﻿ⴰⵡⴰⵍⴻⵏ ⵉⵡⴻⵥⵏⴻⵏ.
2.
ⵎⵎⵉ ⵉⵏⵓ, ⵎⴰⵍⴰ ⵜⵇⴻⴱⵍⴻⴷ ⴰⵡⴰⵍⴻⵏ ⵉⵏⵓ ⵓ ⴰⴷ ⵜⴻⵃⴹⵉⴷ ⵜⵉⵡⴻⵚⵚⴰ ⵉⵏⵓ ⵖⴰⵔⴻⴽ, 
ⵎⴰⵃⴻⵏⴷ ⴰⵎⴻⵣⵣⵓⵖ ⵏⵏⴻⵛ ⴰⴷ ⵉⵡⵛ ⵜⴰⵢⵏⵉⵜ ⵉ ⵜⵉⵖⵉⵜ ⵓⵛⴰ ⵓⵍ ⵏⵏⴻⵛ ⴰⴷ ⵉⵎⴻⵢⵢⴻⵍ ⵖⴰⵔ ⵍⴻⴼⵀⴰⵎⴻⵜ, 
ⵡⴰⵀ, ⵎⴰⵍⴰ ⵜᵉⵜⵜⵍⴰⵖⵉⴷ-ⴷⴷ ⵅ ⵍⴻⵄⵇⴻⵍ, ⴰⴷ ⵜⴻⵙⵙⵅⴻⴷⵎⴻⴷ ⵜⵎⵉⵊⵊⴰ ⵏⵏⴻⵛ ⵎⴰⵃⴻⵏⴷ ⴰⴷ ⵜⴰⴼⴻⴷ ⵍⴻⴼⵀⴰⵎⴻⵜ, 
ⵎⴰⵍⴰ ⵜⴰⵔⴻⵣⵣⵓⴷ ⵅⴰⵙ ⴰⵎ ⵜⴰⵔⴻⵣⵣⵓⴷ ⵅ ⵏⵏⵓⵇⴰⵔⵜ, ⵎⴰⵍⴰ ⵅⴰⵙ ⵜⴰⵔⴻⵣⵣⵓⴷ ⴰⵎ ⵅ ⵜⵅⵓⴱⴰⵢ ⵉⵏⵏⵓⴼⴼⴰⵔⴻⵏ,    
ⵅⴻⵏⵏⵉ ⴰⴷ ⵜⴼⴻⵀⵎⴻⴷ ⵉ ⵜⵉⴳⴳⵯⵓⴷⵉ ⵏ ⵙⵉⴷⵉ, ⵓ ⴰⴷ ⵜⴰⴼⴻⴷ ⵜⵓⵙⵙⵏⴰ ⵏ ⴰⵔⴻⴱⴱⵉ. 
ⵎⴰⵖⴰⵔ ⵙⵉⴷⵉ ⵉⵜⵜⵉⵛ ⵜⵉⵖⵉⵜ, ⵣⴻⴳ ⵓⵇⴻⵎⵎⵓⵎ ⵏⵏⴻⵙ ⵜᵉⵜⵜⴻⴼⴼⴻⵖ-ⴷⴷ ⵜⵓⵙⵙⵏⴰ ⴷ ⵍⴻⴼⵀⴰⵎⴻⵜ. 
ⵉ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵉⵙⵙⴻⵡⵊⴻⴷ ⴰⵙⴻⵏ ⵜⵡⵉⵣⴰ, ⵉ ⵢⵉⵏⵏⵉ ⵉⴳⴳⵓⵔⴻⵏ ⴷⵉ ⵍⴻⴽⵎⴰⵔⴻⵜ ⴰⵇⴰ-ⵜ ⴷ ⵜⴰⵙⴻⴷⴷⴰⵔⵜ ⵉ ⵓⵙⴻⵍⵇⵉ, 
ⵃⵉⵎⴰ ⴰⴷ ⵇⵇⵉⵎⴻⵏ ⵜⵜᵉⵟⵟⴼⴻⵏ ⴷⴻⴳ ⵉⵎⴻⵙⵔⴰⵇ ⵏ ⵍⵃⴻⵇⵇ, ⵓ ⵏⴻⵜⵜⴰ ⴰⴷ ⵉⵙⵙⴰⵔ ⴰⴱⵔⵉⴷ ⵏ ⵢⵉⵏⵏⵉ ⴷⴰⵢⵙⴻⵏ ⵍⴰⵎⴰⵏ ⵣⵣⴰⵜⴻⵙ. 
