﻿ⵃⵉⵥⵇⵉⵢⴰⵍ.
2.
ⵉⵏⵏⴰ ⴰⵢⵉ: “ⴰ ⵎⵎⵉⵙ ⵏ ⴱⵏⴰⴷⴻⵎ, ⴽⴽⴰⵔ ⵅ ⵉⴹⴰⵔⴻⵏ ⵏⵏⴻⵛ ⵓⵛⴰ ⵏⴻⵛⵛ ⴰⴷ ⴽⵉⴽ ⵙⵙⵉⵡⵍⴻⵖ.” 
ⵍⴰⵎⵉ ⴰⴽⵉⴷⵉ ⵉⵙⵙⵉⵡⴻⵍ, ⵢⵓⴷⴻⴼ-ⴷⴷ ⴷⴰⵢⵉ ⴰⵔⵔⵓⵃ ⵓⵛⴰ ⵉⵙⵙⴻⴽⴽⴰⵔ-ⴷⴷ ⴰⵢⵉ ⵅ ⵉⴹⴰⵔⴻⵏ ⵉⵏⵓ ⵓ ⵏⴻⵛⵛ ⵙⵍⵉⵖ ⵉ ⵜⵎⵉⵊⵊⴰ ⵏ ⵡⴻⵏⵏⵉ ⴽⵉⴷⵉ ⵉⵙⵙⴰⵡⴰⵍⴻⵏ. 
ⵏⴻⵜⵜⴰ ⵉⵏⵏⴰ ⴰⵢⵉ: “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴻⵛⵛ ⵙⴻⴽⴽⴻⵖ ⵛⴻⴽ ⵖⴰⵔ ⴰⵢⵜ ⵏ ⵉⵙⵔⴰⵉⵍ, ⵖⴰⵔ ⵍⴻⴳⵏⵓⵙ ⵉⵖⴻⵡⵡⵖⴻⵏ, ⵉⵏⵏⵉ ⵅⴰⴼⵉ ⵉⵖⴻⵡⵡⵖⴻⵏ. ⵏⵉⵜⵏⵉ ⴷ ⵍⴻⵊⴷⵓⴷ ⵏⵙⴻⵏ ⵄⴻⴷⴷⴰⵏ ⵅⴰⴼⵉ ⴰⵍ ⴰⵙⵙ-ⴰ. 
ⵏⵉⵜⵏⵉ ⴷ ⴰⵔⵔⴰⵡ ⵏ ⵡⵓⴷⴻⵎ ⵉⵇⴻⵙⵃⴻⵏ ⴷ ⵡⵓⵍ ⵉⵣⴻⵍⴳⴻⵏ. ⵏⴻⵛⵛ ⵙⴻⴽⴽⴻⵖ ⵛⴻⴽ ⵖⴰⵔⵙⴻⵏ, ⵉⵜⵜⵅⴻⵚⵚⴰ ⴰⵛ ⴰⴷ ⴰⵙⴻⵏ ⵜⵉⵏⵉⴷ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ!’ 
ⵎⴰ ⴰⴷ ⴰⵛ ⵙⵍⴻⵏ ⵏⵉⵖ ⴰⴷ ⵙⴻⵎⵃⴻⵏ ⴷⵉ ⵎⴰⵏ ⴰⵢⴰ, ⵎⵉⵏⵣⵉ ⵏⵉⵜⵏⵉ ⴷ ⵉⵛⵜ ⵏ ⵜⴰⴷⴷⴰⵔⵜ ⵉⵖⴻⵡⵡⵖⴻⵏ, ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵜⵓⵖⴰ ⴰⵏⴰⴱⵉ ⴷⵉ ⵍⵡⴻⵙⵟ ⵏⵙⴻⵏ. 
ⵓⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵡⴰⵔ ⵣⵣⴰⵢⵙⴻⵏ ⵜⵜⴻⴳⴳⵯⴻⴷ ⵓ ⵡⴰⵔ ⵜⵜⴻⴳⴳⵯⴻⴷ ⵓⵍⴰ ⵣⴻⴳ ⵡⴰⵡⴰⵍⴻⵏ ⵏⵙⴻⵏ. ⵡⴰⵅⵅⴰ ⴰⵇⴰ ⴷⵉⵏ ⵖⴰⵔⴻⴽ ⵜⵉⵣⴻⴳⴳⵯⵓⵔⴰ ⴷ ⵉⵙⴻⵏⵏⴰⵏⴻⵏ ⵓ ⵡⴰⵅⵅⴰ ⵣⴻⴷⴷⵖⴻⵏⵜ ⵖⴰⵔⴻⴽ ⵜⵖⴰⵔⴹⵎⵉⵡⵉⵏ, ⵡⴰⵔ ⵜⵜⴻⴳⴳⵯⴻⴷ ⵛⴰ ⵣⴻⴳ ⵡⴰⵡⴰⵍⴻⵏ ⵏⵙⴻⵏ ⵓ ⵡⴰⵔ ⵣⵣⴰⵢⵙⴻⵏ ⵜⵜⵏⴻⵅⵍⵉⵄ, ⵎⵉⵏⵣⵉ ⵏⵉⵜⵏⵉ ⴷ ⵉⵛⵜ ⵏ ⵜⴰⴷⴷⴰⵔⵜ ⵉⵖⴻⵡⵡⵖⴻⵏ. 
ⴰⴷ ⴽⵉⴷⵙⴻⵏ ⵜⴻⵙⵙⵉⵡⵍⴻⴷ ⵙ ⵡⴰⵡⴰⵍⴻⵏ ⵉⵏⵓ, ⵎⴰ ⴰⴷ ⵙⵍⴻⵏ ⵏⵉⵖ ⴰⴷ ⵙⴻⵎⵃⴻⵏ ⴷⵉ ⵎⴰⵏ ⴰⵢⴰ, ⵎⵉⵏⵣⵉ ⵏⵉⵜⵏⵉ ⴰⵇⴰ ⵜⵜⵖⴻⵡⵡⵖⴻⵏ. 
ⵎⴰⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵙⴻⵍ ⵎⵉⵏ ⴷ ⴰⵛ ⵖⴰ ⵉⵏⵉⵖ, ⵡⴰⵔ ⵜⵜⵖⴻⵡⵡⵉⵖ ⴰⵎ ⵜⴰⴷⴷⴰⵔⵜ ⵏⵏⵉ ⵉⵖⴻⵡⵡⵖⴻⵏ. ⴰⵔⵣⴻⵎ ⴰⵇⴻⵎⵎⵓⵎ ⵏⵏⴻⵛ ⵏⵉⵛⴰⵏ ⵓⵛⴰ ⴻⵛⵛ ⵎⵉⵏ ⴷ ⴰⵛ ⵖⴰ ⵡⵛⴻⵖ.” 
ⵓⵛⴰ ⵥⵔⵉⵖ, ⵅⵣⴰⵔ, ⵉⵊⵊ ⵏ ⵓⴼⵓⵙ ⵉⵙⵙⵡⵉⵥⵥⴻⴹ-ⴷⴷ ⵖⴰⵔⵉ, ⵓ ⵅⵣⴰⵔ, ⴷⴰⵢⴻⵙ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ. 
ⵏⴻⵜⵜⴰ ⵉⴱⴻⵣⵣⴻⵄ ⵉ-ⵜ ⵣⵣⴰⵜⵉ. ⵜⵓⵖⴰ ⵢⵓⵔⴰ ⵣⵉ ⵙⴻⵏⵏⴻⵊ ⴷ ⵡⴰⴷⴷⴰⵢ ⵓⵛⴰ ⵜⵜⵡⴰⵔⵉⵏ ⴷⴰⵢⴻⵙ ⵉⵣⵍⴰⵏ ⵏ ⵡⴻⵛⴹⴰⵏ ⴷ ⵓⵙⵇⵉⵏⵏⴻⴼ ⴷ ⵓⵡⴻⵃⵡⴻⵃ ⵏ ⵜⴰⵎⴰⵔⴰ. 
