﻿ⵉⵥⵍⵉ ⵅ ⵉⵥⵍⴰⵏ.
4.
“ⵅⵣⴰⵔ, ⵜⴻⵛⵏⵉⴷ ⵛⴻⵎ, ⵜⴰⵎⴻⴷⴷⵓⴽⴽⴻⵍⵜ ⵉⵏⵓ, ⵛⴻⵎ ⵜⴻⵛⵏⵉⴷ. ⴰⵡⴰⵔⵏⵉ ⵍⵍⵜⴰⵎ ⵏⵏⴻⵎ ⵜⵉⵟⵟⴰⵡⵉⵏ ⵏⵏⴻⵎ ⴷ ⵜⵉⴷⴱⵉⵔⵉⵏ. ⴰⵛⵓⵡⵡⴰⴼ ⵏⵏⴻⵎ ⴰⵎ ⵜⵃⵉⵎⴰⵔⵜ ⵏ ⵉⵖⴰⵢⴹⴻⵏ ⵉ ⴷⴷ-ⵉⵀⴻⴽⴽⵡⴰⵏ ⵣⴻⴳ ⵉⴷⵓⵔⴰⵔ ⵏ ⵊⵉⵍⵄⴰⴷ. 
ⵜⵉⵖⵎⴰⵙ ⵏⵏⴻⵎ ⴳⴳⵉⵏⵜ ⴰⵎ ⵜⵃⵉⵎⴰⵔⵜ ⵏ ⵡⵓⴵⵉ ⵍⵙⵉⵏ ⵜⴻⵏⵜ, ⵉⵏⵏⵉ ⴷⴷ-ⵉⵜⵜⴳⴻⵄⵄⴰⴷⴻⵏ ⵣⴻⴳ ⵡⴻⵎⵛⴰⵏ ⵏ ⵓⵚⴻⴱⴱⴻⵏ, ⵎⴰⵔⵔⴰ ⵜⵉⵅⴻⵙⵡⵉⵏ ⵓⵔⵡⴻⵏⵜ ⵜⴰⵛⵏⵉⵡⵉⵏ, ⵡⴰⵔ ⵜⴻⵇⵇⵉⵎ ⵉⵛⵜ ⵏⴱⵍⴰ ⵉⵃⴻⵏⵊⵉⵔⴻⵏ. 
ⵉⵢⴻⵏⵛⵉⵛⴻⵏ ⵏⵏⴻⵎ ⴰⵎ ⵓⴼⵉⵍⵓ ⴰⵣⴻⴳⴳⵯⴰⵖ ⵉⵃⴻⴷⵇⴻⵏ, ⵉⵚⴱⴻⵃ ⵓⵇⴻⵎⵎⵓⵎ ⵏⵏⴻⵎ. ⵍⵃⴻⵏⴽⴰⵜ ⵏⵏⴻⵎ ⴰⵎ ⵜⵔⴻⵎⵎⴰⵏⵜ ⵉⴱⴹⴰⵏ ⵙⴰⴷⵓ ⵍⵍⵜⴰⵎ ⵏⵏⴻⵎ. 
ⵉⵔⵉ ⵏⵏⴻⵎ ⴰⵎ ⵚⵚⵓⵎⵄⴻⵜ ⵏ ⴷⴰⵡⵓⴷ, ⴱⵏⴰⵏ ⵜⵜ ⴰⵎ ⵜⴻⵙⴼⵉⴼⵉⵏ ⵏ ⵜⵙⴻⴷⴷⵢⵉⵏ. ⴰⵍⴻⴼ ⵏ ⵜⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ ⵓⵢⵍⴻⵏⵜ ⵖⴰⵔⴻⵙ, ⵎⴰⵔⵔⴰ ⴰⵎ ⵜⵙⴻⴷⴷⴰⵔⵉⵢⵉⵏ ⵉⵇⴻⵙⵃⴻⵏ ⵉⵇⵓⵔⴰⵔⴻⵏ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ. 
ⵉⴷⵎⴰⵔⴻⵏ ⵏⵏⴻⵎ ⴳⴳⵉⵏ ⴰⵎ ⵜⵏⴰⵢⴻⵏ ⵏ ⵉⵖⴰⵢⴹⴻⵏ ⵉⵎⴻⵥⵢⴰⵏⴻⵏ, ⴰⵎ ⵡⴰⵛⵏⵉⵡⴻⵏ ⵏ ⵜⵖⴰⵢⴹⴻⵜ ⵏ ⵡⴻⵣⵖⴰⵔ, ⵜⵜⵀⴻⴷⴷⴰⵏ ⴷⵉ ⵜⵍⵉⵍⵍⵉⵛⵉⵏ. 
