﻿ⵉⵥⵍⵉ ⵅ ⵉⵥⵍⴰⵏ.
8.
“ⴰⵅ, ⵎⴻⵄⵍⵉⴽ ⵇⴰⵄ ⵛⴻⴽ ⴷ ⵓⵎⴰ, ⵜᵉⵟⵟⴻⴹⴻⴷ ⴷⵉ ⵜⴱⵉⴱⴱⵉⵛⵉⵏ ⵏ ⵢⴻⵎⵎⴰ. ⵎⴰⵍⴰ ⵓⴼⵉⵖ ⵛⴻⴽ ⴷⵉ ⴱⴰⵔⵔⴰ, ⴰⴷ ⵛⴻⴽ ⵙⵙⵓⴷⵎⴻⵖ, ⴱⵍⴰ ⵎⴰ ⴷ ⴰⵢⵉ ⵙⵙⴻⵃⵇⴰⵔⴰⵏ. 
ⵉⵍⵉ ⴰⴷ ⵛⴻⴽ ⵏⴻⴷⵀⴻⵖ, ⴰⴷ ⵛⴻⴽ ⴰⵡⵢⴻⵖ ⵖⴰⵔ ⵜⴰⴷⴷⴰⵔⵜ ⵏ ⵢⴻⵎⵎⴰ, ⵛⴻⴽ ⴰⴷ ⴰⵢⵉ ⵜⴻⵙⵙⵍⴻⵎⴷⴻⴷ ⴷⵉⵏ. ⴰⴷ ⴰⵛ ⵡⵛⴻⵖ ⴱⵉⵏⵓ ⵉⵜⵜⴼⵓⵃⴻⵏ ⵙ ⵍⴻⵄⵜⵓⵍ ⴰⴷ ⵜⴻⵙⵡⴻⴷ, ⴰⵥⴻⵎⵎⵉ ⵏ ⵜⵛⴻⵊⵊⴰⵔⵜ ⵉⵏⵓ ⵏ ⵡⴰⵔⴻⵎⵎⴰⵏ. 
ⴰⵣⴻⵍⵎⴰⴹ ⵏⵏⴻⵙ ⵙⴰⴷⵓ ⵓⵣⴻⴵⵉⴼ ⵉⵏⵓ, ⴰⴼⵓⵙⵉ ⵏⵏⴻⵙ ⵉⴷⴰⵔⵔⴻⵄ ⴰⵢⵉ-ⴷⴷ. 
ⵏⴻⵛⵛ ⴰⴷ ⴽⴻⵏⵏⵉⵏⵜ ⵙⵙⵊⴰⴵⴰⵖ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ: ⵎⴰⵢⴻⵎⵎⵉ ⵖⴰ ⵜⵀⴻⵡⵍⴻⵏⵜ ⵜⴰⵢⵔⵉ ⵏⵉⵖ ⴰⴷ ⵜⵜ-ⵉ-ⴷⴷ-ⵜⴻⵙⵙⴻⴽⴽⴰⵔⴻⵏⵜ, ⵇⴱⴻⵍ ⵎⴰ ⵜᵉⵜⵜⴻⵅⵙ ⵏⴻⵜⵜⴰⵜ?” 
“ⵎⵉⵏ ⵜⴻⵄⵏⴰ ⵏⵏⵉ ⴷⵉⵏ ⵉⵜⵜⴳⴻⵄⵄⴰⴷⴻⵏ ⵣⵉ ⵍⴻⵅⵍⴰ, ⵜᵉⵜⵜⵄⴻⵎⵎⴻⴷ ⵅ ⵍⵍⵉⴼ ⵏⵏⴻⵙ?” “ⵙⴰⴷⵓ ⵜⵛⴻⵊⵊⴰⵔⵜ ⵏ ⵜⵜⴻⴼⴼⴰⵃⵜ ⴰⵔⵔⴻⵖ ⵎⴻⵥⵔⵉ ⵏⵏⴻⵎ, ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ ⵢⴻⵎⵎⴰⵎ ⵙ ⵍⴻⵃⵔⵉⵇ ⵏ ⵜⴰⵔⵡⴰ, ⵎⴰⵏⵉ ⵛⴻⵎ ⴷⴷ-ⵜⴻⵊⵊⴰ ⵜⴻⵏⵏⵉ ⵛⴻⵎ ⴷⴷ-ⵢⵓⵔⵡⴻⵏ.” 
