﻿ⵜⵉⵜⵓⵙ.
2.
ⵎⴰⵛⴰ ⵛⴻⴽ, ⵙⵉⵡⴻⵍ ⵎⵉⵏ ⵉⵜⵜⵍⵉⵇⴻⵏ ⵉ ⵜⵖⵓⵔⵉ ⵏ ⵚⵚⴰⵃ. 
ⵙⴻⵍⵎⴻⴷ ⵉⵎⵖⴰⵔⴻⵏ ⵎⴰⵃⴻⵏⴷ ⴰⴷ ⵉⵍⵉⵏ ⴼⴰⵇⴻⵏ, ⴰⴷ ⵓⵢⵓⵔⴻⵏ ⵙ ⵜⵙⴻⵅⵅⴰⵢⵜ ⴷ ⵜⴰⵣⴷⵓⴳⵉ ⴷ ⵍ’ⵉⵎⴰⵏ ⵏ ⵚⵚⴰⵃ ⵓ ⵙ ⵜⴰⵢⵔⵉ ⴷ ⵚⵚⴱⴰⵔ. 
ⵙⴻⵍⵎⴻⴷ ⵜⵉⵡⴻⵙⵙⵓⵔⴰ ⵄⴰⵡⴻⴷ ⴰⵎⵎⵓ, ⵎⴰⵃⴻⵏⴷ ⴰⴷ ⴳⴳⵓⵔⴻⵏⵜ ⴰⵎ ⴷⴷ-ⵉⵜⵜⵍⵉⵇ ⴰⴽ-ⴷ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ, ⵡⴰⵔ ⵜⵜⵛⴻⵇⵇⵉⴼⴻⵏⵜ ⵛⴰ, ⵡⴰⵔ ⵡⵛⵉⵏⵜ ⵉ ⴱⵉⵏⵓ, ⵎⴰⵛⴰ ⴻⵊⵊ ⵉ-ⵜⴻⵏⵜ ⴰⴷ ⵙⵙⵍⴻⵎⴷⴻⵏⵜ ⵎⵉⵏ ⵉⵚⴻⴱⵃⴻⵏ, 
ⵃⵉⵎⴰ ⴰⴷ ⵛⴻⵊⵊⵄⴻⵏⵜ ⵜⵉⴱⵍⵉⵖⵉⵏ ⴰⴷ ⵓⵢⵓⵔⴻⵏⵜ ⵙ ⵓⵡⴻⵇⵇⴰⵔ, ⴰⴷ ⵅⵙⴻⵏⵜ ⵉⵔⵢⴰⵣⴻⵏ ⵏⵙⴻⵏⵜ ⴷ ⵜⴰⵔⵡⴰ ⵏⵙⴻⵏⵜ, 
ⵓⵛⴰ ⴰⴷ ⴷⴰⵢⵙⴻⵏⵜ ⵢⵉⵍⵉ ⵓⵜⴻⴱⴱⴻⵜ ⴷ ⵜⵇⴻⴷⴷⴰⵙⵜ, ⴰⴷ ⵡⵛⴻⵏⵜ ⵜⴰⵢⵏⵉⵜ ⵉ ⴰⵢⵜ ⴱⴰⴱ ⵏ ⵜⴰⴷⴷⴰⵔⵜ ⵏⵙⴻⵏⵜ, ⴰⴷ ⴳⴳⴻⵏⵜ ⴰⵔⵔⴰⵢ ⵉ ⵢⴻⵔⵢⴰⵣⴻⵏ ⵏⵙⴻⵏⵜ, ⵃⵉⵎⴰ ⵓⵍⴰ ⴷ ⵉⵊⵊ ⵡⴰⵔ ⵉⵜⵜⵛⴻⵇⵇⴰⴼ ⵛⴰ ⴷⴻⴳ ⵡⴰⵡⴰⵍ ⵏ ⴰⵔⴻⴱⴱⵉ. 
ⵛⴻⵊⵊⵄⴻⵜ ⵄⴰⵡⴻⴷ ⵉⴱⵍⵉⵖⴻⵏ ⵃⵉⵎⴰ ⴰⴷ ⵓⵢⵓⵔⴻⵏ ⵙ ⵜⵙⴻⵅⵅⴰⵢⵜ. 
ⴻⴳⴳ ⵉⵅⴻⴼ ⵏⵏⴻⵛ ⴷⵉ ⵎⴰⵔⵔⴰ ⴷ ⵍⵎⵉⵜⴰⵍ, ⴷⵉ ⵎⴰⵔⵔⴰ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ, ⵓ ⵅⵎⵉ ⵜⴻⵙⵙⵍⴻⵎⴷⴻⴷ, ⵃⴹⴰ ⵎⴰⵃⴻⵏⴷ ⴰⴷ ⵢⵉⵍⵉ ⵡⴰⵡⴰⵍ ⵏⵏⴻⵛ ⴷ ⵚⵚⴻⵃ, 
ⵙ ⵍⴻⵚⴼⴰⵢⴻⵜ ⴱⵍⴰ ⵍⵖⴻⵛⵛ, ⵓⵛⴰ ⵡⴰⵔ ⵜ ⵉⵙⵙⴻⵃⵇⴰⵔ ⵓⵍⴰ ⴷ ⵉⵊⵊ, ⴰⵍ ⵖⴰ ⵉⵙⴻⴹⵃⴰ ⵡⴻⵏⵏⵉ ⴷ ⴰⵏⴻⵖ ⵉⵜⵜⵄⴻⴽⴽⴰⵙⴻⵏ ⵓⵎⵉ ⵡⴰⵔ ⵉⵣⴻⵎⵎⴰⵔ ⴰⴷ ⵅⴰⵏⴻⵖ ⵉⵙⵙⵉⵡⴻⵍ ⵙ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ ⵉⵙⵙⴼⴻⵟⵟⴰⵃⴻⵏ. 
