﻿ⵢⵓⵏⵓⵙ.
3.
ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵢⵓⵏⵓⵙ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ, ⵉⵏⵏⴰ: 
“ⴽⴽⴰⵔ, ⵔⵓⵃ ⵖⴰⵔ ⵜⴻⵏⴷⵉⵏⵜ ⵏ ⵏⵉⵏⵡⴰ ⵜⴰⵎⴻⵇⵇⵔⴰⵏⵜ ⵓⵛⴰ ⴱⴰⵔⵔⴻⵃ ⴰⵙⴻⵏ ⵜⴰⴱⴰⵔⵔⴻⵃⵜ ⵏⵏⵉ ⵉ ⴷ ⴰⵛ ⵖⴰ ⵉⵏⵉⵖ.” 
ⵓⵛⴰ ⵉⴽⴽⴰⵔ ⵢⵓⵏⵓⵙ, ⵉⵔⵓⵃ ⵖⴰⵔ ⵏⵉⵏⵡⴰ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ. ⵜⵓⵖⴰ ⵏⵉⵏⵡⴰ ⴷ ⵉⵛⵜ ⵏ ⵜⴻⵏⴷⵉⵏⵜ ⵜⴰⵎⴻⵇⵇⵔⴰⵏⵜ ⵙ ⵡⴰⵟⵟⴰⵙ, ⴰⵇⴰ ⵉⵜⵜⵅⴻⵚⵚⴰ ⵜⵉⵛⵍⵉ ⵏ ⵜⵍⴰⵜⴰ ⵏ ⵡⵓⵙⵙⴰⵏ ⵉ ⵓⵛⵓⵇⵉ. 
ⵢⵓⴷⴻⴼ ⵢⵓⵏⵓⵙ ⵜⴰⵏⴷⵉⵏⵜ ⵜⵉⵛⵍⵉ ⵏ ⵉⵊⵊ ⵏ ⵡⴰⵙⵙ ⵓⵛⴰ ⵉⴱⴰⵔⵔⴻⵃ, ⵉⵏⵏⴰ: “ⴰⵡⴰⵔⵏⵉ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴰⴷ ⵜᵉⵜⵜⵡⴰⵏⴻⵇⵍⴻⴱ ⵜⴻⵏⴷⵉⵏⵜ ⵏ ⵏⵉⵏⵡⴰ.” 
ⵉⵔⵢⴰⵣⴻⵏ ⵏ ⵏⵉⵏⵡⴰ ⵓⵎⵏⴻⵏ ⴷⵉ ⴰⵔⴻⴱⴱⵉ ⵓⵛⴰ ⴱⴰⵔⵔⵃⴻⵏ ⵙ ⵢⵉⵊⵊ ⵏ ⵓⵥⵓⵎⵎⵉ ⵓⵛⴰ ⴰⵔⴹⴻⵏ ⵜⵅⵓⵏⵛⴰⵢ ⵏ ⵡⴻⵛⴹⴰⵏ, ⵣⴻⴳ ⵓⵎⴻⵇⵇⵔⴰⵏ ⴰⵍ ⴰⵎⴻⵥⵢⴰⵏ ⵊⴰⵔ ⴰⵙⴻⵏ. 
ⵢⵉⵡⴻⴹ ⵡⴰⵡⴰⵍ ⵓⵍⴰ ⵖⴰⵔ ⵓⵊⴻⴵⵉⴷ ⵏ ⵏⵉⵏⵡⴰ ⵓⵛⴰ ⵉⴽⴽⴰⵔ ⵣⵉ ⵍⴽⵓⵔⵙⵉ ⵏ ⵍⵄⴰⵔⵛ ⵏⵏⴻⵙ, ⵉⴽⴽⴻⵙ ⵅⴰⵙ ⴰⵔⵔⵓⴹ ⵏⵏⴻⵙ ⵉⴳⴻⵍⵍⴷⴻⵏ, ⵉⵙⵙⴷⵓⵔⵉⵢ ⵉⵅⴻⴼ ⵏⵏⴻⵙ ⵙ ⵢⵉⵛⵜ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ ⵓⵛⴰ ⵉⵇⵇⵉⵎ ⵅ ⵢⵉⵖⵖⴻⴷ. 
