﻿ⵎⴰⵜⵜⴰ.
12.
ⴷⵉ ⵍⵡⴻⵇⵜ ⵏⵏⵉ ⵉⵛⵓⵇ ⵢⴰⵙⵓⵄ ⴷⴻⴳ ⵉⵢⵢⴰⵔⴻⵏ ⵏ ⵣⵣⴰⵔⵉⵄⴻⵜ ⵏ ⵉⵎⴻⵏⴷⵉ ⴷⵉ ⵙⵙⴻⴱⵜ. ⵜⵓⵖⴰ ⵉⵎⴻⵃⴹⴰⵔⴻⵏ ⵏⵏⴻⵙ ⴵⵓⵥⴻⵏ ⵓⵛⴰ ⴱⴷⴰⵏ ⵍⴻⵇⵇⴹⴻⵏ ⵜⵉⴷⵔⵉⵏ, ⵛⵛⵉⵏ ⵣⵣⴰⵢⵙⴻⵏⵜ. 
ⴰⵍⴰⵎⵉ ⵜⴻⵏ ⵥⵔⵉⵏ ⵉⴼⴰⵔⵉⵙⵉⵢⵢⴻⵏ, ⵏⵏⴰⵏ ⴰⵙ: “ⵅⵣⴰⵔ ⵉⵎⴻⵃⴹⴰⵔⴻⵏ ⵏⵏⴻⵛ ⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵄⴻⴷⴷⵍⴻⵏ ⴷⵉ ⵙⵙⴻⴱⵜ!” 
ⵢⴰⵔⵔⴰ-ⴷⴷ ⵅⴰⵙⴻⵏ: “ⵎⴰ ⵡⴰⵔ ⵜⴻⵖⵍⵉⵎ ⵛⴰ ⵎⵉⵏ ⵉⴳⴳⴰ ⴷⴰⵡⵓⴷ ⵓⵎⵉ ⵉⴵⵓⵥ ⵏⴻⵜⵜⴰ ⴷ ⵢⵉⵏⵏⵉ ⴰⴽⵉⴷⴻⵙ? 
ⵎⴰⵎⵎⴻⵛ ⵢⵓⴷⴻⴼ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⵉⵛⵛⴰ ⴰⵖⵔⵓⵎ ⵏ ⵡⴻⵙⵛⴰⵏ ⵣⵉ ⵜⵣⴻⵡⴹⴰ ⵏ ⵙⵉⴷⵉ ⵉ ⵡⴰⵔ ⵉⵃⴻⴵⵍⴻⵏ ⵎⴰⵛⵛⴰ ⵏⵏⴻⵙ ⵉ ⵏⴻⵜⵜⴰ ⵓⵍⴰ ⵉ ⵢⵉⵏⵏⵉ ⴰⴽⵉⴷⴻⵙ, ⵎⴰⵛⴰ ⵎⵖⵉⵔ ⵉ ⵉⴽⴻⵀⵀⴰⵏⴻⵏ ⵡⴰⵀⴰ. 
ⵏⵉⵖ ⵡⴰⵔ ⵜⴻⵖⵔⵉⵎ ⵛⴰ ⴷⵉ ⵛⵛⴰⵔⵉⵄⴰ ⴱⴻⵍⵍⵉ ⵉⴽⴻⵀⵀⴰⵏⴻⵏ ⵉⵏⵏⵉ ⵉⴵⴰⵏ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴷⵉ ⵙⵙⴻⴱⵜ, ⵅⴻⵟⵟⴰⵏ ⴷⵉ ⵜⴻⵡⵚⵉⵢⵢⴻⵜ ⵏ ⵙⵙⴻⴱⵜ, ⵡⴰⵅⵅⴰ ⴰⵎⴻⵏⵏⵉ ⵡⴰⵔ ⵅⴰⵙⴻⵏ ⵉⴱⵉⵏ ⵍⵄⵉⴱ? 
ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵡⴻⵏⵏⵉ ⵉⴵⴰⵏ ⴷ ⴰⵎⴻⵇⵇⵔⴰⵏ ⵅ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⴰⵇⴰ-ⵜ ⴷⴰⵏⵉⵜⴰ! 
