﻿ⵉⵥⵍⴰⵏ ⵙ ⵉⴳⴻⵊⴷⵓⵔⴻⵏ.
3.
ⴰⵍⵉⴼ. ⵏⴻⵛⵛ ⴷ ⴰⵔⵢⴰⵣ ⵏⵏⵉ ⵉⵥⵔⵉⵏ ⵍⴻⵖⴱⴻⵏ ⵙ ⵡⴻⵄⵎⵓⴷ ⵏ ⵓⴷⵓⵇⵇⴻⵣ ⵏⵏⴻⵙ ⵏ ⵓⴼⵓⴳⴻⵎ. 
ⴰⵍⵉⴼ. ⵏⴻⵜⵜⴰ ⵉⵏⴷⴻⵀ ⴰⵢⵉ ⵓⵛⴰ ⵉⵊⵊⴰ ⴰⵢⵉ ⴰⴷ ⵓⵢⵓⵔⴻⵖ ⴷⵉ ⵜⴰⴵⴻⵙⵜ, ⵡⴰⵔ ⵉⴵⵉ ⴷⵉ ⵜⴼⴰⵡⵜ. 
ⴰⵍⵉⴼ. ⵙ ⵜⵉⴷⴻⵜⵜ, ⵏⴻⵜⵜⴰ ⵢⴰⵔⵔⴰ ⵍⴻⴱⴷⴰ ⴰⴼⵓⵙ ⵏⵏⴻⵙ ⴹⵉⴷⴷ ⵉⵏⵓ, ⴰⵙⵙ ⵉⴽⵎⴻⵍ. 
ⴱⵉⵜ. ⵏⴻⵜⵜⴰ ⵉⴹⴻⵢⵢⴻⵄ ⴰⵢⵙⵓⵎ ⵉⵏⵓ ⴷ ⵜⴻⵍⵎⴻⵛⵜ ⵉⵏⵓ, ⵢⴰⵔⵥⴰ ⵉⵖⵙⴰⵏ ⵉⵏⵓ. 
ⴱⵉⵜ. ⵏⴻⵜⵜⴰ ⴱⵏⴰ ⵉⵛⵜ ⵏ ⵍⴻⴱⵏⵉⵢⵢⴻⵜ ⵅⴰⴼⵉ ⵓ ⵉⵇⵓⵡⵡⴰⵔ ⴰⵢⵉ ⵙ ⴰⵔⵔⵀⴰⵊ ⴷ ⵜⴰⵎⴰⵔⴰ. 
ⴱⵉⵜ. ⴷⵉ ⵟⵟⵍⴰⵎ ⵉⵊⵊⴰ ⴰⵢⵉ ⵣⴻⴷⴷⵖⴻⵖ, ⴰⵎ ⵉⵎⴻⵜⵜⴰⵏ ⵏ ⵡⴰⵟⵟⴰⵙ ⵣⴻⴳ ⵡⴰⵎⵉ. 
ⴳⵉⵎⴻⵍ. ⵏⴻⵜⵜⴰ ⵉⴱⴻⵍⵍⴻⵄ ⴰⵢⵉ ⵊⴰⵔ ⵍⴻⵃⵢⵓⴹ, ⵡⴰⵔ ⵣⴻⵎⵎⴰⵔⴻⵖ ⴰⴷ ⵏⴻⵊⵎⴻⵖ. ⵉⵙⵙⴻⴷⵇⴻⵍ ⵅⴰⴼⵉ ⵙⵙⵏⴰⵙⴻⵍ ⵉⵏⵓ ⵏ ⵏⵏⵃⴰⵙ. 
ⴳⵉⵎⴻⵍ. ⵄⴰⴷ ⵎⴻⵍⵎⵉ ⵜⵜⵍⴰⵖⵉⵖ ⵓ ⵙⵖⵓⵢⵢⵓⵖ, ⵏⴻⵜⵜⴰ ⵉⵇⵇⵉⵎ ⵉⴱⴽⴻⵎ ⵖⴰⵔ ⵜⵥⴰⴵⵉⵜ ⵉⵏⵓ. 
