﻿ⵉⵛⴰⵄⵢⴰ.
31.
“ⵓⵛⵜ ⵅ ⵢⵉⵏⵏⵉ ⴷⴷ-ⵉⵀⵡⴰⵏ ⵖⴰⵔ ⵎⵉⵚⵔⴰ ⵃⵉⵎⴰ ⴰⴷ ⴰⴼⴻⵏ ⵜⵡⵉⵣⴰ, ⵉⵏⵏⵉ ⵉⵜⵜⴻⵛⵍⴻⵏ ⵅ ⵢⴻⵢⵙⴰⵏ ⵓ ⵜⵜⴻⴳⴳⴻⵏ ⵍⴰⵎⴰⵏ ⴷⴻⴳ ⵉⴽⴰⵔⵔⵓⵜⴻⵏ, ⵎⵉⵏⵣⵉ ⵏⵉⵜⵏⵉ ⴷⴻⴳ ⵡⴰⵟⵟⴰⵙ, ⵓⵍⴰ ⵅ ⵢⵉⵏⵏⵉ ⵉⵏⵢⵉⵏ ⵅ ⵢⴻⵢⵙⴰⵏ, ⵎⵉⵏⵣⵉ ⵏⵉⵜⵏⵉ ⵊⵊⴻⵀⴷⴻⵏ, ⴰⵅⵎⵉ ⵡⴰⵔ ⵅⴻⵣⵣⴰⵔⴻⵏ ⵖⴰⵔ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ ⵓ ⵡⴰⵔ ⴰⵔⴻⵣⵣⵓⵏ ⵙⵉⴷⵉ.” 
“ⵎⴰⵛⴰ ⵓⵍⴰ ⴷ ⵏⴻⵜⵜⴰ ⴷ ⴰⵎⵉⵖⵉⵙ, ⵏⴻⵜⵜⴰ ⴳⴳⵓⵔ ⴰⴷ ⵢⴻⵊⵊ ⵍⵖⴰⵔ ⴰⴷ ⴷⴷ-ⵢⴰⵙ. ⵡⴰⵔ ⵉⵜⵜⴷⵉⴽⴽⵡⵉⵍ ⴷⴻⴳ ⵡⴰⵡⴰⵍ ⵏⵏⴻⵙ, ⴰⴷ ⵉⴽⴽⴰⵔ ⴹⵉⴷⴷ ⵉ ⵜⴰⴷⴷⴰⵔⵜ ⵏ ⵉⵄⴻⴼⴼⴰⵏⴻⵏ ⵓ ⴹⵉⴷⴷ ⵉ ⵜⵡⵉⵣⴰ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ. 
ⵎⴰⵖⴰⵔ ⵉⵎⵉⵚⵔⵉⵢⵢⴻⵏ ⴷ ⵉⵡⴷⴰⵏ, ⵡⴰⵔ ⴵⵉⵏ ⴷ ⴰⵔⴻⴱⴱⵉ, ⵓⵛⴰ ⵉⵢⵙⴰⵏ ⵏⵙⴻⵏ ⴷ ⴰⵢⵙⵓⵎ, ⵡⴰⵔ ⵉⴵⵉ ⴷ ⴰⵔⵔⵓⵃ. ⴰⴷ ⵉⵙⴰⵔⵔⴻⵃ ⵙⵉⴷⵉ ⴰⴼⵓⵙ ⵏⵏⴻⵙ ⴰⵍ ⵉ ⵖⴰ ⵉⵏⵇⴰⵔⴹ ⵡⴻⵏⵏⵉ ⵉⵡⵛⵉⵏ ⴰⴼⵓⵙ, ⵓⵛⴰ ⵅⴻⵏⵏⵉ ⴰⴷ ⵉⵡⴹⴰ ⵓⵍⴰ ⴷ ⵡⴻⵏⵏⵉ ⴷⴰⵢⴻⵙ ⵉⵡⵛⵉⵏ ⴰⴼⵓⵙ. ⴰⵎⵎⵓ ⵉ ⵖⴰ ⵇⴹⴰⵏ ⵏⵉⵜⵏⵉ ⵎⴰⵔⵔⴰ ⵉⴷⵙⴻⵏ.” 
