﻿2 ⵉⴽⵓⵔⵉⵏⵜⵉⵢⵢⴻⵏ.
13.
ⴰⵇⴰ ⵜⴰ ⴷ ⵜⵡⴰⵍⴰ ⵡⵉⵙⵙ ⵜⵍⴰⵜⴰ ⴰⴷ ⵖⴰⵔⵡⴻⵎ ⴷⴷ-ⴰⵙⴻⵖ. “ⵅ ⵓⵇⴻⵎⵎⵓⵎ ⵏ ⵜⵏⴰⵢⴻⵏ ⵏⵉⵖ ⵜⵍⴰⵜⴰ ⵏ ⵍⴻⵛⵀⵓⴷ ⴰⴷ ⵉⵜⵜⵡⴰⴹⵎⴻⵏ ⵎⴰⵔⵔⴰ ⵡⴰⵡⴰⵍ!” 
ⵏⵏⵉⵖ ⵜⵜ ⵇⴱⴻⵍ ⵓⵛⴰ ⴰⴷ ⴰⵡⴻⵎ ⵜⵜ ⵉⵏⵉⵖ ⵇⴱⴻⵍ ⵄⴰⵡⴻⴷ, ⴰⵅⵎⵉ ⵜⵜ ⵏⵏⵉⵖ ⵍⴰⵎⵉ ⴷ ⴰⵢⵉ ⵜⵓⵖⴰ ⴰⴽⵉⴷⵡⴻⵎ ⵡⵉⵙⵙ ⵎⴰⵔⵜⴰⵢⴻⵏ, ⵓⵛⴰ ⵄⴰⵡⴻⴷ ⵍⴻⵅⵅⵓ, ⵓⵎⵉ ⵖⴰⴱⴻⵖ, ⵜⵜⴰⵔⵉⵖ ⵜⵜ ⵉ ⵢⵉⵏⵏⵉ ⵉⵅⴹⴰⵏ ⵓ ⵉ ⵎⴰⵔⵔⴰ ⵉⵏⵏⴻⵖⵏⵉ, ⴰⵇⴰ, ⵎⴰⵍⴰ ⵓⵙⵉⵖ-ⴷⴷ ⵜⵡⴰⵍⴰ ⵏⵏⴻⵖⵏⵉⵜ, ⵡⴰⵔ ⴰⵔⴻⵃⵃⵎⴻⵖ ⵛⴰ. 
ⵎⵉⵏⵣⵉ ⴽⴻⵏⵏⵉⵡ ⵜⴰⵔⴻⵣⵣⵓⵎ ⵍⴱⵓⵔⵀⴰⵏ ⴱⴻⵍⵍⵉ ⴰⵇⴰ ⵍⵎⴰⵙⵉⵃ ⵉ ⴷ ⴰⵢⵉ ⵉⵙⵙⴰⵡⴰⵍⴻⵏ, ⵡⴻⵏⵏⵉ ⵡⴰⵔ ⵉⴹⵄⵉⴼⴻⵏ ⴷⴰⵢⵡⴻⵎ, ⵎⴰⵛⴰ ⴰⵇⴰ ⵉⵊⵀⴻⴷ ⴷⴰⵢⵡⴻⵎ. 
ⵡⴰⵅⵅⴰ ⵏⴻⵜⵜⴰ ⵉⵜⵜⵡⴰⵚⴻⵍⵍⴻⴱ ⴷⵉ ⵜⵓⴹⵄⴻⴼⵜ, ⴰⵇⴰ ⵉⴷⴷⴰⵔ ⵙ ⵊⵊⴻⵀⴷ ⵏ ⴰⵔⴻⴱⴱⵉ. ⵓⵍⴰ ⴷ ⵏⴻⵛⵛⵉⵏ ⴰⵇⴰ ⵏⴻⴹⵄⴻⴼ ⴰⴽⵉⴷⴻⵙ, ⵎⴰⵛⴰ ⴰⴷ ⴽⵉⵙ ⵏⴻⴷⴷⴰⵔ ⵣⵉ ⵊⵊⴻⵀⴷ ⵏ ⴰⵔⴻⴱⴱⵉ ⵉ ⴷⴰⵢⵡⴻⵎ ⵉⴵⴰⵏ. 
ⵇⴻⴵⴱⴻⵎ ⵉⵅⴻⴼ ⵏⵡⴻⵎ, ⵎⴰ ⴰⵇⴰ ⴽⴻⵏⵏⵉⵡ ⵜᵉⵜⵜⴱⴻⴷⴷⴰⵎ ⴷⵉ ⵍ’ⵉⵎⴰⵏ, ⴰⵔⵣⵓⵎ ⵍⴻⵄⵎⵓⵔ ⵏⵡⴻⵎ. ⵏⵉⵖ ⵡⴰⵔ ⵜⴻⵙⵙⵉⵏⴻⵎ ⵛⴰ ⴱⴻⵍⵍⵉ ⵢⴰⵙⵓⵄ ⵍⵎⴰⵙⵉⵃ ⴰⵇⴰ-ⵜ ⴷⴰⵢⵡⴻⵎ, ⵓ ⵎⴰⵍⴰ ⵡⴰⵔ ⵉⴵⵉ ⴰⵎⴻⵏⵏⵉ, ⴰⵇⴰ ⴽⴻⵏⵏⵉⵡ ⵜⴻⵎⵎⴻⵏⴹⴰⵔⴻⵎ? 
ⵎⴰⵛⴰ ⵙⵙⵉⵜⵉⵎⴻⵖ ⴰⴷ ⵜⴻⵙⵙⵏⴻⵎ, ⴱⴻⵍⵍⵉ ⵡⴰⵔ ⵏⴻⵎⵎⴻⵏⴹⴰⵔ. 
