﻿ⴰⵡⴰⵍⴻⵏ ⵉⵡⴻⵥⵏⴻⵏ.
23.
ⵎⴰⵍⴰ ⵜⴻⵇⵇⵉⵎⴻⴷ ⵖⴰⵔ ⵉⵊⵊ ⵏ ⵍⵃⴰⴽⴻⵎ, ⵎⴰⵃⴻⵏⴷ ⴰⴷ ⵜⴻⵛⵛⴻⴷ ⴰⴽⵉⴷⴻⵙ, ⵃⴹⴰ ⵎⵍⵉⵃ ⵎⵉⵏ ⵉⴵⴰⵏ ⵣⵣⴰⵜⴻⴽ. 
ⴻⴳⴳ ⵉⵊⵊ ⵏ ⵍⵎⵓⵙ ⵅ ⵢⵉⵍⵉ ⵏⵏⴻⵛ, ⵎⴰⵍⴰ ⵛⴻⴽ ⴷ ⵉⵊⵊ ⵏ ⴱⵓ-ⵍⴻⵎⵖⴰⵔⴻⵜ ⵏ ⵓⵄⴻⴷⴷⵉⵙ. 
ⵡⴰⵔ ⵜⵜⴻⴳⴳ ⵎⴻⵥⵔⵉ ⴷⵉ ⵎⴰⵛⵛⴰ ⵏⵏⴻⵙ ⵉⵛⵏⴰⵏ, ⵎⴰⵖⴰⵔ ⴰⵇⴰ-ⵜ ⴷ ⵎⴰⵛⵛⴰ ⵏ ⵜⵓⵅⵅⵓⵏⴰ. 
ⵡⴰⵔ ⵙⵙⵉⵃⵉⵍ ⵉⵅⴻⴼ ⵏⵏⴻⵛ ⵃⵉⵎⴰ ⴰⴷ ⵜⴷⴻⵡⵍⴻⴷ ⴷ ⴱⵓ-ⵡⴰⴳⵍⴰ, ⵙⴰⵔⵅⵓ ⴷⴻⴳ ⵏⵏⴻⵢⵢⴻⵜ ⵏⵏⴻⵛ. 
ⵎⴰⵍⴰ ⵟⵟⴰⵡⴻⵏⵜ ⵜⵉⵟⵟⴰⵡⵉⵏ ⵖⴰⵔⴻⵙ, ⴰⵇⴰ ⵡⴰⵔ ⴷⵉⵏ ⴰⴳⵍⴰ ⵄⴰⴷ! ⵎⴰⵖⴰⵔ ⴰⴷ ⵉⴳⴳ ⴰⴼⵔⵉⵡⴻⵏ ⵉ ⵢⵉⵅⴻⴼ ⵏⵏⴻⵙ, ⴰⴷ ⵉⴹⵡⴰ ⵖⴰⵔ ⵓⵊⴻⵏⵏⴰ ⴰⵎ ⵢⵉⵊⵊ ⵏ ⵓⴳⵉⴷⴻⵔ. 
ⵡⴰⵔ ⵜⵜᵉⵜⵜ ⴰⵖⵔⵓⵎ ⵏ ⵡⴻⵏⵏⵉ ⴷⵉ ⵜⴻⴵⴰ ⵜⵉⵟⵟ ⵜⴰⵄⴻⴼⴼⴰⵏⵜ, ⵡⴰⵔ ⵎⴻⵥⵔⵉ ⴷⵉ ⵎⴰⵛⵛⴰ ⵏⵏⴻⵙ ⵉⵛⵏⴰⵏ. 
ⵎⴰⵖⴰⵔ ⴰⵎ ⵎⴰⵎⵎⴻⵛ ⵜ ⵉⵜⵜⵅⴰⵔⵔⴰⵚ, ⴰⵎⵎⵓ ⵉ ⵜ ⵉⵜⵜⴻⴳⴳ ⵏⴻⵜⵜⴰ. ⵉⵇⵇⴰⵔ: “ⴻⵛⵛ, ⵜⴻⵙⵡⴻⴷ!”, ⵎⴰⵛⴰ ⵓⵍ ⵏⵏⴻⵙ ⵡⴰⵔ ⴰⴽⵉⴷⴻⴽ ⵉⴵⵉ. 