ⵎⴰⵛⴰ ⵎⴰⵍⴰ ⵜⵓⵖⴰ ⵜⴼⴻⵀⵎⴻⵏ ⵎⵉⵏ ⵉⵅⵙ ⴰⴷ ⵢⵉⵏⵉ: ‘ⵏⴻⵛⵛ ⵅⵙⴻⵖ ⴰⵔⵔⴻⵃⵎⴻⵜ, ⵡⴰⵔ ⵉⴵⵉ ⴷ ⵜⴰⵖⴰⵔⵚⵜ!’, ⵅⴻⵏⵏⵉ ⴰⴷ ⵜⵉⵍⵉ ⵡⴰⵔ ⵜᵉⵜⵜⵃⴰⵙⴰⴱⴻⵎ ⵛⴰ ⵅ ⵉⵎⴻⵣⴷⴰⴳⴻⵏ, 
ⵎⵉⵏⵣⵉ ⵎⵎⵉⵙ ⵏ ⴱⵏⴰⴷⴻⵎ ⴷ ⴱⴰⴱ ⵏ ⵙⵙⴻⴱⵜ.” 
ⵢⴰⵙⵓⵄ ⵢⵓⵢⵓⵔ ⵙⵙⴻⵏⵏⵉ, ⵢⵓⴷⴻⴼ ⵖⴰⵔ ⵜⴻⵎⵣⵉⴷⴰ ⵏⵙⴻⵏ. 
ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ, ⴰⴼⵓⵙ ⵏⵏⴻⵙ ⵉⵇⵓⵛⵛⴻⵃ. ⵙⵙⴻⵇⵙⴰⵏ ⵜ ⵎⴰⵃⴻⵏⴷ ⵣⴻⵎⵎⴰⵔⴻⵏ ⴰⴷ ⵣⵣⴰⵢⴻⵙ ⵛⴻⵜⵜⵛⴰⵏ, ⵏⵏⴰⵏ: “ⵎⴰ ⵉⵄⴻⴷⴷⴻⵍ ⵓⵙⴳⴻⵏⴼⵉ ⴷⵉ ⵙⵙⴻⴱⵜ?” 
ⵉⵏⵏⴰ ⴰⵙⴻⵏ: “ⵎⴰⵏ ⴱⵏⴰⴷⴻⵎ ⵉ ⴷⵉⵏⵏⵉ ⵊⴰⵔ ⴰⵡⴻⵎ ⵡⴻⵏⵏⵉ ⵖⴰⵔ ⵉⴵⴰ ⵉⵣⵎⴰⵔ ⵉ ⵉⵡⴹⴰⵏ ⴷⵉ ⵜⴻⵙⵔⴰⴼⵜ ⴷⵉ ⵙⵙⴻⴱⵜ, ⵡⴰⵔ ⵜ ⵉⵜⵜⴻⵟⵟⴻⴼ, ⵃⵉⵎⴰ ⴰⴷ ⵜ-ⵉ-ⴷⴷ ⵉⵙⵙⵓⴼⴼⴻⵖ? 
ⵎⴻⵛⵃⴰⵍ ⵉⵄⴷⵓ ⴱⵏⴰⴷⴻⵎ ⵅ ⵉⵣⵎⴰⵔ! ⵙ ⵓⵢⴻⵏⵏⵉ ⵉⵄⴻⴷⴷⴻⵍ ⴰⴷ ⵉⵜⵜⵡⴰⴳⴳ ⵎⵉⵏ ⵉⵚⴻⴱⵃⴻⵏ ⴷⵉ ⵙⵙⴻⴱⵜ.” 
ⵍⴻⵅⴷⴻⵏⵏⵉ ⵉⵏⵏⴰ ⴰⵙ ⵉ ⴱⵏⴰⴷⴻⵎ ⵏⵏⵉ: “ⵙⵡⵉⵥⵥⴻⴹ ⴰⴼⵓⵙ ⵏⵏⴻⵛ!” ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵓⵛⴰ ⵉⴷⵡⴻⵍ ⵉⴳⴳⴻⵏⴼⴰ ⴰⵎ ⵡⴻⵏⵏⴻⵖⵏⵉ. 
ⵉⴼⴰⵔⵉⵙⵉⵢⵢⴻⵏ ⴼⴼⵖⴻⵏ-ⴷⴷ ⵖⴰⵔ ⴱⴰⵔⵔⴰ, ⵎⵛⴰⵡⴰⵔⴻⵏ ⵅⴰⵙ, ⵎⴰⵎⵎⴻⵛ ⵖⴰ ⴳⴳⴻⵏ ⴰⴷ ⵜ ⵏⵖⴻⵏ. 
ⵎⴰⵛⴰ ⵢⴰⵙⵓⵄ ⵉⵙⵙⴻⵏ ⴰⵢⴰ ⵓⵛⴰ ⵢⵓⵢⵓⵔ ⵙⵙⴻⵏⵏⵉ. ⵉⴹⴼⴰⵔ ⵉ-ⵜ-ⵉ-ⴷⴷ ⵉⵊⵊ ⵏ ⵍⵖⴰⵛⵉ ⴷ ⴰⵎⴻⵇⵇⵔⴰⵏ, ⵉⵙⵙⴳⴻⵏⴼⴰ ⵉ-ⵜⴻⵏ ⵎⴰⵔⵔⴰ. 