ⴳⵉⵎⴻⵍ. ⵙ ⵜⵚⵓⴹⴰⵔ ⵉⵏⵊⴰⵔⴻⵏ ⵉⴱⴻⵍⵍⴻⵄ ⵅⴰⴼⵉ ⴰⴱⵔⵉⴷ, ⵉⵙⵙⴼⴰⵔⵖ ⵉⵎⴻⵙⵔⴰⵇ ⵉⵏⵓ. 
ⴷⴰⵍⵉⵜ. ⵜⵓⵖⴰ ⵏⴻⵜⵜⴰ ⵉ ⵏⴻⵛⵛ ⴰⵎ ⴷⴷⵓⴱ ⵉⵜⵜⵃⴰⵎⴰⵏ, ⴰⵎ ⵡⴰⵢⵔⴰⴷ ⴷⴻⴳ ⵉⵎⵓⵛⴰⵏ ⵉⵏⵏⵓⴼⴰⵔⴻⵏ. 
ⴷⴰⵍⵉⵜ. ⵏⴻⵜⵜⴰ ⵢⵓⵥⵥⴻⵍ ⵅⴰⴼⵉ ⵣⴻⴳ ⵡⴻⴱⵔⵉⴷ, ⵉⵎⴻⵣⵣⴻⵇ ⴰⵢⵉ, ⵡⴰⵔ ⴷ ⴰⵢⵉ ⵉⵊⵊⵉ ⵛⴰ. 
ⴷⴰⵍⵉⵜ. ⵏⴻⵜⵜⴰ ⵉⵙⵙⴻⵎⵃⴻⴹ ⵍⵇⴻⵡⵙ ⵏⵏⴻⵙ ⵓⵛⴰ ⵉⵊⵊⴰ ⴰⵢⵉ ⴰⴷ ⵉⵍⵉⵖ ⴷ ⴰⵡⴰⴹ ⵉ ⴼⵍⵉⵜⵛⴰ ⵏⵏⴻⵙ. 
ⵀⵉ. ⴼⵍⵉⵜⵛⴰⵜ ⵣⴻⴳ ⵡⴻⵇⵔⴰⴱ ⵏⵏⴻⵙ ⵉⵊⵊⴰ ⵉ-ⵜⴻⵏⵜ ⴰⴷ ⴰⴷⴼⴻⵏⵜ ⴷⵉ ⵜⵉⵥⵥⴰⵍ ⵉⵏⵓ. 
ⵀⵉ. ⴷⴻⵡⵍⴻⵖ ⴷ ⵜⴰⵙⴻⴹⵀⴰⵛⵜ ⵉ ⵎⴰⵔⵔⴰ ⵍⴳⴻⵏⵙ ⵉⵏⵓ, ⴷ ⵉⵣⵍⵉ ⵏⵙⴻⵏ ⵏ ⵓⵣⴰⵡⴰⵔ ⴰⵙⵙ ⵉⵎⵓⵏ. 
ⵀⵉ. ⵏⴻⵜⵜⴰ ⵉⵙⵙⵊⵊⵉⵡⴻⵏ ⴰⵢⵉ ⵙ ⵜⴰⵔⵣⵓⴳⵉ, ⵉⵙⵙⴻⵙⵙⵓ ⴰⵢⵉ ⵙ ⵛⵛⵉⵃ. 
ⵡⴰⵡ. ⵜⵉⵖⵎⴰⵙ ⵉⵏⵓ ⵉⵊⵊⴰ ⵉ-ⵜⴻⵏⵜ ⵣⴻⵄⵄⴼⴻⵏⵜ ⴷⴻⴳ ⵓⵇⴰⵢⴰⵙ ⴰⵍⴰⵎⵉ ⴰⵔⵥⵉⵏⵜ, ⵉⴷⵍⴰ ⴰⵢⵉ ⵙ ⵢⵉⵖⵖⴻⴷ. 
