﻿ⵢⵓⵃⴰⵏⵏⴰ.
3.
ⵜⵓⵖⴰ ⴷⵉⵏ ⵉⵊⵊ ⵏ ⴱⵏⴰⴷⴻⵎ ⵣⴻⴳ ⵉⴼⴰⵔⵉⵙⵉⵢⵢⴻⵏ ⵇⵇⴰⵔⴻⵏ ⴰⵙ ⵏⵉⴽⵓⴷⵉⵎⵓⵙ, ⵏⴻⵜⵜⴰ ⴷ ⵉⵊⵊ ⵏ ⵓⵎⴻⵇⵇⵔⴰⵏ ⵏ ⵡⵓⴷⴰⵢⴻⵏ. 
ⵢⵓⵙⴰ-ⴷⴷ ⵖⴰⵔ ⵢⴰⵙⵓⵄ ⵙ ⴵⵉⵍⴻⵜ, ⵉⵏⵏⴰ ⴰⵙ: “ⴰ ⴰⵎⵙⴻⵍⵎⴰⴷ ⵉⵏⵓ, ⵏⴻⵛⵛⵉⵏ ⵏⴻⵙⵙⴻⵏ ⴱⴻⵍⵍⵉ ⵛⴻⴽ ⴷ ⴰⵎⵙⴻⵖⵖⴰⵔ ⵉ ⴷⴷ-ⵢⵓⵙⵉⵏ ⵣⵉ ⵖⴰⵔ ⴰⵔⴻⴱⴱⵉ, ⵎⵉⵏⵣⵉ ⵡⴰⵔ ⵉⵣⴻⵎⵎⴰⵔ ⵓⵍⴰ ⴷ ⵉⵊⵊ ⴰⴷ ⵉⴳⴳ ⵍⴻⵄⵍⴰⵎⴰⵜ-ⴰ ⵉ ⵜⴻⴳⴳⵉⴷ ⵛⴻⴽ, ⵎⵖⵉⵔ ⵎⴰⵍⴰ ⴰⴽⵉⴷⴻⵙ ⴰⵔⴻⴱⴱⵉ.” 
ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙ: “ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵛ ⵉⵏⵉⵖ, ⵓⵍⴰ ⴷ ⵉⵊⵊ ⵡⴰⵔ ⵉⵣⴻⵎⵎⴰⵔ ⴰⴷ ⵉⵥⴰⵔ ⵜⴰⴳⴻⵍⴷⵉⵜ ⵏ ⴰⵔⴻⴱⴱⵉ ⵎⵖⵉⵔ ⵎⴰⵍⴰ ⵉⵜⵜⵡⴰⵅⵍⴻⵇ-ⴷⴷ ⵣⵉ ⵊⴷⵉⴷ.” 
ⵏⵉⴽⵓⴷⵉⵎⵓⵙ ⵉⵏⵏⴰ ⴰⵙ: “ⵎⴰⵎⵎⴻⵛ ⵉⵣⴻⵎⵎⴰⵔ ⵉⵊⵊ ⵏ ⵓⵡⴻⵙⵙⴰⵔ ⴰⴷ ⴷⴷ-ⵉⵜⵜⵡⴰⵅⵍⴻⵇ ́́ⵄⴰⴷ? ⵡⴰⵔ ⵉⵣⴻⵎⵎⴰⵔ ⴰⴷ ⵢⴰⴷⴻⴼ ⵄⴰⵡⴻⴷ ⴷⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ, ⵎⴰⵃⴻⵏⴷ ⴰⴷ ⴷⴷ-ⵉⵜⵜⵡⴰⵅⵍⴻⵇ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ?” 
ⵢⴰⵙⵓⵄ ⵢⴰⵔⵔⴰ-ⴷⴷ, ⵉⵏⵏⴰ ⴰⵙ: “ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵛ ⵉⵏⵉⵖ: ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵡⴰⵔ ⴷⴷ-ⵉⵅⵍⵉⵇ ⵛⴰ ⵣⴻⴳ ⵡⴰⵎⴰⵏ ⵓ ⵣⴻⴳ ⴰⵔⵔⵓⵃ, ⵡⴰⵔ ⵉⵣⴻⵎⵎⴰⵔ ⴰⴷ ⵢⴰⴷⴻⴼ ⵖⴰⵔ ⵜⴳⴻⵍⴷⵉⵜ ⵏ ⴰⵔⴻⴱⴱⵉ. 
