ACT 2:46 Кажын дес он кидэнаспэс андэ храми, ай ко кхера пхагерэнас о манро тай ханас лошаса тай ивашы илэса,
ACT 2:47 махтадиенас э Дэвлэс, тай алаи андэ дюняс лэн дэхэнас. О Сагбус кажын дес бутярэлас одолэн кон эсас кутардимэ.
ACT 3:1 Екхвар андэ трито сагати, о вахыти, кана мангенас э Дэвлэс, о Пётар тай о Иоанн джянас андэ храми.
ACT 3:2 Андэ адава вахыти отхэ андэ манушэс, саво нащи пхерэлас, сар аракхлило. Лэс кажын дес ачявэнас ки бар, сави бучёлас Шукар, тай ов мангелас ловэ одолэндэ, кон дэлас андэ храми.
ACT 3:3 Кана ов дикхляс э Пётарэс тай э Иоаннес, савэ джянас андэ храми, ов мангляс ли лэндэ.
ACT 3:4 О Пётар тай о Иоанн лачес дикхлэ карин лэстэ, тай о Пётар пхэнляс: — Дикх карин амэндэ!
ACT 3:5 О мануш ваздиняс пэ якха, ишандиелас тэ лэл лэндар со-то.
ACT 3:6 Ай о Пётар пхэнляс: — Руп тай пхол мандэ нанай, ами одова, со си, мэ дав тут. Андэ нав ки Исусеско Христоско андар Назарет — ущи тай пхер!
ACT 3:7 Ов лиляс лэс катар прави васт, кердяс ярдыми тэ ущел, тай бирдэн о патума тай о тубукя э бангески зоралилэ.
ACT 3:8 Ов читяспэс опэр чянгендэ тай лиляс тэ пхерэл. Ов диняс лэнца андэ храми, пхерэлас, челаспэс тай махтадиелас э Дэвлэс.
ACT 3:9 Тай алаи о мануша дикхенас лэс, кай пхерэл тай махтадиел э Дэвлэс.
ACT 3:10 Он ушатэрдиенас андэ лэстэ одолэ манушэс, саво бэшэлас тай мангелас ки Шукар бар ки храмески, тай шаштиенас одолэски, со лэса уло.
ACT 3:11 О чёро астарэласпэс ко Пётар тай ко Иоанн, тай алаи о дюняс шаштимэ агорады лэн андэ одоя риг ки храмески, сави бучёлас колоннада э Саламонески.
ACT 3:12 Кана о Пётар адава дикхляс, ов пхэнляс э дюняски: — Израильтяня, соски тумэн адава аякха шаштэрдиел? Соски тумэ дикхен карин амэндэ аякха, уроди адава амэ амарэ зораса я шужымаса кердям, кай адава мануш пхерэл?
ACT 3:13 О Дэл э Авраамеско, э Исаакеско тай э Яковеско, о Дэл амарэ дадэнго, махтады Пэ Иргатес э Исусес, Савэс тумэ пхукавдянус тай Савэстар болдинянус тумэн ангал Пилат, ай ов мангляс тэ мукел Лэс.
ACT 3:14 Ай тумэ болдинянус тумэн катар Шужо тай Чячё, тай тумэ мангенас, тумэнги тэ мукен э мударимарес.
ACT 3:15 Тумэ мудардянус э Барэс э бэшымаскерэс, ай о Дэл дживиндярдяс Лэс андар мулэ, тай адава амэ дикхлям.
ACT 3:16 О нав Лэско зоралякердяс адалэ манушэс, савэс тумэ дикхен тай джянэн, тай о пакяпэ, саво Лэстар, аиндэрды лэс ангал тумарэ якхендэ.
ACT 3:17 Пхралалэн, мэ галяв, кай тумэ тай тумарэ барэ мануша на джянэнас, со керэн.
ACT 3:18 Екх аякха о Дэл кердяс одова, со Ов пхэнлясас андар алаи ко прарокя, кана пхэнэлас, кай э Христоски кан камэл тэ дикхел хурлуки.
ACT 3:19 Акана, ачявэн тумарэ бэзя тай болдэн тумэн ко Дэл, тумарэ бэзя тэ овэн кхослэ,
ACT 3:20 тай катар Сагбус тэ авэн вахытя рагатески тай Ов тэ бичялэл одолэс, саво камэл тэ авэл тумэндэ, — э Исусес Христос.
ACT 3:21 Ай о Исус камэл тэ ачёл опрэ, бискай на кан авэл вахыти, кана о Дэл кан керэл алаи, савэстар Ов чёктан пхэнэлас андар Пэ шужэ прарокендэ.
ACT 3:22 Вай о Маисей пхэнляс: «Андар тумарэ пхралэндэ о Сагбус, тумаро Дэл, кан тхэл тумэнги прарокес, сар мэ. Тумэ камэл тэ шунэн Лэс андэ алаестэ, со Ов кан пхэнэл тумэнги.
ACT 3:23 Кажни, кон на кан шунэл одолэ Прарокес, кан овэл кувдимэ андар дюняс».
ACT 3:24 Алаи о прарокя, о Самуил тай алаи пал лэстэ, пхэнэнас адалэ десендар.
ACT 3:25 Вай тумэ — о чявэ э прарокенги тай э заветески, саво о Дэл диняс тумарэ дадэн. Ов пхэнляс э Авраамески: «Ти порода кан анэл алгышы алаи э дюняски опэр пху».
ACT 3:26 Кана о Дэл дживиндярдяс Пэ Иргатес, Ов ханик бичялдяс Лэс тумэндэ, тэ алгыштиел тумэн тай тэ пхэнэл кажнески андар тумэндэ тэ ачявэн тумарэ джюнгалэ дилэс.
ACT 4:1 Бискай о Пётар тай о Иоанн пхэнэнас э дюняски, лэндэ пашылэ о попазя, о баро опэр храмески салдатя тай о саддукея,
ACT 4:2 савэ сас холямэна, кай он сиклярэн э дюняс тай пхукавэн одолэстар, кай булуб э Исусески о мануша кан дживиндён андар мулэ.
ACT 4:3 Он астардэ э Пётарэс тай э Иоаннес тай, кай сас бэлвэль, пханлэ лэн джи сабахтаняки.
ACT 4:4 О бут, савэ шунлэ о Габэри, пакянилэ, тай о гиндипэ э пакялэнго барило джи ко пандж биня.
ACT 4:5 Авэр дес о сагбудэс э джемэятески, о барэ мануша тай о сикляримаря э Тхэдимаски кидинэпэс екхетханэ андэ Иерусалими.
ACT 4:6 Отхэ сас о баро попази о Аннас, о Кайафа, о Иоанн, о Александр тай алаи о мануша э породаки э барэ попазески.
ACT 4:7 Он тхэдэ э линдэн ко машкар тай лилэ тэ пхучен лэн: — Со зораса я каски навэстар тумэ кердянус адава?
ACT 4:8 Дэчи о Пётар сас пхэрдо э Шужэ Духоса тай пхэнляс лэнги: — О сагбудэс э дюняски тай о барэ мануша!
ACT 4:9 Тумэ тэ манген авдес амэндар тэ галярас катар лачипэ, саво амэ кердям э бангески, сар ов сас аиндимэ,
ACT 4:10 тай тэ джянэн, тумэ тай алаи о дюняс э Израилеско: адава мануш анкха тэрдо ангал тумэндэ аиндимэ андар нав ки Исусеско Христоско андар Назарет, Савэс тумэ мардянус опэр хачи тай Савэс о Дэл дживиндярдяс андар мулэ!
ACT 4:11 О Исус да си одова Бар, Саво сас чито тумэнца, бутярнэнца, тай Саво уло э угласко бар.
ACT 4:12 Андэ никхастэ аврэстэ кутардипэ нанай, вай нанай диндо манушэнги нисаво авэр нав опэр пху, савэса камэлас амэнги тэ кутардияс амэн.
ACT 4:13 О мануша э Синедрионески дикхлэ о муршыпэ э Пётарэско тай э Иоаннеско тай галилэ, кай он мануша насиклярдэ тай иваша. Ай кана андэ лэндэ пэнджярдэ э сиклярдэн э Исусескерэн, лачес шаштылар.
ACT 4:14 Ай он дикхенас, кай паш лэндэ сас тэрдо аиндимэ мануш, тай нащи ништо лэнги пхэнэнас.
ACT 4:15 Дэчи он пхэнлэ лэнги тэ ачявэн о Синедриони тай лилэ тэ зборизэн машкарэ пэстэ.
ACT 4:16 — Со амэнги тэ керас адалэ манушэнца? — пхэнэнас он. — Алаи, кон бэшэл андэ Иерусалими, джянэн, кай он кердэ бари чюда, тай амэ нащи пхэнас, кай на кердэ.
ACT 4:17 О габэри адалэстар тэ на шунлёл май буглэс машкарэ ко дюняс, эла трашавас лэн, он тэ на пхукавэн никхаски адалэ навэстар.
ACT 4:18 Он динэ икос лэн тай пхэнлэ лэнги никхаски тэ на пхэнэн тай тэ на сиклярэн андэ нав ки Исусеско.
ACT 4:19 Ай о Пётар тай о Иоанн пхэнлэ лэнги: — Тюшундиен тумэ, лачё ангал Дэл тэ шунас тумэн бут, ниш э Дэвлэс?
ACT 4:20 Вай нащи амэ тэ овас тэныки одолэстар, со амэ дикхлям тай шунлям.
ACT 4:21 О мануша э Синедрионески холясаилэ лэнги генэ екхвар тай муклэ, вай на аракхлэ ништо, андар состэ тэ марэн лэн ангал дюняс, вай алаи о мануша махтадиенас э Дэвлэс андар одолэстэ, со уло.
ACT 4:22 Э манушэски, савэса ули адая чюда аиндимаски, сас бут саранда брэшэндар.
ACT 4:23 Кана э Пётарэс тай э Иоаннес муклэ, он алэ пумарэндэ тай пхукавдэ лэнги алаестар, со лэнги пхэнэнас о барэ попазя тай о барэ мануша.
ACT 4:24 Кана о пакялэ адалэстар шунлэ, он екхетханэ ваздинэ по сэси ко Дэл тай пхэнлэ: — Барэя! Ту кердян, со си опрэ, э пху, э моря тай алаи, со андэ лэндэ.
ACT 4:25 Ту пхэнлян э Шужэ Духоса андар ушта амарэ дадэскерэндар тай Тэ иргатескерэндар ки Давидески: «Соски холязэн о дюнядэс тай о мануша тюшундиен чючё?
ACT 4:26 Ваздиндилэ э пхуяки патишая, тай о сагбудэс кидинэпэс екхетханэ мамуй ко Сагбус тай мамуй Лэски Христостэ».
ACT 4:27 Вай чячес улэ екхетханэ андэ адалэ дизатэ о Ирод тай о Понтий Пилат э наиудеенца тай э манушэнца э Израилескерэнца мамуй Тэ шужэ Иргатестэ ко Исус, Савэс Ту макхлян.
ACT 4:28 Он кердэ одова, со Ту чёктан тюшундын тэ керэс Тэ зораса тай Тэ мангимаса.
ACT 4:29 Тай анкха, Сагбуса, дикх карин лэнги трашаимастэ тай дэ Тэ иргатен би трашако тэ пхукавэн Ти збора.
ACT 4:30 Сидэ о васт Тинро тай аиндэрдие э насвалэн, кер сикаипэ тай чюдэс э навэса Тэ шужэ Иргатескерэса э Исусеса!
ACT 4:31 Тай кана он манглэ э Дэвлэс, о тхан, катэ он эсас, изранило, тай он эсас пхэрдэ Шужо Духос тай битрашако пхукавэнас э збора э Дэвлэски.
ACT 4:32 Алаи, савэ пакянилэ, сас екхе илэса тай тынышэса. Никхон на гинэлас, кай лэско мангин си екх лэско, ами алаи лэндэ эсас екхетханэ.
ACT 4:33 О апостоля барэ зораса пхукавэнас катар дживиндипэ ки Сагбуско Исусеско, тай о Дэл пхэрэлас алаен Пи бари мила.
ACT 4:34 Машкарэ лэндэ на сас били екх чёро, вай одола, кастэ сас пхуя тай кхера, бикнэнас лэн, анэнас э бикинимаски ловэ
ACT 4:35 тай тхэнас ко пинрэ ки апостоленги. Адала ловэ палящиенас кажнески одолэски, со камэл.
ACT 4:36 Аки, о Иосиф, савэс о апостоля тхэдэ Варнава (адава си «чяво рагатеско»), о левити катар Кипр,
ACT 4:37 бикиндяс пи ливади, андяс о ловэ тай тхэдяс ко пинрэ ки апостоленги.
ACT 5:1 Екх мануш, савэско нав Анания, екхетханэ пэ ромняса э Сапфираса, бикиндяс по мангин
ACT 5:2 тай паи э ловэнго мукляс пумэнги. Лэски ромни джянэлас адалэстар. Ай со ачило, ов андяс тай тхэдяс ко пинрэ ки апостоленги.
ACT 5:3 О Пётар пхэнляс лэски: — Анания, соски муклян э Сатанас андэ тэ илэстэ, пхэнлян начячипэ э Шужэ Духоски тай гаравдян туки андар ловэ ки ливадяки?
ACT 5:4 Вай э пху джи одолэски, сар ту ла бикиндян, сас тинри, тай о ловэ, савэ лаки лилян, си тинрэ. Соски ту тюшундын асавко? Ту пхэнлян начячипэ на э манушэнги, ами э Дэвлэски.
ACT 5:5 Сар о Анания шунляс адала зборэс, ов пэло, диняс по тынышы. Алаи, кон шунляс адалэстар, лачес трашанилэ.
ACT 5:6 Пашылэ тэрнэ мануша, пакярдэ лэско тэни, никалдэ тай пароскердэ.
ACT 5:7 Тринэ сагатендар али лэски ромни. Ой ништо на джянэлас, со уло.
ACT 5:8 О Пётар пхучляс ла: — Пхэн манги, тумэ тэ ромэса асавки кими бикиндянус э ливади? — Ва, — пхэнляс ой, — асавки.
ACT 5:9 О Пётар пхэнляс лаки: — Со адава тумэ зборисаилянус тэ зумавэн о Духос э Сагбуско? Ту шунэс, кай пхерэн паш удар? Адава авэн одола, савэ пароскердэ тэ ромэс. Он ли тут кан никалэн.
ACT 5:10 Тай одова сагати ой пэли лэски пинрэндэ тай диняс по тынышы. Тэрнэ мануша алэ, дикхлэ ла муля, никалдэ ла тай пароскердэ ла паш ко ром.
ACT 5:11 Алаен э кхангерен тай алаи э манушэн, кон адалэстар шунляс, лиляс бари траш.
ACT 5:12 Андар васта ки апостоленги андэ дюняс кердёлас бут сикаиматэс тай чюдэс. Алаи о пакялэ кидэнаспэс екхетханэ андэ колоннада ки Саламонески.
ACT 5:13 Тай авэра мануша трашанас тэ овэн паш лэндэ, ай о дюняс лэн бут гинэлас.
ACT 5:14 Одолэн, кай пакян э Сагбуски, овэнас май бут тай бут, ли э муршэн, ли э джювлен.
ACT 5:15 О мануша никалэнас аври э насвалэн, тхэнас лэн опэр насилкес тай матразя, хоч о тени э Пётарэско тэ пэрэл опэр лэндэ, кана ов кан накхел пашал.
ACT 5:16 Тай андар диза, кай сас паш ко Иерусалими, авэнас бут дюняс. Он анэнас э насвалэн тай одолэн, андэ савэндэ сас бишужэ духя, тай алаи аиндиенас.
ACT 5:17 О баро попази тай алаи лэски мануша, савэ сас андар джемэяти ки саддукиенго, сас пхэрдэ кизгандилима.
ACT 5:18 Он лилэ э апостолен тай пханлэ лэн андэ дюняски пханли.
ACT 5:19 Ай рати о миляики э Сагбуско пхутэрдяс э бар э пханляки тай никалдяс лэн.
ACT 5:20 — Джян, тэрдён андэ храми, — пхэнляс ов, — тай пхэнэн э манушэнги алаи адалэ нэвэ бэшымастар.
ACT 5:21 Он шунлэ, алэ эртэс сабахтан андэ храми тай лилэ тэ сиклярэн. Кана ало о баро попази тай лэски мануша, он динэ икос о Синедриони тай алаи э барэ манушэн э Израилескерэн тай бичялдэ ки пханли пал апостоля.
ACT 5:22 Ай кана о иргатя алэ андэ пханли, он на аракхлэ лэн отхэ. Он алэ палэ тай пхукавдэ:
ACT 5:23 — Амэ дикхлям, кай э пханляки бар лачес пханли, ай ки бар сас тэрдэ салдатя. Ай кана амэ диням андэ, амэ никхас отхэ на аракхлям.
ACT 5:24 Кана о баро опэр храмески салдатя тай о барэ попазя шунлэ лэн, он лачес шаштылар тай на джянэнас, сар адава тэ галён.
ACT 5:25 Дэчи кон-то ало тай пхэнляс лэнги: — Аки, дикхен, мануша, савэн тумэ пханлянус андэ пханли, тэрдэ андэ храми тай сиклярэн э дюняс.
ACT 5:26 Дэчи о баро опэр салдатя гело э иргатенца тай андяс э апостолен. Он би зорако лилэ лэн, вай трашанас, кай о дюняс кан марэл лэн барэнца.
ACT 5:27 Э апостолен андэ тай тхэдэ ангал Синедриони. О баро попази пхэнляс лэнги:
ACT 5:28 — Амэ тумэнги холяса пхэнлям тэ на сиклярэл адалэ навэстар, ай тумэ алаи о Иерусалими пхэрдянус тумарэ сикляримаса тали дошалэн керэн амэн, кай муло Адава Мануш.
ACT 5:29 О Пётар тай авэра апостоля пхэнлэ: — Амэ камэл бут тэ шунас э Дэвлэс, ниш э манушэн!
ACT 5:30 О Дэл амарэ дадэнго дживиндярдяс э Исусес, Савэс тумэ илдынус опэр хачи тай мудардянус.
ACT 5:31 Ай о Дэл ваздиняс Лэс тай бэшавдяс катар прави васт Пэстар сар Барэс тай Кутардимарес, о Израиль тэ ачявэл пэ бэзя тай о Дэл тэ апувикерэл лэн.
ACT 5:32 Амэ адава алаи дикхлям. Тай екхетханэ амэнца о Шужо Духос, Савэс о Дэл диняс одолэн, кон шунэл Лэс.
ACT 5:33 Кана одола, кон эсас отхэ, шунлэ адава, он холясаилэ тай манглэ тэ мударэн лэн.
ACT 5:34 Тай дэчи ущино екх андар Синедриони, фарисеи, кай бучёлас Гамалиил, о сикляримари э Тхэдимаско, гиндо алаи э дюняса. Ов пхэнляс тэ гелэн э апостолен савэ-то вахытески.
ACT 5:35 Дэчи ов пхэнляс: — Израильтяня, лачес тюшундиен одолэстар, со тумэ кидэнтумэн тэ керэн адалэ манушэнца.
ACT 5:36 На чёктан ало атхэ о Февда, кердяс пэс саво-то намлыс. Пал лэстэ гело паш ко штаршэл мануша, ай кана ов сас мудардо, дэчи алаи, кон джялас пал лэстэ, нашлэ кон кай, тай алаи быты би ништоско.
ACT 5:37 Пал лэстэ сас о галилеяни о Иуда. Ов ало о вахыти, кана сас о яздипэ, тай гелдяс э дюняс пал пэстэ. Ли ов муло, тай лэски мануша нашлэ, кон кай.
ACT 5:38 Оничин анкха пхэнав тумэнги: ма астарэн адалэ манушэн. Мукен лэн. Тэ си одоя дила, со манген он тэ керэн, манушыкани, ой кан пэрэл.
ACT 5:39 Тэ си ой катар Дэл, тумэ нащи лэн кан тэрдярэн, ами тумэ кан овэн душманя э Дэвлэски. Он пакянилэ лэски зборэнги.
ACT 5:40 Он андэ э апостолен тай пхэнлэ лэн тэ марэн. Вай он генэ екхвар пхэнлэ лэнги тэ на пхэнэн катар нав ки Исусеско тай муклэ лэн.
ACT 5:41 О апостоля гелэ андар Синедриони лошанэ одолэски, кай лэнца уло асавко ладжяво андар нав ки Исусеско.
ACT 5:42 Тай кажын дес андэ храми тай андэ кхера он на тэрдёнас тэ сиклярэн тай тэ пхукавэн о Лошано Габэри катар Исус Христос.
ACT 6:1 Андэ адала деса, кана о гиндипэ э сиклярдэнго лиляс тэ барёл, о эллинистя лилэ тэ ровэнпэс опэр еврея. Он пхэнэнас, кай одола бристэнас лэнги пхивлен, кана дагытиенас кажын дес о хапэ.
ACT 6:2 Дэчи о Дэшудуй динэ икос алаи э сиклярдэн тай пхэнлэ: — Нанай лачё амэнги тэ ачявас э бути э збораки э Дэвлэскеряки тай тэ ласамэн э бутяса э конадэнгеряса.
ACT 6:3 Оничин, пхралалэн, лэн андар тумарэндэ эфта манушэн лаче намеса тай пхэрдэ Духоса тай годявэримаса, тай амэ кан тхас опэр лэндэ адая дила.
ACT 6:4 Ай амэ генэ кан мангас э Дэвлэс тай кан керас э бути э збораки.
ACT 6:5 Адая дила алаи дэхлэ, тай тхэдэ э Стэфанес, манушэс, пхэрдо пакямаса тай Шужэ Духоса, э Филиппес, э Прохорес, Никанорес, Тимонэс, Парменэс тай Никалаес, о празелитес андар Антиохия.
ACT 6:6 Лэн тхэдэ ангал апостоля, тай одола манглэ э Дэвлэс тай тхэдэ опэр лэндэ пумарэ васта.
ACT 6:7 Э збора э Дэвлэски джялас, тай о гиндипэ э сиклярдэнго андэ Иерусалими чяльти бутёлас, джи о бут попазя пакянилэ.
ACT 6:8 О Стэфан, мануш, пхэрдо Дэвлэски лачимаса тай зораса, керэлас андэ дюняс барэ чюдэс тай сикаиматэс.
ACT 6:9 Э Стэфанеса лилэ тэ ирищиен сарсавэ мануша андар синагога, сави бучёлас Синагога э Муклэнги. Отхэ генэ пхерэнас о киренца тай о александрийца, тай генэ о мануша андар Киликия тай андар правинцыя Азия.
ACT 6:10 Ай он ништо нащи кердэ мамуй э годявэримаски тай э зораки Духоски, савэнца пхэнэлас о Стэфан.
ACT 6:11 Дэчи он сиклярдэ сарсавэ манушэн тэ пхэнэн: «Амэ шунлям, сар о Стэфан пхэнэлас хохаимаски зборэс катар Маисей тай катар Дэл».
