﻿ⵄⴰⵎⵓⵙ.
7.
“ⵎⴰⵏ ⴰⵢⴰ ⵉⵙⵙⵛⴻⵏ ⴰⵢⵉ ⵜⵜ ⵙⵉⴷⵉ ⵉⵏⵓ, ⵙⵉⴷⵉ! ⵅⵣⴰⵔ, ⵏⴻⵜⵜⴰ ⵉⴳⴳⴰ ⵉⴱⵓⵔⴻⵅⵙⴻⵏ ⵓⵎⵉ ⵜⵓⵖⴰ ⴰⵔⴱⵉⵄ ⴰⵏⴻⴳⴳⴰⵔ ⵉⴱⴻⴷⴷⴰ ⴰⴷ ⵉⵙⵙⵓⴼⴼⴻⵖ. ⵅⵣⴰⵔ, ⵜⵓⵖⴰ-ⵜ ⴷ ⴰⵔⴱⵉⵄ ⴰⵏⴻⴳⴳⴰⵔ ⴰⵡⴰⵔⵏⵉ ⵎⴰ ⵃⴻⵜⵛⴻⵏ ⴰⵔⴱⵉⵄ ⵉ ⵓⵊⴻⴵⵉⴷ. 
ⵉⵎⵙⴰⵔ, ⵓⵎⵉ ⴽⴻⵎⵎⵍⴻⵏ ⵏⵉⵜⵏⵉ ⵣⵉ ⵎⴰⵛⵛⴰ ⵏ ⵓⵖⴻⵎⵎⵓⵢ ⴰⵣⵉⵣⴰ ⵏ ⵜⴻⵎⵎⵓⵔⵜ, ⵏⴻⵛⵛ ⵏⵏⵉⵖ: ‘ⴰ ⵙⵉⴷⵉ ⵉⵏⵓ, ⵙⵉⴷⵉ, ⵙⴰⵎⴻⵃ ⵎⴰⵛⴰ! ⵎⴰⵎⵎⴻⵛ ⵉ ⵖⴰ ⵢⴻⴳⴳ ⵢⴰⵄⵇⵓⴱ ⴰⴷ ⵉⵇⵇⵉⵎ ⴰⴷ ⵉⴱⴻⴷⴷ, ⴰⵇⴰ ⵏⴻⵜⵜⴰ ⴷ ⴰⵎⴻⵥⵢⴰⵏ!’ 
ⵅⴻⵏⵏⵉ ⵉⵏⴷⴻⵎ ⵙⵉⴷⵉ ⵅ ⵎⴰⵏ ⴰⵢⴰ. ‘ⵡⴰⵔ ⵉⵜⵜⵉⵍⵉ!’, ⵉⵏⵏⴰ ⵙⵉⴷⵉ.” 
“ⵎⴰⵏ ⴰⵢⴰ ⵉⵙⵙⵛⴻⵏ ⴰⵢⵉ ⵜⵜ ⵙⵉⴷⵉ ⵉⵏⵓ, ⵙⵉⴷⵉ. ⵅⵣⴰⵔ, ⵙⵉⴷⵉ ⵉⵏⵓ, ⵙⵉⴷⵉ, ⵉⵍⴰⵖⴰ-ⴷⴷ ⵎⴰⵃⴻⵏⴷ ⴰⴷ ⴷⵉⵏ ⵢⵉⵍⵉ ⵍⵄⵉⵇⴰⴱ ⵙ ⵜⵎⴻⵙⵙⵉ ⵓⵛⴰ ⵜⵉⵎⴻⵙⵙⵉ ⵜⴻⵛⵛⴰ ⴰⵎⴰⵏ ⵉⵎⴻⵇⵇⵔⴰⵏⴻⵏ ⵉⵀⴻⵡⵍⴻⵏ ⴰⵍⴰⵎⵉ ⴰⴷ ⵜⴻⵛⵛ ⵓⵍⴰ ⴷ ⵜⴰⵙⵖⴰⵔⵜ ⵏ ⵍⵡⴰⵔⵜ. 
ⵏⴻⵛⵛ ⵏⵏⵉⵖ: ‘ⴰ ⵙⵉⴷⵉ ⵉⵏⵓ, ⵙⵉⴷⵉ, ⵙⴱⴻⴷⴷ ⵎⴰⵛⴰ! ⵎⴰⵎⵎⴻⵛ ⵉ ⵖⴰ ⵢⴻⴳⴳ ⵢⴰⵄⵇⵓⴱ ⴰⴷ ⵉⵇⵇⵉⵎ ⴰⴷ ⵉⴱⴻⴷⴷ, ⴰⵇⴰ ⵏⴻⵜⵜⴰ ⴷ ⴰⵎⴻⵥⵢⴰⵏ!’ 
ⵅⴻⵏⵏⵉ ⵉⵏⴷⴻⵎ ⵙⵉⴷⵉ ⵅ ⵎⴰⵏ ⴰⵢⴰ. ‘ⵡⴰⵔ ⵉⵜⵜⵉⵍⵉ!’, ⵉⵏⵏⴰ ⵙⵉⴷⵉ ⵉⵏⵓ, ⵙⵉⴷⵉ!” 