ⵅⴻⵏⵏⵉ ⵉ ⵖⴰ ⵜⴼⴻⵀⵎⴻⴷ ⵜⴰⵙⴻⴳⴷⴰ ⴷ ⵍⵃⴻⵇⵇ, ⵓⵍⴰ ⴷ ⵍⴻⵚⴼⴰⵢⴻⵜ, ⴽⵓⵍ ⵍⴰⵜⴰⵔ ⵉⵚⴻⴱⵃⴻⵏ ⵎⴰⵃⴻⵏⴷ ⴰⴷ ⵜ ⵜⴻⴹⴼⴰⵔⴻⴷ. 
ⵎⴰⵖⴰⵔ ⵜⵉⵖⵉⵜ ⴰⴷ ⵜⴰⴷⴻⴼ ⵖⴰⵔ ⵡⵓⵍ ⵏⵏⴻⵛ, ⵓ ⵜⵓⵙⵙⵏⴰ ⴰⴷ ⵜⴰⵔⴹⴰ ⵅ ⵍⴻⵄⵎⴰⵔ ⵏⵏⴻⵛ. 
ⴰⵃⴰⴷⵓⵔ ⴰⴷ ⵅⴰⴽ ⵉⵃⴹⴰ, ⵍⴻⴼⵀⴰⵎⴻⵜ ⴰⴷ ⵅⴰⴽ ⵜⴻⵙⵙⴰⵔ: 
... ⵎⴰⵃⴻⵏⴷ ⴰⴷ ⵛⴻⴽ ⵜⴼⴻⴽⴽ ⵣⴻⴳ ⵡⴻⴱⵔⵉⴷ ⵏ ⵓⵄⴻⴼⴼⴰⵏ, ⵣⴻⴳ ⵡⴻⵔⵢⴰⵣ ⵏⵏⵉ ⵉⵇⴻⴵⴱⴻⵏ ⴰⵡⴰⵍ ⵏⵏⴻⵙ, 
ⵣⴻⴳ ⵉⵏⵏⵉ ⵉⵙⴻⵎⵃⴻⵏ ⴷⴻⴳ ⵉⵎⴻⵙⵔⴰⵇ ⵉⵙⴻⴳⴳⵎⴻⵏ, ⵎⴰⵃⴻⵏⴷ ⴰⴷ ⵓⵢⵓⵔⴻⵏ ⵉⴱⵔⵉⴷⴻⵏ ⵏ ⵟⵟⵍⴰⵎ, 
ⵉⵏⵏⵉ ⵉⴼⴰⵔⵔⵃⴻⵏ ⵎⴰⵃⴻⵏⴷ ⴰⴷ ⴳⴳⴻⵏ ⵍⵖⴰⵔ, ⵓ ⵙⵙⵍⵉⵡⵍⵉⵡⴻⵏ ⵅ ⵍⴻⵅⴷⴰⵄⴰⵜ ⵏ ⵍⵖⴰⵔ, 
ⵣⴻⴳ ⵢⵉⵏⵏⵉ ⴼⴰⵔⵖⴻⵏ ⵉⵎⴻⵙⵔⴰⵇ ⵏⵙⴻⵏ ⴷ ⵢⵉⵏⵏⵉ ⵉⵎⴻⵢⵢⵍⴻⵏ ⵙⵙⴰ ⴷ ⵙⵙⴰ ⴷⵉ ⵍⴰⵜⴰⵔⴰⵜ ⵏ ⵢⵉⵅⴻⴼ ⵏⵙⴻⵏ, 
... ⵎⴰⵃⴻⵏⴷ ⴰⴷ ⵛⴻⴽ ⵜⴼⴻⴽⴽ ⵣⵉ ⵜⴻⵎⵖⴰⵔⵜ ⵜⴱⴰⵔⵔⴰⵏⴻⵛⵜ, ⵣⵉ ⵜⴻⵎⵖⴰⵔⵜ ⵣⵉ ⴱⴰⵔⵔⴰ ⵉ ⵉⵜⵜⵖⴰⵔⵔⴰⵏ ⵙ ⵡⴰⵡⴰⵍⴻⵏ ⵏⵏⴻⵙ, 