ⴰⵣⴻⵄⵄⵉⴼ ⵉ ⵜⴻⵛⵛⵉⴷ, ⴰⴷ ⵜ-ⵉ-ⴷⴷ-ⵜⵄⵓⵇⵇⴻⴷ, ⴰⵡⴰⵍⴻⵏ ⵉⵚⴻⴱⵃⴻⵏ ⵏⵏⴻⵛ ⵜⴹⴻⵢⵢⵄⴻⴷ ⵜⴻⵏ. 
ⵡⴰⵔ ⵙⵉⵡⴻⵍ ⴷⴻⴳ ⵓⵎⴻⵣⵣⵓⵖ ⵏ ⵉⵊⵊ ⵏ ⵓⴱⵓⵀⴰⵍⵉ, ⵎⴰⵖⴰⵔ ⵏⴻⵜⵜⴰ ⴰⴷ ⵉⵙⵙⴻⵃⵇⴰⵔ ⴰⵡⴰⵍⴻⵏ ⵏ ⵡⴻⴼⵜⴰⵏ ⵏⵏⴻⵛ. 
ⵡⴰⵔ ⵙⵎⵓⵟⵟⵓⵢ ⴰⵢⵎⵉⵔ ⵏ ⵡⴻⵛⵃⴰⵍ ⵓⵢⴰ, ⵡⴰⵔ ⵜⵜⴰⴷⴻⴼ ⴷⴻⴳ ⵉⵢⵢⴰⵔⴻⵏ ⵏ ⵉⵢⵓⵊⵉⵍⴻⵏ, 
ⵎⴰⵖⴰⵔ ⴰⵎⴻⴼⴷⵉ ⵏⵙⴻⵏ ⴷ ⴰⵎⴻⵇⵇⵔⴰⵏ, ⵏⴻⵜⵜⴰ ⴰⴷ ⴷⴷ-ⵢⴰⵖ ⵜⴰⵙⵖⴰⵔⵜ ⵏⵙⴻⵏ ⵣⵣⴰⵢⴻⴽ. 
ⴰⵔⵔ ⵓⵍ ⵏⵏⴻⵛ ⵖⴰⵔ ⵓⵡⴻⴱⴱⴻⵅ, ⵉⵎⴻⵣⵣⵓⵖⴻⵏ ⵏⵏⴻⵛ ⵖⴰⵔ ⵡⴰⵡⴰⵍⴻⵏ ⵏ ⵜⵓⵙⵙⵏⴰ. 
ⵡⴰⵔ ⵜⵜᵉⵟⵟⴻⴼ ⵜⵜⴰⵔⴱⵉⵢⵢⴻⵜ ⵅ ⵓⵃⵓⴷⵔⵉ, ⵡⴰⵅⵅⴰ ⵜⴻⵛⵛⴰⵜⴻⴷ ⵜ ⵙ ⵡⴻⵄⵎⵓⴷ, ⵡⴰⵔ ⵉⵜⵜⵎⴻⵜⵜⵉ. 
ⵛⴻⴽ ⴰⴷ ⵜ ⵜⴻⵡⵜⴻⴷ ⵙ ⵡⴻⵄⵎⵓⴷ, ⵓ ⴰⴷ ⵜⴻⵙⵙⵏⴻⵊⵎⴻⴷ ⵍⴻⵄⵎⴰⵔ ⵏⵏⴻⵙ ⵣⵉ ⵍⴰⵅⴰⵔⵜ. 
ⵎⵎⵉ ⵉⵏⵓ, ⵎⴰⵍⴰ ⵓⵍ ⵏⵏⴻⵛ ⴷ ⴰⵎⵉⵖⵉⵙ, ⴰⴷ ⵉⴼⴰⵔⵃ ⵓⵍⴰ ⴷ ⵓⵍ ⵉⵏⵓ ⴰⴽⵉⴷⴻⵙ. 