ⵎⵉⵏ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴷⴷⴰⵜ, ⵏⴻⵜⵜⴰ ⴷ ⴷⴷⴰⵜ, ⵓ ⵎⵉⵏ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴰⵔⵔⵓⵃ, ⵏⴻⵜⵜⴰ ⴷ ⴰⵔⵔⵓⵃ. 
ⵡⴰⵔ ⵜⴱⴻⵀⵜⴻⵎ ⵛⴰ ⵎⴰⵍⴰ ⵏⵏⵉⵖ ⴰⵛ, ⵉⵜⵜⵅⴻⵚⵚⴰ ⴽⴻⵏⵏⵉⵡ ⴰⴷ ⴷⴷ-ⵜᵉⵜⵜⵡⴰⵅⴻⵍⵇⴻⵎ ⵣⵉ ⵊⴷⵉⴷ. 
ⴰⵙⴻⵎⵎⵉⴹ ⵉⵜⵜⵙⵓⴹ ⵎⴰⵏⵉⵙ ⵉⵅⵙ, ⵜᵉⵜⵜⴻⵙⵍⵉⴷ ⵉ ⵓⵙⵓⴹⵉ ⵏⵏⴻⵙ, ⵡⴰⵔ ⵜⴻⵙⵙⵉⵏⴻⴷ ⵛⴰ ⵎⴰⵏⵉⵙ ⴷⴷ-ⵉⵜⵜⴰⵙ ⵓⵍⴰ ⵎⴰⵏⵉ ⵉⵜⵜⵔⴰⵃ. ⴰⵎⵎⵓ ⵉ ⵉⴵⴰ ⵄⴰⵡⴻⴷ ⵎⴰⵔⵔⴰ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵣⵉ ⴰⵔⵔⵓⵃ.” 
ⵏⵉⴽⵓⴷⵉⵎⵓⵙ ⵢⴰⵔⵔⴰ-ⴷⴷ, ⵉⵏⵏⴰ ⴰⵙ: “ⵎⴰⵎⵎⴻⵛ ⵉ ⵖⴰ ⵢⴻⴳⴳ ⴰⴷ ⵢⵉⵍⵉ ⵎⴰⵏ ⴰⵢⴰ?” 
ⵢⴰⵙⵓⵄ ⵢⴰⵔⵔⴰ-ⴷⴷ, ⵉⵏⵏⴰ ⴰⵙ: “ⵎⴰ ⵛⴻⴽ ⴷ ⴰⵎⵙⴻⵖⵖⴰⵔ ⵏ ⵉⵙⵔⴰⵉⵍ ⵓ ⵡⴰⵔ ⵜⴻⵙⵙⵉⵏⴻⴷ ⵛⴰ ⵎⴰⵏ ⴰⵢⴰ? 
ⵙ ⵜⵉⴷⴻⵜⵜ, ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵛ ⵉⵏⵉⵖ: ⵏⴻⵛⵛⵉⵏ ⵏⴻⵙⵙⴰⵡⴰⵍ ⵅ ⵎⵉⵏ ⵏⴻⵙⵙⴻⵏ, ⵏⴻⵛⵀⴻⴷ ⵅ ⵎⵉⵏ ⵏⴻⵥⵔⴰ, ⵡⴰⵅⵅⴰ ⴰⵎⴻⵏⵏⵉ ⴽⴻⵏⵏⵉⵡ ⵡⴰⵔ ⵜⴻⵇⴱⵉⵍⴻⵎ ⵛⴰ ⵛⵛⵀⴰⴷⴻⵜ ⵏⵏⴻⵖ. 
ⵎⴰⵍⴰ ⵙⵙⵉⵡⵍⴻⵖ ⴰⵡⴻⵎ ⵅ ⵎⵉⵏ ⵉⴵⴰⵏ ⵅ ⵜⴻⵎⵎⵓⵔⵜ, ⴽⴻⵏⵏⵉⵡ ⵡⴰⵔ ⵜⵉⵎⵏⴻⵎ, ⵎⴰⵎⵎⴻⵛ ⵖⴰ ⵜⴻⴳⴳⴻⵎ ⴰⴷ ⵜⴰⵎⵏⴻⵎ ⵎⴰⵍⴰ ⵙⵙⵉⵡⵍⴻⵖ ⴰⵡⴻⵎ ⵅ ⵎⵉⵏ ⵉⴵⴰⵏ ⴷⴻⴳ ⵓⵊⴻⵏⵏⴰ? 
