﻿ⵉⴼⵉⵍⵉⴱⴱⵉⵢⴻⵏ.
4.
ⵙ ⵓⵢⴰ, ⴰ ⴰⵢⵜⵎⴰ ⵉⵄⵉⵣⵣⴻⵏ ⴷ ⵉⵖⵍⴰⵏ, ⴰⵇⴰ ⴽⴻⵏⵏⵉⵡ ⴷ ⵍⴻⴼⵔⴰⵃⴻⵜ ⵉⵏⵓ ⴷ ⵜⵜⴰⵊ ⵉⵏⵓ, ⴱⴻⴷⴷⴻⵎ ⵅⴻⵏⵏⵉ ⴰⵎⵎⵓ ⵏⵉⵛⴰⵏ ⴷⵉ ⵙⵉⴷⵉⵜⵏⴻⵖ, ⴰ ⵉⵎⵄⵉⵣⵣⴻⵏ ⵉⵏⵓ! 
ⵏⴻⵛⵛ ⵜⵜⵣⴰⵡⴰⴳⴻⵖ ⵣⴻⴳ ⵓⵡⵓⴷⵉⵢⴰ ⴷ ⵙⵉⵏⵜⵉⵛⵉ, ⵎⴰⵃⴻⵏⴷ ⴰⴷ ⵉⵎⵓⵏ ⴰⵔⵔⴰⵢ ⵏⵙⴻⵏⵜ ⴷⵉ ⵙⵉⴷⵉⵜⵏⴻⵖ. 
ⵜⵜⵣⴰⵡⴰⴳⴻⵖ ⵄⴰⵡⴻⴷ ⵣⵣⴰⵢⴻⴽ, ⴰ ⴰⵎⵄⴰⵛⴰⵔ ⴰⵎⵜⵉⵇⵇⵉ ⵉⵏⵓ, ⵎⴰⵃⴻⵏⴷ ⴰⴷ ⵜⴻⵡⵛⴻⴷ ⴰⴼⵓⵙ ⵉ ⵜⵉⵏⵏⵉ ⵉ ⵉⵅⴻⴷⴷⵎⴻⵏ ⴰⴽⵉⴷⵉ ⵅ ⵙⵙⵉⴱⴱⴻⵜ ⵏ ⵜⴱⴰⵔⵔⴻⵃⵜ ⵏ ⵍ’ⵉⵏⵊⵉⵍ, ⵓⵍⴰ ⴰⴽ-ⴷ ⴽⵍⵉⵎⵉⵏⵙ ⴷ ⵉⵎⵙⴻⵅⵅⴰⵔⴻⵏ ⵉⵏⵓ ⵏⵏⴻⵖⵏⵉ, ⵉⵏⵏⵉ ⵉⵙⵎⴰⵡⴻⵏ ⵏⵙⴻⵏ ⵢⵓⵔⴰⵏ ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⴹⴻⵏ ⵏ ⵜⵓⴷⴰⵔⵜ. 
ⴼⴰⵔⵃⴻⵎ ⵍⴻⴱⴷⴰ ⴷⵉ ⵙⵉⴷⵉⵜⵏⴻⵖ, ⵏⴻⵛⵛ ⵇⵇⴰⵔⴻⵖ ⵄⴰⵡⴻⴷ: ⴼⴰⵔⵃⴻⵎ! 
ⴰⴷ ⵢⵉⵍⵉ ⵓⵡⴰⴹⴻⵄ ⵏⵡⴻⵎ ⵉⵜⵜⵡⴰⵙⵙⴻⵏ ⵖⴰⵔ ⵉⵡⴷⴰⵏ ⵎⴰⵔⵔⴰ. ⵙⵉⴷⵉⵜⵏⴻⵖ ⴰⵇⴰ ⵢⵓⴷⴻⵙ. 
