﻿Кердипэ.
15.
Пал атхэ о Сагбус о Яхвэ сикавдяспэс э Аврамески тай пхэнляс: — Ма траша, Аврам. Мэ — то кутардима. То башладима кан овэл бут баро. 
Ай о Аврам пхэнляс: — Вай, Сагбус Яхвэ, со Ту кан дэс ман? Вай мэ ачяв би пуенго, тай мо мангин кан диндёл ко Элиезер андар Дамаск. 
О Аврам генэ пхэнляс: — Ту на динян ман пуен, тай о иргати, кай аракхлило андэ мэ кхерэстэ, кан лэл мо мангин. 
Тай сас лэски збора э Сагбуски э Яхвэски: — Ов на кан лэл. Кан лэл одова, саво кан овэл тутар. 
Ов никалдяс лэс аври тай пхэнляс: — Дикх карин булутя тай гин о чергэня. Ту кан гинэс лэн? — Тай пхэнляс лэски: — Аборкха кан овэн тутэ пуя. 
О Аврам пакянило э Сагбуски э Яхвэски, тай Ов гиндяс лэс чячес. 
Генэ Ов пхэнляс лэски: — Мэ — о Сагбус о Яхвэ, Саво никалдяс тут андар Ур ки халдеенго, тэ дэл тут адая пху. 
Ай о Аврам пхучляс: — Вай, Сагбус Яхвэ, сар мэ тэ галяв, кай ой кан овэл минри? 
О Сагбус о Яхвэ пхэнляс лэски: — Ан Манги тринэ брэшэнги гурувня, тринэ брэшэнги бузня тай тринэ брэшэнги бакрэс, тай генэ ан голубка тай тэрнэ голубес. 
О Аврам аякха ли кердяс. Ов чиндяс лэн дуй котора тай тхэдяс о котора о екх мамуй аврэстэ. Ай э чириклен ов на чиндяс дуй котора. 
О барэ канлыдэс чирикля кидэнаспэс опэр мулэ тэня, ай о Аврам кувдиелас лэн. 
Сар бэшло о кхам, э Аврамес лиляс зорало суно. Атхэ вэркатэ фулистини кали тэмина, тай бари траш лиляс лэс. 
О Сагбус о Яхвэ пхэнляс лэски: — Тэ джянэс, кай тэ пуя кан овэн джятя андэ джяти пху; лэн кан керэн иргатен тай кан тасавэн штаршэл брэш. 
Ай Мэ кан тасавав о дюняс, саво кердяс лэн иргатен, тай дэчи он кан никлён отхар барэ мангинэса. 
Ту бут пхуро кан мэрэс андэ рагати тай кан овэс тэ дадэндэ. 
Атхэ кан авэл о штарто роди тэ породако, вай дага о бэзя э амореенги на улэ джи ко чети. 
Кана о кхам бэшло тай уло тэмина, бирдэн ули бари яг тай какаи ангарэнца, андар савятэ ваздиндёлас тхув. Он накхлэ машкарэ ко чиндэ котора. 
Андэ одова дес о Сагбус о Яхвэ кердяс завети э Аврамеса тай пхэнляс: — Мэ дав тэ пуен адая пху, катар египтески диряв джи ки бари диряв Евфрат: 
э пху э кенеенги, кенезеенги, кадмонеенги, 
хетеенги, периззеенги, рефаимеенги, 
амореенги, ханаанеенги, гиргашэенги тай евусеенги. 