ACT 6:12 Он ваздинэ э дюняс, э барэн тай э сикляримарен э Тхэдимаскерэн. Он пэлэ опэр Стэфан, астардэ лэс тай сюрюдылар андэ Синедриони.
ACT 6:13 Отхэ он тхэдэ хохавнэ манушэн, савэ пхэнлэ: — Адава мануш екхараи пхэнэл мамуй ко шужо храми тай мамуй ко Тхэдипэ.
ACT 6:14 Амэ шунлям, сар ов пхэнэлас, кай о Исус андар Назарет кан хурдярэл адава храми тай кан паровэл о тхэдипэ, саво диняс амэн о Маисей.
ACT 6:15 Алаи, кон бэшэлас андэ Синедриони, лачес дикхенас карин Стэфан, кай о муй лэско уло, сар муй миляикеско.
ACT 7:1 Дэчи о баро попази пхучляс э Стэфанес: — Адава аякха?
ACT 7:2 О Стэфан пхэнляс: — Пхралалэн тай дадалэн! Шунэн ман. О Дэл э намеско сикавдяс Пэс амарэ дадэски э Авраамески, кана ов бэшэлас дага андэ Месапатамия, ангал отхэ, сар ов ало андэ Харран.
ACT 7:3 «Ачяв ти пху тай тэ тухумен, — пхэнляс Ов лэски, — тай джя ки пху, сави Мэ туки кан сикавав».
ACT 7:4 Озаман о Авраам ачявдяс э пху э халдеенги тай ало андэ Харран. Отхар, пал ко мэрипэ лэски дадэскерэстэ, о Дэл андяс э Авраамес андэ адалэ пхуятэ, андэ савятэ тумэ анкха бэшэн.
ACT 7:5 Ов на диняс лэс пху джи тикноро котор. Ай о Дэл диняс збора, кай Ов кан дэл адая пху лэстэ тай лэски пуендэ, ай одова вахыти ко Авраам на сас пуёс.
ACT 7:6 О Дэл пхэнляс лэски: «Тэ пуя кан овэн джятя андэ джяти пху; он кан овэн динэ андэ иргатлыки тай кан сидэн хурлуки штаршэл брэш.
ACT 7:7 Ай Мэ кан марав э дюняс, саво кан керэл лэн иргатен, — пхэнляс о Дэл. — Тай дэчи он кан никлён отхар тай кан керэн бути Манги адалэ тханэстэ».
ACT 7:8 Дэчи Ов диняс э Авраамес завети абрезанияко. О Авраам уло о дад э Исаакеско тай кердяс лэски абрезания ко охтото дес, сар аракхлило, о Исаак уло о дад э Яковеско, ай о Яков — дэшудо патриарховенго.
ACT 7:9 О патриархя катар кизгандилима бикиндэ Иосифес андэ Египти. Ай о Дэл сас лэса
ACT 7:10 тай кутарды лэс катар алаи ко хурлуки. Ов диняс э Иосифес мила тай годявэрипэ ангал якха ко фараони, о патишаи э Египтеско. Одова кердяс э Иосифес сагбус алаи э Египтеско тай алаи пэ кхерэско.
ACT 7:11 Пал отхэ андэ Египти тай андэ Ханаан ули бокх тай баро хурлуки, тай амарэ дада нащи аракхенас хапэ.
ACT 7:12 Кана о Яков шунляс одолэстар, кай андэ Египти си гив, ов бичялдяс отхэ амарэ дадэн екхвар.
ACT 7:13 Кана он алэ дувар, о Иосиф пхутэрдяспэс пэ пхралэнги, тай о фараони галило катар тухумя ки Иосифески.
ACT 7:14 Пал отхэ о Иосиф бичялдяс пал пэ дадэстэ пал Яков тай пал алаи пэ тухумендэ, савэ гиндёнас эфтадэша пандж мануша.
ACT 7:15 О Яков ало тэ бэшэл ко Египти, катэ муло ли ов, ли амарэ дадэнги дада.
ACT 7:16 О тэня сас гелдэ андэ Шэхем тай тхэдэ андэ склепи, саво о Авраам киндяс рупаки ко чявэ ки Хаморески андэ Шэхем.
ACT 7:17 Сар пашолас о вахыти тэ овэл о пхэнлипэ, дино э Дэвлэса э Авраамес, барёлас о гиндипэ амарэ дюняско андэ Египти.
ACT 7:18 Аякха сас, бискай андэ Египти на бэшло опэр трони авэр патишаи, саво на джянэлас катар Иосиф.
ACT 7:19 Ов сас ярамази амарэ тухуменца тай керэлас джюнгалипэ амарэ дадэнги: ов тхэлас лэн тэ чен э пуен, савэ аракхлилэ, тэ мэрэн одола.
ACT 7:20 Андэ адава вахыти аракхлило о Маисей, шукар ангал Дэл. Трин чён лэс хавдярэнас андэ дадэско кхер,
ACT 7:21 ай кана камэлас лэс тэ дэн, лэс лиляс э чяй э фараонески тай барярдяс, сар пэ чявэс.
ACT 7:22 О Маисей сас сиклярдо алаи э египтеско годявэрипэ; ов сас зорало ли андэ збора, ли андэ дила.
ACT 7:23 Кана лэски сас саранда брэш, ов мангляс тэ дикхел пэ пхралэн израильтянен.
ACT 7:24 Екхвар ов дикхляс, кай екхес андар лэндэ хорладиел о египтяни, ов сыкылды тай андар пахылыки мудардяс лэс.
ACT 7:25 О Маисей тюшунды, лэски пхрала кан галён, кай о Дэл лэски вастэнца дэл лэн кутардипэ, ай он на галилэ.
ACT 7:26 Авэр дес о Маисей дикхляс, сар дуй израильтяня марэнпэс. Ов мангляс тэ аклаштиел лэн. «Муршалэн, вай тумэ пхрала, — пхэнэлас ов. — Соски хорладиен екхаврэс?»
ACT 7:27 Дэчи о мануш, саво марэлас пэ комшус, диняс бутуря э Маисеес тай пхэнляс: «Кон тхэдяс тут барэс тай цындомарес опэр амэндэ?
ACT 7:28 Я ту мангес тэ мударэс ли ман, сар ич мудардян э египтянес?»
ACT 7:29 О Маисей шунляс асавке зборэс, нашло тай ало андэ пху Мадиам сар джяти. Отхэ лэстэ аракхлилэ дуй чявэ.
ACT 7:30 Тай саранда брэшэндар ко Маисей ало миляики андэ тхардо хлядяло кущёки ки ливади, надур катар горас Синай.
ACT 7:31 О Маисей сас шаштимэ, кана адава дикхляс. Ов пашыло пашэ, зиядэ тэ дикхел, тай шунляс сэси э Сагбуско:
ACT 7:32 «Мэ о Дэл тэ дадэнго, о Дэл э Авраамеско, э Исаакеско тай э Яковеско». О Маисей изралас катар траш тай нащи ваздэлас пэ якха.
ACT 7:33 О Сагбус пхэнляс лэски: «Чи тэ минидэс, вай о тхан, опэр савэстэ ту тэрдо, — шужы пху.
ACT 7:34 Мэ дикхлём о хурлуки Мэ дюняско андэ Египти тай шунлём лэнго роипэ. Мэ фулистинём, тэ кутардияв лэн. Ай акана джя, Мэ бичялав тут андэ Египти».
ACT 7:35 Одолэ Маисеес, савэстар он болдинэпэс тай савэстар пхэнэнас: «Кон тхэдяс тут барэс тай цындомарес?» — о Дэл бичялдяс сар барэс тай кутардимарес андар миляики, саво сикавдяспэс лэски андэ хлядяло кущёки.
ACT 7:36 О Маисей никалдяс лэн тай саранда брэш керэлас чюдэс тай сикаиматэс андэ Египти, ки Лоли моря тай ки ливади.
ACT 7:37 Адава жэ Маисей пхэнляс э израильтяненги: «Андар тумарэ пхралэндэ о Дэл кан тхэл тумэнги Прарокес, сар мандэ».
ACT 7:38 Ов, — одова мануш, саво сас э дюняса андэ ливади; ов сас отхэ амарэ дадэнца тай э миляикеса, саво зборизэлас лэса опэр горас Синай. Ов лиляс дживиндэ зборэс, тэ дэл лэн амэндэ.
ACT 7:39 Амарэ дада на манглэ тэ шунэн лэс, ами болдинэпэс лэстар тай болдинэ пумарэ илэ карин Египти.
ACT 7:40 Он пхэнлэ э Ааронески: «Кер амэнги дэвлэн, савэ кан джян ангал амэндэ, вай амэ на джянас, со уло адалэ Маисееса, кай никалдяс амэн андар Египти».
ACT 7:41 Андэ адала деса он кердэ гурувэс, андэ адалэ идолэски курбани тай лошазэнас э дилаки пэ вастэнгеряки.
ACT 7:42 О Дэл болдиняспэс лэндар тай ачявдяс лэн тэ керэн иргатлыки э опрунэ армияки, сар си яздимэ андэ книжка ки прарокенги: «Кхер Израилеско, анэнас тумэ Манги башладиматэс тай курбанен саранда брэш андэ ливади?
ACT 7:43 Тумэ кердянус тумэнги шавлинен катуна э Молахески тай чергэн тумарэ дэвлэски э Ремфанески, бангёнас ангал лэндэ тай пхеравэнас лэн пэса. Оничин Мэ кан бичялав тумэн андэ пханлипэ дур катар Вавилон».
ACT 7:44 Амарэ дадэндэ андэ ливади сас Катуна Заветески. О Дэл сикавдяс э Маисеески, касавки ой камэл тэ овэл, тай ов аякха да кердяс.
ACT 7:45 Амарэ дада лилэ адая катуна, тай екхетханэ э Исусеса Навескерэса он андэ ла андэ пху ки дюняски, савэн о Дэл кувды ангал лэндэ. Тай аякха сас джи ко деса ки Давидески,
ACT 7:46 савэс дэхэлас о Дэл. О Давид мангелас Лэс тэ мукел тэ аракхел катуна э Яковески кхерэски.
ACT 7:47 Ай о кхер Лэски тхэдяс о Саламон.
ACT 7:48 Ай о Учё Дэл на бэшэл андэ кхера, тхэдэ э манушэнца. О прароки пхэнэл адалэстар:
ACT 7:49 «О булутя — о трони Минро, тай э пху — скамейка тал Мэ пинрэндэ! Касавко тумэ кан тхэн Манги кхер? — пхэнэл о Сагбус. — Катэ си тхан рагатеско Манги?
ACT 7:50 Та со, на Мэ вастэса алаи адава кердо?»
ACT 7:51 Тумэ — дюняс, савэстэ на бангёл э мэн, кастэ баруно ило тай пханлэ кана! Тумэ екхараи тэрдён мамуй ко Шужо Духос, сар тумарэ дада, аякха ли тумэ!
ACT 7:52 Кас андар прарокя тумарэ дада на кувдиенас? Он мудардэ одолэн, кон пхэнэлас, кай кан авэл о Чячё. Анкха тумэ улянус пхукаимаря тай мударимаря!
ACT 7:53 Тумэ лилянус о Тхэдипэ, дино тумэн андар миляикя, ай на кердянус лэс!
ACT 7:54 Кана он шунлэ адава, он холясаилэ тай лилэ тэ хан пумарэ данда катар холи.
ACT 7:55 Ай о Стэфан, пхэрдо Шужо Духос, ваздиняс пэ якха опрэ тай дикхляс о нами э Дэвлэско тай э Исусеско, Саво сас тэрдо катар прави васт ки Дэвлэско.
ACT 7:56 — Дикхен, — пхэнляс ов, — мэ дикхав пхутэрдэ булутя тай э Чявэс э Манушыканэс катар прави васт ки Дэвлэско!
ACT 7:57 Дэчи он екхвар пханлэ пумарэ кана, барэ бэбэряса читэпэс опэр лэстэ.
ACT 7:58 Он сидинэ э Стэфанес пал диз тай лилэ тэ чен андэ лэстэ бара. О дикхимаря э дошаки ачявдэ пумарэ савутя ко пинрэ ки тэрнэ манушэски, саво бучёлас Савл.
ACT 7:59 Кана он ченас андэ Стэфан бара, одова мангелас э Дэвлэс: — Сагбус Исус, лэ о духос минро!
ACT 7:60 Ов пэло опэр кочя тай лачес пхэнляс: — Сагбус, ма хорладие лэн андар адалэ бэзендэ! Адалэ зборэнца ов муло.
ACT 8:1 О Савл сас екхетханэ одолэнца, савэ мудардэ э Стэфанес. Одолэ десестар уло баро кувдипэ опэр Иерусалимски кхангери, тай алаи, булуб катар апостоля, нашлэ андэ алаи ко пхуя ки Иудеяки тай ки Самарияки.
ACT 8:2 Э Дэвлэски мануша пароскердэ э Стэфанес тай лачес ровэнас пал лэстэ.
ACT 8:3 Ай о Савл лачес кувдиелас э кхангери. Ов челаспэс андэ кхера ки пакялэнги, никалэлас э муршэн тай э джювлен тай челас лэн андэ пханли.
ACT 8:4 Озаман о нашлэ пхукавэнас о Лошано Габэри катэ, он накхенас.
ACT 8:5 О Филипп ало андэ екх диз ки Самарияки тай пхукавэлас отхэ катар Христос.
ACT 8:6 Бут дюняс лачес шунэнас одова, со ов пхэнэлас. Он шунэнас лэски зборэс тай дикхенас чюдэс, савэ ов керэлас.
ACT 8:7 Андар бут мануша никлёнас барэ бэбэряса бишужэ духя, тай о бут астардэ тай о банге аиндиенас.
ACT 8:8 Тай андэ диз одолатэ сас бари лош.
ACT 8:9 Сас отхэ екх мануш, саво бучёлас Симон, саво керэлас андэ адалэ дизатэ магия, шаштэрдиелас э манушэн э Самариякерэн. Ов пэстар пхэнэлас, кай си саво-то баро.
ACT 8:10 Алаи о мануша, ли о простоя, ли о намлыдэс, шунэнас лэс, пхэнэнас: — Адава мануш — бари зор э Дэвлэски.
ACT 8:11 Он шунэнас лэс одолэски, кай ов бут вахыти шаштэрдиелас манушэн пэ магияса.
ACT 8:12 Ай кана он пакянилэ э Филиппески, кай пхукавэлас катар Патишайлыки ки Дэвлэско тай катар нав ки Исусеско Христоско, о мурша тай джювля лилэ болдипэ.
ACT 8:13 Ли о Симон пакянило. Ов болдяспэс тай вэркатэ пхерэлас пал Филипп, дикхелас сикаиматэс тай барэ чюдэс тай шаштиелас.
ACT 8:14 Кана о апостоля андэ Иерусалими шунлэ одолэстар, кай андэ Самария пакянилэ э збораки э Дэвлэскеряки, он бичялдэ лэндэ э Пётарэс тай Иоаннес.
ACT 8:15 Одола алэ тай мангенас э Дэвлэс, тэ дэл лэн Шужо Духос.
ACT 8:16 Опэр никхастэ андар лэндэ о Духос дага на ало, он екх сас болдэ андэ нав ки Сагбуско Исусеско.
ACT 8:17 Пал отхэ о Пётар тай о Иоанн тхэдэ опэр лэндэ пумарэ васта, тай он диндилэ о Шужо Духос.
ACT 8:18 О Симон дикхляс, кай о Духос си дино, кана тхэн пумарэ васта о апостоля, ов дэлас лэн ловэ
ACT 8:19 тай пхэнляс: — Дэн ли ман асавки зор, тай одова, опэр кастэ мэ кан тхав мэ васта, тэ диндёл о Шужо Духос.
ACT 8:20 Ай о Пётар пхэнляс: — То руп мэ нашавдёл екхетханэ туса, ту тэ тюшундиес тэ кинэс о башладипэ э Дэвлэско ловэнги!
ACT 8:21 Ту нащи овэс андэ адалэ дилатэ, вай то ило нанай чячё ангал Дэл.
ACT 8:22 Ачяв адава джюнгалипэ тай манг э Сагбус, файма, Ов кан апувикерэл туки асавке тюшундиматэс.
ACT 8:23 Мэ дикхав, кай ту пхэрдо керкипэ тай пханло джянджирэнца начячимаскерэнца.
ACT 8:24 О Симон пхэнляс: — Манген андар мандэ э Сагбус, манца тэ на овэл ништо, со пхэнлянус тумэ.
ACT 8:25 О апостоля пхукавэнас тай пхэнэнас отхэ э збора э Сагбуски. Дэчи он гелэ палэ андэ Иерусалими тай опэр дром пхукавэнас о Лошано Габэри андэ бут самарийскя гава.
ACT 8:26 О миляики э Сагбуско пхэнляс э Филиппески: — Джя ко юги, опэр дром, кай гелэл андар ливади андар Иерусалими ки Газа.
ACT 8:27 О Филипп ущино тай гело. Бирдэн опэр дром ов дикхляс э евнухес андар э Эфиопия. Ов сас намлыс мануш э Кандакияко, э патишаинкако э эфиопенги, тай дикхелас пал алаи лаки барвалимастэ. Ов алосас тэ бангёл ангал Дэл андэ Иерусалими
ACT 8:28 тай акана джялас кхерэ. Ов бэшло андэ пэ урдонестэ тай драпкерэлас прароки Исаия.
ACT 8:29 О Духи пхэнляс э Филиппески: — Пашо адалэ урдонестэ тай джя пашэ.
ACT 8:30 О Филипп прастанило ко урдон тай шунляс, андэ лэстэ кай драпкерэл прароки Исаия. — Ту галёс одова, состар драпкерэс? — пхучляс о Филипп.
ACT 8:31 — Сар манги тэ галяв би галяримаско? — мангляс одова э Филиппес тэ ваздэлпэс тай тэ бэшэл лэса.
ACT 8:32 Ай драпкерэлас ов адава тхан андар Яздипэ: «Сар бакря, Лэс гелэнас ко чиндипэ, сар бакроро си тэрдо би зборэнго ангал одолэстэ, кай моравэл, аякха ли Ов на пхутрэла о ушта Пинрэн.
ACT 8:33 Лэстар асанас тай лилэ о тхэдипэ э чяче цындоско. Кон кан пхукавэл Лэски породатар? Вай Лэско бэшыпэ линдёл катар пху».
ACT 8:34 О евнух пхучляс ко Филипп: — Пхэн манги, кастар атхэ пхэнэл о прароки, пэстар я кастар-то аврэстар?
ACT 8:35 Дэчи о Филипп лиляс тэ галярэл акалэ тханэстар ки Яздимаско тай пхукавдяс лэски Лошано Габэри катар Исус.
ACT 8:36 Он дага джянас опэр дром тай одова вахыти пашылэ савэ-то панестэ. — Дикх, аки пани, — пхэнляс о евнух. — Со на дэл ман тэ лав болдипэ?
ACT 8:38 Ов пхэнляс тэ тэрдярэн о урдон, ли о дуй он, о Филипп тай о евнух, динэ андэ пани, тай о Филипп болдяс лэс.
ACT 8:39 Ай кана он никлистэ андар пани, о Духос э Сагбуско гелдяс э Филиппес, тай о евнух лэс генэ на дикхляс. Лошано ов гело по дром.
ACT 8:40 Ай о Филипп уло андэ диз Ашдод. Ов пхерэлас тай пхукавэлас о Лошано Габэри андэ алаи ко диза, бискай на ало андэ Кесария.
ACT 9:1 О Савл генэ сас холямэ, мангелас мэрипэ э сиклярдэнги э Сагбускерэнги. Ов ало ко баро попази
ACT 9:2 тай мангляс лэстэ о письмадэс э синагогенги андэ Дамаск, ов тэ линдярэл тай тэ анэл андэ Иерусалими алаен, савэн кан аракхел, муршэн я джювлен, кон бэшэлас андэ сиклярипэ «Дром».
ACT 9:3 Кана ов пашолас ки Дамаск, лэс бирдэн агорады о ярэки опрал.
ACT 9:4 Ов пэло ки пху тай шунляс сэси: — Савл, Савл, соски ту Ман кувдиес?
ACT 9:5 — Кон Ту, Сагбуса? — пхучляс о Савл. — Мэ о Исус, Савэс ту кувдиес, — пхэнляс Ов.
ACT 9:6 — Ущи тай джя андэ диз, отхэ туки кан пхэнэн, со туки камэл тэ керэс.
ACT 9:7 О мануша, кай пхерэнас э Савлэса, тэрдэ сакавя: он шунэнас сэси, ай никхас на дикхенас.
ACT 9:8 О Савл ваздиняспэс катар пху, ай кана ов пхутэрдяс пэ якха, уло, кай ов ништо на дикхел; тай андэ лэс вастэндар андэ Дамаск.
ACT 9:9 Трин дес ов сас коро, ништо на халас тай на пиелас.
ACT 9:10 Андэ Дамаск бэшэлас сиклярдо, саво бучёлас Анания. О Сагбус пхэнляс лэски андэ дикхипэ: — Анания! — Ва, Сагбуса, — пхэнляс одова.
ACT 9:11 О Сагбус пхэнляс лэски: — Джя ки улица ки Доврус андэ кхер ко Иуда тай аракх отхэ манушэс андар Тарс, кай си о нав Савл. Ов анкха мангел э Дэвлэс,
ACT 9:12 тай андэ дикхипэ ов дикхляс манушэс, савэско нав сас Анания, саво ало тай тхэдяс опэр лэстэ пэ васта, ов тэ дикхел.
ACT 9:13 О Анания пхэнляс: — Сагбуса, мэ бутэ манушэндар шунлём адалэ манушэстар, одолэстар, сар бут джюнгалипэ ов кердяс Тэ шужэнги андэ Иерусалими.
ACT 9:14 Тай атхэ лэстэ барипэ катар барэ попазя тэ линдярэл алаен, кон дэл икос То нав.
ACT 9:15 Ай о Сагбус пхэнляс лэски: — Джя, вай о мануш адава — Мо мултуки. Ов кан пхукавэл Мэ навэстар э манушэнги бутэ пхуендэ, лэнги патишаенги тай э израильтяненги.
ACT 9:16 Мэ кан сикавав лэски ли одова, сокабор лэски кан камэл тэ овэл хурлуки андар Мэ навэстэ.
ACT 9:17 О Анания гело, диняс андэ одова кхер, тхэдяс опэр Савл пэ васта тай пхэнляс: — Пхрала Савл, о Сагбус о Исус, Саво ало тутэ опэр тэ дромэстэ атхэ, бичялдяс ман тутэ, ту генэ тэ дикхес тай тэ овэс пхэрдо Шужэ Духоса.
ACT 9:18 Одова вахыти сар сипэс пэлэ опрал якха ко Савл, тай ов лиляс тэ дикхел. Ов ущино тай лиляс болдипэ.
