﻿2 ⵉⴽⵓⵔⵉⵏⵜⵉⵢⵢⴻⵏ.
2.
ⴷⴻⴳⴳⴰ ⴰⵇⴰ ⴳⴳⵉⵖ ⵜ ⴷⴻⴳ ⵢⵉⵅⴻⴼ ⵉⵏⵓ, ⴰⵇⴰ ⵡⴰⵔ ⵖⴰⵔⵡⴻⵎ ⴷⴷ-ⵜⵜⵉⵙⴻⵖ ⵜⵡⴰⵍⴰ ⵏⵏⴻⵖⵏⵉⵜ ⵙ ⵡⴻⵛⴹⴰⵏ. 
ⵎⵉⵏⵣⵉ ⵎⴰⵍⴰ ⵣⴻⵄⵎⴰ ⵏⴻⵛⵛ ⵙⵙⴼⴼⵓⴳⵎⴻⵖ ⴽⴻⵏⵏⵉⵡ, ⵡⵉ ⵅⴻⵏⵏⵉ ⴷ ⴰⵢⵉ ⵖⴰ ⵉⵙⵙⴼⴰⵔⵃⴻⵏ ⵎⵖⵉⵔ ⵡⴻⵏⵏⵉ ⴷⵉ ⴳⴳⵉⵖ ⴰⴼⵓⴳⴻⵎ? 
ⵓⵔⵉⵖ ⴰⵡⴻⵎ-ⴷⴷ ⵎⴰⵏ ⴰⵢⴰ, ⵃⵉⵎⴰ ⵏⴻⵛⵛ, ⵅⵎⵉ ⴷⴷ ⵖⴰ ⵢⴰⵡⴹⴻⵖ ⴷⵉⵏ, ⵡⴰⵔ ⵜⵜⵡⴰⵙⵙⴼⴼⵓⴳⵎⴻⵖ ⵛⴰ ⵣⴻⴳ ⵉⵏⵏⵉ ⵉⵜⵜⵅⴻⵚⵚⴰ ⴰⴷ ⵣⵣⴰⵢⵙⴻⵏ ⴼⴰⵔⵃⴻⵖ. ⴰⵇⴰ ⵜⵜⵉⵇⵇⴻⵖ ⴷⴰⵢⵡⴻⵎ ⵎⴰⵔⵔⴰ, ⴱⴻⵍⵍⵉ ⵍⴻⴼⵔⴰⵃⴻⵜ ⵉⵏⵓ, ⴰⵇⴰ-ⵜⵜ ⴷ ⵍⴻⴼⵔⴰⵃⴻⵜ ⵏⵡⴻⵎ ⵎⴰⵔⵔⴰ. 
ⵎⵉⵏⵣⵉ ⵓⵔⵉⵖ ⴰⵡⴻⵎ-ⴷⴷ ⴷⵉ ⵍⵎⴻⵃⵏⴻⵜ ⵜⴻⵎⵖⴰⵔ ⵙ ⵡⴰⵟⵟⴰⵙ ⵏ ⵉⵎⴻⵟⵟⴰⵡⴻⵏ ⵓⵍⴰ ⵙ ⵡⵓⵍ ⵢⴰⵔⴻⵊⴼⴻⵏ, ⵡⴰⵔ ⵉⴵⵉ ⵃⵉⵎⴰ ⴰⴷ ⵜⴼⴼⵓⴳⵎⴻⵎ, ⵎⴰⵛⴰ ⵃⵉⵎⴰ ⴰⴷ ⵜⴻⵙⵙⵏⴻⵎ ⵜⴰⵢⵔⵉ ⵉ ⵖⴰⵔⵉ ⵉ ⴽⴻⵏⵏⵉⵡ ⵙ ⵓⴼⴻⵢⵢⴻⴹ. 
ⵎⴰⵛⴰ ⵎⴰⵍⴰ ⴷⵉⵏ ⵡⴻⵏⵏⵉ ⵉⵙⵙⴼⴼⵓⴳⵎⴻⵏ, ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵙⵙⴼⴼⵓⴳⴻⵎ ⵡⴰⵀⴰ, ⵎⴰⵛⴰ ⵣⴻⴳ ⵉⵊⵊ ⵏ ⵓⵖⴻⵣⴷⵉⵙ ⵉ ⴽⴻⵏⵏⵉⵡ ⵎⴰⵔⵔⴰ, ⴰⵍⴰⵎⵉ ⵡⴰⵔ ⴽⴻⵏⵏⵉⵡ ⵙⵙⴹⴻⵇⵍⴻⵖ ⵄⴰⴷ ⴽⵜⴰⵔ ⵙ ⵡⴰⵡⴰⵍ-ⴰ. 
