﻿ⴰⵡⴰⵍⴻⵏ ⵉⵡⴻⵥⵏⴻⵏ.
31.
ⴰⵡⴰⵍⴻⵏ ⵏ ⵍⴰⵎⵓⵢⵉⵍ, ⴰⵊⴻⴵⵉⴷ ⵏ ⵜⴻⵇⴱⵉⵍⵜ ⵏ ⵎⴰⵙⵙⴰ, ⵉ ⵣⵉ ⵜ ⵜⵄⴻⵍⵎⴻⴷ ⵢⴻⵎⵎⴰⵙ. 
ⵎⵉⵏ ⴷⵉⵏ, ⴰ ⵎⵎⵉ, ⵎⵉⵏ ⴷⵉⵏ, ⴰ ⵎⵎⵉ ⵏ ⵡⴻⵃⵙⵉⵏ ⵉⵏⵓ, ⵎⵉⵏ ⵉ ⵖⴰ ⵜⴻⴳⴳⴻⴷ, ⴰ ⵎⵎⵉ ⵏ ⵍⵡⵓⵄⵓⴷ ⵉⵏⵓ? 
ⵡⴰⵔ ⵜⵜⵉⵛ ⵜⵉⵣⴻⵎⵎⴰⵔ ⵏⵏⴻⵛ ⵉ ⵜⴻⵎⵖⴰⵔⵉⵏ, ⵓⵍⴰ ⵉⴱⵔⵉⴷⴻⵏ ⵏⵏⴻⵛ ⵉ ⵜⵉⵏⵏⵉ ⵉⵜⵜⵀⴻⵍⵍⴰⴽⴻⵏ ⵉⵊⴻⴵⵉⴷⴻⵏ. 
ⵡⴰⵔ ⴷⴷ-ⵜⵓⵙⵉ ⵉ ⵉⵊⴻⴵⵉⴷⴻⵏ, ⴰ ⵍⴰⵎⵓⵢⵉⵍ, ⵡⴰⵔ ⴷⴷ-ⵜⵓⵙⵉ ⵉ ⵉⵊⴻⴵⵉⴷⴻⵏ ⵎⴰⵃⴻⵏⴷ ⴰⴷ ⵙⵡⴻⵏ ⴱⵉⵏⵓ, ⵓⵍⴰ ⵉ ⴰⵢⵜ ⵏ ⵊⵊⴻⵀⴷ ⵎⴰⵃⴻⵏⴷ ⴰⴷ ⵎⴻⵥⵔⴻⵏ ⴷⵉ ⵛⵛⵔⴰⴱ. 
ⵏⵉⵖ ⴰⴷ ⵉⵙⵓⵡ ⵓ ⴰⴷ ⵉⵜⵜⵓ ⵍⴼⴰⵔⵉⴹⴰ, ⵓ ⴰⴷ ⵉⵙⵙⴼⴰⵔⵖ ⵜⴰⵏⴼⵓⵍⵜ ⵏ ⵎⴰⵔⵔⴰ ⵉⵎⵅⴻⵢⵢⴱⴻⵏ. 
ⴻⵡⵛ ⵛⵛⵔⴰⴱ ⵉ ⵢⵉⵏⵏⵉ ⵉ ⵖⴰ ⵉⵜⵜⵡⴰⵀⴻⵍⵍⴽⴻⵏ, ⵓⵍⴰ ⴷ ⴱⵉⵏⵓ ⵉ ⵢⵉⵏⵏⵉ ⴷ ⵉⵎⴻⵔⵣⴰⴳⴻⵏ ⴷⵉ ⵍⴻⵄⵎⴰⵔ ⵏⵙⴻⵏ. 
ⴻⵊⵊ ⵉ-ⵜ ⴰⴷ ⵉⵙⵓⵡ ⵓ ⴰⴷ ⵉⵜⵜⵓ ⵣⵣⴻⵍⴹ ⵏⵏⴻⵙ, ⴻⵊⵊ ⵉ-ⵜ ⵡⴰⵔ ⵜⵜⵅⴰⵔⵔⴰⵚ ⴷⵉ ⵜⴰⵎⴰⵔⴰ ⵏⵏⴻⵙ ⵄⴰⴷ. 
