﻿ⵉⵥⵍⵉ ⵅ ⵉⵥⵍⴰⵏ.
2.
“ⵏⴻⵛⵛ ⴷ ⵜⴰⵏⴻⵡⵡⴰⵛⵜ ⵏ ⵛⴰⵔⵓⵏ ⵡⴰⵔ ⵣⵣⴰⵢⴻⵙ ⵡⴹⴰⵏⵜ ⵜⵉⴼⵔⴰⵢ ⵄⴻⵎⵎⴰⵔⵚ, ⴷ ⵜⴰⵍⵉⵍⵍⴻⵛⵜ ⵏ ⵜⴻⵢⵙⴰⵔⵉⵏ.” 
“ⴰⵎ ⵜⵍⵉⵍⵍⴻⵛⵜ ⵊⴰⵔ ⵜⵣⴻⴳⴳⵯⴰⵔⵜ, ⴰⵎⵎⵓ ⵉ ⵜⴻⴵⴰ ⵜⴰⵎⴻⴷⴷⵓⴽⴽⴻⵍⵜ ⵉⵏⵓ ⵊⴰⵔ ⵜⵢⴻⴵⵉⵜⵉⵏ.” 
“ⴰⵎ ⵜⵛⴻⵊⵊⴰⵔⵜ ⵏ ⵜⵜⴻⴼⴼⴰⵃⵜ ⵊⴰⵔ ⵜⵛⴻⵊⵊⵓⵔⴰ ⵏ ⵡⴻⵣⵖⴰⵔ, ⴰⵎⵎⵓ ⵉ ⵢⴻⴵⴰ ⵍⵍⵉⴼ ⵉⵏⵓ ⵊⴰⵔ ⵡⴰⵔⵔⴰⵡⴻⵏ. ⵏⴻⵛⵛ ⴰⵇⴰ ⴰⵢⵉ ⵎⵎⴻⵥⵔⴻⵖ ⴰⴷ ⵇⵇⵉⵎⴻⵖ ⴷⵉ ⵜⵉⵍⵉ ⵏⵏⴻⵙ. ⵍⵖⵉⴵⴻⵜ ⵏⵏⴻⵙ ⴷ ⵎⵉⵥⵉⴷ ⵉ ⵡⴰⵏⴻⵖ ⵉⵏⵓ. 
ⵏⴻⵜⵜⴰ ⵉⵏⴷⴻⵀ ⴰⵢⵉ ⴷⵉ ⵜⴰⴷⴷⴰⵔⵜ ⵏ ⴱⵉⵏⵓ, ⵓ ⵜⴰⵢⵔⵉ ⴷ ⵜⴰⵄⴻⴵⴰⵏⵜ ⵏⵏⴻⵙ ⵅⴰⴼⵉ. 
ⵙⵊⴻⵀⴷⴻⵎ ⴰⵢⵉ ⵙ ⵜⵖⴰⵔⵢⵉⵟⴰⵜⵉⵏ ⵏ ⵣⵣⴱⵉⴱ, ⵙⴱⴰⵔⵔⴷⴻⵎ ⴰⵢⵉ ⵙ ⵜⵜⴻⴼⴼⴰⵃⵉⵏ, ⵎⴰⵖⴰⵔ ⵏⴻⵛⵛ ⵀⴻⵍⵛⴻⵖ ⵙ ⵜⴰⵢⵔⵉ. 
ⴰⵣⴻⵍⵎⴰⴹ ⵏⵏⴻⵙ ⵙⴰⴷⵓ ⵓⵣⴻⴵⵉⴼ ⵉⵏⵓ, ⴰⴼⵓⵙⵉ ⵏⵏⴻⵙ ⵉⴷⴰⵔⵔⴻⵄ ⴰⵢⵉ-ⴷⴷ. 