ⵡⴰⵔ ⴽⴻⵙⵙⵉⵎ ⵛⴰ ⵙ ⵡⴻⵎⵏⵓⵙ ⵅ ⵡⴰⵍⵓ, ⵎⴰⵛⴰ ⴰⴷ ⵢⵉⵍⵉ ⵎⴰⵔⵔⴰ ⵎⵉⵏ ⵜᵉⵜⵜⴰⵔⴻⵎ ⵍⴻⴱⴷⴰ ⵉⵜⵜⵡⴰⵙⵙⴻⵏ ⵖⴰⵔ ⴰⵔⴻⴱⴱⵉ ⵙ ⵜⵥⴰⴵⵉⵜ ⴷ ⵜⴽⴻⵙⵙⵉⵜ ⵏ ⵍⵎⴻⵄⵔⵓⴼ ⴰⴽ-ⴷ ⵓⵇⴰⴷⵉ. 
ⵓⵛⴰ ⵍⴻⵀⵏⴰ ⵏ ⴰⵔⴻⴱⴱⵉ ⵉ ⵉⵄⴷⵓⵏ ⵎⴰⵔⵔⴰ ⵍⴻⴼⵀⴰⵎⴻⵜ ⴰⴷ ⵉⵃⴹⴰ ⵓⵍⴰⵡⴻⵏ ⴷ ⵉⵅⴰⵔⵔⵉⵚⴻⵏ ⵏⵡⴻⵎ ⴷⵉ ⵢⴰⵙⵓⵄ ⵍⵎⴰⵙⵉⵃ. 
ⵖⴰⵔ ⵓⵏⴻⴳⴳⴰⵔ, ⴰ ⴰⵢⵜⵎⴰ, ⵎⴰⵔⵔⴰ ⵎⵉⵏ ⵉⴵⴰⵏ ⴷ ⵜⵉⴷⴻⵜⵜ, ⵎⴰⵔⵔⴰ ⵎⵉⵏ ⵉⵇⵇⵓⵔⴻⵏ, ⵎⴰⵔⵔⴰ ⵎⵉⵏ ⵉⵙⴻⴳⴳⴷⴻⵏ, ⵎⴰⵔⵔⴰ ⵎⵉⵏ ⵉⵣⴷⵉⴳⴻⵏ, ⵎⴰⵔⵔⴰ ⵎⵉⵏ ⵉⵄⵉⵣⵣⴻⵏ, ⵎⴰⵔⵔⴰ ⵎⵉⵏ ⵖⴰⵔ ⵉⴵⴰ ⵍⵃⴻⵙⵙ ⴰⵚⴻⴱⵃⴰⵏ, ⵓ ⵎⴰⵔⵔⴰ ⵎⵉⵏ ⵖⴰ ⵉⵙⴷⴰⵀⴻⴵⴻⵏ ⵛⵛⴰⵏ ⴷ ⵓⵙⴻⵎⵖⴰⵔ, ⵅⴰⵔⵚⴻⵎ ⴷⴰⵢⴻⵙ. 
ⵎⵉⵏ ⵜⴻⵖⵔⵉⵎ ⵓ ⵜⵇⴻⴱⵍⴻⵎ, ⵎⵉⵏ ⵜⴻⵙⵍⵉⵎ ⵓ ⵜⴻⵥⵔⵉⵎ ⵣⵣⴰⵢⵉ, ⴳⴳⴻⵎ ⵜ, ⵓⵛⴰ ⴰⵔⴻⴱⴱⵉ ⵏ ⵍⴻⵀⵏⴰ ⴰⴷ ⴽⵉⵡⴻⵎ ⵢⵉⵍⵉ! 
ⴰⵇⴰ ⴼⴰⵔⵃⴻⵖ ⴰⵟⵟⴰⵙ ⴷⵉ ⵙⵉⴷⵉⵜⵏⴻⵖ ⵓⵎⵉ ⴷⴰⵢⵡⴻⵎ ⵉⴵⴰ ⵡⴻⵎⵏⵓⵙ ⵎⴰⵃⴻⵏⴷ ⴰⴷ ⴰⵢⵉ ⵜᵉⵜⵀⵉⵍⵍⴰⵎ, ⴰⵎ ⵎⴰⵎⵎⴻⵛ ⴷⴰⵢⵡⴻⵎ ⵜ ⵜⵓⵖⴰ ⵇⴱⴻⵍ, ⵎⴰⵛⴰ ⵡⴰⵔ ⴷ ⴰⵙ ⵜⵓⴼⵉⵎ ⵎⴰⵎⵎⴻⵛ ⴰⴷ ⵜⴻⴳⴳⴻⵎ. 