ⴰⵔⵣⴻⵎ ⴰⵇⴻⵎⵎⵓⵎ ⵏⵏⴻⵛ ⵉ ⵉⵣⵉⵢⵏⴰⵏ, ⵉ ⴷⴷⴻⵄⵡⴻⵜ ⵏ ⵎⴰⵔⵔⴰ ⵉⵏⵏⵉ ⵉⵜⵜⵡⴰⵊⵊⴻⵏ. 
ⴰⵔⵣⴻⵎ ⴰⵇⴻⵎⵎⵓⵎ ⵏⵏⴻⵛ, ⵃⴽⴻⵎ ⵙ ⵍⵃⵓⴽⵎ ⵏⵉⵛⴰⵏ, ⵓⵛⴰ ⴰⵖ ⵜⴰⵙⵖⴰⵔⵜ ⵉ ⵓⵎⴻⵣⵍⵓⴹ. 
ⴰⵍⵉⴼ. ⵎⴰⵏ ⵡⴻⵏ ⵉ ⵖⴰ ⵢⴰⴼⴻⵏ ⵉⵛⵜ ⵏ ⵜⴻⵎⵖⴰⵔⵜ ⵉⵎⴻⵃⴹⴻⵏ? ⵜⵜⴰⵎⴰⵏ ⵏⵏⴻⵙ ⵉⵄⴷⵓ ⵎⴰⵔⵔⴰ ⵍⵎⴰⵔⵊⴰⵏ. 
ⴱⵉⵜ. ⵅⴰⵙ ⵉ ⵉⵜⵜⵛⴰⵍⴰ ⵡⵓⵍ ⵏ ⵡⴻⵔⵢⴰⵣ ⵏⵏⴻⵙ, ⵡⴰⵔ ⴷ ⴰⵙ ⵉⵜⵜⵅⴻⵚⵚⵉ ⵍⴻⴼⴹⴻⵍ. 
ⴳⵉⵎⴻⵍ. ⵏⴻⵜⵜⴰⵜ ⵜᵉⵜⵜⴻⴳⴳ ⴰⵙ ⵎⵉⵏ ⵉⵚⴻⴱⵃⴻⵏ, ⵡⴰⵔ ⵉⴵⵉ ⵍⵖⴰⵔ, ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ. 
ⴷⴰⵍⵉⵜ. ⵏⴻⵜⵜⴰⵜ ⵜⴰⵔⴻⵣⵣⵓ ⵜⴰⴹⵓⴼⵜ ⴷ ⵜⵉⴼⴼⴻⵙⵜ, ⵓ ⵜⵅⴻⴷⴷⴻⵎ ⵙ ⵉⴼⴰⵙⵙⴻⵏ ⵏⵏⴻⵙ ⵉⵎⴻⵃⴹⴻⵏ. 
ⵀⵉ. ⵏⴻⵜⵜⴰⵜ ⵜⴻⴳⴳⴰ ⴰⵎ ⵜⵖⴰⵔⵔⵓⴱⴰ ⵏ ⵓⵙⴻⴱⴱⴰⴱ, ⵣⵉ ⵍⴰⴳⴳⵯⴰⵊ ⵜᵉⵜⵜⴰⵡⵉ-ⴷⴷ ⵎⴰⵛⵛⴰ ⵏⵏⴻⵙ. 
ⵡⴰⵡ. ⵏⴻⵜⵜⴰⵜ ⵜᵉⵜⵜⵏⴰⴽⴽⴰⵔ ⵓⵎⵉ ⵄⴰⴷ ⵜⴻⴵⴰ ⴵⵉⵍⴻⵜ, ⵜᵉⵜⵜⵉⵛ ⵎⴰⵛⵛⴰ ⵉ ⵜⴰⴷⴷⴰⵔⵜ ⵏⵏⴻⵙ, ⵓ ⵜⴰⵙⵖⴰⵔⵜ ⵏⵙⴻⵏⵜ ⵉ ⵜⴻⵎⵙⴻⵅⵅⴰⵔⵉⵏ ⵏⵏⴻⵛ ⵜⵉⵎⴻⵥⵢⴰⵏⵉⵏ. 
ⵣⴰⵢⵉⵏ. ⵏⴻⵜⵜⴰⵜ ⵜᵉⵜⵜⵅⴰⵔⵔⴰⵚ ⴷⴻⴳ ⵉⵢⵢⴰⵔ ⵓ ⵜᵉⵜⵜⴻⵟⵟⴻⴼ ⵉ-ⵜ, ⵣⵉ ⵍⵖⵉⴵⴻⵜ ⵏ ⵉⴼⴰⵙⵙⴻⵏ ⵏⵏⴻⵙ ⵜⴻⵥⵥⵓ ⵜⵉⵣⴰⵢⴰⵔⵉⵏ ⴷⴻⴳ ⵓⵎⴰⵔⵊⴻⵄ. 
