﻿ⴰⵡⴰⵍⴻⵏ ⵉⵡⴻⵥⵏⴻⵏ.
27.
ⵡⴰⵔ ⵜⵜⴼⴻⵢⵢⴻⵛ ⵣⴻⴳ ⵡⴰⵙⵙ ⵏ ⵜⵉⵡⴻⵛⵛⴰ, ⵎⴰⵖⴰⵔ ⵡⴰⵔ ⵜⴻⵙⵙⵉⵏⴻⴷ ⵛⴰ ⵎⵉⵏ ⴷⴷ ⵖⴰ ⵢⴰⵡⵉ ⵡⴰⵙⵙ. 
ⴻⵊⵊ ⵉⵊⵊ ⵏ ⵓⴱⴰⵔⵔⴰⵏⵉ ⴰⴷ ⵛⴻⴽ ⵉⵛⴻⵏⵏⴻⵄ, ⵡⴰⵔ ⵉⴵⵉ ⴰⵇⴻⵎⵎⵓⵎ ⵏⵏⴻⵛ, ⵉⵊⵊ ⵏ ⵎⵉⴷⴷⴻⵏ, ⵡⴰⵔ ⵉⴵⵉ ⵉⵢⴻⵏⵛⵉⵛⴻⵏ ⵏⵏⴻⵛ. 
ⴰⵥⵔⵓ ⵉⴷⵇⴻⵍ, ⵉⵊⴷⵉ ⵉⵡⴻⵣⵣⴻⵏ, ⵎⴰⵛⴰ ⴰⴼⵓⴳⴻⵎ ⵏ ⵓⴱⵓⵀⴰⵍⵉ ⵉⴷⵇⴻⵍ ⵅⴰⵙⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. 
ⴰⵙⵄⴰⵔ ⴷ ⵓⴷⵓⵇⵇⴻⵣ ⵏ ⵡⴻⵖⴹⴰⴱ ⴰⵇⴰ ⴰⵜⴻⵏ ⵇⴻⵙⵃⴻⵏ, ⵎⴰⵛⴰ ⵎⴰⵏ ⵡⴻⵏ ⵉⵣⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵖⴰⵔ ⵜⵓⵙⵎⵉ? 
ⵜⴻⵃⵍⴰ ⵜⵜⴰⵔⴱⵉⵢⵢⴻⵜ ⵙ ⴱⵟⴰⵢⵟⴰⵢ ⵅ ⵜⴰⵢⵔⵉ ⵉⵏⵏⵓⴼⴼⴰⵔⴻⵏ. 
ⵉⵢⴻⵣⵣⵉⵎⴻⵏ ⵏ ⵡⴻⵏⵏⵉ ⵛⴻⴽ ⵉⵜⵜⴻⵅⵙⴻⵏ ⴰⵇⴰ ⴷ ⵍⴻⵄⵍⴰⵎⴰⵜ ⵏ ⵍⴰⵎⴰⵏ, ⵎⴰⵛⴰ ⵉⵙⵓⴷⵉⵎⴻⵏ ⵏ ⵢⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ ⴰⵇⴰ ⴷ ⴰⵟⵟⴰⵙ. 
ⵡⴻⵏⵏⵉ ⵉⵊⵊⵉⵡⵏⴻⵏ, ⵉⵄⴻⵊⵊⴻⵏ ⵅ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ, ⵎⴰⵛⴰ ⵉ ⵡⴻⵏⵏⵉ ⵉⴵⵓⵥⴻⵏ ⵎⴰⵔⵔⴰ ⵎⵉⵏ ⵢⴰⵔⴻⵣⴳⴻⵏ ⴷ ⴰⵎⵉⵥⵉⴷ. 
ⴰⵎ ⵉⵊⵊ ⵏ ⵡⴻⵊⴹⵉⴹ ⵉⵟⵟⴰⵡ, ⵉⴳⴳⵯⴻⴷ ⵣⵉ ⵍⵄⵓⵛⵛ ⵏⵏⴻⵙ, ⴰⵎⵎⵓ ⵉ ⵉⴵⴰ ⵡⴻⵔⵢⴰⵣ ⵏⵏⵉ ⵉ ⵖⴰ ⵉⵟⴻⵍⵍⵄⴻⵏ ⴱⴰⵔⵔⴰ ⵅ ⵡⴻⵎⵛⴰⵏ ⵏⵏⴻⵙ. 
