﻿ⵉⵥⴻⵀⵀⵉⴷⴻⵏ.
143.
ⴰⵣⴻⵀⵀⴻⴷ ⵏ ⴷⴰⵡⵓⴷ. ⴰ ⵙⵉⴷⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⵙⵃⴻⵙⵙ ⵉ ⵜⵓⵜⵔⴰ ⵉⵏⵓ. ⴰⵔⵔ-ⴷⴷ ⵅⴰⴼⵉ ⵄⵍⴰⵃⵙⴰⴱ ⵜⵉⴷⴻⵜⵜ ⵏⵏⴻⵛ, ⵄⵍⴰⵃⵙⴰⴱ ⵜⴰⵙⴻⴳⴷⴰ ⵏⵏⴻⵛ. 
ⵡⴰⵔ ⵜⵜⴻⴳⴳ ⵛⵛⵔⴻⵄ ⴰⴽ-ⴷ ⵓⵎⵙⴻⵅⵅⴰⵔ ⵏⵏⴻⵛ, ⵎⴰⵖⴰⵔ ⵓⵍⴰ ⴷ ⵉⵊⵊ ⵣⴻⴳ ⵉⵏⵏⵉ ⵉⴷⴷⴰⵔⴻⵏ ⴰⴷ ⵢⵉⵍⵉ ⴷ ⴰⵎⵙⴻⴳⴳⴻⴷ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. 
ⵎⵉⵏⵣⵉ ⵍⴻⵄⴷⵓ ⵉⵜⵜⴷⴰⵔⵔⴰⵛ ⵍⴻⵄⵎⴰⵔ ⵉⵏⵓ, ⵉⵄⴻⴼⴼⴻⵙ ⵅ ⵜⵓⴷⴰⵔⵜ ⵉⵏⵓ ⵖⴰⵔ ⵜⴻⵎⵎⵓⵔⵜ, ⵉⵙⵙⵣⴻⴷⴷⴻⵖ ⴰⵢⵉ ⴷⴻⴳ ⵉⵎⵓⵛⴰⵏ ⵏ ⵟⵟⵍⴰⵎ, ⴰⵎ ⵢⵉⵏⵏⵉ ⵉⵎⵎⵓⵜⴻⵏ ⵣⵉ ⵎⴻⵛⵃⴰⵍ ⵓⵢⴰ. 
ⴱⵓⵃⴱⴻⵍ ⵉⵏⵓ ⵉⵜⵜⴻⴼⵛⵉⵍ ⵅⴰⴼⵉ, ⵓⵍ ⵉⵏⵓ ⵢⴰⵔⴻⵡⵡⴻⵄ ⴷⵉ ⴷⴰⵅⴻⵍ ⵉⵏⵓ. 
ⵏⴻⵛⵛ ⵜⵜⵄⴻⵇⵍⴻⵖ ⵅ ⵡⵓⵙⵙⴰⵏ ⵉⵄⴷⵓⵏ, ⵜⵜⵅⴻⵎⵎⴰⵎⴻⵖ ⴷⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵛ, ⵜⵜⵅⴰⵔⵔⵚⴻⵖ ⴷⵉ ⵍⴻⴼⵄⴰⵢⴻⵍ ⵏ ⵉⴼⴰⵙⵙⴻⵏ ⵏⵏⴻⵛ. 
ⵏⴻⵛⵛ ⵜⵜⴱⴻⵣⵣⵄⴻⵖ ⵉⴼⴰⵙⵙⴻⵏ ⵉⵏⵓ ⵖⴰⵔⴻⴽ, ⵍⴻⵄⵎⴰⵔ ⵉⵏⵓ ⴰⵇⴰ-ⵜ ⵣⵣⴰⵜⴻⴽ ⴰⵎ ⵉⵛⵜ ⵏ ⵜⴻⵎⵎⵓⵔⵜ ⵉⴼⴼⵓⴷⴻⵏ. ⵙⵉⵍⴰⵀ. 
ⴰⵔⵔ-ⴷⴷ ⵅⴰⴼⵉ ⴷⴻⵖⵢⴰ, ⴰ ⵙⵉⴷⵉ, ⴱⵓⵃⴱⴻⵍ ⵉⵏⵓ ⵉⵜⵜⴻⴼⵛⵉⵍ, ⵡⴰⵔ ⵙⵙⵏⵓⴼⴼⴰⵔⴰ ⵓⴷⴻⵎ ⵏⵏⴻⵛ ⵣⵣⴰⵢⵉ, ⵎⴰⵃⴻⵏⴷ ⵡⴰⵔ ⴷⴷⵉⴽⴽⵡⵉⵍⴻⵖ ⴰⵎ ⵢⵉⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ. 
ⴻⵊⵊ ⴰⵢⵉ ⴰⴷ ⵙⵍⴻⵖ ⵉ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵖⴰⵔ ⵜⴻⴼⴼⵓⵜ, ⵎⴰⵖⴰⵔ ⵜⵜⴻⵛⵍⴻⵖ ⵅⴰⴽ. ⵙⵛⴻⵏ ⴰⵢⵉ ⴰⴱⵔⵉⴷ ⵉ ⵖⴰ ⵓⵢⵓⵔⴻⵖ, ⵎⴰⵖⴰⵔ ⵙⵙⴳⴻⵄⵄⴷⴻⵖ ⵍⴻⵄⵎⴰⵔ ⵉⵏⵓ ⵖⴰⵔⴻⴽ. 
ⴰ ⵙⵉⴷⵉ, ⴽⴽⴻⵙ ⴰⵢⵉ ⵉ ⵍⵄⴻⴷⵢⴰⵏ ⵉⵏⵓ, ⵖⴰⵔⴻⴽ ⵉ ⵖⴰ ⴰⵔⴻⵡⵍⴻⵖ. 
ⵙⴻⵍⵎⴻⴷ ⴰⵢⵉ ⴰⴷ ⴳⴳⴻⵖ ⵎⵉⵏ ⵉⴵⴰⵏ ⵉ ⴰⵔⴹⴰ ⵏⵏⴻⵛ, ⵎⴰⵖⴰⵔ ⵛⴻⴽ ⴷ ⴰⵔⴻⴱⴱⵉ ⵉⵏⵓ. ⴻⵊⵊ ⴰⵔⵔⵓⵃ ⵏⵏⴻⵛ ⵉⵚⴻⴱⵃⴻⵏ ⴰⴷ ⴰⵢⵉ ⵉⵏⴷⴻⵀ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉⵡⴰⵟⴰⵏ. 
ⴰ ⵙⵉⴷⵉ, ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵛ. ⵙ ⵜⵙⴻⴳⴷⴰ ⵏⵏⴻⵛ, ⵙⵓⴼⴼⴻⵖ ⵍⴻⵄⵎⴰⵔ ⵉⵏⵓ ⵣⵉ ⵍⴻⵃⵚⴰⵔⴻⵜ, 
ⴰⵔⴻⴷⴷⴻⴵ ⵍⵄⴻⴷⵢⴰⵏ ⵉⵏⵓ ⴷⵉ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⵇⴹⴰ ⵅ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ, ⵎⴰⵖⴰⵔ ⵏⴻⵛⵛ ⴷ ⵓⵎⵙⴻⵅⵅⴰⵔ ⵏⵏⴻⵛ. 
