﻿ⵎⵉⵅⴰ.
5.
“ⵓ ⵛⴻⴽ, ⴱⴰⵢⵜ-ⵍⴰⵃⵎ ⵉⴼⵔⴰⵜⴰ, ⵡⴰⵅⵅⴰ ⵛⴻⴽ ⴷ ⴰⵎⴻⵥⵢⴰⵏ ⴰⵍⴰⵎⵉ ⵡⴰⵔ ⵜⵣⴻⵎⵎⴰⵔⴻⴷ ⴰⴷ ⵜⵉⵍⵉⴷ ⵊⴰⵔ ⵍⵓⵍⵓⴼ ⵏ ⵢⴰⵀⵓⴷⴰ, ⴰⵇⴰ ⵣⵣⴰⵢⴻⴽ ⵉ ⴷⴷ ⵖⴰ ⵉⴼⴼⴻⵖ ⵏⴻⵜⵜⴰ ⵉ ⵏⴻⵛⵛ, ⵎⴰⵃⴻⵏⴷ ⴰⴷ ⵢⵉⵍⵉ ⴷ ⵍⵃⴰⴽⴻⵎ ⵅ ⵉⵙⵔⴰⵉⵍ. ⴰⴱⴰⵏⵉ ⵏⵏⴻⵙ ⴰⵇⴰ-ⵜ ⵣⵉ ⵎⴻⵛⵃⴰⵍ ⵓⵢⴰ, ⵣⴻⴳ ⵡⵓⵙⵙⴰⵏ ⵏ ⵍⴻⴱⴷⴰ. 
ⵙ ⵓⵢⴰ ⵏⴻⵜⵜⴰ ⴰⴷ ⵜⴻⵏ ⵉⵙⴻⵍⵍⴻⵎ ⴰⵍ ⵍⵡⴻⵇⵜ ⵏⵏⵉ, ⴰⵇⴰ ⵜⴻⵏⵏⵉ ⵉ ⵖⴰ ⵢⴰⵔⵡⴻⵏ, ⴰⵇⴰ ⵜⵓⵔⵓⵡ-ⴷⴷ. ⵅⴻⵏⵏⵉ ⴰⴷ ⴷⴷ-ⵉⴷⵡⴻⵍ ⵍⴱⴰⵇⵉ ⵏ ⵢⴰⵢⵜⵎⴰⵙ, ⵊⵎⵉⵄ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ. 
ⵏⴻⵜⵜⴰ ⴰⴷ ⵉⴱⴻⴷⴷ ⴷⵉⵏⵏⵉ ⵓⵛⴰ ⴰⴷ ⵢⴰⵔⵡⴻⵙ ⴷⵉ ⵊⵊⴻⵀⴷ ⵏ ⵙⵉⴷⵉ, ⴷⵉ ⵍⵓⵄⵍⴰ ⵏ ⵢⵉⵙⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ. ⵏⵉⵜⵏⵉ ⴰⴷ ⵣⴻⴷⵖⴻⵏ ⴷⵉⵏⵏⵉ, ⵎⴰⵖⴰⵔ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⴻⵇⵇⵔⴰⵏ ⴰⵍ ⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ. 
ⵡⴰⵏⵉⵜⴰ ⴰⴷ ⵢⵉⵍⵉ ⴷ ⵍⴻⵀⵏⴰ.” “ⵅⵎⵉ ⴷⴷ ⵖⴰ ⵢⴰⵙ ⴰⵛⵛⵓⵔ ⵖⴰⵔ ⵜⴻⵎⵎⵓⵔⵜ ⵏⵏⴻⵖ, ⵓ ⵅⵎⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⵍⴻⵇⵚⵓⵔ ⵏⵏⴻⵖ, ⵅⴻⵏⵏⵉ ⴰⴷ ⴰⵙ ⵏⴻⵙⵙⴻⵍⵇⴰ ⵙⴻⴱⵄⴰ ⵏ ⵉⵎⴻⴽⵙⴰⵡⴻⵏ ⴷ ⵜⵎⴻⵏⵢⴰ ⵏ ⴰⵢⵜ ⵏ ⵊⵊⴻⵀⴷ ⵣⵉ ⵎⵉⴷⴷⴻⵏ. 