ⴰⵍ ⵉ ⵖⴰ ⵉⵙⵎⴻⴹ ⵡⴰⵙⵙ ⵓ ⴰⴷ ⴰⵔⴻⵡⵍⴻⵏⵜ ⵜⵉⵍⵉⵡⵉⵏ, ⴰⴷ ⵓⵢⵓⵔⴻⵖ ⵖⴰⵔ ⵡⴻⴷⵔⴰⵔ ⵏ ⵓⵎⵉⵔⵔⵓ, ⵖⴰⵔ ⵜⴻⵡⵔⵉⵔⵜ ⵏ ⵊⵊⴰⵡⵉ. 
ⵛⴻⵎ ⵎⴰⵔⵔⴰ ⴷ ⴰⵥⵔⵉ, ⵜⴰⵎⴻⴷⴷⵓⴽⴽⴻⵍⵜ ⵉⵏⵓ, ⵡⴰⵔ ⴷⴰⵢⴻⵎ ⵓⵍⴰ ⴷ ⵉⵊⵊ ⵏ ⵍⵄⵉⴱ. 
ⴰⵙ-ⴷⴷ ⴰⴽⵉⴷⵉ ⵣⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ, ⴰ ⵜⴰⵙⵍⵉⵜ ⵉⵏⵓ, ⴰⵙ-ⴷⴷ ⴰⴽⵉⴷⵉ ⵣⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ, ⵚⵡⴻⴷ-ⴷⴷ ⵣⵉ ⵜⵇⵉⵛⵛⴻⵜ ⵏ ⴰⵎⴰⵏⴰ, ⵣⵉ ⵜⵇⵉⵛⵛⴻⵜ ⵏ ⵛⴰⵏⵉⵔ ⴷ ⵀⵉⵔⵎⵓⵏ, ⵣⵉ ⵖⴰⵔ ⵍⵎⴰⵔⴰⴳⴻⵃ ⵏ ⵡⴰⵢⵔⴰⴷⴻⵏ, ⵣⴻⴳ ⵉⴷⵓⵔⴰⵔ ⵏ ⵉⵖⵉⵍⴰⵙⴻⵏ. 
ⵜⵓⵛⴰⵔⴻⴷ ⴰⵢⵉ ⵓⵍ, ⴰ ⵓⵍⵜⵎⴰ, ⴰ ⵜⴰⵙⵍⵉⵜ ⵉⵏⵓ, ⵡⴰⵀ ⵜⵓⵛⴰⵔⴻⴷ ⴰⵢⵉ ⵓⵍ, ⵙ ⵉⵛⵜ ⵏ ⵍⵅⴻⵣⵔⴰⵜ ⵏ ⵜⵉⵟⵟⴰⵡⵉⵏ ⵏⵏⴻⵎ, ⵙ ⵉⵛⵜ ⵏ ⵜⵙⴻⴷⴷⴻⵛⵜ ⵏ ⵢⵉⵔⵉ ⵏⵏⴻⵎ. 
ⵎⴰⵎⵎⴻⵛ ⵜⴻⵛⵏⴰ ⵓⵙⵃⵉⵏⵏⴻⴱ ⵏⵏⴻⵎ, ⴰ ⵓⵍⵜⵎⴰ, ⴰ ⵜⴰⵙⵍⵉⵜ ⵉⵏⵓ, ⵎⴻⵛⵃⴰⵍ ⵜⴻⵚⴱⴻⵃ ⵓⵙⵃⵉⵏⵏⴻⴱ ⵏⵏⴻⵎ ⵅ ⴱⵉⵏⵓ, ⵍⴻⴼⵡⴰⵃⴻⵜ ⵏ ⵣⵣⴻⵛⵜ ⵏⵏⴻⵎ ⵅ ⵎⴰⵔⵔⴰ ⵍⴻⵄⵟⵓⵔ. 