“ⵎⴰⵏ ⴰⵢⴰ ⵉⵙⵙⵛⴻⵏ ⴰⵢⵉ ⵜⵜ ⵏⴻⵜⵜⴰ: ⵅⵣⴰⵔ, ⵙⵉⴷⵉ ⵉⵏⵓ ⵉⴱⴻⴷⴷ ⵅ ⵢⵉⵊⵊ ⵏ ⵍⵃⵉⴹ ⵉ ⵉⵜⵜⵡⴰⴳⴳ ⵙ ⴱⵍⵓⵎⵓ ⵓ ⵢⵉⵊⵊ ⵏ ⴱⵍⵓⵎⵓ ⵜⵓⵖⴰ ⴷⴻⴳ ⵓⴼⵓⵙ ⵏⵏⴻⵙ. 
ⵉⵏⵏⴰ ⴰⵢⵉ ⵙⵉⴷⵉ: ‘ⵎⵉⵏ ⵜᵉⵜⵜⵡⴰⵔⵉⴷ ⵛⴻⴽ, ⵄⴰⵎⵓⵙ?’ ⵏⴻⵛⵛ ⵏⵏⵉⵖ: ‘ⵉⵊⵊ ⵏ ⴱⵍⵓⵎⵓ!’ ⵍⴻⵅⴷⴻⵏⵏⵉ ⵉⵏⵏⴰ ⵙⵉⴷⵉ: ‘ⵅⵣⴰⵔ, ⵏⴻⵛⵛ ⴰⴷ ⴰⵔⵔⴻⵖ ⴱⵍⵓⵎⵓ ⵉⵏⵓ ⴷⵉ ⵍⵡⴻⵙⵟ ⵏ ⵍⴳⴻⵏⵙ ⵏ ⵉⵙⵔⴰⵉⵍ. ⵏⴻⵛⵛ ⵡⴰⵔ ⵅⴰⵙ ⵄⴻⴷⴷⵓⵖ ⵄⴰⴷ! 
ⵍⴻⴳⵄⵓⴷⵉ ⵏ ⵉⵙⵃⴰⵇ ⴰⴷ ⵜⵜⵡⴰⵔⴻⴷⴷⴵⴻⵏⵜ ⵓ ⵜⵉⵣⴰⵡⵉⵢⵢⵉⵏ ⵉⵇⴻⴷⴷⵙⴻⵏ ⵏ ⵉⵙⵔⴰⵉⵍ ⴰⴷ ⴷⴻⵡⵍⴻⵏⵜ ⴷ ⵍⵅⴰⵔⴱⴻⵜ ⵓ ⵏⴻⵛⵛ ⴰⴷ ⴽⴽⴰⵔⴻⵖ ⵅ ⵜⴰⴷⴷⴰⵔⵜ ⵏ ⵢⴰⵔⵓⴱⵄⴰⵎ ⵙ ⵙⵙⵉⴼ.’” 
ⵍⴻⵅⴷⴻⵏⵏⵉ ⵉⵙⵙⴻⴽⴽ ⴰⵎⴰⵚⵢⴰ, ⴰⴽⴻⵀⵀⴰⵏ ⴷⵉ ⴱⴰⵢⵜ-ⵉⵍ, ⵉⵊⵊⴻⵏ ⵖⴰⵔ ⵢⴰⵔⵓⴱⵄⴰⵎ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵉⵏⵏⴰ: “ⵄⴰⵎⵓⵙ ⵉⴳⴳⴰ ⵉⵊⵊ ⵏ ⵍⵄⴰⵀⴷ ⴹⵉⴷⴷ ⵉ ⵛⴻⴽ ⴷⵉ ⵍⵡⴻⵙⵟ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ⵜⴰⵎⵎⵓⵔⵜ ⵡⴰⵔ ⵜⵣⴻⵎⵎⴰⵔ ⴰⴷ ⵜⴻⴽⵙⵉ ⴰⵡⴰⵍⴻⵏ ⵏⵏⴻⵙ. 
ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵄⴰⵎⵓⵙ: ‘ⵢⴰⵔⵓⴱⵄⴰⵎ ⴰⴷ ⵉⵜⵜⵡⴰⵏⴻⵖ ⵙ ⵙⵙⵉⴼ ⵓ ⵉⵙⵔⴰⵉⵍ ⴰⴷ ⵉⵜⵜⵡⴰⵏⴷⴻⵀ ⵖⴰⵔ ⵍⵎⴻⵏⴼⴰ, ⴰⴷ ⵜ ⵙⵙⵉⴳⴳⵯⴻⵊⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏⵏⴻⵙ.’” 
ⵅⴻⵏⵏⵉ ⵉⵏⵏⴰ ⴰⵎⴰⵚⵢⴰ ⵉ ⵄⴰⵎⵓⵙ: “ⴰ ⵛⴻⴽ, ⴰⵎⵡⴰⵍⴰⵡ, ⵔⵓⵃ, ⴰⵔⵡⴻⵍ ⵖⴰⵔ ⵜⴻⵎⵎⵓⵔⵜ ⵏ ⵢⴰⵀⵓⴷⴰ! ⴻⵛⵛ ⴷⵉⵏⵏⵉ ⴰⵖⵔⵓⵎ ⵓ ⵏⴰⴱⴱ ⴷⵉⵏⵏⵉ! 
