﻿ⵃⵓⵛⵉⵄⴰ.
3.
ⵙⵉⴷⵉ ⵉⵏⵏⴰ ⴰⵢⵉ: “ⵔⵓⵃ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉ, ⴻⵅⵙ ⵜⴰⵎⵖⴰⵔⵜ ⵏⵏⵉ ⵉⵜⵜⵡⴰⵙⵙⵄⵉⵣⵣⴻⵏ ⵣⴻⴳ ⵓⵎⴻⴷⴷⵓⴽⴽⴻⵍ ⵏⵏⴻⵙ, ⵎⴰⵛⴰ ⵜⴻⵣⵏⴰ, ⴰⵎ ⵎⴰⵎⵎⴻⵛ ⵙⵉⴷⵉ ⵉⵜⵜⴻⵅⵙ ⴰⵢⵜ ⵏ ⵉⵙⵔⴰⵉⵍ, ⵎⴰⵛⴰ ⵏⵉⵜⵏⵉ ⵅⴻⵣⵣⴰⵔⴻⵏ ⵖⴰⵔ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ ⵓ ⵜⵜⴻⵅⵙⴻⵏ ⵚⵚⴻⴷⵇⴻⵜ ⵏ ⵡⴻⵖⵔⵓⵎ ⵙ ⵣⵣⴱⵉⴱ.” 
ⵙ ⵓⵢⴻⵏⵏⵉ ⵙⵖⵉⵖ ⵜⵜ ⵉ ⵏⴻⵛⵛ ⵙ ⵅⴻⵎⵎⴻⵙⵟⴰⵛ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵓ ⵙ ⵉⵊⵊ ⵏ ⵓⵃⵓⵎⵉⵔ ⵉⴼⴻⵢⵢⴹⴻⵏ ⵏ ⵉⵎⴻⵏⴷⵉ. 
ⵏⴻⵛⵛ ⵏⵏⵉⵖ ⴰⵙ: “ⵛⴻⵎ ⴰⴷ ⵖⴰⵔⵉ ⵜⴻⵇⵇⵉⵎⴻⴷ ⴰⵟⵟⴰⵙ ⵏ ⵡⵓⵙⵙⴰⵏ. ⵡⴰⵔ ⵜⵜⴻⴳⴳ ⵛⴰ ⴼⴰⵔⵇ-ⵛⵛⵖⴻⵍ ⵓ ⵡⴰⵔ ⵜⵜⵉⵍⵉ ⵏ ⵉⵊⵊ ⵏ ⵡⴻⵔⵢⴰⵣ ⵏⵏⴻⵖⵏⵉ ⵓⵛⴰ ⵓⵍⴰ ⴷ ⵏⴻⵛⵛ ⴰⴷ ⴳⴳⴻⵖ ⴰⵎⴻⵏⵏⵉ ⴰⴽⵉⴷⵙⴻⵎ.” 
ⵎⴰⵖⴰⵔ ⴰⵢⵜ ⵏ ⵉⵙⵔⴰⵉⵍ ⴰⴷ ⵇⵇⵉⵎⴻⵏ ⴰⵟⵟⴰⵙ ⵏ ⵡⵓⵙⵙⴰⵏ ⴱⵍⴰ ⴰⵊⴻⴵⵉⴷ, ⴱⵍⴰ ⵍⵃⴰⴽⴻⵎ, ⴱⵍⴰ ⵜⴰⵖⴰⵔⵚⵜ, ⴱⵍⴰ ⴰⵎⴰⵢⴹⵓ ⵉⵇⴻⴷⴷⵙⴻⵏ, ⴱⵍⴰ ⴰⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ. 
ⴰⵡⴰⵔⵏⵉ ⴰⵙ ⴰⴷ ⴷⴷ-ⴷⴻⵡⵍⴻⵏ ⴰⵢⵜ ⵏ ⵉⵙⵔⴰⵉⵍ¸ ⴰⴷ ⴰⵔⵣⵓⵏ ⵅ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ ⵓ ⵅ ⴷⴰⵡⵓⴷ, ⴰⵊⴻⴵⵉⴷ ⵏⵙⴻⵏ. ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ ⴰⴷ ⴷⴷ-ⴰⵙⴻⵏ ⵜⵜⴰⵔⵊⵉⵊⵉⵏ ⵖⴰⵔ ⵙⵉⴷⵉ ⴷ ⵜⵛⵓⵏⵉ ⵏⵏⴻⵙ. 