ⵉⵜⵜⵅⴻⵚⵚⴰ ⵉ ⵉⵎⵙⴻⵅⵅⴰⵔⴻⵏ ⵃⵉⵎⴰ ⴰⴷ ⵟⵟⴰⵄⴻⵏ ⵉ ⴰⵢⵜⴱⴰⴱ ⵏⵙⴻⵏ ⴷⵉ ⵎⴰⵔⵔⴰ, ⴰⴷ ⴰⵙⴻⵏ ⴰⵔⴹⴰⵏ, ⵡⴰⵔ ⵜⴻⵏ ⵜⵜⵄⴻⴽⴽⵙⴻⵏ. 
ⵡⴰⵔ ⵉⵄⴻⴷⴷⴻⵍ ⴰⴷ ⴰⵛⴰⵔⴻⵏ, ⵎⴰⵛⴰ ⴻⵊⵊ ⵉ-ⵜⴻⵏ ⴰⴷ ⵙⵙⴻⵛⵏⴻⵏ ⵍⵎⴰⵏⴻⵜ ⵏⵙⴻⵏ ⵉⵛⵏⴰⵏ, ⵃⵉⵎⴰ ⴰⴷ ⵉⵜⵜⵡⴰⴳⴳ ⵛⵛⴰⵏ ⵉ ⵜⵖⵓⵔⵉ ⵏ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ. 
ⵎⵉⵏⵣⵉ ⴰⵔⴹⴰ ⵏ ⴰⵔⴻⴱⴱⵉ ⵉ ⵉⵙⵙⴰⴽⴽⵡⴰⴹⴻⵏ ⴰⵙⴻⵏⵊⴻⵎ ⵉ ⵎⴰⵔⵔⴰ, ⴰⵇⴰ ⵉⴼⴼⴻⵖ-ⴷⴷ ⵉ ⵎⴰⵔⵔⴰ ⵉⵡⴷⴰⵏ. 
ⴰⵔⴹⴰ ⵏⵏⵉ ⵉⵜⵜⴰⵔⴻⴱⴱⴰ ⴰⵏⴻⵖ ⵎⴰⵃⴻⵏⴷ ⴰⴷ ⵏᵉⵜⵜⴻⵊⵊ ⵍⴻⵇⵊⴰⵃⴻⵜ ⴷ ⵏⵏⴻⵛⵡⴰⵜ ⵏ ⴷⴷⵓⵏⴻⵛⵜ, ⵎⴰⵃⴻⵏⴷ ⴰⴷ ⵏⴻⴷⴷⴰⵔ ⴷⵉ ⴷⴷⵓⵏⴻⵛⵜ-ⴰ ⵙ ⵜⵙⴻⵅⵅⴰⵢⵜ ⴷ ⵜⵙⴻⴳⴷⴰ ⵓ ⵙ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ. 
ⴰⵎⵎⵓ ⵉ ⵏⴻⵜⵜⵔⴰⵊⴰ ⴰⵙⵉⵜⴻⵎ ⵉⵜⵜⵡⴰⴱⴰⵔⴽⴻⵏ ⵓⵍⴰ ⴷ ⴰⵙⴰⵔⴳⴻⴱ ⵏ ⵓⵄⵓⴵⵉ ⵏ ⴰⵔⴻⴱⴱⵉ ⴰⵎⴻⵇⵇⵔⴰⵏ ⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ: ⵢⴰⵙⵓⵄ ⵍⵎⴰⵙⵉⵃ. 
ⵏⴻⵜⵜⴰ ⴷ ⵡⴻⵏⵏⵉ ⵉ ⵅⴰⵏⴻⵖ ⵉⵡⵛⵉⵏ ⵉⵅⴻⴼ ⵏⵏⴻⵙ ⴷⴻⴳ ⵡⴻⵎⵛⴰⵏ ⵏⵏⴻⵖ, ⵎⴰⵃⴻⵏⴷ ⴰⴷ ⴰⵏⴻⵖ ⵉⵙⴻⵍⵍⴻⴽ ⵣⵉ ⵎⴰⵔⵔⴰ ⵍⵎⵓⵄⵚⵉⵢⵢⴻⵜ, ⵃⵉⵎⴰ ⴰⴷ ⵉⵙⵙⵉⵣⴷⴻⴳ ⵉ ⵢⵉⵅⴻⴼ ⵏⵏⴻⵙ ⵉⵊⵊ ⵏ ⵍⴳⴻⵏⵙ ⵉⵎⴻⵃⵃⴹⴻⵏ ⵉ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ. 
ⵙⵉⵡⴻⵍ ⵅ ⵎⴰⵏ ⴰⵢⴰ, ⵣⵉⵢⵢⴰⵔ ⵓ ⵡⴻⴱⴱⴻⵅ ⵙ ⵎⴰⵔⵔⴰ ⵊⵊⴻⵀⴷ, ⵡⴰⵔ ⵜⵜⴻⵊⵊⵉ ⵃⴻⴷ ⴰⴷ ⵛⴻⴽ ⵉⵙⵙⴻⵃⵇⴰⵔ. 