ⵡⴰⵡ. ⵛⴻⴽ ⵜⴻⵙⵙⵉⴳⴳⵯⴻⵊⴻⴷ ⵍⴻⵄⵎⴰⵔ ⵉⵏⵓ ⵅ ⵍⴻⵀⵏⴰ, ⵏⴻⵛⵛ ⵜⵜⵓⵖ ⵎⴰⵔⵔⴰ ⵜⵛⵓⵏⵉ. 
ⵡⴰⵡ. ⵏⴻⵛⵛ ⵏⵏⵉⵖ: “ⵊⵊⴻⵀⴷ ⵉⵏⵓ ⵉⵇⴹⴰ, ⵓⵍⴰ ⴷ ⴰⵙⵉⵜⴻⵎ ⵉⵏⵓ ⴷⵉ ⵙⵉⴷⵉ.” 
ⵣⴰⵢⵉⵏ. ⵄⵇⴻⵍ ⵅ ⵍⴻⵖⴱⴻⵏ ⵉⵏⵓ ⴷ ⵜⵎⴻⵃⴱⴰⵙⵜ ⵉⵏⵓ, ⵅ ⵛⵛⵉⵃ ⴷ ⴰⵔⵔⵀⴰⵊ. 
ⵣⴰⵢⵉⵏ. ⵍⴻⵄⵎⴰⵔ ⵉⵏⵓ ⵉⵜⵜⵅⴰⵔⵔⴻⵚ ⵏⵉⵛⴰⵏ ⴷⵉ ⵎⴰⵏ ⴰⵢⴰ, ⴰⵇⴰ ⵉⵛⴹⴻⵏ ⴷⴰⵢⵉ. 
ⵣⴰⵢⵉⵏ. ⴰⵢⴰ ⵅⵙⴻⵖ ⴰⴷ ⵜ ⴰⵔⵔⴻⵖ ⵖⴰⵔ ⵡⵓⵍ, ⵅ ⵓⵢⴰ ⴰⴷ ⵇⵇⵉⵎⴻⵖ ⵙⵙⵉⵜⵉⵎⴻⵖ ⵄⴰⴷ. 
ⵅⵉⵜ. ⵙ ⵜⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵏ ⵙⵉⴷⵉ, ⴰⵇⴰ ⵡⴰⵔ ⵏⴻⵜⵜⵡⴰⵀⴻⵍⵍⴻⴽ ⵛⴰ, ⵎⵉⵏⵣⵉ ⴰⵔⵔⴻⵃⵎⴻⵜ ⵏⵏⴻⵙ ⵄⴻⵎⵎⴰⵔⵚ ⵡⴰⵔ ⵜᵉⵜⵜⴱⴻⴷⴷⵉ. 
ⵅⵉⵜ. ⴰⵇⴰ-ⵜⵜ ⴷ ⵊⴷⵉⴷ ⴽⵓⵍ ⵚⵚⴱⴻⵃ, ⵍⴰⵎⴰⵏ ⵏⵏⴻⵛ ⴷ ⴰⵎⴻⵇⵇⵔⴰⵏ. 
ⵅⵉⵜ. ⵜⴰⵙⵖⴰⵔⵜ ⵉⵏⵓ ⴷ ⵙⵉⴷⵉ, ⴰⵎⵎⵓ ⵉ ⵉⵇⵇⴰⵔ ⵍⴻⵄⵎⴰⵔ ⵉⵏⵓ, ⵅ ⵓⵢⴰ ⵜⵜⵖⵉⵎⵉⵖ ⵙⵙⵉⵜⵉⵎⴻⵖ ⴷⴰⵢⴻⵙ. 
ⵜⵉⵜ. ⵉⵚⴱⴻⵃ ⵙⵉⴷⵉ ⵉ ⵢⵉⵏⵏⵉ ⴷⴰⵢⴻⵙ ⵉⵙⵙⵉⵜⵉⵎⴻⵏ, ⵉ ⵍⴻⵄⵎⴰⵔ ⵏⵏⵉ ⵅⴰⵙ ⵢⴰⵔⴻⵣⵣⵓⵏ. 