ⵜⵉⵥⵥⴰⵍ ⵉⵏⵓ ⴰⴷ ⵏⴻⴳⵣⴻⵏⵜ ⵙ ⵍⴻⴼⵔⴰⵃⴻⵜ, ⵎⴰⵍⴰ ⵉⵢⴻⵏⵛⵉⵛⴻⵏ ⵏⵏⴻⵛ ⵙⵙⵉⵡⵍⴻⵏ ⵎⵉⵏ ⵉⴵⴰⵏ ⵉⵙⴻⴳⴳⴷⴻⵏ. 
ⴻⵊⵊ ⵓⵍ ⵏⵏⴻⵛ ⵡⴰⵔ ⵉⵜⵜⵉⵙⵉⵎ ⵣⴻⴳ ⵉⵎⴻⴷⵏⴰⴱ, ⵎⴰⵛⴰ ⴻⵊⵊ ⵉ-ⵜ ⴰⴷ ⵢⴰⵔⵔ ⴰⵣⴻⴵⵉⴼ ⵖⴰⵔ ⵜⵉⴳⴳⵯⵓⴷⵉ ⵏ ⵙⵉⴷⵉ ⴰⵙⵙ ⵉⵎⵓⵏ! 
ⵎⴰⵖⴰⵔ ⵅⴻⵏⵏⵉ ⴰⵇⴰ ⴷⵉⵏ ⵜⵉⵡⴻⵛⵛⴰ, ⵓ ⵍⴰⵢⴰⵙ ⵏⵏⴻⵛ ⵡⴰⵔ ⵉⵜⵜⴰⵔⴻⵥⵥⵉ. 
ⵙⴻⵍ-ⴷⴷ ⵛⴻⴽ, ⴰ ⵎⵎⵉ, ⵉⵍⵉ ⴷ ⴰⵎⵉⵖⵉⵙ, ⵏⴷⴻⵀ ⵓⵍ ⵏⵏⴻⵛ ⵖⴰⵔ ⵡⴻⴱⵔⵉⴷ. 
ⵡⴰⵔ ⵜⵜⵖⵉⵎⵉ ⵖⴰⵔ ⵉⵙⴽⴰⵔⵊⵉⵢⵢⴻⵏ, ⵓⵍⴰ ⵖⴰⵔ ⵉⵏⵏⵉ ⵉⵍⴻⵀⵀⴼⴻⵏ ⴷⴻⴳ ⵡⴻⵢⵙⵓⵎ, 
ⵎⴰⵖⴰⵔ ⴰⵙⴽⴰⵔⵊⵉⵢ ⴷ ⴰⵎⴻⵍⵀⵓⴼ ⴰⴷ ⴷⴻⵡⵍⴻⵏ ⴷ ⵉⵎⴻⵣⵍⴰⴹ, ⵓ ⴰⵏⵓⴷⴻⵎ ⵉⵙⵙⵢⵉⵔⵉⴹ ⴷⴻⴳ ⵉⵃⵍⵓⵛⴻⵏ. 
ⵙⴻⵍ-ⴷⴷ ⵛⴻⴽ ⵖⴰⵔ ⴱⴰⴱⴰⵛ ⵡⴻⵏⵏⵉ ⵛⴻⴽ ⵉ ⴷⴷ-ⵉⵊⵊⵉⵏ, ⵓ ⵡⴰⵔ ⵙⵙⴻⵃⵇⵉⵔⵉ ⵢⴻⵎⵎⴰⵛ ⵎⴰⵍⴰ ⵜⴻⵡⵙⴰⵔ. 
