﻿2 ⵉⴽⵓⵔⵉⵏⵜⵉⵢⵢⴻⵏ.
9.
ⵎⵉⵏⵣⵉ ⵃⴻⵙⴱⴻⵖ ⴱⴻⵍⵍⵉ ⵏⵀⵍⴰ ⵎⴰ ⵓⵔⵉⵖ ⴰⵡⴻⵎ-ⴷⴷ ⵅ ⵜⵡⵉⵣⴰ ⵉ ⵉⵎⵇⴻⴷⴷⴰⵙⴻⵏ, 
ⵎⵉⵏⵣⵉ ⵙⵙⵏⴻⵖ ⵏⵏⴻⵢⵢⴻⵜ ⵏⵡⴻⵎ ⵉⵚⴻⴱⵃⴻⵏ ⵎⵉⵅⴻⴼ ⵅⴰⵡⴻⵎ ⵙⵙⴻⵎⵖⴰⵔⴻⵖ ⵊⴰⵔ ⵉⵏⵏⵉ ⵏ ⵎⴰⴽⵉⴷⵓⵏⵉⵢⴰ, ⴱⴻⵍⵍⵉ ⴰⵅⴰⵢⴰ ⵜⵓⵖⴰ ⵜⴻⵡⵊⴻⴷ ⵣⴻⴳ ⵓⵙⴻⴳⴳⵯⴰⵙ ⵉⵄⴷⵓⵏ, ⵓⵛⴰ ⵛⴹⴰⵔⴻⵜ ⵏⵡⴻⵎ ⴰⵇⴰ ⵜⴻⵙⴼⴰⵇ ⴰⵣⵢⴻⵏ ⴰⵎⴻⵇⵇⵔⴰⵏ. 
ⵎⴰⵛⴰ ⵙⵙⴻⴽⴽⴻⵖ-ⴷⴷ ⴰⵡⵎⴰⵜⴻⵏ, ⵎⴰⵃⴻⵏⴷ ⴰⵙⴻⵎⵖⴰⵔ ⵏⵏⴻⵖ ⴷⴰⵢⵡⴻⵎ ⵡⴰⵔ ⵉⵜⵜⵉⵍⵉ ⵛⴰ ⴱⴰⵟⴻⵍ ⴷⵉ ⵜⵎⴻⵙⵍⴰⵛⵜ-ⴰ, ⵃⵉⵎⴰ ⴰⴷ ⵜⵉⵍⵉⵎ ⵜⵃⴻⵣⵣⵎⴻⵎ ⴰⵎ ⵎⴰⵎⵎⴻⵛ ⵏⵏⵉⵖ, 
ⵃⵉⵎⴰ, ⵅⵎⵉ ⴽⵉⴷⵉ ⵉ ⴷⴷ ⵖⴰ ⵢⴰⵙⴻⵏ ⵉⵎⴰⴽⵉⴷⵓⵏⵉⵢⵢⴻⵏ ⵓⵛⴰ ⴰⴷ ⴽⴻⵏⵏⵉⵡ ⴰⴼⴻⵏ ⵡⴰⵔ ⵜⵃⴻⵣⵣⵎⴻⵎ, ⵏⴻⵛⵛⵉⵏ - ⵎⴰⵃⴻⵏⴷ ⵡⴰⵔ ⵇⵇⴰⵔⴻⵖ ⵛⴰ ‘ⴽⴻⵏⵏⵉⵡ’ - ⵡⴰⵔ ⵏⵖⴻⵟⵟⴻⵔ ⵣⴻⴳ ⵓⵙⴻⵎⵖⴰⵔ ⵉ ⵣⵣⴰⵢⵡⴻⵎ ⵏⴻⵙⵙⴻⵎⵖⴰⵔ. 
