﻿ⵉⵛⴰⵄⵢⴰ.
20.
ⴷⴻⴳ ⵓⵙⴻⴳⴳⵯⴰⵙ ⵏⵏⵉ ⴷⵉ ⴷⴷ-ⵢⵓⵙⴰ ⵓⴽⵓⵎⴰⵏⴷⴰⵔ ⵏ ⵍⵄⴻⵙⴽⴰⵔ ⵖⴰⵔ ⴰⵛⴷⵓⴷ, ⵓⵎⵉ ⵜ ⵉⵙⵙⴻⴽⴽ ⵙⴰⵔⵊⵓⵏ, ⴰⵊⴻⴵⵉⴷ ⵏ ⴰⵛⵛⵓⵔ, ⵓ ⵉⵎⵎⵏⴻⵖ ⵏⴻⵜⵜⴰ ⴰⴽ-ⴷ ⴰⵛⴷⵓⴷ ⵓⵛⴰ ⵉⵟⵟⴻⴼ ⵉ-ⵜ, 
ⴷⵉ ⵍⵡⴻⵇⵜ ⵏⵏⵉ ⵜⵓⵖⴰ ⵉⵙⵙⴰⵡⴰⵍ ⵙⵉⴷⵉ, ⵙ ⵓⵇⴻⵎⵎⵓⵎ ⵏ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵉⵏⵏⴰ: “ⵓⵢⵓⵔ, ⵙⴰⵔⵙ ⴰⵔⵔⵓⴹ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ ⵏⵏⵉ ⵅ ⵜⴻⵊⵄⵉⵏⵏⴰ ⵏⵏⴻⵛ ⵓ ⴽⴽⴻⵙ ⵙⴰⵏⴷⴰⵍⵉⵢⴰⵜ ⵏⵏⴻⵛ ⵅ ⵉⴹⴰⵔⴻⵏ ⵏⵏⴻⵛ!” ⵉⴳⴳⴰ ⵉ-ⵜ ⵉⵛⴰⵄⵢⴰ, ⵉⴳⴳⵓⵔ ⴷ ⴰⵄⴰⵔⵢⴰⵏ ⵓ ⵙ ⵍⴻⵃⴼⴰ ⵅ ⵉⴹⴰⵔⴻⵏ ⵏⵏⴻⵙ. 
ⵍⴻⵅⴷⴻⵏⵏⵉ ⵉⵏⵏⴰ ⵙⵉⴷⵉ: “ⴰⵎ ⵎⴰⵎⵎⴻⵛ ⵉⴳⴳⵓⵔ ⵓⵎⵙⴻⵅⵅⴰⵔ ⵉⵏⵓ ⵉⵛⴰⵄⵢⴰ ⵍⴻⵅⵅⵓ ⵄⴰⴷ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⴰⵄⴰⵔⵢⴰⵏ ⵓ ⵙ ⵍⴻⵃⴼⴰ ⴷⴰ ⴷ ⴷⵉⵀⴰ, ⴰⵎ ⵍⴻⵄⵍⴰⵎⴻⵜ ⵓ ⴰⵎ ⵢⵉⵊⵊ ⵏ ⵍⴻⵄⵊⴻⴱ ⵉ ⵎⵉⵚⵔⴰ ⵓ ⵉ ⴽⵓⵛ, 
ⴰⵎⵎⵓ ⵉ ⵖⴰ ⵉⵏⴷⴻⵀ ⵓⵊⴻⴵⵉⴷ ⵏ ⴰⵛⵛⵓⵔ ⵉⵎⴻⵃⴱⴰⵙ ⵏ ⵎⵉⵚⵔⴰ ⴷ ⵉⵎⴻⵏⴼⵉⵢⵢⴻⵏ ⵏ ⴽⵓⵛ, ⴰⵎⴻⵥⵢⴰⵏ ⴷ ⵓⵎⴻⵇⵇⵔⴰⵏ, ⴰⵄⴰⵔⵢⴰⵏ ⴷ ⵓⵃⴻⴼⵢⴰⵏ ⵏ ⵉⴹⴰⵔⴻⵏ, ⵓⵍⴰ ⵙ ⴷⴷⴰⴱⵓⴱ ⵉⵄⴰⵔⵔⴰⵏ, ⴰⵇⴰ ⴷ ⵍⴻⴼⴹⵉⵃⴻⵜ ⵉ ⵎⵉⵚⵔⴰ. 
ⵅⴻⵏⵏⵉ ⴰⴷ ⴳⴳⵯⴻⴷⴻⵏ ⵓ ⴰⴷ ⵙⴻⴹⵃⴰⵏ ⵣⵉ ⵙⵙⵉⴱⴱⴻⵜ ⵏ ⴰⵢⵜ ⵏ ⴽⵓⵛ ⵉ ⵖⴰⵔ ⵜⵓⵖⴰ ⵅⴻⵣⵣⴰⵔⴻⵏ ⴷ ⵛⴰ, ⵓ ⵣⵉ ⵙⵙⵉⴱⴱⴻⵜ ⵏ ⵉⵎⵉⵚⵔⵉⵢⵢⴻⵏ, ⴰⴼⴻⵢⵢⴻⵛ ⵏⵙⴻⵏ. 
ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ-ⴰ ⵅ ⵜⵎⴰ ⵏ ⵍⴻⴱⵃⴰⵔ ⴰⴷ ⵉⵏⵉⵏ ⴷⴻⴳ ⵡⴰⵙⵙ ⵏⵏⵉ: ‘ⵅⵣⴰⵔ, ⴰⵎⵎⵓ ⵉ ⵉⵎⵙⴰⵔ ⵉ ⵡⴻⵏⵏⵉ ⵖⴰⵔ ⵏⵅⴻⵣⵣⴰⵔ ⴷ ⵛⴰ, ⴷ ⵡⴻⵏⵏⵉ ⵖⴰⵔ ⵏⴰⵔⵡⴻⵍ ⵃⵉⵎⴰ ⴰⴷ ⵏⴰⵔⵣⵓ ⵜⵡⵉⵣⴰ, ⵃⵉⵎⴰ ⴰⴷ ⵏⴻⵜⵜⵡⴰⴼⴻⴽⴽ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵓⵊⴻⴵⵉⴷ ⵏ ⴰⵛⵛⵓⵔ. ⵎⴰⵎⵎⴻⵛ ⵅⴻⵏⵏⵉ ⵏⵣⴻⵎⵎⴰⵔ ⴰⴷ ⵏⴻⵏⵊⴻⵎ ⵍⴻⵅⵅⵓ?’” 