ACT 9:19 Дэчи ов халяс, тай лэстэ али э зор. О Савл сас набут деса э сиклярдэнца андэ Дамаск
ACT 9:20 тай бирдэн лиляс тэ пхукавэл андэ синагогя одолэстар, кай о Исус — Чяво Дэвлэско.
ACT 9:21 Алаи, кон лэс шунэлас, шаштиенас тай пхэнэнас: — Та со, на ов мударэлас андэ Иерусалими одолэн, савэ дэнас икос адава нав? Та со, ов на ало атхэ, тэ линдярэл лэн тай тэ гелэл ко барэ попазя?
ACT 9:22 О Савл май барэ зораса сиклярэлас тай галярэлас, кай о Исус си о Христос. Адалэса ов шаштэрдиелас э иудеен, савэ бэшэнас андэ Дамаск.
ACT 9:23 Кана накхло назалаг деса, о иудея тюшундылар тэ мударэн э Савлэс.
ACT 9:24 Ай о Савл галило адалэстар. Он о дес тай э рат дикхенас пал ки бар ки дизаки, тэ мударэн лэс,
ACT 9:25 ай лэски сиклярдэ рати лилэ тай муклэ лэс андэ сэпэти катар дизаки стинас.
ACT 9:26 О Савл ало андэ Иерусалими тай мангелас тэ овэл э сиклярдэнца, ай он трашанас лэстар тай на пакянас, кай ли ов си сиклярдо.
ACT 9:27 О Варнава андяс лэс ко апостоля тай пхукавдяс лэнги одолэстар, сар о Савл опэр дром дикхляс э Сагбус, сар о Сагбус зборизэлас лэса тай сар андэ Дамаск ов баримаса сиклярэлас катар нав ки Исусеско.
ACT 9:28 О Савл сас лэнца саво-то вахыти тай пхерэлас андэ Иерусалими, битрашако сиклярэлас катар нав ки Сагбуско.
ACT 9:29 Ов зборизэлас тай ирищиелас э эллинистенца. Одола манглэ тэ мударэн лэс.
ACT 9:30 Кана о пхрала галилэ адалэстар, он гелдэ э Савлэс андэ Кесария тай отхар бичялдэ лэс андэ Тарс.
ACT 9:31 Озаман э кхангеряки алаи ки Иудея, Галилея тай ки Самария уло рагатеско вахыти. Э кхангери зоралёлас тай барёлас, бэшэлас андэ траш ангал Сагбус. О Шужо Духос керэлас ярдыми э кхангеряки, тай ой барёлас.
ACT 9:32 О Пётар пхерэлас катар тхан ко тхан, мангляс тэ джял ли ко шужэ, кай бэшэнас андэ Лидда.
ACT 9:33 Отхэ сас екх мануш, саво бучёлас Эней. Ов сас астардо тай на ущелас опрал тхан охто брэш.
ACT 9:34 О Пётар пхэнляс лэски: — Эней! О Исус Христос аиндэрдиел тут. Ущи тай кидэ о тхан. Одова вахыти о Эней ущино.
ACT 9:35 Кана алаи, кон бэшэлас андэ Лидда тай Шарон, дикхлэ лэс аиндимэ, он болдинэпэс ко Сагбус.
ACT 9:36 Андэ Яффа сас екх сиклярди, сави бучёлас Тавита, самким «Газель». Ой екхараи керэлас лачипэ тай ярдыми э чёрэнги.
ACT 9:37 Тай аки адава вахыти ой насвалили тай мули. Ла халярдэ тай пашлярдэ опрэ андэ кхер.
ACT 9:38 Э Лидда си надур катар Яффа. Кана о сиклярдэ шунлэ, кай о Пётар сас отхэ, бичялдэ лэстэ дон манушэн тэ манген: — Тэ авэл чяльти амэндэ!
ACT 9:39 О Пётар чяльти гело лэнца. Кана ов ало, лэс гелдэ опрэ андэ кхер. Агорял лэстэ кидинэпэс алаи о пхивля. Он ровэнас тай сикавэнас лэски э рока тай авэра савутя, савэ сивдяс лэнги э Газель, кана ой сас дживинди.
ACT 9:40 О Пётар бичялдяс алаен катар тхан, тэрдило опэр кочендэ тай мангляс э Дэвлэс. Дэчи ов болдиняспэс ки мули тай пхэнляс: — Тавито, ущи! Ой пхутэрдяс пэ якха, дикхляс э Пётарэс тай бэшли.
ACT 9:41 Ов лиляс ла вастэстар тай кердяс ярдыми тэ ущел опэр пинрэ. Дэчи ов диняс икос э шужэн тай э пхивлен тай сикавдяс лэнги э Тавита дживиндя.
ACT 9:42 Адалэстар уло джянло андэ алаи ки Яффа, тай бут мануша пакянилэ э Сагбуски.
ACT 9:43 О Пётар сас андэ Яффа генэ назалаг дес, ов бэшэлас ко Симон, саво керэлас бути э моркхяса.
ACT 10:1 Андэ Кесария сас мануш, саво бучёлас Карнилий, баро опэр шэлэ манушэндэ, андар кагорти, саво пхеравэл нав Италийский.
ACT 10:2 О Карнилий, сар ли алаи лэско кхер, сас мануш, саво керэлас лачипэ тай трашалас катар Дэл. Ов бут дагытиелас ловэ тай екхараи мангелас э Дэвлэс.
ACT 10:3 Екхвар десе паш ко трин сагатя э Карнилиески сас дикхипэ. Ов шужэс дикхелас э Дэвлэски миляикес, саво ало лэстэ тай пхэнляс: — Карнилий!
ACT 10:4 Ов дикхляс карин лэстэ трашаса тай пхэнляс: — Со, сагбуса? О миляики пхэнляс: — О Дэл тюшунды тутар, вай то мангипэ тай ярдыми э чёрэнги ваздиндилэ Лэстэ.
ACT 10:5 Бичял манушэн андэ Яффа, тэ дэн икос он э Симонэс, савэски пхэнэн Пётар.
ACT 10:6 Ов тэрдило ки моря андэ кхер ко Симон, саво керэлас бути э моркхяса.
ACT 10:7 Кана о миляики, кай зборисаило лэса, гело, о Карнилий диняс икос дон пэ иргатен тай лаче салдатес, саво керэлас лэски иргатлыки.
ACT 10:8 Ов пхукавдяс лэнги алаи тай бичялдяс лэн андэ Яффа.
ACT 10:9 Десе авэр дес, кана о бичялдэ пашонас ки диз, паш ко дэшудуй сагатя о Пётар ваздиняспэс опэр кхер тэ мангел э Дэвлэс.
ACT 10:10 Ов сас бокхало тай мангелас тэ хал. Бискай тавэнас хапэ, э Пётарэски сас дикхипэ.
ACT 10:11 Ов дикхелас пхутэрдэ булутя тай сар бугло басмас, саво фулелас опэр пху, пханло штарэ четендар.
ACT 10:12 Андэ адалэ басмастэ сас бут штарэчянгенги гайваня тай одола, савэ балакадиен, тай чирикля.
ACT 10:13 Дэчи сэси пхэнляс лэски: — Ущи, Пётар, чин тай ха.
ACT 10:14 — На, Сагбуса! — пхэнляс о Пётар. — Мэ дага на халём ништо гарами я нашужо.
ACT 10:15 Дэчи о сэси пхэнляс лэски дуйто рази: — Ма пхэн гарами одолэски, со о Дэл шужардяс.
ACT 10:16 Аякха сас тривал, тай одова сагати о басмас сас ваздино опрэ.
ACT 10:17 О Пётар ништо на галёлас, со галярэл адава дикхипэ, кана о мануша, бичялдэ э Карнилиеса, пхучлэ катар кхер ки Симонэско, пашылэ тай тэрдилэ ки бар.
ACT 10:18 Он лилэ тэ пхучен, атхэ тэрдило о Симон, кай бучёл Пётар.
ACT 10:19 О Пётар дага тюшундиелас катар дикхипэ, кана о Духос пхэнляс лэски: — Тут родэн трин мануша.
ACT 10:20 Ущи тай фули тэлэ. Джя лэнца би сидимаско, вай адава Мэ бичялдём лэн.
ACT 10:21 О Пётар фулистино тэлэ тай пхэнляс адалэ манушэнги: — Мэ одова, савэс тумэ родэн. Со дилаки тумэ алянус?
ACT 10:22 Он пхэнлэ: — О баро опэр шэлэ салдатендэ о Карнилий, мануш чячё тай трашал катар Дэл, гиндо алаи э иудеенца, диндило катар шужо миляики збора тэ дэл икос тут андэ пэ кхерэстэ тай тэ шунэл, со ту лэски кан пхэнэс.
ACT 10:23 Дэчи о Пётар диняс икос лэн андэ кхер тай кердяс лэнги лачипэ. Авэр дес о Пётар гело лэнца. Екхетханэ лэса гелэ аякха сарсавэ пхрала андар Яффа.
ACT 10:24 Авэр дес он алэ андэ Кесария. О Карнилий ишандиелас лэн, диняс икос пэ тухумен тай пашэ амалэн.
ACT 10:25 Кана о Пётар ало, о Карнилий дикхляс лэс, пэло лэски чянгендэ тай бангило лэски.
ACT 10:26 Ай о Пётар ваздиняс лэс, пхэнляс: — Ущи, вай ли мэ мануш.
ACT 10:27 О Пётар зборизэлас э Карнилиеса тай ало андэ кхер, катэ кидинэпэс бут дюняс.
ACT 10:28 Ов пхэнляс лэнги: — Тумэ сам джянэн, кай э иудеески на муклёл тэ зборизэл наиудеенца тай тэ авэс лэндэ андэ кхер. Ай о Дэл сикавдяс манги, кай мэ били екхе манушэски на камэл тэ пхэнав гарами я нашужо.
ACT 10:29 Оничин, кана пал мандэ алэ, мэ гелём би сидимаско. Мукен ман тэ пхучяв акана, соски тумэ бичялдянус пал мандэ?
ACT 10:30 О Карнилий пхэнляс: — Штарто дес андэ адалэ вахытестэ, десе паш ко трин сагатя мэ мангавас э Дэвлэс андэ мэ кхерэстэ, сар бирдэн ангал мандэ уло мануш андэ шужэ парнэ савутя.
ACT 10:31 «Карнилий, — пхэнляс ов, — то мангипэ шунлило, тай о Дэл джянэл, кай ту керэс ярдыми э чёрэнги.
ACT 10:32 Бичял манушэн андэ Яффа пал Симон, савэски пхэнэн дага Пётар. Ов ки моря андэ кхер ко Симон, саво керэлас бути э моркхяса».
ACT 10:33 Мэ чяльти бичялдём пал тутэ, тай лачё, кай ту алян. Анкха алаи амэ атхэ, ангал Дэл, тай мангас тэ шунас одова, со о Сагбус диняс тут тэ пхэнэс.
ACT 10:34 О Пётар лиляс тэ пхэнэл: — Акана мэ галяв, кай о Дэл чячес на дикхел карин муй ки манушэско,
ACT 10:35 тай андэ кажни дюнястэ Ов дэхэл одолэс, кон трашал Лэстар тай керэл чячипэ!
ACT 10:36 Ов бичялдяс э дюняски э Израилескерэски Лошано Габэри одолэстар, кай амэ овас лаче Лэса андар Исус Христос, Саво си о Сагбус алаи э манушэнго.
ACT 10:37 Тумэ джянэн одолэ дилэндар, савэ сас андэ алаи ки Иудея, ханик андэ Галилея, кана о Иоанн дэлас икос э манушэн тэ болэнпэс.
ACT 10:38 О Дэл макхляс э Шужэ Духоса тай э зораса э Исусес андар Назарет, тай Ов пхерэлас, керэлас лаче дилэс тай аиндэрдиелас алаен, кон сас андэ зор ки Шэйтанески, вай Лэса сас о Дэл.
ACT 10:39 Амэ дикхлям алаи одова, со о Исус керэлас андэ пху ки иудеенги тай андэ Иерусалими. Лэс мудардэ, илдылар опэр каштуно хачи,
ACT 10:40 ай о Дэл ко трито дес дживиндярдяс Лэс тай диняс Лэс тэ сикавэлпэс э манушэнги —
ACT 10:41 на алаи э дюняски, ами буруни никалдэ э Дэвлэса э дикхимаренги, самким амэнги. Амэ хасас тай пиясас Лэса пал отхэ, сар Ов дживиндило андар мулэ.
ACT 10:42 Ов пхэнляс амэнги тэ сиклярас э манушэн тай тэ пхукавас одолэстар, кай Ов си тхэдо э Дэвлэса, тэ овэс Цындомари э дживиндэнги тай э мулэнги.
ACT 10:43 Лэстар пхукавэн алаи о прарокя тай пхэнэн, кай кажын пакяло андэ Лэстэ диндёл мукипэ бэзенго булуб Лэски навэски.
ACT 10:44 О Пётар дага пхэнэлас адава, кана опэр алаендэ, кай шунэнас лэско Габэри, фулистино о Шужо Духос.
ACT 10:45 О пакялэ иудея, савэнги кердэ абрезания, савэ алэ э Пётарэса, сас шаштимэна, кай о башладипэ э Шужэ Духоско сас чёрдо ли опэр наиудея.
ACT 10:46 Он шунлэ, сар одола пхэнэнас опэр наджянлэ чиба тай махтадиенас э Дэвлэс. Дэчи о Пётар пхэнляс:
ACT 10:47 — Кон на кан мукел, тэ овэн болдэ панеса адала мануша, савэ диндилэ о Духос о Шужо аякха, сар амэ?
ACT 10:48 Тай ов пхэнляс лэнги, тэ лэн болдипэ андэ нав ки Исусеско Христоско. Дэчи о сагбудэс манглэ э Пётарэс тэ ачёл лэнца генэ набут деса.
ACT 11:1 О апостоля тай о пхрала андэ Иудея шунлэ одолэстар, кай о наиудея пакянилэ э Дэвлэски збораки.
ACT 11:2 Оничин, кана о Пётар ало андэ Иерусалими, о пакялэ, савэнги кердэ абрезания, лилэ тэ асан лэстар.
ACT 11:3 — Ту санас одолэндэ, савэнги на кердэ абрезания, тай хасас лэнца, — пхэнэнас он.
ACT 11:4 Дэчи о Пётар пал екхаврэстэ лиляс тэ галярэл лэнги, сар алаи уло.
ACT 11:5 — Мэ сомас андэ диз ки Яффа тай мангавас э Дэвлэс, — пхэнляс ов, — тай адава вахыти мандэ сас дикхипэ: сар баро басмас, саво катар штар четя фулелас опрал доврус отхэ, катэ мэ сомас.
ACT 11:6 Дикхлём андэ лэстэ, мэ дикхлём штарэчянгенги гайванен э пхуякерэн тай э вэшэскерэн, тай одолэн, савэ балакадиен, тай чириклен.
ACT 11:7 Дэчи мэ шунлём сэси, саво пхэнэлас манги: «Ущи, Пётар, чин тай ха».
ACT 11:8 Мэ пхэнлём: «На-на, Сагбуса! Били екхвар мэ на лилём андэ муй ништо гарами я нашужо».
ACT 11:9 О сэси опрал пхэнляс манги дуйто рази: «Ма пхэн гарами одолэски, со о Дэл шужардяс».
ACT 11:10 Аякха сас пхэнло тривал, тай дэчи о басмас сас генэ ваздино опрэ.
ACT 11:11 Одова вахыти ко кхер, катэ мэ сомас, тэрдилэ трин мурша, бичялдэ мандэ андар Кесария.
ACT 11:12 О Духос пхэнляс манги тэ джяв лэнца тай тэ на пхучяв. Аки ли акала шов пхрала гелэ манца, тай амэ алям андэ кхер одолэстэ, кон ман диняс икос.
ACT 11:13 Ов пхукавдяс амэнги одолэстар, сар ов дикхляс андэ пэ кхерэстэ миляикес. О миляики пхэнляс лэски: «Бичял манушэн андэ Яффа пал Симон, савэски пхэнэн Пётар,
ACT 11:14 тай ов кан пхэнэл тумэнги одолэстар, сар ту тай алаи тэ кхерутнэ кан овэн кутардимэна».
ACT 11:15 Кана мэ лилём тэ пхэнав, опэр лэндэ фулистино о Шужо Духос аякха, сар Ов фулистино буруни ли опэр амэндэ.
ACT 11:16 Дэчи мандэ алэ ки годи о зборэс э Сагбуски: «О Иоанн болэлас панеса, ай тумэ кан овэн болдэ Шужэ Духоса».
ACT 11:17 Оничин, о Дэл тэ диняс лэн одова жэ башладипэ, со амэн, савэ пакянилэ андэ Сагбус Исус Христос, ай кон мэ асавко, тэ тэрдяв мамуй ко Дэл?
ACT 11:18 Кана он адава шунлэ, он тэныкисаилэ, ай дэчи махтадылар э Дэвлэс тай пхэнлэ: — Аки, о Дэл диняс ли э наиудеен тэ ачявэн пумарэ бэзя, тай тэ диндён о бэшыпэ!
ACT 11:19 Ай о пакялэ, нашлэ катар кувдипэ, саво уло андар Стэфан, алэ джи ки Финикия, Кипр тай Антиохия, пхукавэнас э Дэвлэски збора екх э иудеенги.
ACT 11:20 Ай сарсавэ андар лэндэ, кай бэшэн андэ Кипр тай Кирени, алэ андэ Антиохия тай лилэ тэ пхукавэн Лошано Габэри катар Сагбус Исус ли э эллинистенги.
ACT 11:21 О васт э Сагбуско сас лэнца, тай о бут пакянилэ тай болдинэпэс ко Сагбус.
ACT 11:22 О габэри адалэстар ало джи ки кхангери андэ Иерусалими. Отхар бичялдэ андэ Антиохия э Варнавес.
ACT 11:23 Кана о Варнава ало тай дикхляс э мила э Дэвлэски, ов лошасаило тай дэлас икос алаен тэ ачён шужэ илэса тай чяче э Сагбуски.
ACT 11:24 О Варнава сас лачё мануш, пхэрдо Шужэ Духоса тай пакямаса, тай бут мануша алэ ко пакяпэ андэ Сагбус.
ACT 11:25 Дэчи о Варнава гело андэ Тарс, тэ родэл отхэ э Савлэс.
ACT 11:26 Тай кана ов аракхляс лэс, андяс лэс андэ Антиохия. Састо брэш он сас андэ антиохийски кхангери тай сиклярэнас бут дюняс. Андэ Антиохия э сиклярдэнги лилэ тэ пхэнэн «христианя».
ACT 11:27 Андэ адава вахыти андар Иерусалими андэ Антиохия алэ набут прарокя.
ACT 11:28 О екх андар лэндэ, саво бучёлас Агав, ущино тай Духоса пхэнляс, кай опэр алаи ки пху кан овэл бари бокх, со ли уло андэ вахыти, кана сас о император Клавдий.
ACT 11:29 Оничин о сиклярдэ гиндэ тэ бичялэн ярдыми э пхралэнги, кай бэшэн андэ Иудея, кастэ сокабор сас тэ дэл.
ACT 11:30 Аякха он ли кердэ, бичялдэ э Варнавес тай э Савлэс тэ гелэн о кидинэ ловэ тай тэ дэн лэн ко барэ мануша.
ACT 12:1 Андэ адава вахыти о патишаи о Ирод линдярдяс сарсавэ манушэн андар кхангери, тэ керэл лэнги джюнгалипэ.
ACT 12:2 Ов пхэнляс тэ мударэл камаса э Яковес, э пхралэс э Иоаннескерэс.
ACT 12:3 Кана ов дикхляс, кай о иудея адалэски лошазэн, ов линдярдяс ли э Пётарэс. Адава уло андэ вахыти, кана сас о мисяфири э Писное Питэнго.
ACT 12:4 Э Пётарэс линдярдэ, пханлэ андэ пханли тай тхэдэ штар группэс по штар салдатя тэ дикхен пал лэстэ. О Ирод мангелас пал ки Пэсах тэ никалэл э Пётарэс ко дюняс.
ACT 12:5 О Пётар сас андэ пханли, ай э кхангери лачес мангелас андар лэстэ э Дэвлэс.
ACT 12:6 Рати ангал отхэ, кай о Ирод камэлас тэ никалэл лэс ко цындос, о Пётар суто сас машкарэ ко дуй салдатя, пханло до джянджирэнца, ай о барэ тэрдэ ангал удар тай дикхен пал пханли.
ACT 12:7 Бирдэн ало миляики э Сагбуско, тай э пханли тхабили ярэкеса. О миляики диняс бутуря э Пётарэс андэ риг тай джянгавдяс лэс. — Ущи дэба! — пхэнляс ов, тай о джянджира пэлэ катар васта ко Пётар.
ACT 12:8 О миляики пхэнляс: — Пхандэ кустик тай уряв минидэс. О Пётар кердяс адава. — Уряв тэ савутя тай джя пал мандэ, — пхэнляс о миляики.
ACT 12:9 О Пётар никлисто пал миляики андар пханли, на галёлас, кай алаи, со керэл о миляики, си чячес. Лэски сикавдёлас, кай ов дикхел дикхипэ.
ACT 12:10 Он накхлэ пашал ангалунэ барэ, дэчи пашал авэра тай пашылэ ки састурни бар, кай гелэл андэ диз. Э бар ой сам пхутэрдили ангал лэндэ, тай он никлистэ. Он накхлэ екх улица, тай бирдэн о миляики на уло.
ACT 12:11 Кана о Пётар галилопэс, ов пхэнляс: — Акана мэ чячес джянав, кай о Сагбус бичялдяс Пэ миляикес тай кутарды ман катар васт ки Иродеско тай одолэ хурлукестар, саво мангелас манги о иудейски дюняс.
ACT 12:12 Галило, со уло, о Пётар гело андэ кхер ки Мария, ки дай ки Иоаннески, савэски генэ пхэнэнас Марк, катэ кидиндилэ тэ манген э Дэвлэс бут дюняс.
ACT 12:13 О Пётар мардяс э бар, тай гели тэ пхутрэл э иргатинка Рода.
ACT 12:14 Ой пэнджярдяс э Пётарэс катар сэси тай бристэрдяс катар лош тэ пхутрэл э бар, прастанили палэ тэ пхэнэл, кай о Пётар тэрдо ки бар.
ACT 12:15 — Ту дэнилилян! — пхэнлэ лаки. Ай ой пхэнэлас, кай си адава чячипэ. — Адава лэско миляики, — гиндэ он.
ACT 12:16 О Пётар озаман генэ марэлас, тай кана он пхутэрдэ э бар тай дикхлэ лэс, улэ шаштимэна.
ACT 12:17 О Пётар сикавдяс лэнги вастэса тэ тэныкизэн тай пхукавдяс, сар о Сагбус никалдяс лэс андар пханли. — Пхукавэн адалэстар э Яковески тай аврэ пхралэнги, — пхэнляс ов лэнги тай гело отхар андэ аврэ тханэстэ.
ACT 12:18 Сабахтан машкарэ ко салдатя уло баро прастаипэ, никхон на джянэлас, со уло э Пётарэса.