ⵣⴻⴳ ⵉⵢⴻⵏⵛⵉⵛⴻⵏ ⵏⵏⴻⵎ, ⴰ ⵜⴰⵙⵍⵉⵜ ⵉⵏⵓ, ⵜᵉⵜⵜⵓⴷⵓⵎ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ, ⵜⴰⵎⵎⴻⵏⵜ ⴷ ⵓⵖⵉ ⵙⴰⴷⵓ ⵉⵍⴻⵙ ⵏⵏⴻⵎ, ⵓ ⵍⴻⴼⵡⴰⵃⴻⵜ ⵏ ⵡⴰⵔⵔⵓⴹ ⵏⵏⴻⵎ ⴰⵎ ⵍⴻⴼⵡⴰⵃⴻⵜ ⵏ ⵉⴷⵓⵔⴰⵔ ⵏ ⵍⵓⴱⵏⴰⵏ. 
ⴰ ⵓⵍⵜⵎⴰ, ⴰ ⵜⴰⵙⵍⵉⵜ ⵉⵏⵓ, ⵛⴻⵎ ⴷ ⵜⴰⵃⵡⵉⵛⵜ ⵉⴱⴻⵍⵍⵄⴻⵏ, ⴷ ⵜⴰⵍⴰ ⵉⵇⵇⵏⴻⵏ, ⴷ ⵍⵄⵓⵏⵚⴰⵔ ⵉⵛⴻⵎⵎⵄⴻⵏ. 
ⵍⴻⴼⵔⵓⵄ ⵉ ⵣⵣⴰⵢⴻⵎ ⵉⵙⵙⵏⴻⵟⵟⵉⵢⴻⵏ ⴷ ⵊⴻⵏⵏⴻⵜ ⵏ ⵜⵔⴻⵎⵎⴰⵏⵉⵏ, ⵙ ⵍⵖⵉⴵⴻⵜ ⵉⵚⴻⴱⵃⴻⵏ ⴰⵟⵟⴰⵙ, ⵏⵏⴻⵡⵡⴰⵛ ⵏ ⵍⵃⴻⵏⵏⵉ ⴷ ⵚⵚⴻⵏⴱⴻⵍ, 
ⵚⵚⴻⵏⴱⴻⵍ ⴷ ⵣⵣⵄⴻⴼⵔⴰⵏ, ⵙ ⵓⵖⴰⵏⵉⵎ ⵓⵃⴻⵎⵎⵓⵎ ⵉⵜⵜⴼⵓⵃⴻⵏ ⴰⴽ-ⴷ ⵍⵇⴰⵔⴼⴰ, ⵄⵍⴰⵎ ⴽⵓⵍ ⵜⵉⵛⴻⵊⵊⵓⵔⴰ ⵏ ⵊⵊⴰⵡⵉ, ⵎⵉⵔⵔⵓ ⴷ ⵡⴻⵛⴼⵉⵍ, ⴰⴽ-ⴷ ⵎⴰⵔⵔⴰ ⵍⴻⵄⵟⵓⵔ ⵉⵚⴻⴱⵃⴻⵏ ⵇⴰⵄ. 
ⴰ ⵜⴰⵍⴰ ⵏ ⵉⵃⵡⵉⵛⴻⵏ, ⴰⵏⵓ ⵏ ⵡⴰⵎⴰⵏ ⵉⴷⴷⴰⵔⴻⵏ, ⵉⵏⵏⵉ ⴷⴷ-ⵉⵜⵜⴰⵣⵣⵍⴻⵏ ⵣⴻⴳ ⵉⴷⵓⵔⴰⵔ ⵏ ⵍⵓⴱⵏⴰⵏ.” 
“ⴽⴽⴰⵔ, ⴰ ⴰⵙⴻⵎⵎⵉⴹ ⵏ ⵏⵏⴻⵊ, ⴰⵙ-ⴷⴷ, ⴰ ⴰⵙⴻⵎⵎⵉⴹ ⵏ ⵙⵡⴰⴷⴷⴰⵢ, ⵙⵓⴹ ⵅ ⵡⴻⵃⵡⵉⵛ ⵉⵏⵓ, ⴻⵊⵊ ⵍⴻⴼⵡⴰⵃⴻⵜ ⵏ ⵍⴻⵄⵟⵓⵔ ⵏⵏⴻⵙ ⴰⴷ ⵜⵓⵢⵓⵔ. ⴻⵊⵊ ⵍⵍⵉⴼ ⵉⵏⵓ ⴰⴷ ⴷⴷ-ⵢⴰⵙ ⵖⴰⵔ ⵡⴻⵃⵡⵉⵛ ⵏⵏⴻⵙ, ⴰⴷ ⵉⵛⵛ ⵣⵉ ⵍⵖⵉⴵⴻⵜ ⵏⵏⴻⵙ ⵉⵚⴻⴱⵃⴻⵏ!” 
