﻿ⵉⵄⵉⴱⵔⴰⵏⵉⵢⵢⴻⵏ.
3.
ⵙ ⵓⵢⴻⵏⵏⵉ, ⴰ ⴰⵢⵜⵎⴰ ⵉⵎⵇⴻⴷⴷⴰⵙⴻⵏ, ⵉⵏⵏⵉ ⵉⵜⵜⵡⴰⵍⴰⵖⴰⵏ ⵙ ⵜⵍⴰⵖⵉⵜ ⵏ ⵓⵊⴻⵏⵏⴰ, ⵅⵣⴰⵔⴻⵎ ⵖⴰⵔ ⵔⵔⴰⵙⵓⵍ ⵡⴰⵏⵉⵜⴰ, ⵖⴰⵔ ⴰⵔⵔⴰⵢⵙ ⵏ ⵉⴽⴻⵀⵀⴰⵏⴻⵏ ⵏ ⵛⵛⵀⴰⴷⴻⵜ ⵏⵏⴻⵖ, ⵢⴰⵙⵓⵄ ⵍⵎⴰⵙⵉⵃ,    
ⵡⴻⵏⵏⵉ ⴷ ⴰⵎⵜⵉⵇⵇⵉ ⵉ ⵡⴻⵏⵏⵉ ⵉ-ⵜ-ⵉ-ⴷⴷ-ⵉⵙⵙⴳⴻⵄⵄⴷⴻⵏ, ⴰⵎ ⵎⴰⵎⵎⴻⵛ ⵜⵓⵖⴰ ⵎⵓⵙⴰ ⴷ ⴰⵎⵜⵉⵇⵇⵉ ⴷⵉ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ. 
ⵎⵉⵏⵣⵉ ⴰⵄⵓⴵⵉ ⵏ ⵡⴰⵏⵉⵜⴰ ⴷ ⴰⵎⴻⵇⵇⵔⴰⵏ ⵙ ⵡⴰⵟⵟⴰⵙ ⵅ ⵡⴻⵏⵏⵉ ⵏ ⵎⵓⵙⴰ, ⴰⵎ ⵛⵛⴰⵏ ⵏ ⵓⴱⴻⵏⵏⴰⵢ ⵏ ⵜⴰⴷⴷⴰⵔⵜ ⵉⵎⵖⴰⵔ ⵅ ⵛⵛⴰⵏ ⵏ ⵍⴻⴱⵏⵉ ⵏⵏⴻⵙ. 
ⵎⵉⵏⵣⵉ ⵎⴰⵔⵔⴰ ⵜⴰⴷⴷⴰⵔⵜ ⵜᵉⵜⵜⵡⴰⴱⵏⴰ ⵣⴻⴳ ⵉⵊⵊⴻⵏ, ⵎⴰⵛⴰ ⵡⴻⵏⵏⵉ ⵉⴱⴻⵏⵏⴰⵏ ⵎⴰⵔⵔⴰ ⴷ ⴰⵔⴻⴱⴱⵉ. 
ⵜᵉⵜⵜⵡⴰⵡⴻⴽⴽⴻⵍ ⵉ ⵎⵓⵙⴰ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ ⴰⵎ ⵉ ⵢⵉⵊⵊ ⵏ ⵓⵎⵙⴻⵅⵅⴰⵔ, ⵎⴰⵃⴻⵏⴷ ⴰⴷ ⵉⵛⵀⴻⴷ ⵅ ⵜⵎⴻⵙⵍⴰⵢⵉⵏ ⵎⵉⵏ ⵅⴻⴼ ⵖⴰ ⵉⵙⵙⵉⵡⴻⵍ ⵏⴻⵜⵜⴰ. 
ⵎⴰⵛⴰ ⵍⵎⴰⵙⵉⵃ ⴰⵎ ⵎⵎⵉⵙ ⵉⵜⵜⵡⴰⴳⴳ ⵅ ⵜⴰⴷⴷⴰⵔⵜ ⵏⵏⴻⵙ, ⵓ ⵜⴰⴷⴷⴰⵔⵜ ⵏⵏⴻⵙ ⴷ ⵏⴻⵛⵛⵉⵏ, ⵎⴰⵍⴰ ⵏⴻⵇⵇⵉⵎ ⵏᵉⵜⵜⴻⵟⵟⴻⴼ ⴷⵉ ⵍⴰⵎⴰⵏ ⵓ ⴷⴻⴳ ⵓⵄⵓⴵⵉ ⵏ ⵓⵙⵉⵜⴻⵎ ⵏⵏⴻⵙ ⴰⵍ ⴰⵏⴻⴳⴳⴰⵔ. 
