﻿ⴰⵡⴰⵍⴻⵏ ⵉⵡⴻⵥⵏⴻⵏ.
9.
ⵜⵉⵖⵉⵜ ⵜⴻⴱⵏⴰ ⵜⴰⴷⴷⴰⵔⵜ ⵏⵏⴻⵙ, ⵜⴻⴳⴳⴰ ⵜⴻⵙⵙⵓⵢⴷⴰ ⵉⴱⵉⵍⴰⵔⴻⵏ ⵏⵏⴻⵙ, ⴰⵇⴰ ⴰⵜⴻⵏ ⴷⵉ ⵙⴻⴱⵄⴰ. 
ⵏⴻⵜⵜⴰⵜ ⵜⵖⴰⵔⵚ ⵉ ⵍⵎⴰⵍ ⵏⵏⴻⵙ, ⵜⵅⴻⴵⴻⴹ ⴱⵉⵏⵓ ⵏⵏⴻⵙ. ⵄⴰⵡⴻⴷ ⵜⴻⵙⵙⵓ ⵟⵟⴰⴱⵍⴰ ⵏⵏⴻⵙ. 
ⵏⴻⵜⵜⴰⵜ ⵜⴻⵙⵙⴻⴽⴽ ⵜⵉⵎⵙⴻⵅⵅⴰⵔⵉⵏ ⵏⵏⴻⵙ ⵜⵉⵎⴻⵥⵢⴰⵏⵉⵏ. ⵅ ⵜⵇⵉⵛⵛⴰⵜⵉⵏ ⵏ ⵍⴻⴳⵄⵓⴷⵉ ⵏ ⵜⴻⵏⴷⵉⵏⵜ ⵜᵉⵜⵜⵍⴰⵖⴰ: 
“ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ ⴷⴰⵏⵉⵜⴰ!” ⵏⴻⵜⵜⴰⵜ ⵜⴻⵇⵇⴰⵔ ⵉ ⵢⵉⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ ⵡⵓⵍ ⵉⵎⵜⴻⵏ: 
“ⴰⵙⴻⵎ-ⴷⴷ, ⵛⵛⴻⵎ ⵣⴻⴳ ⵡⴻⵖⵔⵓⵎ ⵉⵏⵓ, ⵙⵡⴻⵎ ⵣⵉ ⴱⵉⵏⵓ ⵏⵏⵉ ⴷ ⴰⵡⴻⵎ ⴷⴷ-ⵅⴻⴵⴹⴻⵖ. 
ⵊⵊⴻⵎ ⵜⴰⵇⵓⴱⴱⴰⵏⴻⵛⵜ, ⵓⵛⴰ ⴷⴷⴰⵔⴻⵎ, ⴹⴼⴰⵔⴻⵎ ⴰⴱⵔⵉⴷ ⵏ ⵍⴻⴼⵀⴰⵎⴻⵜ.” 
“ⵡⴻⵏⵏⵉ ⵉⵜⵜⵡⴻⴱⴱⵅⴻⵏ ⴰⵎⴻⵙⵜⴻⵀⵣⵉⵢ, ⵉⵙⵙⴰⵔⴻⴱⴱⵓ ⵍⴻⴼⴹⵉⵃⴻⵜ ⵉ ⵢⵉⵅⴻⴼ ⵏⵏⴻⵙ, ⵡⴻⵏⵏⵉ ⵉⵜⵜⵄⴰⵇⴰⴱⴻⵏ ⴰⵄⴻⴼⴼⴰⵏ, ⴰⵇⴰ ⵏⴻⵜⵜⴰ ⵢⴰⵔⴻⴱⴱⵓ ⴰⴱⴻⵇⵇⵉⴹ ⵏ ⵍⴻⴼⴹⵉⵃⴻⵜ ⵏⵏⴻⵙ. 
ⵡⴰⵔ ⵜⵜⵄⴻⵢⵢⴰⴱ ⴰⵎⴻⵙⵜⴻⵀⵣⵉⵢ ⵃⵉⵎⴰ ⵏⴻⵜⵜⴰ ⵡⴰⵔ ⵛⴻⴽ ⵉⵛⴰⵔⵔⴻⵀ, ⵄⴻⵢⵢⴻⴱ ⴰⵎⵉⵖⵉⵙ, ⵅⴻⵏⵏⵉ ⵏⴻⵜⵜⴰ ⴰⴷ ⵛⴻⴽ ⵉⵅⵙ. 
ⴻⵡⵛ ⵉ ⵓⵎⵉⵖⵉⵙ, ⵅⴻⵏⵏⵉ ⴰⴷ ⵉⴷⵡⴻⵍ ⴷ ⵎⵉⵖⵉⵙ ⴽⵜⴰⵔ, ⵙⵖⴰⵔ ⵜⵓⵙⵙⵏⴰ ⵉ ⵓⵎⵙⴻⴳⴳⴻⴷ, ⵅⴻⵏⵏⵉ ⵏⴻⵜⵜⴰ ⴰⴷ ⵉⴼⵀⴻⵎ ⴽⵜⴰⵔ.” 
ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⴱⴻⴷⴷⵓ ⵏ ⵜⵉⵖⵉⵜ, ⵜⵓⵙⵙⵏⴰ ⵏ ⵓⵎⵇⴻⴷⴷⴰⵙ ⴷ ⴰⵎⴻⵇⵇⵔⴰⵏ ⴷ ⴱⴻⴷⴷⵓ ⵏ ⵍⴻⴼⵀⴰⵎⴻⵜ. 
ⵎⴰⵖⴰⵔ ⵣⵣⴰⵢⵉ ⴰⴷ ⴽⵜⴰⵔⴻⵏ ⵡⵓⵙⵙⴰⵏ ⵏⵏⴻⵛ, ⵉⵙⴻⴳⴳⵯⵓⵙⴰ ⵏ ⵜⵓⴷⴰⵔⵜ ⴰⴷ ⵜⵜⵡⴰⵔⵏⵉⵏ ⵉ ⵛⴻⴽ. 
ⵎⴰⵍⴰ ⵛⴻⴽ ⴷ ⵎⵉⵖⵉⵙ, ⵅⴻⵏⵏⵉ ⴰⴷ ⵜⵉⵍⵉⴷ ⴷ ⵎⵉⵖⵉⵙ ⵉ ⵢⵉⵅⴻⴼ ⵏⵏⴻⵛ, ⵓ ⵎⴰⵍⴰ ⵜⴻⵙⵜⴻⵀⴻⵣⵣⵉⴷ, ⴰⴷ ⵜⴰⵔⴱⵓⴷ ⴰⵢⴰ ⵙⵉⵎⴰⵏⵜ ⵏⵏⴻⵛ.” 
ⵜⴰⵎⵖⴰⵔⵜ ⵜⴰⴱⵓⵀⴰⵍⴻⵛⵜ ⵜᵉⵜⵜⴱⵓⵀⵍⵓⵢ, ⵏⴻⵜⵜⴰⵜ ⴷ ⵜⴰⵇⵓⴱⴱⴰⵏⵉⵜ, ⵡⴰⵔ ⵜⴻⵙⵙⴻⵏ ⵡⴰⵍⵓ. 
ⵏⴻⵜⵜⴰⵜ ⵜᵉⵜⵜⵖⵉⵎⴰ ⵖⴰⵔ ⵜⴻⵡⵡⴰⵔⵜ ⵏ ⵜⴰⴷⴷⴰⵔⵜ ⵏⵏⴻⵙ, ⵅ ⵉⵊⵊ ⵏ ⴽⵓⵔⵙⵉ, ⵅ ⵍⴻⴳⵄⵓⴷⵉ ⵏ ⵜⴻⵏⴷⵉⵏⵜ 
ⵃⵉⵎⴰ ⴰⴷ ⵜⵍⴰⵖⴰ ⵅ ⵉⵏⵏⵉ ⵉⵄⴻⴷⴷⵓⵏ, ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵉⵎⴻⵙⵔⴰⵇ ⵏⵙⴻⵏ, ⵜⴻⵏⵏⴰ: 
“ⵡⴻⵏⵏⵉ ⵉⴵⴰⵏ ⴷ ⴰⵃⴰⴼⵉ, ⴻⵊⵊ ⵉ-ⵜ ⴰⴷ ⴷⴷ-ⵢⴰⵙ ⴷⴰⵏⵉⵜⴰ!” ⵏⴻⵜⵜⴰⵜ ⵜⴻⵇⵇⴰⵔ ⵉ ⵢⵉⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ ⵡⵓⵍ ⵉⵎⵜⴻⵏ: 
“ⴰⵎⴰⵏ ⵉⵜⵜⵡⴰⵛⴰⵔⴻⵏ ⴷ ⵉⵎⵉⵥⵉⴷⴻⵏ, ⴰⵖⵔⵓⵎ ⵉⵏⵏⵓⴼⴼⴰⵔⴻⵏ ⴰⵇⴰ ⵉⵛⵏⴰ.” 
ⵏⴻⵜⵜⴰ ⵡⴰⵔ ⵉⵙⵙⵉⵏ ⴰⵇⴰ ⴷⵉⵏ ⵍⴻⵅⵢⴰⵍⴰⵜ, ⴰⵇⴰ ⵉⵏⴻⵡⵊⵉⵡⴻⵏ ⵏⵏⴻⵙ ⴷⴻⴳ ⵡⴰⴵⴰⵖ ⵏ ⵍⴰⵅⴰⵔⵜ ⵉ ⵉⴵⴰⵏ. 