ⵜⵉⵜ. ⴰⵇⴰ ⵎⵍⵉⵃ ⴰⵔⴰⵊⵉ ⵙ ⵓⵙⵉⵜⴻⵎ ⵖⴰⵔ ⵣⵣⴰⵜ, ⴰⵔⴰⵊⵉ ⴷⵉ ⵍⵀⵓⴷⵏⴻⵜ ⵖⴰⵔ ⵓⵙⴻⵏⵊⴻⵎ ⵣⵉ ⵙⵉⴷⵉ. 
ⵜⵉⵜ. ⵎⵍⵉⵃ ⵉ ⵡⴻⵔⵢⴰⵣ ⴰⴷ ⵢⴰⵔⴱⵓ ⴰⵣⴰⵢⵍⵓ ⴷⵉ ⵜⴻⵎⵥⵉ ⵏⵏⴻⵙ. 
ⵢⵓⴷ. ⴻⵊⵊ ⵉ-ⵜ ⴰⴷ ⵉⵇⵇⵉⵎ ⵃⴰⴼⵉ, ⴰⴷ ⵉⵙⵙⴻⵖⴷ, ⵎⴰⵖⴰⵔ ⵙⵉⴷⵉ ⵉⴳⴳⴰ ⵉ-ⵜⵜ ⵅⴰⵙ. 
ⵢⵓⴷ. ⴻⵊⵊ ⵉ-ⵜ ⴰⴷ ⵉⴳⴳ ⴰⵇⴻⵎⵎⵓⵎ ⵏⵏⴻⵙ ⴷⵉ ⵜⵄⴻⵊⵊⴰⵊⵜ, ⴰⴷ ⵢⵉⵏⵉ: “ⴰⴷ ⵜⴰⵖ ⵉⴵⴰ ⵍⴰⵢⴰⵙ!” 
ⵢⵓⴷ. ⴻⵊⵊ ⵉ-ⵜ ⴰⴷ ⵉⵡⵛ ⴰⵎⴻⴳⴳⵉⵣ ⵉ ⵡⴻⵏⵏⵉ ⵜ ⵉⵛⵛⴰⵜⴻⵏ, ⴻⵊⵊ ⵉ-ⵜ ⴰⴷ ⵉⵜⵜⵡⴰⵊⵊⵉⵡⴻⵏ ⵙ ⵓⵙⴻⵃⵇⴰⵔ. 
ⴽⴰⴼ. ⵎⵉⵏⵣⵉ ⵙⵉⴷⵉ ⵉⵏⵓ ⵡⴰⵔ ⵉⵏⴻⵟⵟⴰⵔ ⵃⴻⴷ ⵉ ⵍⴻⴱⴷⴰ, 
ⴽⴰⴼ. ⵎⴰⵛⴰ ⵎⴰⵍⴰ ⵏⴻⵜⵜⴰ ⵉⵙⵙⴻⵛⴹⴻⵏ ⵃⴻⴷ, ⴰⴷ ⵅⴰⵙ ⵉⵃⵉⵏⵏ ⵄⴰⵡⴻⴷ ⵄⵍⴰⵃⵙⴰⴱ ⵍⴻⵎⵖⴰⵔⴻⵜ ⵏ ⵜⵎⴻⵅⵙⵉⵡⵜ ⵏⵏⴻⵙ ⵉⵛⵓⵡⵡⴰⵔⴻⵏ, 
ⴽⴰⴼ. ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵃⴻⵚⵚⴰⵔ ⵏⵉⵖ ⵉⵙⵙⴻⵛⴹⵉⵏ ⵜⴰⵔⵡⴰ ⵏ ⵡⴻⵔⵢⴰⵣ ⵙ ⵡⵓⵍ. 