ⵢⵓⵎⵓⵔ ⵉ-ⵜⴻⵏ ⵙ ⵊⵊⴻⵀⴷ ⵎⴰⵃⴻⵏⴷ ⵡⴰⵔ ⵅⴰⵙ ⵙⵙⵓⴼⴼⵓⵖⴻⵏ ⵍⴻⵅⴱⴰⵔ, 
ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵡⴰⵡⴰⵍ ⵉ ⵉⵏⵏⴰⵏ ⵓⵏⴰⴱⵉ ⵉⵛⴰⵄⵢⴰ: 
“ⵅⵣⴰⵔ, ⴰⵎⵙⴻⵅⵅⴰⵔ ⵉⵏⵓ, ⵡⴻⵏⵏⵉ ⴼⴰⵔⵔⵣⴻⵖ, ⴰⵎⵄⵉⵣⵣ ⵉⵏⵓ, ⵡⴻⵏⵏⵉ ⴷⵉ ⵓⴼⵉⵖ ⴰⵔⴹⴰ ⵉⵏⵓ. ⴰⴷ ⵅⴰⵙ ⵙⵙⴰⵔⵙⴻⵖ ⴰⵔⵔⵓⵃ ⵉⵏⵓ ⵓ ⵏⴻⵜⵜⴰ ⴰⴷ ⵉⴱⴰⵔⵔⴻⵃ ⵙ ⵍⵃⵓⴽⵎ ⵉ ⵍⴻⴳⵏⵓⵙ. 
ⵡⴰⵔ ⵉⵜⵜⴻⵎⵛⵓⴱⴱⵓⵛ, ⵡⴰⵔ ⵉⵙⵖⵓⵢⵢⵓ, ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⵙⵍⵉ ⵜⵎⵉⵊⵊⴰ ⵏⵏⴻⵙ ⴷⴻⴳ ⵉⴱⵔⵉⴷⴻⵏ. 
ⴰⵖⴰⵏⵉⵎ ⵢⴰⵔⵥⴻⵏ ⵡⴰⵔ ⵜ ⵢⴰⵔⴻⵥⵥⵉ, ⵓⵍⴰ ⴷ ⵜⴰⴼⵜⵉⵍⵜ ⵉⴷⴷⵓⵅⵅⵓⵏⴻⵏ, ⵡⴰⵔ ⵜⵜ ⵉⵙⵙⵅⴻⵙⵙⵉ ⴰⵍ ⴷⴷ ⵖⴰ ⵉⵙⵙⵓⴼⴼⴻⵖ ⵍⴻⵃⴽⴰⵎ ⵉ ⵖⴰ ⵉⵏⴻⴷⵀⴻⵏ ⵉ ⵓⵖⴻⵍⵍⴻⴱ, 
ⵓⵛⴰ ⴰⴷ ⵙⵙⵉⵜⵎⴻⵏ ⵍⴻⴳⵏⵓⵙ ⴷⴻⴳ ⵢⵉⵙⴻⵎ ⵏⵏⴻⵙ.” 
ⵍⴻⵅⴷⴻⵏⵏⵉ ⵉⵡⵢⴻⵏ ⴰⵙ-ⴷⴷ ⵉⵊⵊ ⵏ ⵓⵎⴻⵔⵢⴰⵃ, ⵜⵓⵖⴰ-ⵜ ⴷ ⴰⴷⴰⵔⵖⴰⵍ ⴷ ⴰⵢⵏⴰⵡ, ⵓⵛⴰ ⵏⴻⵜⵜⴰ ⵉⵙⵙⴳⴻⵏⴼⴰ ⵉ-ⵜ, ⴰⵍⴰⵎⵉ ⵡⴻⵏⵏⵉ ⵜⵓⵖⴰ ⵉⴵⴰⵏ ⴷ ⴰⵢⵏⴰⵡ ⴷ ⴰⴷⴰⵔⵖⴰⵍ ⵉⴷⵡⴻⵍ ⵉⵙⵙⴰⵡⴰⵍ ⵓ ⵉⵜⵜⵡⴰⵍⴰ. 