ⵜⵜᵉⵜⵜⴰⵔⴻⵖ ⴰⵔⴻⴱⴱⵉ, ⵎⴰⵃⴻⵏⴷ ⵡⴰⵔ ⴷⴰⵢⵡⴻⵎ ⵜᵉⵜⵜⵡⵉⴼ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ ⴷ ⵜⴰⵄⴻⴼⴼⴰⵏⵜ, ⵃⵉⵎⴰ ⴰⴷ ⴷⴷ-ⵜⴱⴰⵏ ⵜⵇⴻⴵⴻⴱⵜ ⵏⵏⴻⵖ ⵓⵛⴰ ⴽⴻⵏⵏⵉⵡ ⵜᵉⵜⵜⴻⴳⴳⴻⵎ ⵎⵉⵏ ⵉⴵⴰⵏ ⴷ ⴰⵚⴻⴱⵃⴰⵏ, ⵡⴰⵅⵅⴰ ⵏⴻⵛⵛⵉⵏ ⵏⴱⴰⵏ ⴰⵅⵎⵉ ⵏᵉⵎⵎⴻⵏⴹⴰⵔ. 
ⵎⵉⵏⵣⵉ ⵏⴻⵛⵛⵉⵏ ⵡⴰⵔ ⵏⵣⴻⵎⵎⴰⵔ ⵡⴰⵍⵓ ⴹⵉⴷⴷ ⵉ ⵜⵉⴷⴻⵜⵜ, ⵎⴰⵛⴰ ⵉ ⵜⵉⴷⴻⵜⵜ ⵡⴰⵀ. 
ⵎⵉⵏⵣⵉ ⵏⴻⵛⵛⵉⵏ ⵏⴼⴰⵔⵔⴻⵃ, ⵍⴰⵎⵉ ⵏⴻⴹⵄⴻⴼ ⵓ ⴽⴻⵏⵏⵉⵡ ⵜⵊⴻⵀⴷⴻⵎ. ⵓⵛⴰ ⵏⴻⵜⵜⵥⴰⴵⴰ ⵄⴰⵡⴻⴷ ⴰⴷ ⵜⵉⵍⵉⵎ ⵜⴽⴻⵎⵎⵍⴻⵎ. 
ⵙ ⵓⵢⴻⵏⵏⵉ ⵜⵜⴰⵔⵉⵖ ⴰⵡⴻⵎ-ⴷⴷ ⵎⴰⵏ ⴰⵢⴰ ⴰⵎ ⵖⴰⴱⴻⵖ, ⵎⴰⵃⴻⵏⴷ, ⵅⵎⵉ ⴷⴷ ⵖⴰ ⵢⴰⵙⴻⵖ, ⵉⵜⵜⵅⴻⵚⵚⴰ ⵡⴰⵔ ⵜⵜⴻⵇⵙⵉⵃⴻⵖ ⵛⴰ ⵄⵍⴰⵃⵙⴰⴱ ⵚⵚⵓⵍⵟⴰ ⵉ ⴷ ⴰⵢⵉ ⵉⵡⵛⴰ ⵙⵉⴷⵉ ⵉⵏⵓ ⵉ ⵍⴻⴱⵏⵉ, ⵡⴰⵔ ⵉⴵⵉ ⵉ ⵡⴰⵔⴻⴷⴷⴻⴵ. 
ⵣⵉ ⵙⵙⴰ ⴷ ⵜⵙⴰⵡⴻⵏⵜ, ⴰ ⴰⵢⵜⵎⴰ, ⵉⵍⵉⵎ ⵜⴼⴰⵔⵔⵃⴻⵎ ⴷ ⵜⴽⴻⵎⵎⵍⴻⵎ, ⵉⵍⵉⵎ ⵜᵉⵜⵜⴼⴻⵡⵡⵊⴻⵎ, ⵅⴰⵔⵔⵚⴻⵎ ⵙ ⵢⵉⵊⵊ ⵏ ⵓⵅⴰⵔⵔⴻⵚ, ⵓⵛⴰ ⵊⵊⴻⵎ ⴰⴷ ⴷⵉⵏ ⵜⵉⵍⵉ ⵍⵀⵓⴷⵏⴻⵜ ⵊⴰⵔ ⴰⵡⴻⵎ, ⵅⴻⵏⵏⵉ ⴰⴷ ⴽⵉⵡⴻⵎ ⵢⵉⵍⵉ ⴰⵔⴻⴱⴱⵉ ⵏ ⵜⴰⵢⵔⵉ ⴷ ⵍⴻⵀⵏⴰ. 
ⵙⴻⴵⵎⴻⵎ ⵉⵊⵊⴻⵏ ⵅ ⵡⴻⵏⵏⴻⵖⵏⵉ ⵙ ⵍⴻⵀⵏⴰ ⵙ ⵓⵙⵓⴷⴻⵎ ⵉⵇⴻⴷⴷⵙⴻⵏ. 
ⵎⴰⵔⵔⴰ ⵉⵎⵇⴻⴷⴷⴰⵙⴻⵏ ⵜⵜⵙⴻⴵⴰⵎⴻⵏ ⵅⴰⵡⴻⵎ ⵙ ⵍⴻⵀⵏⴰ. 
ⵍⴻⵀⵏⴰ ⵏ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴷ ⵜⴰⵢⵔⵉ ⵏ ⴰⵔⴻⴱⴱⵉ ⴷ ⵜⵎⵓⵏⵜ ⵏ ⴰⵔⵔⵓⵃ ⵉⵇⴻⴷⴷⵙⴻⵏ ⴰⴷ ⵉⵍⵉⵏ ⴰⴽⵉⴷⵡⴻⵎ ⵎⴰⵔⵔⴰ. ⴰⵎⵉⵏ. 
