﻿1 ⵉⵜⵉⵙⵙⴰⵍⵓⵏⵉⴽⵉⵢⵢⴻⵏ.
2.
ⵎⴰⵖⴰⵔ ⴽⴻⵏⵏⵉⵡ ⵙⵉⵎⴰⵏⵜ ⵏⵡⴻⵎ, ⴰ ⴰⵢⵜⵎⴰ, ⵜⴻⵙⵙⵏⴻⵎ ⴱⴻⵍⵍⵉ ⴰⴷⴰⴼ ⵏⵏⴻⵖ ⵏⵏⵉ ⴷ ⵖⴰⵔⵡⴻⵎ ⵏⴻⴳⴳⴰ, ⵡⴰⵔ ⵜⵓⵖⵉ ⵉⴵⵉ ⴱⴰⵟⴻⵍ. 
ⵜⵓⵖⴰ ⵅⴰⵏⴻⵖ ⵉⴽⴽⴰ ⵓⵡⴻⴷⴷⴻⴱ ⴷ ⵍⵃⴰⴳⵔⴰ ⴷⵉ ⴼⵉⵍⵉⴱⴱⵉ ⵇⴱⴻⵍ, ⴰⵎ ⵎⴰⵎⵎⴻⵛ ⵜⴻⵙⵙⵏⴻⵎ. ⴰⵡⴰⵔⵏⵉ ⵎⴰⵏ ⴰⵢⴰ, ⴰⵇⴰ ⵏⴱⴰⵔⵔⴻⵃ ⴰⵡⴻⵎ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ ⵙ ⵜⴻⵔⵢⴰⵙⵜ ⴷⵉ ⴰⵔⴻⴱⴱⵉ ⵏⵏⴻⵖ ⵓ ⵙ ⵓⵎⴻⵏⵖⵉ ⴰⵎⴻⵇⵇⵔⴰⵏ. 
ⵙ ⵎⵉⵏⵣⵉ ⴰⴼⴻⵡⵡⴻⵊ ⵏⵏⴻⵖ ⵡⴰⵔ ⵉⴵⵉ ⵛⴰ ⵣⴻⴳ ⵓⵖⴻⴽⴽⵡⵉ ⵏⵉⵖ ⵣⵉ ⵍⴻⵅⵎⴻⵊ ⵏⵉⵖ ⵣⵉ ⵍⵖⴻⵛⵛ, 
ⵎⴰⵛⴰ ⵏⴻⵙⵙⴰⵡⴰⵍ ⴰⵎ ⵉⵡⴷⴰⵏ ⵉ ⵉⵜⵜⵡⴰⵃⴻⵙⴱⴻⵏ ⵏⵉⵛⴰⵏ ⵣⵉ ⴰⵔⴻⴱⴱⵉ ⴰⵍⴰⵎⵉ ⴷ ⴰⵏⴻⵖ ⵉⵡⴻⴽⴽⴻⵍ ⵜⴰⴱⴰⵔⵔⴻⵃⵜ ⵏ ⵍⴻⵅⴱⴰⵔ ⵏⵏⴻⵙ ⴷ ⴰⵚⴻⴱⵃⴰⵏ, ⵡⴰⵔ ⵉⴵⵉ ⵉ ⴰⵔⴹⴰ ⵏ ⵉⵡⴷⴰⵏ, ⵎⴰⵛⴰ ⵉ ⴰⵔⴹⴰ ⵏ ⴰⵔⴻⴱⴱⵉ ⵡⴻⵏⵏⵉ ⵉⵇⴻⴵⴱⴻⵏ ⵓⵍⴰⵡⴻⵏ ⵏⵏⴻⵖ. 
ⵎⵉⵏⵣⵉ ⵄⴻⵎⵎⴰⵔⵚ ⵡⴰⵔ ⵜⵓⵖⵉ ⵏᵉⵜⵜⴻⴳⴳ ⵜⵉⵇⴻⴷⴷⵓⵃⵉⵏ, ⴰⵇⴰ ⴽⴻⵏⵏⵉⵡ ⵜⴻⵙⵙⵏⴻⵎ ⵜⵜ, ⵓ ⵡⴰⵔ ⵏᵉⵜⵜⴻⴳⴳ ⵄⴻⵎⵎⴰⵔⵚ ⵉⵊⵊ ⵏ ⵓⵍⴻⵃⵃⴰⴼ ⵅ ⵟⵟⵎⴻⵄ ⵏⵏⴻⵖ, ⴰⵔⴻⴱⴱⵉ ⴰⵇⴰ-ⵜ ⴷⵉⵏ! 