ⵏⵉⵜⵏⵉ ⴰⴷ ⵃⴹⴰⵏ ⵅ ⵜⴻⵎⵎⵓⵔⵜ ⵏ ⴰⵛⵛⵓⵔ ⵙ ⵙⵙⵉⴼ ⵓ ⵜⴰⵎⵎⵓⵔⵜ ⵏ ⵏⵉⵎⵔⵓⴷ ⴷⵉ ⵜⴻⵡⵡⵓⵔⴰ ⵏⵏⴻⵙ. ⴰⵎⵎⵓ ⵏⴻⵜⵜⴰ ⴰⴷ ⴰⵏⴻⵖ ⵉⵙⵙⴻⵏⵊⴻⵎ ⵣⴻⴳ ⵓⴼⵓⵙ ⵏ ⴰⵛⵛⵓⵔ, ⵅⵎⵉ ⴷⴷ ⵖⴰ ⵢⴰⵙ ⵡⴰⵏⵉⵜⴰ ⵖⴰⵔ ⵜⴻⵎⵎⵓⵔⵜ ⵏⵏⴻⵖ ⵓ ⵅⵎⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵏⴻⵖ.” 
“ⵍⴱⴰⵇⵉ ⵏ ⵢⴰⵄⵇⵓⴱ ⴰⴷ ⵢⵉⵍⵉ ⴷⵉ ⵍⵡⴻⵙⵟ ⵏ ⵍⴻⴳⵏⵓⵙ ⴰⵎⴻⵛⵏⴰⵡ ⵏⵏⴷⴰ ⵏ ⵙⵉⴷⵉ, ⴰⵎⴻⵛⵏⴰⵡ ⵜⵉⴷⴷⵓⵎⵉⵏ ⵅ ⵡⴻⴼⵙⵓ ⴰⵣⵉⵣⴰ, ⵡⴻⵏⵏⵉ ⵡⴰⵔ ⵉⵅⴻⵣⵣⴰⵔⴻⵏ ⵖⴰⵔ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⵓ ⵡⴰⵔ ⵉⵜⵜⵔⵉⵊⵉⵏ ⵜⴰⵔⵡⴰ ⵏ ⴱⵏⴰⴷⴻⵎ. 
ⵍⴱⴰⵇⵉ ⵏ ⵢⴰⵄⵇⵓⴱ ⴰⴷ ⵢⵉⵍⵉ ⵊⴰⵔ ⵍⴻⴳⵏⵓⵙ, ⴷⵉ ⵍⵡⴻⵙⵟ ⵏ ⵍⴻⴳⵏⵓⵙ, ⴰⵎⴻⵛⵏⴰⵡ ⴰⵢⵔⴰⴷ ⵊⴰⵔ ⵍⵎⴰⵍ ⵏ ⵢⴻⵣⵖⴰⵔ, ⴰⵎⴻⵛⵏⴰⵡ ⴰⵢⵔⴰⴷ ⴷ ⴰⵎⴻⵥⵢⴰⵏ ⵊⴰⵔ ⵜⵃⵉⵎⵔⵉⵡⵉⵏ ⵏ ⵡⵓⴵⵉ, ⵡⴻⵏⵏⵉ, ⵅⵎⵉ ⵖⴰ ⵉⵄⴷⵓ, ⵉⵄⴻⴼⴼⴻⵙ ⵓ ⵉⵜⵜⵛⴰⵔⵔⴰⴳ ⵓⵛⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵉ ⵖⴰ ⵉⴼⴻⴽⴽⴻⵏ. 