ⵜⴻⵏⵏⵉ ⵉⵙⴻⵎⵃⴻⵏ ⴷⴻⴳ ⵓⵎⴻⴷⴷⵓⴽⴽⴻⵍ ⵏ ⵜⴻⵎⵥⵉ ⵏⵏⴻⵙ, ⵓ ⵜᵉⵜⵜⵓ ⵍⵄⴰⵀⴷ ⵏ ⴰⵔⴻⴱⴱⵉ ⵏⵏⴻⵙ. 
ⵎⵉⵏⵣⵉ ⵜⵀⴻⴽⴽⵡⴰ ⵖⴰⵔ ⵍⵎⴻⵡⵜ ⵊⵎⵉⵄ ⴰⴽ-ⴷ ⵜⴰⴷⴷⴰⵔⵜ ⵏⵏⴻⵙ, ⵓ ⵍⴰⵜⴰⵔⴰⵜ ⵏⵏⴻⵙ ⵀⴻⴽⴽⵡⴰⵏⵜ ⵖⴰⵔ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ. 
ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵖⴰ ⵢⴰⴷⴼⴻⵏ, ⵡⴰⵔ ⴷⴷ-ⵜⵜⵄⵉⵇⵇⵉⴱⴻⵏ ⵄⴻⵎⵎⴰⵔⵚ, ⵡⴰⵔ ⵜⵜⴰⴽⴽⵡⴰⴹⴻⵏ ⵄⴻⵎⵎⴰⵔⵚ ⵖⴰⵔ ⵉⵎⴻⵙⵔⴰⵇ ⵏ ⵜⵓⴷⴰⵔⵜ. 
... ⵡⴰⵀ, ⵃⵉⵎⴰ ⴰⴷ ⵜⵓⵢⵓⵔⴻⴷ ⴰⴱⵔⵉⴷ ⵏ ⵉⵚⴻⴱⵃⴰⵏⴻⵏ, ⵓ ⴰⴷ ⵜᵉⵟⵟⴼⴻⴷ ⴷⴻⴳ ⵉⵎⴻⵙⵔⴰⵇ ⵏ ⵉⵎⵙⴻⴳⴳⴰⴷⴻⵏ, 
ⵎⴰⵖⴰⵔ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵣⴻⴷⵖⴻⵏ ⴷⵉ ⵜⴻⵎⵎⵓⵔⵜ, ⵓ ⵉⵏⵏⵉ ⵉⴳⴳⵓⵔⴻⵏ ⵙ ⵍⴻⴽⵎⴰⵔⴻⵜ ⴰⴷ ⴷⴰⵢⴻⵙ ⵇⵇⵉⵎⴻⵏ. 
ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵇⴻⴹⵄⴻⵏ ⵣⵉ ⵜⴻⵎⵎⵓⵔⵜ, ⵉⵖⴻⴷⴷⴰⵔⴻⵏ ⴰⴷ ⵣⵣⴰⵢⴻⵙ ⵜⵜⵡⴰⵇⴻⵍⵄⴻⵏ. 
