﻿1 ⵢⵓⵃⴰⵏⵏⴰ.
1.
ⵡⴻⵏⵏⵉ ⵜⵓⵖⴰ ⴷⵉⵏ ⵣⴻⴳ ⵓⵎⴻⵣⵡⴰⵔⵓ, ⴷ ⵏⴻⵜⵜⴰ ⵉ ⴷ ⴰⵡⴻⵎ ⵏⴻⵜⵜⴱⴰⵔⵔⴻⵃ: ⵡⴻⵏⵏⵉ ⵏⴻⵙⵍⴰ ⴷ ⵡⴻⵏⵏⵉ ⵏⴻⵥⵔⴰ ⵙ ⵜⵉⵟⵟⴰⵡⵉⵏ ⵏⵏⴻⵖ, ⴷ ⵡⴻⵏⵏⵉ ⵏⴻⵜⵡⴰⵍⴰ ⵓ ⵏⵃⴰⴷⴰ ⵜ ⵙ ⵉⴼⴰⵙⵙⴻⵏ ⵏⵏⴻⵖ ⴷ ⵡⴻⵏⵏⵉ ⵉⴵⴰⵏ ⴷ ⴰⵡⴰⵍ ⵉⴷⴷⴰⵔⴻⵏ. 
ⴰⵇⴰ ⵜⵓⴷⴰⵔⵜ ⵜⴻⴹⵀⴰⵔ-ⴷⴷ, ⵏⴻⵛⵛⵉⵏ ⵏⴻⵥⵔⴰ ⵉ-ⵜⵜ, ⵓⵛⴰ ⵏⵛⴻⵀⵀⴻⴷ ⵓ ⵏⴻⵜⵜⴱⴰⵔⵔⴻⵃ ⴰⵡⴻⵎ ⵜⵓⴷⴰⵔⵜ ⵉⵜⵜⴷⵓⵎⴰⵏ, ⵜⴻⵏⵏⵉ ⵜⵓⵖⴰ ⴰⴽ-ⴷ ⴱⴰⴱⴰⵜⵏⴻⵖ ⵓⵛⴰ ⵜᵉⵜⵜⵡⴰⵙⵙⴰⵔⴳⴻⴱ-ⴷⴷ ⵉ ⵏⴻⵛⵛⵉⵏ. 
ⵎⵉⵏ ⵏⴻⵥⵔⴰ ⴷ ⵎⵉⵏ ⵏⴻⵙⵍⴰ, ⴰⴷ ⴰⵡⴻⵎ ⵜ-ⵉ-ⴷⴷ-ⵏⴻⵙⵙⵛⴻⵏ, ⵃⵉⵎⴰ ⵄⴰⵡⴻⴷ ⴽⴻⵏⵏⵉⵡ ⴰⴷ ⵜⵉⵍⵉⵎ ⴷⴻⴳ ⵓⵎⵓⵏⵉ ⴰⴽⵉⴷⵏⴻⵖ, ⵓⵛⴰ ⴰⵎⵓⵏⵉ ⵏⵏⴻⵖ ⴰⴽ-ⴷ ⴱⴰⴱⴰⵜⵏⴻⵖ ⵓ ⴰⴽ-ⴷ ⵎⵎⵉⵙ ⵢⴰⵙⵓⵄ ⵍⵎⴰⵙⵉⵃ. 
ⴰⵇⴰ ⵏⴻⵜⵜⴰⵔⵉ ⵎⴰⵏ ⴰⵢⴰ ⵉ ⴽⴻⵏⵏⵉⵡ, ⵃⵉⵎⴰ ⵍⴻⴼⵔⴰⵃⴻⵜ ⵏⵏⴻⵖ ⴰⴷ ⵜⵉⵍⵉ ⵜⴻⴽⵎⴻⵍ. 
ⴷ ⵡⴰ ⴷ ⵍⴻⵅⴱⴰⵔ ⴰⵚⴻⴱⵃⴰⵏ ⵉ ⵣⵣⴰⵢⴻⵙ ⵏⴻⵙⵍⴰ ⵓⵛⴰ ⴰⴷ ⴰⵡⴻⵎ ⵏⴱⴰⵔⵔⴻⵃ: ⴰⵔⴻⴱⴱⵉ ⴷ ⵜⴰⴼⴰⵡⵜ, ⵏⴻⵜⵜⴰ ⵡⴰⵔ ⴷⴰⵢⴻⵙ ⴱⵓ ⵊⵊⵓⵔⵔⴻⵜ ⵏ ⵜⴰⴵⴻⵙⵜ. 