ⵉⵜⴻⴱⵀⴻⵜ ⵍⵖⴰⵛⵉ ⵎⴰⵔⵔⴰ, ⵏⵏⴰⵏ: “ⵎⴰ ⵡⴰⵏⵉⵜⴰ ⵅⴻⵏⵏⵉ ⵡⴰⵔ ⵉⴵⵉ ⴷ ⵎⵎⵉⵙ ⵏ ⴷⴰⵡⵓⴷ?” 
ⵎⴰⵛⴰ ⵙⵍⵉⵏ ⵉⴼⴰⵔⵉⵙⵉⵢⵢⴻⵏ ⵎⴰⵏ ⴰⵢⴰ, ⵏⵏⴰⵏ: “ⵡⴰⵏⵉⵜⴰ ⵉⵙⵙⵓⴼⴼⵓⵖ ⵛⵛⵡⴰⵟⴻⵏ ⵎⵖⵉⵔ ⵙ ⵡⴻⴱⵔⵉⴷ ⵏ ⴱᵉⵄⴰⵍⵣⴰⴱⵓⴱ, ⴰⵎⴻⵇⵇⵔⴰⵏ ⵏ ⵛⵛⵡⴰⵟⴻⵏ.”    
ⵎⴰⵛⴰ ⵢⴰⵙⵓⵄ ⵉⵙⵙⴻⵏ ⵉⵅⴰⵔⵔⵉⵚⴻⵏ ⵏⵙⴻⵏ, ⵉⵏⵏⴰ ⴰⵙⴻⵏ: “ⴽⵓⵍ ⵜⴰⴳⴻⵍⴷⵉⵜ ⵉⵜⵜⴻⵎⵙⴻⴱⴹⴰⵏ ⵅ ⵢⵉⵅⴻⴼ ⵏⵏⴻⵙ ⴰⴷ ⵜᵉⵜⵜⵡⴰⵀⴻⵍⵍⴻⴽ, ⵓ ⴽⵓⵍ ⵜⴰⴷⴷⴰⵔⵜ ⵏⵉⵖ ⵜⴰⵏⴷⵉⵏⵜ ⵉⵜⵜⴻⵎⵙⴻⴱⴹⴰⵏ ⵅ ⵢⵉⵅⴻⴼ ⵏⵏⴻⵙ ⵡⴰⵔ ⵜᵉⵜⵜⵖⵉⵎⵉ ⵛⴰ. 
ⵎⴰⵍⴰ ⴰⵇⴰ-ⵜ ⴷ ⵛⵛⵉⵟⴰⵏ ⵉⵙⵙⵓⴼⴼⵓⵖ ⵛⵛⵉⵟⴰⵏ, ⴰⵇⴰ ⵏⴻⵜⵜⴰ ⵉⵜⵜⴻⵎⵙⴻⴱⴹⴰ ⵅ ⵢⵉⵅⴻⴼ ⵏⵏⴻⵙ, ⵅⴻⵏⵏⵉ ⵎⴰⵎⵎⴻⵛ ⵖⴰ ⵜⴻⵇⵇⵉⵎ ⵜⴳⴻⵍⴷⵉⵜ ⵏⵏⴻⵙ? 
ⵎⴰⵍⴰ ⵏⴻⵛⵛ ⵙⵙⵓⴼⴼⵓⵖⴻⵖ ⵛⵛⵡⴰⵟⴻⵏ ⵙ ⵡⴻⴱⵔⵉⴷ ⵏ ⴱᵉⵄⴰⵍⵣⴰⴱⵓⴱ, ⵙ ⵎⵉⵏ ⵣⵉ ⵜⴻⵏ ⵉ ⵖⴰ ⵙⵙⵓⴼⴼⵖⴻⵏ ⵜⴰⵔⵡⴰ ⵏⵡⴻⵎ? ⵙ ⵓⵢⴻⵏⵏⵉ ⵏⵉⵜⵏⵉ ⴰⴷ ⵉⵍⵉⵏ ⴷ ⵍⵇⵓⴹⴰⵜ ⵅⴰⵡⴻⵎ. 
ⵎⴰⵛⴰ ⵎⴰⵍⴰ ⵏⴻⵛⵛ ⵙⵙⵓⴼⴼⵓⵖⴻⵖ ⵛⵛⵡⴰⵟⴻⵏ ⵙ ⴰⵔⵔⵓⵃ ⵏ ⴰⵔⴻⴱⴱⵉ, ⴰⵇⴰ ⵜⵓⴷⴻⵙ ⴰⵡⴻⵎ-ⴷⴷ ⵜⴳⴻⵍⴷⵉⵜ ⵏ ⴰⵔⴻⴱⴱⵉ. 