ⵏⴻⵛⵛ ⴰⴷ ⴽⴻⵏⵏⵉⵏⵜ ⵙⵙⵊⴰⴵⴰⵖ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ, ⵖⴰⵔ ⵜⵖⴰⵢⴹⵉⵏ ⵏ ⵡⴻⵣⵖⴰⵔ ⵓ ⵖⴰⵔ ⵜⵓⴷⴰⴷⵉⵏ ⴷⴻⴳ ⵉⵢⵢⴰⵔⴻⵏ, ⴰⵇⴰ ⴽⴻⵏⵏⵉⵏⵜ ⵡⴰⵔ ⵀⴻⴽⴽⵡⵍⴻⵏⵜ ⵜⴰⵢⵔⵉ, ⵡⴰⵔ ⵜⵜ-ⵉ-ⴷⴷ-ⵙⵙⴻⴽⴽⴰⵔⴰⵏⵜ ⴰⵍ ⵜᵉⵜⵜⴻⵅⵙ ⵙⵉⵎⴰⵏⵜ ⵏⵏⴻⵙ.” 
“ⵜⵎⵉⵊⵊⴰ ⵏ ⵍⵍⵉⴼ ⵉⵏⵓ! ⴰⵇⴰ ⴷⴰ, ⵉⵜⵜⴰⵙ-ⴷⴷ, ⵉⵏⴻⵟⵟⵓ ⵅ ⵉⴷⵓⵔⴰⵔ, ⵉⵏⴻⴳⴳⴻⵣ ⵅ ⵜⴻⵡⵔⵉⵔⵉⵏ! 
ⵍⵍⵉⴼ ⵉⵏⵓ ⵢⴰⵔⵡⴻⵙ ⴷⴻⴳ ⵉⵖⴰⵢⴹ ⵏ ⵡⴻⵣⵖⴰⵔ, ⵏⵉⵖ ⴷⴻⴳ ⵉⵊⵊ ⵏ ⵓⵎⴻⵥⵢⴰⵏ ⵏ ⵡⵓⴷⴰⴷⴻⵏ. ⴰⵇⴰ-ⵜ ⴷⴰ, ⵉⴱⴻⴷⴷ ⴰⵡⴰⵔⵏⵉ ⵉ ⵍⵃⵉⴹ ⵏⵏⴻⵖ, ⵉⵅⴻⵣⵣⴰⵔ ⵣⵉ ⵍⴻⴽⵡⴰⵣⵉ, ⵉⵜⵜⵛⴻⵢⵢⴻⵄ ⵣⵉ ⵛⵛⴻⴱⴱⴰⵛ.” 
“ⵍⵍⵉⴼ ⵉⵏⵓ ⵉⵜⵜⴰⵔⵔⴰ-ⴷⴷ, ⵉⵏⵏⴰ ⴰⵢⵉ: ‘ⴽⴽⴰⵔ, ⴱⴻⴷⴷ, ⴰ ⵜⴰⵎⴻⴷⴷⵓⴽⴽⴻⵍⵜ ⵉⵏⵓ, ⴰⵥⵔⵉ ⵉⵏⵓ, ⴰⵙ-ⴷⴷ! 
ⵎⴰⵖⴰⵔ ⴰⵇⴰ ⴷⴰ, ⵜⴰⴳⴻⵔⵙⵜ ⵜⴻⵄⴷⵓ, ⵉⴽⵙⵉ ⵡⴻⵏⵥⴰⵔ, ⴰⵇⴰ ⵉⵔⵓⵃ. 
ⴱⴰⵏⴻⵏ-ⴷⴷ ⵉⵏⵓⵡⵡⴰⵔⴻⵏ ⴷⵉ ⵜⴻⵎⵎⵓⵔⵜ, ⵍⵃⴰⵍ ⵏ ⵡⴻⵏⵣⵉⵣ ⴰⵇⴰ-ⵜ ⴷⴰ, ⵓ ⵜⵎⵉⵊⵊⴰ ⵏ ⵜⵊⵍⵉⵍⵍⴻⵃⵜ ⵏⴻⵙⵍⴰ ⵉ-ⵜⵜ ⵄⴰⵡⴻⴷ ⴷⵉ ⵜⴻⵎⵎⵓⵔⵜ ⵏⵏⴻⵖ. 
ⴰⵔⵜⵓ ⵏ ⵜⴰⵣⴰⵔⵜ ⵉⵜⵜⵅⴻⵎⵎⴰⵍ ⵍⴱⴰⵛⵓⵔ ⵏⵏⴻⵙ, ⵜⵉⵣⴰⵢⴰⵔⵉⵏ ⵉⵜⵜⵏⴻⵡⵡⴰⵔⴻⵏ ⴰⵔⵅⵓⵏ ⵉ ⵍⴻⴼⵡⴰⵃ. ⴽⴽⴰⵔ, ⴱⴻⴷⴷ, ⵜⴰⵎⴻⴷⴷⵓⴽⴽⴻⵍⵜ ⵉⵏⵓ, ⴰⵥⵔⵉ ⵉⵏⵓ, ⴰⵙ-ⴷⴷ!’” 