ⴷⵉ ⴱⴰⵢⵜ-ⵉⵍ ⵎⴰⵛⴰ ⵡⴰⵔ ⵜⵣⴻⵎⵎⴰⵔⴻⴷ ⴰⴷ ⵜⵏⴻⴱⴱⵉⴷ ⵄⴰⴷ, ⵎⵉⵏⵣⵉ ⵏⴻⵜⵜⴰⵜ ⴷ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵏ ⵓⵊⴻⴵⵉⴷ ⵓ ⵏⴻⵜⵜⴰⵜ ⴷ ⵜⴰⴷⴷⴰⵔⵜ ⵏ ⵜⴰⴳⴻⵍⴷⵉⵜ.” 
ⵢⴰⵔⵔⴰ-ⴷⴷ ⵄⴰⵎⵓⵙ, ⵉⵏⵏⴰ ⵉ ⴰⵎⴰⵚⵢⴰ: “ⵏⴻⵛⵛ ⵡⴰⵔ ⴵⵉⵖ ⴷ ⴰⵏⴰⴱⵉ ⵓ ⵏⴻⵛⵛ ⵡⴰⵔ ⴵⵉⵖ ⴷ ⵎⵎⵉⵙ ⵏ ⵓⵏⴰⴱⵉ, ⵎⴰⵛⴰ ⵏⴻⵛⵛ ⵜⵓⵖⴰ ⴰⵢⵉ ⴷ ⴱⵓ-ⵍⴻⴱⵀⴰⵢⴻⵎ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵣ ⵏⵏⵉ ⵉⵍⴻⵇⵇⴹⴻⵏ ⵜⴰⵣⴰⵔⵜ ⵜⴰⴱⵓⵔⴻⵛⵜ. 
ⵙⵉⴷⵉ ⵉⴽⴽⴻⵙ ⴰⵢⵉ ⵣⵉ ⴹⴻⴼⴼⴰⵔ ⵏ ⵡⵓⴵⵉ ⵓ ⵙⵉⴷⵉ ⵉⵏⵏⴰ ⴰⵢⵉ: ‘ⵓⵢⵓⵔ, ⵏⴰⴱⴱ ⵉ ⵍⴳⴻⵏⵙ ⵉⵏⵓ ⵉⵙⵔⴰⵉⵍ!’ 
ⵅⴻⵏⵏⵉ ⵍⴻⵅⵅⵓ, ⵙⴻⵍ ⵉ ⵡⴰⵡⴰⵍ ⵏ ⵙⵉⴷⵉ, ⵛⴻⴽ ⴷ ⵡⴻⵏⵏⵉ ⵉⵇⵇⴰⵔⴻⵏ: ‘ⵡⴰⵔ ⵉⵄⴻⴷⴷⴻⵍ ⴰⴷ ⵜⵏⴻⴱⴱⵉⴷ ⴹⵉⴷⴷ ⵉ ⵉⵙⵔⴰⵉⵍ ⵓ ⴰⴷ ⵜⴻⵙⵙⵓⴷⵎⴻⴷ ⴰⵡⴰⵍ ⵏ ⵙⵉⴷⵉ ⵅ ⵜⴰⴷⴷⴰⵔⵜ ⵏ ⵉⵙⵃⴰⵇ!’ 
ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵜⴰⵎⵖⴰⵔⵜ ⵏⵏⴻⵛ ⴰⴷ ⵜⴻⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ ⵙ ⵓⵖⵉⵍ ⴷⵉ ⵜⴻⵏⴷⵉⵏⵜ ⵓ ⵉⵃⴻⵏⵊⵉⵔⴻⵏ ⵏⵏⴻⵛ ⴷ ⵢⴻⵙⵙⵉⵛ ⵏⵏⴻⵛ ⴰⴷ ⵡⴹⴰⵏ ⵙ ⵙⵙⵉⴼ ⵓ ⵜⴰⵎⵎⵓⵔⵜ ⵏⵏⴻⵛ ⴰⴷ ⵜⵜ ⴱⴹⴰⵏ ⵙ ⵓⴼⵉⵍⵓ ⵏ ⵍⴻⵄⴱⴰⵔ ⵓ ⵛⴻⴽ ⴰⴷ ⵜⴻⵎⵎⵜⴻⴷ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵜⴻⵅⵎⴻⵊ ⵓ ⵙ ⵜⵉⴷⴻⵜⵜ ⵉⵙⵔⴰⵉⵍ ⴰⴷ ⵜᵉⵜⵜⵡⴰⵟⵟⴻⴼ ⴷⵉ ⵍⵎⴻⵏⴼⴰ ⴱⴰⵔⵔⴰ ⵉ ⵜⴻⵎⵎⵓⵔⵜ ⵏⵏⴻⵙ.” 