ⵍⴰⵎⵉⴷ. ⵅⵎⵉ ⵖⴰ ⵍⴻⴱⵣⴻⵏ ⵙⴰⴷⵓ ⵉⴹⴰⵔⴻⵏ ⵎⴰⵔⵔⴰ ⵉⵎⴻⵃⴱⴰⵙ ⵏ ⵜⴻⵎⵎⵓⵔⵜ, 
ⵍⴰⵎⵉⴷ. ⵅⵎⵉ ⵖⴰ ⵃⴰⵔⵔⴼⴻⵏ ⵜⴰⵙⵖⴰⵔⵜ ⵏ ⵡⴻⵔⵢⴰⵣ ⵣⵣⴰⵜ ⵉ ⵡⵓⴷⴻⵎ ⵏ ⵓⵎⵄⵓⴵⵉ ⵅ ⴽⵓⵍⵛⵉ, 
ⵍⴰⵎⵉⴷ. ⵅⵎⵉ ⵖⴰ ⵇⴻⵍⴱⴻⵏ ⴷⴷⴻⵄⵡⴻⵜ ⵏ ⴱⵏⴰⴷⴻⵎ, ⵎⴰ ⵣⴻⵄⵎⴰ ⵙⵉⴷⵉ ⵉⵏⵓ ⵡⴰⵔ ⵉⵜⵜⵡⵉⵍⵉ ⵎⴰⵏ ⴰⵢⴰ? 
ⵎⵉⵎ. ⵎⴰⵏ ⵡⴻⵏ ⵉ ⵉⵇⵇⴰⵔⴻⵏ ⵛⴰ ⵏ ⵍⵃⴰⵊⵊⴻⵜ ⵓⵛⴰ ⵅⴻⵏⵏⵉ ⵜⴻⵎⵙⴰⵔ, ⵎⴰⵍⴰ ⵡⴰⵔ ⵜⵜ ⵢⵓⵎⵓⵔ ⵙⵉⴷⵉ ⵉⵏⵓ? 
ⵎⵉⵎ. ⵎⴰ ⵡⴰⵔ ⴷⴷ-ⵉⵜⵜⵉⵙ ⵣⴻⴳ ⵓⵇⴻⵎⵎⵓⵎ ⵏ ⵓⵎⵄⵓⴵⵉ ⵅ ⴽⵓⵍⵛⵉ ⵎⴰⵔⵔⴰ ⵎⵉⵏ ⵡⴰⵔ ⵉⵃⵍⵉⵏ ⵓⵍⴰ ⴷ ⵎⴰⵔⵔⴰ ⵎⵉⵏ ⵉⵚⴻⴱⵃⴻⵏ? 
ⵎⵉⵎ. ⵎⴰⵎⵎⴻⵛ ⵉⵜⵜⵛⴻⵜⵛⴰ ⴱⵏⴰⴷⴻⵎ ⵉⴷⴷⴰⵔⴻⵏ ⵄⴰⴷ? ⴻⵊⵊ ⵡⴻⵔⵢⴰⵣ ⴰⴷ ⵉⵛⴻⵜⵛⴰ ⵣⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏⵏⴻⵙ. 
ⵏⵓⵏ. ⴻⵊⵊ ⴰⵏⴻⵖ ⴰⴷ ⵏⴻⵅⵣⴰⵔ ⵉⴱⵔⵉⴷⴻⵏ ⵏⵏⴻⵖ, ⴰⴷ ⴷⴰⵢⵙⴻⵏ ⵏⴰⵔⵣⵓ, ⴻⵊⵊ ⴰⵏⴻⵖ ⴰⴷ ⴷⴷ-ⵏⴻⴷⵡⴻⵍ ⵖⴰⵔ ⵙⵉⴷⵉ. 
ⵏⵓⵏ. ⴻⵊⵊ ⴰⵏⴻⵖ ⴰⴷ ⵏⴻⵙⵙⴳⴻⵄⵄⴻⴷ ⴰⴽ-ⴷ ⵉⴼⴰⵙⵙⴻⵏ ⵏⵏⴻⵖ ⵓⵍⴰ ⴷ ⵡⵓⵍⴰⵡⴻⵏ ⵏⵏⴻⵖ, ⵖⴰⵔ ⴰⵔⴻⴱⴱⵉ ⴷⴻⴳ ⵓⵊⴻⵏⵏⴰ. 