ACT 12:19 О Ирод пхэнляс тэ родэн лэс, тай на аракхлэ. Ов зораса пхучляс ко барэ тай пхэнляс тэ мударэн лэн. Дэчи о Ирод гело андар Иудея андэ Кесария тай ачило отхэ саво-то вахыти.
ACT 12:20 О Ирод сас холямэ опэр мануша андар Тир тай Сидон. Одола зборисаилэ машкарэ пэстэ, алэ лэстэ. Он динэ икос пумарэ ригатэ э Бластэс, саво дикхел пал ки патишаеско кхер. Он мангенас лачипэ тэ овэл машкарэ лэндэ, вай лэнги область лэлас о хапэ катар область ки патишаески.
ACT 12:21 Андэ пхэнло дес о Ирод урявдяс патишаитико мантия, бэшло опэр цындомаритико тхан тай пхэнляс лэнги.
ACT 12:22 О мануша лилэ тэ пхэнэн: — Адава о сэси э дэвлэско, ами на мануш!
ACT 12:23 Тай озаман о миляики э Сагбуско мудардяс э Иродес, вай ов на махтады э Дэвлэс, тай о Ирод, хало э кермэнца, муло.
ACT 12:24 Э збора э Дэвлэски джялас дур тай дур.
ACT 12:25 О Варнава тай о Савл кердэ андэ Иерусалими о хэзмэти, саво тхэдо опэр лэндэ, лилэ пэса э Иоаннес, савэски генэ пхэнэнас Марк, тай гелэ палэ.
ACT 13:1 Андэ кхангери андэ Антиохия сас прарокя тай сикляримаря: о Варнава, о Симон, кай бучёлас Нигер, о Луцый андар Кирени, о Манаин, саво барило екхетханэ э сагбуса-тетрархеса э Иродеса, тай о Савл.
ACT 13:2 Екхвар, кана он керэнас иргатлыки э Сагбуски тай астарэнас оразас, о Шужо Духос пхэнляс: — Лэн Манги э Варнавес тай э Савлэс э дилаки, савяки Мэ лэн динём икос.
ACT 13:3 Тай он пал ко оразас тай пал ко мангипэ э Дэвлэс тхэдэ опэр лэндэ пумарэ васта тай муклэ лэн.
ACT 13:4 Адала дуй апостоля, бичялдэ э Шужэ Духоса, гелэ андэ Селевкия, ай отхар гелэ опрал пани ко Кипр.
ACT 13:5 Он алэ андэ Саламис тай отхэ пхукавэнас э Дэвлэски збора андэ синагогя ки иудеенги. Ли о Иоанн сас лэнца тай керэлас ярдыми лэнги.
ACT 13:6 Он накхлэ алаи о острав тай алэ андэ Пафос. Отхэ он дикхлэ екхе иудеес, саво бучёлас Вар-Исус, саво сас магиенго тай хохавно прароки.
ACT 13:7 Ов сас э римски праконсулеса э Сергиеса Павлэса, манушэса барэ годяса. О праконсул диняс икос э Варнавес тай э Савлэс, мангелас тэ шунэл э збора э Дэвлэски.
ACT 13:8 Ай адава Элима, о нав савэско си «магиенго», сас мамуй лэндэ тай мангелас тэ болдэл э праконсулес катар пакяпэ.
ACT 13:9 Дэчи о Савл, ов ли о Павел, пхэрдило Шужо Духос, дикхляс доврус карин Элима
ACT 13:10 тай пхэнляс: — Чяво э Шэйтанеско, ту пхэрдо хохаипэ тай холи, тай на дэхэс нисаво чячипэ! Кана ту кан тэрдёс тэ болавэс о доврудэс дрома э Сагбуски?
ACT 13:11 О васт э Сагбуско мамуй тутэ, ту кан овэс коро саво-то вахыти, на кан дикхес э кхамэско ярэки. Тай озаман агорады лэс тумани тай тэмина. Тай ов лиляс тэ прастал андар риг ки риг, родэлас кас-то, кон тэ гелэл лэс вастэстар.
ACT 13:12 Кана о праконсул дикхляс, со уло, ов пакянило, шаштимэ э сикляримаса катар Сагбус.
ACT 13:13 О Павел тай лэса о мануша гелэ андар Пафос тай алэ андэ Пергия андэ Памфилия. Отхэ о Иоанн ачявдяс лэн тай ало палэ андэ Иерусалими.
ACT 13:14 Андар Пергия он гелэ англэ андэ писидийски Антиохия. Андэ суббота он алэ андэ синагога тай бэшлэ.
ACT 13:15 Пал ко драпкерипэ андар Тхэдипэ тай андар Прарокя о барэ э синагогаки пхэнлэ лэнги: — Пхралалэн, тэ си тумэндэ со-то лачё тэ пхэнэн э манушэнги, пхэнэн.
ACT 13:16 О Павел ущино, сикавдяс вастэса тай пхэнляс: — Муршалэн израильтяня тай алаи, кай трашан катар Дэл, шунэн ман!
ACT 13:17 О Дэл амарэ израилески дюняско лиляс Пэски амарэ дадэн. Ов ваздиняс э дюняс о вахыти, кана ов сас андэ джяти пху андэ Египти, тай зоралэ вастэса никалдяс лэн отхар.
ACT 13:18 Саранда брэш Ов дикхелас пал лэндэ андэ ливади.
ACT 13:19 Ов мудардяс андэ Ханаан эфта дюнядэн тай диняс лэнги пху амарэ дадэндэ.
ACT 13:20 Опэр адалэстэ гело паш ко штаршэл пэинда брэш. Дэчи, джи ко вахыти ки прарокеско ки Самуилеско, о Дэл дэлас лэн цындомарен.
ACT 13:21 Дэчи о дюняс мангляс пэски патишаес, тай о Дэл диняс лэн андар порода ки Вениаминески э Саулес, э чявэс э Кишэскерэс. О Саул сас сагбус саранда брэш.
ACT 13:22 Дэчи о Дэл читяс э Саулес тай кердяс лэнги патишаес э Давидес. Ов пхэнляс лэстар: «Мэ аракхлём э Давидес, э чявэс э Иессеескерэс, манушэс Мэ илэскерэс. Ов кан керэл алаи, со Мэ кан мангав».
ACT 13:23 Андар порода ки Давидески о Дэл, сар пхэнляс, бичялдяс э Израилески Кутардимарес — э Исусес.
ACT 13:24 Ангал отхэ, сар ало о Исус, о Иоанн дэлас икос алаи о дюняс э Израилеско тэ ачявэн пумарэ бэзя тай тэ болэнпэс.
ACT 13:25 Кана о Иоанн бытэрдиелас по хэзмэти, ов пхэнляс: «Кас тумэ гинэн ман? Мэ на Ов. Ай пал мандэ авэл Одова, Кастэ мэ на керав джи тэ пхутрав э кустик э минидэнги ко пинрэ».
ACT 13:26 Пхралалэн, пуя э породаки э Авраамески породаки тай одола, кон трашал катар Дэл! Адава габэри катар кутардипэ сас бичялдо амэндэ!
ACT 13:27 О мануша, кай бэшэн андэ Иерусалими, тай лэнги барэ на пэнджярдэ э Христос, он цындоскердэ Лэс тай одолэса кердэ о зборэс э прарокенги, савэ драпкердён кажни суббота.
ACT 13:28 Он на аракхлэ андэ Лэстэ нисави дош, андар савятэ Ов камэл тэ мэрэл, ай манглэ э Пилатес тэ мударэн Лэс.
ACT 13:29 Кана он кердэ алаи, со Лэстар сас яздимэ, он читэ Лэс опрал каштуно хачи тай тхэдэ андэ склепи.
ACT 13:30 Ай о Дэл дживиндярдяс Лэс андар мулэ,
ACT 13:31 тай генэ бут дес одола, кон ало екхетханэ Лэса андар Галилея андэ Иерусалими, дикхлэ Лэс. Анкха он пхукавэн Лэстар э дюняски.
ACT 13:32 Ай амэ пхукавас тумэнги анкха адава Лошано Габэри: одова, кай о Дэл диняс збора амарэ дадэн,
ACT 13:33 Ов кердяс амэнги, лэнги пуенги, кана дживиндярдяс э Исусес. Адалэстар си яздимэ андэ дуйто псаломи: «Ту Чяво Минро, авдес Мэ аракхлём Тут».
ACT 13:34 Ай одолэстар, кай о Дэл дживиндярдяс Лэс андар мулэ, аякха кай о тэни Лэско генэ на кан овэл прахос, Ов пхэнляс аякха: «Мэ кан дав тумэн шужэ тай бипароимаски алгыша э Давидески».
ACT 13:35 Ай аврэ тханэстэ Ов пхэнэл: «Ту на кан дэс Тэ Шужэски тэ овэл прахос».
ACT 13:36 О Давид андэ пэ вахытестэ керэлас, со мангляс о Дэл. О Давид муло, лэс пароскердэ лэски дадэнца, тай о тэни лэско уло прахос.
ACT 13:37 Одолэстэ, Кас о Дэл дживиндярдяс, на тхабило о тэни.
ACT 13:38 Оничин, пхралалэн, мэ мангав, тумэ тэ джянэн, кай булуб Лэски тумэнги авдес пхукавдёл о мукипэ э бэзенго. О Тхэдипэ э Маисееско нащи керэлас э манушэс чячес,
ACT 13:39 ай кажни, кон пакял э Исусески, булуб Лэски диндёл чячипэ.
ACT 13:40 Дикхен, тэ на овэл тумэнца одова, состар пхэнлёл ко прарокя:
ACT 13:41 «Дикхен, асаимаскерэ, шаштиен тай мэрэн, вай Мэ керав андэ тумарэ десендэ асавко, соски тумэ никана на пакянас, тэ пхукавэнас би тумэнги адалэстар».
ACT 13:42 Кана о Павел тай о Варнава никлёнас андар синагога, лэн манглэ тэ пхэнэн одолэстар генэ авэр суббота.
ACT 13:43 О мануша андар синагога гелэ пэски, ай о бут иудея тай чяче мануша о празелитя гелэ пал Павел тай Варнава. Одола зборизэнас лэнца тай галярэнас лэнги ли англэ тэ бэшэн андэ Дэвлэски мила.
ACT 13:44 Авэр суббота би залагеско алаи э диз кидиняспэс тэ шунэн о зборэс э Сагбуски.
ACT 13:45 Кана о иудея дикхлэ сокабор дюняс, он пхэрдилэ кисгандилима тай лилэ тэ кушэн одова, со пхэнэл о Павел.
ACT 13:46 Дэчи о Павел тай о Варнава битрашако пхэнлэ лэнги: — Э збора э Дэвлэски камэл ангал тэ овэл пхукавди тумэнги. Ай аякха сар тумэ на манген адава тай на гинэн тумэн кай керэн э бибытимаско бэшыпэ, анкха амэ кан пхукавас наиудеенги.
ACT 13:47 Вай аякха о Сагбус пхэнляс амэнги: «Мэ кердём Тут ярэки алаи э дюнядэнги, тай андар Тутэ о кутардипэ тэ джял ко четя ки пхуяки».
ACT 13:48 Кана о наиудея шунлэ адава, он лошазэнас тай махтадиенас э Сагбус андар Лэски зборатэ, тай алаи, савэ камэл тэ овэн андэ бибытимаско бэшыпэ, пакянилэ.
ACT 13:49 Э збора э Сагбуски гили опэр алаи одоя пху.
ACT 13:50 О иудея ваздинэ э чяче джювлен андар намлыдэс хорандадэс тай э барэн э дизакерэн, тай одола ваздинэ родипэ мамуй ко Павел тай ко Варнава тай кувдылар лэн андар пумарэ тханэндар.
ACT 13:51 Дэчи он кактылар о прахос опрал пумарэ пинрэндэ тай гелэ андэ Иконий.
ACT 13:52 О сиклярдэ сас пхэрдэ лошаса тай Шужэ Духоса.
ACT 14:1 Андэ Иконий о Павел тай о Варнава динэ, сар екхараи, андэ иудейски синагога тай пхэнэнас аякха, кай пакянилэ бут иудея тай грекя.
ACT 14:2 Ай о иудея, савэ на пакян, ваздинэ наиудеен тай болдинэ лэн мамуй ко пхрала.
ACT 14:3 Ай о Павел тай о Варнава ачёнас отхэ бут вахыти. Он доврус пхэнэнас, ай о Сагбус зоралякерэлас По габэри катар мила кай дэлас лэн зор тэ керэн сикаиматэс тай чюдэс.
ACT 14:4 О мануша андэ диз паляштыларпэс. Сарсавэ сас андар иудея, ай сарсавэ сас андар апостоля.
ACT 14:5 Ай кана о наиудея тай о иудея екхетханэ пумарэ барэнца манглэ тэ холязэн лэнги тай тэ марэн лэн барэнца,
ACT 14:6 одола галилэ адалэстар, нашлэ андэ диза ки Ликаонияки, андэ Листра тай Дервия тай ко тхана агорял лэндэ,
ACT 14:7 катэ генэ пхукавэнас Лошано Габэри.
ACT 14:8 Андэ Листра бэшэлас мануш, савэски чянга на кхелавэнаспэс. Ов лангалас, сар аракхлило, тай никана на пхерэлас. Ов сас бэшло
ACT 14:9 тай шунэлас одова, со пхэнэлас о Павел. О Павел дикхляс карин лэстэ тай дикхляс, кай одолэстэ си пакяпэ аиндимаски.
ACT 14:10 — Ущи опрэ! — бэбэряса пхэнляс ов э бангески. Одова читяспэс тай лиляс тэ пхерэл.
ACT 14:11 О мануша дикхлэ, со кердяс о Павел, тай лилэ тэ дэн бэбэря опэр ликаонски чиб: — Амэндэ фулистинэ о дэла, кай ушадиен манушэнги!
ACT 14:12 Он тхэдэ э Варнавес Зевс, ай э Павлэс Гермес, вай ов сас баро андэ зборима.
ACT 14:13 Ангал диз сас храми э Зевсеско, тай лэско попази андяс ки дизаки бар гурувэн тай венокя, мангелас екхетханэ э дюняса тэ анэн лэнги курбанес.
ACT 14:14 Кана о апостоля о Варнава тай о Павел шунлэ адалэстар, он пхаравдэ пумарэ савутя, читэпэс андэ дюняс тай лилэ тэ дэн бэбэря:
ACT 14:15 — Галёнтумэн, со тумэ керэн? Амэ асавке мануша, сар ли тумэ! Амэ андямус тумэнги Лошано Габэри, тай амэ мангас, тумэ тэ ачявэн адалэ бифайдаски дэвлэн тай тэ болдэн тумэн ко дживиндо Дэл, Саво кердяс одова, со си опрэ, тай э пху, э моря тай алаи, со си андэ лэндэ.
ACT 14:16 Буруни Ов мукелас э дюнядэн тэ пхерэн кажнески пэ дромэса,
ACT 14:17 ай генэ сикавэлас Пэс, керэлас лачипэ, бичялэлас тумэнги брышым опрал тай имиша андэ по вахыти, дэлас хапэ тай пхэрэлас тумарэ илэ лошаса.
ACT 14:18 Ай джи адалэ зборэнца генэ залаг, тай кан анэнас лэнги курбанес.
ACT 14:19 Ай о иудея, савэ алэ андар Антиохия тай Иконий, бангярдэ э дюняс пэ ригатэ. Э Павлэс мардэ барэнца тай сидинэ пал диз, тюшундиенас, кай ов муло.
ACT 14:20 Ай кана о сиклярдэ кидинэпэс агорял лэстэ, ов ваздиняспэс тай гело палэ андэ диз. Авэр дес он э Варнавеса гелэ андэ Дервия.
ACT 14:21 Он пхукавэнас Лошано Габэри андэ адалэ дизатэ, тай лэндэ улэ бут сиклярдэ. Дэчи он гелэ палэ андэ Листра, Иконий тай Антиохия.
ACT 14:22 Отхэ он зоралякерэнас э сиклярдэн тай пхэнэнас лэнги тэ ачён зоралэ андэ пакяпэ. — Амэнги камэл тэ накхас бут хурлуки ангал отхэ, сар амэ кан дас андэ Дэвлэско Патишайлыки, — пхэнэнас он.
ACT 14:23 О Павел тай о Варнава андэ кажни кхангерятэ тхэдэ барэн, манглэ э Дэвлэс оразаса тай динэ лэн ко Сагбус, андэ Савэстэ он пакянилэ.
ACT 14:24 Дэчи он накхлэ э Писидия тай алэ андэ Памфилия.
ACT 14:25 Пал отхэ, сар он пхукавдэ э збора андэ Пергия, он алэ андэ Атталия.
ACT 14:26 Андар Атталия он накхен опрал пани палэ андэ Антиохия. Атхэ кана-то лэн динэ э Дэвлэски лачимаса тэ керэн бути, сави он анкха бытэрдылар.
ACT 14:27 Кана он алэ андэ Антиохия, он кидинэ э кхангери тай пхукавдэ адалэстар, со кердяс о Дэл андар лэндэ тай сар Ов пхутэрдяс о удар э пакямаско наиудеенги.
ACT 14:28 Отхэ он сас бут вахыти екхетханэ э сиклярдэнца.
ACT 15:1 Андар Иудея андэ Антиохия алэ мануша, савэ лилэ тэ сиклярэн э пхралэн: — Тумэ тэ на керэна абрезания, сар пхэнляс о Маисей, тумэ нащи овэн кутардимэна.
ACT 15:2 Адава андяс ко барэ ирищиматэс тай ко чингара машкарэ лэндэ э Павлэса тай э Варнавеса. Он гиндэ, со о Павел, о Варнава тай набут мануша лэндар кан джян андэ Иерусалими тэ зборизэн адалэстар э апостоленца тай э барэ манушэнца.
ACT 15:3 Э кхангери мукляс лэн, тай он гелэ андар Финикия тай Самария, пхукавэнас отхэ одолэстар, сар наиудея лэн тэ пакян э Дэвлэски. Адава габэри лошаскерэлас алаи э пхралэн.
ACT 15:4 Кана он алэ андэ Иерусалими, он дихлэпэс э кхангеряса, э апостоленца тай э барэ манушэнца тай пхукавдэ лэнги алаестар, со о Дэл кердяс андар лэндэ.
ACT 15:5 Ай о пакялэ, савэ сас андар джемэяти ки фарисеенго, пхэнэнас, о наиудея тэ керэн абрезания тай тэ бэшэн, сар пхэнэл о Тхэдипэ э Маисееско.
ACT 15:6 О апостоля тай о барэ мануша кидинэпэс, тэ зборизэн адалэстар.
ACT 15:7 Пал ко бут зборима о Пётар ущино тай пхэнляс: — Пхралалэн, сар тумэ джянэн, накхло бут вахыти одолэ десестар, сар о Дэл лиляс андар тумэндэ ман тэ пхукавав э збора э Лошанэ Габэрески э наиудеенги, тай он тэ пакян.
ACT 15:8 О Дэл, Саво джянэл э манушэнги илэ, башлады лэнги о Шужо Духос аякха, сар ли амэнги, тай сикавдяс адалэса, кай мукел лэн Пэстэ.
ACT 15:9 Ов на керэл нисаво палящима машкарэ амэндэ тай лэндэ, ай андар пакяпэ шужардяс ли лэнги илэ!
ACT 15:10 Ай соски тумэ зумавэн э Дэвлэс тай тхэн опэр мэня ки сиклярдэнги хамути, саво нащи гелэнас нэ амарэ дада, нэ амэ?
ACT 15:11 Вай амэ пакяс одолэски, кай диндяс кутардипэ андар мила ки Сагбуски Исусески. Аякха кутардиенпэс ли он.
ACT 15:12 Дэчи алаи тэныкисаилэ тай лилэ тэ шунэн о пхукаипэ э Варнавеско тай э Павлэско катар сикаипэ тай катар чюдэс, савэ о Дэл кердяс андар лэндэ машкарэ ко наиудея.
ACT 15:13 Кана он бытырдылар, о Яков пхэнляс: — Пхралалэн, шунэн ман.
ACT 15:14 О Симон пхукавдяс амэнги одолэстар, сар о Дэл баштутнэс ало ко наиудея тай лиляс Пэски дюняс.
ACT 15:15 Адалэстар пхэнэн ли о прарокя, сар си яздимэ:
ACT 15:16 «Дэчи Мэ кан авав тай генэ кан ваздав э пэравди катуна э Давидески. Мэ кан гортярав лако хурдярипэ тай доврус кан тхав ла,
ACT 15:17 тай авэра мануша тай алаи о дюнядэс, савэ сас тхэдэ Мэ навэса, лилэ тэ родэн э Сагбус. Аякха пхэнэл о Сагбус, Саво керэл алаи адава,
ACT 15:18 со Ов джянэл чёктан».
ACT 15:19 Оничин мэ гинав, кай амэ на камэл тэ керас пхарипэ э наиудеенги, савэ авэн ко Дэл.
ACT 15:20 Ами амэ камэл тэ яздияс лэнги письмас, он тэ дурён катар шэя, гарамя э идолэнца, катар кахпэлыки, катар мас ки тасавдэ гайваненго тай катар рат.
ACT 15:21 Вай о Тхэдипэ э Маисееско чёктан пхукавдёл андэ кажни дизатэ тай драпкердёл андэ синагогя кажни суббота.
ACT 15:22 О апостоля тай о барэ мануша екхетханэ э кхангеряса гиндэ тэ лэн сарсавэ манушэн андар пумарэндэ тай тэ бичялэн лэн э Павлэса тай э Варнавеса андэ Антиохия. Он лилэ э Иудас, савэски дага пхэнэнас Вар-Савва, тай э Силас. Адала дуй сас барэ машкарэ ко пхрала.
ACT 15:23 Лэнца бичялдэ акасавко письмас: «Катар пхрала апостоля тай барэ мануша э пхралэнги андар наиудея, савэ си андэ Антиохия, Сирия тай Киликия: Сэлями тумэнги!
ACT 15:24 Амэндэ шунлэ одолэстар, кай сарсавэ мануша, кай алэ амэндар, андэ тумэнги пумарэ зборэнца касэвэти тумарэ илэнги. Ай амэ лэнги ништо адава на пхэнлям.
ACT 15:25 Оничин амэ алаи екхетханэ гиндям тэ лас андар амарэндэ сарсавэ манушэн тай тэ бичялас лэн тумэндэ екхетханэ амарэ багалыдэнца э Варнавеса тай э Павлэса,
ACT 15:26 савэ си газыри тэ мэрэн андар нав амарэ Сагбуско ки Исусеско Христоско.
ACT 15:27 Амэ бичялас тумэндэ э Иудас тай э Силас, тай он зборэнца тэ пхукавэн одова, со амэ яздияс.
