﻿ⵉⵛⴰⵄⵢⴰ.
27.
“ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵅⵍⴻⴼ ⵙⵉⴷⵉ ⵣⵉ ‘ⵍⵉ$ⵉⵢⴰⵜⴰⵏ’, ⴰⴼⵉⵖⴰⵔ ⵉⵜⵜⴻⵃⵔⵓⴵⵓⴹⴻⵏ ⵙ ⵜⴰⵣⵍⴰ, ⵙ ⵙⵙⵉⴼ ⵏⵏⴻⵙ ⵉⵇⵙⴻⵃ, ⵉⵎⵖⴰⵔ ⴷ ⵉⵊⵀⴻⴷ, ⵡⴰⵀ ⴰⴷ ⵉⵅⵍⴻⴼ ⵣⵉ ‘ⵍⵉ$ⵉⵢⴰⵜⴰⵏ’, ⴰⴼⵉⵖⴰⵔ ⵉⵜⵜⴻⵃⵔⵓⵔⵓⴷⴻⵏ, ⵓⵛⴰ ⴰⴷ ⵉⵏⴻⵖ ⵍⵀⴰⵢⵛⴻⵜ ⵏⵏⵉ ⵉⴵⴰⵏ ⴷⵉ ⵍⴻⴱⵃⴰⵔ.” 
“ⴷⴻⴳ ⵡⴰⵙⵙ ⵏⵏⵉ ⴰⴷ ⴷⵉⵏ ⵢⵉⵍⵉ ... ⵉⵊⵊ ⵏ ⵓⵎⴰⵔⵊⴻⵄ ⵏ ⵓⴹⵉⵍ ⵙ ⴱⵉⵏⵓ ⵉⵛⵏⴰⵏ. ⵖⴻⵏⵏⵊⴻⵎ ⵅⴰⵙ ⵙ ⵏⵏⵓⴱⵜⴰⵜ. 
ⵏⴻⵛⵛ, ⵙⵉⴷⵉ, ⴰⴷ ⵜⵜ ⵉⵃⴹⴰ, ⴰⴷ ⵜⵜ ⵙⵙⴱⴻⵣⵣⴳⴻⵖ, ⵃⵉⵎⴰ ⵡⴰⵔ ⵜⵜ ⵉⵊⴰⵔⵔⴻⵃ ⵃⴻⴷ, ⵏⴻⵛⵛ ⴰⴷ ⵅⴰⵙ ⵄⴻⵙⵙⴻⵖ ⵙ ⵡⴰⵙⵙ ⴷ ⴵⵉⵍⴻⵜ. 
ⵜⴰⴼⵇⴻⵃⵜ ⵡⴰⵔ ⴷⴰⵢⵉ ⵜⴻⴵⵉ ⵇⴰⵄ, ⵎⴰⵛⴰ ⵎⴰⵍⴰ ⵛⴰ ⵏ ⵢⵉⵊⵊⴻⵏ ⵉⵣⵄⴻⵎ ⴰⴷ ⵉⵙⵙⴰⵔⵙ ⵣⵣⴰⵜⵉ ⵜⴰⵣⴻⴳⴳⵯⴰⵔⵜ ⴷ ⵉⵙⴻⵏⵏⴰⵏⴻⵏ, ⵏⴻⵛⵛ ⴰⴷ ⴽⵉⴷⵙⴻⵏ ⵎⵎⴻⵏⵖⴻⵖ, ⴰⴷ ⵜⴻⵏ ⵙⵙⴰⵔⵖⴻⵖ ⵎⵓⵏⴻⵏ, 
ⵉⵍⵍⴰ ⵎⴰⵍⴰ ⵉⵟⵟⴻⴼ ⴱⵏⴰⴷⴻⵎ ⴷⵉ ⵊⵊⴻⵀⴷ ⵉⵏⵓ, ⵓⵛⴰ ⴰⴷ ⵢⴻⴳⴳ ⵍⴻⵀⵏⴰ ⴰⴽⵉⴷⵉ, ⵡⴰⵀ ⴰⴷ ⵢⴻⴳⴳ ⵍⴻⵀⵏⴰ ⴰⴽⵉⴷⵉ!” 