ⵏⵓⵏ. ⵏⴻⵛⵛⵉⵏ ⵏⵄⴻⴷⴷⴰ ⵓ ⵏⵖⴻⵡⵡⴻⵖ, ⵛⴻⴽ ⵡⴰⵔ ⵜⴻⵖⴼⴰⵔⴻⴷ ⵛⴰ ⵉ ⵓⵢⴰ. 
ⵙⴰⵎⵉⵅ. ⵛⴻⴽ ⵜⵍⴻⵃⵃⴼⴻⴷ ⴰⵏⴻⵖ ⵙ ⵡⴻⵖⴹⴰⴱ, ⵜⴻⴹⴼⴰⵔⴻⴹ ⴰⵏⴻⵖ, ⵜⴻⵏⵖⵉⴷ, ⵡⴰⵔ ⵅⴰⵏⴻⵖ ⵜⵃⵉⵡⵍⴻⴷ ⵛⴰ. 
ⵙⴰⵎⵉⵅ. ⵜⵍⴻⵃⵃⴼⴻⴷ ⵉⵅⴻⴼ ⵏⵏⴻⵛ ⴷⴻⴳ ⵓⵙⴻⵢⵏⵓ, ⵎⴰⵃⴻⵏⴷ ⴰⴷ ⵜⴰⴼ ⵜⴰⵥⴰⴵⵉⵜ ⵡⴰⵔ ⵜⵣⴻⵎⵎⴰⵔ ⴰⴷ ⵜⴻⵄⴷⵓ. 
ⵙⴰⵎⵉⵅ. ⵛⴻⴽ ⵜⴰⵔⵔⵉⴷ-ⴷⴷ ⴰⵏⴻⵖ ⴷ ⵜⴰⵅⵎⵓⵊⵉ ⴷ ⵡⴻⴼⵔⴰⴹ ⴷⵉ ⵍⵡⴻⵙⵟ ⵏ ⵍⴻⴳⵏⵓⵙ. 
ⴱⵉ. ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵖ ⴰⵔⵣⵎⴻⵏ-ⴷⴷ ⵖⴰⵔⵏⴻⵖ ⴰⵇⴻⵎⵎⵓⵎ ⵏⵙⴻⵏ. 
ⴱⵉ. ⵜⵉⴳⴳⵯⵓⴷⴰ ⴷ ⵍⴼⴻⵅ ⴷⴻⵡⵍⴻⵏ ⴷ ⴰⵣⵢⴻⵏ ⵣⵣⴰⵢⵏⴻⵖ, ⴰⵅⴰⵔⵔⴻⴱ ⴷ ⴰⵔⵥⵉⵢⵢⴻⵜ. 
ⴱⵉ. ⵣⵉ ⵜⵉⵟⵟⴰⵡⵉⵏ ⵉⵏⵓ ⵜⵜⴰⵣⵣⵍⴻⵏⵜ ⵉⵎⴻⵟⵟⴰⵡⴻⵏ ⵅ ⵜⴰⵔⴻⵥⵥⵉⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ. 
ⵄⴰⵢⵉⵏ. ⵜⵉⵟⵟ ⵉⵏⵓ ⵜⴻⵇⵇⵉⵎ ⵜᵉⵜⵜⴰⵣⵣⴻⵍ ⵙ ⵉⵎⴻⵟⵟⴰⵡⴻⵏ, ⵡⴰⵔ ⵜᵉⵜⵜⴰⵔⴻⵢⵢⵉⵃ, ⵡⴰⵔ ⵜⴻⵙⵙⴱⴻⴷⴷⵉ, 
ⵄⴰⵢⵉⵏ. ⴰⵍ ⴷ ⵉ ⵖⴰ ⵉⵙⵙⵉⵊⵊ ⵙⵉⴷⵉ ⵣⴻⴳ ⵓⵊⴻⵏⵏⴰ, ⵓⵛⴰ ⴰⴷ ⵉⵜⵜⵡⴰⵍⴰ. 