ACT 15:28 О Шужо Духос тай амэ гиндям тэ на керас тумэнги пхарипэ ништоса, екх одолэса, со камэл:
ACT 15:29 ма хан хапэ, саво андэ курбани аврэ дэвлэнги, мас тасавдэ гайваненго, рат, тай дурён катар кахпэлыки. Тумэ тэ керэн адава, тумэ кан керэн лачипэ. Ачён Дэвлэса!»
ACT 15:30 О бичялдэ гелэ тай алэ андэ Антиохия. Отхэ он кидинэ э кхангери тай динэ о письмас.
ACT 15:31 О мануша драпкердэ лэс тай лошасаилэ э лаче габэрески.
ACT 15:32 О Иуда тай о Сила, савэ сас прарокя, пумарэ зборэнца зоралякерэнас тай сиклярэнас э пхралэн.
ACT 15:33 Он сас отхэ саво-то вахыти, тай о пхрала лачимаса муклэ лэн одолэндэ, кон лэн бичялдяс.
ACT 15:35 О Павел тай о Варнава ачилэ андэ Антиохия, катэ он бутэ аврэ пхралэнца сиклярэнас тай пхукавэнас э збора э Сагбуски.
ACT 15:36 Вахытестар о Павел пхэнляс э Варнавески: — Эла джяс ко пхрала андэ алаи диза, катэ амэ пхукавасас э збора э Сагбуски, тай кан дикхас, сар лэндэ джял э дила.
ACT 15:37 О Варнава мангляс тэ лэл пэса э Иоаннес, савэски генэ пхэнэнас Марк,
ACT 15:38 ай о Павел на мангелас тэ лэл пэса одолэс, кон ачявдяс лэн андэ Памфилия тай на кердяс ярдыми тэ керэн пумари бути.
ACT 15:39 О ирищима сас асавко, кай он екхаврэстар дурилэ. О Варнава лиляс э Маркес тай гело опрал пани андэ Кипр,
ACT 15:40 ай о Павел лиляс э Силас. О пхрала динэ лэн андэ Сагбуски мила, тай он гелэ ко дром.
ACT 15:41 О Павел накхелас андар Сирия тай Киликия тай зоралякерэлас о кхангеря.
ACT 16:1 О Павел ало андэ Дервия тай Листра. Отхэ бэшэлас сиклярдо, саво бучёлас Тимафей. Э дай э Тимафеески сас пакяли иудейка, ай о дад лэско сас греки.
ACT 16:2 Катар Тимафей лачё пхэнэнас о пхрала андэ Листра тай Иконий.
ACT 16:3 О Павел мангляс тэ лэл лэс пэса ко дром. Тай булуб э иудеенги, савэ бэшэнас одолэ дизэндэ, кердяс лэски абрезания, вай алаи джянэнас, кай о дад э Тимафееско сас греки.
ACT 16:4 О Павел тай кон э сас лэса пхерэнас андар диз андэ диз тай сиклярэнас э пакялэн тэ астарэнпэс ко сиклярипэ ки апостоленго тай ки барэ манушэнго андэ Иерусалими.
ACT 16:5 О кхангеря зоралёнас андэ пакяпэ, тай о гиндипэ э пакялэнго кажын дес бутёлас.
ACT 16:6 Он накхлэ андар Фригия тай Галатия, ай о Шужо Духос на мукляс лэн тэ пхукавэн э збора андэ правинцыя Азия.
ACT 16:7 Он пашылэ ко чети Мисия тай кидинэпэс тэ джян андэ Вифиния, ай о Духос э Исусеско на мукляс лэн,
ACT 16:8 тай он накхлэ э Мисия тай алэ андэ Троас.
ACT 16:9 Рати о Павел дикхляс дикхипэ: лэстэ ало мануш андар Македония. Ов сас тэрдо тай мангелас лэс: — Эла андэ Македония тай кер ярдыми амэнги!
ACT 16:10 Пал адалэ дикхимастэ амэ гиндям, кай о Дэл бичялэл амэн тэ пхукавас лэнги о Лошано Габэри, тай лилэ тэ гортярэнпэс тэ джян андэ Македония.
ACT 16:11 Андар Троас амэ накхлям доврус андэ Самофракия тай отхар авэр дес андэ Неаполь.
ACT 16:12 Андар Неаполь амэ гелям андэ Филиппи, андэ римски калония тай андэ бари диз одолэ ригатэ ки Македония. Отхэ амэ самас набут дес.
ACT 16:13 Андэ суббота амэ никлистям пал бар ки дизаки ки диряв, катэ, сар амэ тюшундиясас, сас тхан тэ зборизас э Дэвлэса. Амэ бэшлям тай лилям тэ зборизас э джювлянца, савэ отхэ кидэнаспэс.
ACT 16:14 Машкарэ лэндэ сас екх, сави бучёлас Лидия, андар диз Фиатира, сави бикнэлас багалыдэс лолэ-синя басмадэс. Э Лидия гинэлас э Дэвлэс, тай о Сагбус пхутэрдяс лако ило одолэстэ, со пхэнэлас о Павел.
ACT 16:15 Пал отхэ, сар ой тай лаки кхерутнэ сас болдэ, ой диняс икос амэн пэстэ. — Тумэ тэ гинэн ман чячя э Сагбуски, дэчи элан тай ачён мандэ андэ кхер, — ой лачес-лачес мангелас, тай амэ кердям аякха.
ACT 16:16 Екхвар, кана амэ джясас ко тхан, катэ зборизасас э Дэвлэса, опэр дром дикхлям екхе иргатинка, андэ савятэ сас духос Питонеско. Дорикеримаса ой анэлас баро казандима пэ сагбудэнги.
ACT 16:17 Э иргатинка джялас пал ко Павел тай пал амэндэ тай дэлас бэбэря: — Адала мануша — иргатя э Уче Дэвлэски! Он пхукавэн тумэнги о дром э кутардимаско!
ACT 16:18 Ой керэлас адава бут деса, тай кана э Павлэс адава быздэрды, ов болдиняспэс тай пхэнляс э духоски: — Андэ Нав ки Исусеско Христоско мэ пхэнав туки: никлё андар латэ! Бирдэн о духос ачявдяс ла.
ACT 16:19 Кана лаки сагбудэс галилэ, кай лэндэ быты о казандима, он астардэ э Павлэс тай э Силас тай сидинэ лэн ко майдани ки дизаки барэ.
ACT 16:20 Он андэ лэн ко преторя ки дизаки тай пхэнлэ: — Адала мануша — иудея, тай он ваздэн касэвэти андэ амарэ дизатэ.
ACT 16:21 Он сиклярэн тэ керас одова, со амэнги, э римляненги, на камэл нэ тэ пакяс, нэ тэ керас.
ACT 16:22 О дюняс екхетханэ лэнца керэлас дошалэн э Павлэс тай э Силас, тай о преторя пхэнлэ тэ пхаравэн опрал лэндэ о савутя тай тэ марэн ровленца.
ACT 16:23 Лэн лачес мардэ тай читэ андэ пханли, ай одолэски, кай дикхел пал пханли, пхэнлэ лачес пал лэндэ тэ дикхел.
ACT 16:24 Кана шунляс, со пхэнлэ лэски, ов пханляс лэн андэ андарутни пханли тай мардяс лэнги пинрэ андэ каштэстэ.
ACT 16:25 Паш ки екхпаш рат о Павел тай о Сила мангенас э Дэвлэс тай дэнас Лэски махтадимаски гиля, ай авэра пханлимаря шунэнас лэн.
ACT 16:26 Бирдэн уло асавко зорало пхуяко израипэ, кай о фундамент э пханляко кхелавдило. Алаи о удара пхутэрдилэ, тай алаи ко пханлимаря о джянджира пэлэ катар пинрэ.
ACT 16:27 Кана э пханляко баро джянгавдило тай дикхляс, кай алаи о удара э пханляки пхутэрдэ, ов лиляс камас тай мангляс тэ мударэл пэс, тюшундиелас, кай алаи о пханлимаря нашлэ.
ACT 16:28 Ай о Павел диняс бэбэря: — Ма кер туки джюнгалипэ! Амэ алаи атхэ!
ACT 16:29 О баро лиляс ярэки, прастанило андэ тай трашаса пэло ангал Павел тай ангал Сила.
ACT 16:30 Ов никалдяс лэн андар тай пхучляс: — Сагбудэс минрэ, со манги тэ керав, тэ овав кутардимэ?
ACT 16:31 — Пакя э Сагбуски Исусески, — пхэнлэ он, — тай ту, тай тэ кхерутнэ кан овэн кутардимэна.
ACT 16:32 Тай он пхукавдэ э збора э Сагбуски лэски тай алаи лэски кхерутнэнги.
ACT 16:33 Одова ратяко вахыти э пханляко баро халярдяс лэнги мардэ тхана тай сас болдо, ов тай алаи лэски кхерутнэ.
ACT 16:34 Ов андяс э Павлэс тай э Силас пэстэ кхерэ тай тхэдяс лэнги конас. Екхетханэ алаи пэ кхерутнэнца ов лошазэлас одолэски, кай пакянило э Дэвлэски.
ACT 16:35 Уло дес, тай о преторя бичялдэ пумарэ иргатен андэ пханли тэ пхэнэн: — Тэ мукен адалэ манушэн.
ACT 16:36 Э пханляко баро пхэнляс э Павлэски: — О преторя пхэнлэ тэ мукав тумэн! Оничин никлён тай джян лачимаса!
ACT 16:37 Ай о Павел пхэнляс: — Он би цындомаско мардэ амэн ангал дюняс, на дихлэ одолэски, кай амэ сам римскя мануша, тай читэ амэн андэ пханли. Анкха он манген амэн тэ мукен аякха, никхон тэ на джянэл? На! Мэ авэн он сам тай мэ никалэн амэн.
ACT 16:38 О иргатя пхэнлэ адалэстар э преторенги, тай кана одола шунлэ, кай о Павел тай о Сила римскя мануша, трашанилэ.
ACT 16:39 Он алэ, пхэнлэ лэнги апувикерэн амэн, никалдэ лэн андар пханли тай манглэ тэ джян андар диз.
ACT 16:40 О Павел тай о Сила никлистэ андар пханли тай гелэ андэ кхер ки Лидия. Отхэ он дикхлэпэс э пхралэнца тай зоралякердэ лэн. Дэчи он гелэ.
ACT 17:1 Он накхлэ э Амфиполь тай Аполлония тай алэ андэ Фессалоники, катэ сас э синагога э иудеенги.
ACT 17:2 О Павел, сар екхараи, гело андэ синагога тай отхэ трин субботэс пал екхаврэстэ зборизэлас э иудеенца катар Яздипэ,
ACT 17:3 галярэлас тай сиклярэлас, кай о Христос камэлас тэ мэрэл тай тэ дживиндёл андар мулэ. — О Исус, Савэстар мэ тумэнги пхукавав, да си о Христос, — пхэнэлас о Павел.
ACT 17:4 Лэнги пакянилэ сарсавэ иудея, аякха ли бут грекя, савэ гинэнас э Дэвлэс, тай бут намлыдэс джювля. Тай алаи он лилэ тэ пхерэн э Павлэса тай э Силаса.
ACT 17:5 Адава ваздиняс кизгандилима андэ аврэ иудеендэ, тай он лилэ налаче манушэн, савэн аракхлэ андэ базари, кидинэ дюняс тай ваздинэ э диз. Он гелэ ко кхер ки Иасонэско, родэнас э Павлэс тай э Силас, тэ никалэн лэн ко дюняс.
ACT 17:6 Кана он лэн отхэ на аракхлэ, он сидинэ э Иасонэс тай аврэ пхралэн ки дизаки барэ. — Адала мануша ваздэн алаи о дюняс, ай анкха алэ атхэ, — дэнас бэбэря о мануша.
ACT 17:7 — Тай о Иасон мукляс лэн андэ по кхер. Он на керэн, со пхэнэл о император, тай пхэнэн, кай си авэр патишаи, Саво бучёл Исус.
ACT 17:8 Кана о дюняс тай э дизаки барэ шунлэ адава, трашанилэ.
ACT 17:9 Он лилэ катар Иасон тай аврэндар баро джерэмэс тай муклэ лэн.
ACT 17:10 Сар ули рат, о пхрала бичялдэ э Павлэс тай э Силас андэ Верия. Он алэ отхэ тай гелэ андэ иудейски синагога.
ACT 17:11 О мануша андэ Верия сас пхутэрдэ илэнца, ниш андэ Фессалоники. Он лачес пакянилэ одолэски, со пхэнэлас о Павел, тай кажын дес сиклёнас о Яздипэ, тэ галён, чячипэ си одова, со он шунлэ.
ACT 17:12 О бут андар лэндэ пакянилэ, пакянилэ ли бут намлыдэс гречянкес тай бут грекя.
ACT 17:13 Ай кана о иудея андэ Фессалоники галилэ одолэстар, кай о Павел пхукавэл э збора э Дэвлэски андэ Верия, он алэ ли отхэ тай лилэ тэ ваздэн э дюняс.
ACT 17:14 О пхрала чяльти бичялдэ э Павлэс ки моря, ай о Сила тай о Тимафей ачилэ андэ диз.
ACT 17:15 Одола, савэ гелдэ э Павлэс, алэ лэса андэ Афини, ай дэчи гелэ палэ э письмаса э Силаски тай э Тимафеески чяльти тэ авэн лэстэ.
ACT 17:16 О Павел ишандиелас пэ амалэн, пхерэлас андэ Афини, тай лэс холяскерэлас, кай сас бут идоля андэ адалэ дизатэ.
ACT 17:17 Ов зборизэлас андэ синагога э иудеенца тай э грекенца, савэ гинэн э Дэвлэс. Кажын дес ов зборизэлас э манушэнца, савэ авэнас андэ базари.
ACT 17:18 Лэса зборизэнас ли философя андар школэс эпикурейцэнги тай стоикенги. Сарсавэ пхученас: — Та со адава чюче-зборэнго мангел тэ пхэнэл? Авэра пхэнэнас: — Сар амэ галяс, ов пхукавэл катар джятя дэла, — вай о Павел пхукавэлас о Лошано Габэри катар Исус тай катар дживиндипэ.
ACT 17:19 Э Павлэс андэ опэр Ареопаг тай манглэ: — Пхукав амэнги, со нэво сиклярипэ си адава, саво ту сиклярэс?
ACT 17:20 Амэ на галяс, со ту пхэнэс, тай амэ мангас тэ джянас, со си адава.
ACT 17:21 О афиняня тай савэ авэнас аврэ дизэндар алаендар бут дэхэнас тэ пхукавэн я тэ шунэн со-то нэво.
ACT 17:22 О Павел тэрдило машкарэ ко Ареопаг тай пхэнляс: — Афиняня! Мэ алаестар дикхав, кай тумэ бут аврэндар гинэн э дэвлэн.
ACT 17:23 Мэ пхеравас агорял тай лачес дикхавас тумарэ шужэ тхана. Опэр екх андар алтари сас яздимэ: «НАДЖЯНЛЭ ДЭВЛЭСКИ». Адалэ наджянлэ Дэвлэстар, Савэс тумэ на джянэн, ами гинэн, мэ пхэнав тумэнги.
ACT 17:24 О Дэл, кай кердяс о дюняс тай алаи, со си андэ лэстэ, си э Сагбуско опрунэско тай э пхуяко. Ов на бэшэл андэ храмя, кай си кердэ э манушэнги вастэнца.
ACT 17:25 Ов на мангел, о мануша тэ керэн Лэски иргатлыки пумарэ вастэнца, сар кай Лэски со-то на рэсэл. Ов Сам дэл алаи э манушэн бэшыпэ, тынышы тай алаи авэр.
ACT 17:26 Екхе манушэстар Ов кердяс алаи э дюняс, тай о мануша тэ пхэрэн алаи э пху, тай ангал гиндяс, кана тай катэ он кан бэшэн.
ACT 17:27 Алаи адава о Дэл кердяс адалэски, о мануша тэ родэн Лэс тай тэ аракхен Лэс, ай Ов ли нанай дур кажнестар андар амэндэ.
ACT 17:28 Вай андэ Лэстэ амэ бэшас, пхерас тай сам, сар адалэстар пхэнэнас савэ андар тумарэ яздимарендэ: «Вай амэ сам Лэски порода».
ACT 17:29 Тай тэ сам э порода э Дэвлэски, дэчи амэ на камэл тэ керас э Дэвлэс пхолякерэс, рупунэс я барунэ идолэс я сарсави-то шавлин, керди, сар мангел тай сар галёл о мануш.
ACT 17:30 Буруни, кана о мануша на джянэнас э Дэвлэс, Ов адалэски пхандэлас Пэ якха, ай акана Ов тхэл алаи э манушэнги вэркатэ тэ ачявэн пумарэ бэзя.
ACT 17:31 Ов тхэдяс о дес, кана Ов кан керэл чячё цындос алаи э дюняски, тай Ов акана аракхляс Манушэс, Саво ли кан овэл о цындомари. Ов сикавдяс адава ангал алаендэ, кай дживиндярдяс Лэс андар мулэ!
ACT 17:32 Кана он шунлэ катар дживиндипэ андар мулэ, сарсавэ андар лэндэ лилэ тэ асан, авэра пхэнлэ: — Адалэстар амэ кан шунас тут авэрвар.
ACT 17:33 Адалэса о Павел гело лэндар.
ACT 17:34 Набут мануша пакянилэ тай лилэ тэ пхерэн пал Павел. Машкарэ лэндэ сас о Дионисий андар Ареопаг, э манушни, сави бучёлас Дамарь, тай авэра.
ACT 18:1 Пал одолэстэ о Павел ачявдяс э Афини тай гело андэ Каринфи.
ACT 18:2 Отхэ ов дикхляс иудеес, савэско нав сас Акила, саво аракхлило андэ Понт. Одова набут дес палэ ало катар Италия пэ ромняса э Прискилласа, вай о император Клавдий пхэнляс алаи э иудеенги тэ джян андар Рим. О Павел ало лэндэ
ACT 18:3 тэ бэшэл тай тэ керэл бути лэнца, вай лэндэ сас екх дила — он керэнас катунэс.
ACT 18:4 Кажни суббота ов зборизэлас андэ синагога э иудеенца тай э грекенца, мангелас, он тэ пакян.
ACT 18:5 Кана андар Македония алэ о Сила тай о Тимафей, о Павел лиляс алаи по вахыти тэ галярэл э иудеенги, кай о Исус — Христос.
ACT 18:6 Кана он лилэ тэ холязэн лэски тай тэ кушэн лэс, ов какты о прахос опрал савутя тай пхэнляс лэнги: — Тумэ та санус дошалэ тумарэ мэримаски! Мэ шужо, тай акана мэ джяв ко наиудея.
ACT 18:7 О Павел никлисто андар синагога тай гело ко Титий Юст, саво гинэлас э Дэвлэс. Лэско кхер сас паш ки синагога.
ACT 18:8 О баро э синагогако о Крисп тай алаи лэски кхерутнэ аякха пакянилэ э Сагбуски. Тай о бут андар каринфяня, савэ шунэнас э Павлэс, пакянилэ тай сас болдэ.
ACT 18:9 Екхвар рати о Сагбус пхэнляс э Павлэски андэ дикхипэ: — Ма траша! Англэ зборизэ тай ма тэныкизэ.
ACT 18:10 Мэ туса тай никхон на керэла туки налачипэ. Андэ адалэ дизатэ си бут мануша, савэ си Минрэ.
ACT 18:11 Тай о Павел сас отхэ екх тай екхпаш брэш, сиклярэлас лэн э збора э Дэвлэски.
ACT 18:12 Одова вахыти, кана о Галлион сас о праконсул э правинцыяко Ахаия, о иудея кидинэпэс, астардэ э Павлэс тай андэ лэс ко цындос.
ACT 18:13 Он пхэнлэ: — Адава мануш тхэл э манушэн тэ гинэн э Дэвлэс на аякха, сар сиклярэл амаро Тхэдипэ.
ACT 18:14 О Павел дага ништо на пхэнляс, кана о Галлион пхэнляс э иудеенги, савэ керэн э Павлэс дошалэс: — Иудея, ов тэ керэлас би со-то налачё я джюнгало, озаман мэ тумэн кан шунавас.
ACT 18:15 Ай атхэ ирищиен андар сиклярипэ, нава тай тумаро Тхэдипэ, дэчи дикхен тумэ сам. Мэ на мангав тэ овав цындомари андэ асавке дилэндэ.
ACT 18:16 Тай ов кувды лэн андар тхан ки цындоско.
ACT 18:17 Дэчи алаи астардэ э барэс э синагогакерэс э Сосфенес тай мардэ лэс ангал тхан ки цындоско, ай о Галлион на кердяс адалэски ништо.
ACT 18:18 О Павел сас дага бут дес андэ Каринфи. Пал отхэ ов ачявдяс пэ пхралэн тай екхетханэ э Прискилласа тай э Акиласа гело ки Сирия. Ангал отхэ о Павел чиндяс пэ бала андэ Кенхрея, вай ов кана-то диняс збора э Дэвлэски.
ACT 18:19 Он алэ андэ Эфес, катэ о Павел ачявдяс э Прискиллас тай э Акилас, ай ов гело андэ синагога тай зборизэлас отхэ э иудеенца.
ACT 18:20 Он мангенас лэс тэ ачёл лэндэ генэ саво-то вахыти, ай ов на мангляс.
ACT 18:21 — Мэ кан авав, тэ мангела о Дэл, — пхэнляс о Павел тай гело андар Эфес.
ACT 18:22 Ов фулистино опрал карабляс андэ Кесария, ало андэ Иерусалими тай диняс сэлями атхутнэ кхангеряса, ай дэчи гело андэ Антиохия.
ACT 18:23 Отхэ о Павел сас набут вахыти, ай отхар гело андэ пхуя ки Галатия тай Фригия тай зоралякерэлас алаи э сиклярдэн.
ACT 18:24 Андэ Эфес одова вахыти ало иудеи, саво бучёлас Аполлос. Ов аракхлило андэ Александрия, сас мануш сиклярдо тай лачес джянэлас о Яздипэ.
ACT 18:25 Ов сас сиклярдо о Дрома э Сагбуски тай пхэнэлас тхарэ илэса, чячипэ сиклярэлас катар Исус, гэм ов сам джянэлас екх о болдипэ э Иоаннеско.
ACT 18:26 О Аполлос лиляс битрашако тэ пхэнэл андэ синагога, тай кана э Прискилла тай о Акила лэс шунлэ, он динэ икос лэс пэстэ тай лачес галярдэ лэски о Дром э Дэвлэско.
ACT 18:27 О Аполлос мангляс тэ джял андэ Ахаия, тай о пхрала дэнас такати лэс тай яздылар письмас э сиклярдэнги, савэ бэшэнас отхэ, тай мангенас тэ мукен э Аполлос. Кана ов ало отхэ, ов кердяс баро ярдыми одолэнги, савэ э Дэвлэски милаки пакянилэ.
ACT 18:28 О Аполлос пхэнэлас мамуй ко иудея ангал дюняс тай галярэлас о Яздипэ, кай о Исус си о Христос.
