﻿ⵎⵉⵅⴰ.
2.
“ⵓⵛⵜ ⵅ ⵢⵉⵏⵏⵉ ⵉⵜⵜⵅⴻⵎⵎⴰⵎⴻⵏ ⴷⵉ ⵍⵎⵓⵄⵚⵉⵢⵢⴻⵜ ⵓ ⵅ ⵢⵉⵏⵏⵉ ⵉⵜⵜⵅⴻⵎⵎⴰⵎⴻⵏ ⴷⵉ ⵍⵖⴰⵔ ⴷⵉ ⵇⴰⵎⴰⵜ ⵏⵙⴻⵏ. ⵖⴰⵔ ⵜⵓⴼⴼⵓⵜ ⴰⴷ ⵜ ⴳⴳⴻⵏ, ⵎⴰⵖⴰⵔ ⴰⴼⵓⵙ ⵏⵙⴻⵏ ⴷⴰⵢⴻⵙ ⴰⵟⵟⴰⵙ ⵏ ⵜⵣⴻⵎⵎⴰⵔ. 
ⵏⵉⵜⵏⵉ ⵎⵎⴻⵥⵍⴻⵏ ⴷⴻⴳ ⵉⵢⵢⴰⵔⴻⵏ ⵓⵛⴰ ⵜⵜⴽⴻⵛⵛⴹⴻⵏ ⵜⴻⵏ ⵄⴰⵡⴻⴷ, ⵓⵍⴰ ⴷ ⵜⵓⴷⵔⵉⵏ, ⵓⵛⴰ ⵜⵜᵉⵟⵟⴼⴻⵏ ⵜⴻⵏⵜ. ⴰⵎⵎⵓ ⵉ ⴳⴳⵉⵏ ⵏⵉⵜⵏⵉ ⵙ ⵍⴻⵅⵛⵓⵏⴻⵜ ⵉ ⵡⴻⵔⵢⴰⵣ ⵓ ⵉ ⵜⴰⴷⴷⴰⵔⵜ ⵏⵏⴻⵙ, ⵡⴰⵀ, ⵉ ⴽⵓⵍ ⴰⵔⵢⴰⵣ ⵓ ⵉ ⵜⴻⵙⵖⴰⵔⵜ ⵏⵏⴻⵙ.” 
“ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵅⵣⴰⵔ, ⵏⴻⵛⵛ ⵜⵡⴻⵏⵏⵉⵖ ⵉⵊⵊ ⵏ ⵍⵖⴰⵔ ⵅ ⵍⴰⴵ-ⴰ, ⵉ ⵣⵉ ⵡⴰⵔ ⵜⵣⴻⵎⵎⴰⵔⴻⵎ ⴰⴷ ⵜⵊⴻⴱⴷⴻⵎ ⵉⵔⴰⵡⴻⵏ ⵏⵡⴻⵎ, ⵓ ⵉ ⵣⵉ ⵡⴰⵔ ⵜⵣⴻⵎⵎⴰⵔⴻⵏ ⴰⴷ ⵜⵓⵢⵓⵔⴻⵎ ⵄⴰⴷ ⵙ ⵓⵄⴻⴼⴼⴰⵔ, ⵎⴰⵖⴰⵔ ⴰⴷ ⵜⵉⵍⵉ ⴷ ⵉⵛⵜ ⵏ ⵍⵡⴻⵇⵜ ⵜⴰⵄⴻⴼⴼⴰⵏⵜ. 
ⴷⴻⴳ ⵡⴰⵙⵙ ⵏⵏⵉ ⴰⴷ ⵅⴰⵡⴻⵎ ⵙⵙⴳⴻⵄⵄⴷⴻⵏ ⵉⵊⵊ ⵏ ⵍⵎⴰⵜⴰⵍ ⵓ ⴰⴷ ⵖⴻⵏⵏⵊⴻⵏ ⵉⵊⵊ ⵏ ⵢⴻⵥⵔⵉ ⵏ ⵡⴻⵛⴹⴰⵏ ⴰⵎ ⵜⵜⵛⴻⵜⵛⴰⵏ, ⵓ ⴰⴷ ⵉⵏⵉⵏ: ⵏⴻⵛⵛⵉⵏ ⵏⴻⵜⵜⵡⴰⵔⴻⴷⴷⴻⴵ ⵇⴰⵄ! ⵏⴻⵜⵜⴰ ⵢⴰⵔⵔⴰ ⵜⴰⵙⵖⴰⵔⵜ ⵏ ⵍⴳⴻⵏⵙ ⵉⵏⵓ ⵖⴰⵔ ⵡⴻⵏⵏⴻⵖⵏⵉ. ⵎⴰⵎⵎⴻⵛ ⵜⵜ ⵉⴽⵙⵉ ⵣⵣⴰⵢⵉ? ⵏⴻⵜⵜⴰ ⵉⵡⵛⴰ ⵉⵢⵢⴰⵔⴻⵏ ⵏⵏⴻⵖ ⵉ ⵡⴻⵏⵏⵉ ⴷⴷ-ⵉⴼⴼⵖⴻⵏ ⵣⴻⴳ ⵡⴻⴱⵔⵉⴷ! 