ⵎⴰⵛⴰ ⵎⵉⵏⵣⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵉⵏⵏⴰ ... “ⴰⵇⴰ ⴰⵙⵙ-ⴰ ⵎⴰⵍⴰ ⵜⴻⵙⵍⵉⵎ ⵜⵎⵉⵊⵊⴰ ⵏⵏⴻⵙ, 
ⵡⴰⵔ ⵜⵜᵉⵙⵙⴻⵇⵙⵉⵃⴻⵎ ⵛⴰ ⵓⵍⴰⵡⴻⵏ ⵏⵡⴻⵎ ⵎⴰⵃⴻⵏⴷ ⴰⴷ ⵜ ⵜⴻⵙⵄⴰⵔⴻⵎ, ⴰⵎ ⵉⵏⵏⵉ ⵉⵖⴻⵡⵡⵖⴻⵏ, ⴰⵎ ⴷⴻⴳ ⵡⴰⵙⵙ ⵏ ⵓⵊⴰⵔⵔⴻⴱ ⴷⵉ ⵍⴻⵅⵍⴰ, 
ⵓⵎⵉ ⴷ ⴰⵢⵉ ⵊⴰⵔⵔⴱⴻⵏ ⵍⴻⵊⴷⵓⴷ ⵏⵡⴻⵎ, ⵇⴻⴵⴱⴻⵏ ⴰⵢⵉ, ⴰⵎ ⵥⵔⵉⵏ ⵜⵉⵎⴻⴳⴳⴰ ⵉⵏⵓ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. 
... ⵙ ⵓⵢⴰ ⵄⵉⴼⴼⴻⵖ ⵣⵉ ⵊⵊⵉⵍ ⵏⵏⵉ, ⵏⵏⵉⵖ: ‘ⵡⴰ ⴷ ⵉⵊⵊ ⵏ ⵍⴳⴻⵏⵙ ⵉ ⵉⵡⴻⴷⴷⴰⵔⴻⵏ ⴷⴻⴳ ⵡⵓⵍ ⵏⵏⴻⵙ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵛⴰ ⵉⴱⵔⵉⴷⴻⵏ ⵉⵏⵓ!’, 
ⴰⵍⴰⵎⵉ ⵊⵊⵓⴵⴻⵖ ⴷⴻⴳ ⵡⴻⵖⴹⴰⴱ ⵉⵏⵓ: ‘ⵡⴰⵔ ⴷⴷ-ⵜⵜⵉⴷⴼⴻⵏ ⵛⴰ ⵖⴰⵔ ⴰⵔⵔⴰⵃⴻⵜ ⵉⵏⵓ!’” 
ⵙ ⵓⵢⴻⵏⵏⵉ, ⴰ ⴰⵢⵜⵎⴰ, ⵃⴹⴰⵎ ⵃⵉⵎⴰ ⵄⴻⵎⵎⴰⵔⵚ ⵡⴰⵔ ⵉⵜⵜⵉⵍⵉ ⵃⴻⴷ ⵣⵣⴰⵢⵡⴻⵎ ⵖⴰⵔⴻⵙ ⵓⵍ ⴷ ⴰⵄⴻⴼⴼⴰⵏ ⵉ ⵡⴰⵔ ⵉⵜⵜⵉⵎⵏⴻⵏ ⵓⵎⵉ ⵖⴰ ⵜⴰⴳⴳⵯⴻⵊⴻⵎ ⵅ ⴰⵔⴻⴱⴱⵉ ⵉⴷⴷⴰⵔⴻⵏ, 
ⵎⴰⵛⴰ ⵇⴻⴵⴱⴻⵎ ⵉⵅⴻⴼ ⵏⵡⴻⵎ ⴽⵓⵍ ⴰⵙⵙ, ⴰⵍ ⴰⵙⵙ ⵓⵎⵉ ⵇⵇⴰⵔⴻⵏ: ‘ⴰⵙⵙ-ⴰ!’, ⵃⵉⵎⴰ ⵓⵍⴰ ⴷ ⵉⵊⵊ ⵣⵣⴰⵢⵡⴻⵎ ⵡⴰⵔ ⵉⵜⵜⴻⵇⵙⵉⵃ ⵛⴰ ⵙ ⵓⵖⴻⴽⴽⵡⵉ ⵏ ⴷⴷⴻⵏⴱ. 