ACT 19:1 Одова вахыти, кана о Аполлос сас андэ Каринфи, о Павел накхло андар горадэнги тхана тай ало андэ Эфес. Отхэ ов дикхляс набут сиклярдэн.
ACT 19:2 — Лилянус тумэ о Шужо Духос, кана пакянилянус? — пхучляс ов лэн. — Амэ джи на шунлям одолэстар, кай си Шужо Духос, — пхэнлэ одола.
ACT 19:3 Дэчи о Павел пхучляс: — Сар тумэ санусас болдэ? — Сар болэлас о Иоанн, — пхэнлэ он.
ACT 19:4 О Павел пхэнляс: — О болдипэ э Иоаннеско сас болдипэ тэ муклён о бэзя. Ов пхэнэлас э дюняски тэ пакян Одолэски, Кон камэлас тэ авэл пал лэстэ, самким э Исусески.
ACT 19:5 Кана он шунлэ адалэстар, он болдэпэс андэ нав ки Сагбуско Исусеско.
ACT 19:6 Тай кана о Павел тхэдяс опэр лэндэ пэ васта, опэр лэндэ фулистино о Шужо Духос. Он дэчи лилэ тэ зборизэн аврэ чибэнца тай пхэнэн сар прарокя.
ACT 19:7 Алаи лэн сас паш ко дэшудуй мануша.
ACT 19:8 О Павел трин чён битрашако пхэнэлас андэ синагога, зборизэлас э манушэнца катар Дэвлэско Патишайлыки тай галярэлас лэнги.
ACT 19:9 Савэ андар лэндэ холязэнас тай на мангенас тэ пакян, ангал алаендэ кушэнас о Дром э Исусеско. Дэчи о Павел ачявдяс лэн. Ов лиляс э сиклярдэн тай кажын дес зборизэлас лэнца андэ школа ки Тираннески.
ACT 19:10 Аякха сас дуй брэш, тай алаи о иудея тай о грекя, кай бэшэнас андэ правинцыя Азия, шунлэ э збора э Сагбуски.
ACT 19:11 О Дэл керэлас андар Павел барэ чюдэс.
ACT 19:12 Э насвалэн дэнас тэ колизэн ко кхоснэ тай ко фотэс, савэндэ буруни колизэлас о Павел, тай лэндэ накхенас о дукха, тай о джюнгалэ духя никлёнас андар лэндэ.
ACT 19:13 Сарсавэ иудейскя магиенги, кай пхерэнас опэр дром, лилэ тэ дэн икос о нав э Сагбуско э Исусеско опэр одолэндэ, андэ савэндэ сас бишужэ. Он пхэнэнас: — Мэ пхэнав тумэнги совленца андэ нав ки Исусеско, Савэс пхукавэл о Павел.
ACT 19:14 Адава керэнас ли о эфта чявэ э Скеваски, э иудейски барэ попазески.
ACT 19:15 Ай о джюнгало духи пхэнляс лэнги: — Э Исусес мэ джянав, ли о Павел си манги джянло, ами тумэ кон эсанус асавке?
ACT 19:16 Тай о мануш, андэ савэстэ сас о джюнгало духи, читяспэс опэр лэндэ асавке зораса, кай мардяс лэн алаен, тай он нашлэ андар кхер нанге тай дукхавдэ.
ACT 19:17 Кана одолэстар галилэ о иудея тай о грекя, кай бэшэнас андэ Эфес, лэн лиляс траш, тай он лилэ тэ гинэн лачес о нав э Сагбуско э Исусеско.
ACT 19:18 О бут, савэ пакянилэ, авэнас тай ангал алаендэ пхукавэнас пумарэ дилэс.
ACT 19:19 Ай о бут, кай керэнас магия, анэнас пумарэ магиенги книжкес тай ангал алаендэ тхарэнас лэн. Кана гиндэ, сокабор керэнас о тхардэ лила, уло пэинда биня драхмя.
ACT 19:20 Аякха э збора э Сагбуски барёлас тай пхэрдёлас зор.
ACT 19:21 Пал алаестэ адалэстэ о Павел тюшунды тэ джял ко Иерусалими андар Македония тай Ахаия. — Пал отхэ, сар мэ кан овав андэ Иерусалими, манги камэл тэ джяв ли ко Рим, — пхэнэлас ов.
ACT 19:22 Ов бичялдяс ки Македония до ярдымарен э Тимафеес тай э Эрастэс, ай ов сам генэ савэ-то вахытески ачило андэ правинцыя Азия.
ACT 19:23 Андэ адава вахыти ули бари чингар андар Дром ки Сагбуско.
ACT 19:24 О мануш, кай бучёлас Димитрий, рупунэ бутяко бутярно, керэлас катар руп храми э дэвлинкако э Артэмидако тай одолэса дэлас аканутнэ бутярнэн бут тэ казандиен.
ACT 19:25 Ов кидиняс лэн ли аврэн асавке бутярнэн тай пхэнляс: — Тумэ джянэн, кай адая бути дэл амэн лачё казандима.
ACT 19:26 Ай тумэ дикхен тай шунэн, кай адава Павел галярдяс тай гелдяс андэ хохаипэ бутэ дюняс на екх атхэ андэ Эфес, ами ли алаи ки правинцыя Азия. Ов пхэнэл, кай о дэла, кай си кердэ вастэнца, — адава нанай дэла.
ACT 19:27 На екх амари бути андар адалэстэ кан нашавэл по лачё нав, ами ли о храми э барэ дэвлинкако э Артэмидако ништо на кан гиндёлпэс. Тай ой сам э дэвлинка, савя гинэл алаи э правинцыя Азия тай алаи э пху, кан овэл би дэвлэски баримаско!
ACT 19:28 Он шунлэ адава тай холяса дэнас бэбэря: — Бари Артэмида Эфесески!
ACT 19:29 Чяльти алаи э диз ваздиндили. О мануша астардэ э амалэн э Павлэскерэн, э македонянен э Гаес тай э Аристархес, тай алаи екхетханэ прастанилэ андэ театра.
ACT 19:30 О Павел мангляс тэ никлёл ко дюняс, ай о сиклярдэ лэс на муклэ.
ACT 19:31 Джи сарсавэ барэ мануша э правинцыяки, о амала э Павлэски, пхэнлэ лэски тэ на авэл андэ театра.
ACT 19:32 Авэра дэнас бэбэря екх, авэра авэр. Уло баро прастаима. О бут на джянэнас, соски алэ.
ACT 19:33 О иудея динэ бутуря ангал э Александрэс. Кон-то андар дюняс пхучляс лэс, тай о Александр кердяс вастэса э дюняски тэ тэныкизэл, ов тэ пхэнэл кутардимаски збора.
ACT 19:34 Ай кана алаи галилэ, кай ов иудеи, тай лилэ екхе сэсеса тэ дэн бэбэря: — Бари Артэмида Эфесески! Тай дэнас бэбэря паш ко дуй сагатя.
ACT 19:35 Озаман ко дюняс никлисто э дизако яздимари. Ов тэрдярдяс лэн тай пхэнляс: — Эфесяня, си хоч екх мануш, саво на джянэл, кай э диз Эфес си дикхимари э храмеско э барэ Артэмидако тай лаки шавлиняко, кай пэли опрал?
ACT 19:36 Никхон на пхэнэл мамуй адалэстэ. Оничин тумэ камэл тэ тэрдярэн тай тэ на керэн ништо би тюшундимаско.
ACT 19:37 Тумэ андянус атхэ адалэ манушэн, гэм он на чёрдэ андар храми тай на кушлэ амарэ дэвлинка.
ACT 19:38 Тэ си ко Димитрий тай аврэ бутярнэндэ опэр кастэ-то холи, амэндэ адалэски си цындос тай о праконсуля. Отхэ мэ гелэн пумарэ доша.
ACT 19:39 Тэ си тумэндэ генэ саво-то пхучипэ, пхукав лэн тэ дикхен ки тхэдимаско кидипэ.
ACT 19:40 Я си траш, кай пал авдесутнэ дилэндэ амэн кан керэн дошалэн андэ чингара, вай амэ нащи кан галярас, соски атхэ кидинямамэн. Адалэ зборэнца ов мукляс о кидипэ.
ACT 20:1 Кана о чингара тэныкисаилэ, о Павел кидиняс э сиклярдэн, диняс такати, пхэнляс ов: «Ачё Дэвлэса!» — тай гело ки Македония.
ACT 20:2 Ов накхелас одолэ тханэндар, бутэ зборэнца дэлас такати э пакялэн. Дэчи о Павел ало ки Грецыя
ACT 20:3 тай сас отхэ трин чён. Кана ов кидэласпэс тэ джял карабляса андэ Сирия, о иудея гортярдэпэс тэ мударэн лэс, тай ов галило адалэстар тай гело палэ андар Македония.
ACT 20:4 Лэса сас о Сопатр, о чяво э Пирраско андар Верия, о фессалоникийца о Аристарх тай о Секунд, о Гай андар Дервия тай о Тимафей, генэ о Тихик тай о Трофим андар правинцыя Азия.
ACT 20:5 Он гелэ англэ тай ишандиенас амэн андэ Троас.
ACT 20:6 Амэ пал мисяфири ки Писное Питэнго джясас карабляса андар Филиппи тай пандже десендар улям лэнца андэ Троас. Отхэ амэ самас эфта дес.
ACT 20:7 Андэ екхто дес ки базареско кидинямамэн екхетханэ тэ пхагерас о манро. Авэр дес о Павел мангляс тэ джял дром, оничин ов бут зборизэлас, тай о зборима сидиняспэс джи машкарэ ки рат.
ACT 20:8 Опрэ андэ кхер, катэ амэ кидиндилям, тхабонас бут лампэс.
ACT 20:9 Опэр пэнчира бэшло сас тэрно мануш, саво бучёлас Евтих. О Павел кай бут зборизэлас, о Евтих суто тай пэло ки пху катар трито этажы. Кана лэс ваздинэ, ов сас муло.
ACT 20:10 О Павел фулистино, пашлило опэр тэрно мануш тай диняс ангали лэс. — Ма трашан, — пхэнляс ов, — ов дживиндо!
ACT 20:11 О Павел ваздиняспэс опрэ, пхагердяс о манро тай лиляс тэ хал. Опэр сабахтанятэ о Павел бытэрды тэ зборизэл тай гело дром,
ACT 20:12 ай э тэрнэ манушэс гелдэ кхерэ дживиндэс, тай алаен адава лошаскердяс.
ACT 20:13 Амэ бэшлям опэр карабляс тай гелям андэ Асс, мангенас тэ лэн отхэ э Павлэс. Ов аякха пхэнляс, вай мангляс тэ джял опрал шукипэ.
ACT 20:14 Андэ Асс ов дикхляс амэн, тай амэ лилям лэс опэр карабляс тай гелям андэ Митилини.
ACT 20:15 Отхар амэ гелям карабляса тай авэр дес алям мамуй ко Хиос. Накхло генэ екх дес, тай амэ алям андэ Самос, ай авэр дес — андэ Милит.
ACT 20:16 О Павел тюшунды тэ накхел пашал Эфес тэ на ачёл андэ правинцыя Азия, вай ов сигярэлас, мангелас тэ рэсэл андэ Иерусалими ко дес ки Пэиндако.
ACT 20:17 Андар Милит о Павел бичялдяс андэ Эфес тэ манген э барэ манушэн андар кхангери тэ авэн лэстэ.
ACT 20:18 Кана одола алэ, ов пхэнляс лэнги: — Тумэ джянэн, сар мэ бэшавас атхэ тумэндэ алаи о вахыти, сар мэ алём андэ правинцыя Азия.
ACT 20:19 Мэ ивашымаса тай авсенца керавас иргатлыки э Сагбуски, на дикхавас карин алаи ко пхариматэс, кай о иудея керэнас манги.
ACT 20:20 Мэ на мукавас ништо андар одолэстэ, со овэлас би тумэнги лачё, пхукававас тай сикляравас тумэн ангал дюняс тай андэ кхера.
ACT 20:21 Мэ пхэнавас ли э иудеенги, тай э грекенги, кай он камэл тэ пхутрэн пумарэ бэзя э Дэвлэски тай тэ пакян амарэ Сагбуски Исусески.
ACT 20:22 Анкха мэ бичялдо э Духоса тай джяв андэ Иерусалими, на джянав, со отхэ манца кан овэл.
ACT 20:23 Мэ джянав екх, кай о Шужо Духос пхукавэл манги одолэстар, кай андэ кажни дизатэ ман ишандиел пханлипэ тай хурлуки.
ACT 20:24 Мэ на трашав мэ бэшымаски, манги екх тэ накхав мо дром тай тэ бытэрдияв э бути, со пхэнляс манги о Сагбус Исус, тэ пхукавав о Лошано Габэри катар мила ки Дэвлэски.
ACT 20:25 Тай анкха мэ джянав, кай алаи тумэ, каса мэ зборизавас тай каски пхукававас катар Патишайлыки, генэ тумэ ман на кан дикхен.
ACT 20:26 Оничин мэ пхэнав авдес: мэ на кан овав дошало андэ никхаски мэримастэ,
ACT 20:27 вай мэ бигараимаско пхукававас тумэнги э Дэвлэско мангипэ.
ACT 20:28 Дикхен пал тумэндэ тай пал алаи ки атара, андэ савятэ о Шужо Духос тхэдяс тумэн дикхимарен. Дикхен пал кхангери ки Дэвлэски, сави Ов киндяс Пэски кимяса Пэ ратэскеряса.
ACT 20:29 Мэ джянав, кана мэ кан джяв, тумэндэ кан авэн джюнгалэ рува, ай он э атара на кан аядиен.
ACT 20:30 Джи машкарэ тумэндэ кан овэн мануша, савэ кан лэн тэ болдэн о яздипэ, тэ гелэн э сиклярдэн пал пэстэ.
ACT 20:31 Оничин дикхен лачес! Мабристэн, кай мэ састэ трин брэш пхэнавас авсенца ли о дес ли э рат кажнески андар тумэндэ.
ACT 20:32 Анкха мэ дав тумэн ко Дэл тай ки збора Лэски милаки, сави кан сиклярэл тумэн тай кан дэл тумэн о барвалипэ, саво Ов пхэнляс тэ дэл Пэ шужэ дюнястэ.
ACT 20:33 Мэ никхастэ на мангавас нэ руп, нэ пхол, нэ савутя.
ACT 20:34 Вай тумэ джянен, кай мэ казандиявас мэ вастэнца мэ бэшымаски тай э бэшымаски мэ амалэнги.
ACT 20:35 Андэ алаестэ, со би мэ тэ на керавас, мэ сикававас тумэнги, сар камэл тэ керэс бути, тэ керас ярдыми э назоралэнги тай тэ на бристас катар зборэс ки Сагбуски Исусески: «Зиядэ тэ дэс, ниш тэ лэс».
ACT 20:36 Кана о Павел пхэнляс адава, бангярдяс алаенца пэ кочя тай мангляс э Дэвлэс.
ACT 20:37 Алаи ровэнас, дэнас ангали э Павлэс тай чюмидэнас лэс.
ACT 20:38 Лэн диняс касэвэти лэски зборэс одолэстар, кай он генэ лэс на кан дикхен. Дэчи он гелэ э Павлэса джи ко карабляс.
ACT 21:1 Амэ пхэнлям лэнги: «Ачён Дэвлэса!», никлистям андэ моря тай гелям доврус ко острав Кос. Авэр дес амэ алям андэ Родос тай отхар гелям андэ Патара.
ACT 21:2 Отхэ амэ аракхлям карабляс, кай джялас андэ Финикия, бэшлям андэ лэстэ тай гелям англэ.
ACT 21:3 Амэ накхлям о Кипр, муклям лэс ки леви риг тай гелям андэ Сирия. Амэ тэрдилям андэ Тир. Отхэ амаро карабляс камэлас тэ ачявэл пхарипэ.
ACT 21:4 Андэ Тир амэ аракхлям сиклярдэн тай ачилям лэндэ эфта дес. Катар Духос он пхэнэнас э Павлэски тэ на джял андэ Иерусалими.
ACT 21:5 Кана адала деса накхлэ пашыло о вахыти, амэ гелям англэ. Алаи о сиклярдэ, лэнги ромня тай о пуя гелэнас амэн андар диз. Ко чети ки панеско амэ тэрдилям опэр кочендэ тай пхэнасас э Дэвлэски.
ACT 21:6 Дэчи амэ пхэнлям лэнги: «Ачён Дэвлэса!» тай бэшлям андэ карабляс, ай он гелэ палэ кхерэ.
ACT 21:7 Амэ ачявдям о Тир тай алям андэ Птолемаис. Отхэ амэ дикхлям э пхралэн тай ачилям лэнца екх дес.
ACT 21:8 Ай авэр дес амэ гелям дром тай алям андэ Кесария. Отхэ амэ тэрдилям андэ кхер ко Филиппи, саво пхукавэл о Лошано Габэри, о екх андар эфта иргатя.
ACT 21:9 Лэстэ сас штар чяя тэрнагаря, савэ пхэнэнас сар прарокя.
ACT 21:10 Пал отхэ, сар амэ самас отхэ бут дес, андар Иудея ало прароки, саво бучёлас Агав.
ACT 21:11 Ов пашыло амэндэ, лиляс э кустик э Павлэски, пханляс ласа пэ чянга тай пэ васта тай пхэнляс: — О Шужо Духос пхэнэл: «Аякха о иудея андэ Иерусалими кан пхандэн тай кан дэн андэ васта ки наиудеенги э манушэс, каски адая кустик».
ACT 21:12 Амэ шунлям адава тай атхутнэ манушэнца лилям тэ мангас э Павлэс, тэ на джял андэ Иерусалими.
ACT 21:13 Ай о Павел адалэски пхэнляс: — Соски тумэ ровэн тай пхаравэн мо ило? Мэ сом газыри на екх тэ овав пханло, ами ли тэ мэрав андэ Иерусалими андар нав ки Сагбуско Исусеско.
ACT 21:14 Кана амэ галилям, кай ов си зорало андэ пэ дилатэ, амэ тэныкисаилям, пхэнляс екх: — Мэ овэл аякха, сар мангел о Сагбус.
ACT 21:15 Пал отхэ кидинямамэн тай гелям андэ Иерусалими.
ACT 21:16 Амэнца гелэ сарсавэ сиклярдэ андар Кесария. Он андэ амэн андэ кхер ко киприоти Мнасон, чёктанлыс сиклярдо, савэстэ амэ ачилям.
ACT 21:17 Кана амэ алям андэ Иерусалими, о пхрала лошаса амэн муклэ пэстэ.
ACT 21:18 Авэр дес о Павел екхетханэ амэнца гело ко Яков. Отхэ сас алаи о барэ мануша.
ACT 21:19 О Павел диняс сэлями лэн тай алаи пхукавдяс одолэстар, со о Дэл кердяс машкарэ ко наиудея андар лэско иргатлыки.
ACT 21:20 Он шунлэ лэс тай махтадылар э Дэвлэс. Дэчи он пхэнлэ э Павлэски: — Пхрала, ту дикхес, сокабора биня иудея пакянилэ, тай алаи он си кизгандимаря тэ Тхэдимаски.
ACT 21:21 Лэнги пхэнэн, кай ту сиклярэс э иудеен, савэ бэшэн машкарэ ко наиудея, он тэ на гинэн о Тхэдипэ э Маисееско, тэ на керэн абрезания пумарэ чявэнги тай тэ на бэшэн, сар камэл амэндэ.
ACT 21:22 Со тэ керас? Он, гэлбэтэм, кан шунэн одолэстар, кай ту алян.
ACT 21:23 Оничин кер, со амэ туки кан пхэнас. Машкарэ амэндэ си штар мануша, савэ динэ збора ангал Дэл.
ACT 21:24 Лэ лэн, накх екхетханэ лэнца о абряди э шужымаско тай покин андар лэндэ, он тэ моравэн пумарэ шэрэ. Дэчи алаи кан дикхен, кай о шунлипэ тутар нанай чячипэ тай ту керэс алаи, со си яздимэ андэ Тхэдипэ.
ACT 21:25 Ай э пакялэнги наиудеенги амэ яздымус амарэ гиндимастар: он камэл тэ на хан о хапэ э курбанеско, саво андило э идолэски, мас тасавдэ гайваненго, тэ на пиен рат тай тэ астарэнпэс дур катар кахпэлыки.
ACT 21:26 Авэр дес о Павел лиляс пэса адалэ манушэн тай накхло лэнца о шужыпэ, сар камэл тэ кердёл. Пал отхэ ов диняс андэ храми тай пхэнляс, кана кан бытиен о деса э шужымаски тай кана андар кажнестэ лэндэ кан овэл андо курбани.
ACT 21:27 Кана бытиенас о эфта дес, набут иудея андар правинцыя Азия, кай дикхлэ э Павлэс андэ храми, ваздинэ алаи э дюняс тай астардэ лэс
ACT 21:28 бэбэряса: — Израильтяня! Керэн ярдыми! Адава одова мануш, саво алаен вэркатэ сиклярэл мамуй амарэ дюнястэ, амарэ Тхэдимастэ тай амарэ храместэ. Анкха ов андяс андэ храми э грекен тай кердяс гарами адава шужо тхан.
ACT 21:29 Ангал атхэ андэ диз он дикхенас э Павлэс екхетханэ э эфесянеса э Трофимеса тай тюшундылар, кай о Павел андяс лэс андэ храми.
ACT 21:30 Алаи э диз ваздиндили, кидиндило дюняс. Э Павлэс астардэ, сюрюдылар андар храми, тай э бар э храмески чяльти сас пханли.
ACT 21:31 Он мангенас тэ мударэн э Павлэс, ай о габэри одолэстар, кай алаи о Иерусалими андэ трашатэ, гело джи ки бинеско баро ки римски кагортеско.
ACT 21:32 Ов чяльти лиляс салдатен тай э шэлэнги барэн тай прастанило ко дюняс. Кана о иудея дикхлэ э бинески барэс тай лэски салдатен, он тэрдилэ тэ марэн э Павлэс.
ACT 21:33 О баро пашыло, астардяс э Павлэс тай пхэнляс тэ пхандэн лэс до джянджирэнца. Ов пхучелас ко дюняс, кон си адава тай со ов кердяс.
ACT 21:34 Сарсавэ андар дюняс дэнас бэбэря екх, авэра — авэр, тай асавке бэбэрятар ов ништо нащи галёлас. Дэчи ов пхэнляс тэ гелэн э Павлэс андэ салдатенго кхер.
ACT 21:35 Кана он сас опэр басамакя, о дюняс лилэ тэ тасавэн аякха, кай о салдатя ваздинэ тай гелдэ э Павлэс.
ACT 21:36 Бут дюняс джянас пал лэндэ тай дэнас бэбэря: — Мэрипэ лэски!
ACT 21:37 Ангал удар ко кхер ки салдатенго о Павел пхэнляс э бинески барэски: — Мук тэ пхэнав туки со-то? — Ту джянэс э гречески чиб? — пхучляс одова.