ⵅ ⵍⵓⵎⵓⵔ ⵏ ⵓⵊⴻⴵⵉⴷ ⵊⵎⵉⵄ ⴰⴽ-ⴷ ⴰⵢⵜ ⵏ ⵛⵛⵓⵔⴼⴰ ⴳⴳⵉⵏ ⴰⴷ ⴱⴰⵔⵔⵃⴻⵏ ⴷⵉ ⵏⵉⵏⵡⴰ, ⵏⵏⴰⵏ: “ⵡⴰⵔ ⵜⵜⴻⵊⵊⵉⵎ ⴱⵏⴰⴷⴻⵎ ⴷ ⵍⵎⴰⵍ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵡⵓⴵⵉ ⴰⴷ ⵛⵛⴻⵏ ⵛⴰ, ⵡⴰⵔ ⵜⴻⵏ ⵜⵜⴻⵊⵊⵉⵎ ⴰⴷ ⵀⴷⴰⵏ ⵓⵍⴰ ⴰⴷ ⵙⵡⴻⵏ. 
ⵊⵊⴻⵎ ⴰⴷ ⵢⴰⵔⴹ ⴱⵏⴰⴷⴻⵎ ⴷ ⵍⵎⴰⵍ ⵜⵉⵅⵓⵏⵛⴰⵢ ⵏ ⵡⴻⵛⴹⴰⵏ ⵓⵛⴰ ⵊⵊⴻⵎ ⵜⴻⵏ ⴰⴷ ⵙⵖⵓⵢⴻⵏ ⵙ ⵊⵊⴻⵀⴷ ⵖⴰⵔ ⴰⵔⴻⴱⴱⵉ ⵓⵛⴰ ⴰⴷ ⵉⵜⵓⴱ ⴽⵓⵍ ⵉⵊⵊ ⵣⴻⴳ ⵡⴻⴱⵔⵉⴷ ⵏⵏⴻⵙ ⴰⵄⴻⴼⴼⴰⵏ ⵓ ⵣⵉ ⵍⵄⵓⵏⴼ ⵉ ⵢⵓⵎⵙⴻⵏ ⵖⴰⵔ ⵉⴼⴰⵙⵙⴻⵏ ⵏⵏⴻⵙ. 
ⴰⴷ ⵜⴰⵖ ⴰⴷ ⵉⵏⴷⴻⵎ ⴰⵔⴻⴱⴱⵉ ⵓⵛⴰ ⴰⴷ ⵉⵜⵓⴱ ⵓⵛⴰ ⴰⴷ ⵉⴱⴻⵄⵄⴻⴷ ⵅ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ ⵃⵉⵎⴰ ⵡⴰⵔ ⵏⴻⵜⵜⵡⴰⵜⵀⴻⵍⵍⵉⴽ ⵛⴰ.” 
ⵓⵛⴰ ⵉⵥⵔⴰ ⴰⵔⴻⴱⴱⵉ ⵎⵉⵏ ⴳⴳⵉⵏ, ⴰⵇⴰ ⵜⵓⴱⴻⵏ ⵅ ⵡⴻⴱⵔⵉⴷ ⵏⵙⴻⵏ ⴰⵄⴻⴼⴼⴰⵏ ⵓⵛⴰ ⵉⵏⴷⴻⵎ ⴰⵔⴻⴱⴱⵉ ⵅ ⵍⵖⴰⵔ ⵏⵏⵉ ⵜⵓⵖⴰ ⵉⵏⵏⴰ ⴰⴷ ⴽⵉⵙⴻⵏ ⵉⴳⴳ ⵓⵛⴰ ⵡⴰⵔ ⵜ ⵉⴳⴳⵉ ⵛⴰ. 
