﻿1 ⵜⵉⵎⵓⵜⵉⵢⵓ.
3.
ⵡⴰ ⴷ ⴰⵡⴰⵍ ⴷⴰⵢⴻⵙ ⵍⴰⵎⴰⵏ: ⵎⴰⵍⴰ ⵉⵅⵙ ⵃⴻⴷ ⴰⴷ ⵢⵉⵍⵉ ⴷ ⴰⵎⵖⴰⵔ, ⴰⵇⴰ ⵉⵜⵜⵎⴻⵥⵔⵉ ⴷⴻⴳ ⵉⵛⵜ ⵏ ⵍⵅⴻⴷⵎⴻⵜ ⵜⴻⵛⵏⴰ. 
ⵎⴰⵛⴰ ⵉⵜⵜⵅⴻⵚⵚⴰ ⵉ ⵓⵎⵖⴰⵔ ⴰⴷ ⵉⵜⵡⴰⴼ ⴱⵍⴰ ⵍⵄⵉⴱ, ⴰⴷ ⵢⵉⵍⵉ ⴷ ⴰⵔⵢⴰⵣ ⵏ ⵉⵛⵜ ⵏ ⵜⴻⵎⵖⴰⵔⵜ, ⵖⴰⵔⴻⵙ ⴰⵎⴻⴽⴽⴻⵏ ⵏ ⵏⵏⴻⴼⵙ, ⴰⴷ ⵢⵉⵍⵉ ⴷ ⴰⵙⴻⵅⵅⴰⵢ, ⴰⴷ ⵉⴳⴳ ⵙ ⵓⵙⴻⵜⵜⴻⴼ, ⴰⴷ ⵢⴰⵔⴻⵃⵃⴻⴱ ⵙ ⵉⵏⴻⵡⵊⵉⵡⴻⵏ, ⵉⵣⴻⵎⵎⴰⵔ ⴰⴷ ⵉⵙⵙⴻⵍⵎⴻⴷ. 
ⵏⴻⵜⵜⴰ ⵡⴰⵔ ⵉⵜⵜⵉⵍⵉ ⴷ ⴰⵎⴻⵙⵛⴰⵔ ⵏⵉⵖ ⵉⵡⵡⴻⵜ ⴷⴻⵖⵢⴰ ⵙ ⵓⴼⵓⵙ ⵏⵏⴻⵙ, ⵎⴰⵛⴰ ⴰⴷ ⵢⵉⵍⵉ ⴷ ⴰⵎⵡⴰⴹⴻⵄ, ⵡⴰⵔ ⵉⵜⵜⴻⵎⵛⵓⴱⴱⵓⵛ, ⵡⴰⵔ ⵉⵜⵜⵉⵍⵉ ⴷ ⴰⵇⴻⵣⵣⴰⵣ. 
ⴰⵇⴰ ⵏⴻⵜⵜⴰ ⵉⵙⵙⴻⴳⴳⵓⵔ ⵜⴰⴷⴷⴰⵔⵜ ⵏⵏⴻⵙ ⵎⵍⵉⵃ ⵓⵛⴰ ⵉⵃⴻⴽⴽⴻⵎ ⵅ ⵉⵃⴻⵏⵊⵉⵔⴻⵏ ⵏⵏⴻⵙ ⵙ ⵎⴰⵔⵔⴰ ⵍⴻⵚⴼⴰⵢⴻⵜ. 
ⵎⴰⵛⴰ ⵎⴰⵍⴰ ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⵙⵙⵓⵢⵓⵔ ⵜⴰⴷⴷⴰⵔⵜ ⵏⵏⴻⵙ, ⵎⴰⵎⵎⴻⵛ ⵖⴰ ⵉⴳⴳ ⴰⴷ ⵉⵃⴹⴰ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ? 
ⵡⴰⵔ ⵉⵜⵜⵉⵍⵉ ⴷ ⴰⵎⴻⵃⴹⴰⵔ ⵏ ⵊⴷⵉⴷ ⴷⵉ ⵍ’ⵉⵎⴰⵏ, ⵃⵉⵎⴰ ⵡⴰⵔ ⵉⵜⵜⵓⴼⴼ ⵙ ⵍⴻⴼⵢⵓⵛ ⵓⵛⴰ ⴰⴷ ⵉⵡⴹⴰ ⴷⵉ ⵛⵛⵔⴻⵄ ⵏ ⵛⵛⵉⵟⴰⵏ. 