ⵣⵣⴻⵛⵜ ⴷ ⵍⴻⴱⵅⵓⵔ ⵙⵙⴼⴰⵔⵔⴰⵃⴻⵏ ⵓⵍ, ⴰⵎⵎⵓ ⵄⴰⵡⴻⴷ ⵜⴰⵎⵙⴻⵄⵄⴰⴼⵜ ⵉⵛⵏⴰⵏ ⵏ ⵉⵊⵊ ⵏ ⵓⵎⴻⴷⴷⵓⴽⴽⴻⵍ ⵣⵉ ⵛⵛⵡⴰⵔ ⵏ ⵡⵓⵍ. 
ⵡⴰⵔ ⵙⴻⵎⵎⴻⵃ ⴷⴻⴳ ⵓⵎⴻⴷⴷⵓⴽⴽⴻⵍ ⵏⵏⴻⵛ, ⵓⵍⴰ ⴷⴻⴳ ⵓⵎⴻⴷⴷⵓⴽⴽⴻⵍ ⵏ ⴱⴰⴱⴰⵛ, ⵡⴰⵔ ⵜⵜⵉⴷⴻⴼ ⵛⴰ ⵖⴰⵔ ⵜⴰⴷⴷⴰⵔⵜ ⵏ ⵓⵎⴰⵛ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵏⵏⴻⵛ. ⵉⵃⵍⴰ ⵉⵊⵊ ⵏ ⵡⴰⵊⵊⴰⵔ ⵢⵓⴷⴻⵙ ⵅ ⵉⵊⵊ ⵏ ⵜⴻⵡⵎⴰⵜ ⵢⵉⴳⴳⵯⴻⵊ. 
ⵉⵍⵉ ⴷ ⴰⵎⵉⵖⵉⵙ, ⴰ ⵎⵎⵉ, ⵓ ⵙⴼⴰⵔⵃ ⵓⵍ ⵉⵏⵓ, ⵎⴰⵃⴻⵏⴷ ⵣⴻⵎⵎⴰⵔⴻⵖ ⴰⴷ ⴷⴷ-ⴰⵔⵔⴻⵖ ⵅ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵙⴻⵃⵇⴰⵔⴻⵏ. 
ⵡⴻⵏⵏⵉ ⵉⴼⴻⵜⵜⵏⴻⵏ ⵉⵜⵜⵡⴰⵍⴰ ⵍⵖⴰⵔ ⵓⵛⴰ ⵉⵙⵙⵏⵓⴼⴼⴰⵔⴰ ⵉⵅⴻⴼ ⵏⵏⴻⵙ, ⵎⴰⵛⴰ ⵉⵃⴰⴼⵉⵢⵢⴻⵏ ⴰⵔⴻⵏⵏⵉⵏ ⴳⴳⵓⵔⴻⵏ ⵓⵛⴰ ⵉⵜⵜⵅⴻⵚⵚⴰ ⴰⴷ ⵜⵜⵡⴰⵄⴰⵇⴰⴱⴻⵏ. 
ⴽⵙⵉ ⴰⵔⵔⵓⴹ ⵏⵏⴻⵙ, ⵎⴰⵖⴰⵔ ⵉⴷⴷⴰⴽⴽⵡⴰⵍ ⴷ ⴰⴹⵎⴰⵏ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ, ⴽⵙⵉ ⵜ ⴷ ⴷⴷⵉⵢⵢⴻⵜ ⵉ ⵢⵉⵛⵜ ⵏ ⵜⴻⵎⵖⴰⵔⵜ ⵣⵉ ⴱⴰⵔⵔⴰ. 
ⵡⴻⵏⵏⵉ ⵉⵜⵜⴱⴰⵔⴽⴻⵏ ⴰⵎⴻⴷⴷⵓⴽⴽⴻⵍ ⵏⵏⴻⵙ ⵣⵉⵛ ⵖⴰⵔ ⵜⵓⴼⴼⵓⵜ ⵙ ⵜⵎⵉⵊⵊⴰ ⵉⵊⴻⵀⴷⴻⵏ, ⴰⵇⴰ ⵎⴰⵏ ⴰⵢⴰ ⴰⴷ ⴰⵙ ⵉⵜⵜⵡⴰⵃⵙⴻⴱ ⴷ ⵏⵏⴻⵄⵍⴻⵜ. 