ⵡⴰⵔ ⵏⴰⵔⴻⵣⵣⵓ ⴰⵄⵓⴵⵉ ⵏ ⵉⵡⴷⴰⵏ, ⵓⵍⴰ ⵣⵣⴰⵢⵡⴻⵎ ⵓⵍⴰ ⵣⴻⴳ ⵉⵏⵏⴻⵖⵏⵉ, ⵡⴰⵅⵅⴰ ⵜⵓⵖⴰ ⵏⵣⴻⵎⵎⴰⵔ ⴰⴷ ⵏⴻⴳⴳ ⵉⵅⴻⴼ ⵏⵏⴻⵖ ⵊⴰⵔ ⴰⵡⴻⵏ ⴰⵎ ⵔⵔⵓⵙⵓⵍ ⵏ ⵍⵎⴰⵙⵉⵃ.    
ⵎⴰⵛⴰ ⵜⵓⵖⴰ ⴰⵏⴻⵖ ⴷ ⵉⵃⵏⵉⵏⴻⵏ ⴰⴽⵉⴷⵡⴻⵎ, ⴰⵎ ⵢⵉⵛⵜ ⵏ ⵜⴻⴱⵍⵉⵖⵜ ⵜᵉⵜⵜⵀⵉⵍⵍⴰ ⴷⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ. 
ⴰⵎⵎⵓ ⵄⴰⵡⴻⴷ ⵜⵓⵖⴰ ⵏᵉⵜⵜⴻⵅⵙ ⴽⴻⵏⵏⵉⵡ ⵓ ⵜⵓⵖⴰ ⴷⴰⵢⵏⴻⵖ ⵎⴻⵥⵔⵉ ⵎⴰⵃⴻⵏⴷ ⴰⴷ ⵏⵛⴰⵔⵛ ⴰⴽⵉⴷⵡⴻⵎ, ⵡⴰⵔ ⵉⴵⵉ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⴰⵔⴻⴱⴱⵉ ⵡⴰⵀⴰ, ⴰⵃⴻⵇⵇⴰ ⵓⵍⴰ ⴷ ⵜⵓⴷⴰⵔⵜ ⵏⵏⴻⵖ, ⵎⵉⵏⵣⵉ ⵜⴷⴻⵡⵍⴻⵎ ⴷ ⵉⵎⵄⵉⵣⵣⴻⵏ ⵖⴰⵔⵏⴻⵖ. 
ⵄⴻⵇⵍⴻⵎ ⵅⴻⵏⵏⵉ, ⴰ ⴽⴻⵏⵏⵉⵡ ⴰⵡⵎⴰⵜⴻⵏ ⵏⵏⴻⵖ, ⵎⴰⵎⵎⴻⵛ ⵜⵓⵖⴰ ⵏᵉⵜⵜⴰⵎⴰⵔ ⵓ ⵏⵅⴻⴷⴷⴻⵎ ⵙ ⵉⴼⴰⵙⵙⴻⵏ ⵏⵏⴻⵖ ⴵⵉⵍⴻⵜ ⴷ ⵡⴰⵙⵙ, ⵃⵉⵎⴰ ⵡⴰⵔ ⵅⴰⵡⴻⵎ ⵏᵉⵜⵜⴻⴳⴳ ⴷⴷⵇⴻⵍ. 
ⴽⴻⵏⵏⵉⵡ ⴷ ⴰⵔⴻⴱⴱⵉ ⴰⵇⴰ ⴷ ⵍⴻⵛⵀⵓⴷ ⵅ ⵎⴰⵎⵎⴻⵛ ⴷ ⴰⵡⴻⵎ ⵜⵓⵖⴰ ⵏⴻⵜⵜⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⴰⵔⴻⴱⴱⵉ ⴷⵉ ⵍⴻⵚⴼⴰⵢⴻⵜ ⴷ ⵜⵏⵉⵛⴰⵏⵜ ⵏ ⵡⵓⵍ, ⵓ ⵎⴰⵎⵎⴻⵛ ⵜⵓⵖⴰ ⵏⴻⴳⴳⵓⵔ ⴱⵍⴰ ⵍⵄⵉⴱ ⵊⴰⵔ ⵎⴰⵔⵔⴰ ⵉⵏⵏⵉ ⵢⵓⵎⵏⴻⵏ. 
