﻿ⵉⵄⵉⴱⵔⴰⵏⵉⵢⵢⴻⵏ.
1.
ⴷⴻⴳ ⵡⵓⵙⵙⴰⵏ ⵉⵄⴷⵓⵏ ⵉⵙⵙⵉⵡⴻⵍ ⴰⵔⴻⴱⴱⵉ ⴷⵉ ⴽⵓⵍ ⵍⵡⴻⵇⵜ ⵓ ⴷⴻⴳ ⵡⴰⵟⵟⴰⵙ ⵏ ⵉⴱⵔⵉⴷⴻⵏ ⴰⴽ-ⴷ ⵍⴻⵊⴷⵓⴷ ⵏⵏⴻⵖ ⵙ ⵉⵏⴰⴱⵉⵢⵢⴻⵏ. 
ⴷⴻⴳ ⵡⵓⵙⵙⴰⵏ-ⴰ ⵉⵏⴻⴳⴳⵓⵔⴰ ⴰⵇⴰ ⵉⵙⵙⵉⵡⴻⵍ-ⴷⴷ ⴰⴽⵉⴷⵏⴻⵖ ⵙ ⵎⵎⵉⵙ, ⵡⴻⵏⵏⵉ ⵉⴳⴳⴰ ⴷ ⴰⵡⵔⵉⵜ ⵏ ⴽⵓⵍⵛⵉ, ⵙ ⵡⴻⵏⵏⵉ ⵄⴰⵡⴻⴷ ⵉⴳⴳⴰ ⵣⵣⵎⴰⵏⴰⵜ. 
ⵎⵉⵏⵣⵉ ⵏⴻⵜⵜⴰ ⴷ ⵜⴰⵍⴻⵍⵍⴻⵛⵜ ⵏ ⵓⵄⵓⴵⵉ ⵏⵏⴻⵙ ⵓⵍⴰ ⴷ ⵜⵜⴻⵙⵡⵉⵔⵜ ⵏ ⵙⵉⵎⴰⵏⵜ ⵏⵏⴻⵙ, ⵓ ⵏⴻⵜⵜⴰ ⴷ ⵡⴻⵏⵏⵉ ⵢⴰⵔⴻⴱⴱⵓⵏ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵙ ⵊⵊⴻⵀⴷ ⵏ ⵡⴰⵡⴰⵍ ⵏⵏⴻⵙ. ⴰⵇⴰ ⵏⴻⵜⵜⴰ ⵉⵙⵙⵉⵣⴷⴻⴳ ⴷⴷⵏⵓⴱ ⵏⵏⴻⵖ ⴷⵉ ⵟⵟⴱⵉⵄⴻⵜ ⵏ ⵢⵉⵅⴻⴼ ⵏⵏⴻⵙ, ⵓⵛⴰ ⵉⵔⵓⵃ ⵉⵇⵇⵉⵎ ⵖⴰⵔ ⵢⴻⴼⵓⵙ ⵏ ⵍⵄⴰⴹⵉⵎ ⴷⵉ ⵍⵓⵄⵍⴰ. 
ⵏⴻⵜⵜⴰ ⵢⵓⵄⵍⴰ ⴰⵟⵟⴰⵙ ⵅ ⵍⵎⴰⵍⴰⴽⴰⵜ ⴰⵎ ⵉⵙⴻⵎ ⵉ ⵉⵟⵟⴻⴼ ⴷ ⵍⵡⴰⵔⵜ, ⴰⵇⴰ ⵉⵛⵏⴰ ⵅ ⵡⴻⵏⵏⵉ ⵏⵙⴻⵏ. 
ⵎⵉⵏⵣⵉ ⵉ ⵎⴰⵏ ⵜⴻⵏ ⵣⵉ ⵍⵎⴰⵍⴰⴽⴰⵜ ⵉⵏⵏⴰ ⴰⵔⴻⴱⴱⵉ: “ⵎⵎⵉ ⵉ ⵜⴻⴵⵉⴷ ⵛⴻⴽ, ⴰⵙⵙ-ⴰ ⵏⴻⵛⵛ ⵊⵊⵉⵖ-ⴷⴷ ⵛⴻⴽ!”, ⵓⵛⴰ ⵄⴰⵡⴻⴷ ⵉⵏⵏⴰ: “ⵏⴻⵛⵛ ⴰⴷ ⴰⵙ ⵉⵍⵉⵖ ⴷ ⴱⴰⴱⴰⵙ ⵓ ⵏⴻⵜⵜⴰ ⴰⴷ ⴰⵢⵉ ⵢⵉⵍⵉ ⴷ ⵎⵎⵉ”? 
ⵓⵛⴰ ⵅⴻⵏⵏⵉ ⵅⵎⵉ ⴷⴷ-ⵉⵙⵙⵉⴷⴻⴼ ⴰⵎⴻⵏⵣⵓ ⵖⴰⵔ ⴷⴷⵓⵏⴻⵛⵜ, ⵉⵏⵏⴰ: “ⴰⴷ ⴰⵙ ⵙⴻⵊⴷⴻⵏⵜ ⵎⴰⵔⵔⴰ ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ.” 