ⵛⴼⴰ ⵢⴰⵙ ⵉ ⵡⴰⵏⵉⵜⴰ, ⴰⵇⴰ ⴰⵣⵢⴻⵏ ⴰⵎⴻⵇⵇⵔⴰⵏ ⵣⵣⴰⵢⵡⴻⵎ ⵜⵓⵖⴰ ⵉⵡⴻⴱⴱⴻⵅ ⵉ-ⵜ. 
ⵣⵉ ⵊⵊⵉⵀⴻⵜ ⵏⵏⴻⵖⵏⵉ ⴰⵇⴰ ⵉⵜⵜⵅⴻⵚⵚⴰ ⴰⵡⴻⵎ ⵍⴻⵅⵅⵓ ⴰⴷ ⴰⵙ ⵜⵙⴰⵎⵃⴻⵎ ⵓⵛⴰ ⴰⴷ ⵅⴰⵙ ⵜⴻⵙⵙⴼⴻⵡⵡⵊⴻⵎ, ⵃⵉⵎⴰ ⵡⴰⵔ ⵅⴰⵙ ⵢⴰⵔⴻⵏⵏⵉ ⵓⴼⵓⴳⴻⵎ ⴰⵍ ⴰⵏⴻⴳⴳⴰⵔⵓ. 
ⵙ ⵓⵢⴻⵏⵏⵉ ⵜⵜⵣⴰⵡⴰⴳⴻⵖ ⴽⴻⵏⵏⵉⵡ ⵎⴰⵃⴻⵏⴷ ⴰⴷ ⴰⵙ ⵜⴻⵙⵙⵜⴻⴱⴱⵜⴻⵎ ⵜⴰⵢⵔⵉ ⵏⵡⴻⵎ ⵉ ⵏⴻⵜⵜⴰ. 
ⵎⵉⵏⵣⵉ ⵄⴰⵡⴻⴷ ⵉ ⵎⴰⵏ ⴰⵢⴰ ⵓⵔⵉⵖ ⴰⵡⴻⵎ-ⴷⴷ, ⵃⵉⵎⴰ ⴰⴷ ⵙⵙⵏⴻⵖ ⵙ ⵜⵉⴷⴻⵜⵜ, ⵎⴰ ⵜᵉⵜⵜᵉⵟⵟⴰⵄⴻⵎ ⴷⵉ ⵎⴰⵔⵔⴰ. 
ⵡⴻⵏⵏⵉ ⵓⵎⵉ ⵜⵙⴰⵎⵃⴻⵎ, ⵏⴻⵛⵛ ⵄⴰⵡⴻⴷ ⴰⴷ ⴰⵙ ⵙⴰⵎⵃⴻⵖ. ⵎⵉⵏⵣⵉ ⵅ ⵎⵉⵅⴻⴼ ⵓⵎⵉ ⴷ ⴰⵙ ⵙⴰⵎⵃⴻⵖ, ⵙⴰⵎⵃⴻⵖ ⵜ ⴷⵉ ⵟⵟⵡⴻⵄ ⵏⵡⴻⵎ ⵇⵉⴱⴰⵍⵜ ⵉ ⵡⵓⴷⴻⵎ ⵏ ⵍⵎⴰⵙⵉⵃ, 
ⵃⵉⵎⴰ ⵅⴻⵏⵏⵉ ⵛⵛⵉⵟⴰⵏ ⵡⴰⵔ ⴷ ⴰⵏⴻⵖ ⵉⵣⴻⵎⵎⴰⵔ, ⵎⵉⵏⵣⵉ ⵏⴻⵙⵙⴻⵏ ⵉⵅⴰⵔⵔⵉⵚⴻⵏ ⵏⵏⴻⵙ. 
