﻿ⵉⵥⴻⵀⵀⵉⴷⴻⵏ.
140.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ. 
ⴼⴻⴽⴽ ⴰⵢⵉ ⵣⵉ ⴱⵏⴰⴷⴻⵎ ⴷ ⴰⵄⴻⴼⴼⴰⵏ, ⴰ ⵙⵉⴷⵉ, ⵃⴹⴰ ⴰⵢⵉ ⵣⴻⴳ ⵡⴻⵔⵢⴰⵣ ⵏ ⵍⵄⵓⵏⴼ, 
ⵣⴻⴳ ⵢⵉⵏⵏⵉ ⵉⵜⵜⵅⴰⵔⵔⴰⵚⴻⵏ ⴷⴻⴳ ⵡⵓⵍ ⵏⵙⴻⵏ ⴷⵉ ⵍⵖⴰⵔ, ⵓ ⵙⵙⴻⴽⴽⴰⵔⴻⵏ ⵉⵎⴻⵏⵖⴰⵏ ⴷⵉ ⵎⴰⵔⵔⴰ ⵓⵙⵙⴰⵏ. 
ⵏⵉⵜⵏⵉ ⵙⵙⵇⴻⴹⵄⴻⵏ ⵉⵍⵙⴰⵡⴻⵏ ⵏⵙⴻⵏ ⴰⵎ ⵢⵉⵊⵊ ⵏ ⵓⴼⵉⵖⴰⵔ, ⵙⵙⴻⵎ ⵉⵃⵎⴰ ⴰⵇⴰ-ⵜ ⵙⴰⴷⵓ ⵉⵢⴻⵏⵛⵉⵛⴻⵏ ⵏⵙⴻⵏ. ⵙⵉⵍⴰⵀ. 
ⵃⴹⴰ ⵅⴰⴼⵉ, ⴰ ⵙⵉⴷⵉ, ⵣⴻⴳ ⵉⴼⴰⵙⵙⴻⵏ ⵏ ⵉⵄⴻⴼⴼⴰⵏⴻⵏ, ⵃⴹⴰ ⴰⵢⵉ ⵣⴻⴳ ⵉⵔⵢⴰⵣⴻⵏ ⵏ ⵍⵄⵓⵏⴼ, ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ. 
ⴰⵢⵜ ⵏ ⴱⵓ-ⵏⵏⴼⴰⵅⴻⵜ ⵙⵙⵏⵓⴼⴼⴰⵔⴻⵏ ⵅⴰⴼⵉ ⵉⵊⵊ ⵏ ⵍⴼⴻⵅ, ⵜⵜⴱⴻⵣⵣⴰⵄⴻⵏ ⵜⵉⵙⴻⵖⵡⵉⵏ ⴰⵎ ⵢⵉⵛⵜ ⵏ ⵜⵔⴰⵛⵛⴰ ⵖⴰⵔ ⵓⵖⴻⵣⴷⵉⵙ ⵏ ⵓⵎⴻⵙⵔⴰⵇ, ⴰⵇⴰ ⵜⵜⴻⴳⴳⴻⵏ ⴰⵢⵉ ⵜⵉⵅⴻⴼⵛⵉⵏ. ⵙⵉⵍⴰⵀ. 
ⵏⴻⵛⵛ ⵏⵏⵉⵖ ⵉ ⵙⵉⴷⵉ: “ⵛⴻⴽ ⴷ ⴰⵔⴻⴱⴱⵉ ⵉⵏⵓ!” ⵙⴻⵍ, ⴰ ⵙⵉⴷⵉ, ⵖⴰⵔ ⵜⵎⵉⵊⵊⴰ ⵏ ⵜⵓⵜⵔⴰ ⵉⵏⵓ. 