ⴰⴼⵓⵙ ⵏⵏⴻⵛ ⴰⴷ ⵢⵉⵍⵉ ⵉⵜⵜⵡⴰⵙⵙⴳⴻⵄⵄⴻⴷ ⵙⴻⵏⵏⴻⵊ ⵉ ⵢⵉⵏⵏⵉ ⵉ ⵛⴻⴽ ⵉⵃⴻⵚⵚⴰⵔⴻⵏ, ⵓⵛⴰ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵛ ⴰⴷ ⵜⵜⵡⴰⵎⵃⴰⵏ.” 
“ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵏⵏⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵇⴰ ⵏⴻⵛⵛ ⴰⴷ ⵜⴻⵃⵃⵉⵖ ⵉⵢⵙⴰⵏ ⵏⵏⴻⵛ ⵣⵉ ⵍⵡⴻⵙⵟ ⵏⵏⴻⵛ ⵓ ⴰⴷ ⵙⵙⵀⴻⵍⵍⴽⴻⵖ ⵉⴽⴰⵔⵔⵓⵜⴻⵏ ⵏⵏⴻⵛ. 
ⴰⴷ ⵎⵃⵉⵖ ⵜⵉⵏⴻⴷⴷⴰⵎ ⵣⵉ ⵜⴻⵎⵎⵓⵔⵜ ⵏⵏⴻⵛ, ⴰⴷ ⵀⴻⴷⵎⴻⵖ ⵎⴰⵔⵔⴰ ⵍⵇⴻⵍⵄⴰⵜ ⵏⵏⴻⵛ. 
ⵏⴻⵛⵛ ⴰⴷ ⵇⴻⴹⵄⴻⵖ ⵜⴰⵙⴻⵃⵃⴰⵔⵜ ⵏⵏⴻⵛ ⵣⴻⴳ ⵓⴼⵓⵙ ⵏⵏⴻⵎ ⵓ ⵡⴰⵔ ⵖⴰⵔⴻⴽ ⵜⵜⵉⵍⵉⵏ ⵄⴰⴷ ⵉⴱⴻⵣⴳⴰⵡⴻⵏ. 
ⵍⴻⵅⵢⴰⵍⴰⵜ ⵏⵏⴻⵎ ⵉⵏⴻⵇⵛⴻⵏ ⴷ ⵉⵎⴰⵢⴹⵓⵜⴻⵏ ⵏⵏⴻⵛ ⵉⵇⴻⴷⴷⵙⴻⵏ ⴰⴷ ⵜⴻⵏ ⵎⵃⵉⵖ ⵣⵉ ⵍⵡⴻⵙⵜ ⵏⵏⴻⵛ, ⵃⵉⵎⴰ ⵡⴰⵔ ⵜᵉⵜⵜⴱⴻⵏⴷⴰⵇⴻⴷ ⵄⴰⴷ ⵉ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ. 
ⵓ ⵜⵉⵔⴻⴱⴱⵉⵏ ⵏⵏⴻⵛ ⵏ ⵛⵡⴰⵔⵜⵉ ⴰⴷ ⵜⴻⵏⵜ ⵜⴻⵃⵃⵉⵖ ⵣⵉ ⵍⵡⴻⵙⵟ ⵏⵏⴻⵛ. ⵎⴰⵛⴰ ⴰⴷ ⵀⴻⴷⵎⴻⵖ ⵍⵄⴻⴷⵢⴰⵏ ⵏⵏⴻⵛ 
ⵓⵛⴰ ⴰⴷ ⵏⵜⴰⵇⵎⴻⵖ ⵙ ⵡⴻⵖⴹⴰⴱ ⵓ ⵙ ⵡⴻⵙⵄⴰⵔ ⵅ ⵍⴻⴳⵏⵓⵙ ⵏⵏⵉ ⵡⴰⵔ ⵉⵜⵜⴻⵅⵙⴻⵏ ⴰⴷ ⵙⵍⴻⵏ.” 