ⵏⵉⵖ ⵎⴰⵎⵎⴻⵛ ⵉⵣⴻⵎⵎⴰⵔ ⵃⴻⴷ ⴰⴷ ⵢⴰⴷⴻⴼ ⵖⴰⵔ ⵜⴰⴷⴷⴰⵔⵜ ⵏ ⵡⴻⵏⵏⵉ ⵉⵊⴻⵀⴷⴻⵏ ⵎⴰⵃⴻⵏⴷ ⴰⴷ ⵉⴽⴻⵛⵛⴻⴹ ⵍⴻⵇⵛⵓⵄ ⵏⵏⴻⵙ, ⵎⴰⵍⴰ ⵡⴰⵔ ⵉⵛⴰⵔⴼ ⵡⴻⵏⵏⵉ ⵉⵊⴻⵀⴷⴻⵏ ⴰⵎⴻⵣⵡⴰⵔ? ⵅⴻⵏⵏⵉ ⵉⵣⴻⵎⵎⴰⵔ ⴰⴷ ⵉⴽⴻⵛⵛⴻⴹ ⵜⴰⴷⴷⴰⵔⵜ ⵏⵏⴻⵙ. 
ⵡⴻⵏⵏⵉ ⵡⴰⵔ ⵉⴵⵉⵏ ⴰⴽⵉⴷⵉ, ⴰⵇⴰ-ⵜ ⴹⵉⴷⴷ ⵉⵏⵓ, ⵡⴻⵏⵏⵉ ⵡⴰⵔ ⴽⵉⴷⵉ ⵉⵙⵙⵎⵓⵏⴰⵏ, ⴰⵇⴰ ⵉⵜⵜⵣⴻⴵⴰⵄ ⵡⴰⵀⴰ. 
ⵙ ⵓⵢⴻⵏⵏⵉ ⴰⴷ ⴰⵡⴻⵎ ⵉⵏⵉⵖ: ⵎⴰⵔⵔⴰ ⴷⴷⵏⵓⴱ ⴷ ⵓⵛⴻⵇⵇⴻⴼ ⴰⴷ ⵉⵜⵜⵡⴰⵖⴼⴰⵔ ⵉ ⵉⵡⴷⴰⵏ, ⵎⴰⵛⴰ ⴰⵛⴻⵇⵇⴻⴼ ⴷⵉ ⴰⵔⵔⵓⵃ ⵡⴰⵔ ⵉⵜⵜⵡⴰⵖⴼⴰⵔ ⵛⴰ ⵉ ⵉⵡⴷⴰⵏ. 
ⵡⴻⵏⵏⵉ ⵉ ⵖⴰ ⵉⵏⵉⵏ ⴰⵡⴰⵍ ⴷ ⴰⵄⴻⴼⴼⴰⵏ ⵅ ⵎⵎⵉⵙ ⵏ ⴱⵏⴰⴷⴻⵎ ⴰⴷ ⴰⵙ ⵉⵜⵜⵡⴰⵖⴼⴰⵔ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵏⵉⵏ ⴰⵡⴰⵍ ⴷ ⴰⵄⴻⴼⴼⴰⵏ ⵅ ⴰⵔⵔⵓⵃ ⵉⵇⴻⴷⴷⵙⴻⵏ ⵡⴰⵔ ⴷ ⴰⵙ ⵉⵜⵜⵡⴰⵖⴼⴰⵔ ⵛⴰ, ⵓⵍⴰ ⴷⵉ ⵍⵡⴻⵇⵜ-ⴰ ⵓⵍⴰ ⴷⵉ ⵍⵡⴻⵇⵜ ⵉ ⴷⴷ ⵖⴰ ⵢⴰⵙⴻⵏ. 
ⵃⴻⵙⴱⴻⵎ ⵜⴰⵛⴻⵊⵊⴰⵔⵜ ⴷ ⵜⴰⵚⴻⴱⵃⴰⵏⵜ ⵓⵍⴰ ⴷ ⵍⵖⵉⴵⴻⵜ ⵏⵏⴻⵙ ⴷ ⵜⴰⵚⴻⴱⵃⴰⵏⵜ, ⵏⵉⵖ ⵃⴻⵙⴱⴻⵎ ⵜⴰⵛⴻⵊⵊⴰⵔⵜ ⵜⴻⵅⵙⴰⵔ ⵓⵍⴰ ⴷ ⵍⵖⵉⴵⴻⵜ ⵏⵏⴻⵙ ⵜⴻⵅⵙⴰⵔ, ⵎⵉⵏⵣⵉ ⵜⴰⵛⴻⵊⵊⴰⵔⵜ ⵜᵉⵜⵜⵡⴰⵙⵙⴻⵏ ⵣⵉ ⵍⵖⵉⴵⴻⵜ ⵏⵏⴻⵙ.”    