ⵄⴰⵢⵉⵏ. ⵜⵉⵟⵟ ⵉⵏⵓ ⵜᵉⵜⵜⴻⴳⴳ ⴰⵢⵉ ⵍⴻⵃⵔⵉⵇ ⴷⵉ ⵍⴻⵄⵎⴰⵔ ⵉⵏⵓ, ⵣⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⵢⴻⵙⵙⵉⵙ ⵏ ⵜⴻⵏⴷⵉⵏⵜ ⵉⵏⵓ. 
ⵜⵙⴰⴷⵉ. ⴰⵔⴻⴷⴷⴼⴻⵏ ⴰⵢⵉ-ⴷⴷ ⵍⵄⴻⴷⵢⴰⵏ ⵉⵏⵓ ⴱⵍⴰ ⵇⴻⵟⵟⵓ, ⴰⵎ ⵢⵉⵊⵊ ⵏ ⵡⴻⵊⴹⵉⴹ, ⵎⴰⵛⴰ ⴱⵍⴰ ⵙⵙⵉⴱⴱⴻⵜ. 
ⵜⵙⴰⴷⵉ. ⵏⵉⵜⵏⵉ ⵙⵙⴱⴻⴽⵎⴻⵏ ⵜⵓⴷⴰⵔⵜ ⵉⵏⵓ ⴷⴻⴳ ⵡⴰⵏⵓ, ⵓⵛⴰ ⵏⴹⴰⵔⴻⵏ ⴰⵥⵔⵓ ⵅⴰⴼⵉ. 
ⵜⵙⴰⴷⵉ. ⴰⵎⴰⵏ ⵃⴻⵎⵍⴻⵏ-ⴷⴷ ⵅ ⵓⵣⴻⴵⵉⴼ ⵉⵏⵓ, ⵏⵏⵉⵖ: “ⴰⵇⴰ ⵡⴰⵔ ⵇⵇⵉⵎⴻⵖ ⴵⵉⵖ!” 
ⵇⵓⴼ. ⴰ ⵙⵉⴷⵉ, ⵏⴻⵛⵛ ⵍⴰⵖⵉⵖ ⵅ ⵢⵉⵙⴻⵎ ⵏⵏⴻⵛ, ⵣⵉ ⵍⴰⴵⴰⵖ ⵏ ⵡⴰⵏⵓ. 
ⵇⵓⴼ. ⵛⴻⴽ ⵜⴻⵙⵍⵉⴷ ⵉ ⵜⵎⵉⵊⵊⴰ ⵉⵏⵓ, ⵡⴰⵔ ⵜⵜⴻⵇⵇⴻⵏ ⴰⵎⴻⵣⵣⵓⵖ ⵏⵏⴻⵛ ⵣⵣⴰⵜ ⵉ ⵓⵣⴻⵀⵀⴰⵔ ⵉⵏⵓ, ⵣⵣⴰⵜ ⵉ ⵉⵖⵓⵢⵢⴰⵏ ⵉⵏⵓ! 
ⵇⵓⴼ. ⵛⴻⴽ ⵜⵓⵙⵉⴷ-ⴷⴷ ⵖⴰⵔⵉ ⴷⴻⴳ ⵡⴰⵙⵙ ⵉ ⴷ ⴰⵛ ⴷⴷ-ⵍⴰⵖⵉⵖ, ⵜⴻⵏⵏⵉⴷ: “ⵡⴰⵔ ⵜⵜⴻⴳⴳⵯⴻⴷ ⵛⴰ!” 
ⵔⵉⵅ. ⵛⴻⴽ, ⴰ ⵙⵉⴷⵉ ⵉⵏⵓ, ⵜⴰⵔⴻⴼⵄⴻⴷ ⴷⴷⵄⴰⵡⵉ ⵅ ⵍⴻⵄⵎⴰⵔ ⵉⵏⵓ, ⵛⴻⴽ ⵜⴼⴻⴽⴽⴻⴷ ⵜⵓⴷⴰⵔⵜ ⵉⵏⵓ. 