ⴰⵎⴻⵛⵏⴰⵡ ⵜⵓⴷⴷⵉⵎⵜ ⵡⴰⵔ ⵉⵜⵜⴱⴻⴷⴷⵉⵏ ⴷⴻⴳ ⵡⴰⵙⵙ ⵏ ⵡⴻⵏⵥⴰⵔ ⵉⵊⴻⵀⴷⴻⵏ, ⴰⵎⵎⵓ ⵉ ⵜⴻⴵⴰ ⵜⴻⵎⵖⴰⵔⵜ ⵉⵜⵜⴻⵎⵛⵓⴱⴱⵓⵛⴻⵏ. 
ⵡⴻⵏⵏⵉ ⵉⵜⵜⴻⵅⵙⴻⵏ ⴰⴷ ⴰⵙ ⵉⴱⴻⵍⵍⴻⵄ, ⴰⵇⴰ-ⵜ ⴰⵎ ⵡⴻⵏⵏⵉ ⵉⵜⵜⴻⵅⵙⴻⵏ ⴰⴷ ⵉⵇⴰⵍⴰ ⵉ ⵓⵙⴻⵎⵎⵉⴹ, ⵓ ⴰⴼⵓⵙ ⵏⵏⴻⵙ ⴰⴼⵓⵙⵉ ⴰⴷ ⵉⵟⵟⴻⴼ ⵣⵣⴻⵛⵜ ⵉⵜⵜⴻⵃⵔⵓⴵⵓⴹⴻⵏ. 
ⴰⵎ ⵡⴻⵏⵏⵉ ⵉⵙⵙⴻⵇⴹⴰⵄⴻⵏ ⵓⵣⵣⴰⵍ ⵙ ⵡⵓⵣⵣⴰⵍ, ⴰⵎⵎⵓ ⵉ ⵉⵙⵙⴻⵇⴹⴰⵄ ⵡⴻⵔⵢⴰⵣ ⵜⵉⵎⴻⴳⴳⴰ ⵏ ⵡⴻⵏⵏⵉ ⵜ ⵢⵓⴷⵙⴻⵏ. 
ⵡⴻⵏⵏⵉ ⵉⵃⴻⵟⵟⴰⵏ ⵅ ⵉⵊⵊ ⵏ ⵡⴰⵔⵜⵓ, ⴰⴷ ⵉⵛⵛ ⵍⵖⵉⴵⴻⵜ ⵏⵏⴻⵙ, ⵡⴻⵏⵏⵉ ⵉⵃⴻⵟⵟⴰⵏ ⴱⴰⴱ ⵏⵏⴻⵙ, ⴰⴷ ⵉⵜⵜⵡⴰⵛⴻⵏⵏⴻⵄ. 
ⴰⵎ ⴷⴷ-ⵉⵜⵜⴱⴰⵏ ⵓⵖⴻⵎⴱⵓⴱ ⴷⴻⴳ ⵓⵖⴻⵎⴱⵓⴱ ⴷⴻⴳ ⵡⴰⵎⴰⵏ, ⴰⵎⵎⵓ ⴷⴷ-ⵉⵜⵜⴱⴰⵏ ⵡⵓⵍ ⵏ ⴱⵏⴰⴷⴻⵎ ⵅ ⴱⵏⴰⴷⴻⵎ ⵄⴰⵡⴻⴷ. 
ⴰⵎ ⵍⴰⵅⴰⵔⵜ ⴷ ⵓⵙⵀⴻⵍⵍⴻⴽ ⵡⴰⵔ ⵜⵜⵢⵉⵡⵉⵏⴻⵏ, ⴰⵎⵎⵓ ⵓⵍⴰ ⴷ ⵜⵉⵟⵟⴰⵡⵉⵏ ⵏ ⵉⵡⴷⴰⵏ ⵡⴰⵔ ⵜⵜⵉⵡⴹⴻⵏⵜ ⴰⴷ ⵊⵊⵉⵡⵏⴻⵏⵜ. 