ⴰ ⵙⵉⴷⵉ, ⵙⵉⴷⵉ ⵉⵏⵓ, ⵊⵊⴻⵀⴷ ⵏ ⵓⵙⴻⵏⵊⴻⵎ ⵉⵏⵓ, ⴷⴻⵍ ⴰⵣⴻⴵⵉⴼ ⵉⵏⵓ ⴷⴻⴳ ⵡⴰⵙⵙ ⵏ ⵍⵃⴻⵙⵙ ⵏ ⵍⴻⵙⵏⴰⵃ. 
ⴰ ⵙⵉⴷⵉ, ⵡⴰⵔ ⵜⵜⴻⵊⵊⵉ ⴰⵄⴻⴼⴼⴰⵏ ⴰⴷ ⵢⴰⵔⵔ ⵎⴻⵥⵔⵉ. ⵡⴰⵔ ⵜⵜⴻⴳⴳ ⵜⵜⴰⵙⵉⵄ ⵉ ⵡⴻⵏⵡⴰⵢ ⵏⵏⴻⵙ ⵉⵄⴻⴼⴼⵏⴻⵏ, ⴰⵍⴰⵎⵉ ⵖⴰ ⵙⵙⵄⵓⴵⴻⵏ ⵉⵅⴻⴼ ⵏⵙⴻⵏ. ⵙⵉⵍⴰⵀ. 
ⵅ ⵓⵣⴻⴵⵉⴼ ⵏ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ, ⵉⵍⵉ ⴰⴷ ⵜⴻⵏ ⵉⴷⴻⵍ ⵓⵛⴻⵇⵇⴻⴼ ⵏ ⵉⵢⴻⵏⵛⵉⵛⴻⵏ ⵏⵙⴻⵏ, 
ⴻⵊⵊ ⴰⴷ ⵅⴰⵙⴻⵏ ⴽⴻⴱⴱⴻⵏ ⵍⴻⴼⵃⴻⵎ, ⵉⵍⵉ ⵏⴻⵜⵜⴰ ⴰⴷ ⵜⴻⵏ ⵉⵖⴹⴻⵔ ⴷⵉ ⵜⵎⴻⵙⵙⵉ, ⴷⵉ ⵍⵃⴻⵎⵍⴰⵜ ⵢⵓⴵⵖⴻⵏ, ⵃⵉⵎⴰ ⵡⴰⵔ ⵜⵜⴻⴽⴽⴰⵔⴻⵏ ⵄⴰⴷ. 
ⴻⵊⵊ ⴰⵔⵢⴰⵣ ⵉ ⵉⵛⴻⵇⵇⴼⴻⵏ ⵙ ⵢⵉⵍⴻⵙ ⵡⴰⵔ ⵉⵜⵜⵖⵉⵎⵉ ⵉⴱⴻⴷⴷ ⵅ ⵜⴻⵎⵎⵓⵔⵜ, ⴻⵊⵊ ⴰⴷ ⵉⵄⴰⵔⵏ ⵍⵖⴰⵔ ⴷⴻⵖⵢⴰ ⴰⵔⵢⴰⵣ ⴱⵓ-ⵍⴻⵅⵛⵓⵏⴻⵜ. 
ⵏⴻⵛⵛ ⵙⵙⵏⴻⵖ, ⴰⵇⴰ ⵙⵉⴷⵉ ⴰⴷ ⵉⵙⵙⴻⵇⴼⴻⵍ ⴷⴷⴻⵄⵡⴻⵜ ⵏ ⵍⵎⵓⵙⴰⴽⵉⵏ, ⵍⵃⴻⵇⵇ ⵏ ⵉⵎⴻⵣⵍⴰⴹ. 
ⵙ ⵜⵉⴷⴻⵜⵜ, ⵉⵎⵙⴻⴳⴳⴰⴷⴻⵏ ⴰⴷ ⵇⴰⴷⴰⵏ ⵉⵙⴻⵎ ⵏⵏⴻⵛ, ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵇⵇⵉⵎⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ. 