ACT 21:38 — Самким, ту на одова египтяни, саво набут палэ ваздиняс чингар тай гелдяс пал пэстэ андэ ливади штар биня чёримарен?
ACT 21:39 О Павел пхэнляс: — Мэ иудеи андар Тарс андэ Киликия, мануш барэ дизако. Мангав тут, мук ман тэ пхэнав э дюняски.
ACT 21:40 О баро мукляс лэс. Дэчи о Павел тэрдило опэр басамакя тай вастэнца сикавдяс э дюняски тэ тэныкизэн. Кана уло тэныки, ов зборисаило еврейски чиб:
ACT 22:1 — Пхралалэн тай дадалэн, мукен ман со-то тэ пхэнав тумэнги.
ACT 22:2 Кана он шунлэ, кай ов пхэнэл опэр еврейски чиб, тай уло май тэныки. Тай ов пхэнляс:
ACT 22:3 — Мэ иудеи, аракхлилём андэ Тарс андэ Киликия, ай барилём мэ андэ адалэ дизатэ ко Гамалиил тай сомас сиклярдо алаи о Тхэдипэ амарэ дадэнго. Мэ кизгандимари э дилаки э Дэвлэскеряки, сар кажни андар тумэндэ авдес.
ACT 22:4 Мэ кувдиявас, маравас тай джи мударавас одолэн, савэ пхерэн э Исусеско Дром, линдяравас э муршэн тай э джювлен тай чявас лэн андэ пханля.
ACT 22:5 Адалэстар джянэн — о баро попази тай о барэ мануша. Мэ джи диндилём лэндар письмас э пхралэнги андар Дамаск тай гелём отхэ, тэ линдярав одолэн, кон отхэ сас, тай тэ анав лэн андэ Иерусалими хурлукески.
ACT 22:6 Опэр дром, кана мэ пашавас ко Дамаск, паш ко екхпаш дес бирдэн агорады ман баро ярэки опрал.
ACT 22:7 Мэ пэлём ки пху тай шунлём сэси, саво пхэнэлас манги: «Савл! Савл! Соски ту кувдиес Ман?»
ACT 22:8 Мэ пхучлём: «Кон Ту, Сагбуса?» Ов пхэнляс: «Мэ о Исус андар Назарет, Савэс ту кувдиес».
ACT 22:9 Манца о мануша дикхлэ ярэки, ай о сэси, саво мэ шунлём, он на шунлэ.
ACT 22:10 Мэ пхучлём: «Сагбуса, со манги тэ керав?» О Сагбус пхэнляс: «Ущи тай джя андэ Дамаск. Отхэ туки кан пхэнэн алаи, со камэл туки тэ керэс».
ACT 22:11 Вай о ярэки аякха тхаболас, кай мэ корилём. Тай одола мануша, савэ сас манца, вастэстар андэ ман андэ Дамаск.
ACT 22:12 Отхэ мандэ ало мануш, саво бучёлас Анания, кай керэлас алаи о Тхэдипэ тай намлыс машкарэ ко атхутнэ иудея.
ACT 22:13 Ов пашыло мандэ, тэрдило пашэ тай пхэнляс: «Пхрала Савл, дикх!» Тай бирдэн мандэ пхутэрдилэ мэ якха, тай мэ дикхлём адалэ манушэс.
ACT 22:14 Ов пхэнляс: «О Дэл амарэ дадэнго тхэдяс тут, тэ галёс ту, со Ов мангел, тэ дикхес э Чячес тай тэ шунэс о сэси андар Лэски уштэндэ.
ACT 22:15 Ту кан пхукавэс э манушэнги одолэстар, со ту дикхлян тай шунлян.
ACT 22:16 Ма ов тэмэли! Ущи, дэ икос Лэско нав, лэ болдипэ тай халяр тэ бэзя».
ACT 22:17 Дэчи мэ алём палэ андэ Иерусалими, тай кана мэ мангавас э Дэвлэс андэ храми, манги сас дикхипэ.
ACT 22:18 Мэ дикхлём э Сагбус, Саво пхэнэлас манги: «Чяльти никлё андар Иерусалими, вай атхэ на кан шунэн то пхукаипэ Мандар».
ACT 22:19 Мэ пхэнлём: «Сагбуса, адала мануша джянэн, кай мэ пхеравас андар синагога андэ синагога, тэ линдяравас тай маравас одолэн, савэ пакян Туки.
ACT 22:20 Кана чёрдёлас о рат э Стэфанеско, саво пхэнэлас Тутар, мэ сомас тэрдо катар риг одолэнгерятар, савэ мударэнас лэс, тай дикхавас пал лэнги савутендэ.
ACT 22:21 Дэчи о Сагбус пхэнляс манги: «Джя, Мэ бичялав тут ко дюнядэс, савэ бэшэн дур атхар».
ACT 22:22 Джи адалэ зборэндэ о дюняс шунэлас э Павлэс, тай лилэ тэ дэн бэбэря: — Кхосэн лэс опрал муй ки пхуяко! Ов на камэл тэ бэшэл!
ACT 22:23 Он дэнас бэбэря, кактиенас пумарэ савутя тай ченас опрэ о прахос.
ACT 22:24 Э бинеско баро пхэнляс тэ гелэн э Павлэс андэ салдатенго кхер. Ов пхэнляс тэ марэн лэс тай тэ пхучен, тэ галёл, соски о дюняс аякха холязэл лэски.
ACT 22:25 Ай кана э Павлэс пханлэ тэ марэн, ов пхэнляс э тэрдэски пашэ э шэлэнгески барэски: — Та со, о тхэдипэ мукел тэ марэн римлянес камчияса тай би цындоско?
ACT 22:26 Кана э шэлэнго баро адава шунляс, ов гело тай пхукавдяс э бинески барэски. — Со ту керэс? Адава мануш си римляни, — пхэнляс ов.
ACT 22:27 Э бинеско баро никлисто ко Павел тай пхучляс: — Ту римляни? — Ва, — пхэнляс ов.
ACT 22:28 Дэчи э бинеско баро пхэнляс: — Мэ покиндём бут ловэ тэ овав римляни. — Ай мэ джи бияндилём римляни, — пхэнляс о Павел.
ACT 22:29 Одола, савэ камэлас лэс тэ пхучен, бирдэн гелэ лэстар. Э бинеско баро трашанило, кана галило, кай ов пханляс джянджирэнца римлянес.
ACT 22:30 Авэр дес э бинеско баро мангелас зиядэ тэ галёл, соски о иудея керэн дошалэс э Павлэс, пхутэрдяс лэс катар джянджира тай пхэнляс, тэ кидэнпэс о барэ попазя тай алаи о Синедриони. Дэчи ов андяс э Павлэс тай тхэдяс лэс ангал лэндэ.
ACT 23:1 О Павел дикхляс карин мануша андар Синедриони тай пхэнляс: — Пхралалэн, джи авдесутнэ десестэ мэ бэшавас шужэ илэса ангал Дэл.
ACT 23:2 Тай о баро попази о Анания баримаса пхэнляс одолэнги, савэ си тэрдэ паш Павел, тэ чялавэн лэски ушта.
ACT 23:3 О Павел дэчи пхэнляс: — О Дэл кан марэл тут, домонго мануш! Ту сан бэшло атхэ тэ керэс цындос манги, сар пхэнэл о Тхэдипэ, ай ту сам пхагерэс о Тхэдипэ, кана пхэнэс, тэ марэн ман!
ACT 23:4 Одола, кон сас тэрдо паш Павел, пхэнлэ лэски: — Сар ту кушэс э Дэвлэски барэ попазес?
ACT 23:5 О Павел пхэнляс: — Пхралалэ, мэ на джянавас, кай ов баро попази, вай о Яздипэ пхэнэл: «Ма пхэн налачё опэр баро тэ дюняскерэстэ».
ACT 23:6 О Павел джянэлас, кай андэ Синедриони сарсавэ сас саддукея, авэра — фарисея, оничин ов лачес пхэнляс: — Пхралалэн, мэ фарисеи, о чяво э фарисееско, тай манги керэн цындос андар ишандипэ, кай о мулэ кан дживиндён.
ACT 23:7 Кана ов адава пхэнляс, машкарэ ко фарисея тай ко саддукея ваздиндили чингар, тай о дюняс паляштыпэс,
ACT 23:8 вай со о саддукея пхэнэн, кай нанай нэ дживиндипэ, нэ миляикенго тай духенго. О фарисея вай андэ алаи адалэстэ пакян.
ACT 23:9 Ваздиндили бари бэбэря, сарсавэ сикляримаря э Тхэдимаски андар фарисея ущинэ тай зораса пхэнлэ: — Амэ на аракхас андэ адалэ манушэстэ ништо налачё. Ай со, лэса тэ пхэнэлас о духи я о миляики?
ACT 23:10 Э чингар ваздиндили аборкха, кай э бинеско баро трашалас, э Павлэс тэ на пхаравэн котора, пхэнляс э салдатенги тэ лэн лэс лэндар зораса тай тэ гелэн андэ салдатенго кхер.
ACT 23:11 Авэр рат ангал Павел тэрдило о Сагбус тай пхэнляс: — Ма траша! Сар ту пхукавэсас Мандар андэ Иерусалими, аякха ту камэл тэ пхукавэс ли андэ Рим.
ACT 23:12 Сабахтан сарсавэ иудея кидинэпэс тай динэ совля ништо тэ на хан тай тэ на пиен, бискай на мударэн э Павлэс.
ACT 23:13 Андэ адалэ зборимастэ сас бут катар саранда мануша.
ACT 23:14 Он гелэ ко барэ попазя тай ко барэ мануша тай пхэнлэ: — Амэ диням совля ништо тэ на лас андэ амарэ мостэ, бискай на мударас э Павлэс.
ACT 23:15 Акана тумэ тай о Синедриони манген э бинески барэс тэ анэн лэс тумэндэ хай одолэски, тэ галён зиядэ лэски дила. Ай амэ кан овас гортярдэ тай кан мударас лэс дага ангал отхэ, кай ов кан авэл джи адалэ тханэстэ.
ACT 23:16 Адалэстар галило о тухуми э Павлэско, о чяво лэски пхэняко. Ов гело андэ салдатенго кхер тай пхукавдяс адалэстар э Павлэски.
ACT 23:17 Дэчи о Павел диняс икос екхес андар шэлэнги барэс тай пхэнляс лэски: — Гелэн адалэ тэрнэс ки бинеско баро, лэстэ си со-то багалыс тэ пхэнэл лэски.
ACT 23:18 Э шэлэнго баро гелдяс э тэрнэс ки бинеско баро тай пхэнляс: — О пханло Павел диняс икос ман тай мангляс тэ анав акалэ тэрнэс тутэ. Лэстэ си со-то багалыс тэ пхэнэл туки.
ACT 23:19 Э бинеско баро лиляс э тэрнэс вастэстар, гелдяс лэс ригатэ тай пхучляс: — Со ту мангес манги тэ пхэнэс?
ACT 23:20 О тэрно пхэнляс: — О иудея гиндэ тэ манген тут тэ анэс рано э Павлэс андэ Синедриони хай одолэски, тэ галён зиядэ лэстар.
ACT 23:21 Ай ту адалэски ма пакя, вай лэс ишандиен гаравдэ бут катар саранда мануша. Он динэ совля тэ на хан тай тэ на пиен, бискай на мударэн лэс. Он тэрдэ гортярдэ тай екх ишандиен ти збора.
ACT 23:22 — Никхаски ма пхэн одолэстар, со ту манги анкха пхукавдян, — пхэнляс э бинеско баро э тэрнэски тай мукляс лэс.
ACT 23:23 Дэчи э бинеско баро диняс икос до шэлэнги барэн тай пхэнляс лэнги: — Гортярэн душэл салдатен, эфтадэша опэр грастэндэ тай душэл э пикенца одолэски, тэ никлён андэ Кесария ко эня сагатя бэлвэле.
ACT 23:24 Гортярэн э Павлэски грастэс тай анэн лэс андэ кутардимастэ ко сагбус-пракуратори Феликс.
ACT 23:25 Тай ов язды акасавко письмас:
ACT 23:26 «Катар Клавдий Лисий э намлыс пракураторески Феликсески: Сэлями туки!
ACT 23:27 Адалэ манушэс астардэ о иудея тай манглэ тэ мударэн лэс, ай мэ алём э салдатенца тай кутардым лэс, кай галилём, кай ов си римски мануш.
ACT 23:28 Мэ мангавас тэ галяв, соски он керэн лэс дошалэс, тай андём лэс андэ лэнги Синедриони.
ACT 23:29 Мэ галилём, кай э дош си андар ирищима лэнги Тхэдимастэ тай ов нанай дошало нэ андэ состэ, кай камэл тэ мэрэл я тэ пхандэн андэ пханли.
ACT 23:30 Манги пхэнлэ, кай лэс гортярэнпэс тэ мударэн, мэ чяльти бичялдём лэс тутэ, ай одолэнги, савэ керэн лэс дошалэс, мэ пхэнлём, он тэ джян тэ керэн лэс дошалэс ангал тутэ».
ACT 23:31 О салдатя кердэ, со пхэнлэ лэнги, лилэ э Павлэс тай гелдэ лэс рати андэ Антипатрис.
ACT 23:32 Авэр дес он бичялдэ лэс э салдатенца опэр граста англэ, ай он сам алэ палэ андэ салдатенго кхер.
ACT 23:33 Кана о салдатя опэр граста алэ андэ Кесария, он динэ ко пракуратори о письмас тай ачявдэ лэстэ э Павлэс.
ACT 23:34 О пракуратори драпкердяс о письмас тай пхучляс ко Павел, андар сави правинцыя ов си. Галило, кай о Павел андар Киликия,
ACT 23:35 тай пхэнляс: — Мэ кан шунав тут, кана атхэ кан авэн одола, савэ керэн тут дошалэс, — тай пхэнляс э барэнги тэ дикхен пал Павел андэ патишайлытико кхер ки Иродеско.
ACT 24:1 Пандж дес пал отхэ о баро попази о Анания сарсавэ барэ манушэнца тай юристеса э Тертуллоса ало андэ Кесария, тэ сикавэн э сагбуски-пракураторески э дош мамуй ко Павел.
ACT 24:2 Кана э Павлэс андэ, о Тертулл сикавдяс э дош мамуй лэстэ: — Намлысана Феликс! Андэ тэ годявэрэ кердимастэ амэ бэшас би чингарэнго. Лачипэ туки андар одолэ дилэндэ, савэ ту керэс амарэ дюняски. Амэ сальтя тай вэркатэ гинас лэн.
ACT 24:4 Ай тут тэ на кхинярав, мэ мангав тут лачимаса тэ шунэс амаро харно мангипэ.
ACT 24:5 Амэ гинас, кай адава мануш — сар джюнгали дукх. Ов ваздэл чингар машкарэ ко иудея опэр алаи ки пху тай си о баро э назаретейски джемэятеско.
ACT 24:6 Ов мангелас джи тэ гарамладиел о храми, ай амэ лэс линдярдям.
ACT 24:8 Кана ту кан пхучес лэс, ту сам кан галёс, соски амэ керас лэс дошалэс.
ACT 24:9 О иудея сас лэски ригатэ, пхэнлэ, кай алаи си чячипэ.
ACT 24:10 О сагбус-пракуратори сикавдяс э Павлэски, тай одова лиляс тэ пхэнэл: — Мэ джянав, кай ту бут брэш керэс цындос адалэ дюняски, тай мэ лошано, кай мэ пхэнав лэнги збора.
ACT 24:11 Туки на пхаро кан овэл тэ галёс одова, кай на бут дэшудо десендар палэ мэ алём тэ бангяв э Дэвлэски андэ Иерусалими.
ACT 24:12 Одола, савэ керэн ман дошалэс, на дикхлэ, кай мэ ирищияв каса-то андэ храми я тэ ваздав э дюняс андэ синагога я андэ савэ-то аврэ тханэстэ андэ диз.
ACT 24:13 Он нащи сикавэн э дош, сави пхэнэн мамуй мандэ.
ACT 24:14 Ай мэ пхэнав туки: он пхэнэн э Дэвлэско Дром хохавно, ай мэ бэшав, сар пхэнэл адава сиклярипэ, тай аякха бангяв э Дэвлэски амарэ дадэнгерэски. Мэ пакяв алаески, со си яздимэ андэ Тхэдипэ тай ко Прарокя.
ACT 24:15 Ли мандэ асавко ишандима э Дэвлэски, сар адалэ манушэндэ, — о ишандима одолэски, кай кан овэл о дживиндипэ сар э чяченги, аякха ли э начяченги.
ACT 24:16 Оничин мэ керав алаи, тэ овэл мо ило шужо ангал Дэл тай ангал мануша.
ACT 24:17 Пал бут брэш мэ алём андэ Иерусалими, тэ дав мэ дюняс ловэ тай шэя э чёрэнги тай тэ анав курбаня.
ACT 24:18 Ман дикхлэ андэ храми, кана мэ шужаравас ман. Ай отхэ на сас бут дюняс тай нисаво ирищима,
ACT 24:19 бискай на алэ иудея андар правинцыя Азия, савэнги камэлас би тэ пхэнэн атхэ, андар состэ ман керэн дошалэс.
ACT 24:20 Я кон си атхэ, мэ пхэнэн, со дош аракхлэ пал мандэ, кана ман пхучелас о Синедриони.
ACT 24:21 Файма, мэ дошало андар одолэстэ, кай динём бэбэря отхэ: «Манги керэн цындос авдес ангал тумэндэ андар ишандима, кай кан дживиндён о мулэ»?
ACT 24:22 О Феликс, саво лачес джянэлас о Дром, тэрдярдяс о шунлипэ. — Мэ кан пхэнав, со тэ керэн андэ тумарэ дилатэ, кана кан авэл э бинеско баро о Лисий, — пхэнляс ов.
ACT 24:23 Ов пхэнляс э шэлэнги барэски тэ дикхен пал Павел, ай тэ дэн лэс залаг локипэ тай тэ мукен лэски амалэн тэ керэн лэски иргатлыки.
ACT 24:24 Андар набут дес о Феликс ало пэ ромняса, э иудейкаса, кай бучёлас Друзилла, тай бичялдяс пал Павел, тэ шунэс лэски пакямастар андэ Исус Христос.
ACT 24:25 О Павел пхэнэлас катар шужо бэшыпэ, одолэстар, кай камэл тэ дикхес пал тутэ, тай катар цындос, кай кан овэл. Э Феликсес адава трашавдяс, тай ов пхэнляс: — Рэсэл авдесески! Джя, ай кана кан овэл мандэ вахыти, мэ кан дав тут икос.
ACT 24:26 Ов аякхажэ ишандиелас, кай о Павел кан дэл лэс ловэ, оничин сальтя мангелас тэ анэн лэс тай зборизэлас лэса.
ACT 24:27 Накхло дуй брэш, тай э Феликсес паровдяс о Порцый Фест. О Феликс мангелас тэ керэл лачипэ э иудеенги, оничин ачявдяс э Павлэс андэ пханли.
ACT 25:1 Тринэ десендар пал отхэ, сар о Фест ало андэ правинцыя, ов гело андар Кесария андэ Иерусалими.
ACT 25:2 Отхэ о барэ попазя тай э иудеяки барэ лилэ тэ керэн дошалэс э Павлэс ангал лэстэ.
ACT 25:3 Он лачес мангенас э Фестес, тэ керэл лэнги мила тай тэ гелэл э Павлэс андэ Иерусалими. Ай он кидэнаспэс опэр дром тэ астарэн лэс тай тэ мударэн.
ACT 25:4 О Фест пхэнляс: — О Павел си пханло андэ Кесария, тай мэ сам набут вахытестар кан джяв отхэ.
ACT 25:5 Мэ джян тумарэ сагбудэс манца тай мэ сикавэн э дош мамуй лэстэ, тэ кердяс ов со-то налачё.
ACT 25:6 О Фест сас лэнца охто-дэш дес, ай дэчи ало андэ Кесария тай авэр дес бэшло андэ цындоско тхан тай пхэнляс тэ анэн э Павлэс.
ACT 25:7 Кана о Павел ало, о иудея, савэ алэ андар Иерусалими, лилэ тэ керэн лэс дошалэс андэ бутэ тай барэ налаче дилэндар, ай он нащи сикавдэ, кай адава си чячипэ.
ACT 25:8 О Павел лиляс тэ кутардиелпэс: — Мэ нэ андэ состэ на сом дошало тай на сом мамуй ко иудейски Тхэдипэ, нэ мамуй ко храми, нэ мамуй ко император.
ACT 25:9 О Фест мангляс тэ овэл лачё э иудеенги тай оничин пхучляс ко Павел: — Мангес ту тэ джяс андэ Иерусалими, отхэ тэ керав мэ туки цындос?
ACT 25:10 О Павел: — Мэ сом тэрдо ангал цындос ки императореско, тай атхэ камэл тэ керэн манги цындос. Мэ на кердём э иудеенги ништо налачё, сар ту лачес джянэс.
ACT 25:11 Тэ сом дошало тай камэл тэ мэрав, мэ сом газыри тэ мэрав. Ай э дош, кай пхэнэн о иудея мамуй мандэ, тэ си хохаипэ, дэчи никхон нащи дэл ман лэндэ. Мэ мангав о цындос э императореско!
ACT 25:12 О Фест зборисаило пэ манушэнца тай пхэнляс: — Ту тэ манглян цындос э императореско, дэчи ко император да кан джяс.
ACT 25:13 Пал набут десендэ андэ Кесария ко Фест алэ тэ дикхен лэс о патишаи Агриппа тай э Вереника.
ACT 25:14 Он сас отхэ набут дес, тай о Фест зборизэлас э патишаеса катар дила ки Павлэски: — Атхэ си мануш, савэс о Феликс ачявдяс андэ пханли.
ACT 25:15 Кана мэ сомас андэ Иерусалими, о иудейскя барэ попазя тай о барэ мануша пхэнлэ мамуй лэстэ дош. Он мангенас, мэ тэ керав лэски цындос, тэ овэл дошало.
ACT 25:16 Мэ лэнги пхэнлём, кай ко римляня на кердёл аякха, кай савэ-то манушэс дэн андэ васта одолэндэ, кон керэл лэс дошалэс, ангал отхэ сар ов на кан дикхелпэс лэнца тай на кан пхэнэл, кай нанай дошало.
ACT 25:17 Он алэ манца атхэ, тай мэ чяльти авэр дес бэшлём андэ цындоско тхан тай пхэнлём, тэ анэн адалэ манушэс.
ACT 25:18 Он тэрдилэ агорял лэстэ, ай на кердэ лэс дошалэс андэ билиекхе дошатэ, сави би мэ гинавас бари.
ACT 25:19 Лэндэ сас ирищима андар дила лэнги пакямаски тай савэ-то Исусестэ, Саво муло, ай Савэстар о Павел пхэнэл, кай Ов дживиндо.
ACT 25:20 Мэ на джянавас, сар мэ тэ керав адая дила, тай пхучлём лэс, мангел ов тэ джял андэ Иерусалими тай отхэ тэ тэрдёл ангал цындос.