“ⴰ ⵜⴰⵔⵡⴰ ⵏ ⵉⴼⵉⵖⵔⴰⵏ, ⵎⴰⵎⵎⴻⵛ ⵖⴰ ⵜⴻⴳⴳⴻⵎ ⴰⴷ ⵜⴻⵙⵙⵉⵡⵍⴻⵎ ⵅ ⵎⵉⵏ ⵉⵚⴻⴱⵃⴻⵏ, ⵡⴰⵅⵅⴰ ⴽⴻⵏⵏⵉⵡ ⴷ ⵉⵄⴻⴼⴼⴰⵏⴻⵏ, ⵎⵉⵏⵣⵉ ⵣⴻⴳ ⵓⵄⴻⵎⵎⴰⵔ ⵏ ⵡⵓⵍ ⴰⴷ ⵉⵙⵙⵉⵡⴻⵍ ⵓⵇⴻⵎⵎⵓⵎ. 
ⴱⵏⴰⴷⴻⵎ ⴰⵚⴻⴱⵃⴰⵏ ⵉⵙⵙⵓⴼⴼⵓⵖ-ⴷⴷ ⵎⵉⵏ ⵉⵚⴻⴱⵃⴻⵏ ⵣⵉ ⵍⴽⴻⵏⵣ ⴰⵚⴻⴱⵃⴰⵏ ⵏ ⵡⵓⵍ ⵏⵏⴻⵙ ⵓⵛⴰ ⴱⵏⴰⴷⴻⵎ ⴰⵄⴻⴼⴼⴰⵏ ⵉⵙⵙⵓⴼⴼⵓⵖ-ⴷⴷ ⵣⵉ ⵍⴽⴻⵏⵣ ⴰⵄⴻⴼⴼⴰⵏ ⵏⵏⴻⵙ ⵎⵉⵏ ⵉⵄⴻⴼⴼⵏⴻⵏ. 
ⵎⴰⵛⴰ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴱⴻⵍⵍⵉ ⴽⵓⵍ ⴰⵡⴰⵍ ⵉⵅⵡⴰⵏ ⴰⴷ ⵣⵣⴰⵢⴻⵙ ⵙⵙⵉⵡⵍⴻⵏ ⵉⵡⴷⴰⵏ, ⴰⴷ ⵣⵣⴰⵢⴻⵙ ⵜⵜⵡⴰⵃⴰⵙⴱⴻⵏ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ. 
ⵎⵉⵏⵣⵉ ⵙ ⵡⴰⵡⴰⵍⴻⵏ ⵏⵏⴻⵛ ⴰⴷ ⵜᵉⵜⵜⵡⴰⵙⴻⴳⴳⴷⴻⴷ ⵓⵛⴰ ⵙ ⵡⴰⵡⴰⵍⴻⵏ ⵏⵏⴻⵛ ⴰⴷ ⵜᵉⵜⵜⵡⴰⵃⴰⵙⴱⴻⴷ.” 
ⵛⴰ ⵏ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴰⵔⵔⵉⵏ-ⴷⴷ ⵅⴰⵙ: “ⴰ ⴰⵎⵙⴻⵖⵖⴰⵔ, ⵏⴻⵛⵛⵉⵏ ⵏⴻⵅⵙ ⴰⴷ ⵏⵥⴰⵔ ⵉⵛⵜ ⵏ ⵍⴻⵄⵍⴰⵎⴻⵜ ⵣⵣⴰⵢⴻⴽ.” 
ⵎⴰⵛⴰ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙⴻⵏ: “ⵊⵊⵉⵍ ⴰⵄⴻⴼⴼⴰⵏ ⵉⵣⴻⵏⵏⴰⵏ ⵉⵜⵜⴻⵜⵜⴰⵔ ⵉⵛⵜ ⵏ ⵍⴻⵄⵍⴰⵎⴻⵜ, ⵡⴰⵔ ⴷ ⴰⵙ ⵉⵜⵜⵎⴻⵡⵛⵉ ⵓⵍⴰ ⴷ ⵉⵛⵜ ⵏ ⵍⴻⵄⵍⴰⵎⴻⵜ ⵎⵖⵉⵔ ⵍⴻⵄⵍⴰⵎⴻⵜ ⵏ ⵢⵓⵏⵓⵙ. 