ⵓⵍⴰ ⴷ ⵉⵊⵊ ⵡⴰⵔ ⵢⵓⵍⵉ ⵖⴰⵔ ⵓⵊⴻⵏⵏⴰ ⵎⵖⵉⵔ ⵡⴻⵏⵏⵉ ⴷⴷ-ⵉⵀⵡⴰⵏ ⵣⴻⴳ ⵓⵊⴻⵏⵏⴰ, ⴰⵇⴰ-ⵜ ⴷ ⵎⵎⵉⵙ ⵏ ⴱⵏⴰⴷⴻⵎ, ⴷ ⵡⴻⵏⵏⵉ ⵉⴵⴰⵏ ⴷⴻⴳ ⵓⵊⴻⵏⵏⴰ. 
ⴰⵎ ⵎⴰⵎⵎⴻⵛ ⵉⵙⵙⴳⴻⵄⵄⴻⴷ ⵎⵓⵙⴰ ⴰⴼⵉⵖⴰⵔ ⴷⵉ ⵍⴻⴼⵢⴰⴼⵉ, ⴰⵎⵎⵓ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵎⵎⵉⵙ ⵏ ⴱⵏⴰⴷⴻⵎ ⵄⴰⵡⴻⴷ, 
ⵃⵉⵎⴰ ⵎⴰⵔⵔⴰ ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵜⵜⵀⴻⵍⵍⵉⴽ ⵛⴰ, ⵎⴰⵛⴰ ⴰⴷ ⵖⴰⵔⴻⵙ ⵜⵉⵍⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ. 
ⴰⵎⵎⵓ ⵉ ⵢⴻⵅⵙ ⴰⵔⴻⴱⴱⵉ ⴷⴷⵓⵏⴻⵛⵜ ⴰⵍ ⵎⴰⵏⵉ ⵉⵡⵛⴰ ⴰⵢⴻⵏⵏⵉ ⵏ ⵎⵎⵉⵙ, ⵃⵉⵎⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵀⴻⵍⵍⵉⴽ ⵛⴰ, ⵎⴰⵛⴰ ⴰⴷ ⵖⴰⵔⴻⵙ ⵜⵉⵍⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ. 
ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⴷⴷ-ⵉⵙⵙⴻⴽⴽ ⵛⴰ ⵎⵎⵉⵙ ⵖⴰⵔ ⴷⴷⵓⵏⴻⵛⵜ, ⵃⵉⵎⴰ ⴰⴷ ⵉⵃⴰⵙⴻⴱ ⴷⴷⵓⵏⴻⵛⵜ, ⵎⴰⵛⴰ ⵉⵙⵙⴻⴽⴽ ⵉ-ⵜ-ⵉ-ⴷⴷ ⵃⵉⵎⴰ ⴰⴷ ⵣⵣⴰⵢⴻⵙ ⵜⴻⴷⴷⴰⵔ ⴷⴷⵓⵏⴻⵛⵜ. 
ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵜⵜⵡⴰⵃⴰⵙⴰⴱ ⵛⴰ. ⵡⴻⵏⵏⵉ ⵡⴰⵔ ⵉⵜⵜⵉⵎⵏⴻⵏ ⵛⴰ, ⴰⵇⴰ ⵉⵜⵜⵡⴰⵃⴰⵙⴻⴱ ⵣⵉ ⵍⴻⵅⵅⵓ, ⵎⵉⵏⵣⵉ ⵏⴻⵜⵜⴰ ⵡⴰⵔ ⵢⵓⵎⵉⵏ ⵛⴰ ⴷⴻⴳ ⵢⵉⵙⴻⵎ ⵏ ⵓⵢⴻⵏⵏⵉ ⵏ ⵎⵎⵉⵙ ⵏ ⴰⵔⴻⴱⴱⵉ. 