ⵡⴰⵔ ⵜⵜ ⵏⵏⵉⵖ, ⵎⵉⵏⵣⵉ ⵏⴻⵛⵛ ⵃⵡⴰⵊⴻⵖ ⵛⴰ, ⵎⵉⵏⵣⵉ ⵍⴻⵎⴷⴻⵖ ⴰⴷ ⵇⴻⵏⵄⴻⵖ ⵎⴰⵎⵎⴻⵛ ⵎⴰ ⴷⴷ-ⵜⵓⵙⴰ. 
ⵏⴻⵛⵛ ⴰⵇⴰ ⵙⵙⵏⴻⵖ ⵓⵎⵉ ⵇⵇⴰⵔⴻⵏ ⴷⴷⴻⴵ, ⵓⵛⴰ ⴰⵇⴰ ⵙⵙⵏⴻⵖ ⵓⵎⵉ ⵇⵇⴰⵔⴻⵏ ⴰⴼⴻⵢⵢⴻⴹ. ⵎⴰⵏⵉ ⵎⴰ ⵓ ⴷⵉ ⵎⴰⵔⵔⴰ ⴰⵇⴰ ⵍⴻⵎⴷⴻⵖ, ⴰⵎ ⴷⵉ ⵜⵢⴰⵡⴰⵏⵜ, ⴰⵎ ⴷⵉ ⵍⴰⵥ ⴰⵎ ⴷⴻⴳ ⵓⴼⴻⵢⵢⴻⴹ ⵓⵍⴰ ⴷⵉ ⵍⴻⵖⴱⴻⵏ. 
ⵇⴻⴷⴷⴻⵖ ⵇⴰⵄ ⵣⵉ ⵍⵎⴰⵙⵉⵃ ⵡⴻⵏⵏⵉ ⴷ ⴰⵢⵉ ⵉⵡⵛⵉⵏ ⵊⵊⴻⵀⴷ. 
ⵡⴰⵅⵅⴰ ⴰⵎⴻⵏⵏⵉ ⵎⵍⵉⵃ ⵍⴰⵎⵉ ⴷ ⴰⵢⵉ ⵜⴻⵡⵛⵉⵎ ⴰⴼⵓⵙ ⴷⵉ ⵍⴻⵎⵃⴰⵢⴻⵎ ⵉⵏⵓ. 
ⵜⴻⵙⵙⵏⴻⵎ ⵄⴰⵡⴻⴷ ⵙⵉⵎⴰⵏⵜ ⵏⵡⴻⵎ, ⴰ ⵉⴼⵉⵍⵉⴱⴱⵉⵢⵢⴻⵏ, ⴱⴻⵍⵍⵉ ⵖⴰⵔ ⵓⵎⴻⵣⵡⴰⵔⵓ ⵏ ⵜⴱⴰⵔⵔⴻⵃⵜ ⵏ ⵍⴻⵅⴱⴰⵔ ⴰⵚⴻⴱⵃⴰⵏ, ⵓⵎⵉ ⴷⴷ-ⴼⴼⵖⴻⵖ ⵣⵉ ⵎⴰⴽⵉⴷⵓⵏⵉⵢⴰ, ⵓⵍⴰ ⴷ ⵉⵛⵜ ⵏ ⵜⵎⴻⵙⵎⵓⵏⵜ ⵡⴰⵔ ⵜⴻⴳⴳⵉ ⴰⴽⵉⴷⵉ ⵍⴻⵃⵙⴰⴱ ⵅ ⵎⵉⵏ ⵡⵛⵉⵏ ⴷ ⵎⵉⵏ ⴽⵙⵉⵏ, ⵎⵖⵉⵔ ⵜⴻⵏⵏⵉ ⵏⵡⴻⵎ ⵡⴰⵀⴰ. 
ⵎⵉⵏⵣⵉ ⵄⴰⵡⴻⴷ ⴷⵉ ⵜⵉⵙⵙⴰⵍⵓⵏⵉⴽⴰ ⵜᵉⵙⵙⴻⴽⴽⴻⵎ ⴰⵢⵉ-ⴷⴷ ⵎⵉⵏ ⴷ ⴰⵢⵉ ⵉⵜⵜⵅⴻⵚⵚⴰⵏ, ⵉⵊⵊ ⵏ ⵓⵎⵓⵔ ⵓ ⵉⵊⵊ ⵏ ⵓⵎⵓⵔ ⵏⵏⴻⵖⵏⵉ. 