ⵙ ⵓⵢⴰ ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⵓⵍⴰ ⴷ ⵉⵊⵊⴻⵏ ⵡⴻⵏⵏⵉ ⵉ ⵖⴰ ⵉⵏⴹⴰⵔⴻⵏ ⴰⴼⵉⵍⵓ ⵏ ⵍⴻⵇⵢⴰⵙ ⵄⵍⴰⵃⵙⴰⴱ ⵜⴰⵇⴻⴷⴷⵓⵃⵜ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⵏ ⵙⵉⴷⵉ.” 
“‘ⵡⴰⵔ ⵙⵙⵓⴼⴼⵓⵖⴻⵎ ⴰⵡⴰⵍ ⴰⵎⵎⵓ ⵙ ⵓⴽⵓⴼⴼⵓ!’, ⴰⵎⵎⵓ ⵉ ⵙⵙⴰⵡⴰⵍⴻⵏ ⵏⵉⵜⵏⵉ ⴰⵎ ⵙⵙⵓⴼⴼⵓⵖⴻⵏ ⴽⵓⴼⴼⵓ. ‘ⵅ ⵎⴰⵏ ⴰⵢⴰ ⵡⴰⵔ ⵣⴻⵎⵎⴰⵔⴻⵏ ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⴰⵡⴰⵍ ⵙ ⵓⴽⵓⴼⴼⵓ!’ ⴰⵎⵎⵓ ⵉ ⵖⴰ ⵜⵉⵍⵉ ⵍⴻⴼⴹⵉⵃⴻⵜ ⵡⴰⵔ ⵜᵉⵜⵜⵡⴰⴽⴽⴻⵙⵙ! 
ⴰ ⴽⴻⵏⵏⵉⵡ, ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⵎⴰ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵏⵏⴰ ⴰⵢⴰ? ‘ⵎⴰ ⵉⵊⵊⴰ ⵛⴰ ⴰⵔⵔⵓⵃ ⵏ ⵙⵉⴷⵉ ⵡⴰⵔ ⵜ ⵉⴳⴳⵉ?’ ⵏⵉⵖ: ‘ⵎⴰ ⵜⵉⵏⴰ ⴷ ⵜⵉⵎⴻⴳⴳⴰ ⵏⵏⴻⵙ?’ ⵎⴰ ⵡⴰⵔ ⵜⵜⴻⴳⴳⴻⵏ ⵡⴰⵡⴰⵍⴻⵏ ⵉⵏⵓ ⵍⵅⴰⵔ ⵉ ⵢⵉⵏⵏⵉ ⵉⴳⴳⵓⵔⴻⵏ ⵙ ⵜⵙⴻⴳⴷⴰ? 
ⵎⴰⵛⴰ ⵄⴰⴷ ⵉⴷⴻⵏⵏⴰⴹ ⵉⴽⴽⴰⵔ ⵍⴳⴻⵏⵙ ⵉⵏⵓ ⴰⵎ ⵢⵉⵊⵊ ⵏ ⵍⴻⵄⴷⵓ. ⵜⵇⴻⵍⵄⴻⵎ ⴰⵔⵔⵓⴹ ⴷ ⵓⴱⴰⵔⵜⴻⵙⵙⵓ ⵣⴻⴳ ⵉⵎⵙⴻⴱⵔⵉⴷⴻⵏ ⵉⵇⴻⴼⵍⴻⵏ ⵉ ⵡⴰⵔ ⵜⵜ ⵉⵜⵜⵔⵉⵊⵉⵏ, ⵉⵏⵏⵉ ⵉⵜⵜⵄⵉⴼⴼⴻⵏ ⵓⵎⴻⵏⵖⵉ. 
ⴽⴻⵏⵏⵉⵡ ⵜⴻⵙⵙⵓⴼⴼⵓⵖⴻⵎ ⵜⵉⵎⵖⴰⵔⵉⵏ ⵏ ⵍⴳⴻⵏⵙ ⵉⵏⵓ ⵣⵉ ⵜⴰⴷⴷⴰⵔⵜ ⵏⵙⴻⵏⵜ ⵉⵄⵉⵣⵣⴻⵏ. ⵉⵃⴻⵏⵊⵉⵔⴻⵏ ⵏⵏⴻⵙ ⵜⴻⴽⴽⵙⴻⵎ ⴰⵙⴻⵏ ⵜⴰⵍⵡⵉⵣⵜ ⵉⵏⵓ ⵉ ⵍⴻⴱⴷⴰ. 