ⵄⴰⵡⴻⴷ ⵉⵜⵜⵅⴻⵚⵚⴰ ⴰⴷ ⵖⴰⵔⴻⵙ ⵜⵉⵍⵉ ⵚⵚⵓⵎⵄⴻⵜ ⵜⴻⵛⵏⴰ ⵖⴰⵔ ⵢⵉⵏⵏⵉ ⴷⵉ ⴱⴰⵔⵔⴰ, ⵃⵉⵎⴰ ⵡⴰⵔ ⵅⴰⵙ ⵜⵜⵄⴻⵢⵢⵉⴱⴻⵏ ⵓⵛⴰ ⵡⴰⵔ ⵉⵡⴻⵟⵟⵉ ⵛⴰ ⴷⵉ ⵍⴻⴼⵅⵓⵅ ⵏ ⵛⵛⵉⵟⴰⵏ. 
ⵉⵜⵜⵅⴻⵚⵚⴰ ⵄⴰⵡⴻⴷ ⵉ ⵉⵎⵙⴻⵅⵅⴰⵔⴻⵏ ⴷⵉ ⵜⵎⴻⵙⵎⵓⵏⵜ ⴰⴷ ⵉⵍⵉⵏ ⴷ ⵉⵎⴻⵣⴷⴰⴳⴻⵏ, ⵡⴰⵔ ⵙⵙⵉⵡⵉⵍⴻⵏ ⵛⴰ ⵙ ⵜⵏⴰⵢⴻⵏ ⵏ ⵉⵍⵙⴰⵡⴻⵏ, ⵡⴰⵔ ⵅⴻⵣⵣⴰⵔⴻⵏ ⵛⴰ ⵖⴰⵔ ⴱⵉⵏⵓ ⴰⵟⵟⴰⵙ, ⵡⴰⵔ ⴹⴻⵎⵎⵄⴻⵏ ⴷⵉ ⴰⵔⵔⴱⴻⵃ ⵡⴰⵔ ⵉⵃⵍⵉⵏ. 
ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵟⵟⴼⴻⵏ ⴷⵉ ⵙⵙⵉⵔⵔ ⵏ ⵍ’ⵉⵎⴰⵏ ⵙ ⵜⵏⴻⴼⵙⴻⵛⵜ ⵜⴻⵚⴼⴰ. 
ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵇⴻⴵⴱⴻⵏ ⴷ ⴰⵎⴻⵣⵡⴰⵔⵓ, ⵍⴻⵅⴷⴻⵏⵏⵉ, ⵎⴰⵍⴰ ⵉⴱⴰⵏ-ⴷⴷ ⵡⴰⵔ ⴷⴰⵢⵙⴻⵏ ⵉⵜⵜⵉⵍⵉ ⴱⵓ ⵍⵄⵉⴱ, ⴰⴷ ⵙⴻⵅⵅⴰⵔⴻⵏ. 
ⴰⵎⵎⵓ ⵉⵜⵜⵅⴻⵚⵚⴰ ⵓⵍⴰ ⵉ ⵜⵉⵎⵖⴰⵔⵉⵏ ⴰⴷ ⴰⵔⵙⵉⵏⵜ ⵙ ⵜⵙⴻⵅⵅⴰⵢⵜ, ⴰⴷ ⵃⴹⴰⵏⵜ ⴷⵉ ⵍⴻⵄⵇⵓⵍ ⵏⵙⴻⵏⵜ, ⴰⴷ ⴷⴰⵢⵙⴻⵏⵜ ⵜⵉⵍⵉ ⵍⵎⴰⵏⴻⵜ ⴷⵉ ⵎⴰⵔⵔⴰ, ⵡⴰⵔ ⴷ ⵜⵜⵉⵍⵉⵏⵜ ⴷ ⵜⵉⵎⵛⴻⵇⵇⴰⴼⵉⵏ. 