ⵙ ⵓⵢⴻⵏⵏⵉ ⴳⴳⵉⵖ ⴰⴷ ⵜⵜⴰⵔⴻⵖ ⴰⵡⵎⴰⵜⴻⵏ ⵏⵏⵉ, ⵎⴰⵃⴻⵏⴷ ⴰⴷ ⵖⴰⵔⵡⴻⵎ ⴷⴷ-ⴰⵙⴻⵏ ⴷ ⴰⵎⴻⵣⵡⴰⵔⵓ ⵓⵛⴰ ⴰⴷ ⵙⵙⴻⵡⵊⴷⴻⵏ ⵇⴱⴻⵍ ⵍⴱⴰⵔⴰⴽⴰ ⵏ ⵚⵚⴷⴰⵇⵉ ⵜⵉⵏⵏⵉ ⵅ ⵉⵜⵜⵡⴰⵏⵏⴰ ⵇⴱⴻⵍ ⵉ ⴽⴻⵏⵏⵉⵡ, ⴰⵇⴰ ⵉⵜⵜⵅⴻⵚⵚⴰ ⴰⴷ ⵜⵉⵍⵉ ⵚⵚⴻⴷⵇⴻⵜ ⵏⵏⵉ ⵖⴰⵔ ⵓⴼⵓⵙ ⴰⵎ ⵢⵉⵛⵜ ⵏ ⵍⴱⴰⵔⴰⴽⴰ, ⵡⴰⵔ ⵉⴵⵉ ⴰⵅⵎⵉ ⵜⵜ-ⵉ-ⴷⴷ-ⴽⴽⵙⴻⵏ ⵣⵉ ⵜⴻⵍⵎⴻⵛⵜ ⵏⵡⴻⵎ ⵙ ⵟⵟⵎⴻⵄ. 
ⵎⴰⵛⴰ ⵙⵏⴻⵎ ⴷⴷⴻⴳⴳⴰ: “ⵡⴻⵏⵏⵉ ⵉ ⵖⴰ ⵉⵣⴰⵔⵄⴻⵏ ⵙ ⵜⵛⴻⵟⵟⴰⵔⵜ, ⴰⴷ ⵉⵎⵊⴰⵔ ⵙ ⵜⴰⵛⴻⵟⵟⴰⵔⵜ, ⵓⵛⴰ ⵡⴻⵏⵏⵉ ⵉ ⵖⴰ ⵉⵣⴰⵔⵄⴻⵏ ⵙ ⵜⴻⵛⵔⵉⵎⴻⵜ, ⴰⴷ ⵉⵎⵊⴰⵔ ⵄⴰⵡⴻⴷ ⵙ ⵜⴻⵛⵔⵉⵎⴻⵜ.” 
ⴰⴷ ⵉⴳⴳ ⴽⵓⵍ ⵉⵊⵊⴻⵏ ⴰⵎ ⵎⴰⵎⵎⴻⵛ ⵉⵏⵡⴰ ⴷⴻⴳ ⵡⵓⵍ ⵏⵏⴻⵙ, ⵡⴰⵔ ⵉⴵⵉ ⵙ ⵉⵎⴻⵟⵟⴰⵡⴻⵏ ⵏⵉⵖ ⵙ ⵓⵖⵉⵍ, ⵎⵉⵏⵣⵉ ⴰⵔⴻⴱⴱⵉ ⵉⵜⵜⴻⵅⵙ ⵡⴻⵏⵏⵉ ⵉⵜⵜⵉⵛⴻⵏ ⵙ ⵍⴻⴼⵔⴰⵃⴻⵜ. 
ⵎⵉⵏⵣⵉ ⴰⵔⴻⴱⴱⵉ ⴰⵇⴰ ⵉⵣⴻⵎⵎⴰⵔ ⴰⴷ ⴰⵡⴻⵎ ⵉⵡⵛ ⴽⵓⵍ ⴰⵔⴹⴰ ⵙ ⵓⴼⴻⵢⵢⴻⴹ, ⵃⵉⵎⴰ ⵍⴻⴱⴷⴰ ⵓ ⴷⵉ ⵎⴰⵔⵔⴰ ⴰⴷ ⵖⴰⵔⵡⴻⵎ ⵢⵉⵍⵉ ⵎⵉⵏ ⵜⴻⵃⴷⴰⵊⴻⵎ ⵓⵛⴰ ⴰⴷ ⵜⴰⵔⵏⵉⵎ ⴰⵟⵟⴰⵙ ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵉⵚⴻⴱⵃⴻⵏ, 
ⴰⵎ ⵎⴰⵎⵎⴻⵛ ⵜⵓⵔⴰ: “ⴰⵇⴰ ⵉⴱⴻⵟⵟⴰ, ⵉⵡⵛⴰ ⵉ ⵉⵎⴻⵣⵍⴰⴹ, ⵜⴰⵙⴻⴳⴷⴰ ⵏⵏⴻⵙ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.” 
