﻿ⵉⵛⴰⵄⵢⴰ.
16.
“‘ⵙⴻⴽⴽⴻⵎ ⴷⴷⵎⴰⵏⵉ ⵛⵛⵓⵔⴻⵏ ⵙ ⵉⵣⵎⴰⵔⴻⵏ ⵏ ⵍⵃⴰⴽⴻⵎ ⵏ ⵜⴻⵎⵎⵓⵔⵜ, ⵣⵉ ⵙⴰⵍⴰⵄ ⵖⴰⵔ ⵍⴻⵅⵍⴰ, ⵖⴰⵔ ⵡⴻⴷⵔⴰⵔ ⵏ ⵢⴻⴵⵉⵙ ⵏ ⵚⵉⵀⵢⵓⵏ!’ 
ⴰⵎ ⵉⵊⴹⴰⴹ ⵢⴰⵔⴻⵡⵍⴻⵏ, ⵉⵜⵜⵡⴰⵙⵙⴻⴹⵡⴻⵏ ⵣⵉ ⵍⵄⵓⵛⵛ, ⴰⵎⵎⵓ ⵉ ⵖⴰ ⴳⴳⴻⵏⵜ ⵢⴻⵙⵙⵉⵙ ⵏ ⵎⵓ’ⴰⴱ ⵖⴰⵔ ⵉⵎⵓⵛⴰⵏ ⵏ ⵓⵥⴻⴽⴽⵡⵓ ⵏ ⵢⴻⵖⵣⴰⵔ ⵏ ⴰⵔⵏⵓⵏ. 
‘ⴰⵡⵢⴻⵎ ⵅⴻⵏⵏⵉ ⵛⵛⵡⴰⵔ, ⴽⵙⵉⵎ ⴰⵡⴰⵍ, ⴳⴳⴻⵎ ⵜⵉⵍⵉ ⵏⵏⴻⵎ ⴰⵎ ⴵⵉⵍⴻⵜ ⴷⴻⴳ ⵓⵣⵉⵍ, ⵙⵏⵓⴼⴼⴰⵔ ⵉⵎⴻⵜⵍⴰⵄ, ⵡⴰⵔ ⵣⵏⵓⵣⵉ ⵉⵏⵏⵉ ⵢⴰⵔⴻⵡⵍⴻⵏ!’ 
‘ⵊⵊⴻⵎ ⵉⵏⵏⵉ ⵣⵣⴰⵢⵉ ⵅ ⵢⵓⵥⵥⵍⴻⵏ ⴰⴷ ⵖⴰⵔⴻⵎ ⵇⵇⵉⵎⴻⵏ, ⴰ ⵜⴰⵎⵎⵓⵔⵜ ⵏ ⵎⵓ’ⴰⴱ! ⵉⵍⵉ ⴷ ⴰⴷⵓⵔⵔⵉ ⵉ ⵏⵉⵜⵏⵉ ⵣⵣⴰⵜ ⵉ ⵡⵓⴷⴻⵎ ⵏ ⵓⵎⵜⴻⵃⵃⴰⵢ!’” “ⵍⴻⵃⵚⴰⵔⴻⵜ ⵎⴰⵛⴰ ⴰⴷ ⵜⴱⴻⴷⴷ, ⴰⵜⴻⵃⵃⵉ ⴰⴷ ⵉⵇⴹⴰ, ⵉⵏⵏⵉ ⵉⵄⴻⴼⴼⵙⴻⵏ ⵅ ⵜⴻⵎⵎⵓⵔⵜ ⴰⴷ ⵎⵡⴻⴷⴷⴰⵔⴻⵏ ⵣⵉ ⵜⴻⵎⵎⵓⵔⵜ. 
ⵍⴽⵓⵔⵙⵉ ⵉⴳⴻⵍⵍⴷⴻⵏ ⴰⴷ ⵉⵜⵜⵡⴰⵛⴻⴷⴷ ⵙ ⵜⵎⴻⵅⵙⵉⵡⵜ ⵉⵛⵓⵡⵡⴰⵔⴻⵏ ⵓ ⵏⴻⵜⵜⴰ ⴰⴷ ⵅⴰⵙ ⵉⵇⵇⵉⵎ ⴷⵉ ⵜⵉⴷⴻⵜⵜ ⴷⴻⴳ ⵓⵇⵉⴹⵓⵏ ⵏ ⴷⴰⵡⵓⴷ, ⵏⴻⵜⵜⴰ ⴷ ⵡⴻⵏⵏⵉ ⵉⵃⴻⴽⴽⵎⴻⵏ ⴷ ⵡⴻⵏⵏⵉ ⵢⴰⵔⴻⵣⵣⵓⵏ ⵍⵃⴻⵇⵇ ⵓⵛⴰ ⵉⵙⵙⴻⴼⵍⴻⵃ ⵜⴰⵙⴻⴳⴷⴰ.” 
