﻿ⵏⴰⵃⵓⵎ.
1.
ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵅ ⵏⵉⵏⵡⴰ. ⴰⴷⵍⵉⵙ ⵏ ⵍⴻⵡⵃⵉⵢ ⵏ ⵏⴰⵃⵓⵎ, ⴰⵍⵇⵓⵛⵉ. 
ⴰⵍⵉⴼ. - ⴰⵔⴻⴱⴱⵉ ⵉⵜⵜⴰⵙⵎⴻⵏ ⵓ ⵙⵉⴷⵉ ⵉⵏⵜⴰⵇⴰⵎ, ⵙⵉⴷⵉ ⴷ ⴰⵏⴻⵇⵇⴰⵎ ⵓ ⵏⴻⵜⵜⴰ ⴷ ⴱⴰⴱ ⵏ ⵡⴻⵙⵄⴰⵔ. ⵙⵉⴷⵉ ⴷ ⴰⵏⴻⵇⵇⴰⵎ ⵉ ⵍⵄⴻⴷⵢⴰⵏ ⵏⵏⴻⵙ, ⵏⴻⵜⵜⴰ ⵉⴳⴳⴰ ⵍⵄⴻⴷⵢⴰⵏ ⵊⴰⵔ ⵜⵉⵟⵟⴰⵡⵉⵏ ⵏⵏⴻⵙ.    
ⵙⵉⴷⵉ ⵖⴰⵔⴻⵙ ⵜⵜⴰⵙⵉⵄ ⵏ ⵍⵅⴰⴹⴰⵔ ⵓ ⵊⵊⴻⵀⴷ ⵏⵏⴻⵙ ⵉⵎⵖⴰⵔ ⵓ ⵏⴻⵜⵜⴰ ⵡⴰⵔ ⵉⵜⵜⴱⴰⵔⵔⵉ ⵄⴻⵎⵎⴰⵔⵚ ⵡⴻⵏⵏⵉ ⵉⵜⵜⴻⴳⴳⴻⵏ ⴷⴷⴻⵏⴱ. ⴱⵉⵜ. ⴰⴱⵔⵉⴷ ⵏ ⵙⵉⴷⵉ ⴷⵉ ⵜⵃⴰⵔⵢⴰⴹⵜ ⵓ ⴷⴻⴳ ⵓⵙⴻⵎⵎⵉⴹ, ⵉⵙⴻⵢⵏⵓⵜⴻⵏ ⴰⵇⴰ ⴰⵜⴻⵏ ⴷ ⵜⴰⵄⴻⵊⵊⴰⵊⵜ ⵏ ⵉⴹⴰⵔⴻⵏ ⵏⵏⴻⵙ. 
ⴳⵉⵎⴻⵍ. - ⵏⴻⵜⵜⴰ ⵉⵡⴻⴱⴱⴻⵅ ⵍⴻⴱⵃⴰⵔ, ⵉⵜⵜⴰⵔⵔⴰ ⵉ-ⵜ ⵢⵓⵥⴻⵖ, ⵎⴰⵔⵔⴰ ⵉⵖⴻⵣⵔⴰⵏ ⵉⵜⵜⴻⵊⵊⴰ ⵉ-ⵜⴻⵏ ⵜⵜⴰⵥⵖⴻⵏ. ⴷⴰⵍⵉⵜ. ⴱⴰⵛⴰⵏ ⴷ ⴽⴰⵔⵎⴰⵍ ⵙⵍⴰⵡⴻⵏ, ⵓⵍⴰ ⴷ ⵏⵏⵓⵡⴰⵔ ⵏ ⵍⵓⴱⵏⴰⵏ ⵉⵙⵍⴰⵡ. 
ⵀⵉ. - ⵉⴷⵓⵔⴰⵔ ⵜⵜⴰⵔⵊⵉⵊⵉⵏ ⵣⵣⴰⵢⴻⵙ, ⵓ ⵜⵉⵡⵔⵉⵔⵉⵏ ⴼⴻⵙⵙⵢⴻⵏⵜ, ⵡⴰⵡ. ⵓ ⵜⴰⵎⵎⵓⵔⵜ ⵜᵉⵜⵜⵡⴰⵙⵙⴳⴻⵄⵄⴻⴷ-ⴷⴷ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⵓⵍⴰ ⴷ ⵎⴰⵔⵔⴰ ⵡⵉ ⵅⴰⵙ ⵉⵣⴻⴷⴷⵖⴻⵏ! 
ⵣⴰⵢⵉⵏ. - ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵣⵣⴰⵜ ⵉ ⵡⴻⵙⵅⴻⴹ ⵏⵏⴻⵙ, ⵓ ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⴽⴽⴰⵔ ⵣⵣⴰⵜ ⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ? ⵅⵉⵜ. ⴰⵙⵄⴰⵔ ⵏⵏⴻⵙ ⵉⵜⵜⵡⴰⴽⴻⴱⴱ-ⴷⴷ ⴰⵎ ⵜⵎⴻⵙⵙⵉ ⵓ ⵜⵉⵚⵓⴹⴰⵔ ⵜⵜⵡⴰⵇⴻⴵⵄⴻⵏⵜ-ⵉ-ⴷⴷ ⵣⵣⴰⵢⴻⵙ. 
ⵜⵉⵜ. - ⵉⵛⵏⴰ ⵙⵉⴷⵉ ⵉ ⴷⴷⵓⵔⵔⵉ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ. ⵢⵓⴷ. ⵏⴻⵜⵜⴰ ⵉⵙⵙⴻⵏ ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵢⴰⵔⴻⴽⴽⵡⴰⵍⴻⵏ. 