ⵅⵉⵜ. ⵏⴻⵜⵜⴰⵜ ⵜⴱⴻⴽⴽⴻⵙ ⵜⵉⵊⵄⵉⵏⵏⴰⵜⵉⵏ ⵏⵏⴻⵙ ⵙ ⵊⵊⴻⵀⴷ, ⵓ ⵜⴻⵙⵙⴻⵎⵃⴰⴹ ⵉⵖⴰⴵⴻⵏ ⵏⵏⴻⵙ. 
ⵜⵉⵜ. ⵏⴻⵜⵜⴰⵜ ⵜⵃⴻⴽⴽⴰⵔ ⵉ ⵍⴻⴼⴹⴻⵍ ⵏ ⵜⵙⴻⴱⴱⴰⴱⵜ ⵏⵏⴻⵙ, ⵍⴻⴼⵏⴰⵔ ⵏⵏⴻⵙ ⵡⴰⵔ ⵉⵅⴻⵙⵙⵉ ⴷⵉ ⴵⵉⵍⴻⵜ. 
ⵢⵓⴷ. ⵏⴻⵜⵜⴰⵜ ⵜⴻⵙⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵙ ⵖⴰⵔ ⵜⵔⵓⴽⴽⴰ, ⵓ ⵉⴼⴰⵙⵙⴻⵏ ⵏⵏⴻⵙ ⵟⵟⴼⴻⵏ ⴰⵎⴻⴽⴽⵓⴽ ⵏ ⵓⵅⴻⵢⵢⴰⴹ. 
ⴽⴰⴼ. ⵏⴻⵜⵜⴰⵜ ⵜⴰⵔⴻⵣⵣⴻⵎ ⴰⴼⵓⵙ ⵏⵏⴻⵙ ⵉ ⵓⵎⴻⵃⴷⴰⵊ, ⵜⴻⵙⵙⵡⴰⵥⵥⴰⴹ ⵉⴼⴰⵙⵙⴻⵏ ⵏⵏⴻⵙ ⵉ ⵓⵎⴻⵣⵍⵓⴹ. 
ⵍⴰⵎⵉⴷ. ⵏⴻⵜⵜⴰⵜ ⵡⴰⵔ ⵜᵉⵜⵜⴻⴳⴳⵯⴻⴷ ⵣⵉ ⵜⴰⴷⴷⴰⵔⵜ ⵏⵏⴻⵙ ⴷⵉ ⵙⵙⵉⴱⴱⴻⵜ ⵏ ⵡⴻⴷⴼⴻⵍ, ⵎⴰⵖⴰⵔ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ ⵖⴰⵔⴻⵙ ⴰⵔⵔⵓⴹ ⴰⵔⵊⵓⵡⴰⵏⵉ. 
ⵎⵉⵎ. ⵏⴻⵜⵜⴰⵜ ⵜⴻⴳⴳⴰ ⵉ ⵢⵉⵅⴻⴼ ⵏⵏⴻⵙ ⵜⵉⵙⵓⵏⵜⴰⵡⵉⵏ ⵏ ⵣⵡⴰⵇ, ⴰⵔⵔⵓⴹ ⵏⵏⴻⵙ ⵙ ⵍⴻⵇⵟⴻⵏ ⴰⵣⴷⴰⴷ ⴷ ⵓⴼⵉⵍⵓ ⴰⵔⵊⵓⵡⴰⵏⵉ. 
ⵏⵓⵏ. ⴰⵔⵢⴰⵣ ⵏⵏⴻⵙ ⵉⵜⵜⵡⴰⵙⵙⴻⵏ ⴷⵉ ⵜⴻⵡⵡⵓⵔⴰ, ⵅⵎⵉ ⵉⵜⵜⵖⵉⵎⴰ ⴰⴽ-ⴷ ⵉⵎⵖⴰⵔⴻⵏ ⵏ ⵜⴻⵎⵎⵓⵔⵜ. 
