﻿ⴷⴰⵏⵉⵢⴰⵍ.
12.
“ⴷⵉ ⵍⵡⴻⵇⵜ ⵏⵏⵉ ⴰⴷ ⵉⴽⴽⴰⵔ ⵎⵉⵅⴰⵢⵉⵍ, ⵍⵃⴰⴽⴻⵎ ⴰⵎⴻⵇⵇⵔⴰⵏ. ⵡⴻⵏⵏⵉ ⵉⴱⴻⴷⴷⴻⵏ ⴰⴽ-ⴷ ⵍⴳⴻⵏⵙ ⵏⵏⴻⵛ. ⴰⴷ ⵜⵉⵍⵉ ⴷ ⵉⵛⵜ ⵏ ⵍⵡⴻⵇⵜ ⵏ ⵍⴻⵃⵚⴰⵔⴻⵜ ⴰⵎ ⵡⴰⵔ ⵜⴻⴵⵉ ⵣⴻⴳ ⵡⴰⵎⵉ ⵉⴵⴰ ⵉⵊⵊ ⵏ ⵍⴳⴻⵏⵙ ⴰⵍ ⵍⵡⴻⵇⵜ ⵏⵏⵉ. ⵓ ⴷⵉ ⵍⵡⴻⵇⵜ ⵏⵏⵉ ⴰⴷ ⵉⵜⵜⵡⴰⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵛ, ⴽⵓⵍ ⵉⵊⵊⴻⵏ ⵉ ⵖⴰ ⵉⵜⵜⵡⴰⴼⴻⵏ ⴰⵇⴰ ⵓⵔⵉⵏ ⵜ ⴷⴻⴳ ⵡⴻⴷⵍⵉⵙ. 
ⴰⵟⵟⴰⵙ ⵣⴻⴳ ⵢⵉⵏⵏⵉ ⵉⵟⵟⵚⴻⵏ ⴷⵉ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ ⴰⴷ ⴼⴰⵇⴻⵏ, ⵉⵏⴰ ⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ ⵓ ⵉⵏⵏⴻⵖⵏⵉ ⴰⴷ ⴼⴰⵇⴻⵏ ⵉ ⵓⴱⴻⵀⴷⴻⵍ ⵓ ⵉ ⵢⵉⵊⵊ ⵏ ⵓⵄⵉⴼⴼⵉ ⵉ ⵍⴻⴱⴷⴰ. 
ⵉⵏⵏⵉ ⵖⴰⵔ ⵜⴻⴵⴰ ⵍⴻⴼⵀⴰⵎⴻⵜ ⴰⴷ ⴰⵔⵖⴻⵏ ⴰⵎ ⵎⴰⵎⵎⴻⵛ ⵢⴰⵔⴻⵇⵇ ⵓⵊⴻⵏⵏⴰ ⵓ ⵉⵏⵏⵉ ⵜⵓⵖⴰ ⵉⵏⴻⴷⴷⵀⴻⵏ ⴰⵟⵟⴰⵙ ⵖⴰⵔ ⵜⵙⴻⴳⴷⴰ, ⴰⵎ ⵢⵉⵜⵔⴰⵏ, ⵉ ⵍⴻⴱⴷⴰ ⵇⴰⵄ. 
ⵓ ⵛⴻⴽ, ⴷⴰⵏⵉⵢⴰⵍ, ⵙⵏⵓⴼⴼⴰⵔ ⴰⵡⴰⵍⴻⵏ-ⴰ ⵓ ⵜⵛⴻⵎⵎⵄⴻⴷ ⴰⴷⵍⵉⵙ ⴰⵍ ⵍⵡⴻⵇⵜ ⵏ ⵓⵏⴻⴳⴳⴰⵔ. ⴰⵟⵟⴰⵙ ⴰⴷ ⴰⵔⵣⵓⵏ ⵓ ⵜⵓⵙⵙⵏⴰ ⴰⴷ ⵜⴻⵎⵖⴰⵔ.” 
