﻿ⴰⵡⴰⵍⴻⵏ ⵉⵡⴻⵥⵏⴻⵏ.
7.
ⵎⵎⵉ ⵉⵏⵓ, ⵃⴹⴰ ⴰⵡⴰⵍⴻⵏ ⵉⵏⵓ, ⵅⴻⵎⵎⴻⵍ ⵜⵉⵡⴻⵚⵚⴰ ⵉⵏⵓ ⵖⴰⵔⴻⴽ. 
ⵃⴹⴰ ⵜⵉⵡⴻⵚⵚⴰ ⵉⵏⵓ ⵓ ⵛⴻⴽ ⴰⴷ ⵜⴻⵇⵇⵉⵎⴻⴷ ⵜⴻⴷⴷⴰⵔⴻⴷ, ⵃⴹⴰ ⵜⴰⵖⵓⵔⵉ ⵉⵏⵓ ⴰⵎ ⵎⵓⵎⵎⵓ ⵏ ⵜⵉⵟⵟ ⵏⵏⴻⵛ. 
ⵇⵇⴻⵏ ⵉ-ⵜⴻⵏⵜ ⵖⴰⵔ ⵉⴹⴻⵡⴹⴰⵏ ⵏⵏⴻⵛ, ⴰⵔⵉ ⵜⴻⵏⵜ ⵅ ⵜⴻⵍⵡⵉⵃⵜ ⵏ ⵡⵓⵍ ⵏⵏⴻⵛ. 
ⵉⵏⵉ ⵉ ⵜⵉⵖⵉⵜ: ‘ⵛⴻⵎ ⴷ ⵓⵍⵜⵎⴰ!’, ⵓ ⵙⴻⵎⵎⴰ ⵍⴻⴼⵀⴰⵎⴻⵜ: ‘ⴰⵎⴻⴷⴷⵓⴽⴽⴻⵍ ⵉⵏⵓ!’, 
ⵎⴰⵃⴻⵏⴷ ⵏⵉⵜⴻⵏⵜⵉ ⴰⴷ ⵛⴻⴽ ⵃⴹⴰⵏⵜ ⵣⵉ ⵜⴻⵎⵖⴰⵔⵜ ⵜⴰⴱⴰⵔⵔⴰⵏⴻⵛⵜ, ⵣⵉ ⵜⴻⵎⵖⴰⵔⵜ ⵣⵉ ⴱⴰⵔⵔⴰ ⵉ ⵛⴻⴽ ⵉⵜⵜⵖⴰⵔⵔⴰⵏ ⵙ ⵡⴰⵡⴰⵍⴻⵏ ⵏⵏⴻⵙ. 
ⵎⴰⵖⴰⵔ ⵣⵉ ⵍⴽⴰⵣⵉ ⵏ ⵜⴰⴷⴷⴰⵔⵜ ⵉⵏⵓ, ⵊⴰⵔ ⵛⵛⴻⴱⴱⴰⵛ ⵏ ⵍⴽⴰⵣⵉ ⵙⴻⵡⴹⴻⵖ ⵖⴰⵔ ⵡⴰⴷⴷⴰⵢ, 
ⵙⴻⵡⴹⴻⵖ ⵖⴰⵔ ⵉⵃⴰⴼⵉⵢⵢⴻⵏ ⵉⵏⵏⵉ ⵡⴰⵔ ⵉⵜⵜⵃⵉⴽⵉⵏ, ⵊⴰⵔ ⵉⵃⴻⵏⵊⵉⵔⴻⵏ ⵏ ⴱⵏⴰⴷⴻⵎ ⵃⴻⴽⴽⴰⵔⴻⵖ ⵉⵊⵊ ⵏ ⵓⵃⵓⴷⵔⵉ ⵙ ⵡⵓⵍ ⵡⴰⵔ ⵉⵎⵜⴻⵏ. 
ⵏⴻⵜⵜⴰ ⵉⵥⵡⴰ ⴰⴱⵔⵉⴷ ⵖⴰⵔ ⵜⴻⵖⵎⴰⵔⵜ ⵏⵏⴻⵙ, ⵓ ⵉⵟⵟⴻⴼ ⴰⴱⵔⵉⴷ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. 
ⵖⴰⵔ ⵜⴱⴰⵎⴱⴰⵙⵜ, ⵖⴰⵔ ⵜⵎⴻⴷⴷⵉⵜ ⵏ ⵡⴰⵙⵙ, ⴷⵉ ⵍⴰⴵⴰⵖ ⵏ ⴵⵉⵍⴻⵜ ⴷ ⵜⵓⴱⴱⴰⵔⵛⴻⵏⵜ, 
ⵅⵣⴰⵔ, ⴰⵇⴰ ⵉⵛⵜ ⵏ ⵜⴻⵎⵖⴰⵔⵜ ⵜⵓⵙⴰ-ⴷⴷ ⵉ ⵓⵎⵙⴰⴳⴰⵔ ⴰⴽⵉⴷⴻⵙ, ⴷⴻⴳ ⵡⴰⵔⵔⵓⴹ ⵏ ⵜⴻⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ ⵓ ⵙ ⵜⴻⵃⵔⴰⵢⵎⴻⵛⵜ ⵏ ⵡⵓⵍ. 