“ⴷⴻⴳ ⵡⵓⵙⵙⴰⵏ ⵉ ⴷⴷ ⵖⴰ ⵢⴰⵙⴻⵏ ⴰⴷ ⵉⵡⵡⴻⵜ ⵢⴰⵄⵇⵓⴱ ⴰⵥⵡⴰⵔ, ⵉⵙⵔⴰⵉⵍ ⴰⴷ ⵉⵏⵏⵓⵡⴰⵔ, ⴰⴷ ⵉⵢⵎⴰ, ⵓ ⵏⵉⵜⵏⵉ ⴰⴷ ⵛⵛⵓⵔⴻⵏ ⵜⴰⵎⵎⵓⵔⵜ ⵙ ⵍⵖⵉⴵⴻⵜ.” 
“ⵎⴰ ⵉⵡⵜⴰ ⵉ-ⵜ ⵏⴻⵜⵜⴰ, ⴰⵎ ⵎⴰⵎⵎⴻⵛ ⵡⴻⵏⵏⵉ ⵉⵡⵜⵉⵏ, ⵉⵡⵜⴰ ⵉ-ⵜ? ⵎⴰ ⵉⵜⵜⵡⴰⵏⴻⵖ ⵏⴻⵜⵜⴰ, ⴰⵎ ⵎⴰⵎⵎⴻⵛ ⵜⵜⵡⴰⵏⵖⴻⵏ ⵉⵏⵏⵉ ⵣⵣⴰⵢⴻⵙ ⵉⵜⵜⵡⴰⵏⵖⴻⵏ? 
ⵛⴻⴽ ⵜⴰⵔⴻⴱⴱⵉⴷ ⵜⵜ ⵙ ⵍⴻⵇⵢⴰⵙ ⵍⴰⵎⵉ ⵜⵜ ⵜⴻⵏⴹⴰⵔⴻⴷ, ⵏⴻⵜⵜⴰ ⵉⵙⵙⵓⵣⵣⴰⵔ ⵉ-ⵜⵜ ⵙ ⵓⵙⴻⵎⵎⵉⴹ ⵏⵏⴻⵙ ⵉⵇⴻⵙⵃⴻⵏ, ⴷⴻⴳ ⵉⵊⵊ ⵏ ⵡⴰⵙⵙ ⵏ ⵓⵙⴻⵎⵎⵉⴹ ⵣⵉ ⵎⴰⵏⵉⵙ ⵉ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ. 
ⵙ ⵓⵢⴰ ⴰⴷ ⵉⵜⵜⵡⴰⴳⴳ ⴰⵚⵍⴰⵃ ⵅ ⵍⵎⵓⵄⵚⵉⵢⵢⴻⵜ ⵏ ⵢⴰⵄⵇⵓⴱ ⵙ ⵎⴰⵏ ⴰⵢⴰ ⵓⵛⴰ ⴰⴷ ⵢⵉⵍⵉ ⴰⵢⴰ ⴷ ⵍⵖⵉⴵⴻⵜ ⵜⴻⴽⵎⴻⵍ ⵣⴻⴳ ⵓⵃⴻⵢⵢⴻⴷ ⵅ ⴷⴷⵏⵓⴱ ⵏⵏⴻⵙ: ⴰⵇⴰ ⵏⴻⵜⵜⴰ ⴰⴷ ⵢⴰⵔⵔ ⵎⴰⵔⵔⴰ ⵉⵥⵔⴰ ⵏ ⵉⵄⴰⵍⵟⴰⵔⴻⵏ ⴷ ⵉⵥⵔⴰ ⵏ ⵊⵊⴰⵔ ⵜⵜⵡⴰⵍⴻⴱⵣⴻⵏ ⵓ ⵡⴰⵔ ⴷⵉⵏ ⵜⵜⴱⴻⴷⴷⵉⵏⵜ ⵄⴰⴷ ⵜⵔⴻⴱⴱⵉⵏ ⵏ ⵛⵡⴰⵔⵜⵉ ⴷ ⵉⴱⵉⵍⴰⵔⴻⵏ ⵏ ⴰⵔⴻⴱⴱⵉ ⵏ ⵜⴼⵓⵛⵜ.” 