ⵎⴰⵛⴰ ⵅ ⵍⵎⴰⵍⴰⴽⴰⵜ ⵉⵏⵏⴰ: “ⵏⴻⵜⵜⴰ ⵉⴳⴳⴰ ⵍⵎⴰⵍⴰⴽⴰⵜ ⵏⵏⴻⵙ ⴷ ⵉⵙⴻⵎⵎⵉⴹⴻⵏ, ⵓⵛⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵉⵛⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ”, 
ⵎⴰⵛⴰ ⵅ ⵎⵎⵉⵙ: “ⵍⵄⴰⵔⵛ ⵏⵏⴻⵛ, ⴰ ⴰⵔⴻⴱⴱⵉ, ⴰⵇⴰ ⵉⴵⴰ ⵉ ⵍⴻⴱⴷⴰ ⵇⴰⵄ. ⴰⵣⴻⴵⴰⴹ ⵏ ⵜⴳⴻⵍⴷⵉⵜ ⵏⵏⴻⵛ, ⴰⵇⴰ-ⵜⵜ ⴷ ⴰⵣⴻⴵⴰⴹ ⵉⵙⴻⴳⴳⴷⴻⵏ. 
ⴰⵇⴰ ⵜⴻⵅⵙⴻⴷ ⵜⴰⵙⴻⴳⴷⴰ, ⵜⵛⴰⵔⵀⴻⴷ ⵍⵖⴰⵔ. ⵙ ⵓⵢⴻⵏⵏⵉ ⴰⵇⴰ ⵉⴷⵀⴻⵏ ⵉ ⵛ ⴰⵔⴻⴱⴱⵉ, ⴰⵔⴻⴱⴱⵉ ⵏⵏⴻⵛ, ⵙ ⵣⵣⴻⵛⵜ ⵏ ⵍⴻⴼⵔⴰⵃⴻⵜ ⵙⴻⵏⵏⴻⵊ ⵉ ⵉⵎⵄⴰⵛⴰⵔⴻⵏ ⵏⵏⴻⵛ.” 
ⵓⵛⴰ ⵅⴻⵏⵏⵉ: “ⵣⴻⴳ ⵓⴱⴻⴷⴷⵓ ⵜⴻⴳⴳⵉⴷ ⵛⴻⴽ ⴷⵙⴰⵙ ⵏ ⵜⴻⵎⵎⵓⵔⵜ, ⵉⵊⴻⵏⵡⴰⵏ ⴵⴰⵏ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ. 
ⵉⵏⴰ ⴰⴷ ⵜⵜⵡⴰⵜⴻⵃⵃⴰⵏ, ⵎⴰⵛⴰ ⵛⴻⴽ ⴰⴷ ⵜⴷⵓⵎⴻⴷ, ⵓⵛⴰ ⵉⵏⴰ ⵎⴰⵔⵔⴰ ⴰⴷ ⴰⵔⵛⴰⵏ ⴰⵎ ⵡⴰⵔⵔⵓⴹ. 
ⴰⵎⴻⵛⵏⴰⵡ ⵉⵊⵊ ⵏ ⵓⵙⴻⵍⵀⴰⵎ ⴰⴷ ⵜⴻⵏ ⵜⵜⴹⴻⴼⵙⴻⴷ. ⴰⴷ ⵜⵜⵡⴰⴱⴻⴷⴷⵍⴻⵏ ⴰⵎ ⵡⴰⵔⵔⵓⴹ, ⵎⴰⵛⴰ ⵛⴻⴽ ⴰⴷ ⵜⵉⵍⵉⴷ ⴷ ⵡⴻⵏⵏⵉ ⵓⵛⴰ ⵉⵙⴻⴳⴳⵯⵓⵙⴰ ⵏⵏⴻⵛ ⵡⴰⵔ ⵇⴻⵟⵟⵉⵏ ⵛⴰ.” 
ⵎⴰⵛⴰ ⵉ ⵎⴰⵏ ⵜⴻⵏ ⵣⵉ ⵍⵎⴰⵍⴰⴽⴰⵜ ⵉⵏⵏⴰ ⵉⵊⵊ ⵏ ⵡⴰⵙⵙ: “ⵇⵇⵉⵎ ⵖⴰⵔ ⵢⴻⴼⵓⵙ ⵉⵏⵓ ⴰⵍ ⴷ ⵖⴰ ⴳⴳⴻⵖ ⵍⵄⴻⴷⵢⴰⵏ ⵏⵏⴻⵛ ⴷ ⵜⴰⵏⴻⴱⴷⴰⵜ ⵙⴰⴷⵓ ⵉⴹⴰⵔⴻⵏ ⵏⵏⴻⵛ”? 
ⵎⴰ ⵡⴰⵔ ⴵⵉⵏⵜ ⵏⵉⵜⴻⵏⵜⵉ ⴷ ⴰⵔⵔⵓⵃⴰⵜ ⵉ ⵜⵙⴻⵅⵅⴰⵔⵜ, ⵜⵜⵡⴰⵙⵙⴻⴽⴽⴻⵏⵜ-ⵉ-ⴷⴷ ⵃⵉⵎⴰ ⴰⴷ ⵙⴻⵅⵅⴰⵔⴻⵏⵜ ⵉ ⵢⵉⵏⵏⵉ ⵖⴰ ⵉⵡⴰⵔⵜⴻⵏ ⵜⵓⴷⴰⵔⵜ? 
