﻿ⵉⵛⴰⵄⵢⴰ.
15.
ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵅ ⵎⵓ’ⴰⴱ. “ⴷⵉ ⴵⵉⵍⴻⵜ ⵉⵜⵜⵡⴰⵀⴷⴻⵎ ⴰⵔ-ⵎⵓ’ⴰⴱ, ⵉⴷⵡⴻⵍ ⵉⵙⵙⵓⵙⴻⵎ, ⵡⴰⵀ, ⴷⵉ ⴵⵉⵍⴻⵜ ⵉⵜⵜⵡⴰⵀⴷⴻⵎ ⵇⵉⵔ-ⵎⵓ’ⴰⴱ, ⵉⴷⵡⴻⵍ ⵉⵙⵙⵓⵙⴻⵎ! 
ⴳⴻⵄⵄⴷⴻⵏ ⵖⴰⵔ ⴱⴰⵢⵉⵜ ⴷ ⴷⵉⴱⵓⵏ, ⵖⴰⵔ ⵍⴻⴳⵄⵓⴷⵉ ⵃⵉⵎⴰ ⴰⴷ ⵔⵓⵏ. ⴷⵉⵏⵏⵉ ⴰⴷ ⵉⵔⵓ ⵎⵓ’ⴰⴱ ⵅ ⵏⴰⴱⵓ ⴷ ⵎⴰⵢⴷⴰⴱⴰ. ⵇⴰⵄ ⴰⵣⴻⴵⵉⴼ ⵏⵙⴻⵏ ⵉⵍⵙⴰ ⴷ ⴰⵇⴻⵛⵛⴰⵔ, ⵎⴰⵔⵔⴰ ⵜⵉⵎⵉⵔⴰ ⵜⵜⵡⴰⵃⴻⴼⴼⴻⵏⵜ. 
ⴱⴻⵢⵙⴻⵏ ⵙ ⵜⵅⵓⵏⵛⴰⵢ ⵏ ⵡⴻⵛⴹⴰⵏ ⴷⴻⴳ ⵉⵣⵏⵉⵇⴻⵏ ⵏⵙⴻⵏ, ⴰⵇⴰ ⴷⵉⵏ ⵎⵖⵉⵔ ⵜⵖⵓⵢⵢⵉⵜ ⵅ ⵜⵣⴻⵖⵡⵉⵏ ⵏⵙⴻⵏ ⵓ ⴷⴻⴳ ⵡⴰⵣⵣⴰⵢⴻⵏ ⵏⵙⴻⵏ, ⵉⵎⴻⵟⵟⴰⵡⴻⵏ ⵡⴻⵟⵟⴰⵏ-ⴷⴷ ⵅ ⵓⵖⴻⵎⴱⵓⴱ. 
ⵃⴰⵛⴱⵓⵏ ⵉⵙⵖⵓⵢⵢⵓ, ⵓⵍⴰ ⴷ ⴰⵍⵉⵄⴰⵍⴰ. ⵜⵜⴻⵙⵍⴰⵏ ⵉ ⵜⵎⵉⵊⵊⴰ ⵏⵙⴻⵏ ⴰⵍ ⵢⴰⵀⴰⵚ. ⵅ ⵓⵢⴰ ⵙⵖⵓⵢⵢⵓⵏ ⵓⵍⴰ ⴷ ⵉⵔⵢⴰⵣⴻⵏ ⵏ ⵎⵓ’ⴰⴱ ⵏⵏⵉ ⵖⴰⵔ ⵉⴵⴰ ⵍⴻⵙⵏⴰⵃ, ⴱⵓⵃⴱⴻⵍ ⵏ ⵎⴽⵓⵍ ⴰⵔⵢⴰⵣ ⵉⴼⵛⴻⵍ ⴷⴰⵢⴻⵙ.” 