ⴷ ⵡⴰ ⴷ ⵍⴻⵃⴽⴰⵎ, ⴰⵇⴰ ⵜⴰⴼⴰⵡⵜ ⵜⵓⵙⴰ-ⴷⴷ ⵖⴰⵔ ⴷⴷⵓⵏⴻⵛⵜ, ⵎⴰⵛⴰ ⵉⵡⴷⴰⵏ ⵅⵙⴻⵏ ⵜⴰⴵⴻⵙⵜ ⵅ ⵜⴼⴰⵡⵜ, ⵎⵉⵏⵣⵉ ⵜⵉⵎⴻⴳⴳⴰ ⵏⵙⴻⵏ ⵜⵓⵖⴰ ⴰⵜⴻⵏⵜ ⴷ ⵜⵉⵄⴻⴼⴼⴰⵏⵉⵏ. 
ⵎⴰⵔⵔⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵜⵓⵄⴻⴼⴼⵏⴰ, ⵉⵛⴰⵔⵔⴻⵀ ⵜⴰⴼⴰⵡⵜ, ⵡⴰⵔ ⴷⴷ-ⵉⵜⵜⵉⵙ ⵛⴰ ⵖⴰⵔ ⵜⴼⴰⵡⵜ, ⵃⵉⵎⴰ ⵡⴰⵔ ⵜⵜⵡⴰⵡⴻⴱⴱⵅⴻⵏⵜ ⵛⴰ ⵜⵉⵎⴻⴳⴳⴰ ⵏⵏⴻⵙ. 
ⵎⴰⵛⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵜⵉⴷⴻⵜⵜ ⴰⴷ ⴷⴷ-ⵢⴰⵙ ⵖⴰⵔ ⵜⴼⴰⵡⵜ, ⵃⵉⵎⴰ ⴰⴷ ⴱⴰⵏⴻⵏⵜ ⵜⵉⵎⴻⴳⴳⴰ ⵏⵏⴻⵙ, ⴰⵇⴰ ⵜⵜⵡⴰⴳⴳⴻⵏⵜ ⴷⵉ ⴰⵔⴻⴱⴱⵉ.” 
ⴰⵡⴰⵔⵏⵉ ⵎⴰⵏ ⴰⵢⴰ ⵢⵓⵙⴰ-ⴷⴷ ⵢⴰⵙⵓⵄ ⴷ ⵉⵎⴻⵃⴹⴰⵔⴻⵏ ⵏⵏⴻⵙ ⵖⴰⵔ ⵜⴻⵎⵎⵓⵔⵜ ⵏ ⵢⴰⵀⵓⴷⵉⵢⵢⴰ, ⵉⵙⵙⴻⵄⴷⵓ ⴷⵉⵏ ⵛⴰ ⵏ ⵍⵡⴻⵇⵜ ⴰⴽⵉⴷⵙⴻⵏ ⵓⵛⴰ ⵜⵓⵖⴰ ⵉⵙⵙⴻⵖⴹⴰⵚ. 
ⵓⵍⴰ ⴷ ⵢⵓⵃⴰⵏⵏⴰ ⵜⵓⵖⴰ ⵉⵙⵙⴻⵖⴹⴰⵚ ⴷⵉ ⵄⴰⵢⵏⵓⵏ ⵉ ⴷⴷ-ⵢⵓⵙⵉⵏ ⵟⵟⴰⵔⴼ ⵉ ⵙⴰⵍⵉⵎ, ⵎⵉⵏⵣⵉ ⴷⵉⵏⵏⵉ ⴰⵎⴰⵏ ⴰⵟⵟⴰⵙ. ⵓⵙⵉⵏ-ⴷⴷ ⵉⵡⴷⴰⵏ ⴷⵉⵏⵏⵉ ⵓⵛⴰ ⵜⵜⵡⴰⵙⵙⵖⴻⴹⵚⴻⵏ, 
ⵎⵉⵏⵣⵉ ⵢⵓⵃⴰⵏⵏⴰ ⵜⵓⵖⴰ ⵄⴰⴷ ⵡⴰⵔ ⵉⵎⵎⴻⵏⴹⴰⵔ ⵛⴰ ⴷⵉ ⵍⴻⵃⴱⴻⵙ. 
ⵉⵎⵙⴰⵔ ⵉⵊⵊ ⵏ ⵓⵎⵃⴰⵔⵡⴻⴹ ⵊⴰⵔ ⵉⵊⵊⴻⵏ ⵣⴻⴳ ⵉⵎⴻⵃⴹⴰⵔⴻⵏ ⵏ ⵢⵓⵃⴰⵏⵏⴰ ⴷ ⵉⵊⵊ ⵏ ⵡⵓⴷⴰⵢ ⵅ ⵎⴰⵎⵎⴻⵛ ⵖⴰ ⵢⵉⵍⵉ ⵍⵓⴹⵓ. 
