﻿ⵢⵓⵏⵓⵙ.
2.
ⵉⵙⵙⴻⵡⵊⴻⴷ ⵙⵉⴷⵉ ⵉⵊⵊ ⵏ ⵡⴻⵙⵍⴻⵎ ⴰⵎⴻⵇⵇⵔⴰⵏ ⵃⵉⵎⴰ ⴰⴷ ⵉⵙⵙⴻⵖⵔⵉ ⵢⵓⵏⵓⵙ ⵓⵛⴰ ⵢⵓⵏⵓⵙ ⵉⴽⴽⴰ ⵜⵍⴰⵜⴰ ⵏ ⵡⵓⵙⵙⴰⵏ ⴷ ⵜⵍⴰⵜⴰ ⵏ ⴵⵉⵢⴰⵍⵉ ⴷⴻⴳ ⵓⵄⴻⴷⴷⵉⵙ ⵏ ⵡⴻⵙⵍⴻⵎ. 
ⵓⵛⴰ ⵉⵥⵥⵓⴵ ⵢⵓⵏⵓⵙ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ, ⵣⴻⴳ ⵓⵄⴻⴷⴷⵉⵙ ⵏ ⵡⴻⵙⵍⴻⵎ. 
ⵉⵏⵏⴰ: ”ⵣⵉ ⵍⴻⵃⵚⴰⵔⴻⵜ ⵉⵏⵓ ⵍⴰⵖⵉⵖ ⵉ ⵙⵉⴷⵉ ⵓ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ. ⵣⴻⴳ ⵡⴻⵃⵡⵉⵛ ⵏ ⵍⴰⵅⴰⵔⵜ ⵍⴰⵖⵉⵖ ⵓⵛⴰ ⵛⴻⴽ ⵜⴻⵙⵍⵉⴷ ⵉ ⵜⵎⵉⵊⵊⴰ ⵉⵏⵓ. 
ⵜⵓⵖⴰ ⵜⴻⵏⴹⴰⵔⴻⴷ ⴰⵢⵉ ⴷⵉ ⵍⴰⴵⴰⵖ, ⴷⴻⴳ ⵡⵓⵍ ⵏ ⵍⴻⴱⵃⵓⵔ, ⵜⴻⵏⵏⴹⴻⵏ ⴰⵢⵉ-ⴷⴷ ⵍⴻⵎⵡⴰⵊ. ⵎⴰⵔⵔⴰ ⵣⵣⵀⵉⵔ ⵏⵏⴻⵛ ⴷ ⵍⴻⵎⵡⴰⵊ ⵏⵏⴻⵛ ⴽⴽⵉⵏ-ⴷⴷ ⵅⴰⴼⵉ ⵙⴻⵏⵏⴻⵊ. 
ⵏⵏⵉⵖ: ‘ⵏⴻⵛⵛ ⵜⵜⵡⴰⵙⵙⵓⴼⴼⵖⴻⵖ ⵣⵉ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. ⵄⴰⴷ ⴰⴷ ⵜⵡⴰⵍⵉⵖ ⵄⴰⵡⴻⴷ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ ⵉⵇⴻⴷⴷⵙⴻⵏ.’ 
ⵟⵟⴼⴻⵏ ⴰⵢⵉ ⵡⴰⵎⴰⵏ ⴰⵍ ⵎⴰⵏⵉ ⵉⵡⴹⴻⵏ ⵖⴰⵔ ⵍⴻⵄⵎⴰⵔ ⵉⵏⵓ, ⴰⵎⴰⵏ ⵉⵀⴻⵡⵍⴻⵏ ⵏⵏⴹⴻⵏ ⴰⵢⵉ-ⴷⴷ, ⵉⵍⵚⴻⵇ-ⴷⴷ ⴰⵔⴱⵉⵄ ⵏ ⵍⴻⴱⵃⴰⵔ ⴷⴻⴳ ⵓⵣⴻⴵⵉⴼ ⵉⵏⵓ. 
ⵀⵡⵉⵖ ⵖⴰⵔ ⵟⵟⵔⵓⴼⴰ ⵢⵓⴵⵖⴻⵏ ⵇⴰⵄ ⵏ ⵉⴷⵓⵔⴰⵔ, ⵜⵜⵡⴰⴱⴻⵍⵍⵄⴻⵏ ⵣⵣⴻⴽⵔⵓⵏⴰⵜ ⵏ ⵜⴻⵎⵎⵓⵔⵜ ⵅⴰⴼⵉ ⵙⴻⵏⵏⴻⵊ ⵉ ⵍⴻⴱⴷⴰ, ⵎⴰⵛⴰ ⵛⴻⴽ ⵜⴻⵙⵙⴳⴻⵄⵄⴷⴻⴷ ⵜⵓⴷⴰⵔⵜ ⵉⵏⵓ ⵣⵉ ⵜⵓⵔⵚⵓⴹⵉ ⴷⴻⴳ ⵡⴰⵎⴰⵏ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ! 
ⵓⵎⵉ ⵉⴷⴻⵡⵡⴻⵅ ⵍⴻⵄⵎⴰⵔ ⵉⵏⵓ ⴷⴰⵢⵉ, ⴼⴻⴽⴽⴰⵔⴻⵖ ⴷⵉ ⵙⵉⴷⵉ, ⵓ ⵜⴰⵥⴰⴵⵉⵜ ⵉⵏⵓ ⵜⴳⴻⵄⵄⴻⴷ ⵖⴰⵔⴻⴽ, ⴷⵉ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ ⵉⵇⴻⴷⴷⵙⴻⵏ. 
ⵏⵉⵜⵏⵉ ⵟⵟⴼⴻⵏ ⴷⵉ ⵍ’ⴰⵚⵏⴰⵎ ⵉⴱⴻⵟⵟⵍⴻⵏ ⴷ ⵉⵖⴻⵛⵛⴻⵏ, ⵙⴻⵎⵃⴻⵏ ⴷⵉ ⵜⵎⴻⵅⵙⵉⵡⵜ ⵏⵙⴻⵏ ⵉⵛⴻⵡⵡⴰⵔⴻⵏ. 
ⵎⴰⵛⴰ ⵏⴻⵛⵛ ⴰⴷ ⵛⴻⴽ ⵃⴻⵎⴷⴻⵖ ⵙ ⵢⵉⵛⵜ ⵏ ⵜⵎⵉⵊⵊⴰ ⵜⴻⵛⵛⵓⵔ ⵙ ⵓⵇⴰⴷⵉ. ⵎⵉⵏ ⵡⴰⵄⴷⴻⵖ, ⴰⴷ ⵜ ⵇⴻⴼⵍⴻⵖ. ⴰⵙⴻⵏⵊⴻⵎ ⵣⵉ ⵙⵉⴷⵉ.” 
ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵡⴻⵙⵍⴻⵎ ⵓⵛⴰ ⵉⵄⵓⵇⵇ-ⴷⴷ ⵢⵓⵏⵓⵙ ⴷⵉ ⵍⴱⴰⵔ. 