ⵓ ⵏⴻⵛⵛ, ⴷⴰⵏⵉⵢⴰⵍ, ⵥⵔⵉⵖ, ⵓ ⵅⵣⴰⵔ, ⴰⵇⴰ ⴷⵉⵏ ⴱⴻⴷⴷⴻⵏ ⵜⵏⴰⵢⴻⵏ ⵏⵏⴻⵖⵏⵉ, ⵉⵊⵊ ⵖⴰⵔ ⵜⵎⴰ-ⵢⴰ ⵏ ⵉⵖⵣⴰⵔ ⵓ ⵡⴻⵏⵏⴻⵖⵏⵉ ⵖⴰⵔ ⵜⵎⴰ ⵏⵏⴻⵖⵏⵉ ⵏ ⵉⵖⵣⴰⵔ. 
ⵓ ⵏⴻⵜⵜⴰ ⵉⵏⵏⴰ ⵉ ⵡⴻⵔⵢⴰⵣ ⵉ ⵜⵓⵖⴰ ⵢⴰⵔⴹⴻⵏ ⵍⴻⵇⵟⴻⵏ ⴰⵣⴷⴰⴷ, ⵡⴻⵏⵏⵉ ⵉⴱⴻⴷⴷⴻⵏ ⵙⴻⵏⵏⴻⵊ ⵉ ⵡⴰⵎⴰⵏ ⵏ ⵉⵖⵣⴰⵔ: “ⵎⴻⵛⵃⴰⵍ ⵄⴰⴷ ⵉⵇⵇⵉⵎⴻⵏ ⴰⵍ ⴰⵏⴻⴳⴳⴰⵔⵓ ⵏ ⵍⴻⵄⵊⴰⵢⴻⴱ-ⴰ?” 
ⵓ ⵙⵍⵉⵖ ⴰⵔⵢⴰⵣ ⵏⵏⵉ ⵜⵓⵖⴰ ⵢⴰⵔⴹⴻⵏ ⵍⴻⵇⵟⴻⵏ ⴰⵣⴷⴰⴷ, ⵡⴻⵏⵏⵉ ⵉⴱⴻⴷⴷⴻⵏ ⵙⴻⵏⵏⴻⵊ ⵉ ⵡⴰⵎⴰⵏ ⵏ ⵉⵖⵣⴰⵔ, ⵓ ⵏⴻⵜⵜⴰ ⵉⵙⵙⴳⴻⵄⵄⴻⴷ ⴰⴼⵓⵙ ⵏⵏⴻⵙ ⴰⴼⵓⵙⵉ ⴷ ⵓⴼⵓⵙ ⵏⵏⴻⵙ ⴰⵣⴻⵍⵎⴰⴹ ⵓ ⵉⵊⵊⵓⴵ ⵖⴰⵔ ⵡⴻⵏⵏⵉ ⵉⴷⴷⴰⵔⴻⵏ ⵉ ⵍⴻⴱⴷⴰ, ⴱⴻⵍⵍⵉ ⵅⵎⵉ ⵉ ⵖⴰ ⵉⵜⵜⵡⴰⵇⴹⴰ ⵓⴼⴰⵔⵜⴻⴽ ⵏ ⵓⴼⵓⵙ ⵏ ⵍⴳⴻⵏⵙ ⵉⵇⴻⴷⴷⵙⴻⵏ ⴰⵡⴰⵔⵏⵉ ⵢⵉⵊⵊ ⵏ ⵍⵎⵉⵊⴰⵍ ⵏ ⵍⵡⴻⵇⵜ ⴷ ⵍⴻⵡⵇⴰⵜ ⴷ ⵡⴻⵣⵢⴻⵏ ⵏ ⵢⵉⵊⵊ ⵏ ⵍⵎⵉⵊⴰⵍ ⵏ ⵍⵡⴻⵇⵜ, ⴰⴷ ⵢⵉⵍⵉ ⵓⵇⴻⵟⵟⵓ ⵏ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ. 
