﻿ⵎⵉⵅⴰ.
1.
ⴰⵡⴰⵍ ⵏ ⵙⵉⴷⵉ ⵉ ⴷⴷ-ⵢⵓⵙⵉⵏ ⵖⴰⵔ ⵎⵉⵅⴰ, ⴰⵎⵓⵔⴰⵛⵜⵉ, ⴷⴻⴳ ⵡⵓⵙⵙⴰⵏ ⵏ ⵢⵓⵜⴰⵎ ⴷ ⴰⵃⴰⵣ ⴷ ⵃⵉⵣⵇⵉⵢⴰ, ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ, ⴰⵡⴰⵍ ⵉ ⵉⵥⵔⴰ ⵅ ⵙⴰⵎⴰⵔⵢⴰ ⴷ ⵓⵔⵛⴰⵍⵉⵎ. 
“ⵙⵍⴻⵎ-ⴷⴷ, ⵎⴰⵔⵔⴰ ⴽⴻⵏⵏⵉⵡ, ⴰ ⵍⴻⴳⵏⵓⵙ, ⵉⵍⵉⵎ ⵜⴼⴻⵜⵏⴻⵎ, ⴰ ⵛⴻⵎ, ⵜⴰⵎⵎⵓⵔⵜ ⴷ ⵓⵄⴻⵎⵎⴰⵔ ⵏⵏⴻⵙ! ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⵢⵉⵍⵉ ⴷ ⴰⵛⴻⵀⵀⴰⴷ ⵅⴰⵡⴻⵎ, ⵙⵉⴷⵉ ⵉⵏⵓ ⵣⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ. 
ⵎⴰⵖⴰⵔ ⵅⵣⴰⵔⴻⵎ, ⵙⵉⴷⵉ ⵉⴼⴼⴻⵖ-ⴷⴷ ⵣⴻⴳ ⵡⴻⵎⵛⴰⵏ ⵏⵏⴻⵙ ⵏ ⵜⵣⴻⴷⴷⵉⵖⵜ, ⵓ ⵏⴻⵜⵜⴰ ⴰⴷ ⴷⴷ-ⵉⵀⵡⴰ ⵓ ⴰⴷ ⵉⵚⵓⵔⴼ ⵅ ⵍⴻⴳⵄⵓⴷⵉ ⵏ ⵜⴻⵎⵎⵓⵔⵜ. 
ⵉⴷⵓⵔⴰⵔ ⴰⴷ ⴼⴻⵙⵢⴻⵏ ⵙⴰⴷⵓ ⵏⵏⴻⵙ, ⵓ ⵜⵉⵖⵣⵓⵔⵉⵏ ⴰⴷ ⵜⵜⵡⴰⴱⴹⴰⵏⵜ, ⴰⵎ ⵛⵛⵎⴻⵄ ⵣⵣⴰⵜ ⵉ ⵡⵓⴷⴻⵎ ⵏ ⵜⵎⴻⵙⵙⵉ, ⴰⵎ ⵡⴰⵎⴰⵏ ⵏⵏⵉ ⴷⴷ-ⵉⵜⵜⵡⴰⴼⴰⵔⵔⵖⴻⵏ ⵣⵉ ⵜⴻⵢⵙⴰⵔⵜ. 
ⴰⵢⴰ ⵎⴰⵔⵔⴰ ⵉⵜⵜⴻⵎⵙⴰⵔ ⵣⵉ ⵙⵙⵉⴱⴱⴻⵜ ⵏ ⵓⵅⴻⵟⵟⵓ ⵏ ⵢⴰⵄⵇⵓⴱ, ⵓ ⵣⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ⵎⵉⵏ ⵉⴵⴰⵏ ⴷ ⵅⴻⵟⵟⵓ ⵏ ⵢⴰⵄⵇⵓⴱ? ⵎⴰ ⵡⴰⵔ ⵉⴵⵉ ⴷ ⵙⴰⵎⴰⵔⵢⴰ? ⵓ ⵎⵉⵏ ⴵⴰⵏ ⴷ ⵍⴻⴳⵄⵓⴷⵉ ⵏ ⵢⴰⵀⵓⴷⴰ? ⵎⴰ ⵡⴰⵔ ⵜⴻⴵⵉ ⴷ ⵓⵔⵛⴰⵍⵉⵎ? 
ⵏⴻⵛⵛ ⴰⴷ ⴰⵔⵔⴻⵖ ⵙⴰⵎⴰⵔⵢⴰ ⴷ ⵍⵅⴰⵔⴱⴻⵜ ⴷⴻⴳ ⵉⵢⵢⴰⵔ, ⴷ ⴰⵎⴰⵔⵊⴻⵄ ⵎⴰⵏⵉ ⵖⴰ ⵥⵥⵓⵏ ⵜⴰⵣⴰⵢⴰⵔⵜ, ⵓ ⵏⴻⵛⵛ ⴰⴷ ⵏⴹⴰⵔⴻⵖ ⵉⵥⵔⴰ ⵏⵏⴻⵙ ⴷⵉ ⵜⴻⵖⵣⵓⵔⵜ, ⵓ ⴰⴷ ⵄⴰⵔⵔⵉⵖ ⵅ ⴷⵙⵓⵙⴰ ⵏⵏⴻⵙ. 
