﻿Кердипэ.
50.
О Иосиф пэло опэр пэ дадэстэ, руно опэр лэстэ тай чюмидиняс лэс. 
Ов пхэнляс пэ иргатенги э враченги тэ керэн бальзамирования лэски дадэски, тай о врачя кердэ бальзамирования э Израилески. 
О врачя керэнас адава саранда дес. Дэчи эфтадэша дес о египтяня ровэнас пал муло. 
Кана накхлэ о деса э роимаски, о Иосиф пхэнляс э фараонески иргатенги: — Тэ аракхлём мэ мила андэ тумарэ якхендэ, манген андар мандэ э фараонес тай пхэнэн лэски: 
«Мо дад пхэнляс манги тэ хав совля тай пхэнляс: "Мэ мэрав; тхэ ман андэ склепи, саво мэ гортярдём манги ки пху Ханаан". Мук ман тэ джяв тэ пароскерав мэ дадэс. Пал отхэ мэ кан авав». 
О фараони пхэнляс: — Джя, пароскер тэ дадэс аякха, сар ту халян совля. 
О Иосиф гело тэ пароскерэл пэ дадэс, тай лэса гелэ алаи о иргатя тай о барэ мануша э фараонески, тай алаи о барэ мануша э Египтески, 
тай алаи о кхер э Иосифеско, тай лэски пхрала, тай алаи о кхер лэски дадэско. Андэ Гошэн ачилэ екх лэнги пуя тай о атарэс о барэ тай э тикнэ гайваня. 
Лэнца сас бричкес тай атлыдэс; адава сас баро табури. 
Он алэ ко тхан Горен-Атад, кай сас пал Иордани, тай отхэ лилэ лачес тэ ровэн. Отхэ о Иосиф эфта дес ровэлас пэ дадэски. 
Кана о ханаанея, о мануша одолэ пхуяки, дикхлэ роипэ ко Горен-Атад, он пхэнлэ: «Ко египтяня баро роипэ тай касывэти». Аки соски одова тхан паш ко Иордани бучёл Авел-Мицраим. 
Аякха о чявэ э Яковески кердэ, со ов пхэнляс: 
он гелдэ лэс ки пху Ханаан тай пароскердэ андэ пищера ки ливади Махпела, паш ко Мамрэ. Адая пищера о Авраам киндяс ко хетеи ко Эфрон екхетханэ э ливадяса, тэ овэл лэстэ тхан паромаски. 
Кана о Иосиф пароскердяс пэ дадэс, ов екхетханэ пэ пхралэнца тай алаенца, кон гело лэса тэ пароскерэл э дадэс, гело палэ ко Египти. 
Кана о дад муло, о пхрала э Иосифески тюшундылар: «Кай о Иосиф тэ гаравэл холи амэнги тай акана тэ кан покинэл амэнги андар алаи ко джюнгалипэ, саво амэ лэски кердям?» 
Тай он бичялдэ ко Иосиф тэ пхэнэн: — Ангал мэрипэ о дад ачявдяс асавке пхэнлиматэс: 
«Аки со тумэ камэл тэ пхэнэн тумарэ пхралэски э Иосифески: "Мэ мангав тут, апувикер тэ пхралэн лэнги дош тай о бэзя, савэ он кердэ, кай кердэ туса асавко джюнгалипэ. Акана мангав тут, апувикер о бэзя э иргатенги э Дэвлэски тэ дадэскерэски"». О Иосиф ровэлас, кана лэски пхэнэнас адала зборэс. 
Лэски пхрала алэ, пэлэ ангал лэстэ тай пхэнлэ: — Амэ — тэ иргатя. 
О Иосиф пхэнляс: — Ма трашан. Та со, мэ о Дэл? 
Тумэ тюшундынус мамуй мандэ джюнгалипэ, ай о Дэл болдиняс лэс андэ лачипэ тай кутарды о бэшыпэ бутэ манушэнги. 
Оничин ма трашан: мэ кан хавдярав ли тумэн, ли тумарэ пуен. Ов лошаскердяс лэн тай зборизэлас лэнца лачимаса. 
О Иосиф бэшэлас андэ Египти екхетханэ э хорандаса пэ дадэскерэса, тай бэшло шэлу дэш брэш. 
Ов сас джи, кана сас э трито порода о пуя э Ефремески. Аякхажэ о Иосиф дикхляс тай астардяс опэр кочендэ э пуен э Махирескерэн, саво сас о чяво э Манассияско. 
О Иосиф пхэнляс пэ пхралэнги: — Мэ мэрав, ай о Дэл кан авэл тэ керэл ярдыми тумэнги тай кан никалэл тумэн андар адалэ пхуятэ ки пху, сави Ов халяс совля тэ дэл ко Авраам, э Исаак тай э Яков. 
О Иосиф пхэнляс э Израилески чявэнги тэ хан совля: — О Дэл кан авэл тумэндэ тэ керэл ярдыми, тай дэчи тумэ камэл тэ никалэн атхар мэ кокала. 
Кана о Иосиф муло, лэски сас шэлу дэш брэш. Лэски кердэ бальзамирования тай тхэдэ андэ склепи андэ Египти.