ⵎⴰⵖⴰⵔ ⵡⴻⵏⵏⵉ ⵉⵜⵜⵉⵛⴻⵏ ⵣⵣⴰⵔⵉⵄⴻⵜ ⵉ ⵡⴻⵏⵏⵉ ⵉⵣⴰⵔⵄⴻⵏ ⵓⵍⴰ ⴷ ⴰⵖⵔⵓⵎ ⵉ ⵎⴰⵛⵛⴰ, ⴰⴷ ⴰⵡⴻⵎ ⵉⵡⵛ ⵣⵣⴰⵔⵉⵄⴻⵜ ⵏⵡⴻⵎ, ⴰⴷ ⵢⴰⵔⵏⵉ ⴷⴰⵢⴻⵙ ⵓⵛⴰ ⴰⴷ ⵉⵙⵙⴻⴳⵎⴰ ⵍⵖⵉⴵⴻⵜ ⵏ ⵜⵙⴻⴳⴷⴰ ⵏⵡⴻⵎ, 
ⵎⴰⵃⴻⵏⴷ ⴰⴷ ⵜⵉⵍⵉⵎ ⵜⵜⴻⵊⵊⴰⵔⴻⵎ ⴷⵉ ⵎⴰⵔⵔⴰ ⵉ ⵎⴰⵔⵔⴰ ⵜⴰⵛⵔⵉⵎⴻⵜ ⵏⵏⵉ ⵉ ⵖⴰ ⵉⵙⵙⴻⴳⵎⴰⵏ ⴰⵇⴰⴷⵉ ⵉ ⴰⵔⴻⴱⴱⵉ ⵙ ⵓⴼⵓⵙ ⵏⵏⴻⵖ. 
ⵎⵉⵏⵣⵉ ⵍⵅⴻⴷⵎⴻⵜ ⵏ ⵜⵙⴻⵅⵅⴰⵔⵜ ⵜⴰⵏⵉⵜⴰ ⵡⴰⵔ ⵜⴻⴵⵉ ⵡⴰⵀⴰ ⴷⵉ ⵟⵟⵡⴻⵄ ⵏ ⵎⵉⵏ ⵉⵏⴻⵇⵚⴻⵏ ⵉ ⵉⵎⵇⴻⴷⴷⴰⵙⴻⵏ, ⵎⴰⵛⴰ ⵜᵉⵜⵜⴰⵡⵉ ⵄⴰⵡⴻⴷ ⵖⴰⵔ ⵡⴰⵟⵟⴰⵙ ⵏ ⵓⵇⴰⴷⵉ ⵉ ⴰⵔⴻⴱⴱⵉ. 
ⵎⵉⵏⵣⵉ ⵙ ⵜⵇⴻⴵⴻⴱⵜ ⵏ ⵜⵙⴻⵅⵅⴰⵔⵜ-ⴰ, ⴰⵇⴰ ⵙⵙⴻⵎⵖⴰⵔⴰⵏ ⴷⵉ ⴰⵔⴻⴱⴱⵉ ⵎⵉⵏⵣⵉ ⵜⴻⵎⵎⴰⵔⵙⴻⵎ ⵉⵅⴻⴼ ⵏⵡⴻⵎ ⵉ ⵛⵛⵀⴰⴷⴻⵜ ⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ, ⵓ ⵎⵉⵏⵣⵉ ⵜⵛⴰⵔⵛⴻⵎ ⵙ ⵜⴻⵛⵔⵉⵎⴻⵜ ⴰⴽⵉⴷⵙⴻⵏ ⵓ ⴰⴽ-ⴷ ⵎⴰⵔⵔⴰ. 
ⵏⵉⵜⵏⵉ ⴰⴷ ⴷⴷ-ⵇⴰⵔⵔⴱⴻⵏ ⵖⴰⵔ ⴰⵔⴻⴱⴱⵉ ⵙ ⵜⵥⴰⴵⵉⵜⵉⵏ ⵉ ⴽⴻⵏⵏⵉⵡ, ⵙ ⵜⴰⵢⵔⵉ ⴰⵟⵟⴰⵙ ⵅ ⵙⵙⵉⴱⴱⴻⵜ ⵏ ⵓⴼⴻⵢⵢⴻⴹ ⵏ ⴰⵔⴹⴰ ⵏ ⴰⵔⴻⴱⴱⵉ ⵏⵏⵉ ⵅⴰⵡⴻⵎ ⵉⴵⴰⵏ. 
ⵜⵇⴰⴷ ⴰⵙ ⵉ ⴰⵔⴻⴱⴱⵉ ⵅ ⵜⴻⵡⵀⵉⴱⵜ ⵏⵏⴻⵙ ⵉ ⵡⴰⵔ ⵏⵣⴻⵎⵎⴰⵔ ⴰⴷ ⵣⵣⴰⵢⴻⵙ ⵏⴻⵏⵟⴻⵇ. 