ⵙⴻⵖ-ⴷⴷ ⵜⵉⴷⴻⵜⵜ, ⵡⴰⵔ ⵜⵜ ⵜⴻⵣⵏⵓⵣⴰ ⵛⴰ, ⴰⵎⵎⵓ ⵓⵍⴰ ⴷ ⵜⵉⵖⵉⵜ ⴷ ⵓⵡⴻⴱⴱⴻⵅ ⴷ ⵍⴻⴼⵀⴰⵎⴻⵜ. 
ⴱⴰⴱⴰⵙ ⵏ ⵓⵎⵙⴻⴳⴳⴻⴷ ⴰⴷ ⵉⴼⴰⵔⵃ ⵙ ⵡⴰⵟⵟⴰⵙ, ⵡⴻⵏⵏⵉ ⴷⴷ-ⵉⵊⵊⵉⵏ ⵉⵊⵊ ⵎⵎⵉⵙ ⴷ ⴰⵎⵉⵖⵉⵙ, ⴰⴷ ⴰⵙ ⵉⴼⴰⵔⵃ. 
ⴻⵊⵊ ⴰⴷ ⵉⴼⴰⵔⵃ ⴱⴰⴱⴰⵛ ⵓⵍⴰ ⴷ ⵢⴻⵎⵎⴰⵛ, ⴻⵊⵊ ⵜⴻⵏⵏⵉ ⵛⴻⴽ ⵉ ⴷⴷ-ⵢⵓⵔⵡⴻⵏ ⴰⴷ ⵜⴼⴰⵔⵃ. 
ⴻⵡⵛ ⴰⵢⵉ ⵓⵍ ⵏⵏⴻⵛ, ⴰ ⵎⵎⵉ, ⴻⵊⵊ ⵜⵉⵟⵟⴰⵡⵉⵏ ⵏⵏⴻⵛ ⴰⴷ ⴰⴼⴻⵏⵜ ⴰⵔⴹⴰ ⴷⴻⴳ ⵉⴱⵔⵉⴷⴻⵏ ⵉⵏⵓ. 
ⵎⴰⵖⴰⵔ ⵜⴰⵎⵖⴰⵔⵜ ⴼⴰⵔⵇ-ⵛⵛⵖⴻⵍ ⴷ ⵉⵛⵜ ⵏ ⵜⴻⵙⵔⴰⴼⵜ ⵢⵓⴵⵖⴻⵏ, ⵓ ⵜⴰⵎⵖⴰⵔⵜ ⵣⵉ ⴱⴰⵔⵔⴰ ⴷ ⵉⵊⵊ ⵏ ⵍⵄⵓⵏⵚⴰⵔ ⵉⵃⵙⴰⵔ. 
ⵡⴰⵀ, ⵏⴻⵜⵜⴰⵜ ⵜᵉⵜⵜⵃⴰⵎⴰ ⴰⵎ ⵢⵉⵊⵊ ⵏ ⵓⵅⴻⵡⵡⴰⵏ, ⵏⴻⵜⵜⴰⵜ ⵜⴰⵔⴻⵏⵏⵉ ⴷⴻⴳ ⵉⵖⴻⴷⴷⴰⵔⴻⵏ ⵊⴰⵔ ⵉⵡⴷⴰⵏ. 
ⵡⵉ ⵉ ⵖⴰⵔ ⵉⴵⴰ ⵡⴻⵛⴹⴰⵏ? ⵡⵉ ⵉ ⵖⴰⵔ ⵉⴵⴰ ⵣⵣⴻⵍⴹ? ⵡⵉ ⵉ ⵖⴰⵔ ⵉⴵⴰ ⵓⵎⵛⵓⴱⴱⴻⵛ? ⵡⵉ ⵉ ⵖⴰⵔ ⵉⴵⴰ ⵓⵛⴻⵜⵛⵉ? ⵡⵉ ⵉ ⵖⴰⵔ ⵉⴵⴰⵏ ⵉⵢⴻⵣⵣⵉⵎⴻⵏ ⴱⵍⴰ ⵙⵙⵉⴱⴱⴻⵜ? ⵡⵉ ⵉ ⵖⴰⵔ ⴵⴰⵏⵜ ⵜⵉⵟⵟⴰⵡⵉⵏ ⴱⴱⴰⵔⴻⵡⵢⴻⵏⵜ? 