“ⵜⴰⴷⴱⵉⵔⵜ ⵉⵏⵓ ⴷⴻⴳ ⵉⵎⵓⵛⴰⵏ ⵏ ⵓⴷⵓⵔⵔⵉ ⴷⵉ ⵍⴻⵊⵔⵓⴼ, ⵜⵏⵓⴼⴼⴰⵔ ⴷⵉ ⵜⵙⴰⵡⴻⵏⵜ ⵏ ⵡⴻⴷⵔⴰⵔ. ⴻⵊⵊ ⴰⵢⵉ ⴰⴷ ⵥⴰⵔⴻⵖ ⴰⵖⴻⵎⴱⵓⴱ ⵏⵏⴻⵎ, ⴰⴷ ⵙⵍⴻⵖ ⵉ ⵜⵎⵉⵊⵊⴰ ⵏⵏⴻⵎ, ⵎⴰⵖⴰⵔ ⴷ ⵜⵎⵉⵥⵉⴷⵜ ⵉ ⵜⴻⴵⴰ ⵜⵎⵉⵊⵊⴰ ⵏⵏⴻⵎ, ⵉⵚⴱⴻⵃ ⵓⵖⴻⵎⴱⵓⴱ ⵏⵏⴻⵎ.” 
“ⵟⵟⴼⴻⵎ ⴰⵏⴻⵖ-ⴷⴷ ⵉⵛⴻⵄⴱⴰⵡⴻⵏ, ⵉⵛⴻⵄⴱⴰⵡⴻⵏ ⵉⵎⴻⵥⵢⴰⵏⴻⵏ, ⵉⵏⵏⵉ ⵉⵜⵜⴰⵔⵢⵜⴰⵔⴻⵏ ⴰⵏⴻⵖ ⵉⵎⴰⵔⵊⴰⵄⴻⵏ ⵏ ⵓⴹⵉⵍ, ⵎⴰⵖⴰⵔ ⵜⵉⵣⴰⵢⴰⵔⵉⵏ ⴷⴻⴳ ⵉⵎⴰⵔⵊⴰⵄⴻⵏ ⵏⵏⴻⵖ ⵜⵜⵏⴻⵡⵡⴰⵔⴻⵏⵜ ⵄⴰⴷ. 
ⵍⵍⵉⴼ ⵉⵏⵓ ⴰⵇⴰ-ⵜ ⵉⵏⵓ ⵓ ⵏⴻⵛⵛ ⵏⵏⴻⵙ, ⵏⴻⵛⵛ ⵏ ⵡⴻⵏⵏⵉ ⵢⴰⵔⴻⴽⴽⵡⵙⴻⵏ ⵊⴰⵔ ⵜⵍⵉⵍⵍⵉⵛⵉⵏ 
ⴰⵍ ⵉ ⵖⴰ ⵉⵙⵎⴻⴹ ⵡⴰⵙⵙ ⵓ ⴰⴷ ⴰⵔⴻⵡⵍⴻⵏⵜ ⵜⵉⵍⵉⵡⵉⵏ. ⵏⵏⴻⴹ-ⴷⴷ, ⴰ ⵍⵍⵉⴼ ⵉⵏⵓ, ⵉⵍⵉ ⴰⵎ ⵢⵉⵊⵊ ⵏ ⵉⵖⴰⵢⴹ ⵏ ⵡⴻⵣⵖⴰⵔ ⵏⵉⵖ ⴰⵎ ⵢⵉⵊⵊ ⵏ ⵓⵎⴻⵥⵢⴰⵏ ⵏ ⵡⵓⴷⴰⴷⴻⵏ ⵅ ⵉⴷⵓⵔⴰⵔ ⵉ ⵉⵜⵜⵡⴰⵇⴻⴹⵄⴻⵏ ⵙ ⵜⴻⵢⵙⴰⵔⵉⵏ.” 