ⵎⵉⵏⵣⵉ ⴰⵎ ⵎⴰⵎⵎⴻⵛ ⵜⵓⵖⴰ ⵢⵓⵏⵓⵙ ⵜⵍⴰⵜⴰ ⵏ ⵡⵓⵙⵙⴰⵏ ⵊⴰⵔ ⴵⵢⴰⵍⵉ ⴷ ⵡⵓⵙⵙⴰⵏ ⴷⴻⴳ ⵓⵄⴻⴷⴷⵉⵙ ⵏ ⵡⴻⵙⵍⴻⵎ, ⴰⵎⵎⵓ ⵉ ⵖⴰ ⵢⵉⵍⵉ ⵓⵍⴰ ⴷ ⵎⵎⵉⵙ ⵏ ⴱⵏⴰⴷⴻⵎ ⴷⴻⴳ ⵡⵓⵍ ⵏ ⵜⴻⵎⵎⵓⵔⵜ ⵜⵍⴰⵜⴰ ⵏ ⵡⵓⵙⵙⴰⵏ ⵊⴰⵔ ⴵⵢⴰⵍⵉ ⴷ ⵡⵓⵙⵙⴰⵏ. 
ⵉⵔⵢⴰⵣⴻⵏ ⵏ ⵏⵉⵏⵡⴰ ⴰⴷ ⴷⴷ-ⴽⴽⴰⵔⴻⵏ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ ⴰⴽ-ⴷ ⵊⵊⵉⵍ-ⴰ, ⴰⴷ ⵜ ⵃⴰⵙⴱⴻⵏ, ⵎⵉⵏⵣⵉ ⵏⵉⵜⵏⵉ ⵜⵓⴱⴻⵏ ⵙ ⵜⴱⴰⵔⵔⴻⵃⵜ ⵏ ⵢⵓⵏⵓⵙ, ⵓⵛⴰ ⵅⵣⴰⵔⴻⵎ, ⴰⵇⴰ ⴷⴰ ⵡⴻⵏⵏⵉ ⵉⴵⴰⵏ ⴷ ⴰⵎⴻⵇⵇⵔⴰⵏ ⵅ ⵢⵓⵏⵓⵙ! 
ⵜⴰⵊⴻⴵⵉⴷⵜ ⵏ ⵍⵊⴰⵏⵓⴱ ⴰⴷ ⵜⴻⴽⴽⴰⵔ ⴷⴻⴳ ⵡⴰⵙⵙ ⵏ ⵍⵃⵉⵙⴰⴱ ⴰⴽ-ⴷ ⵊⵊⵉⵍ-ⴰ, ⴰⴷ ⵅⴰⵙ ⵜⴻⵃⴽⴻⵎ ⵎⵉⵏⵣⵉ ⵏⴻⵜⵜⴰⵜ ⵜⵓⵙⴰ-ⴷⴷ ⵣⴻⴳ ⵓⵏⴻⴳⴳⴰⵔⵓ ⵏ ⴷⴷⵓⵏⴻⵛⵜ, ⵃⵉⵎⴰ ⴰⴷ ⵜⵙⴻⵍ ⵉ ⵜⵉⵖⵉⵜ ⵏ ⵙⵓⵍⵉⵎⴰⵏ, ⵓⵛⴰ ⵅⵣⴰⵔⴻⵎ, ⴰⵇⴰ ⴷⴰ ⵡⴻⵏⵏⵉ ⵉⴵⴰⵏ ⴷ ⴰⵎⴻⵇⵇⵔⴰⵏ ⵅ ⵙⵓⵍⵉⵎⴰⵏ!” 
“ⴰⵍⴰⵎⵉ ⵉⴼⴼⴻⵖ ⵍⴰⵔⵢⴰⵃ ⴰⵎⴻⵏⴳⵓⵙ ⵣⵉ ⴱⵏⴰⴷⴻⵎ, ⵉⴱⴷⴰ ⵉⵜⵜⵙⴰⵔⴰ ⴷⴻⴳ ⵉⵎⵓⵛⴰⵏ ⵡⴰⵔ ⴷⴰⵢⵙⴻⵏ ⴱⵓ ⵡⴰⵎⴰⵏ, ⵢⴰⵔⴻⵣⵣⵓ ⴰⵔⵔⴰⵃⴻⵜ, ⵡⴰⵔ ⵜⵜ ⵉⵜⵜⵉⴼ. 
ⵍⴻⵅⴷⴻⵏⵏⵉ ⴰⴷ ⵢⵉⵏⵉ: ‘ⴰⴷ ⴷⴻⵡⵍⴻⵖ ⵖⴰⵔ ⵜⴰⴷⴷⴰⵔⵜ ⵉⵏⵓ ⵎⴰⵏⵉⵙ ⴷⴷ-ⴼⴼⵖⴻⵖ!’ ⵓⵛⴰ ⵉⵔⵓⵃ, ⵢⵓⴼⴰ ⵉ-ⵜⵜ ⵜⴻⵅⵡⴰ, ⵜⴼⴰⵔⴹ, ⵜⵙⴻⵜⵜⴻⴼ. 