ⵡⴰⵔ ⴰⵔⴻⵣⵣⵓⵖ ⴰⴷ ⴷⴰⵢⵉ ⵜⴻⵡⵛⴻⵎ ⵛⴰ, ⵎⴰⵛⴰ ⴰⵔⴻⵣⵣⵓⵖ ⴰⴷ ⵜⵡⴻⵙⵙⴻⵄ ⵍⵖⵉⴵⴻⵜ ⵏⵡⴻⵎ. 
ⵏⴻⵛⵛ ⵟⵟⴼⴻⵖ ⴽⵓⵍⵛⵉ ⵓ ⵖⴰⵔⵉ ⴽⵓⵍⵛⵉ ⵙ ⵣⵣⵢⴰⴷⴰ, ⴰⵇⴰ ⵊⵊⵉⵡⵏⴻⵖ. ⵏⴻⵛⵛ ⴽⵙⵉⵖ ⵎⴰⵔⵔⴰ ⵎⵉⵏ ⴷ ⴰⵢⵉ ⴷⴷ-ⵜᵉⵙⵙⴻⴽⴽⴻⵎ ⵙ ⵓⴼⵓⵙ ⵏ ⵉⴱⴰⴼⵔⵓⴷⵉⵜⵓⵙ: ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⴷ ⵉⵛⵜ ⵏ ⵜⵖⴰⵔⵚⵜ ⵢⴰⵔⴹⴰⵏ ⵇⵉⴱⴰⵍⵜ ⵉ ⴰⵔⴻⴱⴱⵉ. 
ⵎⴰⵛⴰ ⴰⵔⴻⴱⴱⵉ ⵉⵏⵓ ⴰⴷ ⵉⵙⵙⵢⵉⵡⴻⵏ ⵎⴰⵔⵔⴰ ⵎⵉⵏ ⵜⴻⵃⴷⴰⵊⴻⵎ ⵄⵍⴰⵃⵙⴰⴱ ⴰⴳⵍⴰ ⵏⵏⴻⵙ ⴷⴻⴳ ⵓⵄⵓⴵⵉ ⵉ ⵉⴵⴰⵏ ⵏ ⵢⴰⵙⵓⵄ ⵍⵎⴰⵙⵉⵃ. 
ⴰⵇⴰ ⵉ ⴰⵔⴻⴱⴱⵉ, ⴱⴰⴱⴰⵜⵏⴻⵖ, ⴰⴷ ⵖⴰⵔⴻⵙ ⵢⵉⵍⵉ ⵓⵄⵓⴵⵉ ⴷ ⵛⵛⴰⵏ ⵉ ⵍⴻⴱⴷⴰ ⵇⴰⵄ. ⴰⵎⵉⵏ. 
ⵙⴻⴵⵎⴻⵎ ⵅ ⴽⵓⵍ ⵉⵎⵇⴻⴷⴷⴰⵙⴻⵏ ⴷⵉ ⵢⴰⵙⵓⵄ ⵍⵎⴰⵙⵉⵃ ⵙ ⵍⴻⵀⵏⴰ. ⴰⵡⵎⴰⵜⴻⵏ ⵉⵏⵏⵉ ⴰⴽⵉⴷⵉ, ⵜⵜⵙⴻⴵⴰⵎⴻⵏ ⵅⴰⵡⴻⵎ ⵙ ⵍⴻⵀⵏⴰ. 
ⴰⵇⴰ ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵜⵜⵙⴻⴵⴰⵎⴻⵏ ⵅⴰⵡⴻⵎ ⵙ ⵍⴻⵀⵏⴰ, ⴰⵎⴻⵣⵡⴰⵔⵓ ⵉⵏⵏⵉ ⵉⴵⴰⵏ ⵣⵉ ⵜⴰⴷⴷⴰⵔⵜ ⵏ ⵇⴰⵢⵚⴰⵔ. 
ⴰⵔⴹⴰ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴰⴷ ⵢⵉⵍⵉ ⴰⴽⵉⴷⵡⴻⵎ ⵎⴰⵔⵔⴰ. ⴰⵎⵉⵏ. 