ⵎⴰⵔⵔⴰ ⵍⴻⵅⵢⴰⵍⴰⵜ ⵏⵏⴻⵙ ⵉⵏⴻⵇⵛⴻⵏ ⴰⴷ ⵜⵜⵡⴰⵍⴻⴷⴵⴻⵏⵜ ⵓ ⵎⴰⵔⵔⴰ ⵍⵎⵓⵏⴻⵜ ⵏⵏⴻⵙ ⵏ ⴼⴰⵔⵇ-ⵛⵛⵖⴻⵍ ⴰⴷ ⵜⵜ ⵙⵙⵛⴻⵎⴹⴻⵏ ⵙ ⵜⵎⴻⵙⵙⵉ, ⵓ ⵎⴰⵔⵔⴰ ⵍⴻⵅⵢⴰⵍⴰⵜ ⵏⵏⴻⵙ ⵉⵏⴻⵇⵛⴻⵏ ⴰⴷ ⵜⴻⵏⵜ ⴰⵔⴻⴷⴷⴵⴻⵖ ⵏⴻⵛⵛ, ⵎⴰⵖⴰⵔ ⵏⴻⵜⵜⴰⵜ ⵜⵢⴰⵔⴻⵡ ⵉ-ⵜⴻⵏⵜ ⵣⵉ ⵍⵎⵓⵏⴻⵜ ⵏ ⴼⴰⵔⵇ-ⵛⵛⵖⴻⵍ, ⵓ ⵏⵉⵜⴻⵏⵜⵉ ⴰⴷ ⴷⴷ-ⴷⴻⵡⵍⴻⵏⵜ ⵄⴰⵡⴻⴷ ⴷ ⵍⵎⵓⵏⴻⵜ ⵏ ⴼⴰⵔⵇ-ⵛⵛⵖⴻⵍ.” 
“ⵅ ⵓⵢⴰ ⴰⴷ ⵛⴻⴹⵏⴻⵖ ⵓ ⴰⴷ ⵡⵜⴻⵖ ⴰⴳⴻⵊⴷⵓⵔ, ⴰⴷ ⵓⵢⵓⵔⴻⵖ ⵙ ⵍⴻⵃⴼⴰ ⴷ ⴰⵄⴰⵔⵢⴰⵏ, ⴰⴷ ⵙⵙⵎⵉⵄⵡⴻⵖ ⴰⵎ ⵡⵓⵛⵛⴰⵏⴻⵏ ⵏ ⵍⴻⵅⵍⴰ, ⵓ ⴰⴷ ⵙⵖⵓⵢⴻⵖ ⴰⵎ ⵢⴻⵙⵙⵉⵙ ⵏ ⵏⵏⵄⴰⵎⴻⵜ. 
ⵎⴰⵖⴰⵔ ⵉⵢⴻⵣⵣⵉⵎⴻⵏ ⵏⵏⴻⵙ ⵏⴻⵇⵇⴻⵏ, ⵎⴰⵖⴰⵔ ⴰⵢⴰ ⵢⵓⵙⴰ-ⴷⴷ ⴰⵍ ⵢⴰⵀⵓⴷⴰ, ⵉⵡⴻⵙⵙⴻⵄ ⵍⵃⵓⴽⵎ ⴰⵍ ⵜⵉⵡⵡⵓⵔⴰ ⵏ ⵍⴳⴻⵏⵙ ⵉⵏⵓ, ⴰⵍ ⵓⵔⵛⴰⵍⵉⵎ. 
ⵡⴰⵔ ⵜⵜⴱⴰⵔⵔⵃⴻⵎ ⵛⴰ ⵎⴰⵏ ⴰⵢⴰ ⴷⵉ ⵊⴰⵜ, ⵡⴰⵔ ⵜᵉⵜⵜⵔⵓⵎ, ⵡⴰⵔ ⵅⴰⵙ ⵏⴻⵙⵙⵉⵡⵉⵍ. ⴷⵉ ⴱⴰⵢⵜ-ⵍⵉ’ⴰⴼⵔⴰ ⵣⵓⵣⵣⴰⵔⴻⵖ ⴰⵛⴰⵍ ⵅ ⵢⵉⵅⴻⴼ ⵉⵏⵓ. 