ⵉⵜⵜⵅⴻⵚⵚⴰ ⵉ ⵉⵎⵙⴻⵅⵅⴰⵔⴻⵏ ⴷⵉ ⵜⵎⴻⵙⵎⵓⵏⵜ, ⴰⵇⴰ ⴽⵓⵍ ⵉⵊⵊⴻⵏ ⵣⵣⴰⵢⵙⴻⵏ ⴰⴷ ⵢⵉⵍⵉ ⵙ ⵉⵛⵜ ⵏ ⵜⴻⵎⵖⴰⵔⵜ, ⵓⵛⴰ ⵉⵜⵜⵅⴻⵙⵚⴰ ⴰⵙ ⴰⴷ ⵉⵙⵙⵓⵢⵓⵔ ⵎⵍⵉⵃ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴰⴷⴷⴰⵔⵜ ⵏⵏⴻⵙ. 
ⵎⵉⵏⵣⵉ ⵉⵏⵏⵉ ⵉⵜⵜⴻⴳⴳⴻⵏ ⵜⴰⵙⴻⵢⵢⴰⵔⵜ ⵏⵙⴻⵏ ⵎⵍⵉⵃ, ⴰⴷ ⵟⵟⴼⴻⵏ ⵉ ⵢⵉⵅⴻⴼ ⵏⵙⴻⵏ ⵉⵊⵊ ⵏ ⵡⴻⵎⵛⴰⵏ ⵉⵛⵏⴰ ⴷ ⵡⴰⵟⵟⴰⵙ ⵏ ⵜⴻⵔⵢⴰⵙⵜ ⴷⵉ ⵍ’ⵉⵎⴰⵏ ⵏ ⵢⴰⵙⵓⵄ ⵍⵎⴰⵙⵉⵃ. 
ⵓⵔⵉⵖ ⴰⵛ-ⴷⴷ ⵎⴰⵏ ⴰⵢⴰ ⵓⵛⴰ ⵙⵙⵉⵜⵉⵎⴻⵖ ⴰⴷ ⵖⴰⵔⴻⴽ ⴷⴷ-ⴰⵙⴻⵖ ⴷⴻⵖⵢⴰ. 
ⵎⴰⵛⴰ ⵎⴰⵍⴰ ⵄⴻⵟⵟⴰⵍⴻⵖ ⵅⴰⴽ, ⴰⴷ ⵜⴻⵙⵙⵏⴻⴷ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵏⵓⵢⵓⵔ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⵜⴻⵏⵏⵉ ⵉⴵⴰⵏ ⴷ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ ⵉⴷⴷⴰⵔⴻⵏ, ⴰⴱⵉⵍⴰⵔ ⴷ ⴷⵙⴰⵙ ⵏ ⵜⵉⴷⴻⵜⵜ. 
ⵙⵙⵉⵔⵔ ⵡⴰⵏⵉⵜⴰ ⵏ ⵜⵙⴻⴳⴷⴰ ⴷ ⴰⵎⴻⵇⵇⵔⴰⵏ ⵙ ⵜⵉⴷⴻⵜⵜ! “ⴷ ⵡⴻⵏⵏⵉ ⵉⵜⵜⵡⴰⵙⵙⴰⵔⴳⴱⴻⵏ ⴷⵉ ⴷⴷⴰⵜ, ⵉⵜⵜⵡⴰⵙⴻⴳⴳⴷⴻⵏ ⴷⵉ ⴰⵔⵔⵓⵃ, ⵉⴹⵃⴰⵔⴻⵏ-ⴷⴷ ⵉ ⵍⵎⴰⵍⴰⴽⴰⵜ, ⵉⵜⵜⵡⴰⴱⴰⵔⵔⵃⴻⵏ ⵣⵣⴰⵢⴻⵙ ⵊⴰⵔ ⵍⴻⴳⵏⵓⵙ, ⴷ ⵡⴻⵏⵏⵉ ⵣⵣⴰⵢⴻⵙ ⵢⵓⵎⵏⴻⵏ ⴷⵉ ⴷⴷⵓⵏⴻⵛⵜ, ⵉⵎⵎⴻⴽⵙⵉⵏ ⴷⴻⴳ ⵓⵄⵓⴵⵉ.” 