“ⵓⵍ ⵉⵏⵓ ⵉⵙⵖⵓⵢⵢⵓ ⵅ ⵎⵓ’ⴰⴱ. ⵉⵎⴰⵔⵡⴰⵍⴻⵏ ⵏⵏⴻⵙ ⵉⵡⴹⴻⵏ ⴰⵍ ⵜⴰⵏⴷⵉⵏⵜ ⵏ ⵚⵓⵖⴰⵔ, ⵜⴻⵏⵏⵉ ⵉⴵⴰⵏ ⴰⵎ ⵜⴰⵄⴻⵊⵎⵉⵜ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ. ⴰⵎ ⵜⵜⵔⵓⵏ ⵜⵜⴳⴻⵄⵄⴰⴷⴻⵏ ⵜⴰⵙⴰⵡⴻⵏⵜ ⵏ ⵍⵓⵃⵉⵜ, ⵡⴰⵀ, ⴷⴻⴳ ⵡⴻⴱⵔⵉⴷ ⵖⴰⵔ ⵃⵓⵔⵓⵏⴰⵢⵉⵎ ⵙⵙⴳⴰⵄⵄⴰⴷⴻⵏ ⵏⵉⵜⵏⵉ ⵜⴰⵖⵓⵢⵢⵉⵜ ⵏ ⵜⵅⴻⵙⵙⴰⵔⵜ. 
ⵡⴰⵀ, ⴰⵎⴰⵏ ⵏ ⵏⵉⵎⵔⵉⵎ ⴰⴷ ⴷⴻⵡⵍⴻⵏ ⵉⵎⵓⵛⴰⵏ ⵅⵍⴰⵏ, ⵡⴰⵀ, ⴰⵔⴱⵉⵄ ⵉⵙⵍⴰⵡ, ⴰⵖⴻⵎⵎⵓⵢ ⵏ ⴰⵔⴱⵉⵄ ⵉⵇⴹⴰ, ⵡⴰⵔ ⵉⵜⵜⵉⵍⵉ ⵄⴰⴷ ⵓⵖⴻⵎⵎⵓⵢ ⴰⵣⵉⵣⴰ. 
ⵅ ⵓⵢⴰ ⴰⴷ ⴰⵔⴱⵓⵏ ⵎⵉⵏ ⵉⵛⴻⵟⵟⴻⵏ ⴷ ⵎⵉⵏ ⵄⴰⴷ ⵖⴰⵔⵙⴻⵏ, ⵖⴰⵔ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵉⵚⴻⴼⵚⴰⴼⴻⵏ. 
ⵡⴰⵀ, ⴰⴷ ⴷⴷ-ⵜⴻⴼⴼⴻⵖ ⵜⵖⵓⵢⵢⵉⵜ ⵏ ⵓⵛⴻⵜⵛⵉ ⴷⵉ ⵜⴻⵎⵎⵓⵔⵜ ⵏ ⵎⵓ’ⴰⴱ, ⴰⵡⴻⵄⵄⴻⴹ ⵏⵏⴻⵙ ⴰⴷ ⴷⴷ-ⵉⴼⴼⴻⵖ ⴰⵍ ⴰⵊⵍⴰⵢⵉⵎ, ⴰⵖⵓⵢⵢⵉ ⵙ ⵉⵎⴻⵟⵟⴰⵡⴻⵏ ⴰⵍ ⴱⵉ’ⵔ-ⵉⵍⵉⵎ. 
ⵄⴰⴷ ⵛⵛⵓⵔⴻⵏ ⵡⴰⵎⴰⵏ ⵏ ⴷⵉⵎⵓⵏ ⵙ ⵉⴷⴰⵎⵎⴻⵏ, ⵡⴰⵅⵅⴰ ⵏⴻⵛⵛ ⴰⴷ ⴰⵔⴻⵏⵢⴻⵖ ⵅ ⴷⵉⴱⵓⵏ ⵄⴰⴷ ⴽⵜⴰⵔ: ⴰⵢⵔⴰⴷ ⴰⴷ ⴷⴷ-ⵢⴰⵙ ⵅ ⵢⵉⵏⵏⵉ ⴷⴷ-ⵢⴰⵔⴻⵡⵍⴻⵏ ⵣⵉ ⵎⵓ’ⴰⴱ, ⵅ ⵎⵉⵏ ⵉⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ.” 