ⵍⴰⵎⵉ ⴷⴷ-ⵉⵡⴹⴻⵖ ⵖⴰⵔ ⵜⵔⵓⵡⴰⵙ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵍⵎⴰⵙⵉⵃ, ⵜⴻⵏⵏⵓⵔⵣⴻⵎ ⴰⵢⵉ-ⴷⴷ ⵜⴻⵡⵡⴰⵔⵜ ⵙ ⵓⴼⵓⵙ ⵏ ⵙⵉⴷⵉ, 
ⵎⴰⵛⴰ ⵡⴰⵔ ⴰⵔⴻⵢⵢⵃⴻⵖ ⵛⴰ ⴷⵉ ⴰⵔⵔⵓⵃ ⵉⵏⵓ, ⵎⵉⵏⵣⵉ ⵡⴰⵔ ⵓⴼⵉⵖ ⵛⴰ ⵓⵎⴰ ⵜⵉⵜⵓⵙ. ⵓⵛⴰ ⵎⵎⵙⴻⴱⴹⵉⵖ ⵅⴰⵙⴻⵏ, ⵓⵢⵓⵔⴻⵖ ⵖⴰⵔ ⵎⴰⴽⵉⴷⵓⵏⵉⵢⴰ. 
ⵎⴰⵛⴰ ⴰⵇⴰⴷⵉ ⵉ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵏⴻⵖ ⵉⴳⴳⴰ ⴰⴷ ⵏⵉⵍⵉ ⵏᵉⵜⵜⴱⴰⵏ ⵍⴻⴱⴷⴰ ⴷⵉ ⵍⵎⴰⵙⵉⵃ, ⵓⵛⴰ ⵉⵙⵙⵛⴰⵏ ⵣⵣⴰⵢⵏⴻⵖ ⵍⴻⴼⵡⴰⵃⴻⵜ ⵏ ⵜⵓⵙⵙⵏⴰ ⵏⵏⴻⵙ ⴷⵉ ⵎⴰⵔⵔⴰ ⵉⵎⵓⵛⴰⵏ. 
ⵎⵉⵏⵣⵉ ⵏⴻⴵⴰ ⴷ ⵉⵛⵜ ⵏ ⵍⴻⴼⵡⴰⵃⴻⵜ ⵉⵛⵏⴰⵏ ⵉ ⴰⵔⴻⴱⴱⵉ ⴷⵉ ⵍⵎⴰⵙⵉⵃ ⵊⴰⵔ ⵉⵏⵏⵉ ⵉⴷⴷⴰⵔⴻⵏ ⵓ ⵊⴰⵔ ⵉⵏⵏⵉ ⵉ ⵖⴰ ⵉⵜⵜⵡⴰⵀⴻⵍⵍⴽⴻⵏ. 
ⵉ ⵉⵏⴻⴳⴳⵓⵔⴰ ⴰⵇⴰ ⴰⵏⴻⵖ ⴷ ⵍⴻⴼⵡⴰⵃⴻⵜ ⵏ ⵍⵎⴻⵡⵜ ⵉ ⵍⵎⴻⵡⵜ ⵓⵛⴰ ⵉ ⵉⵎⴻⵣⵡⵓⵔⴰ ⴷ ⵍⴻⴼⵡⴰⵃⴻⵜ ⵏ ⵜⵓⴷⴰⵔⵜ ⵉ ⵜⵓⴷⴰⵔⵜ. ⵓⵛⴰ ⵎⴰⵏ ⵡⴻⵏ ⴷ ⴰⵙ ⵉⵇⴻⴷⴷⴻⵏ ⵉ ⵙⵙⵓⵇ-ⴰ? 
ⴰⵇⴰ ⵏⴻⵛⵛⵉⵏ ⵡⴰⵔ ⵏⴻⴵⵉ ⴰⵏⴻⵛⵜ ⵉⵏⵏⴻⵖⵏⵉ ⵉⵏⵏⵉ ⵉⵙⵙⴼⴰⵔⵔⴰⵖⴻⵏ ⴰⵡⴰⵍ ⵏ ⴰⵔⴻⴱⴱⵉ, ⵎⴰⵛⴰ ⵏⴻⵙⵙⵉⵡⴻⵍ ⴷⵉ ⵍⵎⴰⵙⵉⵃ ⵇⵉⴱⴰⵍⵜ ⵉ ⴰⵔⴻⴱⴱⵉ ⵄⵍⴰⵃⵙⴰⴱ ⵜⵉⴷⴻⵜⵜ ⵓ ⵄⵍⴰⵃⵙⴰⴱ ⵎⵉⵏ ⵉⴵⴰⵏ ⵣⵉ ⴰⵔⴻⴱⴱⵉ. 