ⵙⴰⵎⵉⵅ. ⵏⴻⵜⵜⴰⵜ ⵜᵉⵜⵜⴻⴳⴳ ⴰⵔⵔⵓⴹ ⵏ ⵍⴻⵇⵟⴻⵏ ⵓⵛⴰ ⵜⴻⵣⵣⵏⵓⵣⴰ ⵉ-ⵜ, ⵏⴻⵜⵜⴰⵜ ⵜⴻⵣⵣⵏⵓⵣⴰ ⵉⴱⵓⵢⴰⵙ ⵉ ⵓⵙⴻⴱⴱⴰⴱ ⵣⵉ ⴽⴻⵏⵄⴰⵏ. 
ⵄⴰⵢⵉⵏ. ⵊⵊⴻⵀⴷ ⴷ ⵍⵄⴻⵣⵣ ⴷ ⴰⵔⵔⵓⴹ ⵏⵏⴻⵙ, ⵏⴻⵜⵜⴰⵜ ⵜⴹⴻⵃⵃⴻⵛ ⵜⴻⵙⴼⴰⵔⵏⵉⵏ ⵅ ⵡⴰⵙⵙ ⵉ ⴷⴷ ⵖⴰ ⵢⴰⵙⴻⵏ. 
ⴱⵉ. ⵏⴻⵜⵜⴰⵜ ⵜⴰⵔⴻⵣⵣⴻⵎ ⴰⵇⴻⵎⵎⵓⵎ ⵏⵏⴻⵙ ⵙ ⵜⵉⵖⵉⵜ, ⴰⵇⴰ ⴷⵉⵏ ⵜⴰⵖⵓⵔⵉ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵅ ⵢⵉⵍⴻⵙ ⵏⵏⴻⵙ. 
ⵜⵙⴰⴷⵉ. ⵏⴻⵜⵜⴰⵜ ⵜⵃⴻⵟⵟⴰ ⵅ ⵎⵉⵏ ⵉⵜⵜⴻⵎⵎⵙⴰⵔⴰⵏ ⴷⵉ ⵜⴰⴷⴷⴰⵔⵜ, ⴰⵖⵔⵓⵎ ⵏ ⵍⴻⵄⴳⴻⵣ ⵡⴰⵔ ⵜᵉⵜⵜⴻⵜⵜ. 
ⵇⵓⴼ. ⵉⵃⴻⵏⵊⵉⵔⴻⵏ ⵏⵏⴻⵙ ⵜⵜⴻⴽⴽⴰⵔⴻⵏ, ⵙⵙⴻⵎⵖⴰⵔⴰⵏ ⵜⵜ ⵙ ⵍⴻⴼⵔⴰⵃⴻⵜ, ⵓⵍⴰ ⴷ ⴰⵔⵢⴰⵣ ⵏⵏⴻⵙ ⵉⵜⵜⵎⴻⴷⴷⴻⵃ ⵉ-ⵜⵜ. 
ⵔⵉⵅ. ⴰⵟⵟⴰⵙ ⵏ ⵜⵢⴻⵙⵙⵉⵜ ⴳⴳⵉⵏⵜ ⵜⵉⵎⴻⴳⴳⴰ ⵊⴻⵀⴷⴻⵏⵜ, ⵎⴰⵛⴰ ⵛⴻⵎ ⵜⴻⵄⴷⵓⴷ-ⴷⴷ ⵜⴻⵏ ⵎⴰⵔⵔⴰ. 
ⵛⵉⵏ. ⵍⴻⴱⵀⵓⵜ ⵜⵛⴻⵎⵎⴻⵜ ⵓ ⴰⵥⵔⵉ ⵉⵜⵜⵖⴻⵛⵛⴰ ⵎⴰⵛⴰ ⵜⴰⵎⵖⴰⵔⵜ ⵏⵏⵉ ⵉⵜⵜⴻⴳⴳⵯⴷⴻⵏ ⵙⵉⴷⵉ, ⵉⵜⵜⵅⴻⵚⵚⴰ ⴰⴷ ⵜⵜ ⵙⵙⴻⵎⵖⴰⵔⴻⵏ. 
ⵜⴰⴼ. ⵡⵛⴻⵎ ⴰⵙ ⵣⵉ ⵍⵖⵉⴵⴻⵜ ⵏ ⵉⴼⴰⵙⵙⴻⵏ ⵏⵏⴻⵙ, ⵊⵊⴻⵎ ⵜⵉⵎⴻⴳⴳⴰ ⵏⵏⴻⵙ ⴰⴷ ⴰⵙ ⵚⴻⴱⴱⵃⴻⵏⵜ ⵖⴰⵔ ⵜⴻⵡⵡⵓⵔⴰ. 