“ⵏⴻⵛⵛⵉⵏ ⵏⴻⵙⵍⴰ ⵅ ⵏⵏⴼⴰⵅⴻⵜ ⵏ ⵜⴻⵎⵎⵓⵔⵜ ⵏ ⵎⵓ’ⴰⴱ, ⴰⵇⴰ ⵏⴻⵜⵜⴰⵜ ⴷ ⵜⴰⵄⴻⴼⴼⴰⵔⵜ ⴰⵍ ⵟⵟⴰⵔⴼ. ⵜⴰⵄⴻⴼⴼⴰⵔⵜ ⵏⵏⴻⵙ ⴷ ⵏⵏⴼⴰⵅⴻⵜ ⵏⵏⴻⵙ ⴷ ⵣⵣⵄⴰⵎⴻⵜ ⵏⵏⴻⵙ, ⴰⵇⴰ ⵎⴰⵔⵔⴰ ⵍⵀⴰⵔⴷ ⵏⵏⴻⵙ ⵉⵅⵡⴰⵏ ⵡⴰⵔ ⵉⴵⵉ ⵛⴰ ⵏⵉⵛⴰⵏ. 
ⵙ ⵓⵢⴰ ⵉ ⵖⴰ ⵜⵔⵓ ⵜⴻⵎⵎⵓⵔⵜ ⵏ ⵎⵓ’ⴰⴱ ⵅ ⵎⵓ’ⴰⴱ, ⵎⴰⵔⵔⴰ ⵏⵉⵜⵏⵉ ⴰⴷ ⵔⵓⵏ, ⴰⴷ ⵙⵖⵓⵢⴻⵏ ⵅ ⵣⵣⴱⵉⴱ ⵏ ⵇⵉⵔ-ⵃⴰⵔⵉⵙⴰⵜ, ⵏⵉⵜⵏⵉ ⴷⴻⵡⵍⴻⵏ ⵜⵜⵡⴰⵖⴻⵍⴱⴻⵏ ⵇⴰⵄ. 
ⵎⴰⵖⴰⵔ ⵉⵙⵍⴰⵡⴻⵏⵜ ⵜⵣⴰⵢⴰⵔⵉⵏ ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵏ ⵃⴰⵛⴱⵓⵏ. ⵜⵉⵙⴻⴹⵡⵉⵏ ⵏ ⴹⴹⵉⵍⴻⵛⵜ ⵏ ⵙⵉⴱⵎⴰ ⴰⵔⴻⵏⵏⵢⴻⵏⵜ ⵍⵃⵓⴽⴽⴰⵎ ⵏ ⵍⴻⴳⵏⵓⵙ. ⵜⵉⵙⴻⴹⵡⵉⵏ ⵢⵉⵡⴹⴻⵏⵜ ⴰⵍ ⵢⴰⵄⵣⵉⵔ, ⵙⵓⵃⴻⵏⵜ ⴷⵉ ⵍⴻⵅⵍⴰ, ⴱⴻⵣⵣⵄⴻⵏⵜ, ⴰⵇⴰ ⵥⵡⴰⵏⵜ ⵍⴻⴱⵃⴰⵔ. 
ⵅ ⵓⵢⴰ ⵜⵜⵔⵓⵖ ⵅ ⴹⴹⵉⵍⴻⵛⵜ ⵏ ⵙⵉⴱⵎⴰ, ⴰⵎ ⵎⴰⵎⵎⴻⵛ ⵔⵓⵖ ⵅ ⵢⴰⵄⵣⵉⵔ. ⵙⵙⵓⵖ ⵛⴻⵎ ⵙ ⵉⵎⴻⵟⵟⴰⵡⴻⵏ ⵉⵏⵓ, ⴰ, ⵜⵉⵏⴻⴷⴷⴰⵎ ⵏ ⵃⴰⵛⴱⵓⵏ ⴷ ⴰⵍⵉⵄⴰⵍⴰ, ⵎⵉⵏⵣⵉ ⵔⵓⵃⴻⵏ ⵉⵖⵓⵢⵢⴰⵏ ⵏ ⵓⵙⵍⵉⵡⵍⴻⵡ ⵣⵉ ⵜⵉⵏⵉ ⵏⵏⴻⵎ ⵏ ⵓⵏⴻⴱⴷⵓ ⵓ ⵣⴻⴳ ⵡⴻⵍⵇⴰⴹ ⵏⵏⴻⵎ. 