ⴰⵟⴻⵏⵊⵉⵔ ⵏ ⵓⵙⴻⴼⵙⵉ ⵉ ⵏⵏⵓⵇⴰⵔⵜ ⴷ ⵓⴼⴰⵔⵔⴰⵏ ⵉ ⵡⵓⵔⴻⵖ, ⴰⵎⵎⵓ ⵉ ⵉⴵⴰ ⵓⵍⴰ ⴷ ⴰⵔⵢⴰⵣ ⴰⵎ ⵎⴰⵎⵎⴻⵛ ⵜ ⵜⵜⵎⴻⴷⴷⴰⵃⴻⵏ. 
ⵎⴰⵍⴰ ⵜⴻⴷⴷⵣⴻⴷ ⴰⴱⵓⵀⴰⵍⵉ ⵙ ⵡⴻⵣⴷⵓⵣ ⴷⵉ ⵍⵎⴻⵀⵔⴰⵣ ⵊⴰⵔ ⵍⵃⴻⴱⴱ ⵏ ⵉⵎⴻⵏⴷⵉ, ⵜⵓⴱⴱⵓⵀⴻⵍⵢⴰ ⵏⵏⴻⵙ ⵡⴰⵔ ⵅⴰⵙ ⵜⵃⴻⵢⵢⵉⴷ. 
ⵃⴹⴰ ⵎⴰⵃⴻⵏⴷ ⴰⴷ ⵜⴻⵙⵙⵏⴻⴷ ⵎⴰⵎⵎⴻⵛ ⴷⴷ-ⵉⵜⵜⴱⴰⵏ ⵡⵓⴵⵉ ⵏⵏⴻⵛ, ⵡⴻⵊⵊⴻⵀ ⵓⵍ ⵏⵏⴻⵛ ⵖⴰⵔ ⵜⵃⵉⵎⵔⵉⵡⵉⵏ. 
ⵎⴰⵖⴰⵔ ⵍⴻⴽⵙⵉⴱⴻⵜ ⵡⴰⵔ ⵜᵉⵜⵜⵖⵉⵎⵉ ⵉ ⵍⴻⴱⴷⴰ, ⵏⵉⵖ ⵎⴰ ⴰⴷ ⵉⵇⵇⵉⵎ ⵜⵜⴰⵊ ⵏ ⵡⴻⵄⵣⴰⵍ ⵣⵉ ⵊⵊⵉⵍ ⴰⵍ ⵊⵊⵉⵍ ⵏⵏⴻⵖⵏⵉ? 
ⵎⴰⵍⴰ ⵉⵔⵓⵃ ⴰⵔⴱⵉⵄ ⵓⵛⴰ ⵉⴱⴰⵏ-ⴷⴷ ⵓⵖⴻⵎⵎⵓⵢ ⴰⵣⵉⵣⴰ, ⵉⵜⵜⵡⴰⵃⵜⴻⵛ ⴰⴼⵙⵓ ⵅ ⵉⴷⵓⵔⴰⵔ, 
ⵅⴻⵏⵏⵉ ⴰⴷ ⵉⵍⵉⵏ ⵉⵣⵎⴰⵔⴻⵏ ⵉ ⵡⴰⵔⵔⵓⴹ ⵏⵏⴻⵛ, ⵓⵍⴰ ⴷ ⵉⵖⴰⵢⴹⴻⵏ ⵉ ⵜⵎⴻⵙⵖⵉⵡⵜ ⵏ ⵢⵉⵊⵊ ⵏ ⵢⴻⵢⵢⴰⵔ. 
ⵓⵛⴰ ⴰⴷ ⵖⴰⵔⴻⴽ ⵢⵉⵍⵉ ⵎⵉⵏ ⵜⴻⵃⵡⴰⵊⴻⴷ ⵏ ⵓⵖⵉ ⵏ ⵜⵖⴰⵢⵟⵉⵏ ⵉ ⵎⴰⵛⵛⴰ ⵏⵏⴻⵛ, ⴰⴷ ⵢⵉⵍⵉ ⴷ ⵎⴰⵛⵛⴰ ⵉ ⵜⴰⴷⴷⴰⵔⵜ ⵏⵏⴻⵛ, ⵓⵍⴰ ⴷ ⵍⴻⵄⵡⴻⵍⵜ ⵉ ⵜⴻⵎⵙⴻⵅⵅⴰⵔⵉⵏ ⵏⵏⴻⵛ ⵜⵉⵎⴻⵥⵢⴰⵏⵉⵏ. 