“ⵙⴰⵔⵙ ⴰⵢⵉ ⴰⵎ ⵟⵟⴰⴱⴻⵄ ⵅ ⵡⵓⵍ ⵏⵏⴻⵛ, ⴰⵎ ⵟⵟⴰⴱⴻⵄ ⵅ ⵓⵖⵉⵍ ⵏⵏⴻⵛ, ⵎⴰⵖⴰⵔ ⵜⴰⵢⵔⵉ ⵜⴻⵊⵀⴻⴷ ⴰⵎ ⵍⵎⴻⵡⵜ, ⵜⵓⵙⵎⵉ ⵜⴻⵇⵙⴻⵃ ⴰⵎ ⵍⴰⵅⴰⵔⵜ, ⵜⵉⴼⴻⵟⵟⵓⵜⵉⵏ ⵏⵏⴻⵙ ⴷ ⵜⵉⴼⴻⵟⵟⵓⵜⵉⵏ ⵏ ⵜⵎⴻⵙⵙⵉ, ⴰⵇⴰ ⴰⵜⴻⵏⵜ ⴰⵎ ⵓⵛⴻⵄⵄⴰⵍ ⵏ ⵙⵉⴷⵉ. 
ⴰⵟⵟⴰⵙ ⵏ ⵡⴰⵎⴰⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵙⵙⵅⴻⵙⵢⴻⵏ ⵜⴰⵢⵔⵉ, ⵓⵍⴰ ⴷ ⵉⵖⴻⵣⵔⴰⵏ ⵡⴰⵔ ⵜⵜ ⵜⵜⵉⵡⵢⴻⵏ. ⵡⴰⵅⵅⴰ ⵉⵡⵛⴰ ⵉⵊⵊⴻⵏ ⵉ ⵜⴰⵢⵔⵉ ⵎⴰⵔⵔⴰ ⴰⴳⵍⴰ ⵏ ⵜⴰⴷⴷⴰⵔⵜ ⵏⵏⴻⵙ, ⴰⴷ ⵜ ⵙⵙⴻⵃⵇⴰⵔⴻⵏ ⴷ ⴰⵙⴻⵃⵇⴰⵔ.” 
“ⵏⴻⵛⵛⵉⵏ ⵖⴰⵔⵏⴻⵖ ⵉⵛⵜ ⵏ ⵓⵍⵜⵎⴰⵜⵏⴻⵖ ⵜⴰⵎⴻⵥⵢⴰⵏⵜ, ⵄⴰⴷ ⵡⴰⵔ ⴷ ⴰⵙ ⴷⴷ-ⴼⴼⵉⵖⴻⵏ ⵉⴷⵎⴰⵔⴻⵏ. ⵎⵉⵏ ⵖⴰ ⵏⴻⴳⴳ ⵉ ⵓⵍⵜⵎⴰⵜⵏⴻⵖ ⴷⴻⴳ ⵡⴰⵙⵙ ⵉ ⴷⵉ ⵅⴰⵙ ⵉ ⵖⴰ ⵙⵙⵉⵡⵍⴻⵏ?” 
“ⵎⴰⵍⴰ ⵏⴻⵜⵜⴰⵜ ⴷ ⵍⵃⵉⴹ, ⴰⴷ ⵅⴰⵙ ⵏⴻⵙⵙⴱⴻⴷⴷ ⴰⵛⴱⴰⵔ ⴰⵎ ⵉⵊⵊ ⵏ ⵜⵜⴰⵊ ⵏ ⵏⵏⵓⵇⴰⵔⵜ. ⵎⴰⵍⴰ ⵏⴻⵜⵜⴰⵜ ⴷ ⵜⴰⵡⵡⴰⵔⵜ, ⴰⴷ ⵜⵜ ⵏⴻⵇⵇⴻⵏ ⵙ ⵜⴼⴻⵍⵡⵉⵏ ⵏ ⵓⴽⴻⵛⵛⵓⴹ ⵏ ⵜⴻⵏⴳⴻⵍⵜ.” 