ⵏⵉⵜⵏⵉ ⵓⵙⵉⵏ-ⴷⴷ ⵖⴰⵔ ⵢⵓⵃⴰⵏⵏⴰ, ⵏⵏⴰⵏ ⴰⵙ: “ⴰ ⴰⵎⵙⴻⵍⵎⴰⴷ ⵏⵏⴻⵖ, ⵅⵣⴰⵔ, ⵡⴻⵏⵏⵉ ⴰⴽⵉⴷⴻⴽ ⵉⴵⴰⵏ ⵅ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ, ⵡⴻⵏⵏⵉ ⵎⵉⵏ ⵅⴻⴼ ⵜⵛⴻⵀⴷⴻⴷ, ⴰⵇⴰ ⵓⵍⴰ ⴷ ⵏⴻⵜⵜⴰ ⵉⵙⵙⴻⵖⴹⴰⵚ ⵓ ⵎⴰⵔⵔⴰ ⵜⵜⴰⵙⴻⵏ-ⴷⴷ ⵖⴰⵔⴻⵙ.” 
ⵢⴰⵔⵔⴰ-ⴷⴷ ⵢⵓⵃⴰⵏⵏⴰ, ⵉⵏⵏⴰ ⴰⵙⴻⵏ: “ⴱⵏⴰⴷⴻⵎ ⵡⴰⵔ ⵉⵣⴻⵎⵎⴰⵔ ⴰⴷ ⵉⵇⴱⴻⵍ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵎⴰⵍⴰ ⵡⴰⵔ ⴷ ⴰⵙ ⵜⴻⵎⵎⴻⵡⵛ ⵣⴻⴳ ⵓⵊⴻⵏⵏⴰ. 
ⴽⴻⵏⵏⵉⵡ ⵙⵉⵎⴰⵏⵜ ⵏⵡⴻⵎ ⵜⵛⴻⵀⵀⴷⴻⵎ ⴱⴻⵍⵍⵉ ⵏⴻⵛⵛ ⵏⵏⵉⵖ: ‘ⵏⴻⵛⵛ ⵡⴰⵔ ⴵⵉⵖ ⵛⴰ ⴷ ⵍⵎⴰⵙⵉⵃ!’, ⵎⴰⵛⴰ ⴰⵇⴰ ⵏⴻⵛⵛ ⵜⵜⵡⴰⵙⵙⴻⴽⴽⴻⵖ-ⴷⴷ ⵣⵣⴰⵜⴻⵙ. 
ⵡⴻⵏⵏⵉ ⵖⴰⵔ ⵜⴻⴵⴰ ⵜⴻⵙⵍⵉⵜ, ⵏⴻⵜⵜⴰ ⴷ ⴰⵙⵍⵉ. ⴰⵎⴻⴷⴷⵓⴽⴽⴻⵍ ⵏ ⵡⴻⵙⵍⵉ ⵡⴻⵏⵏⵉ ⵉⵜⵜⴱⴻⴷⴷⴰⵏ ⵣⵣⴰⵜⴻⵙ, ⵉⵜⵜⴻⵙⵍⴰ ⵖⴰⵔⴻⵙ, ⵉⴼⴰⵔⵔⴻⵃ ⵙ ⵍⴻⴼⵔⴰⵃⴻⵜ ⵜⴰⵎⴻⵇⵇⵔⴰⵏⵜ ⵙ ⵜⵎⵉⵊⵊⴰ ⵏ ⵡⴻⵙⵍⵉ. ⵙ ⵓⵢⴻⵏⵏⵉ, ⵅⵣⴰⵔ, ⴰⵇⴰ ⵜᵉⵜⵜⵡⴰⴽⴻⵎⵎⴻⵍ ⵍⴻⴼⵔⴰⵃⴻⵜ ⵉⵏⵓ ⵜⴰⵏⵉⵜⴰ. 