ⵄⴷⵓ, ⵛⴻⵎ ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵛⴰⴼⵉⵔ, ⴷ ⴰⵄⴰⵔⵢⴰⵏ ⵓ ⵙ ⵍⴻⵃⵢⴰ. ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵚⴰⵏⴰⵏ ⵡⴰⵔ ⵜⴻⴼⴼⵉⵖ ⵛⴰ. ⵜⴰⵖⵓⵢⵢⵉⵜ ⵏ ⵡⴻⵛⴹⴰⵏ ⵏ ⴱⴰⵢⵜ-ⵀⴰ-ⵉⵟⵚⵉⵍ ⵜⴻⴽⴽⴻⵙ ⵣⵣⴰⵢⵡⴻⵎ ⴰⴱⴻⴷⴷⵉ ⵏⵏⴻⵙ ⴰⴽⵉⴷⵡⴻⵎ. 
ⵎⴰⵖⴰⵔ ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵎⴰⵔⵓⵜ, ⵜᵉⵜⵜⴻⵇⵏⵓⵏⵏⵓⵢ ⵖⴰⵔ ⵎⴰⵔⵔⴰ ⵜⵉⵖⴻⵎⵎⵓⵔⴰ ⴷⵉ ⵟⵟⵡⴻⵄ ⵏ ⵍⵅⴰⵔ, ⵎⵉⵏⵣⵉ ⴰⵇⴰ ⵉⵀⵡⴰ-ⴷⴷ ⵍⵖⴰⵔ ⵏ ⵙⵉⴷⵉ, ⴰⵍ ⵜⴰⵡⵡⴰⵔⵜ ⵏ ⵓⵔⵛⴰⵍⵉⵎ.    
ⵃⴻⵣⵣⵎⴻⵎ ⵉⵢⵙⴰⵏ ⵏ ⵜⴰⵣⵍⴰ ⵣⵣⴰⵜ ⵉ ⵓⴽⴰⵔⵔⵓ, ⴰ ⵛⴻⵎ, ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵍⴰⵅⵉⵛ! ⵏⴻⵜⵜⴰⵜ ⴷ ⴱⴻⵟⵟⵓ ⵏ ⴷⴷⴻⵏⴱ ⵏ ⵢⴻⴵⵉⵙ ⵏ ⵚⵉⵀⵢⵓⵏ, ⵎⴰⵖⴰⵔ ⴷⴰⵢⴻⴽ ⵜⵜⵡⴰⴼⴻⵏ ⵉⵅⴻⵟⵟⴰⵏ ⵏ ⵉⵙⵔⴰⵉⵍ. 
ⵙ ⵓⵢⴰ ⴻⵡⵛ ⴰⵔⵔⵉⵖⴰⵍⵓⵜⴻⵏ ⵏ ⵓⵎⵙⴻⴱⴹⵉ ⵉ ⵎⵓⵔⴰⵛⴰⵜ-ⵊⴰⵜ! ⵜⵓⴷⵔⵉⵏ ⵏ ⴰⴽⵣⵉⴱ ⴰⴷ ⴷⴻⵡⵍⴻⵏⵜ ⴷ ⵍⵖⴻⵛⵛ ⵉ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ. 
ⵄⴰⵡⴻⴷ ⵏⴻⵛⵛ ⴰⴷ ⴰⵎ ⴷⴷ-ⴰⵡⵢⴻⵖ ⴰⵡⵔⵉⵜ, ⴰ ⵛⴻⵎ ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵎⴰⵔⵉⵛⴰ! ⴰⵄⵓⴵⵉ ⵏ ⵉⵙⵔⴰⵉⵍ ⴰⴷ ⴷⴷ-ⵢⴰⵙ ⴰⵍ ⵖⴰⵔ ⵄⴰⴷⵓⵍⵍⴰⵎ. 
ⴻⴳⴳ ⵉⵅⴻⴼ ⵏⵏⴻⵎ ⴷ ⵜⴰⵇⴻⵛⵛⴰⵔⵜ ⵓ ⵃⴻⴼⴼ ⵉ ⵉⵅⴻⴼ ⵏⵏⴻⵎ ⴷⵉ ⵙⵙⵉⴱⴱⴻⵜ ⵏ ⵉⵃⴻⵏⵊⵉⵔⴻⵏ ⵏⵏⴻⵎ ⵉⵄⵉⵣⵣⴻⵏ. ⴰⵔⵔ ⵜⴰⵇⴻⵛⵛⴰⵔⵜ ⵏⵏⴻⵎ ⴷ ⵜⴰⵎⴻⵇⵇⵔⴰⵏⵜ ⴰⵎⴻⵛⵏⴰⵡ ⴰⴳⵉⴷⴻⵔ, ⵎⵉⵏⵣⵉ ⵜⵜⵡⴰⵡⵢⴻⵏ ⵣⵣⴰⵢⴻⵎ ⵖⴰⵔ ⵜⵎⴻⵃⴱⴰⵙⵜ.” 