ⵎⴰⵍⴰ ⵏⴻⵇⵇⴰⵔ, ⴰⵇⴰ ⵖⴰⵔⵏⴻⵖ ⴰⵎⵓⵏⵉ ⴰⴽⵉⴷⴻⵙ, ⵓⵛⴰ ⵏⴻⴳⴳⵓⵔ ⴷⵉ ⵜⴰⴵⴻⵙⵜ, ⴰⵇⴰ ⵏⴻⵙⵙⵅⴰⵔⵔⵉⵇ, ⵡⴰⵔ ⵏⴹⴻⴼⴼⴰⵔ ⵛⴰ ⵜⵉⴷⴻⵜⵜ. 
ⵎⴰⵛⴰ ⵎⴰⵍⴰ ⵏⵓⵢⵓⵔ ⴷⵉ ⵜⴼⴰⵡⵜ, ⴰⵎ ⵏⴻⵜⵜⴰ ⴷⵉ ⵜⴼⴰⵡⵜ, ⵖⴰⵔⵏⴻⵖ ⴰⵎⵓⵏⵉ ⴰⴽ-ⴷ ⵡⴰⵢⴰⵡⵢⴰ, ⵓⵛⴰ ⴰⴷ ⵜⴰⴼ ⵉⴷⴰⵎⵎⴻⵏ ⵏ ⵢⴰⵙⵓⵄ, ⵎⵎⵉⵙ, ⴰⴷ ⴰⵏⴻⵖ ⵙⵙⵉⵣⴷⴻⴳⴻⵏ ⵣⵉ ⵎⴰⵔⵔⴰ ⴷⴷⵏⵓⴱ ⵏⵏⴻⵖ. 
ⵎⴰⵍⴰ ⵏⴻⵇⵇⴰⵔ, ⵡⴰⵔ ⴷⴰⵢⵏⴻⵖ ⴱⵓ ⴷⴷⵏⵓⴱ, ⴰⵇⴰ ⵏⴻⵙⵙⵅⴰⵔⵔⵉⵇ ⵅ ⵢⵉⵅⴻⴼ ⵏⵏⴻⵖ ⵓⵛⴰ ⵜⵉⴷⴻⵜⵜ ⵡⴰⵔ ⴷⴰⵢⵏⴻⵖ ⵜⴻⴵⵉ. 
ⵎⴰⵛⴰ ⵎⴰⵍⴰ ⵏⴻⵏⵄⴻⵎ ⵙ ⴷⴷⵏⵓⴱ ⵏⵏⴻⵖ, ⴰⵇⴰ ⵏⴻⵜⵜⴰ ⴷ ⴰⵎⵜⵉⵇⵇⵉ ⴷ ⴰⵎⵙⴻⴳⴳⴰⴷ ⵃⵉⵎⴰ ⴰⴷ ⴰⵏⴻⵖ ⵉⵖⴼⴰⵔ ⴷⴷⵏⵓⴱ ⵏⵏⴻⵖ ⵓⵛⴰ ⴰⴷ ⴰⵏⴻⵖ ⵉⵙⵙⵉⵣⴷⴻⴳ ⵣⵉ ⵎⴰⵔⵔⴰ ⵎⵉⵏ ⵡⴰⵔ ⵉⵙⴻⴳⴳⴷⴻⵏ. 
ⵎⴰⵍⴰ ⵏⴻⵇⵇⴰⵔ: ‘ⵏⴻⵛⵛⵉⵏ ⵡⴰⵔ ⴷⴰⵢⵏⴻⵖ ⴱⵓ ⴷⴷⵏⵓⴱ!’, ⵏⴻⵜⵜⴰⵔⵔⴰ ⵉ-ⵜ ⴷ ⴱⵓ-ⵉⵅⴰⵔⵔⵉⵇⴻⵏ ⵓⵛⴰ ⴰⵡⴰⵍ ⵏⵏⴻⵙ ⵡⴰⵔ ⴷⴰⵢⵏⴻⵖ ⵉⴵⵉ. 