ⵉⵜⵜⵅⴻⵚⵚⴰ ⴰⴷ ⵉⴳⵎⴰ ⵏⴻⵜⵜⴰ ⵓ ⵏⴻⵛⵛ ⴰⴷ ⵏⴻⵇⵚⴻⵖ. 
ⵎⴰⵖⴰⵔ ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵙⴻⵏⵏⴻⵊ, ⵏⴻⵜⵜⴰ ⵙⴻⵏⵏⴻⵊ ⵉ ⵎⴰⵔⵔⴰ. ⵡⴻⵏⵏⵉ ⵉⴵⴰⵏ ⵣⵉ ⵜⴻⵎⵎⵓⵔⵜ, ⵣⵉ ⵜⴻⵎⵎⵓⵔⵜ ⵉⵙⵙⴰⵡⴰⵍ. ⵡⴻⵏⵏⵉ ⴷⴷ-ⵢⵓⵙⵉⵏ ⵣⴻⴳ ⵓⵊⴻⵏⵏⴰ, ⵏⴻⵜⵜⴰ ⵙⴻⵏⵏⴻⵊ ⵉ ⵎⴰⵔⵔⴰ, 
ⵓ ⵏⴻⵜⵜⴰ ⵉⵛⴻⵀⵀⴻⴷ ⵣⵉ ⵎⵉⵏ ⵉⵥⵔⴰ ⴷ ⵣⵉ ⵎⵉⵏ ⵉⵙⵍⴰ, ⵎⴰⵛⴰ ⵛⵛⵀⴰⴷⴻⵜ ⵏⵏⴻⵙ ⵡⴰⵔ ⵜⵜ ⵉⵇⴻⴱⴱⵉⵍ ⵓⵍⴰ ⴷ ⵉⵊⵊⴻⵏ. 
ⵡⴻⵏⵏⵉ ⵉⵇⴻⴱⴱⵍⴻⵏ ⵛⵛⵀⴰⴷⴻⵜ ⵏⵏⴻⵙ ⴷ ⵡⴻⵏⵏⵉ ⵉⵙⵙⴰⵔⵙⴻⵏ ⵟⵟⴰⴱⴻⵄ ⵏⵏⴻⵙ ⵏ ⵓⵛⴻⵎⵎⵉⵄ ⴱⴻⵍⵍⵉ ⴰⵇⴰ ⴰⵔⴻⴱⴱⵉ ⴷ ⵜⵉⴷⴻⵜⵜ. 
ⵎⵉⵏⵣⵉ ⵡⴻⵏⵏⵉ ⴷⴷ-ⵉⵙⵙⴻⴽⴽ ⴰⵔⴻⴱⴱⵉ, ⵉⵙⵙⴰⵡⴰⵍ ⵙ ⵡⴰⵡⴰⵍⴻⵏ ⵏ ⴰⵔⴻⴱⴱⵉ, ⵎⵉⵏⵣⵉ ⴰⵔⴻⴱⴱⵉ ⵡⴰⵔ ⵉⵜⵜⵉⵛ ⵛⴰ ⴰⵔⵔⵓⵃ ⵙ ⵍⵎⵉⵣⴰⵏ. 
ⴱⴰⴱⴰⵙ ⵉⵜⵜⴻⵅⵙ ⵎⵎⵉⵙ ⵓⵛⴰ ⵉⴳⴳⴰ ⴰⵙ ⴽⵓⵍⵛⵉ ⴷⴻⴳ ⵉⴼⴰⵙⵙⴻⵏ ⵏⵏⴻⵙ. 
ⵡⴻⵏⵏⵉ ⵉⵜⵜⴰⵎⵏⴻⵏ ⴷⵉ ⵎⵎⵉⵙ ⵖⴰⵔⴻⵙ ⵜⵓⴷⴰⵔⵜ ⵉⵜⵜⴷⵓⵎⴰⵏ, ⵎⴰⵛⴰ ⵡⴻⵏⵏⵉ ⵡⴰⵔ ⵉⵟⵟⵉⵄ ⵛⴰ ⵎⵎⵉⵙ, ⵡⴰⵔ ⵉⵥⴰⵔⵔ ⵜⵓⴷⴰⵔⵜ, ⵎⴰⵖⴰⵔ ⴰⵖⴹⴰⴱ ⵏ ⴰⵔⴻⴱⴱⵉ ⴰⴷ ⵅⴰⵙ ⵉⵇⵇⵉⵎ.” 