ⵏⴻⵛⵛ ⵙⵍⵉⵖ ⵜ, ⵎⴰⵛⴰ ⵡⴰⵔ ⴷ ⴰⵙ ⴼⵀⵉⵎⴻⵖ ⵓ ⵏⵏⵉⵖ: “ⴰ ⵙⵉⴷⵉ ⵉⵏⵓ, ⵎⵉⵏ ⵖⴰ ⵢⵉⵍⵉⵏ ⴷ ⴰⵏⴻⴳⴳⴰⵔⵓ ⵏ ⴰⵢⴰ?” 
ⵏⴻⵜⵜⴰ ⵉⵏⵏⴰ: “ⵓⵢⵓⵔ, ⴷⴰⵏⵉⵢⴰⵍ, ⵎⴰⵖⴰⵔ ⴰⵡⴰⵍⴻⵏ-ⴰ ⴰⴷ ⵇⵇⵉⵎⴻⵏ ⴱⴻⵍⵍⵄⴻⵏ, ⵛⴻⵎⵎⵄⴻⵏ ⴰⵍ ⵍⵡⴻⵇⵜ ⵏ ⵓⵏⴻⴳⴳⴰⵔ. 
ⴰⵟⵟⴰⵙ ⵉ ⵖⴰ ⵉⵜⵜⵡⴰⵙⵙⵉⵣⴻⴷⴳⴻⵏ, ⴰⴷ ⴷⴻⵡⵍⴻⵏ ⴷ ⵉⵛⴻⵎⵍⴰⵍⴻⵏ ⵓ ⴰⴷ ⵜⵜⵡⴰⵚⴻⴼⴼⴰⵏ, ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⴳⴳⴻⵏ ⵜⵓⵄⴻⴼⴼⵏⴰ ⵓ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵡⴰⵔ ⴷ ⴰⵙ ⴼⴻⵀⵀⵎⴻⵏ, ⵎⴰⵛⴰ ⵉⵎⵉⵖⵉⵙⴻⵏ ⴰⴷ ⴼⴻⵀⵎⴻⵏ. 
ⵣⵉ ⵍⵡⴻⵇⵜ ⵉ ⴷⵉ ⵜᵉⵜⵜⵡⴰⴽⴽⴻⵙ ⵜⵖⴰⵔⵚⵜ ⵏ ⵍⴻⴱⴷⴰ ⵓ ⵉⵎⵎⴰⵔⵙ ⵏⵏⵄⵉ ⵏ ⵓⵅⴰⵔⵔⴻⴱ ⴷⴻⴳ ⵡⴻⵎⵛⴰⵏ ⵏⵏⴻⵙ, ⴰⵇⴰ-ⵜ ⴰⵍⴻⴼ ⵓ-ⵎⵉⵜⴰⵢⵏ ⵓ-ⵜⴻⵙⵄⵉⵏ ⵏ ⵡⵓⵙⵙⴰⵏ. 
ⵙⵙⴻⵄⴷ ⵏ ⵡⴻⵏⵏⵉ ⵉⵜⵜⵔⴰⵊⴰⵏ ⵓ ⴰⴷ ⵢⴰⵡⴻⴹ ⴰⵍⴻⴼ ⵓ-ⵜⴻⵍⵜ-ⵎⵢⴰ ⵓ-ⵅⴻⵎⵙⴰ ⵓ-ⵜⵍⴰⵜⵉⵏ ⵏ ⵡⵓⵙⵙⴰⵏ. 
ⵓ ⵛⴻⴽ, ⵓⵢⵓⵔ ⴰⵍ ⴰⵏⴻⴳⴳⴰⵔ. ⴰⴷ ⵜⴰⵔⴻⵢⵢⵃⴻⴷ ⵓ ⴰⴷ ⵜⴻⴽⴽⴰⵔⴻⴷ ⵎⴰⵃⴻⵏⴷ ⴰⴷ ⵜⴻⴽⵙⵉⴷ ⵜⴰⵇⴻⴷⴷⵓⵃⵜ ⵉ ⴷ ⴰⵛ ⴷⴷ-ⵉⴽⴽⴰⵔⴻⵏ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ.” 