ⴰⵇⴰ ⵜⴻⵙⵙⵏⴻⵎ ⵄⴰⵡⴻⴷ ⵎⴰⵎⵎⴻⵛ ⵜⵓⵖⴰ ⵏⵄⴻⴵⴻⵎ ⵉⵊⵊ-ⵉⵊⵊ ⵣⵣⴰⵢⵡⴻⵎ, ⴰⵎ ⵢⵉⵊⵊ ⵏ ⴱⴰⴱⴰⵙ ⵉ ⵉⵃⴻⵏⵊⵉⵔⴻⵏ ⵏⵏⴻⵙ, ⵓ ⵎⴰⵎⵎⴻⵛ ⵏⴻⴳⴳⴰ ⴷⴰⵢⵡⴻⵎ ⵓⵍ ⵓ ⵏⴻⵛⵀⴻⴷ ⵉ ⴽⴻⵏⵏⵉⵡ, 
ⵎⴰⵃⴻⵏⴷ ⴰⴷ ⵜⵓⵢⵓⵔⴻⵎ ⴰⵎ ⵎⴰⵎⵎⴻⵛ ⵉⵙⴷⴰⵀⴻⴵ ⵇⵉⴱⴰⵍⵜ ⵉ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵡⴻⵎ ⴷⴷ-ⵉⵍⴰⵖⴰⵏ ⵖⴰⵔ ⵜⴳⴻⵍⴷⵉⵜ ⵏⵏⴻⵙ ⵓ ⵖⴰⵔ ⵓⵄⵓⴵⵉ ⵏⵏⴻⵙ. 
ⵙ ⵓⵢⴻⵏⵏⵉ ⵏⴻⵜⵜⵇⴰⴷⴰ ⴰⵔⴻⴱⴱⵉ ⴱⵍⴰ ⵇⴻⵟⵟⵓ, ⵓⵎⵉ ⴽⴻⵏⵏⵉⵡ ⵜⵇⴻⴱⵍⴻⵎ ⴰⵡⴰⵍ ⵏ ⴰⵔⴻⴱⴱⵉ ⵉ ⵜᵉⵟⵟⴼⴻⵎ ⵣⵣⴰⵢⵏⴻⵖ, ⵡⴰⵔ ⵉⴵⵉ ⴰⵎ ⵢⵉⵊⵊ ⵏ ⵡⴰⵡⴰⵍ ⵏ ⵉⵡⴷⴰⵏ, ⵎⴰⵛⴰ ⴰⵎ ⵡⴰⵡⴰⵍ ⵏ ⴰⵔⴻⴱⴱⵉ, ⵓⵛⴰ ⴷ ⵎⴰⵏ ⴰⵢⴰ ⵉ ⵢⴻⴵⴰ ⴷ ⵜⵉⴷⴻⵜⵜ, ⵓ ⴰⵡⴰⵍ-ⴰ ⵉⵅⴻⴷⴷⴻⵎ ⴷⴰⵢⵡⴻⵎ ⵙ ⵍⴻⵅⴷⴰⵢⴻⵎ ⵏ ⵢⵉⵏⵏⵉ ⵢⵓⵎⵏⴻⵏ. 
ⵎⵉⵏⵣⵉ ⴽⴻⵏⵏⵉⵡ, ⴰ ⴰⵢⵜⵎⴰ, ⵜⴷⴻⵡⵍⴻⵎ ⴷ ⵉⵎⴻⴹⴼⴰⵔⴻⵏ ⵏ ⵜⵎⴻⵙⵎⵓⵏⵉⵏ ⵏ ⴰⵔⴻⴱⴱⵉ ⵉ ⵉⴵⴰⵏ ⴷⵉ ⵢⴰⵀⵓⴷⵉⵢⵢⴰ ⴷⵉ ⵢⴰⵙⵓⵄ ⵍⵎⴰⵙⵉⵃ, ⵎⵉⵏⵣⵉ ⴽⴻⵏⵏⵉⵡ ⵜⴻⴽⵙⵉⵎ ⵄⴰⵡⴻⴷ ⴰⵔⵔⵎⴻⵃ ⵣⴻⴳ ⴰⵢⵜ ⵏ ⵍⴳⴻⵏⵙ ⵏⵡⴻⵎ, ⴰⵎ ⵎⴰⵎⵎⴻⵛ ⴽⵙⵉⵏ ⵓⵍⴰ ⴷ ⵏⵉⵜⵏⵉ ⴰⵔⵔⵎⴻⵃ ⵣⴻⴳ ⵡⵓⴷⴰⵢⴻⵏ, 
ⵉⵏⵏⵉ ⵉⵏⵖⵉⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⵓⵍⴰ ⴷ ⵉⵏⴰⴱⵉⵢⵢⴻⵏ ⵉ ⵣⵣⴰⵢⵙⴻⵏ ⴷⴷ-ⴼⴼⵖⴻⵏ, ⵓⵛⴰ ⵄⴰⵡⴻⴷ ⴷⴰⵔⵔⵛⴻⵏ ⵅⴰⵏⴻⵖ. ⴰⵇⴰ ⴰⵜⴻⵏ ⵡⴰⵔ ⴰⵔⴻⵟⵟⵉⵏ ⵛⴰ ⵉ ⴰⵔⴻⴱⴱⵉ, ⵎⴰⵛⴰ ⴷⴻⵡⵍⴻⵏ ⴹⵉⴷⴷ ⵏ ⵉⵡⴷⴰⵏ ⵎⴰⵔⵔⴰ. 