ⵏⴻⵜⵜⴰⵜ ⵜⴻⵅⵜⵉⵅ ⵓ ⵜⵖⴻⵡⵡⴻⵖ, ⵉⴹⴰⵔⴻⵏ ⵏⵏⴻⵙ ⵡⴰⵔ ⵇⵇⵉⵎⴻⵏ ⵄⴰⴷ ⴷⵉ ⵜⴰⴷⴷⴰⵔⵜ. 
ⵉⵛⵜ ⵏ ⵜⵡⴰⵍⴰ ⴷⵉ ⴱⴰⵔⵔⴰ, ⵅⴻⵏⵏⵉ ⵄⴰⵡⴻⴷ ⴷⴻⴳ ⵡⴰⵣⵣⴰⵢⴻⵏ, ⵖⴰⵔ ⵎⴰⵔⵔⴰ ⵜⵉⵖⴻⵎⵎⴰⵔ ⵏ ⵉⴱⵔⵉⴷⴻⵏ ⵜᵉⵜⵜⵃⴰⵎⴰ. 
ⵏⴻⵜⵜⴰⵜ ⵜᵉⵟⵟⴻⴼ ⵉ-ⵜ ⵓ ⵜⴻⵙⵙⵓⴷⴻⵎ ⵉ-ⵜ, ⵜⴻⵇⵊⴰⵔ ⵓⴷⴻⵎ ⵏⵏⴻⵙ, ⵜⴻⵏⵏⴰ ⴰⵙ: 
“ⵜⵓⵖⴰ ⵅⴰⴼⵉ ⵎⴰⵃⴻⵏⴷ ⴰⴷ ⵡⵛⴻⵖ ⵜⵉⵡⵀⵉⴱⵉⵏ ⵏ ⵍⴻⵀⵏⴰ. ⴰⵙⵙ-ⴰ ⵙⵙⵇⴻⴼⵍⴻⵖ ⵍⵡⵓⵄⵓⴷ ⵉⵏⵓ. 
ⵅ ⵓⵢⴰ ⵉ ⴷⴷ-ⴼⴼⵖⴻⵖ ⵎⴰⵃⴻⵏⴷ ⴰⴷ ⵛⴻⴽ ⵎⵎⵙⴰⴳⴰⵔⴻⵖ, ⵎⴰⵃⴻⵏⴷ ⴰⴷ ⵅⴰⴽ ⴰⵔⵣⵓⵖ ⵓ ⴰⵎⵎⵓ ⵉ ⵛⴻⴽ ⵓⴼⵉⵖ. 
ⵏⴻⵛⵛ ⵙⵙⵓⵖ ⵎⴰⵍⵜⴰⵜ ⵅ ⵇⴰⵎⴰ ⵉⵏⵓ, ⵍⵉⵣⴰⵔⴰⵜ ⵉⵣⴻⵡⵡⵇⴻⵏ ⵣⵉ ⵍⴻⵇⵜⴻⵏ ⴰⵣⴷⴰⴷ ⵣⵉ ⵎⵉⵚⵔⴰ. 
ⵏⴻⵛⵛ ⵔⵓⵛⵛⴻⵖ ⵜⴰⵙⵙⵓⵜ ⵉⵏⵓ ⵙ ⵎⵉⵔⵔⵓ ⴷ ⵡⴻⵛⴼⵉⵍ ⴷ ⵍⵇⴰⵔⴼⴰ. 
ⴰⵙ-ⴷⴷ, ⴻⵊⵊ ⴰⵏⴻⵖ ⴰⴷ ⵏⴻⵊⵊⵉⵡⴻⵏ ⴰⵙⵃⵉⵏⵏⴻⴱ ⴰⵍ ⵜⵓⴼⴼⵓⵜ, ⴻⵊⵊ ⴰⵏⴻⵖ ⴰⴷ ⵏⴰⵔⵔ ⵎⴻⵥⵔⵉ ⴷⵉ ⵍⵉⵔⴰⵔⵜ ⵏ ⵜⴰⵢⵔⵉ. 
ⵎⴰⵖⴰⵔ ⴰⵔⵢⴰⵣ ⵡⴰⵔ ⵉⴵⵉ ⴷⵉ ⵜⴰⴷⴷⴰⵔⵜ, ⵏⴻⵜⵜⴰ ⵉⵙⴰⴼⴰⵔ ⵉⴳⴳⵯⴻⵊ ⴰⵟⵟⴰⵙ. 