ⴽⴽⴰⵔⴻⵎ ⵓ ⴰⴳⴳⵯⴻⵊⴻⵎ, ⵎⵉⵏⵣⵉ ⵡⴰ ⵡⴰⵔ ⵉⴵⵉ ⴷ ⴰⵎⵛⴰⵏ ⵏ ⴰⵔⵔⴰⵃⴻⵜ! ⵎⴰⵖⴰⵔ ⴰⵇⴰ ⵜⴰⵎⵎⵓⵔⵜ ⵜᵉⵜⵜⵡⴰⵙⵙⴻⵅⵎⴻⵊ, ⴰⴷ ⵜⴰⵡⵉ ⴰⵔⴻⴷⴷⴻⴵ, ⵡⴰⵀ ⵉⵊⵊ ⵏ ⵏⵏⵄⵉ ⵏ ⵓⵔⴻⴷⴷⴻⴵ. 
ⵎⴰⵍⴰ ⵛⴰ ⵏ ⵉⵊⵊ ⵉⴹⴻⴼⴼⴰⵔ ⴰⵙⴻⵎⵎⵉⴹ, ⵉⵇⵇⴰⵔ ⵉⵅⴰⵔⵔⵉⵇⴻⵏ, ⵓⵛⴰ ⵉⵇⵇⴰⵔ: ‘ⵏⴻⵛⵛ ⴰⴷ ⴰⵛ ⵙⵙⵓⴼⴼⵖⴻⵖ ⴰⵡⴰⵍⴻⵏ ⵙ ⵓⴽⵓⴼⴼⵓ ⴷⵉ ⵟⵟⵡⴻⵄ ⵏ ⴱⵉⵏⵓ ⴷ ⵛⵛⵔⴰⴱ!’ ⴰⵇⴰ ⵏⴻⵜⵜⴰ ⵉⴳⴳⴰ ⴰⵅⵎⵉ ⵏⴻⵜⵜⴰ ⴷ ⴰⵏⴰⴱⵉ ⵏ ⵍⴳⴻⵏⵙ ⵏⵏⵉ ⵉⵙⵙⵓⴼⴼⵓⵖⴻⵏ ⴰⵡⴰⵍⴻⵏ ⵙ ⵓⴽⵓⴼⴼⵓ.” 
“ⵙ ⵜⵉⴷⴻⵜⵜ, ⴰ ⵢⴰⵄⵇⵓⴱ, ⵏⴻⵛⵛ ⴰⴷ ⵛⴻⴽ ⴽⵙⵉⵖ ⵖⴰⵔⵉ ⵇⴰⵄ, ⵏⵉⵛⴰⵏ ⵏⴻⵛⵛ ⴰⴷ ⵙⵙⵎⵓⵏⴻⵖ ⵎⵉⵏ ⵉⵇⵇⵉⵎⴻⵏ ⵣⵉ ⵉⵙⵔⴰⵉⵍ. ⴰⴷ ⵜⴻⵏ ⵙⵙⵎⵓⵏⴻⵖ ⴰⵎ ⵡⵓⴵⵉ ⵏ ⴱⵓⵚⵔⴰ, ⴰⵎ ⵉⵛⵜ ⵏ ⵜⵃⵉⵎⴰⵔⵜ ⴷⵉ ⵍⵡⴻⵙⵟ ⵏ ⵜⵔⴻⴽⴽⵡⴰⵙⵜ ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵓⵄⵓⵔⵔⵉⵛ ⵏ ⵉⵡⴷⴰⵏ. 
ⴰⵎⴼⴻⴵⴻⵇ ⴰⴷ ⵉⵣⵡⴰⵔ ⵣⵣⴰⵜ ⵉ ⵡⵓⴷⴻⵎ ⵏⵙⴻⵏ, ⵏⵉⵜⵏⵉ ⴰⴷ ⴼⴻⴵⵇⴻⵏ ⵓ ⴰⴷ ⵄⴷⵓⵏ ⵅ ⵜⴻⵡⵡⴰⵔⵜ, ⵓ ⴰⴷ ⵣⵣⴰⵢⴻⵙ ⴷⴷ-ⴼⴼⵖⴻⵏ. ⴰⵊⴻⴵⵉⴷ ⵏⵙⴻⵏ ⴰⴷ ⵉⵣⵡⴰⵔ ⵣⵣⴰⵜ ⵉ ⵓⵖⴻⵎⴱⵓⴱ ⵏⵙⴻⵏ, ⵓ ⵙⵉⴷⵉ ⵖⴰⵔ ⵓⵣⴻⴵⵉⴼ ⵏⵙⴻⵏ.” 