“ⵎⴰⵖⴰⵔ ⵜⴰⵏⴷⵉⵏⵜ ⵉⵜⵜⵡⴰⵙⵙⵊⴻⵀⴷⴻⵏ ⴰⴷ ⵜⴻⴷⵡⴻⵍ ⵃⴰⴼⵉ, ⴰⵎ ⵢⵉⵛⵜ ⵏ ⵜⵣⴻⴷⴷⵉⵖⵜ ⵉⵜⵜⵡⴰⵊⵊⴻⵏ, ⵉⵅⵍⴰⵏ ⴰⵎ ⵍⴻⵅⵍⴰ. ⴷⵉⵏⵏⵉ ⴰⴷ ⵉⵀⴷⴰ ⵓⵄⴻⵊⵎⵉ, ⴰⴷ ⴷⵉⵏ ⵉⵊⵏⴰ, ⴰⴷ ⵉⵛⵛ ⵜⵉⵙⴻⴹⵡⵉⵏ ⵏⵏⴻⵙ. 
ⵅⵎⵉ ⵖⴰ ⵢⴰⵥⵖⴻⵏ ⵍⴻⴼⵔⵓⵄ ⵏⵏⴻⵙ, ⴰⴷ ⵜⵜⵡⴰⵇⴻⴹⵄⴻⵏ. ⴰⴷ ⴷⴷ-ⴰⵙⴻⵏⵜ ⵜⴻⵎⵖⴰⵔⵉⵏ, ⴰⴷ ⵜⴻⵏ ⵙⵙⴰⵔⵖⴻⵏⵜ, ⵎⴰⵖⴰⵔ ⵡⴰⵔ ⵉⴵⵉ ⴷ ⵉⵊⵊ ⵏ ⵍⴳⴻⵏⵙ ⴷⴰⵢⴻⵙ ⵍⴻⴼⵀⴰⵎⴻⵜ. ⵅ ⵓⵢⴰ ⵡⴻⵏⵏⵉ ⵜ ⵉⴳⴳⵉⵏ, ⵡⴰⵔ ⴷ ⴰⵙⴻⵏ ⵉⵣⵣⵉⴵⵉⵣ, ⵓ ⵡⴻⵏⵏⵉ ⵜ ⵉⴽⴻⵡⵡⵏⴻⵏ, ⵡⴰⵔ ⴷ ⴰⵙ ⵢⴰⵔⴻⵟⵟⴰ.” 
“ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵣⵡⴻⴹ ⵙⵉⴷⵉ ⵜⵉⴷⵔⵉⵏ ⵣⵉ ⵎⴰⵏⵉ ⵉⴵⴰ ⵢⴻⵖⵣⴰⵔ ⵏ ⵍⴼⵓⵔⴰⵟ ⴰⵍ ⵜⴻⵖⵣⴰⵔⵜ ⵏ ⵎⵉⵚⵔⴰ. ⵎⴰⵛⴰ ⴽⴻⵏⵏⵉⵡ ⴰⴷ ⵜⵜⵡⴰⵍⴻⵇⴹⴻⵎ, ⵉⵊⵊⴻⵏ ⴰⵡⴰⵔⵏⵉ ⵉ ⵡⴻⵏⵏⴻⵖⵏⵉ, ⴰ ⴰⵢⵜ ⵏ ⵉⵙⵔⴰⵉⵍ. 
ⴷⴻⴳ ⵡⴰⵙⵙ ⵏⵏⵉ ⴰⴷ ⵙⵓⴹⴻⵏ ⴷⴻⴳ ⵓⵢⵉⵛⵛ ⴰⵎⴻⵇⵇⵔⴰⵏ ⵏ ⵉⵛⴰⵔⵔⵉ. ⵅⴻⵏⵏⵉ ⴰⴷ ⴷⴷ-ⴰⵙⴻⵏ ⵉⵏⵏⵉ ⵉⵙⵙⵡⴻⵊⴷⴻⵏ ⴰⴷ ⵀⴻⵍⵍⴽⴻⵏ ⴷⵉ ⴰⵛⵛⵓⵔ ⵓⵍⴰ ⴷ ⵢⵉⵏⵏⵉ ⵉⵜⵜⵡⴰⵄⴰⵔⵔⵏⴻⵏ ⵖⴰⵔ ⵜⴻⵎⵎⵓⵔⵜ ⵏ ⵎⵉⵚⵔⴰ. ⵏⵉⵜⵏⵉ ⴰⴷ ⵙⴻⵊⴷⴻⵏ ⵉ ⵙⵉⴷⵉ ⴷⴻⴳ ⵡⴻⴷⵔⴰⵔ ⵉⵇⴻⴷⴷⵙⴻⵏ ⴷⵉ ⵓⵔⵛⴰⵍⵉⵎ.” 