ⵉⴽⵙⵉ ⵉⵛⵜ ⵏ ⵜⴽⴻⵎⵎⵓⵙⵜ ⵏ ⵜⵎⴻⵏⵢⴰⵜ ⵏ ⵏⵏⵓⵇⴰⵔⵜ ⴰⴽⵉⴷⴻⵙ, ⴰⴷ ⵢⴰⵔⴻⴳⴳⵯⴻⵃ ⵖⴰⵔ ⵡⴰⵙⵙ ⵏ ⵜⵣⵉⵔⵉ ⵉⵇⴻⴼⵍⴻⵏ.” 
ⴰⵎⵎⵓ ⵉ ⵜ ⵜᵉⵟⵟⴻⴼ ⵙ ⵡⴰⵟⵟⴰⵙ ⵏ ⵍⵀⴰⵔⴷ ⵏⵏⴻⵙ, ⵜⴻⵖⵡⴰ ⵉ-ⵜ ⵙ ⵍⴻⵀⵔⵓⴷ ⵏⵏⴻⵙ ⵉⵣⴻⵡⵡⵇⴻⵏ ⵏ ⵉⵢⴻⵏⵛⵉⵛⴻⵏ ⵏⵏⴻⵙ. 
ⴷⴻⵖⵢⴰ ⵏⴻⵜⵜⴰ ⵢⴰⵔⴷⴻⴼ ⵉ-ⵜⵜ, ⴰⵎ ⵢⵉⵊⵊ ⵏ ⵓⴼⵓⵏⴰⵙ ⵉⴳⴳⵓⵔⴻⵏ ⵖⴰⵔ ⵍⴳⵓⵔⵏⴻⵜ, ⴰⵎ ⵉⵛⵜ ⵏ ⵙⵙⵏⴻⵙⵍⴻⵜ ⵅ ⵉⴹⴰⵔⴻⵏ ⵏ ⵡⴻⵏⵏⵉ ⵉⴳⴳⵓⵔⴻⵏ ⵖⴰⵔ ⵓⵎⴰⵔⵔⴻⵜ ⵏ ⵓⴱⵓⵀⴰⵍⵉ 
- ⴰⵍⴰⵎⵉ ⴷⴷ ⴰⵙ ⵜⵛⴰⵔⵔⴻⴳ ⴼⵍⵉⵜⵛⴰ ⵜⵙⴰ - ⴰⵎ ⵢⵉⵊⵊ ⵏ ⵡⴻⵊⴹⵉⴹ ⵉⴹⵡⵉⵏ ⴷⴻⴳ ⵉⵊⵊ ⵏ ⵡⴻⵏⴷⴰⵢ, ⵓ ⵡⴰⵔ ⵉⵙⵙⵉⵏ ⴰⵇⴰ ⵡⴰⵏⵉⵜⴰ ⵉⵜⵜⵡⴰⴳⴳ ⴹⵉⴷⴷ ⵉ ⵜⵓⴷⴰⵔⵜ ⵏⵏⴻⵙ. 
ⵅⴻⵏⵏⵉ ⵍⴻⵅⵅⵓ, ⴰ ⵉⵃⴻⵏⵊⵉⵔⴻⵏ, ⵙⵍⴻⵎ-ⴷⴷ ⵖⴰⵔⵉ, ⵓ ⵙⵍⴻⵎ ⵖⴰⵔ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ. 
ⴻⵊⵊ ⵓⵍ ⵏⵏⴻⵛ ⵡⴰⵔ ⵉⵜⵜⵡⴻⴷⴷⵉⵔ ⴷⴻⴳ ⵉⴱⵔⵉⴷⴻⵏ ⵏⵏⴻⵙ, ⵡⴰⵔ ⵜⵜⵎⴻⵢⵢⵉⵍ ⵖⴰⵔ ⵉⵎⴻⵙⵔⴰⵇ ⵏⵏⴻⵙ. 
ⵎⴰⵖⴰⵔ ⴷⴻⴳ ⵡⴰⵟⵟⴰⵙ ⵉⵜⵜⵡⴰⵢⴻⵣⵎⴻⵏ ⵉⵏⵏⵉ ⵜⴻⵖⴹⴻⵔ, ⵉⵎⵖⴰⵔ ⵡⴰⵟⵟⴰⵙ ⵍⵄⴰⴷⴰⴷ ⵏ ⵎⴰⵔⵔⴰ ⵉⵏⵏⵉ ⵜⴻⵏⵖⴰ. 
ⵜⴰⴷⴷⴰⵔⵜ ⵏⵏⴻⵙ ⵜⴻⵛⵛⵓⵔ ⵙ ⵉⴱⵔⵉⴷⴻⵏ ⵖⴰⵔ ⵍⴰⵅⴰⵔⵜ ⵏⵏⵉ ⵉⵀⴻⴽⴽⵡⴰⵏ ⵖⴰⵔ ⵉⵅⵅⴰⵎⴻⵏ ⵏ ⴷⴰⵅⴻⵍ ⵏ ⵍⵎⴻⵡⵜ. 