ⵍⴻⵅⴷⴻⵏⵏⵉ ⵢⵓⵢⵓⵔ ⵓⵛⴰ ⵢⵉⵡⵉ ⴰⴽⵉⴷⴻⵙ ⵙⴻⴱⵄⴰ ⵏ ⵍⴰⵔⵢⴰⵃ ⵏⵏⴻⵖⵏⵉ, ⴷ ⵉⵄⴻⴼⴼⴰⵏⴻⵏ ⴽⵜⴰⵔ ⵣⵣⴰⵢⴻⵙ, ⴰⴷ ⴷⴷ-ⴰⴷⴼⴻⵏ, ⴰⴷ ⵔⴰⵃⴻⵏ ⴰⴷ ⵣⴻⴷⵖⴻⵏ ⴷⴰⵢⴻⵙ, ⵓⵛⴰ ⴰⵏⴻⴳⴳⴰⵔⵓ ⵏ ⴱⵏⴰⴷⴻⵎ ⵏⵏⵉ ⴰⴷ ⵉⴷⵡⴻⵍ ⵎⴰⵀⵓ ⵅ ⵓⵎⴻⵣⵡⴰⵔⵓ. ⴰⵎⵎⵓ ⵉ ⵖⴰ ⵢⵉⵍⵉ ⵄⴰⵡⴻⴷ ⴰⴽ-ⴷ ⵊⵊⵉⵍ-ⴰ ⴰⵄⴻⴼⴼⴰⵏ.” 
ⵍⴰⵎⵉ ⵜⵓⵖⴰ ⵄⴰⴷ ⵉⵙⵙⴰⵡⴰⵍ ⴰⴽ-ⴷ ⵍⵖⴰⵛⵉ, ⵅⵣⴰⵔ, ⵢⴻⵎⵎⴰⵙ ⴷ ⴰⵢⵜⵎⴰⵙ ⴱⴻⴷⴷⴻⵏ ⴱⴰⵔⵔⴰ, ⴰⵔⴻⵣⵣⵓⵏ ⴰⴷ ⴽⵉⴷⴻⵙ ⵙⵙⵉⵡⵍⴻⵏ. 
ⵉⵏⵏⴰ ⴰⵙ ⵉⵊⵊⴻⵏ: “ⵅⵣⴰⵔ, ⵢⴻⵎⵎⴰⵛ ⴷ ⴰⵢⵜⵎⴰⵛ ⴱⴻⴷⴷⴻⵏ ⴷⵉ ⴱⴰⵔⵔⴰ, ⴰⵔⴻⵣⵣⵓⵏ ⴰⴷ ⴽⵉⴷⴻⴽ ⵙⵙⵉⵡⵍⴻⵏ.” 
ⵎⴰⵛⴰ ⵏⴻⵜⵜⴰ ⵢⴰⵔⵔⴰ-ⴷⴷ ⵅ ⵡⴻⵏⵏⵉ ⵜⵓⵖⴰ ⴷ ⴰⵙ ⵜ ⵉⵏⵏⴰⵏ, ⵉⵏⵏⴰ: “ⵎⵉⵏ ⵜⴻⵄⵏⴰ ⵢⴻⵎⵎⴰ ⴷ ⵎⵉⵏ ⵄⵏⴰⵏ ⴰⵢⵜⵎⴰ?” 
ⵅⴰⵙ ⵓⵛⴰ ⵉⵙⵙⵡⵉⵥⵥⴻⴹ ⵙ ⵓⴼⵓⵙ ⵏⵏⴻⵙ ⵖⴰⵔ ⵉⵎⴻⵃⴹⴰⵔⴻⵏ ⵏⵏⴻⵙ, ⵉⵏⵏⴰ: “ⵅⵣⴰⵔ, ⵢⴻⵎⵎⴰ, ⵅⵣⴰⵔ, ⴰⵢⵜⵎⴰ! 
ⵎⵉⵏⵣⵉ ⵎⴰⵏ ⵡⴻⵏ ⵉⵜⵜⴻⴳⴳⴻⵏ ⵎⵉⵏ ⵉⵅⵙ ⴱⴰⴱⴰ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ, ⴰⵇⴰ ⵏⴻⵜⵜⴰ ⴷ ⵓⵎⴰ ⴷ ⵓⵍⵜⵎⴰ ⴷ ⵢⴻⵎⵎⴰ.” 