“ⵎⴰⵖⴰⵔ ⴰⵎⵎⵓ ⵉ ⴷ ⴰⵢⵉ ⵉⵏⵏⴰ ⵙⵉⴷⵉ: ‘ⴰⵎ ⵎⴰⵎⵎⴻⵛ ⵉⵜⵜⴰⵔⵔⵓⵊⴷⵓⴷ ⵡⴰⵢⵔⴰⴷ ⵏⵉⵖ ⵡⴰⵢⵔⴰⴷ ⴰⵎⴻⵥⵢⴰⵏ ⵅ ⵣⵣⴰⵔⴷⴻⵜ ⵏⵏⴻⵙ ⵅⵎⵉ ⵅⴰⵙ ⴷⴷ-ⵜⵜⵍⴰⵖⴰⵏ ⵉⵊⵊ ⵏ ⵓⴱⴰⵔⵔⵓ ⵏ ⵉⵎⴻⴽⵙⴰⵡⴻⵏ, ⴱⵍⴰ ⵎⴰ ⴰⴷ ⵉⵏⵏⴻⵅⵍⴻⵄ ⵣⵉ ⵜⵎⵉⵊⵊⴰ ⵏⵙⴻⵏ ⵓ ⵡⴰⵔ ⵉⵅⴻⵏⵏⴻⵙ ⵣⴻⴳ ⵓⴱⴰⵔⵔⵓ ⵏⵙⴻⵏ, ⴰⵎⵎⵓ ⵉ ⵖⴰ ⵉⵀⵡⴰ ⵓⵍⴰ ⴷ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵃⵉⵎⴰ ⴰⴷ ⵉⵎⵎⵏⴻⵖ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ ⵓ ⵅ ⵜⴻⵡⵔⵉⵔⵜ ⵏⵏⴻⵙ. 
ⴰⵎ ⵢⵉⵊⴹⴰⴹ ⵉⵜⵜⴼⴰⵔⴼⵉⵔⴻⵏ ⵙⴻⵏⵏⴻⵊ ⵉ ⵍⵄⵓⵛⵛ ⵏⵙⴻⵏ, ⴰⵎⵎⵓ ⵉ ⵖⴰ ⵉⵙⵙⴻⵍⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵅ ⵓⵔⵛⴰⵍⵉⵎ. ⴰⴷ ⵜⵜ ⵉⵙⵙⴰⵔ, ⴰⴷ ⵜⵜ ⵉⵙⵙⴻⵏⵊⴻⵎ, ⴰⴷ ⵅⴰⵙ ⵢⴻⴽⴽ ⵓⵛⴰ ⴰⴷ ⵜⵜ ⵉⵙⵙⴻⵏⵊⴻⵎ.” 
“ⴷⴻⵡⵍⴻⵎ-ⴷⴷ ⵖⴰⵔ ⵡⴻⵏⵏⵉ ⵅ ⵃⴻⵢⵢⴷⴻⵏ ⴰⵢⵜ ⵏ ⵉⵙⵔⴰⵉⵍ ⵙ ⵡⴰⵟⵟⴰⵙ. 
ⵎⴰⵖⴰⵔ ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵎⵎⴻⵏⴹⴰⵔ ⴽⵓⵍ ⵉⵊⵊ ⵍ’ⴰⵚⵏⴰⵎ ⵏⵏⴻⵙ ⵏ ⵏⵏⵓⵇⴰⵔⵜ ⴷ ⵍ’ⴰⵚⵏⴰⵎ ⵏⵏⴻⵙ ⵏ ⵡⵓⵔⴻⵖ, ⵉⵏⵏⵉ ⵢⴻⴳⴳⵉⵏ ⵉⴼⴰⵙⵙⴻⵏ ⵏⵡⴻⵎ ⵉ ⵢⵉⵅⴻⴼ ⵏⵡⴻⵎ, ⵉ ⴷⴷⴻⵏⴱ. 
ⴰⵛⵛⵓⵔ ⴰⴷ ⵉⵡⴹⴰ ⵙ ⵙⵙⵉⴼ, ⵡⴰⵔ ⵉⴵⵉ ⵙⵙⵉⴼ ⵏ ⵉⵊⵊ ⵏ ⵡⴻⵔⵢⴰⵣ. ⴰⴷ ⵜ ⵢⴻⵛⵛ ⵙⵙⵉⴼ, ⵡⴰⵔ ⵉⴵⵉ ⵏ ⵉⵊⵊ ⵏ ⴱⵏⴰⴷⴻⵎ. ⴰⴷ ⵢⴰⵔⵡⴻⵍ ⴰⵛⵛⵓⵔ ⵣⵣⴰⵜ ⵉ ⵙⵙⵉⴼ ⵓⵛⴰ ⵉⵃⵓⴷⵔⵉⵢⵢⴻⵏ ⵏⵏⴻⵙ ⴰⴷ ⴷⴻⵡⵍⴻⵏ ⵖⴰⵔ ⵜⴻⵙⵎⵓⵖⵉ. 
ⵜⴰⵚⴹⴰⵔⵜ ⵏⵏⴻⵙ ⴰⴷ ⵜⴻⴳⴳⵯⴻⵊ ⵙ ⵜⵉⴳⴳⵯⵓⴷⵉ ⵓⵛⴰ ⵍⵃⵓⴽⴽⴰⵎ ⵏⵏⴻⵙ ⴰⴷ ⴰⵔⴻⵡⵍⴻⵏ ⵣⵉ ⵜⵄⴻⴵⴰⵏⵜ!’, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⵡⴻⵏⵏⵉ ⵖⴰⵔ ⵜⴻⴵⴰ ⵜⵎⴻⵙⵙⵉ ⴷⵉ ⵚⵉⵀⵢⵓⵏ ⵓⵍⴰ ⴷ ⵜⴰⴼⵇⵓⵏⵜ ⴷⵉ ⵓⵔⵛⴰⵍⵉⵎ.” 