ACT 25:21 О Павел лачес мангляс, лэски дила тэ дикхел о баро император, тай мэ пхэнлём э салдатенги тэ дикхен пал лэстэ, бискай на бичялав лэс ко император.
ACT 25:22 О Агриппа пхэнляс э Фестески: — Ли мэ мангавас би тэ шунав адалэ манушэс. — Рано кан шунэс, — пхэнляс о Фест.
ACT 25:23 Авэр дес о Агриппа тай э Вереника барэ фаласа динэ андэ тхан ки цындоско э биненги барэнца тай намлыдэс манушэнца э дизакерэнца. О Фест пхэнляс, тэ анэн э Павлэс.
ACT 25:24 О Фест пхэнляс: — Патишаи Агриппа тай алаи, кон атхэ кидиняспэс! Тумэ дикхен ангал тумэндэ манушэс, опэр савэстэ бут иудея андэ Иерусалими ли атхэ, андэ Кесария, пхэнэн манги, кай ов дошало. Он дэн бэбэря, кай ов на камэл тэ бэшэл.
ACT 25:25 Ай мэ на аракхав андэ лэстэ нисави дош, андар савятэ ов камэл тэ мэрэл. Ай ов мангляс цындос ко баро император, оничин мэ гиндём тэ бичялав лэс отхэ.
ACT 25:26 Ай мэ на джянав, со тэ яздияв э сагбуски. Оничин мэ мангав, тумэ, ай о бут ту, патишаи Агриппа, тэ пхучес лэс. Дэчи мэ кан джянав, со тэ яздияв.
ACT 25:27 Мэ тюшундияв, кай си дэнлипэ манги тэ бичялав пханлимарес тай тэ на сикавав, андар состэ ов дошало.
ACT 26:1 — Мэ мукав тут тэ зборизэс андар тутэ, — пхэнляс о Агриппа э Павлэски. О Павел ваздиняс по васт тай лиляс тэ пхэнэл кутардимаски збора:
ACT 26:2 — Патишаи Агриппа! Авдес мэ бахтало, кай кан сикавав туки, кай мэ на сом дошало андэ одолэстэ, андэ состэ керэн ман дошалэс о иудея.
ACT 26:3 Ту сам лачес джянэс, сар камэл тэ кердёл ко иудея тай андар состэ он ирищиен. Оничин мангав тут даяндимаса шун ман.
ACT 26:4 Алаи о иудея лачес джянэн мо бэшыпэ тай одова, кай мэ тикнярила бэшав машкарэ мэ дюнястэ андэ Иерусалими.
ACT 26:5 Он чёктан джянэн ман тай, тэ манген, мэ пхукавэн одолэстар, кай мэ бэшавас сар фарисеи, кай мэ сомас андэ зорало сиклярипэ андэ амарэ пакямастэ.
ACT 26:6 Авдес мэ тэрдо ангал цындос, вай ишандияв, кай о Дэл кан керэл Пи збора, сави диняс амарэ дадэн.
ACT 26:7 О дэшудуй породэс амарэ дюняски о дес тай рат сальтя керэн иргатлыки э Дэвлэски тай ишандиен, кана адая збора э Дэвлэски кан овэл. Патишаи, андар адава ишандима о иудея керэн ман дошалэс.
ACT 26:8 Та со, тумэ гинэн, кай о Дэл нащи дживиндярэл э мулэн?
ACT 26:9 Ли мэ гинавас, кай камэл тэ керав алаи мамуй ко нав ки Исусеско андар Назарет.
ACT 26:10 Адава мэ да керавас андэ Иерусалими. Мэ диндилём барипэ катар барэ попазя тай бичялавас андэ пханли бутэ шужэн, ай кана лэн мударэнас, мэ сомас андар одолэндэ, савэ адава керэнас.
ACT 26:11 Мэ бутвар маравас лэн андэ синагогя, тай тхавас лэн тэ болдэнпэс пумарэ пакямастар. Мэ сомас асавко холямэ опэр лэндэ, кай кувдиявас лэн джи андэ джятя диза.
ACT 26:12 Екхвар асавке диласа мэ сомас бичялдо баримаса катар барэ попазя тай джявас андэ Дамаск.
ACT 26:13 Опэр дром отхэ, патишаи, машкарэ ко дес мэ дикхлём ярэки опрал, саво тхаболас лачес катар кхам. О ярэки агорады ман тай кон э сас манца.
ACT 26:14 Амэ алаи пэлям ки пху, тай мэ шунлём сэси, саво пхэнэлас манги опэр еврейски чиб: «Савл, Савл, соски ту Ман кувдиес? Пхаро туки тэ джяс мамуй Мандэ».
ACT 26:15 Мэ пхучлём: «Кон Ту, Сагбуса?» — «Мэ о Исус, Савэс ту кувдиес, — пхэнляс о Сагбус.
ACT 26:16 — Ваздэтут тай ущи опэр пинрэ. Мэ алём, тэ керэс иргатлыки Манги тай тэ пхукавэс манушэнги, со ту ужэ дикхлян тай со мэ кан керав ангал тэ якхендэ.
ACT 26:17 Мэ кан кутардияв тут тэ дюнястар тай катар наиудея, савэндэ Мэ тут бичялав,
ACT 26:18 тэ пхутрэс лэнги о якха тай тэ болдэс лэн катар тэмина ко ярэки, катар барипэ ко Сатанас ко Дэл, тэ овэн кхослэ лэнги бэзя тай он тэ овэн машкарэ одолэндэ, савэн Мэ шужардём пакямаса андэ Мандэ».
ACT 26:19 Патишаи Агриппа, мэ нащи тэ на тхавкан опрунэ дикхимас.
ACT 26:20 Мэ пхукававас ханик одолэнги, кон сас андэ Дамаск, дэчи андэ Иерусалими тай андэ алаи Иудея, тай дэчи ли наиудея, он тэ ачявэн пумарэ бэзя тай тэ болдэнпэс ко Дэл тай лэнги дилэс тэ сикавэн лэнго пароипэ.
ACT 26:21 Андар адалэстэ о иудея астардэ ман андэ храми тай манглэ тэ мударэн.
ACT 26:22 Ай о Дэл джи авдесутнэ десестэ керэл ярдыми манги, тай аки мэ тэрдо атхэ тай пхукавав ли э тэрнэнги, ли э пхурэнги, мэ на пхэнав бут одолэстар, со пхэнлэ о прарокя тай о Маисей, со кан овэл.
ACT 26:23 Ами, кай о Христос камэлас тэ накхел хурлуки тай баштутно тэ дживиндёл андар мулэ, тэ пхукавэл о ярэки ли э иудеенги, ли на иудеенги.
ACT 26:24 Кана ов аякха кутардиеласпэс, о Фест тэрдярдяс лэс. — Ту дэнило, Павел, — диняс бэбэря ов, — о баро джянлипэ кердяс тут дэнилэс!
ACT 26:25 О Павел пхэнляс: — Намлысана Фест, мэ на сом дэнило, тай одова, со мэ пхэнав, чячипэ тай годявэрипэ.
ACT 26:26 Адава джянэл о патишаи, ангал савэстэ мэ би трашако пхэнав. Мэ джянав, кай ништо андар адалэстэ на накхло, со ов на шунляс, вай адава на сас андэ гаравдо тхан.
ACT 26:27 Патишаи Агриппа, ту пакяс э прарокенги? Мэ джянав, кай пакяс.
ACT 26:28 — Ту тюшундиес андэ асавке залаг вахытестэ тэ керэс ман христианес? — пхэнляс о Агриппа э Павлэски.
ACT 26:29 О Павел пхэнляс: — Саво адава вахыти тэ на овэл, харно я дулго, мэ мангав э Дэвлэс, тэ на екх ту, ами ли алаи, кон шунэл ман авдес, тэ овэн асавке, сар мэ, булуб акалэ джянджирэндар.
ACT 26:30 О патишаи ваздиняспэс, тай лэса ваздинэпэс о сагбус-пракуратори, э Вереника тай одола, кон бэшлэ лэса.
ACT 26:31 Он никлистэ, пхэнэнас екхаврэски: — Адава мануш на кердяс ништо, андар состэ камэл тэ мэрэл я тэ овэл андэ пханли.
ACT 26:32 — Камэлас би лэс тэ мукас, тэ на мангел цындос ко император, — пхэнляс о Агриппа э Фестески.
ACT 27:1 Кана сас гиндо, кай амэ кан джяс андэ Италия, э Павлэс тай аврэ пханлэн динэ ко шэлэнго баро, саво бучёлас Юлий, андар кагорти э барэ императорески.
ACT 27:2 Амэ бэшлям опэр адрамитски карабляс, саво камэлас тэ джял андэ портя ки правинцыя Азия, тай гелям ко дром. Амэнца сас о македоняни о Аристарх андар Фессалоники.
ACT 27:3 Авэр дес амэ алям андэ Сидон. О Юлий сас лачё э Павлэса тай мукляс лэс тэ джял пэ амалэндэ, тэ лэл лэндар алаи, со камэл дромэски.
ACT 27:4 Амэ генэ гелям опэр моря тай накхлям о Кипр одолэ ригатар, сави кутардиелас амэн катар балвал, вай аврэ ригатар э балвал пхудэлас андэ амаро муй.
ACT 27:5 Амэ накхасас опрал моря, тай мамуй ачёнас э Киликия тай э Памфилия, тай тэрдилям андэ ликийски диз Мира.
ACT 27:6 Отхэ э шэлэнго баро аракхляс карабляс андар Александрия, кай джялас андэ Италия, тай бэшавдяс амэн опэр лэстэ.
ACT 27:7 Бут дес амэ тэмэли, джи пхаримаса джясас англэ тай алям андэ диз ки Книд. Э балвал на дэлас амэн тэ джяс, карин камэл, оничин амэ накхлям ко Крит катар риг ко Салмон, катэ амэ самас кутардимэна катар балвал.
ACT 27:8 Пхаримаса амэ накхасас пашал шукипэ тай алям андэ тхан, кай бучёл Лаче Пристаня, надур катар диз Ласея.
ACT 27:9 Амэ нашавдям бут вахыти, тай о дром опэр моря овэлас хаталыс, вай джи о дес э оразаско накхло. О Павел пхэнляс лэнги:
ACT 27:10 — Муршалэн, мэ дикхав, кай амаро дром кан овэл хаталыс тай пхаро на екх э шэенги тай э карабляски, ами ли амарэ бэшымаски.
ACT 27:11 Ай э шэлэнго баро шунляс э капитанес тай э сагбус, ай на э Павлэс.
ACT 27:12 Опэр адалэ пристанятэ нащи вэнкярэсас, тай о бут гиндэ тэ джян англэ, тэ овэла алаи лачё, тэ авэн андэ Финикс тай отхэ тэ вэнкярэн. О Финикс сас э пристань опэр Крит, пхутэрди э югески-западнески тай э северески-западнески риг.
ACT 27:13 Кана пхудиняс локи балвал катар юги, о матрося гиндэ, кай ой лэнги да камэл, ваздинэ о якори тай накхлэ пашал Крит.
ACT 27:14 Набут вахытестар катар острав пхудиняс бари зорали северески-вастокески балвал, кай бучёлас Эвракилон.
ACT 27:15 Ов лиляс о карабляс, саво нащи джялас мамуй лэстэ. Дэчи амэ динямамэн э волнэнги тай пхеравэнаспэс, карин кувдиелас э балвал.
ACT 27:16 Амэ улям катар риг ки тикнорэ остравески э Кавдаски, катэ амэ самас кутардимэна катар балвал. Отхэ амэ барэ пхаримаса гаравдям э лодка.
ACT 27:17 Кана ла ваздинэ опэр карабляс, о матрося сидинэ о тхулэ шэлэ тал карабляс тай пханлэ лэс. Катар траш тэ бэшэн опэр кишаенго мели ки Сиртис, он муклэ о парусадэс тай джянас англэ, карин челас лэн э балвал.
ACT 27:18 Э бари зорали балвал аякха лачес челас о карабляс, кай авэр дес он лилэ тэ чен о шэя андэ пани.
ACT 27:19 Ко трито дес он пумарэ вастэнца читэ андэ пани э карабляски шэя.
ACT 27:20 Набут дес на дикхиндёлас нэ о кхам, нэ о чергэня, ай э бари-зорали балвал май ваздиндёлас. Амэ нашавдям алаи о ишандима тэ кутардиясамэн.
ACT 27:21 О мануша чёктан ништо на ханас. Дэчи о Павел ущино машкарэ лэндэ тай пхэнляс: — Муршалэн, тумэнги камэлас тэ шунэн ман тай тэ на джян андар Крит, озаман тумэндэ на кан овэнас асавке джюнгалиматэс тай нашаиматэс.
ACT 27:22 Ай аканкха зоралён, никхон андар тумэндэ на кан мэрэл, екх о карабляс кан хурдёл.
ACT 27:23 Окоя рат мандэ ало о миляики э Дэвлэско, Каско мэ сом тай ангал кастэ мэ бангяв.
ACT 27:24 Ов пхэнляс манги: «Павел, ма траша. Ту камэл тэ тэрдёс ангал император. О Дэл булуб туки кан гаравэл о бэшыпэ алаенго, кон джял туса».
ACT 27:25 Муршалэн, акана лошазэн! Мэ ишандияв э Дэвлэски тай пакяв, кай алаи кан овэл аякха, сар сас манги пхэнло.
ACT 27:26 О карабляс кан овэл чито опэр савэ-то остравестэ.
ACT 27:27 Андэ дэшуштарто рат, кана амэн дага пхеравэлас опэр Адриаски моря, машкарэ ки рат о матрося галилэ, кай амэ пашас ки пху.
ACT 27:28 Он меряскердэ о хорипэ, тай уло, о хорипэ сас трияндушов метрэс, ай кана меряскердэ дэчи, о хорипэ сас биш эфта метрэс.
ACT 27:29 О матрося трашанас, кай кан чялавэл амэн андэ бара, тай муклэ опрал кармас ки карабляско штар якоря, мангенас, тэ овэл чяльти дес.
ACT 27:30 О матрося манглэ тэ нашэн опрал карабляс тай лилэ тэ мукен лодка опэр пани, керэнаспэс, кай манген тэ мукен о якоря опрал накх ки карабляско.
ACT 27:31 О Павел пхэнляс э шэлэнги барэски тай э салдатенги: — Адала мануша тэ на ачёна опэр карабляс, тумэнги на кан овэл кутардипэ.
ACT 27:32 Дэчи о салдатя чиндэ о шэлэ, савэ астарэнас э лодка, тай ой пэли андэ моря.
ACT 27:33 Опэр сабахтанятэ о Павел лиляс тэ мангел алаи э манушэн тэ хан. — О ачявдэ дэшуштар дес тумэ сальтя санус андэ трашатэ тай ништо дага на халянус, — пхэнляс ов.
ACT 27:34 — Мэ лачес пхэнав тумэнги тэ хан. Адава кан керэл ярдыми тэ кутардиентумэн. Билиекхестэ андар тумэндэ джи бал катар шэро на кан пэрэл.
ACT 27:35 О Павел пхэнляс адава, лиляс о манро, алгышты андар лэстэ э Дэвлэс, пхагердяс тай лиляс тэ хал.
ACT 27:36 Адава зоралякердяс алаен, тай он лилэ тэ хан.
ACT 27:37 Алаи опэр карабляс амэн сас душэл эфтадэша шов мануша.
ACT 27:38 Кана о мануша чялэс халэ, он лилэ тэ локярэн о карабляс, кай ченас андэ моря о гив.
ACT 27:39 Пал сабахтанятэ он на пэнджярдэ э пху, ами дикхлэ э бухта э кишаяки пхуяса, савятэ он манглэ тэ тэрдён, тэ овэл алаи лачё.
ACT 27:40 О матрося чиндэ о якорядэс тай читэ лэн андэ моря, пхутэрдэ э рулески ровли, ваздинэ о тикноро парусас тай болдинэ о карабляс ко чети ки панеско.
ACT 27:41 Ай о карабляс урянило опэр кишай тай бэшло опэр мели. О накх хор гело андэ кишай тай нащи кхелавэсас лэс, ай э кармас пхагерэнас о валнадэс.
ACT 27:42 О салдатя манглэ тэ мударэн алаи э пханлимарен, никхон андар лэндэ, кана кан никлёл, тэ на нашэл.
ACT 27:43 Ай э шэлэнго баро мангелас тэ кутардиел э Павлэс тай тэрдярдяс лэн. Ов пхэнляс одолэнги, савэ галёнас тэ дэн джялдави, тэ ченпэс андэ пани ангал тай тэ джян ки пху.
ACT 27:44 Авэра камэлас тэ джян опэр пхалендэ тай опэр пхаге котора ки карабляски. Аякха алаи лачимаса никлистэ опэр пху.
ACT 28:1 Кана амэ кутардымусамэн, амэ галилям, кай о острав бучёл Мальта.
ACT 28:2 Аканутнэ мануша муклэ амэн пхутэрдэ илэса, со амэ на ишандиясас. Он тхардэ яг тай динэ икос амэн пумэндэ, вай сас шыл тай джялас брышым.
ACT 28:3 Кана о Павел кидиняс ангали кашта тай мангляс тэ чел лэн андэ яг, лэско васт астардяс сап, сави кутардиеласпэс катар яг тай балакады андар кашта.
ACT 28:4 Кана о аканутнэ дикхлэ, кай опрал Павлэско васт салындиел сап, он лилэ тэ пхэнэн екхаврэски: — Чячес адава мануш мударимари: ов кутардыпэс катар моря, ай э дэвлинка э цындоски на мукел лэс тэ ачёл дживиндо.
ACT 28:5 Ай о Павел какты э сапэс андэ яг, тай ой на кердяс лэски джюнгалипэ.
ACT 28:6 О мануша ишандиенас, кай ов кан лэл тэ шувлёл я бирдэн кан пэрэл муло. Он ишандылар бут вахыти, тай кана дикхлэ, кай лэса ништо на уло, паровдэ по тюшундипэ тай лилэ тэ пхэнэн, кай ов саво-то дэл.
ACT 28:7 Надур сас мангин, саво сас э барэ манушэско опэр острав, савэско нав Публий. Ов лошаса мукляс амэн пэстэ, тай трин дес амэ самас лэстэ.
ACT 28:8 О дад э Публияско сас насвало пашло опэр тхан. Ов сас тхаро, тай лэстэ сас дизентерия. О Павел ало лэстэ, мангляс э Дэвлэс, тхэдяс опэр лэстэ пэ васта тай аиндэрды лэс.
ACT 28:9 Кана адава уло, авэра о насвалэ э остравески лилэ тэ авэн тай тэ аиндиен.
ACT 28:10 Он кердэ амэнги бари пачя, тай кана амэ камэлас тэ джяс карабляса, он динэ амэн дромэски алаи, со камэлас.
ACT 28:11 Накхло трин чён, тай амэ никлистям опэр моря опэр караблястэ андар Александрия, саво вэнкярдяс опэр острав. Адава карабляс пхеравэлас нав «Дуй пхрала».
ACT 28:12 Амэ алям андэ Сиракузи тай самас отхэ трин дес.
ACT 28:13 Отхар амэ гелям тай алям андэ Ригий. Авэр дес пхудиняс балвал катар юги, тай екхе десестар амэ алям андэ Путеоли.
ACT 28:14 Отхэ амэ аракхлям пхралэн, тай он манглэ амэн тэ овас лэнца базари. Тай аки амэ алям андэ Рим.
ACT 28:15 О пхрала андэ Рим шунлэ одолэстар, кай амэ камэл тэ авас, тай никлистэ мамуй джи ко Аппиеско Майдани тай джи ки дизори Трин Гастиницэс. Кана о Павел дикхляс лэн, ов махтады э Дэвлэс тай диндило такати.
ACT 28:16 Амэ алям андэ Рим, тай э Павлэс муклэ тэ бэшэл башка. Лэса бэшэлас екх салдати, саво дикхелас пал лэстэ.
ACT 28:17 Тринэ десендар о Павел диняс икос э намлыдэн иудеен. Кана он кидинэпэс, ов пхэнляс лэнги: — Пхралалэн, мэ сомас пханло андэ Иерусалими тай диндо ко римляня, ай мэ на кердём ништо мамуй амарэ дюнястэ, нэ мамуй ко дилэс амарэ дадэнги.
ACT 28:18 О римляня кердэ манги цындос тай манглэ тэ мукен ман, вай пал мандэ нанай нисави дош, андар савятэ камэл тэ мэрав.
ACT 28:19 Ай о иудея на мангенас адава, тай мэ камэлас тэ мангав цындос ко император. Ай мэ кердём адава на тэ керав дошалэс мэ дюняс.
ACT 28:20 Мэ оничин авдес динём икос тумэн, тэ дикхав тумэн тай тэ зборизав тумэнца. Вай андар ишандима ки Израилеско опэр мандэ адала джянджира.
ACT 28:21 О иудея пхэнлэ э Павлэски: — Амэ на диндилям нисавэ письмадэс тутар андар Иудея, тай никхон андар пхрала, кай алэ отхар, на пхэнлэ амэнги тутар ништо джюнгало.
ACT 28:22 Ай амэ манглям тутар тэ шунас, сар ту тюшундиес. Вай амэ шунас екх налачё адалэ сикляримастар.
ACT 28:23 Он зборисаилэ э Павлэса, тай андэ пхэнло дес лэстэ кхерэ ало бут дюняс. О Павел катар сабаги тай джи ки бэлвэль пхэнэлас лэнги катар Дэвлэско Патишайлыки тай пхукавэлас лэнги катар Исус зборэнца андар Тхэдипэ ки Маисееско тай андар Прарокя.
ACT 28:24 Сарсавэ пакянилэ лэски, ай сарсавэ на.
ACT 28:25 Лэндэ уло чингар машкарэ пэстэ, тай кана он лилэ тэ джян, о Павел пхэнляс акасавке зборэс: — Шужо Духос чячи пхэнляс тумарэ дадэнги андар прароки Исаия:
ACT 28:26 «Джя адалэ дюнястэ тай пхэн: "Тумэ лачес кан шунэн, ай на кан галён, лачес кан дикхен, ай на кан дикхен.
ACT 28:27 О ило адалэ дюняско уло баруно, он пхарэс шунэн канэнца, тай о якха пумарэ пханлэ, тэ на дикхен якхенца, тэ на шунэн канэнца, тэ на галён илэса тай тэ на болдэнпэс, тэ аиндэрдияв Мэ лэн"».
ACT 28:28 Акана джянэн, кай о кутардипэ э Дэвлэско бичялдо наиудеенги: он ли кан шунэн адава габэри!
ACT 28:30 О Павел бэшэлас андэ Рим андэ астардо кхер генэ састэ дуй брэш тай мукелас пэстэ алаен, кон авэлас лэстэ.
ACT 28:31 Ов битрашако пхукавэлас о Патишайлыки э Дэвлэско тай сиклярэлас катар Сагбус Исус Христос пхутэрдэс, тай никхон лэс на тэрдярэлас.