“ⵏⴻⵛⵛ ⴷ ⵍⵃⵉⴹ ⵓ ⵉⴷⵎⴰⵔⴻⵏ ⵉⵏⵓ ⴰⵎ ⵍⴱⵓⵔⵊⴰⵜ. ⵅⴻⵏⵏⵉ ⴷⴻⵡⵍⴻⵖ ⵏⴻⵛⵛ ⴷⵉ ⵜⵉⵟⵟⴰⵡⵉⵏ ⵏⵏⴻⵙ ⴰⵎ ⵜⴻⵏⵏⵉ ⵢⵓⴼⵉⵏ ⵍⴻⵃⵏⴰ.” 
“ⵙⵓⵍⵉⵎⴰⵏ ⵜⵓⵖⴰ ⵖⴰⵔⴻⵙ ⵉⵊⵊ ⵏ ⵓⵎⴰⵔⵊⴻⵄ ⵏ ⵓⴹⵉⵍ ⴷⵉ ⴱⴰⵄⵍ-ⵀⴰⵎⵓⵏ. ⵉⵡⵛⴰ ⴰⵎⴰⵔⵊⴻⵄ ⵏⵏⵉ ⵉ ⵉⵄⴻⵙⵙⴰⵙⴻⵏ. ⵉ ⵍⵖⵉⴵⴻⵜ ⵏⵏⴻⵙ ⵇⴰⵄ ⵉⵊⵊ ⵢⵉⵡⵉ-ⴷⴷ ⴰⵍⴻⴼ ⵏ ⵍⴻⵡⵣⴻⵏ ⵏ ⵏⵏⵓⵇⴰⵔⵜ.” 
“ⴰⵃⵡⵉⵛ ⵏ ⵓⴹⵉⵍ ⵉⵏⵓ, ⴰⵇⴰ-ⵜ ⵣⵣⴰⵜ ⵉ ⵜⵉⵟⵟⴰⵡⵉⵏ ⵉⵏⵓ. ⴰⵍⴻⴼ ⵏ ⵍⴻⵡⵣⴻⵏ ⵏ ⵏⵏⵓⵇⴰⵔⵜ ⴰⵇⴰ ⴰⵜⴻⵏ ⵉ ⵛⴻⴽ, ⴰ ⵙⵓⵍⵉⵎⴰⵏ, ⵓ ⴰⵍⴼⴰⵢⴻⵏ ⵉ ⵉⵄⴻⵙⵙⴰⵙⴻⵏ ⵏ ⵍⵖⵉⴵⴻⵜ ⵣⵣⴰⵢⴻⵙ.” 
“ⴰ ⵛⴻⵎ ⵜⴻⵏⵏⵉ ⵉⵣⴻⴷⴷⵖⴻⵏ ⴷⴻⴳ ⵉⵃⵡⵉⵛⴻⵏ, ⵉⵄⵛⵉⵔⴻⵏ ⵏⵏⴻⵎ ⵜⵜⴻⵙⵍⴰⵏ ⵙ ⵉⵎⴻⵣⵣⵓⵖⴻⵏ ⵏⵙⴻⵏ ⵉ ⵜⵎⵉⵊⵊⴰ ⵏⵏⴻⵎ, ⵇⵇⴰⵔⴻⵏ: ‘ⴻⵊⵊ ⴰⵢⵉ ⴰⴷ ⵜⵜ ⵙⵍⴻⵖ!” 
“ⴷⴻⵖⵢⴰ, ⴰ ⵍⵍⵉⴼ ⵉⵏⵓ, ⴻⴳⴳ ⴰⵎ ⵢⵉⵖⴰⵢⴹ ⵏ ⵡⴻⵣⵖⴰⵔ ⵏⵉⵖ ⴰⵎ ⵓⵎⴻⵥⵢⴰⵏ ⵏ ⵓⴷⴰⴷⴻⵏ, ⵅ ⵉⴷⵓⵔⴰⵔ ⵉⵛⵛⵓⵔⴻⵏ ⵙ ⵍⴻⵄⵛⵓⴱ ⵉⵜⵜⴼⵓⵃⴻⵏ.” 