ⴽⴰⴼ. - ⵙ ⵢⵉⵛⵜ ⵏ ⵍⵃⴻⵎⵍⴻⵜ ⵉⴼⴻⵢⵢⴹⴻⵏ ⴰⴷ ⵢⵓⵇⴰ ⴰⵎⵛⴰⵏ ⵏⵏⴻⵙ ⵓ ⵍⵄⴻⴷⵢⴰⵏ ⵏⵏⴻⵙ ⴰⴷ ⵜⴻⵏ ⵉⴹⴼⴰⵔ, ⴰⵍ ⵖⴰ ⵢⴰⴷⴼⴻⵏ ⵖⴰⵔ ⵜⴰⴵⴻⵙⵜ. 
ⵎⵉⵎ. - ⵎⵉⵏ ⵜⵅⴰⵔⵔⵚⴻⵎ ⵅⴻⵏⵏⵉ ⵅ ⵙⵉⴷⵉ? ⵏⴻⵜⵜⴰ ⴰⴷ ⵜ ⵉⵇⴹⴰ ⵇⴰⵄ. ⴰⵖⵓⴼⵉ ⵡⴰⵔ ⴷⴷ-ⵉⵜⵜⵉⵙ ⵎⴰⵔⵜⴰⵢⴻⵏ. 
ⴰⵇⴰ ⵏⵉⵜⵏⵉ ⵜⵜⵡⴰⵎⵓⴷⴻⵏ ⵄⴰⴷ ⴰⵎ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ, ⵓ ⵖⴻⵍⵍⴰⵏ ⴰⵎ ⵢⵉⵎⴻⵙⵛⴰⵔⴻⵏ, ⴰⵎⵎⵓ ⵉ ⵖⴰ ⵜⵜⵡⴰⵛⵛⴻⵏ ⵏⵉⵜⵏⵉ ⵇⴰⵄ ⴰⵎ ⵓⵍⵓⵎ ⵢⵓⵥⵖⴻⵏ. 
ⵣⵣⴰⵢⴻⴽ ⵉ ⴷⴷ-ⵉⴼⴼⴻⵖ ⵡⴻⵏⵏⵉ ⵉⵜⵜⵅⴰⵔⵔⵚⴻⵏ ⴷⵉ ⵎⵉⵏ ⵡⴰⵔ ⵉⵃⵍⵉⵏ ⵅ ⵙⵉⴷⵉ, ⴰⵎⵛⴰⵡⴰⵔ ⵉ ⵡⴰⵔ ⵉⵙⴻⴽⴽⵡⵉⵏ ⵡⴰⵍⵓ. 
ⴰⵎⵎⵓ ⵉⵙⵙⴰⵡⴰⵍ ⵙⵉⴷⵉ: ⵡⴰⵅⵅⴰ ⵏⵉⵜⵏⵉ ⵜⵜⴼⴻⵍⵃⴻⵏ ⵓ ⴵⴰⵏ ⴷⴻⴳ ⵡⴰⵟⵟⴰⵙ, ⵡⴰⵅⵅⴰ ⴰⵎⴻⵏⵏⵉ ⵏⵉⵜⵏⵉ ⴰⴷ ⵜⵜⵡⴰⵇⴻⵙⵙⴻⵏ ⵓ ⵏⴻⵜⵜⴰ ⴰⴷ ⵉⵄⴷⵓ. ⵡⴰⵅⵅⴰ ⵏⴻⵛⵛ ⴳⴳⵉⵖ ⵅⴰⴽ ⴰⵖⵉⵍ, ⵎⴰⵛⴰ ⵏⴻⵛⵛ ⵡⴰⵔ ⵅⴰⴽ ⵜⵜⴻⴳⴳⴻⵖ ⴰⵖⵉⵍ ⵄⴰⴷ. 
ⵍⴻⵅⵅⵓ ⴰⴷ ⴰⵔⵥⴻⵖ ⴰⵣⴰⵢⵍⵓ ⵏⵏⴻⵙ ⵉ ⵅⴰⴽ ⵉⵎⵎⴰⵔⵙⴻⵏ, ⵓ ⵏⴻⵛⵛ ⴰⴷ ⵛⴰⵔⵔⴳⴻⵖ ⵜⵉⵙⵖⵓⵏⵉⵏ ⵏⵏⴻⵛ. 
ⵙⵉⴷⵉ ⵉⵡⴻⵚⵚⴰ ⵅⴰⴽ, ⴰⵇⴰ ⵡⴰⵔ ⵣⵣⴰⵢⴻⴽ ⵉⵜⵜⵉⵍⵉ ⵄⴰⴷ ⵃⴻⴷ ⵙ ⵢⵉⵙⴻⵎ ⵏⵏⴻⵛ. ⵏⴻⵛⵛ ⴰⴷ ⵇⴻⴹⵄⴻⵖ ⵍⴻⵅⵢⴰⵍⴰⵜ ⵉⵏⴻⵇⵛⴻⵏ ⴷ ⵍⴻⵅⵢⴰⵍⴰⵜ ⵉⴼⴻⵙⵢⴻⵏ ⵣⵉ ⵜⴰⴷⴷⴰⵔⵜ ⵏⵏⴻⵛ. ⵏⴻⵛⵛ ⴰⴷ ⴳⴳⴻⵖ ⴰⵏⴹⴻⵍ ⵏⵏⴻⵛ, ⵎⴰⵖⴰⵔ ⵓⴼⵉⵖ ⵛⴻⴽ ⵜⴻⴼⵙⵓⵙⴻⴷ. 