ⵜⵃⴻⵢⵢⴻⴷ ⵍⴻⴼⵔⴰⵃⴻⵜ ⴷ ⵣⵣⵀⵓ ⵣⴻⴳ ⵉⵢⵢⴰⵔⴻⵏ ⵉⵙⵙⴻⵖⵎⴰⵢⴻⵏ ⵏ ⵜⴼⴻⴵⴰⵃⵜ, ⵡⴰⵔ ⵜⵜⵖⴻⵏⵏⵉⵊⴻⵏ ⵓ ⵡⴰⵔ ⵙⵍⵉⵡⵍⵉⵡⴻⵏ ⵄⴰⴷ ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ. ⵡⴻⵏⵏⵉ ⵢⴰⵔⴻⴼⴼⵙⴻⵏ ⵡⴰⵔ ⵢⴰⵔⴻⴼⴼⴻⵙ ⵄⴰⴷ ⴰⴹⵉⵍ ⴷⵉ ⵜⵙⵉⵍⵜ ⵏ ⵓⴹⵉⵍ. ⵙⵙⴱⴻⴷⴷⴻⵖ ⵏⴻⵛⵛ ⵍⴻⵄⵢⵓⴷⴰⵜ ⵏ ⵓⵙⵍⵉⵡⵍⴻⵡ. 
ⵅ ⵓⵢⴰ ⵙⵖⵓⵢⵢⵓⵏⵜ ⵜⴻⴽⵔⵉⵛⵉⵏ ⵉⵏⵓ ⴰⵎ ⵢⵉⵊⵊ ⵏ ⵍⴳⴰⵎⴱⵔⵉ ⵅ ⵎⵓ’ⴰⴱ, ⵓ ⴷⴰⵅⴻⵍ ⵉⵏⵓ ⵅ ⴽⵉⵔ-ⵃⴰⵔⵉⵙ. 
ⵅⵎⵉ ⵉ ⵖⴰ ⵢⴰⵃⴻⵍ ⵎⵓ’ⴰⴱ ⵅ ⵍⴳⴻⵄⵄⴷⴻⵜ ⵎⴰⵏⵉ ⵜⵜⵇⴻⴷⴷⴰⵎⴻⵏ ⵜⵉⵡⵀⵉⴱⵉⵏ ⵏⵏⴻⵙ ⵓⵛⴰ ⴰⴷ ⵢⴰⴷⴻⴼ ⵖⴰⵔ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ ⵃⵉⵎⴰ ⴰⴷ ⵉⵥⵥⴰⴵ, ⵅⴻⵏⵏⵉ ⴰⴷ ⵥⴰⵔⴻⵏ ⴰⵇⴰ ⵎⵓ’ⴰⴱ ⵡⴰⵔ ⵉⵣⴻⵎⵎⴰⵔ ⴰⴷ ⵉⴳⴳ ⵡⴰⵍⵓ.” 
ⵡⴰ ⴷ ⴰⵡⴰⵍ ⵉ ⵉⵙⵙⵉⵡⴻⵍ ⵙⵉⴷⵉ ⵅ ⵎⵓ’ⴰⴱ. 
ⵓⵛⴰ ⵍⴻⵅⵅⵓ ⵉⵙⵙⴰⵡⴰⵍ ⵙⵉⴷⵉ, ⵉⵇⵇⴰⵔ: “ⴷⵉ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⵄⵍⴰⵃⵙⴰⴱ ⵉⵙⴻⴳⴳⵯⵓⵙⴰ ⵏ ⵓⵛⴻⵡⵡⴰⵍ, ⴰⴷ ⵉⴷⵡⴻⵍ ⵓⵄⵓⴵⵉ ⵏ ⵎⵓ’ⴰⴱ ⵉⵜⵜⵡⴰⵙⵙⴻⵃⵇⴰⵔ ⴰⴽ-ⴷ ⵎⴰⵔⵔⴰ ⴰⴱⴰⵔⵔⵓ ⵏⵏⵉ ⴰⵎⴻⵇⵇⵔⴰⵏ. ⵎⵉⵏ ⵣⵣⴰⵢⴻⵙ ⵉ ⵖⴰ ⵉⵇⵇⵉⵎⴻⵏ, ⴰⴷ ⵢⵉⵍⵉ ⴷⵔⵓⵙ ⵇⴰⵄ, ⵡⴰⵔ ⵉⴵⵉ ⴰⵟⵟⴰⵙ.” 