ⵖⴰⵔ ⵉⵏⵏⵉ ⵉⵜⵜⵖⵉⵎⴰⵏ ⵖⴰⵔ ⴱⵉⵏⵓ ⴰⵍ ⵜⴰⵎⴻⴷⴷⵉⵜ, ⵖⴰⵔ ⵢⵉⵏⵏⵉ ⴷⴷ-ⵢⵓⵙⵉⵏ ⵃⵉⵎⴰ ⴰⴷ ⵇⵇⴰⵙⴻⵏ ⴱⵉⵏⵓ ⵉⵅⴻⴵⴹⴻⵏ. 
ⵡⴰⵔ ⵅⴻⵣⵣⴰⵔ ⵖⴰⵔ ⴱⵉⵏⵓ, ⵅⵎⵉ ⵉⵜⵜⴻⵣⵡⵉⵖ, ⵉⵜⵜⵍⵉⵇⵍⵉⵇ ⴷⵉ ⵍⴽⴰⵙ ⵓ ⵏⴻⵜⵜⴰ ⵉⵀⵡⴻⵏ ⵉ ⵜⵉⵙⵙⵉⵜ. 
ⵖⴰⵔ ⵓⵏⴻⴳⴳⴰⵔ ⵉⵜⵜⵖⵉⵎⴰ ⵉⵣⴻⵄⵄⴻⴼ ⴰⵎ ⵢⵉⵊⵊ ⵏ ⵓⴼⵉⵖⴰⵔ, ⵉⵜⵜⵔⵓⵛⵛⴰ ⵙⵙⴻⵎ ⴰⵎ ⵜⵍⴻⴼⵙⴰ. 
ⵜⵉⵟⵟⴰⵡⵉⵏ ⵏⵏⴻⵛ ⴰⴷ ⵜⵡⴰⵍⴰⵏⵜ ⵜⵉⵎⵖⴰⵔⵉⵏ ⵜⵉⴱⴰⵔⵔⴰⵏⵉⵢⵢⵉⵏ, ⵓ ⵓⵍ ⵏⵏⴻⵛ ⴰⴷ ⵉⵙⵙⵉⵡⴻⵍ ⵙ ⵓⵅⴰⵔⵡⴻⴹ. 
ⵛⴻⴽ ⴰⴷ ⵜⵉⵍⵉⴷ ⴰⵎ ⵢⵉⵊⵊⴻⵏ ⵉ ⵉⵜⵜⴻⵟⵟⵚⴻⵏ ⴷⵉ ⵍⵡⴻⵙⵟ ⵏ ⵍⴻⴱⵃⴰⵔ, ⴰⵎ ⵉⵊⵊⴻⵏ ⵉ ⵉⵜⵜⴻⵟⵟⵚⴻⵏ ⴷⵉ ⵜⵇⵉⵛⵛⴰⵜ ⵏ ⵜⴻⵃⵏⴰⵛⵜ ⵏ ⵓⵖⴰⵔⵔⴰⴱⵓ 
ⴰⴷ ⵜⵉⵏⵉⴷ: “ⵡⵜⵉⵏ ⴰⵢⵉ, ⵎⴰⵛⴰ ⵡⴰⵔ ⵢⴻⵣⵎⴻⵖ, ⴷⴻⵅⵎⴻⵏ ⴰⵢⵉ, ⵎⴰⵛⴰ ⵡⴰⵔ ⵓⵛⵉⵖ ⴰⴽ-ⴷ ⵡⴰⵍⵓ. ⵎⴻⵍⵎⵉ ⵉ ⴷⴷ ⵖⴰ ⴼⴰⵇⴻⵖ? ⵏⴻⵛⵛ ⴰⴷ ⴰⵔⵣⵓⵖ ⵄⴰⵡⴻⴷ ⵖⴰⵔ ⴱⵉⵏⵓ!” 