ⵎⵉⵏⵣⵉ ⵏⴻⵜⵜⵡⴰⵙⵙⵎⵓⵏ ⴰⵟⵟⴰⵙ ⴰⴽ-ⴷ ⵍⵎⴰⵙⵉⵃ ⵎⴰⵍⴰ ⵏⴻⵇⵇⵉⵎ ⵏⵛⴻⴱⴱⴰⵔ ⵣⴻⴳ ⵓⵎⴻⵣⵡⴰⵔ ⴰⵍ ⴰⵏⴻⴳⴳⴰⵔ ⴷⵉ ⵍⵄⴰⵀⴷ-ⴰ ⵉ ⴷⴰⵢⴻⵙ ⵍⴰⵎⴰⵏ. 
ⵙ ⵓⵢⴰ ⵉⵜⵜⵡⴰⵏⵏⴰ ⴰⵎⵎⵓ: “ⴰⵇⴰ ⴰⵙⵙ-ⴰ, ⵎⴰⵍⴰ ⵜⴻⵙⵍⵉⵎ ⵍⵃⴻⵙⵙ ⵏ ⵜⵎⵉⵊⵊⴰ ⵏⵏⴻⵙ, ⵡⴰⵔ ⵜⴻⵙⵙⴻⵇⵙⵉⵃⴻⵎ ⵛⴰ ⵓⵍⴰⵡⴻⵏ ⵏⵡⴻⵎ ⵎⴰⵃⴻⵏⴷ ⴰⴷ ⵜ ⵜⴻⵙⵄⴰⵔⴻⵎ.” 
ⵅⴻⵏⵏⵉ ⵎⵉⵏ ⵉⵄⵏⴰⵏ ⵏⵉⵜⵏⵉ ⵉⵏⵏⵉ ⵉⵙⵍⵉⵏ ⵜ, ⵅⴻⵏⵏⵉ ⵖⴻⵡⵡⵖⴻⵏ? ⵎⴰ ⵡⴰⵔ ⴵⵉⵏ ⵏⵉⵜⵏⵉ ⵎⴰⵔⵔⴰ ⴷ ⵉⵏⵏⵉ ⴷⴷ-ⵉⴼⴼⵖⴻⵏ ⵣⵉ ⵎⵉⵚⵔⴰ ⵙ ⵓⴼⵓⵙ ⵏ ⵎⵓⵙⴰ? 
ⵣⵉ ⵎⴰⵏ ⵡⴻⵏ ⵉⵄⵉⴼⴼ ⵏⴻⵜⵜⴰ ⵅⴻⵏⵏⵉ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ? ⵎⴰ ⵡⴰⵔ ⵉⴵⵉ ⵣⴻⴳ ⵢⵉⵏⵏⵉ ⵉⵅⴹⴰⵏ, ⵉⵏⵏⵉ ⵓⵎⵉ ⵉⵡⴹⴰⵏ ⵉⵖⵙⴰⵏ ⵏⵙⴻⵏ ⴷⵉ ⵍⴻⵅⵍⴰ? 
ⵉ ⵓⵎⵉ ⵉⵊⵊⵓⴵ ⵏⴻⵜⵜⴰ, ⴱⴻⵍⵍⵉ ⵡⴰⵔ ⴷⴷ-ⵜⵜⵉⴷⴼⴻⵏ ⵛⴰ ⵖⴰⵔ ⴰⵔⵔⴰⵃⴻⵜ ⵏⵏⴻⵙ? ⵎⴰ ⵡⴰⵔ ⵉⴵⵉ ⵉ ⵢⵉⵏⵏⵉ ⵡⴰⵔ ⴷ ⴰⵙ ⵜⵜⵉⵇⵇⴻⵏ? 
ⴰⵇⴰ ⵏⴻⵜⵜⵡⴰⵍⴰ ⴱⴻⵍⵍⵉ ⵏⵉⵜⵏⵉ ⵡⴰⵔ ⵣⴻⵎⵎⴰⵔⴻⵏ ⴰⴷ ⴰⴷⴼⴻⵏ ⵅ ⵙⵙⵉⴱⴱⴻⵜ ⵏ ⴱⵍⴰ ⵍ’ⵉⵎⴰⵏ ⵏⵙⴻⵏ. 