ⵔⵉⵅ. ⴰ ⵙⵉⴷⵉ, ⵜⴻⵥⵔⵉⴷ ⴷⴷⴻⴵ ⵉ ⴷⴰⵢⵉ ⵉⴳⴳⵉⵏ, ⴰⵖ ⴰⵢⵉ ⵜⴰⵙⵖⴰⵔⵜ ⵉⵏⵓ. 
ⵔⵉⵅ. ⵛⴻⴽ ⵜⴻⵥⵔⵉⴷ ⵎⴰⵔⵔⴰ ⴰⵅⵍⴰⴼ ⵏⵙⴻⵏ, ⵎⴰⵔⵔⴰ ⵎⵉⵏ ⵏⵡⴰⵏ ⴹⵉⴷⴷ ⵉⵏⵓ. 
ⵛⵉⵏ. ⵛⴻⴽ ⵜⴻⵙⵍⵉⴷ ⵍⵃⴻⴳⵔⴰ ⵏⵙⴻⵏ, ⴰ ⵙⵉⴷⵉ, ⵎⴰⵔⵔⴰ ⵎⵉⵏ ⵏⵡⴰⵏ ⴹⵉⴷⴷ ⵉⵏⵓ, 
ⵛⵉⵏ. ⴰⵡⴰⵍⴻⵏ ⵏⵏⵉ ⴷⴷ-ⵉⵜⵜⴻⴼⴼⵖⴻⵏ ⵣⵉ ⵊⴰⵔ ⵉⵢⴻⵏⵛⵉⵛⴻⵏ ⵏ ⵢⵉⵏⵏⵉ ⵅⴰⴼⵉ ⵉⴽⴽⴰⵔⴻⵏ, ⵓⵍⴰ ⴷ ⵍⴻⵎⵡⴰⵢⴰⵍ ⵏⵙⴻⵏ ⵏ ⵓⵅⴰⵔⵔⴻⵚ ⵅⴰⴼⵉ ⴰⵙⵙ ⵉⵎⵓⵏ. 
ⵛⵉⵏ. ⵅⵣⴰⵔ ⵖⴰⵔ ⵓⵖⵉⵎⵉ ⴷ ⵓⴱⴻⴷⴷⵉ ⵏⵙⴻⵏ, ⵏⴻⵛⵛ ⴷ ⵉⵣⵍⵉ ⵏⵙⴻⵏ ⵏ ⵓⵙⵜⴻⵀⵣⵉ. 
ⵜⴰⴼ. ⴰ ⵙⵉⴷⵉ, ⵅⴻⴵⴻⵚ ⵉ-ⵜⴻⵏ ⵍⵎⵓⵏⴻⵜ ⵏⵙⴻⵏ ⵉ ⵉⵙⴷⴰⵀⴻⴵⴻⵏ, ⵄⵍⴰⵃⵙⴰⴱ ⵜⵉⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵙⴻⵏ. 
ⵜⴰⴼ. ⵙⴷⴰⵖⵔⴻⵍ ⵓⵍⴰⵡⴻⵏ ⵏⵙⴻⵏ, ⴻⵊⵊ ⵏⵏⴻⵄⵍⴻⵜ ⵏⵏⴻⵛ ⴰⴷ ⴷⴷ-ⵅⴰⵙⴻⵏ-ⵜⴻⵡⴹⴰ. 
ⵜⴰⴼ. ⴹⴼⴰⵔ ⵉ-ⵜⴻⵏ ⴷⴻⴳ ⵡⴻⵖⴹⴰⴱ ⵏⵏⴻⵛ, ⵇⴹⴰ ⵅⴰⵙⴻⵏ ⵣⵉ ⵙⴰⴷⵓ ⵓⵊⴻⵏⵏⴰ ⵏ ⵙⵉⴷⵉ. 