ⵎⴰⵖⴰⵔ ⵎⴻⵏⵄⴻⵏ ⴰⵏⴻⵖ, ⵎⴰⵃⴻⵏⴷ ⴰⴷ ⵏⴻⵙⵙⵉⵡⴻⵍ ⵖⴰⵔ ⵍⴻⴳⵏⵓⵙ, ⵃⵉⵎⴰ ⵍⴻⴳⵏⵓⵙ ⴰⴷ ⵟⵟⴼⴻⵏ ⵜⵓⴷⴰⵔⵜ. ⴰⵎⵎⵓ ⵉ ⵜⵜⵄⴻⵎⵎⴰⵔⴻⵏ ⵏⵉⵜⵏⵉ ⵍⵎⵉⵣⴰⵏ ⵏ ⴷⴷⵏⵓⴱ ⵏⵙⴻⵏ ⵍⴻⴱⴷⴰ, ⵎⴰⵛⴰ ⵉⵡⴹⴰ-ⴷⴷ ⵅⴰⵙⴻⵏ ⵡⴻⵖⴹⴰⴱ ⴰⵍ ⴰⵏⴻⴳⴳⴰⵔ. 
ⴰ ⴽⴻⵏⵏⵉⵡ ⴰⵢⵜⵎⴰⵜⵏⴻⵖ, ⵖⴰⵔ ⴷⵔⵓⵙ ⵏ ⵍⵡⴻⵇⵜ ⵏⴻⴷⵡⴻⵍ ⵏⴻⵛⵛⵉⵏ ⴷ ⵉⵢⵓⵊⵉⵍⴻⵏ ⵏⵡⴻⵎ ⵣⵉ ⵊⵊⵉⵀⴻⵜ ⵏ ⵓⵖⴻⵎⴱⵓⴱ, ⵎⴰⵛⴰ ⵡⴰⵔ ⵉⴵⵉ ⵣⵉ ⵊⵊⵉⵀⴻⵜ ⵏ ⵡⵓⵍ. ⵙ ⵓⵢⴰ ⵜⵓⵖⴰ ⵏⴰⵔⴻⵣⵣⵓ ⵙ ⵎⴻⵥⵔⵉ ⴷ ⴰⵎⴻⵇⵇⵔⴰⵏ ⴰⴷ ⵏⵥⴰⵔ ⴰⵖⴻⵎⴱⵓⴱ ⵏⵡⴻⵎ. 
ⵜⵓⵖⴰ ⵏⴻⵅⵙ ⴰⴷ ⵖⴰⵔⵡⴻⵎ ⴷⴷ-ⵏⴰⵙ, ⵏⴻⵛⵛ ⴱⵓⵍⵓⵙ ⵉⵛⵜ ⵏ ⵜⵡⴰⵍⴰ ⴷ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉ ⵄⴰⴷ, ⵎⴰⵛⴰ ⵛⵛⵉⵟⴰⵏ ⵉⴱⴻⴷⴷ ⴰⵢⵉ ⴷⴻⴳ ⵡⴻⴱⵔⵉⴷ. 
ⵎⵉⵏⵣⵉ ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵙⵉⵜⴻⵎ ⵏⵏⴻⵖ, ⴷ ⵍⴻⴼⵔⴰⵃⴻⵜ ⵏⵏⴻⵖ ⵏⵉⵖ ⴷ ⵜⵜⴰⵊ ⵏ ⵓⵄⵓⴵⵉ ⵏⵏⴻⵖ ⵣⵣⴰⵜ ⵉ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⵅⵎⵉ ⴷⴷ ⵖⴰ ⵢⴰⵙ, ⵉⵍⵍⴰ ⴽⴻⵏⵏⵉⵡ ⵡⴰⵀⴰ? 
ⴰⵇⴰ ⴽⴻⵏⵏⵉⵡ ⴷ ⴰⵄⵓⴵⵉ ⵏⵏⴻⵖ ⴷ ⵍⴻⴼⵔⴰⵃⴻⵜ ⵏⵏⴻⵖ. 
